Florentino Perez, Perezida wa Real Madrid, yongeye kugirirwa icyizere cyo kuyobora iyi kipe izwi cyane ku Isi mu mupira w'amaguru, aho yatorewe manda izarangira mu 2029. Ni umwe mu bayobozi bafite agatubutse kandi ari muri bamwe mu bakire bagezweho iki gihe bayoboye kandi bakinayoboye iyi kipe.
Perez yatangiye kuyobora Real Madrid bwa mbere mu 2000, akora ayobora manda y'imyaka itandatu kugeza mu 2006.
Yagarutse mu 2009, maze yongera kubaka izina rye nk'umuyobozi w'inkingi ya mwamba, wubakiye ku mishinga ikomeye yahinduye isura y'iyi kipe.
Mu gihe cye, yatanze umusanzu ukomeye mu gutuma Real Madrid iba ikipe ihatanira ibikombe bikomeye nka UEFA Champions League, aho yayitwaye inshuro nyinshi.
Ubushobozi bwe bwo kubona abakinnyi bakomeye nka Cristiano Ronaldo, Luka Modrić, na Karim Benzema, kimwe n'abandi bakinnyi b'icyitegererezo, bwatumye Real Madrid ihorana ku isonga mu mupira w'amaguru ku Isi.
Perez kandi yibukirwa cyane ku mishinga yo kubaka no kuvugurura stade Santiago Bernabéu, ubu iri mu zikomeye cyane ku Isi, ikagira uburyo bugezweho bwakira abafana mu buryo buhebuje.
Perez yavuze ko iyi manda nshya igamije gukomeza kunoza ibikorwa remezo by'ikipe no gushaka impano nshya z'abakinnyi bashya. Yagarutse ku gushimira abafana ba Real Madrid ku bwo kumuba hafi, avuga ko umusanzu wabo ariwo utuma iyi kipe ikomeza kuba ubukombe mu mupira w'amaguru.
Kongera gutorerwa kuyobora Real Madrid ni ikimenyetso cy'uko abafana n'abagize iyi kipe bemera icyerekezo Perez yahaye ikipe. Ni manda izibanda ku mishinga yo gutsinda ibikombe byinshi, guha amahirwe abakinnyi bato, no kuzamura icyubahiro cy'ikipe mu ruhando mpuzamahanga.
Source : https://kasukumedia.com/florentino-perez-yongeye-gutorerwa-kuyobora-real-madrid-kugeza-mu-2029/
