Areruya Joseph ukinira Java-InovoTec, wabaye umukinnyi mwiza w'umwaka muri Afurika mu 2018, ashobora guhagarika gukina umukino w'amagare kuri iki Cyumweru nyuma yo gukina isiganwa rya Kirehe Race 2024.
Aya makuru yatangajwe n'Ikipe ya Java-InovoTec ku mugoroba wo ku wa Gatandatu nyuma y'uko Areruya yabaye uwa kabiri ku munsi wa mbere wa Kirehe Race 2024, yasizwe umunota umwe n'amasegonda 49 na Muhoza Eric watsindiye i Kirehe.
Ibinyujije ku rubuga rwa X [yahoze ari Twitter], iyi kipe izongera gukina mu 2025 iri mu cyiciro cya gatatu cy'amakipe yabigize umwuga ku Isi, yagize iti 'Iri rishobora kuba isiganwa rya nyuma kuri Areruya Joseph nk'umukinnyi w'amagare wabigize umwuga. Mu kwezi gutaha tuzatangaza inshingano ze nshya muri kompanyi'.
Ku myaka 28 yamavuko, ari mu bakinnyi b'Abanyarwanda bakomeye kandi bubatse ibigwi mu mukino w'amagare haba mu Rwanda ndetse no muri Afurika. Areruya ni umwe mu bakinnyi batangiranye n'Ikipe ya Java-InovoTec muri Mutarama 2023. Yegukanye Tour du Rwanda ya 2017, mu 2018 yegukana La Tropicale Amissa Bongo yo muri Gabon na Tour de l'Espoir yo muri Cameroun.
The post Gusezera umukino w'amagare kwa Areruya Joseph appeared first on KASUKUMEDIA.COM.
Source : https://kasukumedia.com/gusezera-umukino-wamagare-kwa-areruya-joseph/
