Ni ibirori byabaye mu mugoroba wo kuri uyu wa 15 Ugushyingo 2024, hagarukwa ku bihe byaranze imyaka 25 Rotary Club Kigali Mont Jali imaze ibayeho ifasha mu gukemura ibibazo by'Abanyarwanda.
Mu bikorwa yakoze harimo ibijyanye n'uburezi, gutanga amazi meza, kubungabunga ibidukikije n'ibindi bigamije kuzamura imibereho y'Abanyarwanda muri rusange.
Ifatanya n'izindi kuko ubu mu Rwanda hari Clubs 11, buri yose ikagira ibikorwa igenda ikorera mu baturage bijyanye n'ibyo uyu muryango ku rwego mpuzamahanga wagiye ushyiraho bose bakabikurikiza.
Perezida wa Ratary Club Kigali Mont Jali, Freddy Mutanguha, yavuze ko mu myaka 25 bamaze, bakomeje kugendera mu murongo wo kwishakamo ibisubizo mbere yo kujya gukomanga ahandi.
Ati 'Kuba tumaze imyaka 25 bituma tureba inyuma tukareba aho twavuye nk'umuryango wagiye ufasha sosiyete mu buryo butandukanye, tugafatanya n'ubuyobozi bw'igihugu cyacu kugira ngo tugende dutanga ibisubizo ku bibazo Abanyarwanda bahura na byo ariko tukagenda tubyikemurira kuko birazwi ko mu gihe hari ikibazo, Abanyarwanda turi aba mbere kwishakamo ibisubizo.'
Yahamije ko muri iki gihe bizihiza imyaka 25 hari imishinga itatu biyemeje gushyiramo imbaraga kugira ngo bafashe abantu bafite ingorane mu buzima bwabo.
Iyi irimo uwo gufasha abafite ubumuga bw'uruhu bahura n'ibyago bitandukanye nk'iyo bari ku izuba kuko uruhu rwabo rutabasha kuryihanganira, rugacika ibisebe ndetse bikazavamo n'uburwayi bwa kanseri.
Ati 'Twiyemeje rero ko twabafasha kugira ngo bashobore kurinda umubiri wabo cyane cyane dushaka amavuta yabugenewe kugira ngo basige ku mubiri wabo izuba ntirikomeze kuwangiza, bagira n'ikibazo gikomeye cyo kureba kure, twashatse abaganga batandukanye barimo inzobere zo kuvura amaso bareba amaso yabo aho ageze mu kureba kure, twifuza rero mu byo turimo gukora mu bukangurambaga twatangiye uyu munsi, kugira ngo dushobore kubagurira 'lunettes' zishobora gutuma bareba neza.'
Mutanguha yavuze ko abana bafite ubumuga bw'uruhu bakunda kunanirwa kwiga ndetse bamwe bakava mu ishuri kuko baba batabasha kureba ku kibaho bigatuma badindira mu masomo.
Ati 'Ni ikintu cyadukoze ku mutima, ko mu gihe bazaba bari mu ishuri bashobora kureba ku kibaho nk'abandi bana, bashobora gusoma nk'abandi kuko twasanze abenshi muri bo baradindira mu kwiga.'
Mutanguha kandi avuga ko hari abantu usanga iyo babyaye abana bafite ubumuga bw'uruhu bibatera ipfunwe nyamara na bo ari abana nk'abandi bakwiye uburenganzira bungana aho kubaheza.
Undi mushinga ni uwo gufasha ikigo cya Autism Rwanda gifasha abana bavukanye ubumuga bwo mu mutwe kuko basanze umubyeyi ubafasha afite ingorane z'ubushobozi buterwa n'uko ibyo uburezi bw'abo bana busaba ababyeyi batabasha kubyishyura.
Ati 'Aba bana nubwo bavutse bafite ubumuga bikanabagora kubasha kwisanzurana n'abandi, ariko biirashoboka ko bakwiga bakamenya ubwenge kuko ntabwo ari ubumuga. Iryo shuri twifuza kurifasha kugira ngo na bo bashobore gufasha abandi babyeyi kuko harimo ikibazo ko ibyo bakeneye birenze iby'amashuri atandukanye n'ubushobozi baba bakeneye buba ari bwinshi.'
Yanavuze ko bateganyije gufasha urubyiruko rwahuye n'ibyago byo gufungwa bakazakorana n'abayobozi b'amagororero ku buryo rwakwigishwa imyuga irimo ubudozi, rukazavayo ruhabwa imashini zibafasha kwiteza imbere, bikanagabanya imibare y'abongera kujya mu bikorwa bibasubiza mu byaha.
Igikorwa cy'ubukangurambaga batangiye kuri uyu wa 15 Ugushyingo 2024, kizamara amezi ane hakusanywa miliyoni 100 Frw azafasha mu gushyira mu bikorwa iyi mishinga.
Abanyamuryango ba Rotary Club Kigali Mont Jali n'izindi bahise batangira ibikorwa byo gutanga inkunga yabo ngo bikorwe byihuse kuko bifitiye igihugu akamaro.
Rotary Club Kigali Mont Jali igizwe n'abanyamuryango 44, barimo bane bashya bakiriwe kuri uyu munsi. Abo ni Akbar Mbirizi, Alphonse Munyantwali, Dr. King Rugagi Kayondo na Jimmy Karangwa.
Amafoto:Kwizera Herve
