Umupolisi ukomeye ku rwego rwo hejuru wo mu gihugu cya Kenya yishwe arashwe nyuma y'uko arashe umucamanza mu rukiko mu murwa mukuru wa Nairobi.
Uyu mupolisi w'ipeti rya 'Chief Inspector of Police' (CIP) yarashe umucamanza mukuru Monica Kivuti wo mu rukiko rwa Makadara, nyuma gato yuko afashe icyemezo mu rubanza amakuru avuga ko umugore we aregwamo, icyemezo beshi bakeka ko kitamushimishije.
Bivugwa ko uwo mupolisi w'igikomerezwa yarakajwe n'icyemezo cy'urukiko cyo kuburizamo gufungurwa by'agateganyo kw'umugore we nyuma y'uko yari yarabuze.
Uwo mupolisi mukuru, watangajwe ko yitwa Kipchirchir Kipruto, ukuriye stasiyo ya polisi yo mu mujyi wa Londiani, mu burengerazuba bwa Kenya, yahise asohora imbunda arasa umucamanza, aramukomeretsa.
Abandi bapolisi bakuru bari bari mu rukiko basubije ako kanya, umwe muri bo arasa uwo mupolisi mukuru watangiye kurasa, aramwica ako kanya.
Muri uko kurasana, abandi bapolisi bakuru batatu bakomeretse, nkuko bikubiye muri raporo ya polisi y'ukuntu byagenze. Uwo mucamanza n'abapolisi bakuru bakomeretse barimo kuvurirwa mu bitaro.
Urwego rw'ubucamanza rwa Kenya rwavuze ko uwo mucamanza 'yasheshe kurekurwa by'agateganyo hatanzwe ingwate ku muntu ushinjwa utaritabye urukiko ndetse wari wananiwe gutanga ibisobanuro bishimishije ku kutitaba urukiko'.
Itangazo ry'urwo rwego ryagize riti: 'Ako kanya iki cyemezo kigitangazwa, umuntu yarashe umucamanza amukomeretsa mu mayunguyungu.'
Iryo tangazo ryavuze ko amakuru y'ibanze avuga ko 'uwarashe ari umupolisi mukuru washakanye n'ucyekwa'.
Polisi ya Kenya yavuze ko uwo mupolisi mukuru yari ari mu rukiko 'ku mpamvu zitazwi'.
Polisi ya Kenya yavuze ko iperereza rikomeje kugira ngo hamenyekane icyateje uko kurasa.
Urwego rw'ubucamanza rwavuze ko ruzavugurura ingamba z'umutekano ndetse rwijeje umutekano abakozi bo mu bucamanza n'abandi bagana inkiko.
Umwanditsi mukuru w'ubucamanza Winfridah Mokaya yagize ati: 'Nk'umuryango w'ubucamanza, twifurije mugenzi wacu gukira vuba. Tunihanganishije umuryango w'umupolisi mukuru wapfiriye muri ibi byabaye bibabaje.'
The post Umupolisi ukomeye muri Kenya yapfuye arasiwe mu rukiko azira iki? appeared first on KASUKUMEDIA.COM.
Source : https://kasukumedia.com/umupolisi-ukomeye-muri-kenya-yapfuye-arasiwe-mu-rukiko-azira-iki/
