Ibi bizakorwa hazamurwa ubwikorezi burengera ibidukikije no guteza imbere ubuhinzi buhangana n'imihindagurikire y'ibihe, bikazatanga umusanzu ku Rwanda mu rugendo rwo kugera ku ntego zo guhangana n'ihindagurika ry'ibihe no kugera ku iterambere rirambye.
Mu iki cyiciro hazashorwa miliyari 2,7 Frw mu bigo by'ubucuruzi bito, ibiciriritse, ndetse n'ibyagutse, bikora ibijyanye no kubungabunga ibidukikije mu Rwanda.
Igice kimwe cyiri shoramari cyahariwe ibikorwa byo guteza imbere ubukungu bwisubira, kikaba cyaragenewe miliyoni 350 Frw azahabwa ibigo birindwi agatangwa nyuma y'amezi ane yo gutegura no guhugura ba nyiri mishinga.
Iri shoramari rikaba rizagirwamo uruhare n'ikigo cy'u Budage gishinzwe ubufatanye mpuzamahanga, GIZ Rwanda, binyuze mu mushinga wo kurengera ibidukikije n'ubukungu bwisubira [WCE].
Mu bigo birindwi byatoranyijwe, hari ibyibanda ku bice bitandukanye by'ubukungu bwisubira, birimo igabanya ry'imyanda y'ibiribwa, ikoreshwa neza ry'imyanda ikomoka ku binyabuzima no kunagura bateri zitagikoreshwa.
Ikindi gice ni icy'inkunga y'uburyo bwishyurwa n'ubutishyurwa ku bigo by'ubucuruzi bigitangira, ibito, ibiciriritse ndetse n'ibyagutse ya 2,350,000,000 Frw, izatangwa ku bufatanye n'Ikigo cy'Igihugu cya Denmark Gishinzwe Iterambere Mpuzamahanga [DANIDA], n'ibiro by'u Bwongereza bishinzwe ububanyi n'amahanga n'iterambere [FCDO].
Iyi nkunga izahabwa ibigo by'ubucuruzi icyenda bitanga ibisubizo mu nzego eshatu z'ishoramari zijyanye na gahunda ya Ireme Invest zirimo urw'ubwikorezi burengera ibidukikije, urwego rw'imiturire irengera ibidukikije kandi irambye, ndetse n'urwego rw'ubuhinzi buhangana n'imihindagurikire y'ibihe.
Muri rusange ibi bigo by'ubucuruzi 16 byatoranyijwe guhabwa inkunga byakorewe isuzuma ryimbitse bigaragaza ko bifite ubushobozi bwo kwagura ibikorwa byabyo kugira ngo birusheho gutanga umusanzu mu iterambere no kurengera ibidukikije ndetse no guhangana n'imihindagurikire y'ibihe mu Rwanda.
Ireme Invest ni ikigega cy'ishoramari gitera inkunga abikorera mu Rwanda, kikabafasha kubona imari yo kwagura imishinga ijyanye no kubungabunga ibidukikije.
Ireme Invest yamuritswe na Perezida Paul Kagame mu 2022, ubwo yari muri Sharm el Sheikh mu Misiri mu nama mpuzamahanga yiga ku guhangana n'imihindagurikire y'ibihe, COP27.
Yashyizweho hu bufatanye n'abafatanyabikorwa barimo Guverinoma z'u Bufaransa, Suède n'u Bwongereza, Banki y'Ishoramari y'u Burayi [EIB] na Green Climate Partnership Fund, ndetse ikaba inakorana n'abandi batandukanye.
