Abakandida batatu: Kagame Paul watanzwe n'umuryango FPR- Inkotanyi, Habineza Frank watanzwe n'Ishyaka Riharanira Demokarasi no kurengera ibudukikije mu Rwanda (DGPR) ndetse n'umukandida wigenga ariwe Mpayimana Phillippe, ni bo basohotse ku rutonde ntakuka rw'abemerewe guhatanira umwanya w'Umukuru w'Igihugu.
Byatangajwe na Oda Gasinzigwa Umuyobozi wa Komisiyo y'Igihugu y'Amatora (NEC), kuri uyu wa Gatanu tariki 14 Kamena 2024, mu kiganiro cyatambutse imbona nkubone kuri Televiziyo Rwanda, ni nyuma y'uko ku wa 6 Kamena 2024, hasohotse urutonde rw'agateganyo.
Uru rutonde ntakuka rwatangajwe hashingiwe ku Itegeko Nshinga rya Repubulika y'u Rwanda mu ngingo yaryo ya 99 iteganya ibisabwa Umukandida ku mwanya wa Perezida wa Repubulika; Hashingiwe na none ku Itegeko Ngenga N° 001/2019.OL ryo ku wa 29/07/2019 rigenga amatora nk'uko ryavuguruwe, mu ngingo zaryo iya 73, iya 74, iya 75, iya 81, iya 82, iya 83, iya 84, iya 85, iya 86 n'iya 88; Hanashingiwe kandi ku Mabwiriza ya Komisiyo y'Igihugu y'Amatora N˚ 001/24 yo ku wa 19/02/2024 agenga amatora ya Perezida wa Repubulika n'ay'Abadepite yo mu mwaka wa 2024 mu ngingo zayo, iya 62, iya 63 n'iya 64.
The post Komisiyo y'Igihugu y'Amatora (NEC) yatangaje urutonde ntakuka rw'abemerewe guhatanira umwanya w'Umukuru w'Igihugu appeared first on KASUKUMEDIA.COM.
