WebRwanda.com

🔒
❌
There are new available articles, click to refresh the page.
Before yesterdayUbukungu

Amabuye y'agaciro azinjiza miliyari 1260RWf mu myaka irindwi iri imbere

By Ubukungu

Ubucukuzi bw'amabuye y'agaciro ngo buragenda bwongera umusaruro kubera ikoranabuhanga ryashyizwemo ku buryo muri 2024 umusaruro wabwo uzagera kuri Miliyari 1260RWf.

Byatangarijwe mu biganiro byahuje zimwe mu nzego za Leta n'abakora umwuga wo gucukura amabuye y'agaciro, bikaba byahujwe no kwizihiza umunsi mpuzamahanga w'ubucukuzi bw'amabuye y'agaciro, ku itariki ya 04 Ukuboza 2017.

Francis Gatare, umuyobozi mukuru w'Ikigo cy'igihugu gishinzwe mine,peteroli na gaz (RMB), avuga uko iyo ntego izagerwaho nubwo ihanitse. Agira ati “Icya mbere ni ukuzamura ikoranabuhanga mu kuyungurura umusaruro kuko hari mwinshi ujyana n'ibitaka n'amazi yakoreshejwe mu buryo butanoze. Ibi byonyine bishobora kongera umusaruro birenze 50%.”

Akomeza agira ati “Ikindi ni uko ubushakashatsi buherutse gukorwa bwagaragaje andi mabuye atari asanzwe azwi mu gihugu cyacu. Icyo ni icyizere cy'umusaruro ufatika mu gihe abashoramari bazaba batangiye kuyacukura, tukumva iriya ntego tuzayigeraho ndetse ikaba yanarenga.”

Kalima Jean Malic, umuyobozi w'ihuriro nyarwanda ry'abacukuzi b'amabuye y'agaciro (RMA) avuga ko biteguye nk'abacukuzi ngo iriya ntego igerweho. Ati “Twebwe turiteguye, tugomba gukora cyane kugira ngo iyo ntego Leta yifuza izagerweho kuko natwe abacukuzi tuzaba duteye imbere. Tuzongerera amahugurwa abacukuzi cyane ko hari n'abo tujya twohereza hanze hagamijwe ubumenyi butuma umusaruro wiyongera.”

Hubakimana Thomas, ufite ikigo gicukura amabuye y'agaciro mu Karere ka Ruhango, avuga ko hari byinshi yungukiye muri iyo nama bituma agiye kongera umusaruro. Agira ati “Ngiye kongera ingufu mu byo nkora, niba nabonaga toni imwe mu kwezi ngere kuri ebyiri. Ngiye kongera abakozi b'abahanga n'ikoranabuhanga ku buryo umusaruro uzazamuka mu buryo bugaraga nanjye niteze imbere.”

Mu myaka itanu ishize u Rwanda rwinjizaga miliyoni 200 z'Amadorari ya Amerika (Miliyari 170RWf) buri mwaka aturutse mu bucukuzi bw'amabuye y'agaciro.

Ibyemezo by'inama y'abaminisitiri idasanzwe yo kuwa 5 Ukuboza 2017

By Ubukungu

None tariki ya 5 Ukuboza 2017, inama y'Abaminisitiri idasanzwe yateraniye muri Village Urugwiro, iyobowe na Nyakubahwa Perezida wa Repubulika, Paul Kagame.

Dore imyanzuro yafashe:

1. Inama y'Abaminisitiri yemeje imyanzuro y'Inama y'Abaminisitiri yo ku wa 08 Ugushyingo 2017, imaze kuyikorera ubugororangingo.

2. Inama y'Abaminisitiri yagejejweho aho imyiteguro y'Inama y'Igihugu y'Umushyikirano igeze.

3. Inama y'Abaminisitiri yemeje:

a) Ishyirwaho ry'Ikigo Mpuzamahanga cy'i Kigali gishinzwe Ibikorwa by'Ubucuruzi n'Imari (Kigali International Financial Center/KIFC);

b) Uburyo burambye bwo gushakira umutungo wunganira gahunda y'ubwisungane mu kwivuza;

c) Politiki yo guteza imbere ibikorerwa mu Rwanda n'ingamba zo kuyishyira mu bikorwa;

d) Politiki y'Igihugu y'Itangwa ry'impeta z'ishimwe;

e) Amasezerano hagati ya Guverinoma y'u Rwanda n'Umushoramari “Gatare Tea Company Ltd” yerekeranye n'ubufatanye mu gucunga amashyamba ya Leta akurikira: Nyankenke A, Nyankenke B, Gakomeye, Shungwe, Mutazimiza, Shariyo, Shariyo-Rwambogo, Shariyo-Matare na Rwanyamwaso aherereye mu mirenge ya Mahembe, Kanjongo na Macuba mu Karere ka Nyamasheke.

f) Amasezerano hagati ya Guverinoma y'u Rwanda n'Umushoramari “Rwanda Mountain Tea (RMT) Ltd” yerekeranye n'ubufatanye mu gucunga amashyamba ya Leta akurikira: Mashya IA, Mashya IB, Mashya IC, Mashya II, Rutare na Gapfunsi aherereye muri Gishwati mu Turere twa Ngororero na Nyabihu.

g) Amasezerano hagati ya Guverinoma y'u Rwanda na Rwanda Energy Group (REG) yerekeranye no gucunga no gufata neza inganda za Leta z'amashanyarazi umunani
(8) zikurikira: Nyabarongo, Jabana I; Jabana II; Mukungwa I; Ntaruka; Nshili; Nyabahanga na Gatsata.

4. Inama y'Abaminisitiri yemeje Imishinga y'Amategeko ikurikira:

a) Umushinga w'Itegeko ryemera kwemeza burundu Amasezerano y'Inguzanyo yashyiriweho umukono i Kigali, mu Rwanda, ku wa 29 Ugushyingo 2017, hagati ya Repubulika y'u Rwanda na Banki Nyafurika Itsura Amajyambere, yerekeranye n'inguzanyo ingana na miliyoni ijana na makumyabiri n'imwe n'ibihumbi ijana na mirongo itatu na birindwi z'amadolari y'Abanyamerika (121.137.000 USD) agenewe gahunda irambye yo gukwirakwiza amazi n'ibikorwa by'isukura;

b) Umushinga w'Itegeko ryemera kwemeza burundu Amasezerano y'Inguzanyo yashyiriweho umukono i Kigali, mu Rwanda, ku wa 29 Ugushyingo 2017, hagati ya Repubulika y'u Rwanda na Banki Nyafurika Itsura Amajyambere ihagarariye Africa Growing Together Fund, yerekeranye n'inguzanyo ingana na miliyoni mirongo itanu z'amadolari y'Abanyamerika (50.000.000 USD) agenewe gahunda irambye yo gukwirakwiza amazi n'ibikorwa by'isukura;

c) Umushinga w'Itegeko ryemera kwemeza burundu Amasezerano y'Inguzanyo yashyiriweho umukono i Kigali, mu Rwanda, ku wa 29 Ugushyingo 2017, hagati ya Repubulika y'u Rwanda n'lkigega Nyafurika Gitsura Amajyambere, yerekeranye n'inguzanyo ingana na miliyoni mirongo itandatu za Units of Account (60.000.000 UA) agenewe gahunda yo guteza imbere ubumenyi n'ubucuruzi;

d) Umushinga w'Itegeko ryemera kwemeza burundu Amasezerano y'Inguzanyo yashyiriweho umukono i Kigali, mu Rwanda, ku wa 04 Ukuboza 2017, hagati ya Repubulika y'u Rwanda n'Ikigega Mpuzamahanga Gitsura Amajyambere (IDA), yerekeranye n'inguzanyo ingana na miliyoni mirongo inani n'umunani n'ibihumbi magana atanu z'Amadetesi (88.500.000 DTS) agenewe gahunda ya mbere yo gutera inkunga politiki y'iterambere y'urwego rw'ingufu;

e) Umushinga w'Itegeko rihindura kandi ryuzuza Itegeko N° 14/2008 ryo ku wa 04/6/2008 rigena iyandikwa ry'abaturage n'itangwa ry'ikarita ndangamuntu ku Banyarwanda.

5. Inama y'Abaminisitiri yemeje Amateka akurikira:

a) Iteka rya Perezida rigena imiterere, imitangire n'imenyekanisha ry'Impeta z'Ishimwe;

b) Iteka rya Minisitiri w'Intebe rishyiraho imbonerahamwe y'imyanya y'imirimo, imishahara n'ibindi bigenerwa Abakozi b'Urwego rw'Igihugu rw'Imiyoborere (RGB);

c) Iteka rya Minisitiri w'Intebe rivana ubutaka mu mutungo rusange wa Leta buri kuri hegitari 155, 9 buherereye mu murenge wa Ruharambuga mu Karere ka Nyamasheke rikabushyira mu mutungo bwite wayo no kubutanga bitanyuze mu ipiganwa bugahabwa Umushoramari Gisakura Tea Company;

d) Iteka rya Minisitiri w'Intebe rishyiraho Abashinjacyaha bo ku Rwego rw'Ibanze. Abo ni :

1. Madamu IGENA Marie Louise;

2. Madamu UWIMANA Angelique;

3. Bwana TWAGIRAYEZU Ildephonse.

e) Iteka rya Minisitiri w'Intebe ryemerera Bwana SEBUDANGA Augustin wari Chief Cabinet Notes Taker muri Serivizi za Minisitiri w'Intebe kujya mu kiruhuko cy'izabukuru;

f) Iteka rya Minisitiri w'Intebe ryemerera Bwana RUTAKAMIZE Joseph wari Umuyobozi wa Serivisi ya Porogaramu y'Ishami ry'Ubumenyi n'Ubugeni mu Kigo Gishinzwe Guteza Imbere Uburezi mu Rwanda (REB) kujya mu kiruhuko cy'izabukuru;

g) Iteka rya Minisitiri rishyiraho Koleji z'Ishuri Rikuru ry'u Rwanda ry'Imyuga n'Ubumenyingiro: Koleji ya Kigali, Koleji ya Ngoma, Koleji ya Karongi, Koleji ya Huye, Koleji ya Tumba, Koleji ya Musanze, Koleji ya Gishari na Koleji ya Kitabi.

6. Inama y'Abaminisitiri yashyize Bwana KARANGWA Charles ku mwanya wa Director of Public Institutions Accommodation and Office Management Unit mu Kigo cy'u Rwanda gishinzwe Guteza imbere imiturire/RHA.

7. Mu Bindi:

a) Minisitiri w'Uburinganire n'Iterambere ry'Umuryango yamenyesheje Inama y'Abaminisitiri ko Inama Nkuru y'Abana ya 12 ku rwego rw'Igihugu iteganyijwe ku itariki ya 7 Ukuboza 2017 ikazabera mu Ngoro y'Inteko Ishinga Amategeko. Insanganyamatsiko y'uyu mwaka ni: “Uburere buboneye: inkingi yo kubaka u Rwanda twifuza”.

b) Minisitiri w'Umuco na Siporo yamenyesheje Inama y'Abaminisitiri ko:

 Ikipe y'Igihugu y'Umupira w'Amaguru “Amavubi” iri mu marushanwa ya CECAFA arimo kubera muri Kenya kuva tariki ya 3 kugeza ku ya 17 Ukuboza 2017. Ikipe y'Igihugu “Amavubi” iri mu itsinda rya A hamwe n'Amakipe y'Ibihugu bya Kenya, Libiya, Tanzania na Zanzibar.

 Ikipe y'Isonga Academy yitabiriye Amarushanwa yiswe “Tournoi International du District d'Abidjan” yahuje amakipe y'ingimbi 12 y'umupira w'amaguru yo muri Afurika n'Uburayi. Iyo mikino iteganyijwe kuva ku itariki ya mbere kugeza ku ya 6 Ukuboza
2017.

c) Minisitiri w'Urubyiruko yamenyesheje Inama y'Abaminisitiri ko:

 Gahunda y'Itorero “Urunana rw'Urungano” iteganyijwe kubera i Gabiro kuva tariki ya 6 kugeza ku ya 16 Ukuboza 2017. Muri uyu mwaka, iri Torero rizahuza urubyiruko rusaga 500 ruzava hirya no hino mu Gihugu n'urundi rusaga 100 ruzava mu bindi bihugu. Ibiganiro muri iryo Torero bizibanda ku gukunda igihugu,
kurwanya ingengabitekerezo ya Jenoside no kwimakaza Ubumwe
n'Ubwiyunge.

 Gahunda y'Intore mu biruhuko yatangiye tariki ya 25/11/2017 ikazasozwa tariki ya 13/01/2018. Iyi gahunda igamije kurinda urubyiruko kwishora mu bikorwa birwangiza muri ibi bihe by'ibiruhuko rushyirwa muri gahunda ziruteza imbere harimo kwigishwa indangagaciro z'umuco nyarwanda, guteza imbere impano zarwo, kwirinda ibiyobyabwenge, kwita ku isuku aho rutuye, kugira uruhare mu kubaka ibyumba by'amashuri n'ibindi.

d) Umunyamabanga wa Leta muri Minisiteri y'Uburezi ushinzwe Amashuri Abanza n'Ayisumbuye yamenyesheje Inama y'Abaminisitiri ko ingengabihe y'amashuri Abanza n'Ayisumbuye igizwe n'ibyumweru 39 bigabanyijwe mu bihembwe bitatu ku buryo bukurikira:

 Igihembwe cya mbere kizamara ibyumweru 10, kizatangira tariki ya 22 Mutarama 2018, kirangire tariki ya 29 Werurwe 2018;

 Igihembwe cya kabiri kizamara ibyumweru 15, kizatangira tariki ya 16 Mata 2018, kirangire tariki ya 03 Kanama 2018.

 Igihembwe cya gatatu kizamara ibyumweru 14, kizatangira tariki ya 21 Kanama 2018, kirangire tariki ya 23 Ugushyingo 2018.


Iri tangazo ryashyizweho umukono na Marie Solange KAYISIRE,
Minisitiri Ushinzwe Imirimo y'Inama y'Abaminisitiri

"Made in Rwanda" ku ibere: Ubu igiye kwegukana 65% by'amasoko ya Leta

By Ubukungu

Minisitiri w'Ubucuruzi n'Inganda, Vincent Munyeshyaka, yavuze ko hari gukorwa impinduka zigamije kuzamura urwego rw'inganda, kugira ngo ibikorerwa mu Rwanda birusheho guhabwa umwihariko mu masoko ya leta, kurusha ibiva hanze. Ubu noneho leta irateganya kwegurira 65% by'amasoko yayo ibikorerwa mu Rwanda.

Guverinoma y'u Rwanda iheruka gushyikiriza Inteko Ishinga Amategeko umushinga w'itegeko rigenga amasoko ya leta, urimo ingingo ziha amahirwe yihariye ibicuruzwa bikorerwa mu Rwanda byaba bikozwe n'Abanyarwanda cyangwa abanyamahanga bahafite inganda.

Hagendewe ku itegeko ryari risanzweho, ibikorerwa mu Rwanda bihabwa amahirwe mu masoko ya leta, aho biba bifite inyongera ya 10% y'amahirwe mu ipiganwa. Ni ukuvuga ngo ukorera mu gihugu ashobora kurenzaho nka 9% ku giciro cye kandi akaba ariwe utsindira isoko kubera ko afite rya 10% ry'inyongera y'amahirwe kuko akorera mu gihugu.

Mu kiganiro yagiranye na The New Times, Minisitiri Munyeshaka yavuze ko itegeko rishya rirarushaho gutanga amahirwe ku bicuruzwa bikorerwa mu Rwanda ugereranyije n'iby'ahandi. Yakomeje agira ati “Twarivuguruye kugira ngo turusheho guha amahirwe ibicuruzwa byacu bikorerwa mu gihugu. Twabiteganyije mu nzego ebyiri z'ingenzi. Ku bicuruzwa bikorerwa imbere mu gihugu, kimwe n'ibikorerwa mu nganda z'abanyamahanga ziri mu gihugu.”

“Mu kuvugurura itegeko, ku bufatanye n'Ikigo cy'igihugu gishinzwe amasoko ya leta (RPPA), twifuzaga kubaka uburyo bwo gukurikirana ngo turebe ko nibura 65 ku ijana by'amasoko ya leta yagenerwa ibikorerwa imbere mu gihugu. Igisigaye ni ukubishyira mu bikorwa.”

Minisitiri Munyeshyaka yanakuyeho impungenge ku buziranenge bw'ibicuruzwa bikorerwa mu Rwanda bizagenda bihabwa umwihariko usesuye, ngo hato bitazahabwa isoko bidashobora gukoreshwa mu buryo burambye. Yakomeje agira ati “Ako ni n'akazi gasigaye ku bakorera ibicuruzwa mu gihugu ngo bazamure urwego rw'ibyo bakora. Ikigo cy'Igihugu gitsura Ubuziranenge (RSB) nacyo kizabafasha mu gukemura ibibazo by'ubuziranenge, ikoranabuhanga rikenewe n'uburyo bwo gupfunyika.'

Iryo tegeko ngo rizakora mu gihe ibicuruzwa bihanganira isoko bizaba binganya ubwiza, habone kubaho igicuruzwa gihabwa umwihariko. Ati “Ntabwo hazigera habaho kwirengagiza ubuziranenge bw'igicuruzwa.”

Ibiciro by'amashanyarazi bigeye kongera kuvugururwa

Minisitiri Munyeshyaka yavuze ko ukuboneka kw'amashanyarazi n'igiciro cyayo bikunze kugaragazwa nk'imwe mu mbogamizi ku nganda zo mu gihugu biri kuvugutirwa umuti. Yagize ati “Turi muri gahunda yo kureba uko hajyaho ibiciro bishya ku mashanyarazi mu nganda. Hari no gushakwa uburyo bwafasha Ikigo Gishinzwe Ingufu kumenyesha abafatabuguzi mbere y'igihe amashanyarazi agiye kubura, kugira ngo bafate ingamba kubyo bari gukora.”

“Hari kuganirwa ku biciro by'amashanyarazi ku nganda, ku buryo muri Mutarama umwaka utaha tuzaba twabonye ibitekerezo bya nyuma twashingiraho. Nasaba abacuruzi kuba bihanganye. Guverinoma izi neza iki kibazo kandi iri kugikurikirana.”

Ugendeye ku biciro bisanzwe by'amashanyarazi, inganda nini zishyura 83 Frw kuri kilowatt, abafite inganda ziciriritse bakishyura 90 Frw kuri kilowatt, mu gihe abafite inganda nto bishyura 126 Frw kuri kilowatt.

Munyeshyaka yanavuze ko inganda zifite ibibazo ku kubona ibyo zikoresha zivanamo ibindi bicuruzwa rimwe na rimwe n'umusaruro wazo ntube mwiza, biterwa no kutabona ibyo zikoresha mu buryo buhoraho, nko mu nganda zitunganya umusaruro ukomoka ku buhinzi.

Usanga ngo koperative zakabaye zitanga ibyo bikoreshwa mu nganda nazo zifitemo ibibazo. Yavuze ko nka guverinoma bifuza gufasha mu kunoza imikorere za koperative, kuko hari ibibazo by'imiyoborere bigira ingaruka ku rwego rwose muri rusange.

Urwego rw'ibikorerwa mu Rwanda rukomeje kuzamuka ari nako rugabanya icyuho cy'ibitumizwa n'ibyoherezwa mu mahanga, kuko nko mu mezi atandatu ya mbere y'uyu mwaka, cyagabanyutseho 25%.

Abazunguzayi bakuwe mu muhanda baracyakomerewe no kubona igishoro

By Ubukungu

Abahoze bacururiza mu mihanda bazwi ku izina ry'abazunguzayi bagasiye bakorera mu masoko bubakiwe muri Nyarugenge bifuza kongererwa igishoro kugira ngo bakore bakunguka ntibazongere gusubira mu muhanda.

Abatangaza ibyo ni abakorera mu masoko bubakiwe muri Nyabugogo. Iyo ubasanzemo ubona abenshi bafite ibicuruzwa bike bakavuga ko biterwa n'uko nta gishoro gihagije bafite ngo bongere imari.

Uwimana, umwe muri bo umaze igihe gito avuye mu muhanda, avuga ko ikibazo kibakomereye ari ukubura igishoro. Agira ati “Nkiri mu muhanda nacuruzaga 2000RWf nkabasha gutunga abana banjye, ariko hano mu isoko ntibikunda hasaba menshi. Tubonye uwatwishingira bakatuguriza twakora twunguka kandi tukishyura neza, natwe mu muhanda ntituhishimiye kuko haba ibibazo byinshi.”

Mugenzi we ati “Nk'ubu ibi ncuruza baranyizera nkabifata ntishyuye (babyita ‘dovize'), namara kugurisha nkajya kwishyura uwabimpaye wenda nkungukaho 1000RWf cyangwa 2000RWf byo kurya, urumva ko nta terambere nta gishoro. Nibura mbonye ibihumbi 200RWf nakora nkiteza imbere.” Akomeza avuga ko mu isoko ari heza kuko bakora ntacyo bikanga, kandi ko n'abakiriya basigaye babagana ari benshi kuko abazunguzayi bagabanutse cyane mu muhanda no muri gare.

Umuyobozi wungirije w'Akarere ka Nyarugenge ushinzwe imibereho myiza y'abaturage, Ndayisenga Jean Marie Vianney , avuga ko hari uburyo bafashamo abo bantu babahuza n'amabanki. Agira ati “Tumaze iminsi tuganira na bo tubashishikariza kwegera amabanki no kwishyira hamwe kugira ngo babone igishoro.”

Akomeza agira ati “Igisigaye ni ukuganira n'ayo mabanki ku bijyanye n'ingwate binyuze muri gahunda ya ‘Gira ubucuruzi', amafaranga twabakodesherezaga ibibanza akaba ari yo banki zibaguriza bakayishyura agahabwa n'abandi.” Yongeraho ko intera bagezeho bakura abazunguzayi mu muhanda ishimishije n'ubwo batarawuvamo bose. Ati “Aho tugeze ubu harashimishije kuko tugeze nibura kuri 95% dukura abazunguzayi mu muhanda. Gusa ntitwirara kuko bakiwurimo ariko n'abinangira bakomeza gufatwa hifashishijwe inzego z'umutekano n'abandi babishinzwe kugeza bawuvuyemo burundu.”

Hashize umwaka bamwe mu bazunguzayi bavuye mu muhanda, bajya gukorera mu masoko bubakiwe n'Akarere ka Nyarugenge. Aho bacururizaga mbere ntacyo bishyuzwaga ariko ubu batangiye kujya basorera ibibanza bacururizamo.

Ibintu ukwiriye kwitondera mu ikoreshwa ry'imbuga nkoranyambaga

By Ubukungu

Ha mbere umuntu wasangaga agira amakenga y'ingutu agiye gushyira ahagarara cyangwa se y'icyo agomba kuvana kuri internet n'impamvu zacyo ariko ubu ibintu bisigaye bisa nk'aho byose bidatekerezwaho.

Ku mbuga nkoranyambaga hari ibyaha byinshi bihakorerwa ndetse n'abantu b'abagome baba bashaka kugukuririra mu byago cyangwa se kugutekaho umutwe bakazifashisha.

Imbuga nkoranyambaga ubwazo si mbi ariko ikibi ni uburyo usanga abantu baha urwaho abo batekamutwe bazikoresha mu kuborohereza kubona amakuru n'ibindi bakwifashisha. Uburyo bwose waba ukoreshamo imbuga nkoranyambaga hari ibyo uba ugomba kwitondera.

Kwirinda gukoresha umubare w'ibanga umwe hose

Nubwo ari byiza kugira umubare w'ibanga umwe ku mbuga nkoranyambaga, kuri za email kuko bikurinda kubyibagirwa ariko bifite n'ingaruka mbi kuko iyo bikundiye abajura bo kuri internet kugera hamwe n'ahandi hose bihita biborohera kuhagera.

Nanone kandi abantu bagirwa inama yo kujya bakoresha umubare w'ibanga ugoranye kuba watahurwa, ukaba byibuze uvanze inyuguti n'imibare.

Kirazira gutanga umubare wawe w'ibanga

Abantu benshi usanga ntacyo bibabwiye guha umubare w'ibanga inshuti zabo za hafi. Nubwo waba ubizeye ko bataguhemukira ariko bashobora kutabyitaho ngo bayibike cyangwa bayisibe aho wayiboherereje bigatuma n'umuntu utatekerezaga ayibona, akakwinjirira. Iyo rero uwo mubare w'ibanga ubonywe n'abatakwifuriza ibyiza, urabyumva nawe ibikurikiraho.

Kwitwararika kuri ‘links'

Links zimwe ziherekanwa hari ubwo ziba zifite ibibazo ku buryo kuzihererekanya no kuzifungura bishobora kukugiraho ingaruka.

Abajura bo kuri internet (hackers) bakunze kohereza link, ukayisanga nko kuri email yawe cyangwa se mu butumwa bugufi, uba ugomba kutazitaho ngo uzifungure kuko zishobora kuguteza ibibazo bakinjira mu mabanga yawe.

Guhuza imbuga nkoranyambaga zose

Nubwo usanga abantu bose babikora, icyo ashyize ku rubuga rumwe kikajya no ku zindi mbuga nkoranyambaga akoresha, iyo ubirebye witonze usanga atari byiza na gato. Iyo urebye usanga zimwe zidakoresha amagambo angana, udafite abagukurikira bameze kimwe n'imvugo zikoreshwaho zitandukanye. Biba byiza iyo buri rubuga urukoresheje ukwarwo, ukamenya n'ibyo uha abagukurikira.

Hari ibyo ushobora gutanga ntibyumvwe kimwe kuko wabitanze aho utagombaga kubitanga ndetse ubutumwa bwose umuntu asanga ahantu agasanga burasa, amagambo ku magambo usanga butishimirwa, igihe nta mwimerere bufite.

Amashirakinyoma ku kiyaga kizahangwa i Nyabugogo

By Ubukungu

Igishushanyo mbonera cy'Umujyi wa Kigali cyashyizwe ku mugaragaro mu mwaka wa 2013, kigaragaramo igice kizaba kigizwe n'ikiyaga gihangano kizahera ahahoze ari ‘parc industriel' kugeza mu gishanga cya Nyabugogo. Benshi bibazaga aho imirimo yo guhanga iki kiyaga yaba yarahereye ariko noneho umujyi wa Kigali watangaje ko ugikora inyigo y'umushinga w'iki kiyaga.

Umuyobozi w'Umujyi wa Kigali wungirije ushinzwe ubukungu, Busabizwa Parfait, yatangarije itangazamakuru ko bitebuke mu gishanga cya Nyabugogo hazahangwa ikiyaga. Yagize ati « Si inzozi ni umushinga ufatika kandi uzashyirwa mu bikorwa nubwo ntakubwira ngo igihe iki n'iki uzaba warangiye. Ikiyaga kizava hariya hahoze ari muri ‘parc industriel' kize mu gishanga cya ‘point lourd' cyose kigende kigere muri kiriya gishanga cya Nyabugogo.»

Uyu muyobozi yakomeje avuga ko uyu mushinga uri gukorerwa inyigo n'Umujyi wa Kigali ufatanyije n'Ikigo cy'Igihugu gishinzwe kurengera ibidukikije ‘REMA'. Akomeza avuga ko mu gihe kitarenze umwaka umwe n'igice abafite ibikorwa muri icyo gice kizajyamo ikiyaga kizahangwamo bakazaba bimuwemo kuko batangiye ibiganiro n'umujyi no kubabarira byaratangiye.

Iyo nyigo y'imiterere y'iki kiyaga ngo izagaragaza uko kizaba giteye, kikaba cyakubakwa nk'umushinga wa wa leta cyangwa mu bufatanye bwayo n'abikorera kuko cyaba ari igikorwa kizabyazwa inyungu. BIteganyijwe ko icyo kiyaga kizaba gikikijwe n'ubusitani abantu baruhukiramo, hakanabera ibindi bikorwa bitandukanye by'imyidagaduro.

Ku wa 19 Nyakanga 2017, ubwo perezida Kagame yiyamamarizagaga i Nyabugogo, yizeje abantu ibihumbi n'ibihumbi bari baje kumusanganira yuko mu myaka 7 iri imbere Nyabugogo izahindura isura. Yongeye kuvuga ko Nyabugogo igaragaza isura y'umuryango w'Ibihugu byo muri Afurika y'Iburasirazuba.

Yagize ati “Aha turi Nyabugogo, ibihakorerwa, abahari mwese, ubu ngubu Nyabugogo ni ikimenyetso cya East African Commmunity. Aha muri ibi bice byose n'ibihakorerwa hari abaturuka Uganda, Kenya, Tanzania, Burundi hirya no hino hose. Rero ni ikimenyetso cy'ukuntu dushaka uko u Rwanda rukura rugatera imbere ariko noneho dufatanya n'abaturanyi n'abanyamahanga…”

Nta gushidikanya iki kiyaga nikimara guhangwa i Nyabugogo kizaba kimwe mu byiza nyaburanga bitatse umujyi wa Kigali kandi kizagira uruhare mu kwinjiza amafaranga binyuze mu bikorwa by'ubushabitsi n'ubukerarugendo bugishamikiyeho. Iki kiyaga kandi kizagira uruhare mu guhindura isura y'umujyi wa Kigali by'umwihariko agace ka Nyabugogo.

RDB igiye guhemba ibyiciro 8 by'abashoramari

By Ubukungu

Ikigo k'igihugu k'iterambere (RDB) kiratangaza ko kigiye guhemba abashoramari bo mu byiciro 8, mu rwego rwo kubashimira ko bakoze neza ndetse no mu buryo bw'imikoranire myiza.

Nk'uko bisobanurwa n'Umuyobozi w'iki kigo, Clare Akamanzi, mu kiganiro n'itangazamakuru, ngo iki gikorwa kiri mu rwego rwo kwereka abashoramari banini n'abaciriritse ko igihugu kizirikana ibyo bakora birimo kugiteza imbere no kwiteza imbere ubwabo ndetse bakanatanga imirimo. Ati “Ubusanzwe RDB ifite umuco wo gutanga ibihembo ku bantu bakoze neza n'abatanga serivisi nziza, kuri iyi nshuro tukaba tuzahemba ibyiciro 8 by'abashoramari bazaba bagaragaye ko bahize abandi.”

Akamanzi yagarutse ku ruhare rw'abikorera mu iterambere ry'ubukungu bw'u Rwanda, abashishikariza kongera imbaraga no gukomeza kwiteza imbere no kuzamura ubukungu bw'igihugu mu byiciro byose.

Umuyobozi wungirije wa RDB ushinzwe ibikorwa, Hategeka Emmanuel, yasobanuye neza ibyiciro bizaba bigomba kwitabira aya marushanwa yamaze gutangira, kwiyandikisha bikazasozwa tariki ya 10 Ukuboza 2017. Yagize ati “Ubundi kwiyandikisha mu marushanwa ku byiciro binyuranye by'abashoramari byaratangiye, bizasozwa tariki ya 10 Ukuboza 2017, maze abatsindiye ibihembo babihabwe tariki ya 12 Mutarama 2018.” Yavuze ko muri ibyo byiciro by'abashoramari harimo umushoramari w'umwaka, akaba ari uwageze ku ishoramari riruta abandi.

Hari ikiciro cy'umucuruzi wohereje mu mahanga ibicuruzwa ku rugero ruciriritse ariko bifite inyongeragaciro igaragara. Muri ayo marushanwa kandi hazahembwa umushoramari w'udushya.

Hari n'ikiciro cy'umushoramari muto w'umwaka, ufite imyaka itarenze 35. Muri ayo marushanwa kandi hazaba harimo ikiciro cy'umushoramari wahize abandi mu gukora no gucuruza ibikorerwa mu Rwanda “Made in Rwanda.” Hategeka yongeyeho ko hari n'ikiciro cy'abashoramari ba serivisi, ubukerarugendo, ibigo by'imari, iby'ubwishingizi n'ibindi.

Umuyobozi wungirije muri RDB avuga ko abo bireba baziyandikisha banyuze ku rubuga rwa RDB, bagashyiraho amakuru aberekeye bitewe n'ibyo babazwa, nyuma bikazashyikirizwa abakemurampaka, bagahitamo abakwiye ibyo bihembo bagendeye ku barusha abandi, abatowe bakongera bagashyikirizwa ku nshuro ya nyuma abakemurampaka 3 bazaba bagomba kwemeza ibyo aba mbere bakoze.

Bamwe mu bari muri ibi byiciro bitabiriye imurikagurisha ry'ibikorerwa mu Rwanda baganiriye n'Imvaho Nshya ku bijyanye n'aya marushanwa, bishimiye ko hagiye kubaho amarushanwa azanitabirwa n'ikiciro cyabo, bavuga ko bishimye ko na cyo kitibagiranye kandi ko basanga ibyo bakora bihabwa agaciro gakomeye.

Bizimana Hamdan ukora inkweto, akaba aturuka mu karere ka Nyarugenge, yagize ati “Sinishimye kuko ari jye uzabona igihembo cya mbere, ahubwo nshimishijwe n'uko ikiciro cyacu k'ibikorerwa mu Rwanda kitibagiranye mu rwego rw'abashoramari, bigaragaza ko igihugu kiduha agaciro ku byo dukora, ndetse ni n'uburyo bwo kudushishikariza kwigira no kwihesha agaciro.”

Mukakabano Sifa na we ucuruza ibikorerwa mu Rwanda, yishimira ko Leta y'u Rwanda yabahaye urubuga rwo gukoreramo ndetse ngo n'isoko rikaba rihari, akanishimira kurushaho ko ikiciro cy'abashoboramari b'imbere mu gihugu bakora bakanacuruza ibikorerwa mu Rwanda batibagirana.

Ati “Ubu ni bumwe mu buryo bwinshi bwo guteza imbere ibikorerwa iwacu mu Rwanda, bizarushaho kugira agaciro ndetse n'umurimo dukora utange ikizere.”
Abashoramari banini n'abaciriritse ni bamwe mu bagira uruhare mu iterambere ry'ubukungu bw'igihugu, bakaba bashishikarizwa kwitabira aya marushanwa.

Mu Rwanda hakozwe intebe zishobora kumara imyaka isaga 150

By Ubukungu

Abanyeshuri batatu biga muri Musanze Polytechnique bakora intebe zo munzu no mu busitani bakoresheje isima n'ibyumba, zishobora kugeza ku myaka 150 zitarasaza.

Aba banyehuri babikora bagamije kurengera ibidukikije cyane cyane ibiti bikoreshwa mu bubaji, bavuga ko bishobora gukendera. Ndahimana Tharicisse, Nshimiyimana Eric na Samba Aime Jules n'abanyeshuri bahuriye muri Musanze Polytechnique biga mu ishami ry'ubwubatsi. Bishyize hamwe bakora umushinga wo gukora intebe zicarwaho mu ngo bakoresheje isima ndetse n'ibyuma.

Samba yagize ati “Igitekerezo twakigize nyuma yo kubona ko ibiti bikoreshwa mububaji birimo gukendera, intego akaba ari ukugabanya ikoreshwa ry'ibiti ku kigero cya 0,7% buri mwaka.”

Mu kwezi kwa Nyakanga umwaka ushize aba basore batsindiye igihembo cyitwa African Entrepreurship Academy. Cyabahesheje uburenganzira byo kujya kwerekana ibikorwa byabo mu mijyi y'i Burayi no muri Aziya.

Izi ntebe zifite ubushobozi bwo kumara imyaka 150 cyangwa inarenga zitaraza, aho intebe zo mubusitani zigura amafaranga ibihumbi 600 naho izo munzu zikagura ibihumbi 800, nk'uko Twahirwa abisobanura. Ati “Twaragabanyije kuko twatangiye tuzigurisha miliyoni, kandi Abanyarwanda barimo kugenda bitabira ibikorwa byacu. Ikindi kandi nubwo zikoze mu isima n'ibyuma ntabwo ziremereye.”

JPEG - 47.7 kb
Bemeza ko izi ntebe zishobora kumara imyaka isaga 150

Twahirwa avuga ko mu bushakashatsi bakoze ngo basanze ibikoresho bimeze nk'ibyabo byarubatswe mu mwaka w'i 1902 muri Leta z'unze ubumwe z'Amerika muri leta ya Ohio, ariko kugeza n'ubu bikaba bikiriho. Ati “Ubu biradutunze n'imiryango yacu, sitwe gusa kuko dukoresha abakozi 14, ariko intego akaba ari uko mu mwaka itanu bazaba bikubye gatanu.”

Ibi bikorwa aba banyeshuri bakora babifashwamo n'abarimu babigisha, umwe mubabafashije ni Bunani Hermas n'umwarimu w'aba banyeshuri. Avuga ko bigisha umwana nawe agatinyuka agakora ubushakashatsi ntiyumve ko ibyo mwarimu yamuhaye bihagije, akaba ariyo mpamvu bavumbura ibikorwa nk'ibi. Ati “Kuba abanyeshuri bakora imishinga nk'iyi n'ikimenyetso cy'ihame ryerekana ko ireme ry'uburezi mu Rwanda rigenda rigerwaho, kandi ibi bigatanga ikizere cy'ejo hazaza h'igihugu.”

Umuyobozi wa Musanze Polytechnique, Bayisenge Emile avuga ko abanyeshuri bafite imishinga nk'iyi batabatererana ahubwo babafasha kubona ibyangombwa by'ubuziranenge no kumenyekana. Ati “Dufite abanyeshuri benshi bafite imishinga ariko niyo barangije amashuri dukomeza kubakurikirana ndetse bagakomeza gukorera muri iki kigo tutabishyuza nubwo baba bakorera amafaranga, ibi biha ingufu n'abagenzi babo bakiri ku ntebe y'ishuri bigatuma bakora cyane kuko baba babona aho ababanjirije bamaze kugera.”

Uretse abo banyeshuri bakora intebe, muri Musanze Polytechnique harimo abanyeshuri bafite imishinga isubiza bimwe mu bibazo igihugu gifite, inatanga imirimo ku rubyiruko bagenzi babo.

Ibyari imyanda byahindutse imari ishyushye

By Ubukungu

Abakora umwuga wo gusana ibikoresho by'ikoranabuhanga byapfuye baravuga ko batakibangamirwa n'ibitagikora kuko babigurisha ku nganda zo hanze.

Mu gihe ubundi ibisigazwa bya za mudasobwa,ibya za televiziyo zashaje,amatelefone yapfuye byabatezaga umwanda bakabura aho babishyira, hari kompanyi yo mu Bwongereza ibibagurira ku 8.000Frw ku kiro kimwe. Blancomet recycling UK Ltd ni yo igura ibyo bikoresho by'ikoranabuhanga bishaje. Ikorera mu Rwanda kuva mu mwaka wa 2010, aho ibigura ikajya kubikoramo ibindi bikoresho bitandukanye.

Karibuze Sayidi Vienney ukorera mu Mujyi wa Kigali avuga ko ubundi ibyo bikoresho bishaje byababangamiraga cyane bakabura aho babishyira bigateza umwanda aho bakorera. Agira ati “Waburaga aho ushyira ibintu byawe, ibyo ugurisha n'ibyo wakoze. Ariko ubu biriya bitagifite akamaro tubishyira ku ruhande bakaza bakabitugurira bakaduha amafaranga. “Ubu ni imari ntibikiri imyanda, ziriya mudasobwa na telefone na biriya bishaje bisigara byose baduha amafaranga.”

Twagirayezu Alexis ukorera ku mu Murenge wa Gitega mu Karere ka Nyarugenge, avuga ko abo bantu bagura ibyo bikoresho atabazi kuko ntawe uramugeraho kandi byamubanye byinshi. Ati “Abo bandi bafite ababibagurira nanjye mbabonye nabibaha kuko nanjye njya mbigira.Njya mbyumva ngo barabigura ariko ntabo ndabona.”

Abahanga mu by'ubuzima bahamya ko ibikoresho by'ikoranabuhanga bishaje bitagomba kujugunywa ahabonetse hose kuko hari ibiba bifite imirasire(rayons) yangiza umubiri.Batanga inama zo kujya bongera bakabikoramo ibindi bintu aho kugugunzwa.

Umunyamabanga wa Leta muri Minisiteri y'ibikorwa remezo, Kamayirese Germaine, aherutse kubwira Inteko shinga amategeko y'u Rwanda ko icyo kibazo cy'iyo myanda cyashakiwe umuti,hubakwa uruganda mu Bugesera ruzajya rwongera kubikoramo ibindi bikoresho (recycling).

Urwo ruganda biteganijwe ko ruzatangira gukora mu mwaka wa 2018, kandi rukazajya rugira site rukoreraho zizwi ngo ku buryo abantu bose bazajya babimenya,bakazana ibyo bikoresho bishaje bafite ababibagurira.

Imibare yo muri 2016 igaragaza ko abantu ku giti cyabo ari bo babitse igice kinini cy'ibikoresho by'ikoranabuhanga biba byarashaje, kuko bafite ibirenga 81% mu gihe ibisigaye biri mu bigo bitandukanye bya leta n'ibyigenga.

"Made in Rwanda Expo" : Ibicuruzwa ni byiza ariko birahenze cyane

By Ubukungu

Mu imurikagurisha ry'ibikorerwa mu Rwanda ririmo kubera i Kigali hagaragaramo ibicuruzwa byinshi bikorerwa mu Rwanda. Gusa ku rundi ruhande abaguzi bo bavuga ko ibicuruzwa bikorerwa mu Rwanda bihenze cyane kurusha ibiva mu mahanga, ibintu ariko Leta ivuga ko buhoro buhoro arirwo rugendo kandi ngo uko imyaka ishira indi igataha ibikorerwa mu Rwanda bigenda byiyongera mu bwiza no mu bwinshi.

Ku wa 30 Ugushyingo 2017 ubwo Minisitiri w'Ubucuruzi n'Inganda Munyeshyaka Vincent yafunguraga ku mugaragaro imurikagurisha ry'ibikorerwa mu Rwanda “Made in Rwanda Expo 2017” ku nshuro ya gatatu” yavuze ko hakurikijwe umubare w'abitabira kumurika no kugura ibikorerwa mu Rwanda n'uko inganda zigenda zongera ubwinshi bw'ibicuruzwa ku isoko ry'imbere mu gihugu, ibikorerwa mu Rwanda bimaze kwiyongera haba mu bwinshi no mu bwiza kandi byujuje ubuziranenge.

Minisitiri Munyeshyaka yavuze ko muri gahunda yo guteza imbere ibikorerwa mu Rwanda, bikwiye kwishimirwa ko umubare w'abamurika wazamutseho 68% kuva muri 2015, aho ku nshuro ya mbere hamuritse abantu 250, muri 2016 hamurika abantu 305 ubu bakaba bageze kuri 420 kandi n'abaryitabira umubare uzamuka.

Ati “Nagira ngo nsabe abikorera kwigiramo ikizere no gukomeza kubaka icyo kizere. Birimo kugaragara ko ibyo dukora bigenda byiyongera mu bwinshi ariko cyane cyane mu bwiza. Mu buryo bwose n'ingendo mazemo iminsi biragaragara ko inganda nyinshi n'ibigo biciriritse barimo gukora ibintu bibasha guhangana ku isoko mpuzamahanga. Nabonye muri rusange ko ibyinshi bikorwa ubu ngubu byoherezwa hanze, ahenshi bari ku kigero cya 80%.”

Yibukije bamwe mu bafite inganda ko nubwo benshi bihutiye kohereza kuri iryo soko ariko bakwiye kwibuka kugaruka bakabanza guhaza isoko ry'imbere mu gihugu, nk'imwe mu ntego z'ibanze za gahunda ya ‘Made in Rwanda'. Ati “Ikizakurikiraho, ni ukuzabibutsa ko n'isoko ry'imbere mu gihugu na ryo rikeneye kwihaza kuko bigaragara ko abantu batangiye bareba isoko ryo hanze; ni byiza ariko ngira ngo ujya gutera uburezi arabwibanza”.

JPEG - 60.4 kb
Muri Expo haramurikwa moto ziteranyirizwa mu Rwanda

Maniraguha Martin, Umuyobozi mu ruganda rw'imyenda rwa “Hema Garment Ltd”, ruri mu karere ka Musanze, yavuze ko mu mezi atatu rumaze isoko rya mbere bahereyeho ari Abanyarwanda, cyane ku bo mu karere ka Musanze na Rubavu, bityo uruganda rugeze ku kigero cya 60%.

Umuyobozi w'Inama y'ubutegetsi y'urugaga rw'abikorera, PSF, Benjamin Gasamagera, yavuze ko abikorera biyemeje ko bazafasha Leta kugabanya ibiva hanze kuva ku kigero cya 30% kugera kuri 50% mu myaka itanu, ni ukuvuga kugera muri 2021.

Imurikagurisha rya ‘Made in Rwanda' ku nshuro ya gatatu ryatangijwe, biteganyijwe ko rizasoza tariki ya 5 Ukuboza 2017.

JPEG - 53 kb
Haramurikwa inzu zimukanwa

Abiga muri UR bashengurwaga na Buruse y'iyanga Guverinoma ishobora kubatera akanyamuneza

By Ubukungu

Ubwo yagezaga ibikorwa bya Guverinoma mu bijyanye n'uburezi, Minisitiri w'Intebe Dr Ngirente Edouard yijeje Inteko Ishinga Amategeko hashyizweho Komisiyo iri kwiga ibibazo biri muri Kaminuza y'u Rwanda.

Ni kenshi ikibazo cy'imibereho y'umunyeshuri wa UR cyakunze kubazwa inzego zitandukanye, aho abanyeshuri bakunze kugaragaza ko amafaranga ibihumbi 25 bahabwa na Leta adahagije ku buryo babasha kubaho ndetse bakaniga neza. Nyuma y'aho Minisitiri w'Intebe atanze ishusho y'uruhare rw'ubumenyi mu iterambere ry'igihugu, hatanzwe umwanya wo kubaza ibibazo bigamije kuzamura u Rwego rw'uburezi mu Rwanda.

Ikibazo cy'ireme ry'uburezi ni cyo kibanzweho cyane, aho benshi mu basabye ijambo bagaragaje ko ireme ry'uburezi rikijegaje, hakaba hakenewe ingamba zimbitse zo kurizahura.

Ku kibazo cy'amafaranga ahabwa abanyeshuri ba UR agamije kubatunga, Depite Mukazibera Agnes yabajije Minisitiri w'Intebe niba yaba yarigeze agera muri UR ngo amenye uko icyo kibazo gihagaze. Aho ngo gishobora kuba kibangamira ireme ry'uburezi.

Yagize ati “Ibi bihumbi 25 mu buzima abanyeshuri babayemo nifuzaga ko nyakubahwa Minisitiri w'Intebe agira icyo abivugaho, umunyeshuri agomba kubona bitari ukwishyura icumbi, kugira ibyo ashobora gufungura, hari ugufotoza inyandiko z'amasomo hari n'ibindi byose asabwa,hari n'amafaranga y'urugendo, Nyakubahwa Minisitiri w'Intebe yaba yaragiye kuri ‘terrain'kugira ngo arebe uko abanyeshuri babayeho kugira ngo bashobore kwiga?”

Mu gusubiza iki kibazo, Minisitiri w'Intebe yavuze ko hashyizweho komisiyo ireba ibibazo bya UR byose, aho ngo n'icyo cy'ayo mafaranga kiri kwigwaho. Yagize ati “Iki ni ikibazo rusange ariko turakizi no muri iyi minsi kiri mu biganirwaho kuko turatekereza ku burezi ku buryo bwimbitse cyane, twakiganiriyeho ndetse nabizaza ko komisiyo twashyizeho muri iyi minsi iri kutwigira ireme ry'uburezi mu rwego rwa kaminuza n'ibyakorwa, iki na cyo yakigarutseho, cyo kureba ese abanyeshuri iyo babonye bwa bufasha bwa Leta bwo kwiga ese butuma babaho mu mibereho isanzwe?”.

Yavuze kandi ko bari kureba n'uburyo abanyeshuri bahabwa amacumbi ahoy aba ari atarimo abantu kugiora ngo babashe kuba ahantu heza. Yunzemo ati “ Iki ngiki nacyongeraho ndetse ko dutekereza kuri ayo mafaranga tubaha tukanatekereza no kongera kubatuza mu macumbi ya kaminuza aho yaba akiri adafite abantu batayatuyemo.

Mu bindi bibazo byabajijwe harimo kuba hari amavugururwa yabaye muri UR ndetse amashuri amwe n'amwe akimurwa, ibi ngo bikaba bizateza ikibazo gikomeye, aho ngo hari aho abanyeshuri bajyanwe hatari ibimoresho ndetse bakaba bari mu bucucike bukabije.

Minisitiri Ngirente akaba yavuze ko ayo mavugururwa yari ngombwa, gusa yemeza ko ibibazo birimo bizwi, hakaba hari gahunda yo kubishakira umuti mu maguru mashya.

Ibihumbi 25 bihabwa abanyeshuri koko birahagije?

Ubwo mu minsi ishize UR yagiranaga ibiganiro na Komisiyo y'uburezi, umuco, urubyiruko n'ikoranabuhanga, Dr Muligande Charles, Umuyobozi wungirije ushinzwe iterambere rya UR, yavuze ko abanyeshuri bahabwa inguzanyo yo kwiga muri UR baba bari mu cyiciro cya mbere n'icya kabiri by'ubudehe.

Ibyo byiciro ngo umuntu ntaba anabasha kuba yakwigurira Mituelle de Santé.

Avuga ku mafaranga abanyeshuri bahabwa abatunga angana n'ibiuhumbi 25 ku kwezi yagaragaje ko umunyeshuri yishyura icumbi amafaranga 5000 cyangwa 6000.
Iyo havuyemo amafaranga y'icumbi hasigara ibihumbi 19, aba agomba kuryamo ndetse n'utundi dukoresho dukenerwa.

Yavuze ko mu kurya k'umunyeshuri, atungwa n'udushyimbo ndetse n'umutsima, aho ngo bisaba ko arya amafaranga 600 ku munsi. Bishatse kuvuga ko ku kwezi umunyeshuri wa UR arya ibihumbi 18.

Mu mafaranga yose aba yakoreshejwe ngo hasigara amafarnaga 1000 gusa, aho ngo aba ari yo akoresha mu gufotoza inyandiko z'amasomo, kugura isabune ndetse n'ibindi. N'ubwo amafaranga 25 abanyeshuri bahabwa buri kwezi bigaragara ko ari make ngo hari n'igihe imiryango baturukamo baba bashaka amakiriro kuri utwo duhumbi, nk'uko Dr Muligande yatwise.

39% by'abakozi bari mu kazi nta bumenyi bujyanye n'isoko ry'umurimo bafite

By Ubukungu

Ni kenshi mu kazi ka Leta hagaragazwa amakosa yamunze imikorere y' inzego zimwe na zimwe zihora zisobanura imbere y'inteko ishinga amategeko buri gihe uko umwaka ushize undi ugataha. Mu kwisobanura, ni kenshi bivugwa ko imikorere mibi iterwa n'abakozi badafite ubumenyi buhagije mu kazi. Si mu kazi ka Leta gusa ibintu byazambye kuko no mu bikorera ibintu atari shyashya. Ibi bishobora gushimangirwa n'imibare igaragaza ko 39% by'abakozi bari mu kazi nta bumenyi bujyanye n'isoko ry'umurimo bafite.

Guverinoma y'u Rwanda ikomeje gushyira imbaraga mu kuzamura ubumenyi bw'Abanyarwanda benshi kugira ngo babe ishingiro ry'ubukungu bushingiye ku bumenyi n'ubushobozi, nk'imwe mu ngamba izagabanya icyuho cy'abakozi bafite ubumenyi bujyanye n'ibikenewe ku isoko ry'umurimo ubu bangana na 61% gusa.

Mu kiganiro ku ruhare rw'uburezi mu kubaka igihugu gifite ubukungu bushingiye ku bumenyi, Minisitiri w'Intebe, Dr Ngirente Edouard, yagejeje ku Nteko Ishinga Amategeko, imitwe yombi, yagaragaje ko mu ngeri zitandukanye zifatiye runini ubukungu bw'igihugu hakiri ibyuho.

Raporo ya World Economic Forum yo mu 2017 ‘Global Human Capital Report', yagaragaje ko 62% by'abatuye Isi bose ari bo bafite ubumenyi n'ubushobozi bujyanye n'ibikenewe ku isoko ry'umurimo, inerekana ko 38% ari abantu bafite impano zitabyazwa umusaruro.

Minisitiri w'Intebe yagarutse ku ruhande rw'u Rwanda aho abagera kuri 39% ugereranyije n'abari mu kazi badafite ubumenyi bujyanye n'isoko ry'umurimo. Yagize ati “By'umwihariko mu Rwanda abafite ubumenyi bujyanye n'ibikenewe ku isoko ry'umurimo ni 61%, ugereranyije n'abantu bose bari mu kazi.”

Ibi byanashimangiwe n'inyigo yakozwe muri uyu mwaka n'ikigo cy'igihugu gishinzwe kubaka ubushobozi no guteza imbere umurimo yagaragaje ko hakiri icyuho mu byerekeranye n'ubumenyingiro mu kuzamura ubukungu bw'igihugu.

Mu nzego zitandukanye kubona abakozi bashoboye biracyari ingorabahizi

Mu bijyanye n'ubuhinzi bw'icyayi harimo kugihinga, kucyongerera agaciro, kugera kigejejwe ku isoko, hagaragajwe ko bafite ubushobozi ari 2500 nyamara hakenewe 7000 muri uyu mwaka naho mu 2020 hakazaba hakenewe 9000, mu 2025 hagakenerwa 12000.

Abantu bafite ubumenyi mu bijyanye no guhinga no gutunganya ikawa, ni 2657 ku 3687 bakenewe muri 2017. Muri 2020 hazakenerwa 4800 n'abagera ku 6500 muri 2025. Abafite ubushobozi bwo guhinga imbuto, imboga n'indabyo ni 39 ku bantu 528 bakenewe muri 2017 , muri 2025 hazaba hakenewe 900.

Mu bucukuzi bw'amabuye y'agaciro no kuyatunganya, intego ni ukuwukura ku 10% ukagera kuri 20% mu 2024; abafite ubushobozi ni 13000 ku bantu bagera ku 23 900 bakenewe uyu munsi. Mu bakozi bahari muri bo 43% ni abakora ubucukuzi buciriritse.

Ubumenyi mu rwego rw'ubukerarugendo bushingiye ku nama, ababufite ni 41000 mu gihe mu 2020 abazaba bakenewe ari 82,400. Ku bijyanye n'inganda zitunganya umusaruro ukomoka ku mata, abangana na 76% by'abakora muri urwo rwego nta bumenyi bwihariye babifitemo akaba imwe mu mpamvu 10% by'amata aboneka mu gihugu ariyo yonyine atunganywa. Hakenewe abantu bagera kuri 730.

Mu nganda zikora imyenda, hakoramo abakozi 1500 ariko hakenewe abakozi bafite ubumenyi bwihariye bagera 2930; hakenewe ubumenyi muri tekiniki zo gukora imyuga, gukoresha imshini no kuzikanika, abanyamideli n'abahanga mu kuvanga amarangi.

Ku birebana n'iterambere ry'imijyi, mu 2018 hazaba hakenewe 11500, muri 2024 ni 17000 ubwo bumenyi harimo igenamigambi ry'imijyi, kubaka, gukora ibishushanyo mbonera n'ibindi. Mu bijyanye n'iby'indege hakenewe abantu 276. Mu bijyanye n'ingufu hakenewe abantu 2750 bafite ubumenyi butandukanye mu byerekeye ingufu zituruka ku ngomero z'amazi, nyiramugengeri, amashyuza, gazi metani no ku mirasire y'izuba.

JPEG - 83.9 kb
Minisitiri w'intebe n'abayobozi b'imitwe yombi y'inteko ishinga amategeko

Abadepite batunze agatoki impinduka za hato na hato zikorwa mu burezi, imibereho ya mwalimu, ubucucike mu mashuri nka bimwe mu bituma abanyarwanda barangiza kwiga nta bumenyi bwo guhangana ku isoko ry'umurimo. Depite Nyirarukundo Ignacienne yagize ati “Niba 61% bari mu mirimo aribo bafite ubushobozi ni ugutakaza kabiri kuko umurimo ntuboneka kandi agahembwa. Ni ibintu bikwiye guhagurukirwa n'imbaraga zacu zose abantu bakabishakira umuti ku buryo bwihutirwa.”

Depite Theobald Mporanyi nawe yagize ati “Impinduka za buri munsi zikorwa mu burezi nta bushakashatsi bwabayeho ugasanga abanyeshuri bahora mu cyeragati, ni ikintu gikwiye kwitabwaho cyane.”

Ibi byagarutsweho na Depite Kankera wagarutse ku mavugurura ya Kaminuza y'u Rwanda, yakozwe ariko ugasanga arimo ibibazo byinshi nk'aho hari aho usanga abanyeshuri biga bahagaze, nta laboratwari zihari cyangwa n'izihari nta bikoresho bihari ndetse n'izo mpinduka ugasanga nta mwanya wo kuzimenyera utangwa. Depite Rucibigango we yagaragaje ko usanga abanyeshuri binjira muri za kaminuza igihiriri nyamara kimwe cya gatatu cyabo ari bo bafite ubushobozi bwo kuzigamo.

Ikibazo cy'iremere ry'uburezi kigarukwaho kenshi mu Rwanda, inzego zibishinzwe zikagaragaza ko hari ingamba nyinshi zafashwe mu kugera ku ryifuzwa.

Musanze: Mu minsi mikuru inyama zishobora kuribwa n'umugabo zigasiba undi

By Ubukungu

Nyuma y'aho Akarere ka Musanze gafashe icyemezo cyo gufunga ibagiro rimwe rukumbi kagiraga kubera umwanda no gusaza, abakunzi b'akaboga bararirira mu myotsi kubera ko ibiciro byako byazamutse bikaba bishobora kurushaho mu bihe by'iminsi mikuru.

Kuri ubu ikilo cy'inyama kiri ku 2000 kivuye ku 1600 mbere yo gufunga ibagiro rya Musanze. Bamwe mu baganiriye n'itangazamakuru bavuga ko bamaze iminsi babayeho nabi kuko ibiciro by'inyama byazamutse. Hakizimana Asumani ufite restaurant yagize ati “Ubu tumerewe nabi kuko inyama zirahenze cyane kandi twe ntidushobora kuzamura ibiciro by'ibiryo, twahisemo kureka guteka inyama kuko zatugushaga mu gihombo.”

Muhoza Regine utuye mu mujyi wa Musanze, we yemeza ko kuba ibiciro by'inyama byarazamutse byatumye bafata umwanzuro wo gusa n'abazivuyeho. Ati “Naguraga ibiro bitandatu mu cyumweru tukazirya mu rugo ariko ubu nahisemo kujya nigurira intoryi, hatagize igihinduka no mu minsi mikuru nizo tuzakoresha kuko sinagura ibiro bibiri ngo bigire icyo bikora mu muryango wanjye.”

Si aba gusa kuko n'abacuruzi bavuga ko kuba aka karere karafunze ibagiro bakoreshaga bibabangamiye cyane kandi bibagoye kuko bubona inyama bisaba kujya kuzirangura mu tundi turere. Semakeri Issaka yagize ati “Kuvana inka Musanze ukayijyana kuyibagira muri Gakenke na byo ni ibintu bitugoye kuko inka yiyongeraho amafaranga agera ku bihumbi 30 by'amafaranga y'u Rwanda, ubu umuguzi ari kuza twamubwira ko ziri kugura 2000 agahita yigendera ntagure, nacuruzaga inka ebyiri ku munsi ariko ubu imwe na yo ntiri gushira.”

Umuyobozi w'Akarere ka Musanze wungirije ushinzwe ubukungu, Ndabereye Augustin avuga ko ikibazo cy'ibagiro gihari ariko nta gihe kizwi atanga kizaba cyakemutse. Ati “Ikibazo kirahari kuko ibagiro ryari rihari ryarafunzwe kubera
rishaje, ubu twabonye ikibanza kandi turacyari gushaka abafatanyabikorwa ngo hubakwe ibagiro rigezweho.”

Amarira y'abagenzi batagangarira ku mihanda ya Kigali bazayahozwa nande?

By Ubukungu

Nyuma yaho hatangijwe uburyo bwo gukoresha amakarita (Tap and Go) ku bagenzi batega imodoka muri Kigali, iyi gahunda n'ubwo yishimiwe na benshi, hari abo ibangamiye basaba gutabarwa.

Gahunda ya "Tap and go" n'ubwo nayo yari yitezweho kugabanya ibibazo byo gutinda ku mihanda, bisa nk'aho urwishe ya nka rukiyirimo. Hirya no hino ku mihanda ya Kigali haracyagaragara imirongo minini y'abagenzi bategereza imodoka zibatwara bajya mu kazi cyangwa bavayo, bakamara hafi isaha yose batarabona imodoka ibatwara. Ibintu bihumira ku mirari mu masaha ya mu gitondo n'ayo ku mugoroba aho abagenzi batagangarira ku mihanda bakijujuta ariko ntibigire icyo bitanga.

Ubwiza bw'iyi gahunda ni uko ijyanye n'iterambere kandi ifasha abagenzi kuko badasabwa kugendana amafaranga mu mufuka, aho bamwe bashobora kugira ubwoba bwo kuyibwa.

Bimwe mu bibangamiye abatega izi modoka ni ibiciro bisa nk'aho byazamutse cyane ku buryo basaba ko byakwigwaho neza. Urugero rumwe ni Nyabugogo-Kibagabaga. Kuva Nyabugogo kugera Kibagabaga bahatangaga amafaranga 230 mbere yuko iyi gahunda yo gukoresha amakarita itangira ariko ubu barimo kwishyura amafaranga 470 nk'umuntu ugiye Kabuga. Aya mafaranga kandi atangwa n'uwari we wese bitewe naho aturutse, nka Kinamba agana Kibagabaga, bityo bagasaba ko byakwiganwa ubushishozi.

Uri ni urugero rumwe ariko no hirya no hino muri Kigali niko bimeze. Ubundi umuntu wavaga Kimironko agana I Kabuga, yishyura amafaranga 270, uvuye ku Mulindi agana I Kabuga agatanga 100 gusa none aho iyi gahunda itangiriye, uwatangaga 100 asigaye yishyura 270 kimwe n'uvuye Kimironko.

Kuki ibi bidakosorwa ariko abagenzi bagatekana ko bishoboka. Nka Nyabugogo-Kibagabaga hakwiye kujyaho imodoka zihariye zihagarukira ku buryo ibiciro bidahinduka kuko mu busanzwe batega Nyabugogo-Kimironko-Kabuga, bityo bagasaba ko hashyizweho imodoka Nyabugogo-Kibagabaga batabangamirwa nibyo biciro kuko bakomeza kwishyura amafaranga 230 nkuko byari bisanzwe.

Abava ku isoko rya Mulindi bagana I Kabuga nabo bagashyirirwaho ligne yaho yihariye kuko hari abagenzi benshi barema ririya soko rivugwa kuba mpuzamahanga.

Nta utishimiye iterambere ariko hanatekerezwe uburyo aba baturage bafashwa kuko amafaranga y'urugendo yikubye kabiri cyangwa gatatu hamwe na hamwe. Ikindi aba bagenzi bagaragaza ko ari ikibazo mu ikoreshwa ry'aya makarita, ni uburyo asigaye yibwa.

Abayakora bakwiye gushaka uburyo ikarita yakwandikwa kuri nyirayo ku buryo n'igihe yibwe uwayibye adashobora kuyikoresha. Izi karita ziribwa cyane kandi uzibye akazikoresha nta kibazo. Kuki hatajyaho uburyo bworoshye bwo kubona ikarita yawe igihe yibwe nuburyo uwayibye adashobora kuyikoresha?

Uretse kandi kwibwa, hari abagenzi baziha abashoferi cyangwa aba konvwayeri ngo babakorezeho kuko baba batazi kubikora maze bakazibahindurira bagahabwa izitariho amafaranga ku buryo ashyira ku mashini bakamubwira ko amafaranga yashize kandi yari ariho. Ibi byose bikwiye gutekerezwaho maze umugenzi agatekana.

Imyenda yakorewe mu mahanga igiye kuba amateka mu Rwanda

By Ubukungu

Urugaga rw'abikorera mu Rwanda (PSF) rutangaza ko kugeza ubu kugura imyenda n'ibikoresho by'ubwubatsi mu mahanga bitakiri ngombwa kuko inganda zibikorera mu Rwanda.

Byatangajwe ubwo hafungurwaga ku mugaragaro imurikagurisha ry'ibikorerwa mu Rwanda (Made in Rwanda) ririmo kubera i Gikondo kuva tariki 29 Ugushyingo kugera 05 Ukuboza 2017.

Iri murikagurisha ryitabiriwe n'abamurika 405 barimo abatuganya ibikomoka ku buhinzi n'ubworozi, abanyabugeni n'ubukorikori, abateranya ibikoresho by'ikoranabuhanga, ibinyabiziga, abakora imyenda ndetse n'abafite inyubako zimukanwa.

JPEG - 170.4 kb
Inzu yimukanwa nayo iri kumurikwa muri Expo

Kuri iyi nshuro ya gatatu iri murikagurisha ribaye, PSF ivuga ko abamurika bashoboye guhaza Abanyarwanda ku bijyanye n'imyambaro na byinshi mu bikoresho by'ububatsi; nk'uko umuyobozi mu biro muri PSF, Stephen Ruzibiza abisobanura. Agira ati “Ntibikiri ngombwa kugura imyenda n'ibindi birimo ibikoresho by'ubwubatsi biva hanze kuko inganda zacu zirabikora.”

Akomeza avuga ko imurikagurisha ry'ibikorerwa mu Rwanda ry'ubutaha ritazabera mu mahema akorerwa mu mahanga nk'uko bisanzwe, kuko ngo inganda zo mu Rwanda zizaba zakoze ibiyasimbura.

Ruzibiza avuga ko ubushobozi bw'inganda zo mu Rwanda zikora ibijyanye n'ubwubutasi, imyenda n'ibikomoka ku biribwa bugeze ku rugero rwa 75% mu guhaza isoko ry'u Rwanda. Akomeza asobanura ko abikorera bagifite ikibazo cy'ibura ry'ibikoresho byo gupfunyikwamo bikiri ku rugero rwa 35% n'ibyuma bikiri ku rugero rwa 16% mu guhaza isoko ry'u Rwanda.

Perezida wa PSF, Benjamin Gasamagera asobanura ko abanyenganda batarabona umuriro n'amazi bihoraho, ndetse ngo bafite n' ikibazo cy'igiciro gihanitse cy'amashanyarazi, ibikoresho by'ibanze n'urugendo.

Minisitiri w'Ubucuruzi n'Inganda, Vincent Munyeshyaka wafunguye iryo murikagurisha yizeje inganda zo mu Rwanda ko Leta ikomeje gushaka amashanyarazi n'uburyo yabasonera imisoro ku bikoresho by'ibanze.

Avuga kandi ko itegeko rigenga amasoko ya Leta ririmo gutorwa n'Inteko ishinga amategeko. Iryo tegeko rivuga ko ibikorerwa mu Rwanda bizajya bikoreshwa cyane kurusha ibiva ahandi, ndetse ababikora bagahabwa amanota 15% mu gupiganira isoko.

Minisitiri Munyeshyaka yatangaje ko kuva mu mwaka wa 2010 kugera muri 2016, ibitumizwa hanze byagabanutse ku rugero rwa 8%, mu gihe ibyoherezwa hanze byo byiyongereyeho 10%.

Abaturage batewe impungenge n'izamuka rikabije ry'ibiciro by'ibiribwa

By Ubukungu

Abacuruzi b'ibiribwa baravuga ko kuzamuka kw'ibiciro bishobora kuba bifitanye isano no gukendera kwabyo, kuko batakirangura nk'uko baranguraga mu myaka yatambutse.

Abenshi mu batangaza ibyo ni abakorera mu masoko yo mu Mujyi wa Kigali, basobanura ko kuba ibiciro by'imyaka bigenda birushaho kuzamuka nabo bibagiraho ingaruka zingana n'izigera ku babagurira.

Vestine umwe mu bacururiza ibiribwa mu isoko rya Nyabugogo, avuga ko we asanga kuzamuka kw'ibiciro biterwa n'uko imyaka yakendereye ku buryo batagicuruza nk'uko bacuruzaga. Agira ati “Ibiciro byariyongereye n'abakiriya barabuze, kuko nk'ibishyimbo byaguraga 500Frw ubu ni 800Frw ikiro cy'ibitonore, ibirayi byaguraga 200Frw none ni 250Frw na 300Frw, urumva ko byazamutse kubera ko imyaka ntayo.”

Mugezi we ukorera mu isoko rya Nyarugenge, avuga ko byagize ingaruka ku bakiriya kuko bagenda bagabanuka kubera ibiciro bizamuka. Ati “Amafaranga wacuruzaga mu myaka ibiri ishize ntabwo akibonekamo hano, kubera ko wicaramo hano ukarinda ugeza nimugoroba ubonye amafaranga 500Frw kandi mu myaka ishize waracuruzaga ku buryo imari yose waranguye ihita ishira.”

Kuzamuka kw'ibiciro ntibyagize ingaruka ku bacuruzi usa gkuko harimo n'abagura bavuga ko byatumye ingano y'ibyo bahahaga igabanuka, nk'uko bitangazwa na Nsengiyumva Celestin umwe mu baguzi. Ati “Mbere twashoboraga kugura nk'ibiro 50 by'ibirayi ariko ubu sinarenza ibiro 30, kuko nakoreshaga ibihumbi 12.000Frw cyangwa munsi yayo ariko uyu munsi udafite 15.000Frw no kuzamura ntushobora kubibona.”

Dr. Murekezi Charles, umuyobozi mukuru ushinzwe iterambere ry'ubuhinzi muri Minisiteri y'Ubuhinzi n'Ubworozi (MINAGRI), ahakana ibivugwa ko kuzamuka kw'ibiciro bifite aho bihuriye n'ikendera ry'ibiribwa.

Atanga urugero rwo mu myaka itatu ishize aho ibigori byazamutse ku kigereranyo cya 33%, bivuye kuri toni 282 bigera kuri toni 374, akavuga ko n'ibindi bihingwa ari uko byagenze. Ati “Impamvu nyamukuru ni uko twabaye isoko rigari, isoko ry'akarere, izamuka ry'ibiciro rero riterwa n'uko iryo soko riteye, kuko usanga ababikenera babaye benshi ugasanga igiciro kirazamutse.”

Muri iri soko ryo mu karere ngo u Rwanda rutangamo ibiribwa bitandukanye birimo ibigori, ibishyimbo, imboga, amatungo n'amata. Ahumuriza Abanyarwanda kutagira impungenge z'ikendera ry'imyaka kuko MINAGRI ifite ibigega birimo ibigori n'ibishyimbo bishobora kubatunga mu gihe cy'amezi abiri. Ibyo bigega bikiyongera ku bindi bigo bikora ubucuruzi bw'imyaka na byo bifite umusaruro byahunitse.

Gukora intebe mu mapine y'imodoka bimaze kumwinjiriza miliyoni 5RWf

By Ubukungu

Kalisa Parfait wo mu Karere ka Bugesera yiyemeje kurengera ibidukikije afata amapine ashaje y'imodoka akayakoramo intebe zo kwicaraho mu ruganiriro.

Uwo musore ufite imyaka 26 y'amavuko, afite ‘Atelier' akoreramo izo ntebe mu Mujyi wa Nyamata. Kalisa wari usanzwe akora umwuga w'ububaji, avuga ko yatangiye gukora intebe mu mapine y'imodoka muri Gashyantare 2017. Avuga ko mu mezi umunani ashize akora izo ntebe amaze kwinjiza miliyoni 5RWf.

Akomeza avuga ko akora intebe zo mu ruganiriro. Intebe n'ameza bikoze mu mapine abigurisha ibihumbi 120RWf.Ipine y''imodoka ishaje imwe ayigura 2000RWf. Kalisa avuga ko yagize igitekerezo cyo gukora intebe mu mapine y'imodoka nyuma yo kubona ko imbaho zo kubazamo ibikoresho bitandukanye zishobora kuzabura kubera ko amashyamba mu Rwanda ari make.

Agira ati “Nibwo narebye ipine nsanga nshobora kuribyazamo ikindi kintu aho kugira ngo baritwike rikanduza ibidukikije babuze aho barishyira. Nibwo nahisemo kurikoramo intebe n'ameza mbona abantu barabikunze nkomeza gutyo.” Akomeza avuga ko nta gishoro gihambaye yatangiranye kuko yatangiye afite ibihumbi 10RWf gusa. Ati “None kuri ubu maze gukuramo asaga miliyoni 5RWf kandi narishyuye abakozi batatu nkoresha. Ndateganya gufata ibindi bikoresho biba byarashaje na byo nkabibyaza umusaruro, aho kugira ngo bijye birushya abantu babuze aho kubita.”

Kalisa avuga ko bimusaba icyumweru kimwe ngo abe arangije gukora intebe n'ameza byo mu ruganiroro bikoze mu mapine. Uwo rwiyemezamirimo avuga ko yanitabiriye imurikagurisha ry'Intara y'Iburasirazuba riherutse kubera mu Karere ka Kayonza. Yemeza ko ubwo yajyanagayo izo ntebe abantu batandukanye bazikunze bamusaba ko nabo yabakorera izo kwicaraho. Ibyo byatumye ahabwa n'igihembo nk'umuntu wagaragaje ibintu bidasanzwe muri iryo murikagurisha.

Kalisa kandi ari muri ba rwiyemezamirimo bakiri bato bahatanira igihembo cyo ku rwego rw'igihugu. Yanahawe igihembo cy'ibihumbi 150RWf n'ubuyobozi bw'Akarere ka Bugesera. Uwo musore yatanze n'akazi kuko akoresha abakozi batatu ahemba ibihumbi 80RWf buri kwezi.

Nzabirinda Jean Baptiste, umwe muri bo avuga ko kuri we byari inzozi kumva ko amapine ashobora kubyazwamo ibikoresho byo mu rugo. Agira ati “Nabonaga abana bayakinisha andi bakayakoramo inkweto none uyu mugabo yaranzanye ampa akazi anyigisha gukora ibi bikoresho tubikuye mu mapine none ubu amafaranga nkorera aha amaze kungeza kuri byinshi.”

Umuhuzabikorwa w'inama y'igihugu y'urubyiruko mu Karere ka Bugesera, Mutware Antoine avuga ko ari amahirwe ku ruhande rw'akarere kuba bunguka urubyiruko rushobora guhanga imirimo iruteza imbere. Agira ati “Turabyishimira cyane kuko abahanze utu dushya banagira uruhare mu guha urundi rubyiruko akazi.”

Akomeza agira ati “Akarere kiyemeje kujya buri mwaka gakoresha amarushanwa y'udushya mu kubikundisha urubyiruko kandi uyu Kalisa akaba yarahembwe muri ubwo buryo.” Mutware yongeraho ko bafata urubyiruko rufite udushya n'indi mishinga, bukabahuza n'ibigo by'imari n'ibigega byunganira urubyiruko.

Mahama: Impunzi z'Abarundi zabuze isoko ry'ibiseke n'ibikapu ziboha

By Ubukungu

Abagore n'abakobwa b'impunzi z'Abarundi baba mu nkambi ya Mahama iri mu Karere ka Kirehe baboha ibikapu n'ibiseke bakabibika kuko batabona aho babigurisha ngo babone amafaranga.

Bagaragaje icyo kibazo ubwo basurwaga na Ambasaderi w'Ubuyapani mu Rwanda, Takayuki Miyashita ku wa gatatu tariki ya 29 Ugushyingo 2017. Ubwo bukorikori bigishijwe bwo kuboha ibiseke n'ibikapu ni ubwo gutuma babona amafaranga yunganira inkunga bahabwa n'imiryango ifasha impunzi.

Gusa ariko impunzi zagaragaje ko ibyo baboha batabibonera isoko bigatuma bagwa mu gihombo. Nzirimpa Pelagie, uhagarariye ishyirahamwe ryitwa “Dukomeze ibikorwa” avuga ko muri iryo shyirahamwe harimo abagore 150 baboha ibiseke n'ibikapu. Umushinga wa Save the Chilidren niwo wabibafashijemo. Agira ati “Mu bubiko dufite ibikapu bisaga 50 ariko twabuze isoko. Twifuza ko abatureberera badushakira isoko tukabasha kubona inyungu mu byo dukora.”

Ibyo bikapu n'ibiseke baboha bigura kuva ku 2000RWf kugeza ku 5000RWf bitewe n'ingano yabyo. Nzirimpa ahamya ko ubukorikori bigishijwe buzabagirira akamaro igihe bazaba barasubiye mu gihugu cyabo cy'u Burundi kuko ari ibintu bamaze amezi umunani bakora nk'umwuga.

Takayuki Miyashita, Ambasaderi w'Ubuyapani mu Rwanda yizeje izo mpunzi ko igihugu cy'Ubuyapani kizakomeza kubakorera ubuvugizi. Yakomeje kandi yizeza abakora ubukorikori ko bazabashakira isoko bafatanije n'abaterankunga batandukanye. Agira ati “N'ubwo tutazi igihe amahoro azagarukira mu Burundi igihe cyose muzaba mukiba mu buhunzi tuzabafasha cyane cyane mu bikorwa by'ubukorikori mukora.”

Rwahama Jean Claude, umuyobozi ushinzwe ibibazo by'impunzi muri Minisiteri y'imicungire y'ibiza no gucyura impunzi (MIDMAR) atangaza ko kwigisha izo mpunzi gukora ubukorikori biri muri gahunda ya Leta ya “Kora Wigire” na “Hanga Umurimo”. Agira ati “N'ubwo ari impunzi bagomba kujyana na gahunda za Leta ya "Kora Wigire" kugira ngo barusheho kugira imibereho myiza.”

Umusaruro w'ubuki ukomeje kugabanuka cyane

By Ubukungu

Abavumvu bo mu Ntara y'Iburasirazuba bagaragaraza ko inzuki boroye iyo zigiye guhova zitagaruka zose kuko hari izipfira mu nzira.

Nzabanita Boniface, umuvumvu wo mu Karere ka Nyagatare avuga ko kuva aho abahinzi batangiriye gutera imiti yica udukoko mu myaka, inzuki na zo zijya guhova zigapfa.

Akomeza avuga ko imyaka yose iterwamo umuti wica udukuko, nk'bigori, amashaza, ikawa iyo bitangiye kuzana indabo,inzuki zijya kuzihovayo, zataha zigapfira mu nzira. Agira ati “Iyo rero zisanze ibyo bihingwa byaratewe umuti wica udusimba na zo zihita zipfa inyinshi tuzibona zaguye mu nzira.”

Akomeza avuga ko kuba inzuki zipfa bituma n'umusaruro w'ubuki ugabanuka kuko ngo nko mu mutiba wavamo ibiro biri hagati ya 10 na 15, havamo ibiro nka bitanu gusa.

Undi muvumvu witwa Batamuriza Justine wo mu Karere ka Gatsibo we avuga ko baterwa igihombo no guhura n'ibyonyi byangiza inzuki. Muri byo hari n'abantu bajya mu mitiba kwishakiramo ubuki bwo kwirira ngo ugasanga bakoresheje umuriro mwinshi zigashya.

Gusa ariko umushinga witwa FIOM Rwanda, ushinzwe gutera inkunga amakoperative y'ubworozi bw'inzuki utangaza ko ugiye kwigisha abavumvu bo mu Ntara y'Iburasirazuba uburyo bakorora inzuki bakazirinda impfu zitunguranye. Uwo mushinga wiyemeje kwigisha abo bavumvu uburyo bahinga ibihingwa hafi yaho bororera inzuki kugira ngo zijye ziba ari ho zitara zitarinze kujya kure.

Rukwatage Janvier, umukozi w'uwo mushinga avuga ko bimwe mu byo bazigisha abavumvu harimo guhinga indabo, gutera ibiti inzuki zikunda guhovaho. Avuga kandi ko ari byiza gushyira ubwoko bw'ifu ahantu hatandukanye hafi y'imizinga kugira ngo inzuki zibone ibizitunga n'ibyo zikoramo ubuki. Agira ati “Tuzabaha n'imizinga ya kizungu tunabahugure uburyo bakoramo ubwo bworozi bukabaha umusaruro.”

Abavumvu ariko bifuza ko bafashwa kugira ahantu hagari bakorera umwuga wabo w'ubworozi bw'inzuki kuko byabafasha kubona umusaruro mwinshi.

Zimbabwe: Perezida Mnangagwa yahigiye kugaruza umutungo w'igihugu wasahuwe

By Ubukungu

Perezida mushya wa Zimbabwe, Emmerson Mnangagwa, yatanze nyirantarengwa y'amezi atatu ku bantu n'ibigo ngo habe hagarujwe umutungo wa leta byasahuye ukajyanwa hanze mu buryo butemewe n'amategeko.

Mnangagwa yavuze ko Guverinoma izajyana mu nkiko abo kiriya gihe kizagera muri Gashyantare bataragaruza uwo mutungo. Yagize ati “Ibyo bikorwa bibi bigize icyaha gikomeye cy'ubukungu cyakorewe abaturage ba Zimbabwe.”

Ubwo yarahiriraga kuba Perezida wa Zimbabwe, Mnangagwa, yasezeranye ko agiye guhangana na ruswa, guteza imbere ishoramari ry'abanyamahanga no guhanga imirimo kugira ngo yongere kubaka ubukungu bw'igihugu.

Yagize ati “Amafaranga menshi n'indi mitungo yasahuriwe hanze y'igihugu mu buryo butemewe n'amategeko na bamwe mu bantu ndetse n'ibigo. Ababikoze bahawe amezi atatu yo kubigarura kugira ngo birinde kuba bakurikiranwa n'amategeko.”

Yakomeje agira ati “Tugomba kurandura iyi myitwarire mibi yaranze ahahise. Ibikorwa bya ruswa bigomba guhagarara. Aho ibi byabaye, byihutirwa ubutabera bugomba gutangwa.”

BBC yanditse ko Mnangagwa ibi yanabihereye ku mukwabu wakozwe n'igisirikare wakuye ku butegetsi Mugabe ndetse ugasiga uwari Minisitiri w'imari, Ignatius Chombo, atawe muri yombi akekwaho ibyaha bya ruswa.

Kuva mu 2009, Zimbabwe ikoresha idolari rya Amerika nk'ifaranga ry'igihugu nyuma y'uko iryayo ritaye agaciro. Banki Nkuru y'Igihugu, ivuga ko habayeho magendu y'amadolari ajyanwa mu mabanki yo mu bindi bihugu. Habarurwa nibura miliyari z'amadolari zajyanywe mu mabanki yo hanze ya Zimbabwe.

Byatumye amafaranga abura mu gihugu bityo abacuruza amadolari mu buryo bwa magendu bariyongera kuko nk'abatumiza ibicuruzwa mu mahanga bayakenera ngo barangure ibicuruzwa.

Uyu mwanzuro ufatwa nk'uburyo bwo kuzahura ubukungu bwa Zimbabwe bwazahaye kuva mu 2000, ubwo habaga amavugurura y'ibikingi yatumye abazungu bamburwa ubutaka bari bafite bugahabwa abanya-Zimbabwe batabugiraga.

Mnangagwa yagiye ku butegetsi asimbuye Mugabe wari ubumazeho imyaka 37 wari waramwirukanye ku mwanya wa Visi Perezida nk'umugambi wo guharurira inzira umugore we Grace Mugabe, ngo azamusimbure ku mwanya wa Perezida.

Miliyari 215 Frw u Rwanda rwahawe zizasiga ibura ry'amazi muri Kigali ari umugani

By Ubukungu

Banki Nyafurika Itsura Amajyambere (AfDB) yahaye u Rwanda inguzanyo y'igihe kirekire y'amadolari miliyoni 255.4, ni ukuvuga agera kuri miliyari 215 Frw, ariho igice kizashorwa mu gukwirakwiza amazi n'isukura n'ikizajya mu kuzamura ubumenyi mu iterambere ry'urwego rw'inganda.

Iyi nguzanyo yashyizweho umukono kuri uyu wa Gatatu na Minisitiri w'Imari n'Igenamigambi, Clever Gatete, na Gabriel Negatu uyobora AfDB mu karere k'Afurika y'Iburasirazuba , iriho miliyoni $171 zizashyirwa mu gukwirakwiza amazi n'isukura na miliyoni $84 zizashyirwa mu kuzamura ubumenyi.

Ku bijyanye n'amazi, Minisitiri Gatete yagize ati “Ni ugusana, kuvugurura no kwagura imiyoboro y'amazi mu Mujyi wa Kigali no mu yindi mijyi, kubaka no kuvugurura uruganda rw'amazi rwa Nzove ku buryo ruziyongeraho metero kibe 35,000 hano mu mujyi wa Kigali.”

“Harimo kubaka icyiciro cya kabiri cy'uruganda rw'amazi rwa Gihira II rukiyongeraho metero kibe 15,000 ku munsi, kuvugurura no kwagura imiyoboro y'amazi mu mijyi itandatu yunganira Kigali.”

Iyo mijyi ni Musanze, Rubavu, Muhanga, Nyagatare, Huye na Rusizi. Yavuze ko hazanakorwa inyigo z'ishoramari ryo mu gihe kiri imbere mu turere twa Muhanga, Karongi na Ngoma. Bibarwa ko abaturage miliyoni 1.1 ku bazagerwagaho n'amazi meza kubera iyi gahubda, mu gihe abandi 475, 000 bazagerwaho n'ibikorwa by'isuku n'isukura.

Minisitiri Gatete yavuze ko hari n'ibikorwa remezo by'isukura bizubakwa ibindi bikavugururwa, harimo uburyo bwo guhuriza hamwe imyanda mu Mujyi wa Kigali, ibyo bikorwa bikazagera no mu mijyi ya Rusizi, Karongi, Musanze na Rubavu.

Biteganywa ko gahunda y'amazi n'isukura iteganywa yose hamwe izashorwamo miliyoni 262 $, aho AfDB yatanzemo 171 $, European Investment Bank ikazatanga miliyoni 45 $, Guverinoma ikazatanga miliyoni zisaga 40 $ andi akazatangwa n'abandi baterankunga.

Umuyobozi w'Ikigo gishinzwe amazi Isuku n'Isukura (WASAC), Aimé Muzola, yavuze ko uyu mushinga uri muri gahunda ya leta yo guha Abanyarwanda amazi ku kigero cya 100% mu myaka irindwi iri imbere. Yagize ati “Aya mafaranga rero azakoreshwa mu gushyiraho imiyoboro y'amazi, aho dufite imiyoboro henshi ishaje cyangwa se imijyi yagiye yaguka bigatuma n'imiyoboro yari ihari itakibasha kujyana amazi akwiriye kugira ngo abaturage bayabone ari meza kandi ahagije.”

Yavuze ko bazahera mu Mujyi wa Kigali bagakomereza mu tundi duce usanga dufite ikibazo cy'imiyoboro mito kandi ishaje. Yakomeje agira ati “Iyi gahunda rero izatuma imiyoboro iba myiza, ibe minini, kandi twagiye tureba n'igice abaturage bamaze guturamo cyane ndetse n'ikindi bazaturamo tugendeye ku gishushanyo mbonera cy'umujyi, ku buryo umuntu azajya ajya gutura ahantu agasanga ibikorwa by'amazi byarahagejejwe.”

“Mu mujyi wa Kigali ni ikibazo kizahita gikemuka burundu kuko ubungubu amazi azaba ahabwa Umujyi wa Kigali azaba ahagije, n'imiyoboro nituyibona, umuntu azajya ayabona, ibyo kugenda duhererekanya iminsi kugira ngo tubone amazi, uyu mushinga uzahita ukemura icyo kibazo.”

Muzola yavuze ko ubu bari gushaka ibigo bizubaka iyo miyoboro, ku buryo akazi kazakorwa kakazafata hagati y'imyaka ibiri n'itatu. Iyo nguzanyo izishyurwa mu myaka 25, u Rwanda rukazatangira kwishyura nyuma y'imyaka umunani ku nyungu ya 2.3%.

Hari igice kizajya mu iterambere ry'inganda

Minisitiri w'Ubucuruzi n'inganda, Vincent Munyeshaka, yavuze ko hari igice cyagenewe guteza imbere Made in Rwanda, hagamijwe ko ibigo bishinga imizi mu Rwanda bikora ibintu bikenewe ku isoko ry'imbere mu gihugu ariko bigahatana no ku isoko mpuzamahanga.

Iyo gahunda y'imyaka itatu izashorwamo miliyoni 84 $ zizishyurwa mu myaka 35 azatangira kwishyurwa nyuma y'imyaka itanu ku nyungu ya 0.75%. Yakomeje agira ati “Iyo urebye iterambere ry'inganda aho rigeze, ririmo gusaba ko Abanyarwanda bagira ubumenyi bwihariye, bagira ikoranabuhanga ryihariye, Abanyarwanda bitegura bakiga bakagira ubwo bumenyi bwo gukora ibintu bitandukanye.”

“Izi miliyari 84 $ icyo zije kudufasha ni ukugira ngo tubashe kwigisha Abanyarwanda binyuze muri Minisiteri y'Ubucuruzi n'inganda ariko dufatanyije n'ibindi bigo bya Guverinoma.”

Umuyobozi wa AfDB, Gabriel Negatu, yavuze ko iyi nkunga bizeye ko izagira uruhare rukomeye mu guteza imbere Abanyarwanda, ashimangira ko u Rwanda rukoresha neza inkunga ruhabwa. Yavuze ko iterambere ryose rugezeho atari uko rufite abaterankunga ahubwo rukoresha neza ubushobozi rufite. Yagize ati “Kuri twe dushyira u Rwanda mu gukoresha inkunga ya AfDB ku rwego rwo hejuru, kandi ibimaze kugerwaho bigaragarira buri wese.”

RDB yananiwe kwisobanura imbere y'abadepite ku ruhuri rw'ibibazo biyivugwamo

By Ubukungu

Ikigo cy'Igihugu cy'iterambere (RDB) cyitabye Komisiyo y'Imibereho y'Abaturage mu nteko ishinga amategeko y'u Rwanda, ngo cyisobanure ku bibazo bikirimo.

Muri ibyo bibazo harimo gukoresha abakozi batigeze barahira, abakozi batujuje ibyangombwa, no kuzamura abakozi mu buryo butubahirije amategeko. Raporo y'ibikorwa bya Komisiyo Ishinzwe Abakozi ba Leta y'umwaka 2016/17, igaragaza ko muri iki kigo harimo ibibazo akenshi ngo bishingiye mu gucunga abakozi bakigize.

Visi Perezida wa Komisiyo y'imibereho myiza, Depite Alphonsine Mukarugema, yibaza ukuntu muri RDB harimo abakozi bashyizwe mu myanya batarahiye bagombaga kurahira. Avuga kandi hari abandi bakozi bari muri iki kigo batagira ibyangombwa bibemerera kujya mu kazi, nko kuba bamwe batagaragaza ibyangombwa ko bafunzwe cyangwa batafunzwe. Iyi komisiyo kandi ivuga ko muri RDB hari abakozi bazamuwe mu ntera mu myanya imwe, nyamara ngo nta bizamini byigeze bikoreshwa.

Umuyobozi Ushinzwe Imari muri RDB, Mark Nkurunziza waje uhagarariye umuyobozi mukuru wa RDB, yavuze ko na bo bemera ko bakoze amakosa. Yavuze ko ari amakosa kuba kugeza ubu hari abakozi batararahira, yemeza ko bitarenze tariki 12 Ukuboza 2017 nta mukozi muri iki kigo uzaba atararahira.

Ku bijyanye n'abakozi batagira ibyangombwa ibyerekana ko bafunzwe n'ibindi, Nkurunziza ko habayemo uburangare, ariko bitarenze uyu mwaka na cyo kigomba kuba cyakemutse. Naho abakozi 8 bazamuwe mu ntera batakoze ibizamini, uyu muyobozi yabwiye abadepite ko byakozwe mu rwego rwo kugira ngo serivise iki kigo gitanga zikomeze gutangwa neza.

Yagize ati “Kubera impinduka zo guhindura abakozi zagiye ziba, inama y'ubutegetsi ya RDB yaricaye itwereka uburyo abakozi babagumisha mu kigo, bakazamura umukozi muri wa mwanya uri hejuru, ariko mu mabwiriza bari basinye ni uko bashyizemo ko bagombaga gukora umwaka umwe, nyuma babakorere isuzuma ariko umukozi wazamuwe agakomeza agahembwa amafaranga yahembwaga.”

Uyu mukozi avuga ko bagiye bazamura abakozi akenshi bagira ngo iki kigo gikomeze gutanga serivise inoze, kandi bagumane babakozi n'ubundi babaga bafite ubumenyi. Gusa abadepite ntibanyuzwe n'byo bisobanuro. Bo bavuga ko niba barashakaga kuzamura abakozi, ya myanya yagombaga gushyirwa ku isoko, n'abandi bantu bakaba bayipiganirwa.

Abadepite byatumye banzura ko tariki ya 7 Ukuboza 2017 Umuyobozi Mukuru wa RDB agomba kwiyizira mu Nteko kuko uwahaje amuhagarariye adafite ubushobozi bukemura ibibazo.

Miliyari 17RWf zitakarira mu gucura inoti n'ibiceri buri mwaka

By Ubukungu

Banki y'Igihugu (BNR) irakangurira abaturage kwitabira ikoranabuhanga mu guhererekanya amafaranga, kugira ngo Leta irengere Miliyari 17Frw zikoreshwa buri mwaka mu gucura inoti n'ibiceri bishya.

Guhererekanya amafaranga mu ntoki umuntu yishyura cyangwa yishyurwa bituma inoti n'ibiceri bisaza vuba cyangwa bikaburirwa irengero cyangwa zikangirika burundu.

Ibyo bituma buri mwaka BNR isimbuza inoti zishaje, igikorwa gitwara agera muri miliyari 2Frw hakiyongeraho n'andi Miliyari 15Frw yo kuzikwirakwiza mu mabanki hifashishijwe imodoka, nk'uko bitangazwa na Guverineri wungirije wa BNR, Nsanzabaganwa Monique. Agira ati “Ingorane ya mbere mu gukoresha inoti n'ibiceri ni umutekano wabyo. Ni ibintu byibika mu buryo bworoshye ariko wakoresheje uburyo bw'ikoranabuhanga ntiwahura n'ibyo bibazo.” Nsanzabaganwa avuga ko ayo mafaranga atakarira mu gusimbuza ayangiritse ari menshi ku buryo leta yakabaye iyakoresha mu bindi bikorwa biteza imbere abaturage.

Kuri uyu wa Mbere tariki 28 Ugushyingo 2017, BNR yakoreye ubukangurambaga mu turere twa Rusizi na Nyamasheke,hagamijwe gukangurira abaturage n'abafite aho bahurira n'ihererekanya ry'rmafaranga uko bakwitabira gukoresha ikoranabuhanga.

Habyarimana Gilbert umwe mu bikorera bo mu Karere ka Rusizi, yemeza ko we na bagenzi be bumva neza akamaro ko kudatwara amafaranga mu ntoki, harimo no kwirinda kwibwa n'izindi mpanuka amafaranga yagirira mu ntoki. Ati “Iyo igihugu gitakaje amafaranga angana gutyo n'abaturage baba bahombye.”

Hafashwe ingamba z'uko mu myaka irindwi iri imbere guhererekanya hifashishijwe ikoranabuhanga bizaba bigeze kuri 80%, bivuye kuri 21% kuri ubu.

Yashoye 200RWf mu buhinzi n'ubworozi none ageze kuri miliyoni 14RWf

By Ubukungu

Lambert Nkundumukiza yatangiye korora ingurube no guhinga urutoki muri 2015 ahereye ku bihumbi 200RWf ariko ubu amaze kugera ku gishoro cya Miliyoni 14RWf.

Nkundumukiza w'imyaka 30, atuye mu Murenge wa Mushonyi mu Karere ka Rutsiro. Avuga ko ubu akoresha abakozi 17 kandi ngo azakenera abarenze uwo mubare mu mwaka utaha. Avuga ko agurisha ibitoki n'inyama z'ingurube mu mahoteli n'amarestora mu Rwanda n'i Goma muri Congo, kandi akemeza ko nta kintu cye na kimwe gishobora kubura isoko.

Agira ati “Mu Rwanda ntaho wabura abakugurira ibyo wejeje kuko bafite ikibazo cyo gutumiza ibintu byinshi hanze. Ibintu byose ni isoko, ni cyo nabwira urubyiruko ruvuga ko rwabuze icyo rukora.” Avuga ko urubyiruko rugomba kureba amahirwe arukikije cyane cyane mu buhinzi, aho “ubutaka bwinshi butarabasha kubyazwa umusaruro bwagakwiriye kuba butanga.”

Nkundumukiza avuga ko mu kwezi kwa mbere kwa 2018 utaha azashinga uruganda rutunganya inyama z'ingurube zikavamo ikiribwa bita ‘Sosisso', akoresheje inguzanyo ya miliyoni 5Frw yijejwe n'Ikigega BDF. Yahaye ikaze abifuza gukorana nawe bagashora imari muri ubwo bucuruzi, avuga ko yaboneye isoko rinini i Rubavu n'i Goma muri Congo.

Umusaruro wa ‘Youth Connect'

Umushinga wa Nkundumukiza Lambert ni umwe muri 90 ihatanira ibihembo bya Ministeri y'Urubyiruko (MINIYOUTH) bizatangwa mu kwezi k'Ukuboza, mu nkera y'imihigo yiswe “Youth Konnect.”

Nkundumukiza yegukanye igihembo cya miliyoni 1Frw, cyahawe umushinga wa mbere mu Ntara y'Uburengerazuba kuwa Kabiri tariki 7 Ugushyingo 2017. Yakegukanye atsinze abantu batatu ba mbere muri iyo ntara.

Aracyafite amahirwe yo guhabwa ibihembo, kuko Ministeri y'Urubyiruko ivuga ko ikomeje gahunda ngarukamwaka yo guhemba imishinga 30 yarushije indi yose mu gihugu muri uyu mwaka.

Umuyobozi ushinzwe ishami ry'imishinga muri Ministeri y'Urubyiruko William Furaha, asobanura ko imishinga 90 y'urubyiruko izahatanira ibihembo by'amafaranga, ariko hakazahembwa 30 gusa. Ati “Uwa mbere azahabwa miliyoni eshanu, uwakabiri eshatu, uwa gatatu ebyiri, abasigaye 27 bazahabwa ibihumbi 500Frw buri wese.”

Furaha avuga ko miliyoni zirenga 117Frw zimaze guhabwa urubyiruko rwihangira imirimo kuva mu 2012 zitapfuye ubusa, kuko ngo bagiye bahangira akazi abandi bantu. Ati “Muri 2016 twasuye imishinga 67 yari yaranyuze muri ‘Youth Connect', dusanga barabashije guhangira imirimo ihoraho abantu 1074, n'abandi 2,700 bari bafite imirimo ya nyakabyizi.”

Ibi uwabibara akoresheje itegeko ry'itatu ryoroshye, yasanga imishinga 150 yahawe ibihembo kuva muri 2012 kugera muri 2016, yarabashije guhangira abantu imirimo ihoraho na nyakabyizi itari munsi ya 8,450.

Gahunda ya ‘Youth Connect' kimwe n'izindi zirimo ‘NEP Kora Wigire', ni imwe mu ngamba Leta y'u Rwanda yashyizeho mu guhangira Abanyarwanda imirimo ibihumbi 200 buri mwaka.

Umunyonzi utazi amategeko y'umuhanda ntazongera kwemererwa gutwara abagenzi

By Ubukungu

Mu rwego rwo kugabanya impanuka mu muhanda, abatwara abagenzi ku magare bazwi nk'abanyonzi barahamagarirwa gutunga uruhushya rw'agateganyo rwo gutwara ibinyabiziga.

Polisi y'igihugu (RNP), ishami rishinzwe umutekano wo mu muhanda ihamya ko abanyonzi bagomba kumenya amategeko y'umuhanda kuko byagabanya impanuka. Polisi ikomeza ivuga ko mu mezi icyenda ashize abantu bagera ku 180 bapfuye bazira impanuka zo mu muhanda.

76% by'abo, bangana na 136, bapfuye hagati y'ukwezi kwa Kanama n'Ukwakira 2017. Muri abo 136, ababarirwa muri 17% baguye mu mpanuka zatewe n'amagare.

N'ubwo ariko abanyonzi basabwa kumenya amategeko y'umuhanda nta gihe ntarengwa cyashyizweho cyo kuba barayize bose. CIP Emmanuel Kabanda, umuvugizi w'ishami rya Polisi rishinzwe umutekano wo mu muhanda, avuga ko iyo gahunda iri mu rwego rw'ubukangurambaga.

Agira ati “Biri mu rwego rw'ubukangurambaga kuko benshi biroha mu mwuga wo gutwara abantu ku magare nta mategeko bazi ari byo biteza impanuka. Dusaba rero abakuriye amashyirahamwe y'abanyonzi kubanza kubaza abayazamo niba bazi amategeko y'umuhanda.”

Akomeza agira ati “Nta kundi rero umuntu yamenya ko uzi amategeko y'umuhanda udafite nibura uruhushya rw'agateganyo rwo gutwara ibinyabiziga, bagomba rero kwiga bakarubona.”

CIP Kabanda agira inama abanyonzi yo kwambara no kwambika abo batwaye ingofero zirinda umutwe (casque), gushyira utugarurarumuri ku magare yabo no kwambara imyambaro yabugenewe kugira ngo bagaragare ku muhanda ntibakomeze kugongwa n'ibindi binyabiziga.

Abanyonzi na bo bavuga ko bifuza kuba babona izo mpushya kuko batishimira kujya mu muhanda batazi amategeko awugenga.

Niyonsaba Eugène utwara igare muri santere ya Kabuga mu Murenge wa Rusororo mu Karere ka Gasabo, yemera ko ayo mategeko atayazi. Agira ati “Amategeko y'umuhanda umuntu ayamenya ari uko yayize kandi arafasha mu kurinda impanuka. Ubu jyewe ndi mu batangiye kuyiga nkumva bizangirira akamaro.”

Mugenzi we witwa Manizabayo ati “Kwiyahura mu muhanda utazi amategeko ni bibi kuko akenshi uteza ibibazo bakaba banakugonga.” Akomeza agira ati “Nk'ubu iyo utazi uko witwara ahambukira abanyamaguru cyangwa n'ibyapa utazi icyo bisobanura ni byo biteza impanuka, ndakangurira bagenzi banjye kuyiga.”

Aba banyonzi akenshi bavuga ko bareka kwiga amategeko y'umuhanda kubera kubura amafaranga basabwa mu ishuri, hakaba n'abafite imbogamizi yo kutamenya gusoma no kwandika.

Bisinesi y'ibinyamakuru byandika ishobora kuba iri mu marembera

By Ubukungu

Itangangazamakuru ryandika nkuko turizi kugeza ubu ryagiye ritegwa iminsi kuva kera abantu bavuga ko uko ikoranabuhanga ritera imbere rizagera aho rikazimira. Noneho kuva aho internet iziye, abenshi basigaye bemeza ko nta myaka myinshi ibinyamakuru bisigaranye mbere y'uko bizimira burundu. Umuyobozi ushinzwe ibyimari muri Google aherutse kwandika inkuru isuzuma ejo hazaza h'ibinyamakuru nkuko tubizi ubu.

Hel Varian yibajije impamvu ibinyamakuru binyura mu icapiro bigenda bisigara inyuma mu iterambere rigaragara muri iyi minsi cyane cyane mu byerekeye ikoreshwa rya internet. Ese koko internet izatuma ibinyamakuru bizimira?

Ese ubundi ni iki twita ikinyamakuru? Ibintu bine by'ingenzi nibyo bituma inyandiko yitwa ikinyamakuru: kuba yabonywa n'uyishaka, kuba isohoka nyuma y'igihe runaka kandi mu buryo buhoraho, kuba itangaza amakuru ajyane n'igihe kandi kuba itangaza amakuru anyuranye. Iki ni cyo gitandukanya ibinyamakuru n'izindi nyandiko ariko nanone bikaba ari zimwe mu nzitizi zituma ibinyamakuru bigenda bikendera ndetse bamwe bakemeza ko bishobora kuzimira. Abiga ibyitangazamakuru bemeza ko ikinyamakuru cya mbere cyabayeho ari “Relation aller Fürnemmen und gedenckwürdigen Historien” cyo mu Budage. Ibinyamakuru bikaba byatangiye gusakara cyane ahagana mu kinyejana cya 17.

Abantu batangiye kuvuga ko ibinyamakuru bizazimira igihe televiziyo zari zimaze gusakara mu bihugu bitandukanye ku isi. Ibi byahinduye uburyo abantu babonaga amakuru binyuze mu binyamakuru bisanzwe. Aho gutegereza umunsi wose, icyumweru cyangwa ukwezi igihe ikinyamakuru kizasohokera, televiziyo yazanye uburyo bwo kureba amakuru mu mashusho no mu majwi kandi mu gihe gito cyangwa se iyo nkuru irimo kuba (live). Uko televiziyo zagiye ziyongera kandi yazanye ubwisanzure mu guhitamo ururimi ushakamo inkuru.

Umuntu yakwibaza impamvu radiyo ikiza itateye izi mpungenge. Kuba radiyo ari amajwi gusa, hari byinshi yakemuye nko kuba umuntu adasabwa kumenya gusoma n'ibindi ariko hari ikintu cyibanze mu gusakaza inkuru kiba kibura: amashusho. Televiziyo uretse kuba itanga amashusho inatanga amajwi bikaba bituma umuntu amera nk'uwibereye aho inkuru yabereye.

Aho internet iziye rero, ibintu byarahindutse cyane. Internet yatanze uburyo bwo gutangaza amakuru mu buryo bwose bushoboka: amashusho, amajwi, inyandiko n'ubundi buryo bwinshi. Internet yanahinduye uburyo abantu bashaka amakuru aho umuntu aba atagitegereza ko ikinyamakuru runaka kimugeraho, televiziyo cyangwa radiyo ngo zize gutangaza inkuru nibamara kuzitunganya. Ubu umuntu afite ubushobozi bwo kubona inkuru ziturutse hirya no hino ku isi bidasabye ko ategereza ko umunyamakuru amara gutegura inkuru.

Ikindi internet yahinduye ni uburyo itangazamakuru rikorwa muri rusange. Ubu buri wese ashobora kuba umunyamakuru, agatangaza inkuru akoresheje mudasobwa cyangwa telefone igendanwa. Kuva aho ikoreshwa ry'imbuga nkoranyambaga (social media) nka Twitter, Facebook, Youtube n'izindi rigenda rirushaho gutera imbere, amakuru yirirwa acicikana ku buryo umuntu aba afite uburyo bwinshi bwo kubona amakuru ndetse no kuyasakaza.

Igitera impungenge ko ibinyamakuru bishobora gucika si uburyo amakuru atangazwa gusa ahubwo ni n'uburyo bw'amikoro. Ibinyamakuru byinshi bibeshwaho n'amafaranga ava mu kwamamaza. Uburyo bikorwa ni uko ushaka kwamamaza agura umwanya mu kinyamakuru hanyuma akishyura buri ncuro itangazo rye ritambutse mu kinyamakuru. Ibi bigenda bihinduka. Kubera internet igera ku bantu benshi kandi mu buryo butandukanye bunihuse niyo abantu basigaye bahitamo kunyuzaho amatangazo yabo yamamaza. Ibi biranahenduka cyane kubera ko ikinyamakuru kiba kibara impapuro iryo tangazo rijyaho kuko uko urupapuro rwiyongeraho niko no mu icapiro bihenda. Internet yo ntabwo ifite icyo kibazo kuko umwanya wo gushyiraho amakuru, amatangazo ndetse n'ibindi byinshi uhari kandi udashobora gushira.

Ibinyamakuru bikomeye byakomeje kwandika ku mpapuro ariko binatangira kugaragara ku mbuga za internet aho usanga inkuru ariho zinabanza mbere yo gusohoka mu icapiro. Ibinyamakuru byinshi kandi biri kugenda bikoresha imbuga nkoranyambuga kugirango bisakaze amakuru kuri benshi ariko no kugirango habeho gukusanya ibitekerezo bituruka mu basomyi n'abandi baba bafite icyo batangaza kuri iyo nkuru. Ubu inkuru iba iherekejwe n'amafoto, amajwi cyangwa amashusho ndetse hari n'uburyo bwo kuyihuza n'izindi bijya gusa ndetse no kuyohereza abandi.

Ibi byose ariko, ni igihe internet yakoreshejwe neza kandi yageze kuri bose. Mu bihugu byinshi bikiri mu nzira y'amajyambere usanga internet itarasakara cyane kubera ikibazo cy'amikoro, ubumenyi ariko cyane cyane kuba nta mashanyarazi aboneka ahenshi mu byaro. Ikindi ni uko ikoreshwa rya internet risaba ubumenyi bwihariye busumba gusoma no kwandika ndetse bikanasaba kuba umuntu afite uburyo yagera kuri mudasobwa cyangwa telephone zigendanwa. Izi ni zimwe mu mpamvu mbona internet igifite igihe kirekire mbere yo gukuraho ibinyamakuru mu buryo tubizi uyu munsi.

Ibi kandi si ibibazo byo mu bihugu bikennye gusa cyangwa bitarasakaramo internet ku buryo buri muntu wese yayibona. Ni n'ikibazo cy'imyumvire n'uburyo umuntu aba yarakuze ashaka amakuru. Birumvikana ko iyo umuntu yakuze asoma ikinyamakuru runaka azakomeza kukibonamo isoko y'amakuru yizeye. Birumvikana ko umuntu umaze imyaka asoma ikinyamakuru runaka atazahita abihindura ngo ni uko internet ifite amakuru menshi.

Ariko aho mbona ko internet ishobora gutuma ibinyamakuru nk'uko tubizi ubu bizimangatana ni mu myaka iri imbere aho abazadukomokaho bazahera mu bwana bwabo bakoresha ikoranabuhanga mu byo bakora byose birimo no gushaka amakuru. Icyo gihe bazibagirwa ibinyamakuru bicapye nkuko ubu dusa nk'abibagiwe kaseti na radiyo na videwo, ibyitwaga diskete yemwe na CD zikaba ziri kugenda zigabanuka. Bizatwara umwanya, imyaka ndetse ariko uburyo dusoma amakuru buzahinduka mu buryo butangaje uko n'ikoranabuhanga rigenda rirushaho gutera imbere.

Miliyari 25RWf ni zo zizakoreshwa mu kwimura inganda z'i Gikondo

By Ubukungu

Umujyi wa Kigali urateganya gukoresha agera muri Miliyari 25Frw mu kwimura inganda zose ziri mu gishanga cy'i Gikondo muri 2018.

Icyo gishanga kiri muri gahunda y'ahazashyirwa ubusitani mu rwego rwo kuhahindura ahantu nyaburanga. Hazanashyirwa igice cyo kwidagaduriramo, nk'uko bisobanurwa n'Umuyobozi wungirije ushinzwe ubukungu mu Mujyi wa Kigali Busabizwa Parfait.

Avuga ko ku ikubitiro abanyenganda 63 bagikorera muri icyo gishanga, bazahabwa ingurane yo kwimurwa igera kuri Miliyari 4Frw. Andi Miliyari 21Frw asigaye azatangwa muri 2019. Agira ati “Hifujwe ko abo banyenganda bose bakwimukira rimwe mu mwaka utaha wa 2018, ariko bakazishyurwa igice kimwe cy'amafaranga Miliyari enye, asigaye akazishyurwa mu mwaka uzakurikiraho.”

Ubuyobozi bw'Umujyi wa Kigali na Minisiteri y'Ubucuruzi n'Inganda (MINICOM), bavuga ko icyo kiguzi kizahabwa abanyenganda gishobora kuziyongera kikikuba kabiri, bitewe n'uko ari icya kera kitakijyanye n'igihe.

Abanyenganda basigaye mu gishanga cya Gikondo basabwa kwihitiramo aho bazimukira. Hateganijwe ko bazahitamo hagati ya Masoro, Gahanga, Masaka, Nzove, Mageragere cyangwa i Jabana. Ni nabo basabwa kwigurira ubutaka no kwiyubakira aho bazimurira inganda, nk'uko Umuyobozi wungirije w'Umujyi wa Kigali akomeza abisobanura.

Perezida w'Urugaga rw'Abikorera (PSF), Benjamin Gasamagera, avuga ko abenshi muri abo banyenganda batifuza ingurane y'amafaranga ahubwo ngo bashaka kwerekwa ahandi bakwimukira. Ati “Kuhava byo byamaze kwemeranywaho, ariko icyo twibaza ni ukuhava gute! Ukahava ujya hehe! 50% by'abanyenganda barifuza aho gukorera handi,kurusha guhabwa amafaranga.”

Gasamagera yirinze kuvuga ko biteguye kwimuka mu gishanga cya Gikondo muri 2018, mu gihe batarahabwa ingurane bifuza cyangwa indi myanya yo gukoreramo.

Ubuyobozi bw'Umujyi wa Kigali buvuga ko ku nkengero z'icyo gishanga hatangiye guterwa ubusitani abantu baruhukiramo, ndetse kubakwamo za kiyosike zicuruzwamo ibyo bakenera. Hagati mu gishanga hazatunganywa n'Ikigo cy'igihugu gishinzwe kubungabunga ibidukikije (REMA), kugira ngo hahinduke ikiyaga gikusanyirizwamo amazi y'imvura aturuka mu bice bitandukanye by'Umujyi wa Kigali.

Ubuyobozi bw'Umujyi wa Kigali buvuga ko butaragena imbago z'ahantu icyo gishanga kigomba kugarukira.

Abagore bacuruza bambukiranya imipaka binjiriza u Rwanda asaga miliyoni 170 $

By Ubukungu

Minisiteri y'Ubucuruzi n'Inganda itangaza ko ubucuruzi bucicitse bwambukiranya imipaka bukorwa n'umubare munini w'abagore bwinjiriza igihugu amadolari asaga miliyoni 170 buri mwaka.

Nyuma yo kugirwa inama no guhurizwa hamwe mu makoperative bakareka kunyura inzira z'ubusamo, Abanyarwandakazi bakora ubucuruzi bwambukiranya imipaka basigaye binjiriza u Rwanda imisoro myinshi nk'uko Umuyobozi Mukuru ushinzwe Ubucuruzi n'ishoramari muri Minisiteri y'ubucuruzi n'inganda mu Rwanda, Opirah Robert, yabitangaje kuri uyu wa Mbere.

Mu nama mpuzamahanga yahuriwemo n'ibihugu bitanu bihana imipaka n'u Rwanda, hagamijwe kurebera hamwe inzitizi abagore bakora ubucuruzi bwambukiranya imipaka bahura nazo n'uko zakemurwa, Opirah yagize ati “Ubucuruzi bwambukiranya imipaka bukorwa n'umubare munini w'abagore ... bwinjiriza u Rwanda asaga miliyoni 170 z'amadolari buri mwaka.”

Yakomeje avuga ko mu rwego rwo guteza imbere ubu bucuruzi, Leta y'u Rwanda imaze kubaka amasoko ya kijyambere agera kuri atatu ku mipaka ya Cyanika, Kanyaru n'irindi riri i Karongi.

Muri ayo masoko haba hari n'amarerero abagore basigamo abana igihe bagiye mu bihugu bituranye n'u Rwanda kuzana cyangwa kujyana ibicuruzwa.

Mu minsi iri imbere harateganywa kuzubakwa andi masoko atandukanye ku mupaka wa Rusumo, Kagitumba, Gatuna, Rusizi ya mbere n'iya kabiri hamwe no ku mupaka wa Nemba.

Mu gihe MINICOM yishimira intera ubu bucuruzi buri gufata, Umujyanama mu biro bya Minisitiri w'Ubucuruzi muri Repubulika iharanira Demokarasi ya Congo, Umulisa Solange, yavuze ko ubumenyi buciriritse bw'abagore bakora ubucuruzi bwambukiranya imipaka ari imbogamizi ku gihugu cye.

Yagize ati “Usanga badafite ubumenyi ku bijyanye n'imikorere ya za gasutamo, akenshi ibihugu byombi biba byarasinye amasezerano agamije kuborohereza mu bucuruzi ariko bariya bagore ntibabimenya.”

Yakomeje avuga ko bazarushaho kuabasobanurira imikorere ya za gasutamo zihuje ibihugu byombi, bikabafasha gukora ubucuruzi buciriritse kandi buciye mu mucyo.

Nubwo hari byinshi byakozwe ku ruhande rw' u Rwanda, Umunyamabanga Nshigwabikorwa wa Pro-Femmes Twese Hamwe, Bugingo Emma Marie, yavuze ko abagore bakora ubucuruzi bwambukiranya imipaka hari imbogamizi bagihura nazo.

Yagize ati “Batubwira ko bahura n'imbogamizi zijyanye n'amasaha abakozi bo ku mipaka bakorera atangana . U Rwanda hari aho ruvuga ruti tuzakora kugeza saa yine z'ijoro cyangwa se tuzakora amasaha 24/24 ariko wareba ku bindi bihugu duhana imbibe ugasanga ayo masaha ntabwo bayubahiriza.”

Bugingo yavuze ko mu makoperative 63 y'abagore bakora ubucuruzi bwambukiranya imipaka, agera kuri 25 arimo abagore barenga 2500, bahujwe n'ibigo by'imari, bibaguriza ayo kwagura ubucuruzi; babonye ingwate babifashijwemo na BDF.

Kwita ku mbwa z'inzererezi bimwinjiriza ibihumbi 600Frw ku kwezi

By Ubukungu

Ngabo Faraji wo mu Murenge wa Kinyinya mu Karere ka Gasabo akorera agera ku bihumbi 600Frw buri kwezi abekesha kwita ku mbwa.

Ngabo umaze imyaka itanu yigisha imbwa kubana n'abantu ku buryo zumva ibyo bazibwiye. Avuga ko abikora ku buryo bw'umwuga kuko yabyigiye umwaka umwe n'igice i Nairobi mu muri Kenya. Ajya gutangira gukora aka kazi ntabwo ari ibintu yitekerereje kuko yabanje gukora muri imwe muri sosiyete ikora ibijyanye no gucunga umutekano w'abantu n'ibintu. Yakoraga mu bijyanye n'imbwa ariko ahavuye bituma atekereza kubikora nk'akazi.

Ngabo avuga ko bakura imbwa z'inzererezi ku gasozi bakazitaho ku buryo bazitoza kubana n'abantu. Gusa ngo ntibazigurisha kuko uyikeneye bayimuhera ubuntu ariko bakabanza kwemeranya uburyo izajya yitabwaho.

Ngabo avuga ko mu myaka amaze akora aka kazi, amaze gukura imbwa z'inzererezi mu muhanda zisaga 200. Gusa ngo sibyo byonyine akora kuko anigisha imbwa ziba mu miryango uburyo bwo kumvikana nabo zibana nabo, ku buryo hari byinshi byamugejejeho. Agira ati “Mfite moto ebyiri, mfite n'amazu agera muri atatu muri Bumbogo no muri Kinyinya hamwe na hegitari ebyiri z'ubutaka, ku buryo biri nko mu gaciro ka miriyoni 60Frw.”

JPEG - 204.3 kb
Imwe muri moto yakuwe mu kazi ko kwita ku mbwa imufasha mu ngendo ajya kwigisha imbwa

Bimwe mu byo yigisha imbwa harimo kumenyerana n'abantu, akanazigisha kwumva indimi zitandukanye zirimo Icyongereza, Igifaransa, Swahili n'Ikinyarwanda hakiyongeraho no kuzitembereza. Ngabo ngo afite imbwa zigera kuri 30 yigisha. Imwe bayimwishyurira ashobora kurenga ibihumbi 60 ku kwezi, yayitoje mugihe cy'iminota itarenze 30 ku munsi.

Abazungu ngo nibo bakiriya benshi ba Ngabo kuburyo hari n'abandi bakorerabushake bagera kuri batanu bakora ibijyanye no kwita ku mbwa z'inzererezi ajya afasha bakamugenera amadorari 300 buri kwezi.

Rukundo Damascene n'umwe mu birabura bake bamuha imbwa zabo akazitoza, avuga ko abigishiriza neza imbwa bigatuma bashobora kuumvikana nazo. Ati “Mbere ntarayimutwarira ntabwo wayibwiraga ngo yumve. Ariko ubungubu iyo hari ikintu irimo gukora kidasobanutse ukayibwira stop ubona ibiretse, wayibwira “come” ikaza, “sit” ikicara ku buryo ubona murimo kuzuzanya.”

Kimwe mu byo Rukundo avuga akundira imbwa ngo ni uburyo iyo atashye avuye ku kazi imusanganira, mu gitondo nabwo ikaza kumusuhuza. Avuga kandi ko ishobora kumuburira mbere mu gihe hari abateganya kumugirira nabi.

Haracyari icyuho hagati y'abagabo n'abagore batunze ubutaka

By Ubukungu

Ubuso bw'ubutaka bungana na 26% mu Rwanda nibwo butunzwe n'abagore, 18% bukaba buri mu maboko y'abagabo naho ubundi bungana na 54% akaba aribwo buhuriweho n'abagabo n'abagore.

Mu nama mpuzamahanga iteganyijwe kubera i New York muri America umwaka utaha, u Rwanda ruvuga ko rwiteguye gusangiza ibindi bihugu uburyo abagore bahawe uburenganzira k'ubutaka bigatuma batera imbere. Hazanaganirwa kandi ku nzitizi n'amahirwe abagore bafite.

Hashize imyaka isaga 4, mu Rwanda hasohotse itegeko rigenga ubutaka, aho bimwe mu bikubiye muri iryo tegeko ni uburenganzira busesuye riha umugore n'umukobwa k'ubutaka.

Kuba abagore barahawe ubu burenganzira k'ubutaka, bamwe muribo basanga ari kimwe mubyatumye barushaho kwiteza imbere bitewe nuko babutanzeho ingwate mu bigo by'imari abandi bakabukoresha mu buryo butandukanye

Raporo ivuga ku cyuho cyigaragara muri gahunda z' uburinganire "Gender Gap Report" yasohotse uyu mwaka, iherutse gushyira u Rwanda ku mwanya wa 4 mu bihugu 144 byagerageje kuziba icyuho kiri hagati y'abagore n'abagabo mu nzego zinyuranye zirimo ubukungu busangiwe, uburezi, ubuzima na politike.

Mu bindi u Rwanda rwishimira, ni umubare w'abagore bagera kuri 84% bafite amahirwe yo kubona telefoni igendanwa mu gihe 33% by'abagore bashobora guhererekanya amafaranga binyuze kuri izo telefoni.

Yasezeye ku kazi yinjira mu bworozi bumwinjiriza miliyoni 50Frw ku mwaka

By Ubukungu

Shirimpumu Jean Claude uhagarariye aborozi b'ingurube ku rwego rw'igihugu, yafashe icyemezo asezera ku kazi ka Leta ayoboka ubworozi bw'ingurube.

Uwo mugabo uvuka mu Murenge wa Kageyo mu Karere ka Gicumbi, avuga ko mu myaka irindwi amaze ari rwiyemezamirimo yorora ingurube. Avuga ko kuba umworozi w'ingurube bitamuteye ipfunwe nyuma yo gusezera mu kigo gishinzwe kwita ku buzima.

Yaretse akazi kamuhembaga umushahara uri hagati y'ibihumbi 800Frw na 900Frw ku kwezi, amafaranga yemeza ko abantu benshi batasiga ngo bajye mu bworozi. Agira ati “Nari nsanzwe nkorana na Guverineri Gatabazi mu kigo cy'igihugu cy'ubuzima mpembwa amafaranga menshi ariko ndeka ako kazi njya kwikorera. Ntabwo banyirukanye ninjye wifatiye icyo cyemezo.”

Avuga ko buri kwezi agurisha ingurube zisaga ijana akagira ingurube 600 zihoraho ubu zikaba zimaze kumugeza kuri byinshi. Ati “buri kwezi ngurisha ingurube zisaga 100 kandi nkagira ingurube 600 zihoraho. Niba mu mwaka ngurisha ingurube 1200 ku mafaranga ari hagati y'ibihumbi 30 na 50 murumva ko ibyo byonyine ntabaze ibindi nzikuramo, bimpa amafaranga y'u Rwanda agera kuri miliyoni 50.”

Avuga ko ubworozi bw'ingurube butamugora kuko ingurube yororoka cyane ishobora kubyara iziri hagati ya 60 na 80. Ibi bikaba byaratumye ageze ku rwego rwo guhemba bamwe mu bakozi akoresha amafaranga angana n'ayo yakoreraga muri Leta. Ati “Mfite abakozi 10 bahoraho hafi ya bose barangije kaminuza aho mbahemba aruta ayo nahembwaga ngikorera Leta. Mfite n'umudogiteri Veterineri.”

Shirimpumu avuga ko icyororo cy'ingurube agikura mu mahanga akavuga ko ikibwana kimwe cy'ingurube kimugeraho gihagaze agera ku bihumbi 900Frw.

Ingurube imaze gukura ayigurisha ku biro, aho agurisha ikiro kimwe ku 3.000Frw ku yo korora. Naho iyo ari ingurube yabagiye abashaka kugura inyama zo kurya ikiro akigurisha 2.500Frw.

Avuga ko mu byo ingurube zamugejejeho adashimishwa n'imitungo n'ubwo nayo ayifite irimo imodoka zirenze imwe n'inzu yiyubakiye. Avuga ko yashimishijwe no kwirihira kaminuza akabasha no kurihira umugore we ubu ufite akazi.

Ariko ikiruta byose kuri we ni uko yashoboye gufasha abandi. Kuri ubu arihira abana batatu arera amashuri ya kaminuza , hakiyongeraho abe batatu nabo arihira amashuri yisumbuye.

Mu mitungo afite harimo isambu akoreramo ubworozi yaguze miliyoni 25Frw, akaba no mu nzu yaguze miliyoni 40Frw.

Akangurira urubyiruko kumugana akarufasha kwihangira imirimo mu bworozi bw'ingurube, aho afite ingamba zo guhaza inyama amasoko yose y'u Rwanda agasagurira n'amahanga.

Guverineri w'Intara y'Amajyaruguru Gatabazi Jean Marie Vianney wakoranye na Shirimpumu aramushima ku iterambere amaze kugeza mu Ntara y'Amajyaruguru, agasaba abaturage kumwigiraho baharanira kwiteza imbere.

Abanyamahanga bitabiriye ‘BuildExpo' biyemeje gushora imari mu Rwanda

By Ubukungu

Bamwe mu banyamahanga bamaze iminsi itatu i Kigali mu imurikagurisha ry'ibikoresho by'ubwubatsi n'ibitanga ingufu z'imirasire y'izuba “BuildExpo” bishimiye uburyo mu Rwanda bahakorera ubucuruzi bw'ibicuruzwa byabo, batangaza ko biteguye kugaruka gushaka aho bazakorera n'abo bazakorana, bityo Abanyarwanda bakabona ibikoresho byabo bitabahenze mu nzira zo kubitumiza hanze.

Abo banyamahanga biganjemo abaturutse ku mugabane w'Aziya, Amerika no muri bimwe mu bihugu byo mu karere u Rwanda ruherereyemo, bitabiriye imurikagurisha ryateguwe n'ikigo cyo muri Dubai, “Expogroup” gifatanyije n'Ikigo k'Igihugu k'Iterambere (RDB).

Bamwe mu baganiriye n'Imvaho Nshya, cyane abo muri Aziya bavuze ko ari ubwa mbere bakandagiye muri Afurika, ariko biteguye kuza ku isoko ry'u Rwanda no kugeza ibicuruzwa byabo ku mugabane w'Afurika. Umushinwakazi, Yin Bin, yavuze ko mu banyarwanda bagera kuri 500 yakiriye abasobanurira ibyo kompanyi “Tianjin Youfa International Trade CO. Ltd” y'ikigo “Youfa Group” ikora, babyishimiye ariko bamubwira ko nta ho babona ibyo bikoresho hafi yabo.

Ati “Nzasaba ikigo cyanjye kuzabyigaho neza tukaza gukorera mu Rwanda kugira ngo abashaka ibikoresho byacu babibone hafi, batiriwe batakaza amafaranga menshi kuko bambwiye ko bishobora no kubafata amezi atandatu batarabona ibicuruzwa batumije iwacu mu Bushinwa.”

Patrick Ongolla wo muri Kenya yavuze ko ikigo akorera cya “Ramco Group” kizashaka umwanya urambuye kikaza mu Rwanda kuganira na Guverinoma y'u Rwanda ku mushinga wo gutanga ingufu z'amashanyarazi aturuka ku ruganda rukoresha ibicanwa byoroshye (ASL Ltd) bubaka ahantu rukabasha gutanga umuriro ku baturage bari hamwe bari hejuru ya 500 000.

Kamulinda Fidele Claude wamurikaga ibikoresho by'Ikigo Electricom Ltd gikura ibikoresho mu nganda zo mu Bufaransa na Turikiya, yavuze ko imurikagurisha ryabafashije kwerekana bimwe mu bikoresho by'ubwubatsi birimo ibihangana n'ubukonje bwo ku nkuta z'inzu n'ibyo kurinda inkuba ku bantu benshi no ku ngo.

Ati “Iyi expo yaradufashije cyane, kuko nk'iyo umuntu ari ahantu mu nguni ye, aho akorera, nta bwo ushobora kumeya ibyo acuruza. Ariko iyo ugiye ahantu hagaragara, hasurwa nk'aha, abantu barahagera bakabona ibyo bifuzaga.”

Umuyobozi wungirije wa RDB ushinzwe ibikorwa, Emmanuel Hategeka, yavuze ko abitabiriye iri murikagurisha baturutse ku yindi migabane u Rwanda rubatezeho byinshi mu ishoramari.

Ati “Abo tubatezeho byinshi kuko bashobora no kuva hano biyemeje kuba batangira ibikorwa by'ubucuruzi byabo mu Rwanda, bashora imari mu Rwanda, by'akarusho bashobora kuba batangira gukorera ibicuruzwa byabo mu Rwanda bagamije guhaza isoko ryo mu Rwanda n'isoko ryo mu karere.”

Iri murikagurisha ryitabiriwe n'abavuye mu bihugu binyuranye hirya no hino ku isi, harimo u Bushinwa, u Buhinde, u Butaliyani, Turikiya, u Buyapani, Afurika y'Epfo, Ibihugu byunze ubumwe by'Abarabu (UAE), Oman, Tanzania, Kenya, Ibirwa bya Komore n'ibindi. Ni imurikagurisha ryatangiye ku wa 22 risoza ku wa 24 Ugushyingo 2017.

Bugeshi: Umukobwa udafite amikoro ntapfa kubona umugabo

By Ubukungu

Abakobwa batuye mu Murenge wa Bugeshi, mu Karere ka Rubavu, baravuga ko bahangayikishijwe no kutabona abagabo kuko nta mikoro baba bafite.

Bamwe mu bakobwa bo muri uwo Murenge twaganiriye, bavuga ko iyo uvutse iwanyu ari abakene, ntibabone imitungo baguha nta musore wapfa kugushaka, ahubwo yirebera umukobwa ufite ibintu.

Iyizire Leontine umwe mu bakobwa batuye muri ako gace, avuga ko ari ibintu bizwi ko umukobwa ukennye byanze bikunze aba agomba kugumana n'ababyeyi ariko yaba afite ibintu akaba wizeye kubona umugabo. Agira ati “Nibura kugira ngo ubone umugabo, biba bugusaba kuba ufite ubuso bw'ubutaka bungana na metero kare 18, kuko icyo gihe nibwo umusore apfa kukuvugisha mugatangira kuvugana ku by'urukundo.”

Iyizere avuga ko afite ingero nyinshi z'abakobwa atagaragaza, bagiye bahura n'icyo kibazo bagahitamo kubyarira iwabo kuko nta kundi baba bagomba kubigenza. Ati “Abahungu ba hano bakora ibishoboka byose bagaperereza iwabo w'umukobwa, basanga iwabo hari icyo bafite bagatangira kugutereta, basanga ntacyo ufite bakigendera. Mbese urebye, inaha, nta rukundo ruhaba, ahubwo haba gukunda ibintu.”

Abasore batuye muri uwo murenge nabo bemeza ko babanza kureba icyo umukobwa afite, bityo bakiyemeza kumushaka bagafatanya kubaka urugo.

Hakizimana Bosco ufite imyaka 26, avuga ko ako gace ari ihame ko umusore ugiye gushaka, agomba kubanza kureba umukobwa ufite ubutaka yahawe n'ababyeyi be,yaba atabufite agashaka undi. Ati “Umukobwa iyo azi ko afite amafaranga, araza akakureba wowe musore, ati vayo nkugurire, akagutwara mu kabari, nawe wabona ko hari icyo yibitseho, ugafatiraho cyane.”

Icyo kibazo cyabereye abakuze batuye muri aka gace amayobera , kuko mbere umusore yabanzaga kubaka, iwabo bakajya kumusabira. Bitandukanye n'ubu aho umusore ari we ujya kwishakira uzamushaka, nk'uko byemezwa na Ntahorugiye Leonard n'umusaza ufite imyaka 70. Ati “Ikibabaje ni ugusanga umwana w'imyaka 18 y'amavuko, abura umusore bajya kungana,akajya kwishyingira ku mugabo tujya kungana.”

Munyaneza Francois Xavier, umuyobozi ushinzwe irangamimerere mu Murenge wa Bugeshi, avuga ko imitungo itakabaye ikibazo ku bifuzaa gushakana, kuko agace batuye ari agace kihagije mu bukungu.

Avuga ko ako gace keremo imyaka itandukanye cyane cyane ibirayi, ku buryo buri muntu ashyize amaboko hasi agakora, byakemura iyo myumvire.

Avuga ko bagerageza kubiganiraho mu bikorwa bihuza urubyiruko nko mu muganda uba buri wa kane w'icyumweru. Muri ibyo bikorwa bakangurira urubyiruko gukora rukajya rushaka abagore rwishimiye aho gukurikirana abafite ibintu.

Abatuye muri uwo murenge n'indi mirenge bihana imbibi, bavuga ko usanga ako gace hari abakobwa benshi bagumirwa, bigatera bamwe kujya kwishyingira. Ingaruka zikomeye ni uko usanga havuyemo ubushoreke, kuko hari abagabo bashaka abagore barenze umwe.

Muri 2035 Umunyarwanda azaba yinjiza amadolari 4000

By Ubukungu

Ubuyobozi bw'urugaga rw'abikorera mu Rwanda ndetse na Minisiteri y'Imari n'Igenamigambi batangaza ko mu mwaka wa 2035 buri munyarwanda agomba kuzaba nibura yinjiza amadolari 4 000 ku mwaka. Ni intego izi nzego zivuga ko zihaye kandi ikaba ishoboka bitewe n'uko u Rwanda rukomeza kugaragaza umuvuduko mu iterambere.

Gahunda ya Guverinoma y'u Rwanda ni uko muri 2020 umunyarwanda azaba yinjiza amadolari 1 240 hanyuma muri 2035 buri munyarwanda akazaba abarirwa amadolari 4 000 ku mwaka.

Rugwabiza Leonard, umuyobozi mukuru ushinzwe ubukungu muri Minisiteri y'Imari n'Igenamigambi, avuga ko nta kabuza iriya ntego igomba kuzagerwaho. Ati “Tuzabigeraho nta kabuza, iteka mbwira abantu ko ibyo ushaka bitandukanye n'ibyo wifuza, iyo ubyifuza uhera mu kuvuga ko bibaye byaba ari byiza ariko twe ubu icyo dushaka ni ukubikorera, nta bwo byakwizana. Ubwo abandi babigezeho na twe nta kabuza tuzabigeraho.”

Akomeza agira ati “Icyo tugomba gukora ni ukongera umusaruro kuri buri munyarwanda ku giti ke, buri munyarwanda tugomba kumuha ubumenyi buhagije. Icyo ni cyo ibihugu byose byateye imbere cyane byakoze, yaba u Bushinwa, Singapole, Koreya y'Epfo n'abandi bose bateye imbere ni uko bagiye bazamura ubushobozi bwa buri muturage, ibindi bizakorwa ni ukuzamura umubare w'abizigamira mu bigo by'imari na banki.”

Abikorera biteguye gufasha mu kwesa uyu muhigo

Leta y'u Rwanda ihamya ko ubukungu bw'igihugu bugomba gushingira ku bikorera. Mu kiganiro kihariye Gasamagera Benjamin, umuyobozi w'urugaga rw'abikorera mu Rwanda (PSF) yagiranye n'Imvaho Nshya, yahamije ko iyi ntego ishoboka cyane, ibi akaba abishingira ku bimaze kugerwaho mu myaka nka 15 ishize.

Gasamagera Benjamin yagize ati “Ni intego ishoboka cyane, ni ibintu bishoboka ndetse dushobora no kubigeraho mbere yaho kuko urebye iterambere ry'ubukungu twagezeho muri iyi myaka nka 15 ishize twakoze ibintu byinshi kandi urebye twaheraga kuri zero. Twari turi ku gipimo cya 8% buri mwaka kandi n'ubukungu bw'isi ntibwari buhagaze neza. Ubu rero ukurikije ibyo dufite numva iyo ntego ishoboka cyane.

Biradusaba kuzamura umusaruro ku bintu byose muri rusange, umusaruro wavuye hasi cyane ariko tugomba gukomeza kuwuzamura kurushaho, mu rwego rw'abikorera dukurikije ibikorwa remezo byashyizweho na Leta kugira ngo byorohereze abashoramari n'abacuruzi tubona ko nta rwitwazo twabona turamutse tudakoze, tugomba kubikoresha kurushaho”.

Urugaga rw'abikorera ruvuga ko kugira ngo iyi ntego igerweho hazitabwa cyane ku buhinzi bukoresha ikoranabuhanga ndetse no kuzamurira inganda ubushobozi, aho Gasamagera agira ati “Mu nganda tuzakomeza gushyira imbaraga kuri ‘Made in Rwanda' kuko twasanze ari gahunda nziza. Mu buhinzi ho ubusanzwe tujya tugira umusaruro mwinshi ubundi ukaba muke, ubwo hagomba gufatwa ingamba tukajya duhunika igihe umusaruro wabaye mwinshi hanyuma kuba muke kwawo na byo ubundi biterwa n'izuba ariko burya imvura igwa mu Rwanda irahagije ku buryo dukoresheje uburyo bwo gufata amazi byadufasha kuko ubutaka bwacu butindana amazi.

Hazashyirwamo imbaraga cyane mu bikorera bacu bari mu rwego rw'ubuhinzi kugira ngo bamenyere gukoresha ikoranabuhanga buri kantu kose yaba mu kuhira imyaka, yaba mu gutubura imyaka, mu gukoresha ifumbire mvaruganda ahantu hose ho mu buhinzi tuzahashyira ingufu kuko na none burya umusaruro wo mu buhinzi ni wo n'inyinshi muri za nganda ziba zikeneye.”

PSF ivuga kandi ko mu bindi byazafashamo u Rwanda kugera ku ntego harimo gukomeza kunoza imitangire ya serivise, gukorera ku gihe, kwiha intego kandi inzego zose zigahigira kuzagera ku ntego no gukomeza gukosora ibidakorwa neza.

Ibanga wakoresha kugira ngo usezerere ubushomeri niba waracikirije amashuri

By Ubukungu

Benshi bihutira kugwiza umubare w'amashuri bibwira ko aribyo bizatuma babona akazi karyoshye. Yego, nibyo hari icyo ufite amashuri menshi aba arusha utayafite harimo n'akazi gahemba menshi. Ariko si ko bigenda buri gihe kandi si nako bizahora.

Ushobora kumva ukeneye impamyabumenyi cyangwa impamyabushobozi iyo ariyo yose ariko kandi nta buryo ubona byanyuramo ngo ukomeze wige. Ikindi kandi urumva gukomeza kuba umushomeri bikurambiye. Dore ibanga wakoresha kugira ngo ukirigite ifaranga.

UBUKUNGU turabahishurira ibanga ry' ibyo wakora kugira ngo ukirigite ifaranga.

1.Gana amashuri yigisha ubumenyi ngiro

Birashoboka ko waba warageze mu ishuri ariko ukarinda utaha nta mwuga uzi gukora. Uyu ni umwanya mwiza wo kugana ibigo by'amashuri biguhugure mu myuga itandukanye. Hano uzahitamo ibyo uziga ugendeye ku byo ukunda kuko bizagufasha kubyiyumvamo ndetse no kubimenya vuba. Ushobora kwiga kudoda, gukanika, amashanyarazi, guteka n'ibindi.

2.Ihangire umurimo

Muri iki gihe bigaragara ko ubushomeri bugenda bufata indi ntera cyane cyane mu rubyiruko. Nyuma yo kumenya umwuga runaka gerageza uburyo bwose bushoboka wihangire umurimo ujyanye n'ibyo wize. Ndetse byaba ngombwa ugatanga akazi ku bandi aho guhora wirukanka ngo urashaka akazi udafitiye icyizere. Ahubwo koresha umwanya wawe utekereze uburyo wakwiteza imbere udateze amaboko. Reba hano inzira umuntu wese yanyuramo kugira ngo yihangire umurimo. Jya usura UBUKUNGU.COM kenshi kuko tugira inama zagufasha.

3.Wasaba akazi

Dore imirimo ushobora kuba wahitamo mu gihe ugiye gusaba akazi. Uru rutonde twarukoze tugendeye ku buhamya bw'abakorera imyuga itandukanye mu Karere ka Huye. Ni imirimo kandi itanga amahirwe n'ubumenyi ku bashiritse ubute bashaka gukora ariko kandi binakenewe ku isoko ry'umurimo.

Ubukanishi
Aka ni akazi gahemba neza ariko gasaba ubwitanjye no gukoresha ingufu. Hari abavuga ko gasebetse ariko nayo ni imyumvire ikwiye gukosoka. Nonese ko wakwanga gukora ukicwa n'inzara, ukaba wakwiba ugafatwa ugafungwa? Iyo ubwo niyo yaba inzira nziza? Kurya ni ukwishyura kandi uburyohe bw'ifaranga ni akazi. Aha ushobora gukanika ibinyabiziga ndetse n'ibindi bikoresho. Mu gukora ibi bizagusaba kuba warahuguwe mu gihe gito ubundi ukaza ku isoko ry'umurimo.

Gukora ibikorwa byo kurinda umutekano
Ibisabwa kuri kano kazi ntabwo bikomeye kuko icyo usabwa ni ukuba uzi gusoma, ufite ikinyabupfura n'ubwitanjye, ushoboye gukora imyitozo ngororamubiri. Uretse no kuba aka kazi kagufasha kwiteza imbere, uba unatanga umusanzu mu kubaka igihugu cyawe uharanira amahoro y'abatuye isi ndetse n'abazagukomokaho.

Amashanyarazi
Aka nako ni akazi kagufasha gusezera ku bushomeri ndetse ugahita ukirigita ifaranga mu gihe gito. Icya mbere ni uko uba ufite amahugurwa ku bijyanye n'amashanyarazi ariko kandi hano hazanacyenerwa n'impamyabushobozi kugira ngo uzizerwe kuko amashanyarazi nago ari ayo gukorwamo n'ubonetse wese.

Ubudozi
Akazi gasaba kuba warafashe amahugurwa y'igihe gito ukongeraho kuba inyangamugayo ndetse no gukorera ku gihe.

Ubuhinzi n'ubworozi
Kuba wagira amahugurwa ku buhinzi n'ubworozi ni iturufu ikomeye yaguhesha akazi cyangwa ukakihangira. Ndetse ukaba wanahugura abandi.

Guhuza abacuruzi n'abaguzi
Aha ngaha icyo ukora ni ugushaka umuntu ufite ibicuruzwa cyangwa serivisi runaka bye, hanyuma ukajya umuhuza n'abakiriya. Ndetse byaba ngombwa ukajya ubibasangisha aho bari. Ariko ukajya ukora wizigama unahagirira ubunararibonye kugira ngo uzahite ujya kwikorera. Kwizigama ntabwo bivuga kwizigama n'ututari utwawe ngo ukunde uzikorere.

Gutwara ibinyabiziga
Nta gikomeye hano uretse kuba uzi gusoma ndetse ufite n'uruhushya rwo gutwara ikinyabiziga. Bikaza bisanga umurava, ikinyabupfura ndetse n'ubunyangamugayo.

Ibikorwa by'isuku, kwakirana urugwiro abagana amaresitora n'amahoteli n'indi myuga nabyo byagufasha gukirigita ifaranga byihuse.

Urashaka kumenya ahari akazi, andi makuru y' ubukungu ndetse n' inama zagufasha kwiteza imbere? Andika ijambo 'ubukungu' muri message wohereze kuri 2656

Ibihugu 15 aho abasore batarongora kubera umubare muto w'abakobwa mu bihugu byabo

By Ubukungu

Mu gihe mu Rwanda bivugwa ko abagore aribo benshi hari ibihugu bitandukanye ku isi aho abasore bagumiwe kubera umubare muto w'abagore mu bihugu byabo.

Zimwe mu mpamvu zitangwa zitera uwo mubare muto w'abagore nkuko ikinyamakuru herbeauty.co kibivuga ngo ni ihohoterwa ribakorerwa, intambara za hato na hato zituma bahunga na politiki y'uburinganire iki hasi mu bihugu bimwe, hamwe no kujya gushaka imirimo ahandi n'izindi.

Kubera izo mpamvu tugiye kureba ibihugu 15 ku isi ahaboneka umubare muto w'abagore aho bigora abasore baho kubona abagore.

15. Libya

Igihugu cya Libya kiravugwa kugira abasore batarongora kubera kubura abakobwa . Iki gihugu ni kimwe mu byaranzwe n'intambara z'urudaca igihe kinini, zatumye abagore benshi bagihunga, abandi bagahohoterwa mu buryo bukomeye. Ikindi kibitera ngo ni umuco waho udaha agaciro abagore n'ibindi bigatuma bajya ahandi gushaka amaramuko bagerayo bakarongorwa.

14. Philippines

Iki gihugu ni kimwe mu bihugu bikennye ku Mugabane wa Aziya. Abagore muri iki gihugu bakunze kujya hanze yacyo gushaka akazi nka Australia n'ahandi mu bindi bihugu bya Aziya. Ibyo rero biri gutuma w'abagore usohoka mu gihugu. Ubushakashatsi muri iki gihugu bugaragaza ko umubare w'abashatse ugenda ugabanuka, hakavugwa ko biterwa n'umubare muto w'abakobwa muri iki gihugu.

13. Iceland

Muri iki gihugu ubushakashatsi bugaragaza ko abahungu ari benshi kurusha abagore. Abahungu benshi biravugwa ko bibera mu bwigunge kubera kubura abakobwa. Hari amakuru ariko atizewe avuga ko Leta muri iki gihugu yemeye gutanga ibihumbi bitanu by'Amadolari ku mukobwa wese w'umunyamahanga kugirango yemere gushakana n'umusore wo muri iki gihugu ariko kandi wakwemera kuhatura.

12. Norway

Mu myaka ishize, umubare w'abahungu waje kurenga uw'abakobwa muri iki gihugu, aho bivugwa ko biterwa no gusuhuka, aho abakobwa bajya mu bindi bihugu gushakirayo amaramuko.

11. Iran

Nibwo bwa mbere mu mateka ya Iran, umubare w'abahungu uruta uw'abakobwa. Imwe mu mpamvu yabiteye ni uko umubare munini w'abakobwa muri iki gihugu bize cyane bigatuma bajya hanze gushaka imirimo ijyanye n'ibyo bize. Kuri iki kandi, benshi muri aba bagore bumva batashaka batari bagira aho bagera mu kwiteza imbere, nibyo biri gutera abasore muri iki gihugu guhura n'ibibazo byo kutabona abakunzi.

10. Sweden

Siwedi ni igihugu nacyo kuri ubu kivugwamo icyo kibazo. Bimwe mu bibazo bigenda bibitera ngo ni ikijyanye no kubura aho umuntu aba. Ingo zakira urubyiruko ziragenda ziba nke maze urubyiruko cyane cyane abakobwa bakabura aho batura. Ibi rero bituma umubare wabo mwinshi usohoka mu gihugu, cyane cyane abakobwa.

9. Afghanistan

Hari igihe abakobwa muri iki gihugu bakunze kugaragara mu migi itandukanye ariko kuri ubu kubera intambara zisa nkaho zihoraho n'umutekano muke, byatuma abakobwa n'abana bigira mu bindi bihugu ari benshi cyane, abahungu bagasigara barwana.

8. Nigeria

Muri Nigeria abasore 1.4 baba bahuriye ku mukobwa 1. Zimwe mu mpamvu zitangwa ku buke bw'abakobwa muri iki gihugu zirimo: Kurongorwa kw'abana bakiri bato, kuba abagabo bemererwa gushaka abagore benshi n'umuco wo muri iki gihugu wo guca imyeyo uhiganje, bituma benshi bahunga iki gihugu bakajya kureba ahandi bibera habaha umutekano. Leta muri iki gihugu iherutse kugaragaza ko muri Nigeria hari ikibazo cy'abasore basaziraho kubera kubura abakobwa barongora.

7. Greece

Greece ni igihugu gikunze kugira abimukira benshi kubera uburyo ari cyiza no kuba ubuzima bwaho buhendutse kurusha ahandi mu bihugu byo ku mugabane w'Uburayi. Ibi rero bituma abakobwa benshi basohoka bakajya mu bihugu byo kuri uwo mugabane kujya kureba aho bahembwa neza.

6. Misiri/ Egypt

Misiri ni kimwe mu bihugu bifite abaturage benshi mu bihugu by'Abarabu. Ubushakashatsi bwerekana ko abasore 1.5 bahurira ku mukobwa 1. Abakobwa benshi muri iki gihugu bakora imirimo yo murugo. Abize usanga benshi barize ibijyanye na siyansi zirimo: Ubuvuzi, amategeko n'ibindi. Benshi muri aba rero bigira mu bindi bihugu aho bashobora kubona imirimo, maze bikagira ingaruka ku basore benshi basigara mu bwigunge.

5. Ubushinwa

Ubushinwa nicyo gihugu cya mbere ku isi gifite abaturage benshi. Ni igihugu kivugwamo abakobwa bake kubera umuco mubi wo gukuramo inda z'abana b'abakobwa. Ibi rero bituma abakobwa baba bake cyane kurusha abahungu. Mu Bushinwa, imiryango myinshi iha agaciro abana b'abahungu kurusha abab'akobwa. Kuri ubu Leta noneho yatangiye kugaragaza icyo kibazo. Abasore benshi b'Abashinwa basigaye bishakira abakobwa b'Ababarusiyakazi ahavugwa kuba abasore bake.

4. Amerika

Ubushakashatsi bwakozwe mu mwaka wa 2010, bwagaragaje ko muri Leta zunze ubumwe z'amerika abakobwa bari miliyoni 157, abasore bakaba miliyoni 151.8. Gusa hari imigi imwe nimwe aho abasore baruta abakobwa. Twavuga nka Las Vegas, Los Angeles.

3. Ubuhindi

Ubuhindi ni igihugu kiri hafi gufata Ubushinwa mu kugira umubare munini w'abaturage ku isi. Iki gihugu kiravugwa kugira umubare muto w'abakobwa aho umukobwa umwe arambagizwa n'abahungu 1.08.

2. United Arab Emirates

Kubera ubutunzi buri muri iki gihugu, ubukerugendo bwateye imbere, ni bimwe mu bituma abanyamahanga benshi bifuza kujya kugituramo. Biravugwa ko 85% by'abatuye iki gihugu kiri ku mugabane wa Aziya ari abanyamahanga kandi benshi ni abigitsinagabo. Ibi rero bituma abasore benshi bigira gushaka ahandi mu bindi bihugu.

1. Qatar

Qatar ni igihugu kiza ku isonga mu kugira umubare muto w'abakobwa Ni gihugu gikize cyane kuri petrole. Abasore 3.41 muri iki gihugu bahurira ku mukobwa umwe iyo barambagiza. Kimwe mu bibazo bitera ibura ry'abakobwa ni umubare munini w'abimukira bajya muri iki gihugu kuhashakira amaramuko kubera ubukire bwacyo aho bagize 94% by'abakozi muri iki gihugu.

Ishusho iriho Yezu yagurishijwe miliyoni 450 z'Amadorali muri cyamunara

By Ubukungu

Ishusho imaze imyaka irenga 500 bikekwa ko yashushanyijwe n'umunyabugeni w'umutaliyani Leonardo da Vinci yagurushijwe mu cyamunara i New York muri Amerika (USA).

Iyo shusho iriho umugabo w'umusatsi muremure n'ubwanwa acigatiye umubumbe ukoze mu kirahure, ikindi kiganza kiri imbere y'igituza urutoki rwa mukubitarukoko na musumbazose zireba hejuru. Uwo mugabo bivugwa ko ari Yezu/Yesu.

Iyo shusho bise Salvator Mundi (bisobanura umutabazi w'isi) yagurishijwe mu cyamunara miliyoni 450 z'Amadorali ya Amerika, abarirwa muri miliyari 380RWf. Cyamunara yabereye mu nzu y'ubugeni yitwa Christie. Niyo shusho iguzwe amadolari menshi cyane gusumbya andi yose yabayeho mu mateka y'ubugeni.

Umunyabugenzi Leonardo da Vinci yapfuye mu mwaka wa 1519, asize inyuma amashusho atarenga 20 arimo iyamamaye cyane izwi nka Mona Lisa. Mona Lisa iriho umugore ufite isura itangaje kuko hari igihe umureba ukabona ameze nk'urimo guseka, ubundi ukabona arasa nk'ufite agahinda.

JPEG - 43.1 kb
Ishusho yamamaye cyane yiswe Mona Lisa yakozwe n'umunyabugeni rurangiranwa Leonardo da Vinci

Iyo shusho yindi yitwa Salvator Mundi bivugwa ko da Vinci yayishushanyije mu mwaka wa 1505, ikaba ari yo yonyine igiye mu maboko y'umuntu ku giti cye. Andi mashusho ye yose ari mu nzu zimurika ibikorwa by'abanyabugeni.

Cyamunara yo kugurisha iyo shusho iriho Yezu yatangiye ba nyirayo bashaka miliyoni 100 z'Amadorali (miliyari 85RWf) ariko cyamunara yagiye kurangira hamaze kuboneka uwemeye gutanga miliyoni 450 z'Amadorali. Uwaguze iyo shusho ariko ntiyabashije kumenyekana kuko yabikoreye kuri telefone mu iciririkanya ryamaze iminota 20.

Ishusho Salvator Mundi yari iherutse kugurishwa muri cyamunara yabereye mu mujyi wa London mu Bwongereza mu mwaka wa 1958. Icyo gihe yaguzwe ama-Livre Sterling 45 yonyine (yakoreshwaga muri icyo gihugu) arenga ibihumbi 45RWf. Icyo gihe byavugwaga ko iyo shusho atari da Vinci wayishushanyije, ahubwo ari umuyoboke we wayikoze.

Iyo shusho yigeze no gutungwa n'umwami Charles I w'Ubwongereza ahagana mu mwaka wa 1600 ariko iza kuburirwa irengero, yongera kugaragara muri 2005.

BAD yahaye u Rwanda inguzanyo ya miliyoni 84.3 $ izateza imbere urubyiruko n'abagore

By Ubukungu

Banki nyafurika itsura Amajyambere (BAD) yageneye u Rwanda inguzanyo ya miliyoni 84.3 z'amadolari azafasha muri gahunda yo guteza imbere ubumenyi mu bucuruzi, SBDP.

Iyi nguzanyo yemejwe n'inama y'ubutegetsi ya BAD, izifashishwa mu kongera umusaruro w'inganda ziciriritse no guhanga imirimo 200 000 buri mwaka. Banki itanze iyi nkunga mu gushyigikira ubukungu w'u Rwanda buzamuka ku kigero cya 6.8 % buri mwaka kuva muri 2014 ndetse na gahunda igihugu cyihaye yo guhanga imirimo 200,000 buri mwaka idashingiye ku buhinzi.

Gahunda ya SBDP ifite intego yo kuba yateje imbere inganda ziciriritse 100 na koperative 500 bitarenze umwaka wa 2020 bizafasha izo nganda kongera ubwiza bw'umusaruro zatangaga kandi n'amafaranga zinjizaga akiyongera.

BAD ivuga ko urwego rw'abikorera arirwo nkingi yo guca ubushomeri mu gihugu, nyamara mu Rwanda ntiruratera imbere ku buryo rwahangana n'umubare w'ubushomeri buhari.

Imibare y'Ikigo cy'Igihugu gishinzwe ibarurishamibare mu Rwanda iherutse kwerekana ko ubushomeri buhagaze kuri 16.7 %, mu rubyiruko bukaba ku kigero cya 21 %. Iyi nguzanyo ya BAD kandi izafasha urubyiruko n'abagore binyuze mu Mirenge SACCO.

Gahunda ya SBDP ni iya Guverinoma y'u Rwanda ifatanyije na BAD, urwego rw'abikorera n'abandi bafatanyabikorwa bazajya batanga inama y'uburyo iyo gahunda yanozwa. Banki nyafurika itsura Amajyambere yagiye itera inkunga u Rwanda mu nzego zitandukanye zirimo ingufu, ibikorwaremezo, gutwara abantu n'ibintu n'ibindi.

Mu Mwaka ushize, iyi banki yahaye u Rwanda inguzanyo ya miliyoni 50 z'amadolari muri gahunda ya SEEP III igamije kongera ubumenyi mu guhanga imirimo. Iyi gahunda yari igamije guhanga imirimo mishya 30,000 idashingiye ku buhinzi mu mwaka wa 2016 na 2017.

Rubavu: Hubatswe amasoko ya kijyambere abura abayajyamo

By Ubukungu

Amwe mu masoko ya kijyambere yubatswe mu Karere ka Rubavu mu bihe bishize yabuze abacuruzi bayakoreramo, bake bayajyamo bakavuga ko babuzwa icyashara n'udusoko duto tugiye turi ku mihanda no mu nsisiro.

Abaturage baturiye isoko rya Rukoko, ahazwi nka Buhuru riri mu Kagali ka Rukoko, Umurenge wa Rubavu, hashize imyaka igera kuri irindwi ryubatswe ariko ridakorerwamo; isoko rya Rugerero ryo rimaze imyaka irenga 10 ariko naryo abaririmo bavuga ko usanga ryambaye ubusa.

Ntamugabumwe Jerome ucururiza muri iri soko avuga ko bahangayikishijwe cyane no kutabona abakiriya. Yagize ati “Tubona ari intege nke z'abayobozi, usanga ibintu bidanditse ahantu hose, nta muntu uzaza kugura hano ibintu abisize hanze kandi binahendutse kubera ko badasora.”

Yakomeje avuga ko bahora babimenyesha ubuyobozi bakizezwa kwirukana abacururiza ku mihanda, bose bakazanwa mu isoko ariko ntibikorwe, n'abaririmo bakagenda barisohokamo. Yagize ati” Umucuruzi araza yabura abakiriya akagenda, undi akaza agahanyanyaza byamunanira agasubira muri karitsiye aho yabona abakiriya, turifuza ko abantu bose baza muri iri soko, abantu bose bagatozwa guhahira aha aho kugira ngo bahahire muduce dukikije isoko.”

Nyiranganizi Odette utuye mu Murenge wa Rugerero we yagize at “Iri soko ryaje ari igisubizo tuvuga ngo turasubijwe ariko ntabwo ryigeze rirema imyaka irihiritse, ariko usanga biterwa n'uko hari abacuruzi bicira abandi noneho bagacururiza ku mihanda, mu nsisiro ugiyemo akabura abamugana nawe akabivamo. Iki kibazo cy'abacururiza mu nsisiro kimaze kuduhangayikisha kuko kirahombya impande zose.”

JPEG - 482.1 kb
Abaturage bahisemo kurema udusoko duto ku mihanda no ku nsisiro

Ubuyobozi bw'Akarere ka Rubavu bwemeranya n'aba baturage ku gihombo giterwa n'abagicururiza ku mihanda aho kujya mu masoko ya kijyambere, ariko kavuga ko hari ngamba zafashwe mu gutuma ayo masoko akora neza.

Umunyamabanga Nshingwabikorwa w'Akarere ka Rubavu, Nsabimana Sylvain, yagize ati “Nko ku isoko rya Buhuru twafashe ingamba ko kuva mu kwezi kwa Mutarama 2018 hari ibicuruzwa bizajya bihabarizwa, cyane imboga kuko inyinshi ziva muri biriya bice naho iryo mu Murenge wa Rugerero twasanze rigomba gusanwa rigatunganywa ubundi tugakurikizaho ingamba zigamije gutuma aganwa nk'uko bikwiye.”

N'isoko ryubatswe mu Murenge wa Rugerero naryo ntiriraganwa uko bikwiye, kubera ko riri hagati abahatuye bakaba barema isoko rya Gisenyi n'irya Mahoko. Abaturage bacururiza mu muhinda bo usanga bavuga ko kutajya mu masoko ya kijyambre biterwa n'ubushobozi buke.

❌