Mu rwego rwo gushimira uko Gasogi United yitwaye mu mwaka w'imikino wa 2023-24, umwe mu bakunzi ba yo yayiguriye ibikombe.
Ni nyuma y'uko iyi kipe isoje umwaka w'imikino amara masa kuko ibikombe bihatanirwa mu Rwanda, nta na kimwe yegukanye.
Nyuma y'umukino w'umunsi wa nyuma wo Gasogi United yakiriye ikanatsinda Etincelles FC 1-0, ni bwo habaye umuhango wo gushyikiriza iyi kipe ibikombe.
Mbere yo guhambwa ibikombe, umukunzi wa Gasogi United wabiguze, Ntakirutimana Aciel yabanje guhemba abakinnyi bitwaye neza aho Muderi Akbar, Hamis Kamis, umunyezamu Dauda Ibrahim n'umutoza Alain Kirasa bahawe imidali.
Uyu mufana akaba yahise anahemba perezida wa Gasogi United, Kakooza Nkuriza Charles [KNC] aho yamuhaye igikombe. Yanahise anaha iyi kipe igikombe mu rwego rwo kuyishimira uko yitwaye mu mwaka w'imikino wa 2023-24.
Gasogi United muri uyu mwaka w'imikino iri ku mwanya wa 9 n'amanota 36 akaba ari na wo yasorezaho mu gihe ejo Marines ifite 35 itatsinda Sunrise FC. Mu gikombe cy'Amahoro yaviriyemo muri 1/2 isezerewe na Police FC.
Source : http://isimbi.rw/siporo/article/nyuma-yo-kubura-na-kimwe-gasogi-united-yaguriwe-ibikombe-amafoto
