Espoir FC yatewe mpaga eshanu kubera gukinisha umukinnyi Watanga Christian Milembe utari ufite ibyangombwa maze umwanya wa yo mu mikino ya kamarampaka "play-offs" mu gushaka amakipe azamuka mu Cyiciro cya Mbere uhabwa AS Muhanga.
Ni umwanzuro Ishyirahamwe ry'Umupira w'Amaguru mu Rwanda (FERWAFA) ryafatiye iyi kipe yo mu Karere ka Rusizi ku wa 20 Gicurasi 2024 nyuma y'ikirego cyatanzwe na AS Muhanga.
Mu ibaruwa FERWAFA yandikiye aya makipe yombi, yavuze ko yashingiye ku makuru yatanzwe na AS Muhanga.
Iti "yasuzumwe na Komisiyo y'amarushanwa igasanga hari umukinnyi wa Espoir FC witwa Christian Watanga Milembe ukina adafite icyangombwa kimwemerera gukina gitangwa na FERWAFA."
Yavuze ko imyanzuro y'iyi komisiyo yateranye ku wa Mbere tariki ya 20 Gicurasi yemeje ko Espoir FC iterwa mpaga mu mikino yose yakinnye.
Iti "yemeje ko Ikipe ya Espoir FC ikurwaho amanota atatu mu mikino yose ya Espoir FC uyu mukinnyi yagaragayemo uyu mwaka w'imikino wa 2023/24."
AS Muhanga yakurikiraga Espoir FC ya kabiri ku rutonde rw'amakipe abiri ya mbere azakina play-offs z'Icyiciro cya Kabiri, ari yo yahise ifata uwo mwanya ndetse izahura na Vision FC mu mukino wa mbere uteganyijwe ku wa 22 Gicurasi.
Espoir FC iahanwe mu gihe yari ifite 'licence' bigaragara ko imeze nk'izindi za FERWAFA ikoreshwa n'uyu mukinnyi byanzuwe ko nta cyangombwa cy'Ishyirahamwe ry'Umupira w'Amaguru mu Rwanda yagiraga.
Source : http://isimbi.rw/siporo/article/mpaga-5-espoir-fc-irarira-ayo-kwarika
