WebRwanda.com

🔒
✇ Kigali Today

Yaguye mu mpanuka ashakisha amajyambere #Rwanda #RwOT via @kigalitoday

By Editor — July 17th 2019 at 16:46
Nyiringabo Claudine wari ufite ubukwe mu kwezi gutaga kwa Kanama
Nyiringabo Claudine wari ufite ubukwe mu kwezi gutaga kwa Kanama

Nyiringabo ni umwe mu bagenzi 11 baguye mu mpanuka y'imodoka ya Kompanyi ‘Ugusenga Expres' yabereye mu karere ka Karongi kuwa 16 Nyakanga 2019.

Uyu mukobwa w'imyaka 28, yari afite ubukwe bwo gusabwa ku itariki ya mbere Kanama 2019.

Abo mu muryango we babwiye Kigali Today ko yari amaze iminsi mu mujyi wa Kigali, aho yakoraga ibiraka bimufasha gushakisha imibereho, no gushaka amajyambere azatahana mu bukwe bwe.

Murumuna we Mizero Clementine, yavuze ko Nyiringabo yari amaze iminsi mu mujyi wa Kigali akora akazi ko kubarura abagize imiryango, mu byiciro by'ubudehe.

Ku munsi impanuka yahitanye ubuzima bwe yabereye, Nyiringabo ngo yavuye mu mujyi wa Kigali mu gitondo cya kere, yerekeje mu karere ka Nyamasheke, aho yari agiye gukora ikizamini cy'akazi.

Murumuna we, Amizero avuga ko iki kizamini yari agiye kugikora kugira ngo nibimukundira akabona akazi azakorere hafi y'umuryango avuka mo, ndetse n'urugo yiteguraga gushinga.

Amizero yagize ati “Muri kiriya gitondo impanuka iba, nanjye barampamagaye, mpamagarwa na musaza wanjye, arambwira ngo ninjye kureba aho iyo mpanuka yabereye kuko mukuru wanjye yari arimo, ati genda urebe uko bimeze! Nahise mva ku kazi nihuta, mpageze nyine nsanga byarangiye”!

Amizero avuga ko yaherukanaga na mukuru we Nyiringabo mu kwezi gushize kwa Kamena, gusa ngo bajyaga bavugana kuri telefoni igendanwa, ndetse no ku munsi impanuka yabereyeho, bari bavuganye kandi bari bamaze iminsi basezeranye byinshi.

Ati “Impanuka yabaye yari avuye I Kigali ajya Nyamasheke gukora ikizamini cy'akazi, kuko twari tumaze iminsi dusezeranye ko mbere y'uko ubukwe bwe buba tuzabanza gutunganya aho tuvuka. Twari twasezeranye ko azagura ibisorori byo mu rugo, nanjye nkagura ama rido yo mu nzu twitegura ubukwe bwe”.

Claudine Nyiringabo yashyinguwe kuri uyu wa 17 Nyakanga 2019, mu murenge wa Macuba aho avuka.

Impanuka yabereye mu karere ka Karongi yahitanye abantu 11
Impanuka yabereye mu karere ka Karongi yahitanye abantu 11

Imapanuka yabereye I Karongi kandi yanahitanye ubuzima bwa Ananie Higaneza, wari utuye ku Kinamba mu mujyi wa Kigali.

Kigali Today yaganiriye n'umugore we Martine, avuga ko umugabo we yavuye mu rugo kuwa kabiri 16 Nyakanga 2019 mu gitondo agiye ku kazi mu karere ka Rusizi, nk'uko yari asanzwe ahakorera.

Nyuma ngo yaje guhamagarwa abwirwa ko umugabo we ari umwe mu baguye muri iyo mpanuka, gusa uyu mubyeyi wari ufite intege nke, ntiyatangaje byinshi ku rupfu rw'umugabo we.

Yavuze ko kubera imbaraga nkeya afite, atiteguye gusubiza ibibazo by'umunyamakuru, avuga ko umugabo we azashyingurwa kuwa gatanu mu irimbi ry'I Nyamirambo mu mujyi wa Kigali.

Impanuka yabereye mu karere ka Karongi yahitanye ubuzima bw'abantu 11, ndetse isiga benshi ari inkomere.

Hari n'ababashije kuyirokoka kubera amahirwe bagize.

Urugero ni urwa Habumuremyi Jean Baptiste bakunze kwita ‘John' utuye mu Mujyi wa Muhanga mu Murenge wa Nyamabuye akagari ka Gahogo mu Mudugudu wa Ruvumera, wagombaga kugenda muri iyo modoka yakoze impanuka.

Habumuremyi nawe yagombaga kujya gukora ikizamini cy'akazi mu karere ka Nyamashe, nawe atega iyo modoka ariko kubera ko yagombaga kubageraho iturutse i Kigali, ngo yatinze kubageraho, abona yagera i Nyamasheke yakererewe, bituma itike yari yaguze ayiha undi mugenzi wari ukeneye kujya i Nyamasheke, Habumuremyi we urugendo ararusubika, arokoka atyo.

Polisi y'igihugu ishami rishinzwe umutekano wo mu muhanda rivuga ko, ritaramenya neza icyateye iriya mpanuka yabereye mu karere ka Karongi, kuko bataravugana n'umushoferi wari utwaye imodoka.

SSP Ndushabandi Jean Marie Vianney, umuvugizi wa Polisi ishami rishinzwe umutekano mu muhanda, agira ati “Ntabwo turamenya neza icyateye impanuka kuko ntabwo turavugisha umushoferi ngo tumenye uruhande rwe kuko ataramera neza, ariko kugeza ubu turacyeka ikibazo cy'umunaniro ku mushoferi.

Iyo urebye amasaha impanuka yabereye hafi saa moya, bivuze ko imodoka yahagurutse i Kigali byibura saa kumi za mu gitondo. Birashoboka ko yaba atarashoboye kuruhuka neza mbere y'uko ajya gutwara."

SSP Ndushabandi avuga ko ikibazo cy'umuvuduko urenze urugero kitabayeho, kuko umushoferi yagenderaga ku muvuduko wemewe wa 60km ku isaha.

Ati “Ntabwo impanuka yaba yaratewe n'umuvuduko. Turakangurira ba nyir'ama kompanyi atwara abagenzi kureba ko abashoferi baruhuka bakanasimburana mu rwego rwo kwirinda umunaniro. Iyi nama duhora tuyibagira. Nta nyungu iri mu gukoresha umushoferi amasaha menshi, haba ku ruhande rwa nyir'imodoka cyangwa umushoferi, ahubwo byakuviramo guhomba imodoka n'abantu".

Umunsi wo kuwa kabiri tariki ya 16 Nyakanga 2019 kandi, mu karere ka Kayonza mu ntara y' Uburasirazuba na ho habereye impanuka y'imodoka yo mu bwoko bwa ‘Coaster', ihitana abantu batatu barimo n'umwana w'uruhinja.

Kuwa gatatu tariki ya 17 Nyakanga 2019, mu karere ka Kamonyi mu ntara y'Amajyepfo, na ho habereye impanuka y'imodoka ya Coaster, yagonze umunyonzi (utwara igare) iramuhitana.

Hari benshi bibaza ko abashoferi batwara izi modoka zo mu bwoko bwa Coaster (zitwara abagenzi), baba basigaye bacomokora ibyuma byagenewe kugabanya umuvuduko, bikaba byaba imwe mu mpamvu zitera impanuka.

Icyakora, umuvugizi wa Pilisi y'Igihugu ishami rishinzwe umutekano wo mu muhanda SSP JMV Ndushabandi, avuga ko ikigo ngenzuramikorerere RURA, gifite uburyo kigenzura niba umuntu acomokoye icyo cyuma, kuburyo ashobora kubiryozwa.


✇ Kigali Today

Buravan yashimiye Kigali Today yamufashije kuzamuka mu muziki we #Rwanda #RwOT via @kigalitoday

By Editor — July 17th 2019 at 16:34
Umuhanzi Yvan Buravan yageneye Kigali Today icyemezo cy
Umuhanzi Yvan Buravan yageneye Kigali Today icyemezo cy'ishimwe

Buravan yashimiye Kigali Today yamufashije kumenyekanisha umuziki we, akaba ageze ku ntera ishimishije.

Mu muhango wo guhura n'abayobozi b'ibitangazamakuru ndetse n'abanyamakuru wabaye kuri uyu wa gatatu tariki 17 Nyakanga 2019, Yvan Buravan yavuze ko yishimiye intera itangazamakuru ryamugejejeho. Yagize Ati "Aho ngeze uyu munsi, mwabigizemo uruhare runini cyane. Ndacyabakeneye mu rugendo, n'ubwo tugeze ahashimishije, ahakomeye nibwo hatangiye".

Muri uwo muhango kandi, yanamurikiye abanyamakuru igihembo yahawe na RFI. Nyuma yo gutwara igihembo cya Prix Découverte 2018, Buravan yazengurutse ibihugu bitandukanye bya Afurika, akora ibitaramo byitabiriwe n'abanyamahanga batari bake ku buryo byamuhesheje amahirwe yo kurushaho kwamamara mu ruhando mpuzamahanga.

Yvan Buravan n
Yvan Buravan n'abanyamakuru ba Kigali Today, Ines Nyinawumuntu (iburyo) na Kamanzi Natasha (ibumoso) bafashe ifoto y'urwibutso

✇ Kigali Today

APR FC yasezerewe muri CECAFA itisindiwe kuri Penaliti #Rwanda #RwOT via @kigalitoday

By Sports — July 17th 2019 at 16:34

Mu mukino wasozaga indi wa 1/4, ikipe ya APR FC ibaye ikipe ya nyuma yo mu Rwanda isezerewe muri Cecafa, aho yatsinzwe na AS Maniema Penaliti 4-3.


✇ Kigali Today

Burera: Abahishira abakoresha ibiyobyabwenge batuma bitaranduka burundu #Rwanda #RwOT via @kigalitoday

By Editor — July 17th 2019 at 14:42
Ibiyobyabwenge bimwe babimennye ibindi barabitwika
Ibiyobyabwenge bimwe babimennye ibindi barabitwika

Uwitwa Karimunda Claver wo mu Murenge wa Cyanika yatangaje ko abanangira bakarenga ku mabwiriza yo kurwanya ibiyobyabwenge bavangira abaturage mu kunoza gahunda zo kubungabunga umutekano bafatanyije n'inzego ziwushinzwe, badasize n'iterambere ryabo bwite.

Atangaza ko ntawe byigeze bikiza kuko hari ingero nyinshi we na bagenzi be bafite z'abantu byakenesheje kubera gufatirwa mu cyuho babicuruza, babitunda cyangwa ku babinywa.

Ati: “Birababaje kubona Amafaranga yaguzwe ibi biyobyabwenge atikira gutya ba nyirayo batarabanje kugira amahitamo meza y'icyo bagombaga kuyakoresha mu bindi bikorwa bitabangamiye iterambere ry'igihugu. Ubu baba baramaze gutera imbere ndetse bageze kure iyo babikora gutyo. Twiyemeje kujya dutunga agatoki abantu bakekwaho kubitunda no kubicuruza tudasize inyuma n'ababinywa kugira ngo bajye bakanirwa urubakwiriye”.

Muri ibi biyobyabwenge harimo urumogi, kanyanga n
Muri ibi biyobyabwenge harimo urumogi, kanyanga n'izindi nzoga zifungwa mu mashashi zitemewe ziba zavuye muri Uganda zikinjizwa mu gihugu rwihishwa

Ibiyobyabwenge bigizwe n'urumogi ni byo byatwitswe hanamenwa inzoga za kanyanga n'izindi zitemewe ziva mu gihugu cya Uganda. Icyo gikorwa cyabaye ku wa mbere tariki ya 15 Nyakanga 2019.

Agaruka ku mpamvu Leta ibirwanya ariko ntibicike burundu, Commissioner of Police Denis Basabose yagize ati: “Haracyari ikibazo cy'abahishira cyangwa abakingira ikibaba abacuruza n'abakoresha ibiyobyabwenge. Ababana na bo baba bazwi, ariko ikibabaje ni uko badatanga amakuru. Ni hahandi uzumva ngo habayeho ibyaha byo gukubita no gukomeretsa, kwangiza iby'abandi n'amakimbirane mu miryango. Bagiye batubwira hakiri kare bitaraba nibwo tuzagera ku mugambi wo kubihashya burundu”.

Umunyamabanga wa Leta ushinzwe ubuzima rusange n'ubuvuzi bw'ibanze muri Minisiteri y'Ubuzima, Dr Patrick Ndimubanzi, yasabye abaturage kubirwanya bivuye inyuma.

Dr Patrick Ndimubanzi yasabye abaturage kwirinda ibiyobyabwenge kuko bimunga ubukungu bwabo n
Dr Patrick Ndimubanzi yasabye abaturage kwirinda ibiyobyabwenge kuko bimunga ubukungu bwabo n'ubw'igihugu

Yagize ati: “Turasaba Abaturage kumva uburemere bw'ingaruka ziterwa n'ikoreshwa ry'ibiyobyabwenge ku buzima bwabo, kuko iyo byagenze gutyo batakaza ubushobozi bwo kugira icyo bimarira, bigahungabanya ubukungu bwabo n'ubw'igihugu. Nibahagurukire kubikumira birinde ko bikomeza gukoma mu nkokora ibikorwa bateganya kugeraho mu gihe kizaza”.

Ibi biyobyabwenge byagiye bifatirwa mu bice bitandukanye byo mu Karere ka Burera mu bikorwa byo kubikumira inzego zishinzwe kubungabunga umutekano zifatanyamo n'Abaturage. Ibiyobyabwenge byinjira muri aka Karere ka Burera ni ibiba biturutse mu gihugu cya Uganda.

Abaturage babwiwe ububi bw
Abaturage babwiwe ububi bw'ibiyobyabwenge basabwa kubyirinda


✇ Kigali Today

Dore uko bamwe mu byamamare bazaba basa nibagera mu zabukuru #Rwanda #RwOT via @kigalitoday

By Editor — July 17th 2019 at 10:42

Abiganjemo abahanzi n'abandi bamamaye mu bintu bitandukanye barimo n'abo mu Rwanda ni bamwe mu bakoresheje ubwo buryo maze basangiza abakunzi babo ayo mafoto ku mbuga nkoranyambaga.

Platini (Dream Boys)
Platini (Dream Boys)
Antoinnette Niyongira
Antoinnette Niyongira
Tizzo (Active)
Tizzo (Active)
Uncle Austin
Uncle Austin
Kevin Hart
Kevin Hart
Meddy
Meddy
Sandrine Isheja
Sandrine Isheja
Nkusi Arthur
Nkusi Arthur
Anita Pendo
Anita Pendo
Sintex
Sintex
Miss Flora
Miss Flora
Ishimwe Clement (Kina Music)
Ishimwe Clement (Kina Music)
 Igisupusupu
Igisupusupu
 DJ Pius
DJ Pius
Fresh Kid
Fresh Kid
Peace Jolis
Peace Jolis
Joanna (Miss Heritage)
Joanna (Miss Heritage)
Igor Mabano
Igor Mabano
Sterling Magnell (Umutoza w
Sterling Magnell (Umutoza w'abasiganwa ku magare)
Ziggy 55
Ziggy 55
Danny Vumbi
Danny Vumbi
Shaddy Boo
Shaddy Boo

✇ Kigali Today

Ibikorwa byo kurwanya ibiyobyabwenge byakomereje mu ntara zose #Rwanda #RwOT via @kigalitoday

By Editor — July 17th 2019 at 07:16


Ni muri urwo rwego kuri uyu wa 16 Nyakanga 2019, mu gihugu hose habaye iki gikorwa cyo kumena ibiyobyabwenge abaturage baganirizwa ububi bwabyo n'ingaruka zabyo maze basabwa kubyirinda no kubirwanya.

Umunyamabanga wa Leta muri minisiteri y'ubuzima Dr. Ndimubanzi Patrick kuwa mbere hatangizwa ukwezi kwahariwe ibikorwa bya Polisi yakomoje ku biyobyabwenge ubwo yaganiraga n'abaturage b'akarere ka Burera abasaba kwirinda no kurwanya ibiyobyabwenge kuko byangiza ubuzima bw'ubinywa bigateza n'umutekano mucye.

Yagize ati “Polisi yonyine ntiyabasha kugera ku nshingano zayo hatabayeho ubufatanye n'abaturage,birakwiye ko nkamwe baturage mufatanya nayo mu gukumira ibyaha bitaraba harimo cyane cyane ikoreshwa ry'ibiyobyabwenge dore ko aribyo nyirabayazana w'ibindi byaha biteza umutekano mucye bikanangiza ubuzima bw'ababikoresha.”

Yakomeje avuga ko ibi biyobyabwenge byibasiye cyane urubyiruko ari ngombwa ko buri wese yumva ko kubirwanya ari inshingano ze.

Umunyamabanga wa Leta muri minisiteri y'ubuzima yakomeje abwira abaturage ko kuba baturanye n'umupaka ko badakwiye kubigira intandaro yo kwambuka bakajya kuzana ibiyobyabwenge ibyo bikwiye guhagarara.

Ati “Birakwiye kumva ko kurwanya ibyaha ari ibyacu kuko abakora ibyaha n'abantu tuziranye duhorana umunsi k'uwundi ,gutangira amakuru ku gihe nibyo bizafasha inzego z'umutekano kubirwanya.”

Yongeyeho ko nta terambere n'imibereho myiza twifuza byagerwaho hakigaragara ibyaha.

Ati "Dukwiye kuba intangarugero ku bana bacu tubigisha indangagaciro nyarwanda zirimo,gukunda igihugu,gukunda umurimo no gutinya ikibi,tukazabaraga igihugu cyiza gitekanye."

Mu Ntara y'Amajyaruguru mu turere twa Burera, Rulindo, Gicumbi na Gakenke hamenwe ibiyobyabwenge bifite agaciro ka miliyoni 191frw.

Mu Ntara y'Iburasirazuba mu karere ka Gatsibo hamenwe ibiyobyabwenge bifite agaciro ka 1,642,OOOfrw, mu karere ka Nyagatare hamenwe ibifite agaciro ka 17,121,OOOfrw.

Mu Ntara y'Iburengerazuba mu karere ka Ngororero hamenwe ibiyobyabwenge bifite agaciro ka 60,000 frw, mu karere ka Rusizi hamenwe ibifite agaciro ka 4,500,000frw, mu karere ka Nyabihu hamenwe ibifite agaciro ka 80,000,000frw, akarere ka Nyamasheke ibifite agaciro ka 10,000,000frw, mu karere ka Rutsiro hamenwe ibifite agaciro ka 1,870,900 frw , mu karere ka Karongi ibifite agaciro ka 8,000,000frw, mu gihe mu karere ka Rubavu hamenwe ibifite agaciro ka 152,241,000 frw.

Mu Ntara y'Amajyepfo mu karere ka Ruhango hamenwe ibiyobyabwenge bifite agaciro ka 9,630,000frw, mu karere ka Nyanza hamenwe ibifite agaciro ka 943,500 frw, mu gihe mu karere ka Huye hamenwe ibifite agaciro ka 1,172,100 frw.

Naho mu mujyi wa Kigali ubukangurambaga bwo kurwanya no gukumira ibiyobyabwenge bwabereye mu karere ka Gasabo mu murenge wa Nduba hamenwa Kanyanga litiro 500 n'urumogi ibiro 150.

Muri rusange iki gikorwa cyo gukangurira abaturage kwirinda no kurwanya ibiyobyabwenge hirya no hino mu gihugu kikaba cyagenze neza. Aho abayobozi bakanguriraga abaturage kubirwanya kuko biteza umutekano mucye bigakurura n'ibindi byaha.

Abaturage hirya no hino mu gihugu bakaba bavuze ko bagiye kurushaho kuba abafatanyabikorwa batangira amakuru ku gihe.


✇ Kigali Today

Muhanga: barifuza ko amavuriro aciriritse yakora n'amasaha ya nijoro #Rwanda #RwOT via @kigalitoday

By Editor — July 17th 2019 at 06:51
Amavuriro aciriritse yafashije abaturage kutarembera mu ngo
Amavuriro aciriritse yafashije abaturage kutarembera mu ngo

Abaturage by'umwihariko batuye mu byaro ahataboneka amavuriro akora nijoro, bavuga ko serivisi z'ubuvuzi bahabwa ku mavuriro aciriritse (Poste de Santé) zibafasha ku manywa gusa kandi na nijoro haboneka abantu barembye.

Umurenge wa Kiyumba ni umwe mu Mirenge ya kure y'Umujyi wa Muhanga ku buryo kubegereza amavuriro aciriritse byatumye abaturage baremberaga mu ngo bagabanuka nk'uko byemezwa na benshi mu bawutuye.

Mahirwe Aimable, Umubaforomo ukorera kuri imwe muri poste de santé zubatswe mu Murenge wa Kiyumba mu karere ka Muhanga na we yemeza ko ibibazo by'ubuvuzi bw'ibanze byagabanyutse kubera amavuriro acirirtse yegerejwe abaturage.

Agira ati, “Serivisi dutanga hano zagiriye abaturage akamaro kuko ntibakirembera mu rugo ugereranyije na mbere, cyane cyane nk'abakoraga urugendo rurerure bava Kabacuzi bajya kwivuriza ku kigo nderabuzima cya Nyabikenke”.

N'ubwo bimeze gutyo ariko, abaturage bagaragaza ko bagihura n'ikibazo cya kwakirwa nijoro bagannye aya mavuriro, kuko aba yafunze bagasaba inzego z'ubuyobozi ko zabafasha kubona ababakira mu masha ya nijoro kuko naho haboneka abakeneye serivisi zo kwa muganga byihutirwa.

Uwamaliya avuga ko kwegurira abikorera amavuriro aciriritse ari bwo buryo bwo gutuma akora nijoro
Uwamaliya avuga ko kwegurira abikorera amavuriro aciriritse ari bwo buryo bwo gutuma akora nijoro

Umuyobozi w'akarere ka Muhanga Uwamaliya Beatrice avuga ko, nyuma yo kubaka aya mavuriro nka kimwe mu byihutirwaga ngo abaturage babone serivisi nziza mu buvuzi, ubu hakurikiyeho kuyegurira abikorera kugira ngo barusheho gutanga bene izo serivisi.

Agira ati, “Icya mbere kwari ukwihutira kubaka aya mavuriro kuigira ngo abaturage bacu babone serivisi z'ibanze kwa muganga”.

“Ubu igikurikiyeho ni ukuyegurira abikorera kugira ngo barusheho gutaga serivisi nziza kumuturage zizaba zirimo no kungera amasaha kugira ngo n'abo bakenera ubuvuzi nijoro babubone”.

Ubushakashatsi bwakozwe n' Urwego rw'Igihugu rw'Imiyoborere RGB mu mwaka wa 2018, serivisi zirimo kwakira no kwita ku barwayi, gukingira indwara, ibikorwa remezo n'ibikoresho by'amavuriro birimo n'Imbangukiragutabara, abakozi b'amavuriro, n'izindi zitangirwa kwa muganga, bugaragaza ko muri rusange abaturage babajijwe bazishimira ku gipimo cya 70.8%.

Inama zitangwa na Minisiteri y'ubuzima zikaba zisaba abakira abagana serivisi z'ubuzima gushyiramo imbaraga kugira ngo zirusheho kunozwa bityo babashe gufasha ababagana, mu gihe Lata ya yo yihaye Umuhigo wo kuba mbere y' umwaka wa 2019 nibura buri Kagari kagomba kuba gafite ivuriro ryakira abakeneye serivisi z'ibanze kwa muganga.


✇ Kigali Today

Yasubitse urugendo, imodoka yari kugendamo ihitana 11 #Rwanda #RwOT via @kigalitoday

By Editor — July 17th 2019 at 06:32
Habumuremyi yagurishije itike undi mugenzi, we urugendo ararusubika
Habumuremyi yagurishije itike undi mugenzi, we urugendo ararusubika

Habumuremyi arubatse akaba afite umugore n'abana babiri. Asanzwe yikorera ku giti cye.

Imodoka yakoreye impanuka i Karongi ku wa kabiri tariki 16 Nyakanga 2019 yagombaga kuyigendamo ndetse yamaze no kugura itike. Habumuremyi yashakaga kuva i Muhanga akerekeza i Nyamasheke anyuze mu Karere ka Karongi.

Hari ikizamini cy'akazi yagombaga kujya gukora mu Karere ka Nyamasheke ku mwanya w'umukozi ushinzwe imicungire y'ibiza (Disaster Management).

Habumuremyi asobanura ko yagiye kubaza imodoka iva i Muhanga yerekeza i Nyamasheke, abona iya Sosiyete yitwa Ugusenga ishobora kugenda ku wa kabiri saa kumi n'igice zo mu rukerera yiyemeza kujyana na yo kuko yumvaga ko mu ma saa mbili n'igice aba yageze i Nyamasheke akajya mu kizamini nta zindi mbogamizi.

Kuri uwo munsi mu rukerera yarazindutse nka saa kumi n'iminota 15 agura itike ari uwa mbere mu bari i Muhanga bashaka kwerekeza i Karongi na Nyamasheke bajyanye n'imodoka ya Ugusenga.

Kubera ko imodoka bari bategerereje i Muhanga yagombaga kubageraho iturutse i Kigali, ngo yatinze kubageraho, noneho Habumuremyi abona nagenda na yo aragera i Nyamasheke nka saa yine n'igice cyangwa saa tanu yakererewe, yatakaje n'amafaranga ndetse n'umwanya, bituma itike yari yaguze ayiha undi mugenzi wari ukeneye kujya i Nyamasheke, Habumuremyi we urugendo ararusubika.

Habumuremyi ntiyabashije kumenya niba uwo musore yagurishijeho itike yari yaguze yarabashije kurokoka.

Iyo tike y'ibihumbi 3400 yari yaguze yo kuva i Muhanga yerekeza i Nyamasheke yagombaga kuyigenderaho yicaye mu mwanya ufite nimero 22.

Habumuremyi avuga ko amaze kugurisha iyo tike yahise yisubirira mu rugo araryama. Ahagana saa mbili n'igice nibwo umuntu yamuhamagaye amubwira ko ya modoka yari agiye kugendamo ya Ugusenga ikoreye impanuka ikomeye i Karongi, amwoherereza n'amafoto y'iyo mpanuka, arumirwa.

Iyo mpanuka yabaye mu gitondo cyo ku wa kabiri tariki 16 Nyakanga 2019 ibera mu Murenge wa Bwishyura mu Karere ka Karongi aho imodoka ya Coaster yari itwaye abagenzi 27 yataye umuhanda iragwa ihitana 11 hakomereka abandi 16.

Habumuremyi yabwiye Kigali Today ati “Ni Ubuhamya butoroshye. Mu rugo twashimye nyagasani ko tubashije kurokoka iyo mpanuka.”

Habumuremyi avuga ko akimara kumva iby'iyo mpanuka, yahise ahamagara umugore we wari wamaze kujya ku kazi amubwira iby'iyo modoka yashakaga kugendamo ariko agasubika urugendo ku munota wa nyuma none ikaba yakoze impanuka.

Umugore we ngo na we byaramutangaje cyane, arapfukama ashima Imana abihuza n'ibyo aho asengera ngo baherutse kumuhanurira ko hari icyobo arokotse.

Impanuka yabereye i Karongi yari ikomeye cyane
Impanuka yabereye i Karongi yari ikomeye cyane

Inkuru bijyanye:

Kayonza na Karongi: Impanuka ebyiri z'imodoka zahitanye 14 abandi 46 barakomereka


✇ Kigali Today

Imihigo ya 2018/2019 i Gasabo ngo yeshejwe kuri 97% #Rwanda #RwOT via @kigalitoday

By Editor — July 17th 2019 at 05:51
Inyubako y
Inyubako y'akarere ka Gasabo ni umwe mu mihigo aka karere kitegura kumurikira Perezida

Ikigaragara ni uko muri uyu mwaka amanota y'ikirenga yari yaraciwe yongeye kugaruka, aho akarere ka Gasabo kavuga ko kesheje imihigo 73 kari kihaye ku rugero rwa 97%.

Muri yo harimo inyubako y'ibiro by'akarere yuzuye itwaye amafaranga miliyari eshanu, ubuhinzi bw'umuceri n'imboga, amashuri n'ibitaro, inzu zubakiwe abatishoboye n'ihangwa ry'imihanda.

Mu mihigo y'umwaka washize wa 2017/2018, akarere ka Gasabo kari kaje ku mwanya wa kabiri nyuma ya Rwamagana, n'amanota 82.5%.

Rwamurangwa Stephen uyobora akarere ka Gasabo avuga ko gukemura ibibazo by'abaturage hamwe no kuboneza urubyaro, ari byo byatumye ijanisha rya 3% risigaye ritagerwaho.

Mu byo abaturage basaba aka karere ndetse n'ibyo ubuyobozi bwako bushaka kugeraho mu mihigo y'ubutaha, harimo icyo gushaka ibiribwa bihagije, guhanga imirimo no guteza imbere ibyoherezwa hanze.

Kubaka ikigo Nderabuzima cya Gatsata byari mu mihigo y
Kubaka ikigo Nderabuzima cya Gatsata byari mu mihigo y'umwaka wa 2017/2018 mu karere ka Gasabo

Umuturage wimuriwe i Gikomero mu mudugudu w'icyitegererezo mu mwaka ushize agira ati"Nta byo kurya dufite kandi nta kazi dufite katwinjiriza kugira ngo tubone amafaranga yo guhahisha".

Akarere ka Gasabo kavuga ko umushinga w'inkoko kahaye bamwe mu baturage b'i Gikomero, kagiye kuwagura kugira ngo gakure mu bukene abataka ko batagira ibiribwa.

Bwana Rwamurangwa akomeza agira ati "Minisiteri y'ubuhinzi itubwira ko hari icyuho cy'inyama z'inkoko n'amagi kibarirwa kuri 70%".

"Ibyinshi mu bikomoka ku nkoko amahoteli abivana hanze y'Igihugu, turashaka rero kuziba icyo cyuho".

Akarere ka Gasabo kavuga ko hegitare 1,398 z'ibishanga bikagize zizahingwaho imboga(cyane cyane imiteja) mu buryo bugezweho, kuko ngo zikenewe mu bihugu by'u Bufaransa n'u Bwongereza.

Ubuyobozi bw'aka karere kandi buvuga ko ibikorwa byari mu mihigo y'umwaka wa 2018/2019 byatwaye amafaranga angana na miliyari 10.3, mu gihe ibikozwe byose muri uwo mwaka hakoreshejwe arenga miliyari 27.

Biyemeje kuziba icyuho kirenga 70% mu Rwanda cy
Biyemeje kuziba icyuho kirenga 70% mu Rwanda cy'ibikomoka ku nkoko

✇ Kigali Today

Nyaruguru: Polisi yatanze amashanyarazi ku ngo 143 #Rwanda #RwOT via @kigalitoday

By Editor — July 17th 2019 at 05:33
Amwe mu mazu yarayemo amashyanyarazi
Amwe mu mazu yarayemo amashyanyarazi

Ubundi polisi y'igihugu yari yateganyije kuhatanga amashanyarazi mu ngo 100, ariko yasanze uyu mudugudu utuwe n'ingo 143, yiyemeza kutagira n'umuntu n'umwe uhatuye usigara.

Ibi byashimishije abatuye muri uyu mudugudu wa Bitare kuko ngo bamurikishaga amatoroshi cyangwa telefone, na zo bajyaga gushyirishamo umuriro mu birometero bibiri uturutse aho batuye.

Ngo hari n'abari bagerageje kwigurira amashanyarazi y'imirasire y'izuba, ariko bakabura amafaranga yo kwishyura ngo barangize (bishyura buke buke), bakayabatwara.

Josepha Mukandinda ufite imyaka 73, bakimara kumushyirira mu nzu aya mashanyarazi, yagize ati “Najyaga murikisha itoroshi, amabuye yashiramo nkananirwa gushyiramo andi kuko ntazi uko babigenza. Iyo najyaga gusuka amazi nijoro nayimurikishaga nyifatiye mu kanwa cyangwa nkareba aho nyegeka, hakaba igihe itemba, bikangora. Ibi byose ntibizongera kumbaho.”

Komiseri wa polisi, Daniel Nyamwasa, yavuze ko ibizakorwa mu kwezi kwahariwe ibikorwa bya Polisi ari byinshi
Komiseri wa polisi, Daniel Nyamwasa, yavuze ko ibizakorwa mu kwezi kwahariwe ibikorwa bya Polisi ari byinshi

Patrice Rukeratabaro, umukuru w'umudugudu wa Bitare, ngo yishimiye ko noneho n'iwabo haza kubona.

Agira ati “Mu Mudugudu wa Sheke duturanye na wo wo mu Kagari ka Sheke, ho babahaye amashanyarazi atari ay'imirasire y'izuba. Twatembereraga yo nimugoroba tukumva tudashaka gutaha kuko kwari ukuva mu rumuri ujya mu mwijima.”

Ikimushimishije kurushaho ni uko amashanyarazi bahawe azamubashisha gushyira umuriro muri terefone. Kujya kuwushyirishamo kure byatumaga hari igihe abamukuriye bamushaka bakamubura, hanyuma yaba yayihaye umwana ngo ajye kuwushyirishamo akaba ari we umwitabira.

Ati “Nari naramubwiye ko igihe yagiye kuyisharija bampamagaye yitaba, akababaza icyo banshakira akaza kukimbwira.”

Komiseri wa Polisi, Dr. Daniel Nyamwasa, watangije ibikorwa by'ukwezi kwahariwe ibikorwa bya Polisi i Nyaruguru, yavuze ko muri rusange mu Rwanda hose bazatanga amashanyarazi y'imirasire y'izuba mu ngo ibihumbi bitatu na mituweri ibihumbi bitatu, ni ukuvuga 100 muri buri karere.

Bazubaka inzu 30 z'abakene basemberaga, ni ukuvuga inzu imwe muri buri karere, ndetse n'ibiro bitandatu by'imidugudu itarangwamo ibyaha. I Bitare na ho hari uwasemberaga bazubakira ariko umudugudu bazubakira ibiro muri Nyaruguru ni uwa Kaduha mu Kagari ka Nkakwa mu Murenge wa Nyagisozi.

Bazakora n'ubukangurambaga bushishikariza abantu gutanga amaraso banabahe urugero, bashishikarize abantu kurwanya ibiyobyabwenge cyane cyane bagaragaza ababikora n'ababicuruza.

Yagize ati “Buri wese agerageze, uwo amenye amugaragaze. N'iyo umutunze urutoki uba umufashije, kuko uba umukiza ikizamuhemukira.”

Ingo 143 z'abatuye i Bitare zihawe amashanyarazi y'imirasire nyuma y'uko mu minsi yashize muri aka karere abaturage bakabakaba ibihumbi 25 n'ubundi bari bayahawe. Byari byatumye imibare y'abamaze kugezwaho amashanyarazi igera kuri 81% i Nyaruguru.

Umuyobozi w'aka karere, François Habitegeko, avuga ko kuba abaturage baragiye bagezwaho amashanyarazi y'imirasire y'izuba bitazakuraho ko bagezwaho n'asanzwe aca mu nsinga.

Ati “amashanyarazi akomoka ku mirasire y'izuba ni ayo kwifashisha kugira ngo babone nijoro, basharije na telefone. Ibindi bikorwa by'iterambere nko gusudira n'ibindi bazabibashishwa n'ayandi bazagezwaho nyuma.”


✇ Kigali Today

Abagide ba Afurika barizeza ko bazagabanya inda mu bangavu #Rwanda #RwOT via @kigalitoday

By Editor — July 17th 2019 at 05:16

Mu Rwanda ikibazo cy'abangavu baterwa inda cyakomeje gufata intera ikabije kugeza n'ubwo Leta ivuga ko buri mwaka abarenga ibihumbi 17 bava mu ishuri bitewe no gutwita imburagihe.

Minisitiri w'Urubyiruko, Rosemary Mbabazi yasabye abagide ba Afurika baciye ingando z'iminsi ine mu karere ka Bugesera, gushingira ku masomo bazahakura bagakemura ibibazo biri mu bakobwa b'Abanyafurika.

Agira ati"Hari inda mu bangavu, ibiyobyabwenge n'icuruzwa ry'abantu, turagira ngo mu gihe uzaba uvuye hano ujye ufata akanya ko kwigisha abaturage iyo mu cyaro".

Umuyobozi w'Abagide muri Afurika, Alphonsine Kabagabo avuga ko ibiganiro barimo bigomba kuvamo ingamba zihindura imibereho n'imitekerereze y'umukobwa w'Umunyafurika.

Kabagabo agira ati " Iri huriro turikora buri myaka itatu, turashaka ko ubutaha tuzaba twishimira icyahindutse, niba umubare w'abangavu batwita kuri ubu ari 2,000, wenda muri icyo gihe bazabe ari nka 500 gusa byibura".

Minisitiri w'Urubyiruko, Rosemary Mbabazi yasabye aba bagide gufata iyambere bagakemura ibibazo biri mu bakobwa b'Abanyafurika
Minisitiri w'Urubyiruko, Rosemary Mbabazi yasabye aba bagide gufata iyambere bagakemura ibibazo biri mu bakobwa b'Abanyafurika

Umwana w'umukobwa witwa Mukamanzi Anne-Marie w'imyaka 19 uturuka i Giheke mu karere ka Rusizi, akomeza ashimangira ko bazatoza abandi kurya ifi birobeye(gutungwa n'ibyo bakoreye).

Avuga ko batozwa kuzigama amafaranga bahabwa n'ababyeyi akabaviramo igishoro cyo gucuruza, bikaba ari byo bibarinda guterwa inda n'abagabo babashukisha amafaranga.

Abagide n'abakobwa b'abasukuti(scouts) bavuga ko barimo gukemura ibibazo bijyanye no gushyingirwa no gutwita imburagihe kw'abakobwa, iby'ihohoterwa, ibiri mu burezi bw'abakobwa, uburinganire ndetse n'ibidukikije.

Mu Rwanda kuri ubu harabarirwa abagide n'abakobwa b'abasukuti barenga ibihumbi 11.

Aba bagide baturutse mu bihugu bitandukanye bya Afurika
Aba bagide baturutse mu bihugu bitandukanye bya Afurika

✇ Kigali Today

Gukebwa hakoreshejwe impeta hari abo bijya bigwa nabi #Rwanda #RwOT via @kigalitoday

By Editor — July 16th 2019 at 19:04

Akenshi usanga havugwa ko ari ukugira ngo habungabungwe amagara yabo cyane ko ngo byaba bigabanya ibyago byo kwandura Virusi itera SIDA ku kigero cya 60%.

Ikindi ni uko nk'Abayahudi n'Abayisilamu n'ibindi bihugu by'abarabu, gukebwa ntibifatwa nk'ibintu bigamije kubungabunga amagara y'abantu gusa, ahubwo ni umuhango w'idini ufite icyo usobanura, ikindi ni uko uyu muhango hari n'abawufata nk'aho ari igikorwa cy'idini rya Isilamu gusa bakaba batekereza ko batabikora atari abayoboke b'idini rya Isilamu.

Na hano mu Rwanda hari igihe Minisiteri y'Ubuzima yageze aho ikangurira Abanyarwanda kwitabira igikorwa cyo gukebwa kuko bibafitiye akamaro cyane mu rwego rwo kurushaho kugira isuku y'igitsina no kugabanya ibyago byo kwandura virusi itera SIDA.

Igikorwa cyo gukebwa ubundi hari uburyo bubiri gikorwamo ari bwo: uburyo bwo gukoresha impeta n'ubundi buryo bwo gukata agahu k'inyuma ku gitsina bakahadoda bagashyiraho n'igipfuko.

Umwe mu baganga bakora ibijyanye no gukebwa yasobanuye uko bikorwa ahereye ku buryo bwo gukata bisanzwe ati: “Ubundi ubu buryo bwo gukata ni bwo bukunze gukoreshwa n'abaza batugana bashaka iyo serivisi kuko nibwo buryo bworoha kandi bwizewe kuko bakata agahu k'inyuma ku gitsina cy'umugabo bamuteye ikinya hanyuma bakaza kumudoda imitsi yose bakayifunga ku buryo nta kibazo byaza guteza ku wakebwe.

Yakomeje asobanura ko uburyo bw'impeta ari uburyo budakunze gukoreshwa cyane ko n'aho bukoreshwa ahanini biba ari mu buryo bw'ubukangurambaga gusa ubu buryo bukaba bunagora rimwe na rimwe nubwo bwaba bukoreshwa ku bantu benshi kuruta gukebwa bisanzwe.

Ku bijyanye n'ibiciro uwo muganga yasobanuye ko ubundi mu bitaro bisanzwe bya Leta igiciro kiri hasi cyane ugereranyije no mu mavuriro yigenga kuko nko mu mavuriro ya Leta bikorwa ku mafaranga angana n'ibihumbi icumi (10,000frw) byose biri hamwe no kwitabwaho naho mu mavuriro yigenga bikaba bihagaze ku mafaranga agera ku bihumbi mirongo itandatu (60,000frw), waba ufite ubwishingizi bigatwara agera ku bihumbi makumyabiri (20,000frw).

Bamwe mu babashije kuvugana na Kigali Today bavuze ko gukebwa ari byiza kandi ko uretse kuba bivugwa ko bigabanya ibyago byo kwandura virusi itera SIDA ngo ni n'isuku y'umubiri.

Muganga asobanura ko imbogamizi zijya zibaho biturutse ku gukebwa ahanini zituruka ku bantu baba barakoreshejweho uburyo bw'impeta ntibigende neza imitsi igaturika. Akomeza avuga ko iyo bigenze bityo uwakebwe hakoreshejwe impeta agaruka kwa muganga bakayikuramo hanyuma bakamubaga bakamudoda nk'uko byari gukorwa mbere hakoreshejwe uburyo busanzwe bwo gukata.


✇ Kigali Today

Uwahoze ari umumotari ubu akora akazi ko gucukura imva #Rwanda #RwOT via @kigalitoday

By Editor — July 16th 2019 at 18:12
Nzaramba acukura imva akanashyira amakaro ku mva
Nzaramba acukura imva akanashyira amakaro ku mva

Nzaramba w'imyaka 39 afite umugore n'abana batatu. Avuga ko nyuma yo kuba umumotari bakamwiba moto, yahise afata umwanzuro wo kujya gukora akazi ko gucukura imva.

Ati “Ubundi nabanje kuba umunyonzi, nyuma nza kuba umumotari, ariko baza kunyiba moto nakoreshaga, mpita njya gushaka boss ukoresha hano,mwaka akazi ngira amahirwe aranshima arakampa.”

Avuga ko kugira ngo abone aka kazi nta kindi byamusabye, usibye kuba afite imbaraga gusa.

Ati “Ubundi aka kazi nta kindi gasaba usibye kuba ufite imbaraga zashobora gucukura, kandi unabishaka.”

Ni iki cyagoye Nzaramba agitangira aka kazi?

Nzaramba Emmanuel avuga ko akigera mu kazi, yabanje kugira ubwoba bwo kwinjira mu irimbi, ndetse no kururutsa umurambo mu mva.

Ati “Ngitara aka kazi, nabanje gutinya kujya mu irimbi, kuko kubona nkikijwe n'imva rwose byanteraga akantu k'ubwoba. Noneho iyo byageraga mu kumanura umurambo byo byabaga ari urundi rwego! Hari n'igihe cyageraga nijoro nkabirota.”

Akomeza avuga ko hari n'ababanje kumunena no kumuseka k'ubw'akazi akora.

Ati “Hari n'aho tugera wenda nko mu kabari, bakanga ko twegerana cyangwa dusangira bavuga ngo ‘bariya ni abo mu irimbi'.”

Ese hari igihe kijya kigera bakabura abakiriya?

Nzaramba avuga ko hari igihe bwira nta mukiriya uje,ariko ko batamara icyumweru batabonye imikorere, kuko n'iyo batacukuye hari abaza gukoresha imva z'ababo neza bazishyiraho sima cyangwa amakaro.

Ati “Abakiriya ntibakunze kubura, gusa hari nk'igihe bujya bwira ntawe tubonye, ariko hakaza nk'abaza gushyirisha amakaro ku mva zabo kandi na byo nzi kubikora.”

Yongeraho ko nta gihe runaka yahamya ko kizagira abakiriya benshi cyangwa bazabura, kuko urupfu ntirurobanura.

Ati “Hari igihe kigera tukabona abakiriya benshi tukitabaza n'abandi bantu tudasanzwe dukorana, ariko ntiwahamya ngo ni mu mezi aya n'aya kuko urupfu ntirurobanura.”

Ese abakora uyu murimo bakira gute inkuru y'urupfu?

Nzaramba avuga ko we na bagenzi be iyo bumvise uwapfuye cyangwa bakabona umubare munini w'abakiriya babagana n'ubwo batakwishimira ko runaka yapfuye, ariko ko nta cyo biba bibatwaye kuko ari akazi. Ahubwo bitegura kugakora neza.

Ati “N'ubwo ntawakwishimira urupfu, ariko duhita twumva ko twariye nyine. Hari n'igihe tujya twicara twabuze abakiriya tukabivuga dutebya tuti ‘ariko ko nta bakiriya bakiboneka aho urupfu ntirwadukujeho ra?'”

Uyu murimo umaze kugeza Nzaramba ku rihe terambere?

Nzaramba avuga ko mu myaka ibiri amaze akora uyu murimo, hari ibikorwa amaze gukora, nko kuvugurura inzu ye, ndetse ko yiguriye n'igare.

Ati “Natangiye aka kazi baranyibye moto yanjye, nkora amezi macye mpita nigurira igare rishya kuko urumva sinari kujya nza ku kazi n'amaguru, nyuma nza kuvugurura inzu yanjye nyitera na karabasasu.”

Ni izihe nama Nzaramba agira abanenga uyu murimo?

Nzaramba abwira abanenga umurimo uwo ari wo wose kandi bagataka ubushomeri ko ari akazi nk'akandi, kuko aba ari no gutanga umusanzu, kuko ntawakwishyingurira umuntu wenyine no mu busanzwe afashwa n'abandi.

Ati “Hari abirirwa badusebya bakaduseka kubera akazi dukora, nyamara ugasanga arimo kugusaba icupa, akuganyira ubushomeri ngo umugurize. Inama nabaha rero, ni ukureka kwigira maringaringa,bagakura amaboko mu mufuka kuko akazi ni akazi.”

Arongera ati “ Nta dipolome bagusaba, usibye imbaraga zawe wahawe n'Imana. Nibareke kwigira nabi rero hato batazavamo n'ingegera.”

Akazi ko gucukura imva, Nzaramba Emmanuel na bagenzi be bane bagafatanyije, bahembwa bitewe n'imva bacukuye, kuko imva zitandukana ku mafaranga bitewe n'ibizigize. Avuga ko nta mubare runaka yahamya ko ahembwa, ariko ko mu kwezi atabura ibihumbi mirongo itanu.


✇ Kigali Today

Burera: Abaturage bishimiye uruhare rwa Polisi mu bikorwa bibateza imbere #Rwanda #RwOT via @kigalitoday

By Editor — July 16th 2019 at 17:17
Dr Patrick Ndimubanzi yifatanyije n
Dr Patrick Ndimubanzi yifatanyije n'abayobozi na Polisi mu gushyira itafari ahari kubakwa inzu izuzura itwaye miliyoni 8 z'amafaranga y'u Rwanda

Iyi nzu iri kubakirwa Tuyizere w'imyaka 37, umugore we witwa Nyiramugisha Annonciata w'imyaka 44 y'amavuko n'abana babo batandatu b'abahungu iri kubakishwa amatafari ahiye; ikaba igizwe n'ibyumba bitatu, uruganiriro, ubwiherero n'igikoni.

Serugendo Emmanuel umuturanyi wa Tuyizere yishimiye ko iyi nzu igiye gutuma ava mu bwigunge kubera ko yari abayeho mu buzima bugoye.

Yagize ati: “Tuyizere yari afite ikibazo gikomeye kuko yabaga mu kazu gashaje, katobotse, ku buryo wabaga uhagaze hanze yako ukareba ibiri mu nzu kubera imyenge, mbese bameze nk'ababa ku gasozi bikatubabaza. Kuba Polisi imwubakiye iyi nzu ni igikorwa tuyishimira cyane”.

Inzu ya Tuyizere iri kubakwa mu kagari ka Nyagahinga aho abayobozi n
Inzu ya Tuyizere iri kubakwa mu kagari ka Nyagahinga aho abayobozi n'abaturage bifatanyije muri iki gikorwa

Uyu muryango uri kubakirwa binyuze muri gahunda y'ukwezi kwahariwe ibikorwa bya Polisi y'u Rwanda yatangirijwe ku rwego rw'Intara y'Amajyaruguru mu Karere ka Burera kuri uyu wa mbere tariki ya 15 Nyakanga 2019.

Muri iyi gahunda Polisi iteganya kuzubaka inzu 30 z'abatishoboye mu gihugu hose, ibiro by'imidugudu itandatu yabaye indashyikirwa mu gukumira no kurwanya ibyaha, gucanira ingo ibihumbi bitatu amashanyarazi akomoka ku mirasire y'izuba, gutanga ubwisungane mu kwivuza ku bantu ibihumbi bitatu n'ibindi bikorwa biteza imbere ubuzima bw'Abaturage bo mu gihugu hose.

Komiseri wa Polisi, Denis Basabose, yasobanuye ko Polisi ifite inshingano zo kwita ku baturage mu buryo ubwo ari bwo bwose, akaba ari yo mpamvu ibi biri gukorwa.

Guverineri w
Guverineri w'Amajyaruguru Gatabazi JMV na we yitabiriye iki gikorwa

Mu gikorwa cyo gutangiza ku mugaragaro gahunda y'ukwezi kwahariwe ibikorwa bya Polisi ku rwego rw'Intara y'Amajyaruguru, Umunyamabanga wa Leta ushinzwe ubuzima rusange n'ubuvuzi bw'ibanze muri Minisiteri y'Ubuzima, Dr Patrick Ndimubanzi, wifatanyije n'abaturage, Polisi n'ubuyobozi mu gikorwa cyo gushyira itafari kuri iyi inzu y'umuryango wa Tuyizere iri hafi gusakarwa, yashimiye uburyo ibi bikorwa bije kunganira Leta n'inzego bifatanya mu kuzamura ubuzima bw'Abaturage, ari na ho yahereye abasaba kubifata neza kugira ngo abatishoboye bazamukane n'abandi mu iterambere.

Yagize ati: “Ibikorwa nk'ibi ngibi ni byiza kuko bigaragaza ubufatanye bw'inzego za Leta n'umutekano mu buryo bwo kuzamura cyane cyane abafite ubukene. Turasaba ko abagenerwabikorwa babigira ibyabo, babibungabunge babifata neza kugira ngo bizabashoboze kwinjira vuba mu byiciro by'abifite”.

Imyaka 19 irashize Polisi y'u Rwanda ifatanya n'Abaturage mu gucunga no kubungabunga umutekano; mu nsanganyamatsiko igira iti: “Ubufatanye mu bikorwa byo kubungabunga umutekano no guteza imbere imibereho myiza y'Abaturage” ikaba ikomeje guhamagarira Abaturarwanda kutirara no gukomeza gukomera ku bikorwa bituma umutekano udahungabana.

Abaturage bishimiye ko iyi gahunda y
Abaturage bishimiye ko iyi gahunda y'ibikorwa bya polisi bizamura abaturage ije kubakura mu bwigunge

✇ Kigali Today

Nyarugenge: Umudugudu wahize indi mu mutekano watangiye kubakirwa ibiro #Rwanda #RwOT via @kigalitoday

By Editor — July 16th 2019 at 16:33
Minisitiri w
Minisitiri w'Urubyiruko Rosemary Mbabazi na we yitabiriye iki gikorwa

Polisi y'u Rwanda ku bufatanye n'abaturage bashyize ibuye ry'ifatizo ahatangiye kubakwa ibiro by'Umudugudu wa Kamatamu muri uwo Murenge kuko ari wo wahize indi mu mutekano.

Ibi biro birimo kubakirwa Umudugudu wa Kamatamu byitezweho gufasha ubuyobozi bw'umudugudu gutanga serivisi zinoze, ndetse no korohereza abaturage gusiragira bashaka abayobozi nk'uko abaturage bo muri uwo mudugudu babivuga.

Umwe muri abo baturage witwa Nyiramana avuga ko bashimishijwe n'uko babonye umusaruro w'ubufatanye bagezeho, kuko babonye ibiro by'umudugudu wabo,aho batazongera kujya gushakira umukuru w'umudugudu iwe nk'uko byajyaga bigenda rimwe na rimwe bakaba banamubura, ahubwo ngo bazajya bamusanga mu biro.

Ati “Ibi tubikesha ubufatanye buturanga. Ikinshimishije kurushaho, ni uko tutazongera gusiragira ngo turahiga Mudugudu cyangwa abandi. Hari igihe wajyaga kumureba iwe, ugasanga ntawe uriyo,bakamukurangira ahandi,nabwo bikaba uko. Ariko ubu tuzaba tuzi neza aho tumusanga,ndetse n'amasaha.”

Umuyobozi w'Umudugudu wa Kamatamu, Mereweneza Rwumvuguza, na we ashimangira ibyo byishimo bakuye ku bufatanye.

Ati “Turishimye cyane kuko tugiye kubona ibiro by'umudugudu wacu. Ibi ni abaturage babigizemo uruhare. Iyo abaturage bamenye ibanga ryo kwiga ku bibazo, cyane cyane mu nteko z'abaturage, birakemuka.”

Akomeza agira ati “Hari igihe wajyaga kubona ukabona umuturage agusanze mu nzira cyangwa mu murima ngo nsinyira! Rimwe na rimwe bagasanga uri ahantu nta gikoresho na kimwe witwaje. Ariko ubu, buri muturage azaba azi amasaha y'ibikorwa byose by'umudugudu, kandi bazi aho basanga ubaha serivisi bakeneye.”

IGP Dan Munyuza yaganirije abaturage ku byerekeranye n
IGP Dan Munyuza yaganirije abaturage ku byerekeranye n'umutekano

Umuyobozi mukuru wa Polisi, DCG Dan Munyuza, yasabye abaturage kongera ubufatanye bwabo mu kubungabunga umutekano,batangira amakuru ku gihe, ndetse banibanda ku guhashya ibiyobyabwenge mu rubyiruko.

Ati “Muri ibi bikorwa, polisi iribukiranya n'abaturarwanda bose inshingano za buri wese zigendanye no kubungabunga umutekano w'igihugu cyacu. Ibikorwa byose igihugu cyacu kimaze kugeraho byubakira ku mutekano.”

Akomeza agira ati “Muri politiki y'umutekano igihugu cyacu kigenderaho, twahawe na nyakubahwa Perezida wa Repubulika y'u Rwanda, ni uko abaturage bafatanyije n'inzego z'umutekano baza ku mwanya wa mbere mu kwicungira umutekano, kugira ngo igihugu cyose, kirangwe n'umutekano.”

Arongera ati “Ibikomeza guhungabanya umutekano rero mukwiye kwirinda ni ibi:icya mbere, hakomeje kugaragara abantu bahungabanya umutekano bakoresheje umuhoro. Muri uyu mwaka dukwiye kwamagana ibintu byitwa gutema hakoreshejwe umuhoro! Ikindi gikomeje guhungabanya ubuzima bw'abantu ni ikoreshwa ry'ibiyobyabwenge. Mureke tubirwanye.”

Minisitiri w'Urubyiruko Rosemary Mbabazi, na we yagaragaje ko ikibazo cy'ibiyobyabwenge kiri mu bidindiza iterambere ry'igihugu.

Ati “Ibiyobyabwenge ni umwanzi w'ubwenge. Namwe murabyumva ko biyobya ubwenge. Ubwo buba bugiye. Nk'urubyiruko rero mukiri bato, igihugu cyacu gishingiye ku bwenge n'ubukungu bwo mu bwenge ndetse n'iterambere ry'umuntu rishingiye ku bwenge. Nagira ngo mbasabe turwanye ibi bintu.”

Uku kwezi kwahariwe ibikorwa bya polisi bizatwara amafaranga agera muri miliyoni magana arindwi. Kuzaba kugizwe n'ibikorwa binyuranye bigizwe no kubaka ibiro by'imidugudu itandatu yo hirya no hino mu gihugu yahize iyindi mu kurwanya ibyaha, gucanira imiryango ibihumbi bitatu hakoreshejwe imirasire y'izuba, kubakira abatishoboye inzu 30 (ni ukuvuga ko ari inzu imwe muri buri karere) ndetse no kwishyurira ubwisungane mu kwivuza imiryango ibihumbi bitatu.


✇ Kigali Today

Kayonza na Karongi: Impanuka ebyiri z'imodoka zahitanye 14 abandi 46 barakomereka #Rwanda #RwOT via @kigalitoday

By Editor — July 16th 2019 at 16:19
Impanuka yabereye Kamarashavu yahitanye batatu, 30 barakomereka
Impanuka yabereye Kamarashavu yahitanye batatu, 30 barakomereka

Iyo modoka yaguye saa kumi n'iminota 50 z'umugoroba wo ku wa kabiri tariki 16 Nyakanga 2019, ubwo yari igeze ahitwa Kamarashavu mu kagari ka Rubumba mu Murenge wa Kabare mu Karere ka Kayonza, mu ikorosi riri mu buhaname bukabije.

Ngo ubwo umushoferi wayo yashakaga guheza ikorosi riri ahantu hazamuka, ikamyo yamanutse isatira Coaster umushoferi afata feri yirinda kugongana n'iyo kamyo.

Ngo muri uko gufata Feri, imodoka yasubiye inyuma ikora intera nini yibarangura igwa mu gishanga nk'uko Kigali Today yabitangwarijwe na Mberwa Semugisha Théogène, Umunyamabanga Nshingwabikorwa w'Umurenge wa Kabare.

Agira ati “Hari mu ma saa kumi n'iminota 50 z'umugoroba, aho imodoka ya Coaster yari ivuye i Kabarondo yerekeza i Nasho itwaye abagenzi 33, yageze mu Murenge wa Kabare ahari ikorosi rihanamye cyane ry'ahitwa Kamarashavu, ubwo umushoferi yashakaga guheza ikorosi, haruguru haturuka imodoka ya FUSSO, uwo mushoferi afata feri yirinda kugongana n'iyo kamyo nibwo imodoka isubiye inyuma imanuka mu mubande”.

Mu mpanuka yabereye i Kayonza imodoka yamanutse ku musozi muremure igwa mu gishanga
Mu mpanuka yabereye i Kayonza imodoka yamanutse ku musozi muremure igwa mu gishanga

Gitifu Mberwa uyobora Umurenge wa Kabare avuga ko iyo mpanuka yahise ihitana batatu muri 33 bari muri iyo modoka, babiri muri bo bakaba bakomeretse bikabije aho bahise bagezwa mu bitaro bya Kibungo mu gihe 28 bagiye kuvurizwa mu kigo Nderabuzima cya Mulindi.

Agira ati “Abapfuye ni umugabo, umugore n'umwana uri mu kigero cy'umwaka umwe, babiri bakomeretse bikabije barimo n'umugore utwite bahise boherezwa mu bitaro bya Kibungo, 28 bakomeretse byoroheje aho bari gukurikiranwa n'abaganga mu kigo Nderabuzima cya Mulindi”.

Gitifu Mberwa, avuga ko ingabo z'igihugu zagize uruhare runini mu gutabara inkomere, ubwo zajyanwaga mu kigo Nderabuzima cya Mulindi, aho izo ngabo zifashishije Imbangukiragutabara yazo yari ikurikiye iyo Coaster yakoze impanuka ubwo yerekezaga i Nasho.

Mu mpanuka yabereye Kamarashavu mu Murenge wa Kabare imodoka yangiritse bikabije
Mu mpanuka yabereye Kamarashavu mu Murenge wa Kabare imodoka yangiritse bikabije

Avuga ko 95% mu bakoze impanuka, ari abaturage bo mu Murenge wa Nasho mu Karere ka Kirehe, anahumuriza inkomere anihanganisha imiryango yaburiye ababo muri iyo mpanuka.

Imirambo y'abaguye muri iyo mpanuka, iri mu buruhukiro bw'ibitaro bya Rwinkwavu.

Iyi mpanuka ije ikurikira indi yabaye mu gitondo cyo ku wa kabiri tariki 16 Nyakanga 2019 mu Murenge wa Bwishyura mu Karere ka Karongi aho imodoka ya Coaster yari itwaye abagenzi 27 yataye umuhanda iragwa ihitana 11 hakomereka 16.

Impanuka yabereye i Karongi yari ikomeye cyane
Impanuka yabereye i Karongi yari ikomeye cyane


✇ Kigali Today

CNLG iramagana ibirego bya Diane Rwigara ivuga ko byuzuyemo ipfobya #Rwanda #RwOT via @kigalitoday

By Editor — July 16th 2019 at 15:22
Diane Rwigara mu kiganiro n'abanyamakuru kuri uyu wa mbere, yavuze byinshi ariko atabashije gutangira gihamya
Diane Rwigara mu kiganiro n'abanyamakuru kuri uyu wa mbere, yavuze byinshi ariko atabashije gutangira gihamya

Ku mugoroba wo kuri uyu wa kabiri tariki 16 Nyakanga 2019, nibwo Diane Rwigara yahamagaye itangazamakuru maze arimenyesha ko yandikiye Umukuru w'Igihugu ibaruwa, nyuma y'uko ngo akoze ubushakashatsi agasanga hari abarokotse Jenoside bakomeje kwicwa mu bihe bitandukanye, nyamara ntabashe kugaragaza ibimenyetso by'ibyo avuga.

Diane Rwigara avuga ko yandikiye Perezida wa Repubulika ibaruwa, agashyira ku mugereka urutonde rw'abo yemeza ko barokotse Jenoside bishwe mu buryo budasobanutse kandi mu bihe bitandukanye. Cyakora ntiyabashije kwereka itangazamakuru gihamya y'ibyo avuga.

Umunyamabanga Nshingwabikorwa wa CNLG, Dr Jean Damascene Bizimana, uyobora komisiyo yanabonye kopi y'iyo baruwa, yateye utwatsi ibyavuzwe n'uyu munyapolitiki wagerageje kwiyamamariza kuyobora igihugu mu matora y'umukuru w'igihugu muri 2017 ariko akaza kwangirwa bitewe n'ibyaha bitandukanye yakoze ashaka kuzuza ibisabwa ngo yiyamamaze birimo gukoresha impapuro mpimbano.

Dr Bizimana yagize ati “Ibikorwa byakozwe na Leta y'u Rwanda iyobowe na FPR Inkotanyi mu gusubiza ubuzima abacitse ku icumu rya Jenoside yakorewe Abatutsi ni ibikorwa bigaragarira buri wese ushaka kubibona kereka impumyi n'abasabitswe n'urwango.”

“Ndetse abacitse ku icumu rya Jenoside yakorewe Abatutsi barabishima cyane, byaba ibirebana n'ubuzima, uburezi, amacumbi, kwita ku mibereho yabo n'ibindi. Ntabwo abacitse ku icumu bakeneye ibinyoma bya Diane Rwigara n'abatekereza cyangwa abakora nabi nka we.”

Dr Bizimana yakomeje asa nk'ugira inama Diane Rwigara, amubwira ko abaye akunda u Rwanda n'Abanyarwanda bose akaba abifuriza ibyiza yagombye kuva mu bikorwa bye bibi akorera igihugu aho kwitwaza abacitse ku icumu bafite Leta ibakunda, yabarokoye kandi ikomeje kubafasha kwiyubaka kuva Jenoside ihagaritswe n'Inkotanyi muri Nyakanga 1994.

Ati “Hari umugani w'ikinyarwanda uvuga ngo urusha nyina w'umwana imbabazi aba ashaka kumurya. Icyo ni cyo gihango abacitse ku icumu bafitanye na Leta. Ushaka kubivuga ukundi ni umubeshyi.”

CNLG isanga kandi mu byavuzwe na Diane Rwigara harimo ugupfobya Jenoside, kuko kimwe mu biranga ipfobya rya Jenoside yakorewe Abatutsi nk'uko biteganywa n'itegeko rihana icyaha cy'ingengabitekerezo ya Jenoside ryo muri 2013, ryavuguruwe muri 2018 ari ugukwiza ibinyoma n'impuha kuri Jenoside yakorewe Abatutsi, kugoreka ukuri no gutesha agaciro ingaruka zayo ugamije kuyobya abantu.

Umunyamabanga wa CNLG agira ati “Muri iriya mvugo ya Diane Rwigara ibyo byaha birimo ariko si byo byonyine kuko no gusebanya birimo.”


✇ Kigali Today

Rayon Sports itsinzwe na KCCA isezererwa muri CECAFA #Rwanda #RwOT via @kigalitoday

By Sports — July 16th 2019 at 14:02

Mu mukino wa kabiri wa 1/4 cya CECAFA Kagame Cup wabereye kuri Stade ya Kigali i Nyamirambo, Rayon Sports ihatsindiwe na KCCA bituma ihita isezererwa.

Ikipe ya KCCA yafunguye amazamu ku munota wa 38 ku gitego cyatsinzwe na Kizza Mustapha, Rayon Sports icyishyura ku munota wa 48 gitsinzwe na Rugwiro Hervé.

Ku munota wa 66, Kizza Mustapha yatsindiye KCCA igitego cya kabiri, umukino urangira Rayon Sports itabashije kucyishyura ndetse ihita inasezererwa.


✇ Kigali Today

Azam Fc itunguye Mazembe iyisezerera muri CECAFA Kagame Cup #Rwanda #RwOT via @kigalitoday

By Sports — July 16th 2019 at 11:32

Wari umukino ikipe ya Tout Puissant Mazembe yahabwagamo amahirwe, ariko iza gutsindwa na Azam Fc yegukanye igikombe giheruka.

Igice cya mbere cyarangiye ari igitego 1-1, aho Mazembe yabonye igitego cya mbere ku munota wa 21 gitsinzwe na Ipamy Giovanni, kiza guhita cyishyurwa ku munota wa 28 na Idd Selemani.

Ku munota wa 69 w'umikino, Azam Fc yatsinze igitego cya kabiri cyatsinzwe na Obrey Chirwa, umukino urangira Azam isezereye Mazembe muri 1/4 cy'irangiza.


✇ Kigali Today

Abatuye ku Ruheru basanga ibikorwaremezo bafite byatuma bamwe bahitiranya n'i Kigali #Rwanda #RwOT via @kigalitoday

By Editor — July 16th 2019 at 10:37
Amwe mu mazu yamaze kugezwamo amashanyarazi
Amwe mu mazu yamaze kugezwamo amashanyarazi

Ibi babivugira ko mu minsi yashize mu Karere ka Nyaruguru hatanzwe amashyanyarazi akomoka ku mirasire y'izuba ku bakabakaba ibihumbi 25, ku buryo abatuye mu mirenge ikora kuri Nyungwe bayahawe bose nta kureba abari mu byiciro bifashwa.

Mu dusantere tumwe na tumwe kandi hashyizwe amatara yo ku mihanda abamurikira nijoro.

Umugabo uvuga ko yitwa Peti Maya utuye ku Ruheru agira ati “Amatara yatugejejweho maze tuyakiriza rimwe, abanyamahanga bayabonye ngo hewe, nimuze dutabare u Rwanda rwatewe. Abandi na bo ngo reka da, ngo iyo hataba n'umupaka mba njabutse nkaba ari ho nigira.”

Aya mashanyarazi kimwe n'ibindi bikorwa remezo bagejejweho harimo no gutunganyirizwa imihanda, bitera abatuye ku Ruheru kuvuga ko iwabo bahagereranya n'i Kigali.

Faustin Mazimpaka abwira abayobozi bifatanyije na bo mu kwizihiza isabukuru y'imyaka 25 yo kwibohora yagize ati “Iyo muza nimugoroba mwari kugira ngo ni Kigali yimutse iza hano ku ishyamba.”

Francine Niyiturinze yiga mu mwaka wa gatandatu w'amashuri abanza. Afite imyaka 25. Na we ati “hano iwacu ni i Kigali rwose. Ni i Burayi nako. Nabonaga imodoka nkabona ari ibintu bidasanzwe, nkajya kuyireba. Ariko ubu zirahita nkagira ngo ni i Burayi neza.”

Ku Ruheru n'imihanda yarakozwe ku buryo n'imodoka ziyinyuramo mu buryo bworoshye.

Umukecuru Doroteya Nyiranziza wahawe inzu mu mudugudu wa Yanza, urimo amazu afatanye ane muri imwe, kandi umaze gutuzwamo abantu 40 biganjemo abahoze batuye mu manegeka, na we nyuma yo gushyikirizwa inzu yahawe tariki 4 Nyakanga 2019 yavuze ko iterambere ryabarizwaga i Kigali ubu ryasanze iwabo.

Yagize ati “Nabaga mu manegeka ya njyenyine, hatari heza. None nageze heza aho abantu bari. Wagirango nibera mu mujyi neza neza.”

Iyi nzu yashyikirijwe kimwe na bagenzi be bandi 19, kuko 20 yandi yo amaze igihe atashywe, yubakishije amatafari akomeye cyane bita aya ruriba.

Yayihanywe n'ibikoresho by'ibanze ari byo intebe n'ibitanda bitanu bishashe neza, amasafuriya ndetse n'amashyiga ya rondereza hamwe n'aya gaz. Gaz yo kwifashisha izajya itangwa n'umwanda wo mu bwiherero.

Umuyobozi w'Akarere k Nyaruguru, François Habitegeko, avuga ko n'ubundi Perezida Kagame yari yabwiye abatuye i Nyaruguru ko Kigali izabasanga iwabo.

Ati “Na Nyakubahwa umukuru w'igihugu cyacu yarabivuze, ati nimugume ahongaho Kigali izahabasanga. Kandi koko murabibona. Iyo uvuze Kigali uba uvuze imiturire myiza. Ariya mazu mwabonye uko ameze, hari n'ababa Kigali badatuye mu ameze nka yo.”

Akomeza agira ati “iyo uvuze Kigali uba uvuze amashanyarazi, barayafite. Yewe bafite n'ayo ku muhanda arara abamurikira mu mudugudu. Uba uvuze amashuri, amazi meza, itumanaho, umutekano. Byose turabifite”.

Avuga kandi ko usibye amazina atandukanye, u Rwanda rwose rufite uko rwungukiye mu rugendo rwo kwibohora.


❌