Imibare yashyizwe hanze na RBC ku wa 4 Mata 2025, igaragaza ko kuva mu myaka 13 ishize abagira ihungabana mu gihe cyo kwibuka mu Rwanda bari mu byiciro bine by'ingenzi.
Birimo icyo kuva mu 2010 kugeza mu 2015 aho imbare y'abagiraga ihungabana mu cyumweru cyo kwibuka yari hagati ya 3000 n'abarenga 4000.
Mu 2010 abagize ihungabana mu cyumweru cyo kwibuka bari 3.193, mu 2011 bagera kuri 4.363, bigeze mu 2012 baba 4.095.
Mu 2013 bari 3.702, mu 2014 baba 3.471, bigeze mu 2015 hongera kubarurwa abangana na 3.240 bagize ihungabana.
Icyiciro cya kabiri cy'abagize ihungabana mu cyumweru cyo kwibuka Jenoside yakorewe Abatutsi ni icyo kuva mu 2016 kugeza mu 2019. Icyo gihe abagize ihungabana buri mwaka bari hagati 2000 n'abarenga gato 3000.
Mu 2016 abahuye n'ihungabana mu gihe cyo kwibuka bari 2.554, mu 2017 baramanuka baba 2.043, bigeze mu 2018 bongera kuzamuka baba 2.628. Mu 2019 bongeye kugera ku 3.268.
Icyiciro cya gatatu cy'iyo mibare kirimo imyaka ibiri yo mu bihe bya Covid-19 aho umubare wagabanutse bitewe n'uko ibikorwa byo kwibuka byakozwe mu buryo budahuza abantu benshi.
Mu 2020 abahuye n'ihungabana mu cyumweru cyo kwibuka bari 696 bigeze mu 2021 baba 964.
Icyiciro cya kane cyo kirimo imyaka itatu iheruka ari na cyo kigaragaza ko mu myaka 13 ishize abantu bahungabanaga mu cyumweru cyo kwibuka abishwe muri Jenoside yakorewe Abatutsi bagabanyutseho ababarirwa mu 2000.
Mu 2022 abahuye n'ihungabana mu cyumweru cyo kwibuka ni 1.923, bigeze mu 2023 barazamuka baba 2.184 naho mu 2024 mu cyumweru cyo kwibuka bari 2.016.
Imibare ya RBC kandi igaragaza ko abo 2.016 bahuye n'ihungabana mu cyumweru cyo kwibuka mu 2024, muri bo abagera ku 1.403 bari hejuru y'imyaka 35 mu gihe abandi 464 bari hagati y'imyaka 25 na 35 naho abantu 140 bari hati y'imyaka 15 na 24 mu gihe abantu icyenda bari munsi y'imyaka 15.
Mu bahuye n'ihungabana mu 2024 kandi higanjemo abagore kuko bihariye 89% bangana n'abantu 1.786 mu gihe abagabo bagize 11% bangana n'abantu 230.
RBC igaragaza ko ibyo bidasobanuye ko abagabo badahura n'ihungabana cyane ahubwo ko bo badakunda kurigaragaza nk'abagore.
Dr. Gishoma Darius, Ukuriye ishami ry'ubuzima bwo mu mutwe muri RBC yavuze ko nubwo imyaka ibaye 31 Jenoside yakorewe Abatutsi ibaye ndetse n'imibare y'abahungabana ikaba itakiri nk'iyo mu myaka 13 ishize ariko abahungabana bafite ibikomere bagihari.
Mu gihe cyo kwibuka ku nshuro ya 31 Jenoside yakorewe Abatutsi mu 1994, Abaturarwanda basabwa kwirinda ibikorwa bitoneka abarokotse Jenoside kuko bagifite ibikomere, ari na byo bibatera ihungabana ku buryo ibyo bikorwa biba bibongerera ibikomere n'ibya mbere bitarakira.
