George Foreman, umwe mu banyabigwi mu mukino w'iteramakofe ku isi, yitabye Imana ku myaka 76. Umuryango we watangaje ko uyu mukinnyi wahize benshi mu myaka ye yitabye Imana mu ijoro ryo ku wa Gatanu, tariki ya 21 Werurwe 2025.
Foreman azwi cyane ku mateka akomeye yanditse mu mukino w'iteramakofe, cyane cyane ku mukino we w'ibihe byose wahuje na Muhammad Ali mu 1974 i Kinshasa muri Zaire, uzwi nka Rumble in the Jungle.
Uyu mukino wari witezwe na benshi, warangiye Foreman atsinzwe na Ali, ariko ntiwamuvukije kuba umwe mu banyabigwi bakomeye b'ibihe byose.
Foreman yatangiye urugendo rwe mu iteramakofe mu myaka ya za 1960, yegukana umudali wa zahabu mu Mikino Olempike ya 1968 i Mexico City.
Nyuma yaho, yinjiriye mu iteramakofe nk'uwabigize umwuga, atsindira bwa mbere igikombe cy'isi cy'abakinnyi baremerewe mu 1973, ubwo yatsindaga Joe Frazier.
Nyuma yo gutsindwa na Muhammad Ali, Foreman yagiye asezera no kugaruka mu mukino, aza gukora amateka mu 1994 ubwo yongera kwegukana igikombe cy'isi ku myaka 45, aba umukinnyi mukuru mu myaka wegukanye icyo gikombe.
Nyuma y'iyo ntsinzi, yaretse iteramakofe burundu maze yinjira mu bucuruzi, aho yagize izina rikomeye binyuze muri George Foreman Grill, ibikoresho byo guteka byamamaye ku isi.
Urupfu rwe ni igihombo gikomeye ku mukino w'iteramakofe no ku bakunzi bawo ku isi hose. Bamwe mu banyabigwi b'uyu mukino, barimo Mike Tyson na Lennox Lewis, bamwunamiye bamwita 'umwe mu bakomeye babayeho mu iteramakofe.'
Source : https://kasukumedia.com/umunyabigwi-mu-iteramakofe-george-foreman-yitabye-imana-ku-myaka-76/
