Espagne yegukanye Euro ya 2024 - #rwanda #RwOT

Uko Umukino wagenze umunota ku munota:

Umukino urangiye ikipe y'igihugu ya Espagne itsinze u Bwongereza ibitego 2-1 ihita yegukana igikombe cya Euro ya 2024 kiba icya 4 yegukanye mu mateka yayo

90+2' Ikipe y'igihugu y'u Bwongereza iri gusatira ishaka uko yakwishyura ariko byanze

Umukino wongeweho iminota 4

89' Dani Olmo arokoye Espagne akuramo igitego cyabazwe ku mupira warutewe na Ivan Toney 

86' Ikipe y'igihugu ya Espagne ibonye igitego cya 2 gitsinzwe na Mikel Oyarzabal  ku mupira yarahawe na Marc Cucurella 

83' Luis de la Fuente akuyemo Robin Le Normand hajyamo Nacho 

81' Espagne ikomeje kwatsa umuriro imbere y'izamu ry'u Bwongereza, Nico Williams ahaye umupira Lamine Yamal arekura ishoti ariko Jordan Pickford aratabara 

77' Nyuma yo kwishyurwa ikipe y'igihugu ya Espagne irimo irashaka igitego cya 2, Nico Williams yari ahinduye umupira ashaka umutwe wa Mikel Oyarzabal ariko birangira Stones awushyize muri koroneri itagize icyo itanga 

72' Ikipe y'igihugu y'u Bwongereza ibonye igitego cyo kwishyura gitsinzwe na Cole Palmer ku mupira mwiza yarahawe na Jude Bellingham 

69' u Bwongereza nabwo bukoze impinduka mu kibuga havamo Kobbie Mainoo hajyamo Cole Palmer 

67'' Espagne ikoze impinduka mu kibuga ikuramo Alvaro Morata hajyamo Mikel Oyarzabal 

66' Lamine Yamal yari yongeye guhemukira u Bwongereza ku mupira yarahawe na Dani Olmo ariko arekuye ishoti birangira Jordan Pickford ashyize umupira muri koroneri 

62' Ikipe y'igihugu y'u Bwongereza ibonye kufura yari iteretse ahantu heza ku ikosa Nico Williams yari akoreye Bukayo Saka ariko itewe na Phil Foden ntiyagira icyo itanga 

60' Gareth Southgate akoze impinduka mu kibuga akuramo Harry Kane ashyiramo Ollie Watkins 

54' Nyuma yo kubona igitego ikipe y'igihugu ya Espagne ikomeje kwatsa umuriro imbere y'izamu ry'u Bwongereza, uwitwa Alvaro Morata ahawe umupira mwiza na Lamine Yamal awuhinduriye mu izamu birangira Luke Shaw atabaye 

48' Ikipe y'igihugu ya Espagne yaribonye igitego cya 2 ku mupira Nico Williams yarahaye Dani Olmo ari imbere y'izamu ariko arekuye ishoti birangira rinyuze hepfo y'izamu 

46' Ikipe y'igihugu ya Espagne ifunguye amazamu ku gitego  gitsinzwe na Nico Williams ku mupira yarahawe na Lamine Yamal 

Igice cya kabiri gitangiye umutoza w'ikipe y'igihugu ya Espagne Luis de la Fuente akora impinduka mu kibuga akuramo Rodri wagize ikibazo cy'imvune ashyiramo Martin Zubimendi 

Igice cya mbere kirangiye amakipe yombi anganya 0-0

45+1' Phil Foden yarakoze akantu ku mupira waruturutse kuri kufura ariko Unai Saimon aba maso 

Igice cya mbere cyongeweho iminota 2 

42' Rutahizamu akaba na kapiteni w'ikipe y'igihugu ya Espagne, Alvaro Morata arase uburyo bwashoboraga kuvamo igitego ku mupira yarahawe na Nico Williams ariko birangira Marc Guehi amwitambitse abura uko arekura ishoti 

37' Ikipe y'igihugu ya Espagne yongeye kwiharira umupira cyane gusa kubona aho imenera byabaye ikibazo 

31' Dani Olmo akoreye ikosa Declan Rice mu rubuga rw'u Bwongereza ndetse bituma anahabwa ikarita y'umuhondo 

27' Ba myugariro b'ikipe y'igihugu y'u Bwongereza bimye umwanya wo gushoteramo abasore ba Espagne,uwitwa Fabian Luiz aracenze agiye kurekura ishoti ryashoboroga guteza ibibazo gusa birangira Marc Guehi aryitambitse umunyezamu ahita arifata

22' Lamine Yamal yari agerageje guhindura umupira ashaka Daniel Olmo gusa birarangira Jordan Pickford asohotse arawufata

18" Amakipe yombi yakaniye umukino nta n'imwe iri gushaka gukora amakosa , Abasore ba Espagne barimo Nico Williams bari kubona imipira bagerageza gucenga ariko ba myugariro b'u Bwongereza bakayibakuraho

15' Ikipe y'igihugu y'u Bwongereza nayo  itangiye  gusatira cyane cyane icungira ku kwirukankana imipira, Kayle Walker awuzamukanye yiruka ageze imbere y'izamu arawuhindura ariko birangira Aymeric Laporte atabaye 

12' Nico Williams azamukanye umupira acenga yinjira mu rubuga rw'amahina agiye kurekura ishoti mu izamu birangira Stones atabaye ashyira umupira muri koroneri 

10' Ikipe y'igihugu y'u Bwongereza yaribonye amahirwe ya mbere imbere y'izamu rya Espagne kuri kufura yaritewe ariko birangira umusifuzi avuze ko uwitwa Marc Guehi yakoze amakosa 

6' Ikipe y'igihugu y'u Bwongereza yabuze umupira kuko uri guhererekanywa n'abasore ba Espagne gusa 

4' Nico Williams ahinduye umupira mwiza washoboraga guteza ibibazo u Bwongereza ariko birangira Stones awushyize muri koroneri itagize icyo itanga 

3' Ikipe y'igihugu ya Espagne niyo ifite umupira ihererekanya neza ariko ikabikorera mu rubuga rwayo

1'Umukino utangijwe n'ikipe y'igihugu ya Espagne ariko ntabwo itindanye umupira 

Abakinnyi 11 ba Espagne babanje mu kibuga:

Simon

Carvajal

Le Normand

Laporte

Cucurella

Rodri

Ruiz

Yamal

Olmo

Williams

Morata

Abakinnyi 11 b'u Bwongereza babanje mu kibuga:

Pickford

Walker

Stones

Guehi

Saka

Mainoo

Rice

Shaw

Foden

Bellingham

Kane

Ikipe y'igihugu ya Espagne batazira 'La Roja' yazamutse mu itsinda yarimo iriyoboye, ikaba yarikumwe n'ikipe y'igihugu y'u Butaliyani, Croatia na Albania. Muri 1/8 yasezereye Georgia,muri 1/4 isezerera u Budage naho muri 1/2 isezerera ikipe y'igihugu y'u Bufaransa iyitsinze ibitego 2-1.

Biteganyijwe ko Lamine Yamal wujuje imyaka 17 ku munsi w'ejo ku wa Gatandatu ari buze kwandika amateka yo kuba umukinnyi ukiri muto ukinnye umukino wa nyuma w'irushanwa rikomeye rihuza amakipe y'ibihugu (Euro cyangwa igikombe cy'Isi) nyuma ya Pelé wari ufite aka gahigo aho aho yari yarakinnye umukino wa nyuma w'igikombe cy'Isi cyo mu 1958 afite imyaka 17 n'iminsi 249.

Igitego uyu mukinnyi yatsinze bakina n'u Bufaransa muri 1/2 cyatumye ahita aba umukinnyi ukiri muto utsinze muri Euro ndetse amaze no gutanga imipira 3 yavuyemo ibitego,ibintu bitari byarakozwe n'undi mukinnyi wese wa Espagne muri Euro imwe.

Ikipe y'igihugu ya Espagne irakina uyu mukino ishaka igikombe cya 4 cya Euro nyuma yicyo yegukanye mu 1964,2008 ndetse n'icyo muri 2012. Mu gihe yacyegukana niyo yaba ifite ibi bikombe byinshi mu mateka.

Espagne mu mateka yayo yatsinzwe rimwe yageze ku mukino wa nyuma,icyo gihe hari mu 1984 ikaba yaratsinzwe n'u Bufaransa.

Umutoza wa Espagne,De la Fuente agiye gutoza uyu mukino afite imyaka 63 ndetse n'iminsi 23 akaba ariwe mutoza w'ikipe y'igihugu ugiye gutoza umukino wa nyuma wa Euro akuze nyuma ya Luis Aragonés watoje Espagne muri 2008 afite imyaka 69 n'iminsi 337 na Otto Rehhagel watoje Ubugereki muri 2004 afite imyaka 65 n'iminsi 330 ndetse Bose byarangiye begukanye igikombe.

Ikipe y'igihugu y'u Bwongereza yo ntabwo izi uko iki gikombe gisa usibye kuba yarageze ku mukino wa nyuma wa Euro ya 2020 iheruka.

Uyu niwo mukino wa nyuma mu marushanwa akomeye u Bwongereza bugiye gukina butari mu rugo. Umukino wa nyuma wa Euro ya 2020 bari mu rugo ndetse n'igikombe cy'Isi cyo mu 1966 nabwo bari mu rugo kuri Wembley Stadium.

Intare 3 nk'uko bakunda kuyita ifite imibare myiza mu mu murwa mukuru w'u Budage i Berlin ahari bubere umukino kuko mu mikino 6 imaze kuhakinira yatsinzemo 4 banganya 2.

Iyi kipe y'igihugu yazamutse ari iya mbere mu itsinda ryarimo Serbia, Denmark na Slovenia. Muri 1/8 yasezereye Slovakia, muri 1/4 isezerera u Busuwisi mu gihe muri 1/2 yasezereye u Buhorandi ibutsinze ibitego 2-1.

U Bwongereza ntabwo buratsindwa mu mikino 6 iheruka ya Euro mu gihe bwinjijwe igitego mbere ndetse nta n'indi kipe irabikora.

Gareth Southgate utoza u Bwongereza ni umutoza wa 3 ugeze ku mukino wa nyuma wa Euro inshuro irenze imwe nyuma ya Helmut Schön wahageze mu 1972 no 1976 ndetse na Berti Vogts wahageze mu 1992 no 1996. Bose bagiye bahagera bikurikiranya Kandi nta n'umwe wigeze uhatsindirwa kabiri.

Ni inshuro ya Gatatu muri Euro Espagne iri kumwanya wa 8 ku rutonde ngarukakwezi rw'impuzamashyirahamwe y'umupira w'amaguru ku Isi(FIFA) igiye guhura n'u Bwongereza bwo buri ku mwanya wa 5.

Bahuriye mu itsinda rimwe mu 1980 birangira ikipe y'igihugu y'u Bwongereza ariyo itsinze ibitego 2-1, mu gihe undi wabahuje hari muri 1/8 birangira banganyije 0-0 ariko n'ubundi u Bwongereza bukomeza kuri penariti 4-2.

Mu mukino uheruka kubahuza hari mu irushanwa rya UEFA Nations muri 2018 , ikipe y'igihugu y'u Bwongereza yatsinze iya Espagne ibitego 3-2. Ni ibitego bya Raheem Sterling wari watsinze 2 ndetse na Marcus Rashford mu gihe ibya Espagne byo byari byatsinzwe na Sergio Ramos ndetse na Paco Alcácer.

Mu marushanwa yose bombi bamaze guhura imikino 27, Espagne ikaba yaratsinzemo imikino 10 mu gihe u Bwongereza bwo bwatsinzemo imikino 13 banganya 4..

Source : https://inyarwanda.com/inkuru/144949/live-espagne-igiye-gucakirana-nu-bwongereza-ku-mukino-wa-nyuma-wa-euro-144949.html