WebRwanda.com

🔒
❌
There are new available articles, click to refresh the page.
Yesterday — April 18th 2019Agakiza

Icyumweru cy'umubabaro (igice cya 4) Pastor Desire

By Pastor Desire Habyarimana

Kuwa kane:

Uyu munsi wa kane Yesu yasangiye n'abigishwa be ifunguro rya nyuma.

Mu cyumba cyo hejuru cyatunganirijwe Yesu ubwe ndetse n'abigishwa be ku bw'urupfu rwe. Yahaye ifunguro rya Pasika igisobanuro gishya. Irobe ry'umutsima n'igikombe cya vino byashushanyaga umubiri we wendaga gutambwa ndetse n'amaraso ye yendaga kumenwa.

Nuko rero ashyiraho "ifunguro ryera ry'Umwami wacu." Nyuma yo kuririmba indirimbo bagiye mu murima w'i Getsemani,aho Yesu yasenganye umubabaro, kuko yari azi ibyendaga kumubaho.

Muri iki cyumweru cy'umubabaro byari bigeze aho bikomeye, ariko ahishura icyamuzanye abamwita mwene Mariya na Yosefu bari bagiye kumenya ko yaje gucungura isi.

Muri Yohana 6:53-57 yahishuye ko utarya umubiri we ntanywe amaraso ye nta bugingo aba afite, urya umubiri we aba afite ubugingo buhoraho, azamuzura, umubiri we ni ibyo kurya by'ukuri, amaraso ye ni ibyo kunywa by'ukuri, uguma muri we iteka, azabaho kubwa Kristo, umubiri we uruta Manu yo mu butayu.

Umuntu utazwi yateguye icyumba cyo hejuru yakoze igikorwa cyiza. Ese buriya duteguye imitima yacu ntitwaba tugize neza kurutaho? Yesu icyari kimuzanye kwari ugukiza umutima akunga abantu n'Imana. Muri iki gihe imyemerere y'amadini ituma twubaha disipuline kuruta impinduka z'umutima, ibyo biduhindura abanyedini kuruta kuba abana b'Imana.

Yuda yasohotse muri icyo cyumba ajya kugambanira Yesu ku batambyi bakuru ntacyo atari yabwiwe, yari amaranye imyaka 3 na Yesu.

Ibyo yakoze ibyinshi bari kumwe, burya abapagani bo mu rusengero ntacyo baba batazi ahubwo icyabananiye ni uguha imitima yabo Yesu.

Mbasabe: imibabaro ya Yesu yo ntacyari buyibuze ariko ntitukayigiremo uruhare nka Yuda, Yesu yavuze ko uzana ibigeragezo azabona ishyano, mweneso ntakageragezwe ubigizemo uruhare musengana, musangira ifunguro ryera.

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by'abantu k'ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org

Before yesterdayAgakiza

Icyumweru cy'umubabaro (igice cya 3) Pastor Desire

By Pastor Desire Habyarimana

Umunsi wa gatatu:

Umunsi wa gatatu wari uw'ikiruhuko Yesu yiriwe i Betaniya nta kintu yakoze ariko mu by'ukuri ugerageje kwinjira mu marangamutima ye yari amerewe nabi kuko bwari bucye afatwa, yiriwe afite umubabaro kubw'ibyari bigiye kumubaho.

Ubusanzwe umuntu mukuru wese iyo agiye gupfa ariyumva rimwe na rimwe akaraga abo mu muryango we, Yesu kuba yari yiriwe mu rugo, yariyumvaga, yari afite ibise byo kubyara itorero, imyiteguro yose yari yararangiye, Uwo munsi ibitabo byiriwe bizinze ntawabonye icyo yandika.

Imirimo yakoze kuva kuwa 5 ushize byari byarakaje abafarisayo n'abatambyi, inama z'akagambane zikorwa ku manywa na n'ijoro bifuza uko bamufata, Yesu yari afite umubabaro.

Hari ubwo umuntu yiyumvamo akaga kari imbere ye akaba adafite ibisobanuro cyangwa atakubwira neza uko yiyumva cyangwa ikindi yabikoraho akihangana ariko ikirere cye gifunze.

Nagira ngo mbibutse ko aha hose atahigwaga n'abapagani ahubwo bari abanditsi, abafarisayo n'abatambyi. Guhemukirwa n'abitwa abo munzu y'Imana byica kabiri. Ni byiza kuba umwana w'Imana ntuzabe umunyedini kuko ridatanga ubugingo.

Hari icyo ntekereza buriya buri wese aramutse yemeye guhinduka ku ngeso ze ntitwaba turuhuye umutima wa Yesu ko na n'ubu agihagarikiye umutima ingeso mbi twirirwamo kandi tuvuga ko dukijijwe?

Ese ubu Yesu ntahora ahagaritse umutima kuko tutari abizerwa mu kazi, mu butunzi yaduhaye, mukubana n'abandi? Nubwo agira imbabazi nyinshi ariko duhindutse yakwishima.

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by'abantu k'ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org

Icyumweru cy'umubabaro (igice cya 2) Pastor Desire

By Pastor Desire Habyarimana

Kuwa mbere:

Yesu yirukanye abacururiza mu rusengero, icyo gihe mu rugo rw'abanyamahanga hari huzuye abacuruzi n'abavunjayi barimo bashaka inyungu z'ikirenga. Yesu yabasohoyemo ndetse yubika intebe n'ameza byabo.

Ese niba Yesu atarihanganiye abacururiza mu rusengero rw'amatafari rusanzwe, azihanganira ingeso zibitse mu mitima y'abarokore banze guhindukaho? Kuvunja ni ukugurana amafranga y'ikindi gihugu burya abantu benshi satani yarabavunjiye abatwara ubukristo abasigira idini, abatwara gusenga abasigira intege nke, abatwara ukurundo abasigira urwango, ibice, kwikunda n'ibindi.

Abashumba benshi bigishije abantu kuza mu rusengero ariko ntibabigisha ko nabo ari insengero z'Umwuka Wera ibyo bituma bitwararika iyo baje mu rusengero rwubatswe n'abantu ariko hirya yaho bakananirwa kwera imbuto Imana ishaka.

Iri soko ryashinzwe n'abafarisayo n'abatambyi ngo abantu bagurire ibitambo hafi bibonere inyungu, binabahindure abakire. Amadini menshi akora ibiri mu nyungu zabo atari inyungu z'Ubwami bw' Imana.

Dukeneye abantu bagarura kuvugisha ukuri bagaca akajagari kari mu bantu bavuga ko basenga.

Kuwa kabiri

Uyu munsi mu gitondo habayeho impaka nyinshi, Yesu yigishije mu migani abasha gusimbuka imitego myinshi yatezwe n'abatambyi.

Kuwa kabiri nyuma ya saa sita, yagiye ku musozi Elayono ahateganye na Yerusalemu, yigishije kwirinda Abafarisayo, yahanuye isenywa ry'urusengero rukomeye rwa Herode ndetse anabwira abigishwa be iby'ibihe bizaza no kugaruka kwe.

Natwe twarasenyutse mu mwuka, amarangamutima n'inyuma ku mubiri abantu babuze ababo n'ibyabo ariko Yesu abasha kongera kutwubaka tukaba abantu bishimye.

Iyo urebye agaciro, umutekano, ubuyobozi bwiza, iterambere riri mu gihugu cyacu ubona gukora kw'Imana nta mbaraga z'umuntu zari kubishobora.

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by'abantu k'ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org

Icyumweru cy'umubabaro (igice cya 1) Pastor Desire

By Pastor Desire Habyarimana

Muri iyi nyigisho tuzarebera hamwe icyumweru cy'umubabaro Yesu yanyuzemo kugira ngo agera ku kuducungura k'Umusaraba, kandi imibabaro ye idufasha kwihanganira iyo tunyuramo kuko ari icyitegererezo cyacu.

Kuko ubwo yababajwe no kugeragezwa ubwe abasha gutabara abageragezwa bose kuko azi intimba icyo ari cyo Abaheburayo 2

Kuwa gatanu
Yesu yageze i Betaniya iminsi 6 mbere ya Pasika kugira ngo amarane igihe n'incuti ze, Mariya, Marita, Lazaro.

Kuwa 2 wakurikiyeho nimugoroba , mu gihe Yesu yari akiri i Betaniya, Mariya yasize ibirenge bye amavuta y'igiciro cyinshi nk'igikorwa cyo kwicisha bugufi. Iki gikorwa cyerekanye ukwiyegurira Yesu kwa Mariya n'ubushake bwe bwo kumukorera. Yohana 12

Kuwa gatandatu
Isabato Umunsi w'ikiruhuko: Yesu yizihije isabato mu buryo bw'Abisirayeli bwa ba kera.

Ku cyumweru:
Yesu yagiye i Yerusalemu ahetswe n'indogobe ku munsi wa mbere w'icyumweru bisohoza ubuhanuzi bwa kera (Zekariya 9:9) ikivunge cy'abantu cyamwakirije amagambo yo kuri (Zaburi 118:25-26) bityo bimuhesha izina ry'Ubumesiya nk'uhagarariye Uwiteka, Umwami w'Abisirayeli wagombaga kuzaza.

Ikibabaje ni uko abavuze ngo hoziyana nibo bavuze ngo nabambwe nyuma y'icyumweru kimwe gusa, abantu nibagukomera mu mashyi uzahore utekereza ko bahindura imvugo bitewe n'igihe uri kunyuramo, ibikomeye wanyuzemo humura nturi wenyine

Ibi byose Yesu yanyuzemo byari ukugira ngo imibabaro ye izaduhe kugira amahoro, ibyishimo, kugubwa neza, kandi aduhumuriza mu makuba yacu ngo natwe tuzahumurize abayarimo tubaha ihumure twahawe n' Imana.

Niba wifuza gusengerwa cyangwa kugisha inama, waduhamagara kuri +250788422984. Dusengera ibyifuzo by'abantu k'ubuntu. Sangiza ubu butumwa inshuti zawe.
Pastor Desire
www.agakiza.org
Fcbk: Agakiza.org
Chaine YouTube: Agakiza.org

CEP IPRC Kitabi igeze kure imyiteguro y'igiterane kidasanzwe igiye gukora

By Ismael KAYISHEMA

CEP IPRC KITABI yateguye igitera kidasanzwe kizaba kuwa 14 Mata 2019, guhera saa 08H00 kugeza saa 12h00. CEP IPRC KITABI ni umuryango w'abanyeshuri b'abapentekote (ADEPR ) bakorera umurimo w'Imana mu ishuri rikuru ry'imyuga n'ubumenyi ngiro rya Kitabi ( IPRC KITABI) ari nako babifatanya n'amasomo.

Iki giterane kizitabirwa n'abakozi b'Imana batandukanye : abashumba, abaririmbyi, abakristo n'abandi batumirwa batandukanye by'umwihariko umushumba w'ururembo rw'Amajyepfo nawe azaba yitabiriye iki giterane.

Umuyobozi wa CEP IPRC KITABI ucyuye igihe , Innocent Ahishakiye avuga ko imyiteguro y'iki giterane igeze kure , abatumirwa Bose biteguye n'indi myiteguro yose igeze kure.

Reverand Pasteur NSENGIYUMVA Ereneste ukoranye umunsi ku munsi na CEP IPRC KITABI nk'umushumba wa Paroisse KAGANO, ashimira Imana aho umurimo aba banyeshuri bakora ugeze ukorwa , yavuze ko bageze ku rwego rushimishije , atanga urugero rw'ibiterane bakoze byo Gushyigikira abatishoboye n'ibindi byinshi
, Umushumba Ereneste avuga Kandi ko muri iki giterane ari naho hazabera umuhango w'ihererekanyabubasha hagati ya Komite ya CEP IPRC KITABI icyuye igihe n'abagize komite nshyashya bazarambikwaho ibiganza n'abakuru barimo umushumba w'ururembo rw'Amajyepfo

Imyiteguro ya Chorale YAKINI iragaragaza ko iki giterane kizaba kiri ku rwego rwo hejuru , aho abaririmbyi bahora mu myiteguro umunsi ku wundi , dore ko isanzwe ari imwe mu machorales akomeye mu itorero ry'akarere ka Nyamagabe

Abanyamuryango CEP IPRC KITABI

ZABURI 44.2-4 4.Kuko atari iyabo nkota...

By Martha

ZABURI 44.2-4
4.Kuko atari iyabo nkota yabahaye guhindūra igihugu, kandi atari ukuboko kwabo kwabakijije, ahubwo ni ikiganza cyawe cy'iburyo, n''ukuboko kwawe n'umucyo wo mu maso hawe,kuko wabīshimiraga.

Iyi ndirimbo ni indirimbo ya bene Kora, ivuga ku bwoko bwa Isirayeli;burya ikintu cya mbere umuntu wamenye Imana aba akwiye kugira intego mu buzima bwe, ni UKWISHIMIRWA N'IMANA kuko iyo Imana ikwishimiye hari ibyo ihindura ku buzima bw'umuntu wayeguriye ubuzima bwe.

Ese wakora iki kugira ngo Imana ikwishimire?

1.Kwihana:Iyo umuntu yihannye neza ibyaha bye byose, ako kanya Imana ihita imwishimira; Ibindi byose wakora (gusenga, guterana, gutura, n'ibindi) na byo ni byiza, ariko si byo byatuma Imana ikwishimira; aha twakwibuka ko igihe umwana w'ikirara yamaraga kwisubiramo, akihana akagaruka kwa se, se yaramwishimiye cyane ndetse amukoreshereza n'umunsi mukuru (Luka 15.32)

2.Kuba Uwera
:Ijambo ry'Imana rigira riti: Abera bo mu isi ni bo mfura nishimira bonyine (Zaburi 16.3), kuba uwera birashoboka, kuko twezwa n'amaraso ya Yesu Kristo, Ijambo ry'Imana, Umwuka Wera, ndetse n'Imana ubwayo (1Yoh 1.7)

3.Kugira kwizera:Nta kindi Yosuwa na Kalebu bakoze cyatumye Imana ibishimira, uretse kwizera(Kubara 14.8)

Dore ingero 2 z'abantu bibiliya itwereka ko Imana yahamije ko ibishimira:

1. Umwami Dawidi (Ibyakozwe n'Intumwa 13.22):yakundaga guhimbaza Imana cyane, akayicurangira, akayiririmbira; yahimbye Zabura zisaga 70

Kandi yagiraga ishyaka ryinshi ry'umurimo w'Imana (1Samweli 17.26),akanamenya kwihana amaramaje no gusaba Imana imbabazi.Nawe nugira ishyaka ry'umurimo w'Imana ugaharanira ko utagibwaho igitutsi, Uwiteka azakwishimira;

2. Koruneliyo:Yubahaga Imana agakunda gusenga, akagira imirimo myiza myinshi n'ubuntu bwinshi (Ibyakozwe n'Intumwa 10.4)

Biragukwiriye ko niba waragize umugisha wo kumenya Imana, ukaba uri umukristo, haranira kubaho ubuzima Imana ikwishimira, kuko nibiba bityo ni bwo Imana izakwimura, ikagukura mu isi nk'uko yabikoreye Henoki (Itangiriro 5.23).

[email protected]

UMUSOMYI WA BIBILIYA, Kuwa 08.Mata 2019

By Martha

UMUSOMYI WA BIBILIYA, ni igitabo gitegurwa n'UMURYANGO W'ABASOMA BIBILIYA MU RWANDA (Ligue Pour la Lecture de la Bible), kigamije gufasha abantu guhura n'Imana buri munsi mu ijambo ryayo. Kuri uyu wa mbere tariki ya 08/04/2019 turasoma mu UMUBWIRIZA 6.1-12
1.Hariho ikibi nabonye munsi y'ijuru kijya kiremerera abantu:
2.Umuntu Imana yahaye ubutunzi n'ubukire n'icyubahiro, ntabure ibyo umutima we wifuza byose, ariko Imana ntimuhe inda yo kubirya, ahubwo umushyitsi akaba ari we ubyirīra, ibyo na byo ni ubusa, n'indwara mbi.

3.Umuntu ubyaye abana ijana akarama imyaka myinshi, iminsi yo kubaho kwe ikagwira ariko umutima we ntuhage ibyiza, akabura n'aho ahambwa, ndavuga yuko bene uwo arutwa n'inda yavuyemo.

4.Kuko iyo nda iza ari ubusa ikagenda mu mwijima, kandi izina ryayo ritwikiriwe n'umwijima,

5.Ndetse ntiyigeze kubona izuba haba no kurimenya, iyo nda iba iguwe neza kuruta wa wundi.

6.Naho yarama imyaka ibihumbi bibiri atanezezwa n'ibyiza, mbese bose ntibajya hamwe?

7.Imirimo yose umuntu akora aba akorera inda ye, nyamara ntashira umururumba.

8.Umunyabwenge arusha umupfapfa iki? Umukene uzi kwitondera imbere y'abakiriho aba afite iki?

9.Kubonesha amaso biruta kuzerereza umutima. Ibyo na byo ni ubusa, ni nko kwiruka inyuma y'umuyaga.

10.Ikiriho cyose cyiswe izina kera kandi umuntu azwi icyo ari cyo, ntashobora kurwanya umurusha amaboko.

11.Ko haba ibintu byinshi bigwiza ibitagira umumaro, ibyo byungura umuntu iki?

12.Noneho ni nde wamenya ikigirira umuntu umumaro akiriho, mu minsi yose yo kubaho kwe kutagira umumaro igahita nk'igicucu? Ni nde wabasha kubwira umuntu ibizaba munsi y'ijuru mu nyuma ze?

Ibibazo bidufasha gusobanukirwa
1.Ibyo nsomye birambwira ibya nde, kandi biranyigisha iki?
2.Ibyo nsomye biranyigisha iki
- Ku Mana data wa twese?
- kuri yesu kristo?
- ku mwuka wera?
3.Mbese mu byo nsomye harimo:
- Urugero rwiza nakurikiza?
- Urugero rubi nakwirinda?
4.Mbese mu byo nsomye harimo:
- Itegeko nkwiriye kumvira?
5.Mbese mu byo nsomye harimo:
- Icyo Imana yansezeranyije?
6.Mbese mu byo nsomye harimo:
- ijambo rimburira?

Ubusobanuro bw'umusomyi

Ni nde wamenya ikigirira umuntu umumaro akiriho? (12): Umubwiriza ntiyumva ukuntu Imana iha umuntu ibyakamuteye umunezero birimo ubutunzi, ubukire n'icyubahiro, ariko bikarangira atanyuzwe kubera kubura inda yo kubirya, ahubwo bikaribwa na rubanda. Ubundi ibyo byose kubigira ntacyo byari bitwaye. Ariko iyo bitarimo kubaha Imana, byose birangira ari ukwiruka inyuma y'umuyaga. Uko twaba turi kose, ibitugirira akamaro bikaduhesha umugsha ni ukuzirikana ko muri iyi si turi abashyitsi n'abimukira (1Ngoma 29.14-15).

Ni nde wabasha kubwira umuntu ibizaba mu nsi y'ijuru mu nyuma ze? (12). Ntawe. Kuko ikuzimu aho uwo muntu ajya nta mirimo nta n'imigambi ihaboneka (Umubw.9.10). Muri iyi si ni ho abatunzi bakwiye gutegurira iby'inyuma y'ubu buzima aho kwibera mu kudamarara, kukazakurikirwa no kubabara iteka (Luka 16.19,22-23) Icyifuzo: Sengera abantu bahorana umururumba w'ibintu byinshi bikabatera kubuza abandi umutekano, kugirango bamenye ko Yesu ahaza bemere kumwakira.

[email protected]

Ese koko hari igihe kiboneye umuntu aba akwiriye kuryaho imbuto.

By Martha

Muri iyi nkuru twifuje kubagezaho igihe kiza cyangwa igihe kiboneye umuntu aba akwiriye kuryamo imbuto, turanavuga ku myumvire itariyo ku bijyanye n'igihe kiza cyo kurya imbuto, nkuko byatanghajwe n'abahanga mu gukora ubushakashatsi ku mirire n'ubuzima.

Ubusanzwe ibintu byose bigira igihe kiboneye cyo kubikoramo, gukora ibintu hatitawe ku gihe gikwiriye cyo kubikoramo, bishobora gutuma intego itagerwaho, ni muri urwo rwego twifuje kwibutsa abakunzi bacu badukurikira ko kurya imbuto bigira igihe gikwiriye bikorwamo, mu gihe bikozwe neza, umumaro wo kurya imbuto ukabasha kugerwaho tutibagiwe ko hari n'ibindi byo kwitabwaho nk'isuku n'ibindi.
Igihe ni ikintu cyo kwitabwaho mu kugira ngo umuntu aboneze imirire, umuntu ashobora gutakaza intungamubiri zimwe na zimwe ziba mu biribwa, bitewe n'imyitwarire yagize mu gihe cyo gufata amafunguro.

Igihe gikwiriye cyo kurya imbuto rero ushobora gusanga kitavugwaho rumwe n'abantu batandukanye, bamwe bakavuga ko ari byiza kurya imbuto mu gitondo, abandi bati igihe kiza ni mu masaha y'umugoroba, abandi bati igihe cyiza ni mbere yo gufata amafunguro abandi bati ni nyuma yo gufata amafunguro, ariko ukuri guhari ni uko igihe cyose waryamo imbuto, ari igihe kiza, ibindi byose ni imyumvire ipfuye nkuko tubikesha igitangaza makuru kitwa www.healthline.com, gikora ubushakashatsi mu bijyanye n'imirire n'ubuzima, aho cyatangaje imyumvire ipfuye igera kuri itanu, ivuga ku bijyanye no kurya imbuto.

Imbuto ni ibiribwa bikungahaye ku ntungamubiri nyinshi, kurya imbuto rero ni igice kimwe k'ingenzi mu bijyanye no kurya indyo iboneye, hatitawe ku gihe waziririye.

[email protected]

Ubutumwa bw'Ihumure by Pastor Desire

By Ubwanditsi

Muri iki gihe twibuka ku nshuro ya 25 Jenoside yakorewe Abatutsi, umuryango w' agakiza.org na SSHM dufashe mu mugongo abacitse kw'icumu rya Genocide yakorewe abatutsi.

Turasaba Imana ngo ikomeze kububaka mu mwuka,
amarangamutima n' umubiri.

Hashimwe Imana y'Umwami wacu Yesu Kristo ari yo na Se, ari na yo Data wa twese w'imbabazi n'Imana nyir'ihumure ryose, iduhumuriza mu makuba yacu yose kugira ngo natwe tubone uko duhumuriza abari mu makuba yose, tubahumurisha ihumure twahawe n'Imana, (2 Korinto 1:3-4)
[email protected]

N'ubwo kubabarira ari ukubabara kabiri, ariko bikore nk'ubutwari ntuzicuza ku Mana.

By Niyondora Vedaste

Mu kinyarwanda kubabarira ni igikorwa umuntu akora atari ku bwe ahubwo agikorera undi. Ni ukiuvuga ngo reka kubabara njyewe mbabare mu mwanya wawe. Hanyuma umusaruro uva mo niwo ntuba ukiri umubabaro ahubwo witwa imbabazi.

Usaba imbabazi ni nk'utabaza ubabarira ni nk'utabara.

Umutima ubabajwe n'amafuti ya nyirawo, utakaza amahoro yawo kugeza ku rwego bidashoboka kwihanganira ubwo bubabare, kuko kubura amahoro yo mu mutima ni indwara yica kandi nta muganga wayisuzuma ngo ayibone kereka nyirayo n'Imana imenya ibyiherereye mu mitima.

Bigera igihe rero wa muntu wakosheje yumva atakibashije kwikemurira iki kibazo, agakenera ubutabazi. Ni ko gutera intambwe yo gusanga uwo yahemukiye akamusaba ubutabazi bwitwa imbabazi. Icyo aba amusabye nta kindi ni ukumubwira ngo : « Ndababaye cyane ndagusabye wemere nguhe ku bubabare bwanjye ungabanyirize ndebe ko naruhuka .»

Iyo amwemereye kumuruhura akamuha imbabazi, bimusaba kwakira ibiro amutuye akabyikorera kandi akabyihanganira. Bimusaba gutangira urugendo rutoroshye rwo kurebe uwamukoshereje nk'utaramukoshereje. Hari igihe umutwaro uba munini cyane uwatangaga ubufasha agashaka undi awitirira kugira ngo bimworohere. Rimwe na rimwe arabaza ati « wabitewe n'iki ? » Kugira ngo yumve niba hari undi yashyiraho ayo makosa hanyuma abone uburyo ahanagura icyaha k'uwamugannye.

Ukijijwe neza we, iyo byanze ahita abishyira kuri satani. Ariko kandi uyu aba abaye intwari kuko bimufasha kurakarira satani gusa ntarakarire abandi. Uwabishobora n'ubwo bitoroshye yababarira uwamukoshereje atamubajije impamvu yamuteye gukosa.
Aha hari ikibazo umuntu wese yakwibaza.
Ni nde uvunika kuruta undi hagati y'usaba imbabazi n'utanga imbabazi?

Tubihuje n'uko twabivugaga haruguru, ni nde ufite imvune nyinshi hagati y'utabaza n'utabara ?

Iyi mirimo yombi irakomeye bitewe n'uburemere bw'ikosa. Ariko kandi bikanajyana n'uburyo umuntu ateyemo by'umwihariko n'uko yakira ibintu.
Mu buryo buri rusange, utabaza avunika umutabara ataraza, iyo amaze kubona ubutabazi, hasigara gusa guhangana n'imvune yasigiwe n'ikibazo. Utabara we, aho uwo atabaye atangirira kuruhuka ni ho utabaye atangirira umuruho. Kuko aba aje guhangana n'ibyarwanyaga mugenzi we.

Ukeneye imbabazi avunika cyane igihe cyose ataragera ku ntabwe yo kuzisaba. Ariko iyo amaze kuzisaba akazi gakomeye gasigarana uzitanga kandi we ashobora kubikora igihe kinini, kuko ni urugendo. Niyo mpamvu usaba imbabazi akwiye kwitwararika mu gihe cyose agihura n'ingaruka z'icyo yakoze. Kuko kubwirwa ko ubabariwe ntibizira rimwe no kwibagirwa ko wakosheje. Rimwe na rimwe n'ubusabane bwawe n'uwo wahemukiye ntibuhita busubira uko bwahoze uwo mwanya.

Ushobora kubabarirwa ariko ingaruka zikaza uko byamera kose. Kuko n'Imana ishobora kukubabarira ariko ingaruka zikakugeraho.
Urugero : 1. Wababarirwa ko wasambanye ariko iyo watwaye ind urayibyara, imbabazi ntizigusubiza kuba umukobwa.
2. Wababarirwa ko warwanye, ariko aho bagukomerekeje urahagumana kandi hakubabaza kugeza igihe hazakirira, n'iyo hakize hasigara inkovu.
Umuntu akwiye gusaba imbabazi yiteguye no kwihanganira inzira bizafata kugira ngo ababarirwe, n'ubwo aba akoze igikorwa cyiza cyo kwihana ariko haba hasigaye inshingano yo gufasha uwahemukiwe kurenga ibikomere yatewe n'ubuhemu. Hari igihe byoroha, ariko bishobora no kudakunda ako kanya.

Ubabarira niwe ufite akazi gakomeye. Kuko kubabarira ni ukubabara kabiri. Habaye ho ububabare igihe ikosa ryakorwaga, none hongeye kuba ububabare mu gihe cyo kwibuka ikosa n'urugendo rwo kurisimbuza imbabazi. Kuko kubabarira ni itegeko utitaye ku buryo imbabazi zasabwe mo ndetse Yesu we atwigisha gutera intabwe nini yo kubabarira n'utadusabye imbabazi.

Ubwo akazi ko kubabarira gakomeye gatyo kavamo n'inyungu nyinshi.

Iyo umutabazi yitwaye neza, uwatabawe ntaba akivugwa cyane nk'uwamutabaye kuko we nta kazi kadasanzwe aba yakoze, uwakoze ibidasanzwe kandi by'ubutwari kurutaho ni uwatabaye. Kuko iyo umuntu atabaye aba yiyemeje ibintu bibiri, gupfa cyangwa gukira. None uwafashe icyemezo kingana gityo iyo birangiye adapfuye kandi umurimo we wageze ku ntego wumva adakwiye kugororerwa nk'intwari ?

Kuko ubasha gusaba imbabazi ari intwari, ubasha kubabarira we ni intwarane

Usaba imbabazi aba yigirira neza ubwe. Kuko impamvu zimutera kubikora ni ize bwite. Ari nayo mpamvu iyo tujya gusaba imbabazi dukwiye gusengera uwo tuzisaba ngo Imana imuhe umutima wo kubabarira kuko niyo iwugira. Nti dukwiye kumera nk'abajya guhinyuza gukiranuka kwe ahubwo dukwiye gutanga ubufasha kuko n'impamvu y'ako kazi gakomeye gatyo iba yaturutse kuri twe abakeneye imbabazi.

Bibiliya ibivugaho iki ?

Iyo hatariho imbabazi abantu bitabaza imanza. Kandi imanza zikemura ibibazo ariko ntizikuraho ingaruka z'ibibazo ari byo bikomere byo mu mutima. Ariko imbabazi zikorera iyo mirimo yombi icyarimwe. Iyo habonetse imbabazi nta mpamvu yindi y'imanza. Umuntu utagira imbabazi ntazababarirwa mu rubanza, nyamara imbabazi ziruta urubanza zikarwishima hejuru. Yakobo 2 :13

Rero n'ubwo bigoye ariko ni inshingano y'umukristo kubabarira. Ndetse birenga kubabarira ababidusabye gusa, dukwiye kwitoza no kubabarira abatarabidusaba. Kuko abakosa bose siko basaba imbabazi, kandi twebwe dutegetswe kubababarira.

Ibyo ni byo Kristo yadukoreye, kandi adusaba natwe kubikorera abandi. Mugirirane neza kandi mugirirane imbabazi, mubabarirane ibyaha nk'uko Imana yabababariye muri Kristo. Abefeso 4 :32.
Tugomba kubabarira kuko ari byo Imana idushakaho(Mika 6:8)

Kandi bituma nawe ubabarirwa. Kuko nimubabarira abantu ibyaha byabo, na so wo mu ijuru azababarira namwe (Matayo 6 :14)

Kugira umutima ubabarira bigabanya imanza z'urudaca mu bantu b'Imana, nk'uko twabibonye haruguru. (Yakobo 2 :13)

Igihe ufite umuntu wanze kubabarira ntukizere ko wowe Imana yakubabariye. Bibiliya ivuga ngo : « Kandi nimuhagarara musenga hakagira hari umuntu wabagiriye nabi, mumubabarire kugira ngo wo mu ijuru na we abababarire ibyaha byanyu. » Mariko 17 :3
Aha icyo dusabwa ni ukubabarira twaba twasabwe imbabazi cga tutazisabwe, Imana ikeneye ko dukora uwo murimo wo kubabarira abaduhemukiye, nk'uko nayo itugirira imbabazi. Icyakora kuko tuzi icyo imbabazi zisobanura, natwe dukwiye kugira umuco mwiza wo gusaba imbabazi igihe twakosheje.

Nkwifurije guhora umuco mwiza wo gusaba imbabazi no kubabarira !

NIYONDORA Vedaste [email protected]

CEP UR CE RUKARA CAMPUS yateguye igiterane cya kataraboneka cyo gushima imana no gusengera abayobozi bashya

By Ismael KAYISHEMA

Umuryango w'abanyeshuri b'abapantekote ukorera umurimo w'Imana muri kaminuza y'u Rwanda ishami ry'uburezi CEP UR-CE RUKARA CAMPUS.wateguye igiterane cyo gushima Imana no gusengera abayobozi bashya muri uyu mwaka wa mashuri 2018-2019, hakazanashimirwa komite icyuye igihe. Iki giterane gifite intego iboneka muri (Abefeso 2:10, kuko turi abo yaremye ituremeye imirimo myiza muri Kristo Yesu, iyo Imana yiteguriye kera kugira ngo tuyigenderemo.)

Igiterane kizaba kuwa 31 Werurwe 2019, ku cyicaro cya kaminuza irukara. Guhera sa 08h-12h hateganyijwe umuhango wo gusengera abayobozi ba CEP(Investiture) naho guhera sa 14h -17h hateganijwe igitaramo cyo gushima Imana.

Amakorari atandukanye azaririmba muri iki giterane , ariyo : Choral Integuza ADEPR kayonza hamwe nandi matsinda y'abaririmbyi akorera umurimo w'Imana muri CEP UR CE RUKARA CAMPUS nka Choral Louange, Choral ,Horebu hamwe na Shiloh worship Team.

Iki giterane kizitabirwa n'abashyitsi batandukanye barimo Abayobozi bakuru b'itorero ry'ADEPR mu Rwanda, abayobozi bo mu nzego za leta, abayobozi bama CEP atandukanye,abanyeshuri barangirije muri CEP UR CE RUKARA CAMPUS, abayobozi bakaminuza , n'abanyeshuri basengera muri CEP bose. Komite igiye gusengerwa ihagarariwe na NZEYIMANA BAHATI Shaban naho komite icyuye igihe ikaba yari iyobowe na MIZERO Anaclet.
Kuri ubu CEP UR CE RUKARA CAMPUS rifite abakiristo bagera kuri 500

Komite icyuye igihe iyobowe na MIZERO Anaclet.


Komite nshya iyoboye na NZEYIMANA BAHATI Shaban

Ibyo benshi bemeranywaho mu biranga umugore cyangwa umugabo mwiza

By Ubwanditsi

Hari impaka zikunda kubaho cyane iyo abantu bavuga ku bijyanye n'ukwiye kuvamo umugabo mwiza cyangwa se umugore mwiza, uzubaka urugo rugakomera. Bamwe bavuga ubutunzi, abandi bakemeza ko bwonyine budahagije, ariko reka turebe bimwe mu byo abantu bagarukaho cyane abakristo.

1. Umugabo cyangwa umugore ukunda Imana kandi akayiha umwanya

2. Umuntu ufite urukundo, mu bintu bigoye mu buzima kandi byo kwitondera ni igihe byagusaba kubana n'umuntu wumva utaramwakira ngo umugirire urukundo. Nta rindi pfundo ryubaka urugo atari urukundo. Nibaza ko mbere yo gukomeza gahunda zose, habanza urukundo kuko niryo banze ry'ibintu byose.

3. Kwizerana gushingiye ku budahemuka. Iyo hagati y'abakundana hahorana urwikekwe, biragoye ko urukundo rwanyu rushinga imizi. Niba ukundana n'umuntu ukabona buri munsi, murakekana. Umukeka nawe agukeka, mushatse mwakwitonda kuko aho mwerekeza atari heza.

Hari ibyo abantu bita byiza byitwa gufuha, ariko bikwiye kuba bifite imipaka kandi bitazana intonganya za buri munsi, no gukekana buri kanya.

4. Umuntu ufite icyerekezo. Hari igihe ubona umusore cyangwa umukobwa ukabona nawe ubwe ameze nk'utazi iyo ava niyo ajya, kubera kutagira umurongo w'ubuzima. Nshuti reka nkubwire Imana itanga umurongo w'ubuzima, nubona utawufite ujye ujya gusenga, winginge Imana, kuko ijya iha ishusho ibintu bitari biyifite. Impamvu ari byiza umuntu ufite icyerekezo ni uko azagufasha kugera ku nzozi zawe.

5. Umuntu ufite imico myiza (inyangamugayo kandi w'umwizerwa, ugwa neza)

6. Umuntu uzi gutega abandi amatwi no kumenya uko avuga ibyo atekereza kandi mu buryo bwiza budasiga ibikomere. Mu bisanzwe uburyo wegereye umuntu ngo muganire ku kibazo runaka, bushobora kuba bumwe mu buryo bugaragaza ko kiri burangire neza cyangwa nabi. Umuntu akwiye kuba yemera gutega mugenzi we amatwi, kandi yajya kumusubiza akamusubizanya ineza.

Buriya impamvu ari byiza ko umuntu agutega amatwi, abantu hari ubwo baba bafite amateka atandukanye, bafite imico itandukanye n'ibindi. Iyo musanze ibibatandukanya bitababera inyungu ahubwo birushaho kubateranya umunsi ku munsi mushatse mwarushaho kwegera Imana, ikarushaho kubayobora bitaragera aho bitagarurwa.

7. Kwihangana. Ubusanzwe burya uko ubayeho abandi batakwihanganiye ntibatindana nawe. Iyo rero wibagiwe ko abandi nabo bakwihanganira, birakugora kwihanganira abandi. Impamvu ni uko nubwo mwakizwa ntimuhora mu mwuka kuko mutuye mu isi, bibasaba ko habaho kwihanganirana kugira ngo mubane amahoro.

8. Umuntu ufite umwuga w'ubugaragu. Bene uyu muntu yemera guca bugufi mu bintu byose.

9. Umuntu wubaha. Si ngombwa ko umuntu ahora yemera ibyo uvuze, ariko ni ngombwa ko yubaha igitekerezo cyawe mbere yo kugitesha agaciro. Urugo ni urw'abantu babiri, nubwo bidakuraho inshingano za buri wese, ariko ibintu birimo kubahana bibamo ibyiza byinshi.

Wenda mu gihe utekereza kuri aya magambo, wibaze ngo mbese ko nifuza kubaka urugo rwiza no guhirwa mu rugendo rw'ubuzima bwanjye, byibuze muri ibi nsomye uwo dukundana yujujemo bingahe? Hanyuma se wowe wujujemo bingahe? Icyakora niba mwarashyize imbere Imana mu byo mukora byose, yabasha guhindura byose byiza, ikabaha ihirwe mu rugendo rwanyu.

Kumenera umugore ibanga byatumye amaso ye areba isi bwa nyuma

By Ubwanditsi

Mu muryango w'abadani mu rugo rw'uwitwa Manowa n'umugore we wabanje kuba ingumba,niho Imana yakoreye igitangaza babyara umusore waranzwe n'amateka adasanzwe ariwe Samusoni bisobanura umunyembaraga cyangwa umugabo w'izuba

Nk'uko bivugwa n'abahanga batandukanye mu by'amateka harimo nka Ginger Garrett, urubuga rwa wikipedia.org/wiki/Samson na bibiriya Yera, byemeza ko uyu Samusoni yavukanye imbaraga zidasanzwe bivugwako yazikuraga ku uwiteka Imana yo mu ijuru ngo ikaba ari nayo yari yarohereje malayika wayo mbere y'uko uyu Samusoni avuka ngo abwire nyina ko n'ubwo ari ingumba ariko agiye gusama inda akaba ategetswe kutanywa igisindisha icyo aricyo cyose cyangwa kurya igihumanya cyose, ndetse yihanangirizwa ko uyu mwana atazigera yogoshwa umusatsi we(abacamanza 13:13).

Ibi byose rero bikomeza bisobanurwa ko aba babyeyi babyubahirije nyamara nyuma yo kuvuka no kugimbuka kw'uyu Samusoni akaba yaraje kwadukana ingeso yo kujya mu bagore ari naho yaje kubenguka umugore wo mu gikombe cyitwa Soreka witwa Delilah, ari nawe waje kuba imbarutso y'ibibazo byabaye kuri Samusoni byose harimo n'urupfu rwe.

N'ubwo bivugwa ko Samusoni Imana yamukoreshe byinshi cyane akamamara , ntaho bigaragara ko kuba icyamamare byamuheshaga uburenganzira bwo kugomera Imana, n'ubwo bigaragara ko Samusoni yahoreye Uwiteka akicamo benshi mu bafilisitiya bari abanzi b'Imana, ariko na none binaboneka ko bivuye mu kurundurira umutima we mu bagore harimo na Delilah, byatumye acumura ku mana maze amena ibanga avuga aho imbaraga ze ziva agira ati “nta cyuma cyogosha kigeze kunyura ku mutwe wanjye,kuko nabaye umunaziri w'Imana uhereye nkiva munda ya mama. Nakogoshwa imbaraga zanjye zanshiramo, ngacogora nkamera nk'abandi”.

Nk'uko wari umutego kuri we kugirango bamufate koko bamwigirije ho nkana ndetse binagaragara ko bamwishe bamunoboyemo amaso. Aya makosa ya Samusoni rero akwiye kubera benshi muri twe nk'isomo rikomeye; ba bandi usanga Imana igirira neza igaha cyangwa igakoresha ibikomeye bitari bimwe nyamara bo bakabona ko ari wo mwanya wo gukoresha icyo cyubahiro cyangwa igikundiro mu mafuti atandukakanye harimo kwikubira imitungo ya rubanda cyangwa kwigarurira ingo z'abandi, Guteka imitwe cyangwa uburaya muri rusange , muramenye ,mumenye ko hari isezerano mwasezeranye n'Imana ryo kuzayubahisha kugeza kugeza gupfa, bitari ibyo ruriye samusoni rutabibagiye.

Gusa na none umuntu yakongera ho ko Samusoni umuntu yanamwigiraho ko Imana igira imbabazi ko naho umuntu yaba yarakoze ibyaha byinshi cyane Imana imubabarira, ititaye ku buhemu bwe ahubwo yo yita ku rukundo rwayo ruhoraho iteka ryose kuko Samusoni nawe bigaragara ko nyuma y'ibi byose yatakambiye Imana maze iramwumvira imuha imbaraga, nawe tumbira Imana uyereke aho wacumuye uyibwire uti Data ndakwinginze ndengera, irakurengera.

Ernest Rutagungira

Adamu, umurinzi wa mbere , umukurambere w' indangare.

By Ubwanditsi

“Ndaza vuba, komeza ibyo ufite hatagira ugutwara ikamba ryawe” (Ibyahishuwe 3:11)

Ubwo Imana yaremaga isi, yamaze kurema umuntu imuha isi ngo “ayirinde”. Bibliya ibivuga neza ngo “Uwiteka Imana ijyana wa muntu imushyira muri iyo ngobyi yo muri Edeni, ngo ahingire ibirimo ayirinde” (Itangiriro 2:15). Hano biragaragara neza ko umwe mu mirimo ya mbere Imana yahaye umuntu harimo no kurinda isi. Iyo Imana iba izi ko nta kibazo kandi ko izayirindira, ntabwo iba yarahaye Adamu uwo murimo. Biragaragara ko umurimo wo kwita ku isi Adamu agomba kuba yarawukoraga neza kuko ntaho batubwira ko Imana yagaye imirimo ye. Imana yararemaga Adamu akita amazina . Nta nyamaswa cyangwa ikindi cyose cyaremwe cyasigaye kidafite izina. Umurimo wa mbere yawukoze neza. Kandi natwe imirimo twahawe turayikora pe!

Iyo ndebye ukuntu abantu bavunika bakorera Imana, iyo ndebye ukuntu abapasitori bitanga kandi abenshi bahembwa umushahara w' intica ntikize cyangwa nta nuwo bafite, iyo ndebye ukuntu abavugabutumwa benshi bitanga kandi akenshi nta n' icyo bahembwa, iyo ndebye ukuntu abaririmbyi batanga igihe cyabo ndetse n' ubuhanga, ntawashidikanya ko twitanga tugakora.

Ariko na none iyo uhindukiye ukareba ibyaha dukorera muri iyo mirimo, iyo ureba ubuswa n'amakosa bigaragara kenshi mu byo dukora, ntawashidikanya ko turi indangare. Kandi dufite aho tubica: Adamu ni we wabaye umurinzi wa mbere, kandi ni we wabaye indangare ya mbere. Umugani w' Abanyarwanda ugira ngo “isuku igira isoko, umwanda ugira akazu” kandi ngo “imfura na se barangana”!

Ubwo Imana yabwiraga Adamu kurinda isi, ni uko yari izi ko hari ushobora kuyangiza. Ariko Adamu ntiyabyitayeho ngo abaririze amenye neza icyo agomba kurinda cyangwa uburyo agomba kubikora. Wenda iyo aba yarabajije Imana icyo agomba kurinda iba yaramuhishuriye ko hari umwanzi, sinshidikanya ko iba yaramuhishuriye uburyo bwo kumutsinda.

Ariko Bibliya itangira igice cya 3 cy' icyo gitabo cy' Itangiriro itubwira ngo “inzoka yarushaga uburiganya inyamaswa zo mu ishamba zose Uwiteka Imana yaremye.” Ubwo Satani yazaga kwangiza isi, ntabwo yaje ari malayika, ahubwo yafashe isura Adamu yari amenyereye, aza mu nzoka kugira ngo ayoboke uburari.

Kandi umugambi we yawugezeho kuko maaherezo yashoboye kugusha Adamu na Eva, abambura ubutware bwabo kandi isi bari bashinzwe kurinda arayangiza. Mu kindi gice turaza kugaruka ku kumenya uwo turwana na we nka kimwe mu byangombwa by' umurinzi mwiza ariko tube tuzirikanye hano ko Imana ivuga ko “Inzoka yarushaga izindi nyamaswa uburiganya” umwanzi turwana akoresha uburiganya , ni yo ntwaro ye ya mbere kandi ni yo yatumariye abantu. Kenshi yinjira yishushanije, hari nubwo aza asa na “malayika w' umucyo”.

Kayini, Ndi Umurinzi wa Mwene Data se?

Ubwo Satani yari amaze konshya Kayini ngo yice mwene se Abeli, Imana ubwayo ni yo yagiye kumureba maze iramubwira iti “nukora ibyiza ntuzemerwa? Ariko nudakora ibyiza, dore ibyaha byitugatugiye ku rugi kandi ni wowe byifuza ariko ukwiriye kubitegeka” (Itangiriro 4:7). Aha na none Imana ni yo yahamagaye Kayini ngo yirinde, ngo arwanye ibyaha kuko yari hafi kugwa mu mutego. Ariko aho kwirinda, Bibliya ikomeza itubwira ngo Kayini abibwira Abeli murumuna we. Kandi bari mu gasozi, Kayini ahagurukira murumuna we Abeli aramwica”(Itangiriro 4:8). Tekereza nawe: Kayini Imana yaramuburiye, ndetse na we aragenda abibwira Abeli ariko arangije abirengaho aramwica. Dushobora guseka Kayini ko yakoze ibintu nk' ibyo ariko buri munsi mbona abantu bagenda mu nzira ze: bazi neza ibyo Imana yababwiye gukora cyangwa ibyo yababujije , ndetse babyigisha abandi ariko bagahindukira bakabikora. Abo ntabwo ari abarinzi.

Ntibirinda ubwabo kandi nta n'ubwo barinda neza “icyo Imana yababikije” (2 Timoteyo 1;14). Inkuru ya Kayini turayizi uko irangira, ubwo Imana yamubazaga iti “Abeli murumuna wawe ari he?”. Aho kwemera icyaha, kayini yaragihakanye ahakana n' uburinzi bwe kuri mwene se ubwo yasubizaga ngo “ndabizi se? Ndi umurinzi wa murumuna wanjye?” (Itangiriro 4:9) Ndi umurinzi wa mwene data ? Icyo kibazo cya Kayini cyarangije gusubizwa kuko Imana idutegerejeho kuba abarinzi ba bene data.Ariko uno munsi Imana ije ikatubaza bene Data bose twabonye bagwa, abo twabonye bava mu buntu bw' Imana, ije ikatubaza iby'abavandimwe, abaturanyi cyangwa abo dukorana barimbukira mu byaha, Imana itubajije icyo twakoze ngo tubagarure mu nzira twayisubiza ngo iki?.

Aho ntitwavuga nka Kayini ngo “ndi umurinzi wa mwene data se?” Ubwoko bw' Imana bukeneye kumenya ko twahamagariwe kuba abarinzi b' imitima yacu n' ubugingo bwacu ariko turi n'abarinzi ba bene Data. Hakenewe abarinzi! N' ubu nandika aya magambo numvise ntsindwa kubw'abantu benshi twakoranye umurimo ariko ubu bakaba baraguye, mu bavandimwe banjye, mu nshuti zanjye no mu baturanyi harimo benshi bagenda mu nzira y' igihogere ibajyana kurimbuka, nyamara kenshi nibagirwa no kubasengera.

Isengesho: Mana, umbabarire kuba ndi kwigisha abandi ibyo nanjye ntakora neza! Ungire umurinzi utari indangare.

Inyigisho ya Pasteur Antoine Rutayisire

Umuraperi El Max Kagoma k'Imana agiye kumurika album ye ya mbere ikubiyemo ubuhamya bujyanye n'ibihe bikomeye yanyuzemo

By Ismael KAYISHEMA

Umuraperi Ishoborabyose Eric Bakunda kwita El Max ni umwe mu baraperi mu njyana zo kuramya no guhimbaza Imana bamaze kwerekana impano itangaje muri iki gihe.
Uyu musore ukiri muto amaze igihe kinini ategura album ye ya mbere y'amajwi yise ‘'Nzahoyankuye''.Kuri iki cyumweru tariki ya 17 Gicurasi 2019 kuva saa cyenda z'amanywa ,El Max nibwo azashyira hanze iyi album.
Ni igitaramo cyatumiwemo abahanzi bakunzwe cyane muri iyi minsi barimo Danny Mutabazi wamenyekanye mu ndirimbo yiswe Karuvari ndetse akaba yitegura kumurika album ye ya mbere y'amashusho,Bright Karyango umuraperi mu ndirimbo zihimbaza Imana ubimazemo igihe ndetse n'umwe mu bahanzikazi bakomeye mu muziki wo kuramya no guhimbaza Imana.
Iyi album y'Umuraperi Eli Max Kagoma k'Imana , yise 'Nzahoyankuye' ikubiyemo ubuhamya bw'ukuntu yatawe n'ababyeyi be akaza gutoragurwa n'umugiraneza akamurera kugeza n'uyu munsi.
Iriho indirimbo Azaza yakoranye na M Olivier, Hagarara neza, Sinzavayo na Ishobora byose.
Uyu muhanzi yabwiye itangazamakuru ko ari iby'agaciro kubona agiye kumurika album ye ya mbere y'amajwi by'umwihariko ikaba ivuga ku buhamya bwe bujyanye n'ibihe bikomeye yanyuzemo ariko ikaba n'amashimwe ashimira Imana kubw'aho imugejeje.

Umva 2 z'umuraperi El Max Kagoma k'Imana

Ngwino tuganire ku ruhare rw'umugabo mu kubaka umuryango uzira amakimbirane

By Ubwanditsi

Umuryango w'ivugabutumwa Seek and Save Humanity Ministries (SSHM) wateguriye abagabo amahugurwa yihariye afite insanganyamatsiko igira iti: “Ni uruhe ruhare rw'umugabo mu kubaka umuryango uzira amakimbirane?”

Uyu muryango usanzwe utegura amahuriro, ibiterane n'amahugurwa y'ibyiciro bitandukanye hibandwa cyane cyane ku bubatse ingo (abagabo n'abagore mu bihe bitandukanye), urubyiruko, abana b'abashumba ndetse n'ibikorwa by'isanamitima.

Aya mahugurwa azaba tariki ya 16 Werurwe 2019, atumiwemo abagabo babarizwa mu matorero atandukanye, ndetse n'abadasanzwe bafite aho basengera. Buri wese mu batumiwe afite umuryango, bityo insanganyamatsiko y'umunsi ntiheza, kugira ngo buri wese agire uruhare mu kubaka umuryango we bwite, bityo n'umuryango nyarwanda uzaba wubakitse rwose.


Nk'uko bitangazwa na Pastor Desire Habyarimana uyobora SSHM, impamvu nyamukuru yo guhugura abubatse ingo ni uko umuryango uramutse wubatse neza, imibare y'urubyiruko rukoresha ibiyobyabwenge yagabanuka, imibare y'ingo zisenyuka ikagabanuka ndetse n'ibibazo byugarije umuryango bikabonerwa umuti.

Pastor Desire akomeza yemeza ko ibi bibazo byose bikwiriye gushakirwa umuti binyuze mu matorero kuko umubare munini w'Abanyarwanda bafite amadini n'amatorero babarizwamo, bityo uyu ukaba umuyoboro mwiza wo gukemuriramo ibibazo nk'ibi byugarije benshi. Pastor Desire unavuga ko SSHM itegamiye ku idini runaka yagize ati: “Buri wese mu bayoboye amadini n'amatorero abigizemo uruhare, byazana impinduka nziza, ibibazo bikagabanuka.”


Aya mahugurwa azabera kuri Solace Ministries ku Kacyiru (inyuma ya Hotel Umubano) ku wa gatandatu tariki ya 16 Werurwe 2019, saa tatu, kandi kwinjira ni ubuntu.

Abazigisha muri aya mahugurwa ni impuguke mu gukemura amakimbirane cyane cyane yo mu miryango, harimo nka Pastor Senga Emmanuel ubarizwa muri Eglise Vivante ku Kimihurura n'abandi.

Bamwe mu baramyi bakunzwe muri Gospel bazafatanya na Vedaste N Christian mu gitaramo “Uzi gukunda Live concert” bamenyekanye

By Ismael KAYISHEMA

Uzi gukunda Live concert yateguwe n'umuramyi Vedaste N Christian, ikazaba kuwa 31 Werurwe kuri ADPR Murambi, saa munani z'igicamunsi (14h00)

Muri iki giterane Vedaste N Christian yatumiyemo bamwe mu baramyi ba Gospel bakunzwe, barimo, Alexis Dusabe; Bosco Nshuti; Giselle Precious na Besalel Choir.
Hatumiwe n'umuvugabutumwa Mwalimu Jean Paul Nzaramba!

Kizaba ari igitaramo cy'indirimbo n'ijambo ry'Imana. Umuramyi Vedaste N Christian yavuze byinshi ku gitaramo yateguriye abakunzi b'indirimbo zo kuramya no guhimbaza Imana. By'umwihariko abagiye bamwereka ko indirimbo ze zibahembura. Mu kiganiro yagira na www.agakiza.org kirebana na Uzi gukunda Live concert yateguye yadutangarije ibi bikurikira.

Agakiza.org: Ni iki kidasanzwe mu iri kigaramo wateguye ?

Vedaste N Christian: Ikidasanzwe ni njye bwa mbere, kuberako ntamenyerewe mu gutegura ibitaramo, iki nicyo gitaramo nteguye bwa mbere nkanjye njyenyine. Birumvikana ko kidasanzwe ku bwanjye, Ikindi nta kintu ndi gusubiramo byibura naba narigeze gukora, byose ni bishyashya , byumwihariko n'Imana irimo iradutegurira ibintu byiza.

Agakiza.org: Wagendeye kuki ujya gutumira abaririmbyi muzafatanya muri concert yawe ?

Vedaste N Christian: Njya gutumira baramyi, bwa mbere nibanze kubantu bafite indirimbo zikora ku mutima wanjye ndetse n'abandi muri rusange, n'uburyo bitwara (Discipline yabo) n'imiririmbire yabo myiza iherekejwe n'Umwuka w'Imana. Sibo bonyine , urumva abaririmbyi nkunda muri Gospel ntabwo bose twahurira ku munsi umwe ngo bikunde n'abandi tuzagenda dukorana mu bindi bitaramo ariko kuri iyi nshuro abo tuzakora bose ndabakunda kandi no mu buzima busanzwe batuye ari inshuti zanjye bamba hafi kuko bamwe banateye intambwe nk'iyo ndi gutera mbere yanjye, rero mbakurikiyeho amavuta y'Imana abariho.

Agakiza.org: Kuki wahisemo gukorera concert yawe i Murambi, ukekako abantu bazaba bake?

Vedaste N Christian: Ntabwo nteganya ko bazaba bakeya , sinanabyifuza ahubwo ni uko ijya kurisha ihera ku rugo. Ntabwo nari bujye gukora igitaramo cya mbere ngo ngikorere iw'abandi. Icyakora umubare w'abantu bazitabira uzampa ishusho y'ikindi gitaramo nzakora naho nagitegurira hisumbuyeho. Iki ni igitaramo cya mbere nagombaga kugirera aho ngeza amaboko kuberako hagenda hazamo n'imbogamizi z'ubushobozi budahagije.

Agakiza.org: Ese ko ufite indirimbo nyinshi, kuki concert yawe wayitiriye “Uzi gukunda” imwe mu ndirimbo zawe?

Vedaste N Christian: Impamvu nahisemo uzi gukunda ni ukubera intego y'igiterane, iboneka muri Yohana 15:13 , havuga ngo: "Nta wufite urukundo ruruta urw'umuntu upfira incuti ze". Urumvako hihura n'ubutumwa buri muri iriya ndirimbo , ikindi ubwanjye iyi ndirimbo iramfasha kandi hari umubare munini bw'abantu ikora ku mutima nkurikije abangeraho umunsi ku munsi. Nubwo nizindi zibakora ku mutima ariko yo byahuje n'intego y'igiterane cyane.

Umuramyi Vedaste N Christian arateganya gushyira hanze umuzingo w'indirimbo uzaba ugizwe n'indirimbo zitari munsi ya 12 muri uyu mwaka. Kuri ubu amaze gusohora indirimbo enye arizo : Uzi Gukunda, Interuro imwe ( bakunze kwita uri Uwera), Ubikora ute iya kane yitwa Niwe Mahoro, Zose zikaba ziboneka kuri youtube wanditse amazina y'indirimbo n'umuhanzi (Vedaste N Christian) kimwe n'izindi yagiye akora mbere y'umushinga wa Album. Gusa ngo arateganya ko iki gitaramo kizaba yamaze gushyira hanze indirimbo ya gatanu mu zizaba zigize uyu muzingo.

ABARAMYI BAZARIRIMBA MURI Uzi gukunda Live concert


Vedaste N Christian


Besalel Choir

Giselle Precious

Alexis Dusabe

Bosco Nshuti

Umva indirimbo "uzi gukunda" ya Vedaste N Christian

Urufatiro rw'urugo rwiza - Jeremy Sourdril

By Isabelle Gahongayire

Kunesha k'urugo cyangwa k'umuntu w'ingaragu biterwa n'uburyo uwo muntu abana n'Imana. Ubuzima bwacu bugomba gushingira ku Mana no ku ijambo ryayo. Imana nta bwo ari inyongezo ku buzima bwacu, ahubwo ni urufatiro rw'ubuzima bwacu.

Urugo ruhabwa umugisha iyo abashakanye babayeho ku bw'Imana. Biragoye ko tubona ukuboko kw'Imana mu buzima bwacu iyo tubaho uburyo tubitekereza n'uko tubigambirira. Imana nta bwo iha umugisha imigambi yacu, ahubwo iwuha imigambi yayo. Urugo ruhawe umugisha rutumbira Imana kugira ngo ruyumve irugira inama. Iyo umugabo n'umugore begera Imana, ibaha ubwenge bw'uburyo bakora ibyo batumvikanaho, ikabasubiriza ibibazo byabo. Ijambo ry'Imana rituma urugo rugira umuco, rukamenya ingamba zo gufata mu buzima bwa buri munsi.

Urugo ruhawe umugisha ruba:
• Rushyira hamwe
• Ntiruharanira inyungu nk'izabatizera (Mt.6 :31-33)
• Ruhesha Imana icyubahiro mu byo rukora byose (1 Abakorinto 10 :31)
• Rubaho ku bw'Imana (Mt.6 :24)
• Rubana akaramata (Itangiriro. 2 :24)
• Rurimo ubwumvikane (Amosi 3 :3)
• Ntabwo ruha Imana ibisigazwa (udusengesho duke, kujya mu materaniro gake, rutanga gake...) - Ibyakozwe n'intumwa 5:1, 2
• Nta bwo rusimbuza Imana ibindi (Yeremiya.2 :13)
• Ruharanira gushaka Imana no kubaka kuri yo
• Rurangwamo urukundo (N'ubwo rwagira ubutunzi bwinshi nta rukundo byaba ari umuyaga) - 1 Abakorinto 13:3
• Rugira umwete wo gukura no guhinduka (Abaroma. 12 :11)
• Abashakanye bamenya gusabana imbabazi (Abakolosayi 3:13)
• Rwizera Imana no mu bigaragara nk'ibikomeye: kuko ari yo yo kwizerwa (1 Abatesalonike 5 :23-24)

Twaremewe kubaho duhesha Imana icyubahiro, no mu gihe twubatse ingo. Birashoboka ko urugo rugirwa n'abigishwa beza ba Kristo. Ibi birashoboka kuri ba bandi bifuza guhinduka no kugendera mu rukundo no kwizera biri mu Mana. Imana yo nta bwo ihinduka, ariko iriteguye kuduhindura uko bikwiriye. Imana ishimwe ku bwa Kristo Yesu, kuko ku bwe byose bishoboka. Ni we uhindura ibikomeye kuba ibyoroshye, ibidashoboka akabihindura ibishoboka!

Umuhanzi Jean Claude HAKIZIMANA yateguriye abakunzi ba Gospel concert yo Gushima Imana

By Ismael KAYISHEMA

Iyi ni imwe mu nzira Umuhanzi Jean Claude yatangiye kugirango arusheho kwagura ibihangano bye , anashime Imana yamukomereje amaboko mu gihe kigera ku myaka 3 ari umuhanzi mu ndirimbo zihimbaza Imana. Mu ntamabara zose yahuye nazo Imana yabanye nawe, imurinda gusubira inyuma.

Iyi concert izitabirwa n'abaririmbyi batandukanye, bazaba barimo: Abaririmbyi bo ku mudugudu wa ADEPR Rugarama, paruwasi ya Rugarama , Nyamirambo na worship team yaho, hazaba hari n'umuhanzi Jado Sinza.

Kuri ubu Umuhanzi Jean claude afite indiribo zigera kuri enye. Eshatu z'amajwi n'indi imwe y'amashusho. Gukora ibitaramo byagutse ni imwe mu ntego yihaye kugirango abashe kugeza ubutumwa bwiza ku bantu benshi afatanyije n'abandi bahanzi. Iyi concert izaba igamije gushima Imana , ifite intego iboneka muri Yohana 9:4 “nkwiriye gukora umurimo w'uwantunye hakiri ku manywa” Umwigisha ni pasteur MUNYANZIZA celestin.

Jean claude yashimagiye ikigamijwe muri concert yateguye, agira ati “ iyi consert izaba irimo kuramya no guhimbaza n'ijambo ry' Imana, ni consert yange ya mbere !!ntabwo ari ukumurika album ahubwo ni ugushima lmana kandi nibutsa abantu ko dukwiriye gukora hakiri ku manywa nkuko intego ibivuga ngasaba abantu kuzitabira kuko tuzahungukira byinshi!!”

Iyi concert izaba kuwa 17 Werurwe 2019. Guhera saa 14:00-18:00 kuri paroise ADEPR Rugarama i Nyamirambo.

Umva imwe mu ndirimbo za Jean Claude

Ni ryari umuntu akwiye kurekeraho gusengera ikifuzo?

Hariho Abantu muri iki gihe usanga bakunda kuvuga ko iyo usengeye ikintu runaka ukeneye ku Mana biba bihagije ubundi ugomba gutuza ugategereza igihe kizasubirizwa ariko abandi bati twe twabibitse bisengeye, nyamara muri Bibiliya uyu munsi turahasanga urugero rw'umugabo wasenze agatinda imbere y'Imana n'icyo byamumariye.

Hari naho kandi Bibiliya ibwira abibutsa Uwiteka kutamuhwemera kugeza I Yelusalemu hahindutse amashimwe, ubundi se ni ryari Yelusalemu ihinduka amashimwe, ni igihe icyo wasabaga ugihawe, igihe icyo wifuzaga gitunganye ni igihe ubonye igisubizo cy'icyo wasengeye.

Arambwira ati “Yewe Daniyeli mugabo ukundwa cyane, umva amagambo ngiye kukubwira, haguruka weme kuko uyu munsi ngutumweho.” Amaze kumbwira iryo jambo ndahaguruka, mpagarara ntengurwa. Aherako arambwira ati “Witinya Daniyeli, kuko uhereye ku munsi watangiriyeho gushishikarira gusobanukirwa no kwicisha bugufi imbere y'Imana yawe, amagambo yawe yarumviswe kandi ni yo anzanye. Ariko umutware w'ibwami bw'u Buperesi amara iminsi makumyabiri n'umwe ambuza. Nyuma Mikayeli, umwe wo mu batware bakomeye aza kuntabara, ntinda mu bami b'u Buperesi. Nuko none nzanywe no kugusobanurira ibizaba ku bantu bawe mu minsi y'imperuka, kuko ibyo weretswe ari iby'igihe gishyize kera.” Amaze kumbwira ayo magambo, ncurika umutwe ndumirwa.Daniyeli 10:11-15

Uyu mugabo daniyeli yarafite ibyo yashakaga gusobanuza Imana kubijyanye n'ibyo yari yeretswe ariko ntiyasobanukirwa, niko gufata gahunda yo kujya imbere y'Imana ngo ayisobanuze amenye neza ibyo aribyo, mu by'ukuli Daniyeli ajya imbere y'Imana ntiyari azi urugero rw'iminsi azahamara we icyo yashakaga kwari ugusobanukirwa kandi yagombaga gukora ibishoboka akava imbere y'Imana abonye icyamujyanye.

Umunsi wa mbere arasenga ntiyabona icyo ashaka, umunsi wa kabiri n'uko, Danieli ntiyacika intege kugera ku munsi wa 21 aho Imana yibajije igitakisha Daniyeli kandi yarasubijwe ku munsi wa mbere yatangiriraga ho gusenga no kwinginga.

Nicyo cyatumye Imana yohereza Mikayeli ngo ajye kureba icyabaye malayika asanga uwari wamanukanye ibisubizo bya Daniyeli yahuye n'umutware w'ingabo w'ibwami w'ubuperesi aramubuza mbese mu kirere habereyemo intambara ikomeye ariko birangira igisubizo cy'uyu mugabo ukundwa kimugezeho.

Abarokore benshi bakunze gusenga bimwe twita gutitiriza ariko igihe cyagera bagacogora ariko burya reka mbabwire ko dusengera mw'isi y'umwuka kandi dufite abanzi b'Imana bo mw'isi y'umwuka tutareba barwanya amasengesho yacu, rimwe na rimwe iyo ducogoye gusenga banagira uruhare mu kudindiza ibisubizo by'amasengesho.

Ngaho ibaze iyo Daniyeli asenga ku munsi wa gatatu akarekera aho ati “reka ntuze Imana yarabyumvise!” Mpamya ko hari ukundi byari kugenda kutari uku, gusa siko byagenze yagumye imbere y'Imana asaba kandi yinginga kugera asubijwe.

Twibazaga ari ryari umuntu akwiriye kurekera aho gusengera ikifuzo, ariko nta gihe na kimwe ukwiriye kurekera aho gusengera ikintu kereka wagihawe gusa na none twe nk'abakrito nk'uko tubizi ko intambara yacu Atari iyo mu mubiri kandi tuyirwanisha gusenga ahanini dukomeza kurindisha icyo twahawe isengesho.

Imana ibahe umuigisha.

[email protected]

Ibimenyetso bishobora kukwereka ko mu maraso yawe harimo ikibazo cyangwa se harimo uburozi

By Claire

Abantu bakunda kugira iki kibazo cyangwa se ubu burwayi bukabahitana kuko babyitiranya n'izindi ndwara, iyo rero bititaweho ngo umuntu yivuze ubu burwayi bushobora kuganisha ku rupfu.

Abantu bakunda kugira ibi bibazo ni abantu barwaye indwara zikomeye kuburyo ubudahangarwa bw'umubiri buba ari buke cyangwa nanone abantu bakunda kugira indwara zifata ibihaha, ndetse n' indwara zifata urwungano rw'inkar. Nk'uko twabivuze haruguru iyo birangaranwe bishobora kuvamo urupfu ariko iyo bikurikiranywe kare biravurwa bigakira.

Ibyo bimenyetso rero ni ibi:

- Guhinda umuriro
Iki kimenyetso ni ikimenyetso gikomeye gikwiriye gutuma ukwiriye gutuma uhita ujya kwa muganga bakareba neza ikibazo ufite mumubiri
- Kumva ubukonje
Umuntu atangira gutitira nyamara wenda igipimo cy'ubushyuhe kiri hejuru ariko we rwose akajya yumva imbeho yamurembeje.
- Kurwara indwara zifata inzira z'ubuhumekero
- Ibicurane n' inkorora
Ibi rero ngo iyo birengeje icyumweru kandi warafashe imiti uko bikwiriye ubu ukwiriye kujya kwa muganga bakareba neza nib anta bindi bibazo biri mu maraso
- Ububabare mu ngingo
- Amavi ntafashe nkuko bikwiriye mbese kumva ususumira
- Umuvuduko w'amaraso: kuzamuka cyane cyangwa kumanuka bikagera kugipimo cyo hasi
- Gushaka guhumeka ukumva biragoranye bitandukanye nibyari bisanzwe
- Guhinduka kw'ibara ry'uruhu
- Kuzana udusununu cyangwa utubara tw'umukara ku mubiri
- Guhunyiza buri kanya, nubwo waba wasinziriye ute ugakomeza kugira udutotsi
- Kwibagirwa bya buri kanya ukumva ibitekerezo byawe ntibi kumurongo neza
- Kwihagarika inshuro nke cyane
- Isesemi kuruka ndetse no gucibwamo.

Ibimenyetso by'iyi ndwara bijya gusa n'izindi ndwara ni nayo mpamvu bamwe bayitiranya ariko ikiza nuko iyo imenyekanye kare ivurwa igakira neza.

Claire @agakiza

Abaganga babaze umwana ukiri munda ya mama we bifashishije ikoranabuhanga.

By Claire

Bethan Simpson w'imyaka 26 umubyeyi utwite uyu mwana yatangaje ko nyuma y'ibyumweru 20 aribwo kwa muganga babonye ko uyu mwana afite ikibazo cy'imikurire y'ingingo zimwe na zimwe” Spina bifida”.

Ibi bibazo byashoboraga kuzateza umwana ibibazo byo kutagenda cyangwa kugwingira ntiyongere gukura mu gihe amaze kuvuka.

Iryo bagwa ryabereye mu nda ya mama w'uyu mwana ryabereye muri kaminuza y'abavuzi iherereye I London mu bwongereza mu gihe uwo mwana yaragize ibyumweru 24 gusa abayeho nk'uko tubitangarizwa na Christian Today .

Bethan hamwe n'umugabo we Kieron batangaje ko mugihe bari bamenye ko uyu mwana afite iki kibazo batekereje guhita bakuramo iyo nda ariko hari n'ikindi kwa muganga bari bababwiye ko gishoboka, kumubaga mbere y'uko uwo mwana avuka bagatunganya ikibazo afite.

Abaganga bafunguye uterus ya Bethanie kugirango babashe kubona uruhande bendaga kubaga.

Ubu aka kanya ntitwahita tubabwira ngo bimeze bite ariko icyo Bethanie atangaza hamwe no kwizera kwinshi afite aravuga ko kubwe ameze neza kandi ko yizeye ko umwana we azakomeza gukura nk'uko bisanzwe kugera igihe azavukira ndetse na nyuma kuko abaganga bo batangaje ko byagenze neza.

Ikindi yabashije gutangaza nuko agakobwa ke kugeza ubu yumva gakina munda kandi ko yizeye kuzakakira kw'isi ari kazima.

Bethan arashishikariza ababyeyi bose gukurikirana ubuzima bw'abana babo mu gihe bakibatwita bakitabira kujya kwa muganga ubishinzwe kugira ngo abafashe kubakurikirana kuko bo ubwabo bataba bazi mu by'ukuli ni iki kiri kubera munda aho batareba.

[email protected]

Imana ifuhira umukiranutsi usubira inyuma.

By Claire

Nta kintu kibabaza mu buzima nko kubona inshuti yawe, umwana wawe cyangwa se umuntu ukunda cyane arimo gukora amakosa utekereza ko atagakoze, birumvikana ko ari umuntu mudafite aho muhuriye ushobora no kubibona ukica amaso cyangwa ukanabimubwira ariko wenda ntuzajye no gukurikirana ko ubyo wavuze byumviswe.

Nyamara siko bigenda ku nshuti umwana cyangwa umuvandimwe ni ukuvuga umuntu wese ufitiye urukundo, ushobora no kurara ijoro ujya kumushaka ngo umuhugure cyangwa se ngo umuhane, gusa kubera ko nyine turi abantu harimo uhitamo kwicecekera ahubwo agafata ibyemezo bikomeye.

Urugero: nkurikije ikosa yakoze sinshobora kongera kubana nawe, ibi bintu ntibyihanganirwa n'ibindi n'ibindi

Nyamara siko Imana imeze!

Imana irakunda ndetse cyane hanyuma umuntu ikunda yishimira kumubona akiranuka nk'uko nayo ikiranuka, ikosa rito ashobora gukora rishobora gutuma ifuha cyangwa ibabara ariko ikiza cy'Imana nuko yishimira gucyaha no kubabarira.

“Wandikire marayika w'Itorero ryo muri Efeso uti:

“Ufashe inyenyeri ndwi mu kuboko kw'iburyo, akagendera hagati y'ibitereko by'amatabaza birindwi by'izahabu aravuga aya magambo ati ‘Nzi imirimo yawe n'umuhati wawe no kwihangana kwawe, kandi nzi yuko utabasha kwihanganira abanyageso mbi, n'uko wagenzuye abiyita intumwa kandi atari zo, ukabona ko ari abanyabinyoma. Uzi kwihangana kandi warenganirijwe izina ryanjye ntiwacogora. Ariko rero mfite icyo nkugaya, ni uko waretse urukundo rwawe rwa mbere.. Ariko rero ufite icyo ngushimira, ni uko wanga imirimo y'Abanikolayiti, iyo nanjye nanga”. Abefeso2:1-6

Imana yarifite ibintu byinshi ishimira aba befeso, uburyo bihanganaga, uburyo barenganyijwe bazira kumenya Imana ntibacogore n'ibindi n'ibindi ariko bageze hagati baracogora umuhati bagiraga, ishyaka, imirimo myiza bakoraga, urukundo bagiriranaga hagati yabo ndetse n'Imana ubwayo birashira, nibyo byababaje Imana rero izana ifuhe ibasaba kwisubiraho ndetse ibabwira n'igihano yagombaga kubahanisha baramutse batisubiyeho.

“Nuko ibuka aho wavuye ukagwa wihane, ukore imirimo nk'iya mbere kuko nutabikora nzaza aho uri, nkūre igitereko cy'itabaza cyawe ahacyo nutihana” abefeso 2:5

Iyo igitereko cy'Imana kitagihari n'Imana iba itagihari. Murumva rero ko Imana ifuhira umukiranutsi wasubiye inyuma ndetse ko ishobora kumuhana mu gihe atemeye kwisubiraho ngo yihane.

Dore rero icyo Imana ishaka k'umukiranutsi wayo: “Ariko ujye ukiranuka uzageze ku gupfa, nanjye nzaguha ikamba ry'ubugingo”.Abefeso 2:10b

Imana ibahe umugisha.

[email protected]

Mbere yo guhindurirwa amateka Yabyaye abana bamunanira kubarera ajya kubaragiza.

By Ubwanditsi

Uyu rero nta wundi ni Bwana HABIYAREMYE Eugene akaba ar' umuhungu wa MUNYAWERA Yohani na CYITEGETSE Veronika, iwabu ni i MBARE mu Murenge wa SHYOGWE, Akarere ka Muhanga.akaba yaragize icyifuso cyo gutanga ubuhamya bw'ibyabaye mu buzima bwe, ngo twese twiyumvire cyane uko Yesu ari Umwami mwiza, ngo nawe utaramwakira umwakire wumve ibyiza wacitswe maze ufate icyemezo cyiza umwemerere uyu munzi yinjire ature muri wowe.

UKO YAVUTSE AGAHABWA AMAZINA AFITE UBU

Reka twumve uko atangira abivuga “Navutse mu muryango wa Munyawera Yohani wari ukennye cyane, mvukira mu bitaro bya KABGAYI. ubundi izina Eugene bisobanura mu Gifaransa :" BIEN-NE " Mu kinyarwanda ni ukuvuga ngo :" UWAVUTSE NEZA". Ariko koko disi navutse neza kubona naravutse ku ngoma ya KIRISITU yo kwabyara.

Ubwo Mama yambyaraga turi mu bitaro bya KABGAYI nahise ngira ibibazo mu minsi ibiri ya mbere nenda gupfa habura gato. Ubwo nari gusamba, umubikira ukora mu bitaro bya Kabgayi yarirutse ahamagara Padiri ngo bampe batisimu ntapfa ntabatijwe.

Uwo mwanya bahita batoranya umuzamu warariraga ibitaro bya Kabgayi witwaga RWABUTATARA REHU ngo ambyare mu batisimu. Nuko sha REHU ambyara mu batisimu yambaye igikote kirekire afite ubuhiri mu ntoki arindisha izamu. Ubwo nyine bahita banyita :"Eugene" bivuga ngo mvutse neza kuko mvutse bagahita bambatiza ako kanya.

Iryo zina mba ndihawe na Ma Soeur( umubikira) gutyo. Ubwo umubikira yamaraga kumpa izina no kumbatiza, Data nawe yahise anyita HABIYAREMYE bishaka kuvuga ko muri ibyo bihe Imana yaremye niyo ihaba gusa ati Iyo hataba iyaremye inzogera iba yarirenze kuko abana b'abantu bo bamaze gukurayo amaso.Ubwo dutaha tuva mu bitaro ntahana amazina yombi.

MAZE GUKURA NAHISE NJYA KUBA UMUBOYI I KIGALI

Ubwo namaraga kugira imyaka 11, ubukene iwacu kwa Habiyaremye bwaradukubise, niyemeza kujya i Kigali gushaka akazi, ubwo mba ngiye i Kigali nkora akazi k'ububoyi sha nkiri umwana. Bigeze muri 1994 mba ndatashye nsubira iwacu kubera ibyari biri kuba mu Rwanda. Ntaha baririmba ngo :" Ubwo musubiye iwanyu muri abagabo..."

Ubwo nageze mu rugo ndi umusinzi ruharwa, nagera mu kabari abandi bakava mu nzira ngakamya nkajya ahandi. Ikindi nari uwa mbere mu kubyina, Umuziki wo mu kabari narawuzirikaga bigatuma abantu bose bava mu nzira, naba ntanafite amafaranga bakagura kuko aho nabaga ndi nta rungu ryaharangwaga.

Ubwo muri iyo minsi nari mfite ihene nari naroroye yitwaga :" IVONA" , maze ngataha nasinze nagera mu rugo ngakubita ikivugirizo nyihamagara nti :" HU-HU-HU" IVONA yanjye ikaza yiruka kunsanganira ikaza ihebeba sha, nkumva ni byiza cyane kubera ihene yanjye yari inzi.

Iyo hene ikaba yarabyayye abana batatu icyarimwe, Umunsi umwe urushungandushyi ( urwagwa) ruranshuka, ndanywa numva inyota ntishira, ndaza Mpamagara IVONA yanjye nk'uko bisanzwe iza kunsanganira, nanjye ndayifata ndayizirika nyijyana ku kabari nyishyira nyir'akabari nti:" Mpa inzoga ninywere, ubundi IVONA yanjye ngiyi uyikoreshe icyo ushaka.

Uwo mwanya ampa inzoga ndanywa, naho IVONA yanjye bayiyuza inyuma bajya kuyikubita imbugita mu kanya Brochette za IVONA yanjye sha ziba zigiye ahagaragara.

Mu kanya gato, wa mugabo nyiri akabari ati :" Akira amafaranga yawe asagutse yajyane, nanjye nti :" Yagumane nzayaheraho ejo". Ubwo naratashye ngeze mu rugo ntegereza ko IVONA yanjye ihebeba ndaheba, sha nshaka gusubira kwa nyirakabari ngo ansubize IVONA yanjye nsanga bamaze kuyirya imishito, ndababara cyane ndigaya kuba Ihene yanjye IVONA bayiriye kandi nayikundaga.Uko niko inzoga zigukoresha icyo utatekerezaga.

MURI ICYO GIHE NARI UMUKENE WA KABIRI KU MUSOZI

Abantu batuye i Mbare baranzi ubwo hazaga CARITAS yajyaga ishaka abakene kurusha abandi, ubwo bagakora inama yo kujonjora. Nuko sha, uwa mbere akaba umupfakazi witwa LANGWIDA akagira amanota 95 naho uwa Kabiri akaba HABIYAREMYE Eugene mwene MUNYAWERA Yohani na CYITEGETSE Veronika akagira amanota 92%. Umukene wa mbere Langwida akandusha amanota abiri gusa.Ubwo bakadutoranya kuzajya gufata imfashanyo ya CARITAS i KABGAYI.

Ku munsi wo kujya gufata imfashanyo, nkazinduka iya rubika nkanyura kwa LANGWIDA, ubwo njye nawe tugashogoshera n'i Kabgayi...Nabaga mfite agafuka gashaje gato cyane mu mpande ariko karekare, gashukuye cyane. Ubwo twagerayo bati :"Abafata ibishyimbo mujye ku murongo.

LANGWIDA akabanza, sha ubwo ngakurikira. Tugafata ibishyimbo, ka gafuka kakuzura. Bati abafata ibigori, nkajya ku murongo, bati zana icyo tugushyiriramo, ngashaka ibirere ngahambiramo ko byuzuye se ndagira nte, bati abafata Lentille, ubwo Langwida akajya ku murongo ngakurikira,Tugahambira no mu gitenge cya Langwida, nta kibazo Langwida we ndagutwaza tuuu, ariko aka gakiza ntikaducike abafata umuceri!!

Abafata amavuta, abafata kawunga. Hose ngatambayo njye na LANGWIDA kandi ka gafuka kanjye kamaze kuzura kare, bimwe LANGWIDA Akabishyira mu we mufuka,tukavanga, ibitenge tukuzuza, uwambaye igipira agakuramo bagashyiramo.

Mu kanya bati :" Noneho ibiribwa birarangiye, turashaka abakene bafata imyenda, hakaba hagurutse Eugene na Langwida, tukajya ku murongo sha, nkaba mbatuye ipantaro, nini ntinkwire!!! Ubuguru buto butabyibushye ariko ni burebure!!! Ndakambaye, wagirango ni FIRIME ya CHARLOS ku bayibonye!!!! Ye baba weeee!!!

Bamwe barasetse, abandi bangiriye inama yo kuzaca ayo maguru!!! Tugiye mu mipira, mbatuye igipira, ndacyambaye, ikijosi cyacyo ni kimwe bita MBWA IRARENGA!!! Ntiwamenya ijosi n'ukuboko, nta gusubiza hasi, ni ukucyambara tuuu!!! Ikijosi kirarereta!!! nacyo bati uzashake urwembe ugice.

Ubundi Mwene Munyawera ndikoreye njye na Langwida wanjye turatashye iwacu mu Kinini twe abakene babiri ba mbere ku musozi!!!!!Ubwo umugore n'abana babona dutungutse bagatangira kwisetsa bati:" Manu yaje, ubu tugiye kumara kabiri nta nzara.

Muri 1992 Eugene mba ndakijijwe, nsaba Imana umwenda kuko nari nambaye igikote kigera ku marenge. Ndibuka icyo gikote nkibuka igitutsi Mana yigeze kuntuka ngo :" Urakambara NTABARA " ndebye koko nsanga icyo gikote nta bara gifite mbona ko umubyeyi yantutse bikampama koko( babyeyi muramenye ntimukature amagambo mabi ku bana banyu).

Icyo gikote cyanjye iyo nakimesaga cyamaraga iminsi itatu, umunsi umwe wo kujojoba, umunsi wundi wo kumuka, n'uwa gatatu wo kuma.

Umunsi umwe nti sha reka nsabe ibiti nubake inzu ndebe ko nanjye nagira inzu nk'abandi bagabo.Ibiti barabimpaye sha ariko bibaye bicye, aho abandi bashinga ibiti 20 njye ngashingamo ibiti icumi gusa, ubundi ngahomekamo icyondo.

Ndayisakaye ariko umuyaga uhushye inzu ya Eugene irahengamye wagirango irenda kuguruka. muri iyo minsi abarokore bakajya baririmba ngo :"Tuzaguruka tumusanganire" abaturanyi nabo bati :" Sha niba bazanaguruka koko barabeshya inzu ya BUJENI izabatanga kuguruka. Ubwo nyine bakabakina ku mubyimba ngo abarokore bazaguruka nk'inzu ya BUJENI!!!!

UKO NAJE GUSHAKA UMUGORE

Ubwo abantu bose babonaga akazu kanjye kenda kuguruka, bakavuga ngo abarokore bazaguruka ariko bazasanga akazu ka BUJENI kabatanze kuguruka, nibwo nakunze umukobwa, nambara igikote cyanjye na rugabire, BUJENI njya kumurambagiza, nawe ati:" Ariko abantu bavuga ko akazu kawe ntakigenda, ni byo ? nanjye nti:" ni ibyo babeshya abantu bagira amagambo menshi.

Yabanje kunseka cyane, ariko uko nagumyaga kumwihata niko yageze aho mbona aremeye. Iyo nzu yanjye yari ifite akugi gasekeje, twagakinga kakajya mu kizingiti kimwe, ahasigaye hagasigara harangaye, tugashakiraga imisambi tukarundamo tugapfuka ngo iyo myenge ye kugaragara kuko uwari guturuka inyuma wese yari kwinjira uko ashaka.

NAJE KUNANIRWA KURERA ABO NABYAYE NJYA KUBARAGIZA

Ubwo twashakanaga na Madame wanjye, nyuma yaho gato naje gukizwa nemerera Yesu kumbera umwami n'umukiza. Ubwo natangiye kuzamuka gahoro gahoro. Mu gukizwa ariko ikigeragezo cya mbere nahuye nacyo ni imyumvire y'abo twasenganaga ijyanye no kuboneza urubyaro. Ubwo narabyaye ngeza ku bana batanu, nyamara ntacyo kubatunga nari mfite. Kubarera bimaze kunanira, nafashe umwanzuro wo kujya kubaragiza kwa Mabukwe sha nti mumfashe uyu mwana!!!!

Nibuka umunsi umwe,nagiye gusura umwana wanjye, umwana ararira ngo turatahana, mabukwe aramujijisha anyereka aho manukira ngo atambona, ngenda ntazi aho ngana manuka mu rutoki ngera ahantu mu nkoko,zirasakuza benezo baraza baramfata ngo ndi umujura. Byarambabaje cyane kuko kuhava nahakuwe na Mabukwe agombye kunsobanura.

NAHINDURIWE AMATEKA

Ubu BUJENI ntakiri BUJENI asigaye ari EUGENE,Ubu ndi umuhinzi wa Kijyambere mu Murenge wose wa SHYOGWE ninjye Muhinzi ntangarugero.Mpinga inyanya zitwa F1 nkagemura muri SIMBA SUPER MARKET, ngahinga inyanya ngemura kwa NYIRANGARAMA.

Mpingira muri Green House kandi gufata Miriyoni mu ntoki nagurishije ni ibisanzwe ahubwo kugurisha simfate za miriyoni nicyo kiba kidasanzwe.Ubu Radiyo SALUS na TELEVISION Y'U RWANDA baransuye.

Mfite Boutique na ALIMENTATION iwacu i Mbare, inzu mbamo irimo amazi, umuriro, ako ga TVR ndakareba nanjye nkumva uko mbaye. Niba uri umukristo utizera ndahamiriza ko ntaho Imana itakura umuntu kuko BUJENI warwaniraga na LANGWIDA ku murongo, ubu niwe EUGENE wa mbere mu Murenge wa SHYOGWE.

Ugeze ku karere ka Muhanga ukabaza kukurangira abahinzi ntangarugero, bakohereza kwa EUGENE mu KININI.Nyamara sinjye ahubwo ni Kristo uri muri njye.

Mu minsi ishize nahawe igihembo k'umuhinzi wa mbere ntangarugero mu Murenge. Nkaba mperutse no gufata CERTIFICAT nahawe na Ministre MUREKEZI y'umuhinzi- Mworozi Ntangarugero.Ubu mfite ishyirahamwe natangije iwacu rigamije : Kwigobotora ingoyi y'ubukene,rigizwe n' abakobwa babyariye iwabo.

Nafashe ibihumbi 200,000 mbagurira inkwavu n'ingurube, ubundi ndabatira mbigisha guhinga kijyambere. Iryo shyirahamwe ryitwa:" ABAHUJE BA SHYOGWE" ubu rigizwe n'abakobwa 23 kandi bose ubu dukora icyo twita kubyarana mu batisimu, urushije undi ikintu mu iterambere akakimigisha. ubu ndi umujyanama w'Ubuzima, ariko si ubwa none gusa ahubwo n'ubw'igihe kizaza.

HABIYAREMYE Eugene

Imirongo 5 yo muri Bibiliya yafasha abaruhijwe n'ubusore! - Tyler O'neil

By Simeon Ngezahayo

Mu matorero yibanda ku mumaro wo gushaka ndetse no mu muco wibanda ku byiza by'imibonano mpuzabitsina, Abakristo bakiri ingaragu bahura n'ibibazo byo kwisuzugura (kumva badashyitse) kandi bagahorana icyuho. Nyamara Bibiliya itanga ibisubizo byo kubakomeza.

Kuri uyu wa kabiri, June Hunt uyobora umuryango w'ivugabutumwa Hope For The Heart ministries (Ibyiringiro by'umutima) yaravuze ati "Hari abantu benshi bashyingirwa kugira ngo bagire agaciro, kuko bumva kuba ingaragu nta gaciro bibahesha. Ndetse no mu itorero, ingaragu nyinshi "zibarira mu cyiciro cya kabiri."

Imirongo 5 ikurikira, n'ibitekerezo by'abayobozi b'amatorero bigukomeze wowe uhangayikishijwe n'uko ukiri ingaragu.

1. "Na we arababaza ati ‘Mama ni nde, na bene data ni ba nde?' Abararanganyamo amaso, abari bicaye impande zose bamugose arababwira ati ‘Dore mama na bene Data: umuntu wese ukora ibyo Imana ishaka ni we mwene Data, ni we mushiki wanjye, ni we mama.'” Mariko 3:33-35

Yesu ntiyigeze ashaka, kandi mu Befeso 5 intumwa Pawulo yanditse ko itorero ari umugeni wa Kristo. Yesu aha ikaze abigishwa be mu rukundo nk'urw'abashakanye, ndetse nk'urwa kivandimwe.

2. Abaheburayo 4:15 "Kuko tudafite umutambyi mukuru utabasha kubabarana natwe mu ntege nke zacu, ahubwo yageragejwe uburyo bwose nkatwe, keretse yuko atigeze akora icyaha."

Pawulo yasobanuye ko Yesu Kristo, Umukiza w'abari mu isi utigeze gukora icyaha yagerajwe uburyo bwose nk'uko urimo kugeragezwa.

3. 1 Abakorinto 7:8-9 "Abatararongorana kandi n'abapfakazi, ndababwira yuko icyiza kuri bo ari uko bagumya kumera nkanjye. Ariko niba badashobora kwirinda barongorane, kuko ibyiza ari ukurongorana kuruta gushyuha."

4. Yeremiya 31:3 "Nagukunze urukundo ruhoraho, ni cyo cyatumye ngukuruza ineza nkakwiyegereza."

5. 1 Abakorinto 13:4-7 "Urukundo rurihangana rukagira neza, urukundo ntirugira ishyari, urukundo ntirwirarira, ntirwihimbaza, ntirukora ibiteye isoni, ntirushaka ibyarwo, ntiruhutiraho, ntirutekereza ikibi ku bantu, ntirwishimira gukiranirwa kw'abandi ahubwo rwishimira ukuri, rubabarira byose, rwizera byose, rwiringira byose, rwihanganira byose."

Mu gitabo cye yise “Ubugaragu bufite intego,” John Fischer yaravuze ati "Niba tugamije kurongorana tuba duhisemo nabi, kuko bituma urukundo rwacu rugarukira ku wo twashakanye gusa." Yakomeje agira ati “Aho kwibanda ku gushakisha uwo umutima wabo ukunda, Abakristo bakagombye kwibanda ku gukunda abandi, ibyo kurongorana bikaza nyuma. Kurongorana si ryo herezo ry'ubuzima… ni ukuba umugaragu w'urukundo.”

Babyeyi, ntimucogore!

By Kiyange Adda-Darlene

Hashize iminsi, hari kuwa gatandatu mu gitondo ubwo nari mfitanye gahunda na mugenzi wanjye ijyanye n'akazi, hanyuma tujya ahantu turicara tubanza gufata amafunguro ya mugitondo. Nkuko byari bisanzwe, jye na mugenzi wanjye twahuriye ahantu abantu bafatira amafunguro (restaurant). Mu gihe twari twatangiye ikiganiro cyacu, nabonye ibintu byantangaje cyane, bituma nshaka kubikurikirana kugira ngo menye ibyaribyo..

Mu nguni ya ha hantu twari twicaye, hari hicaye umugabo ari kumwe n'umuhungu we uri mu kigero cy'imyaka 10 cyangwa 11, bicaye basangira kandi baganira.

Ubwo, hari abashobora kumbwira ko ibyo ari ibisanzwe ariko ntabwo bisanzwe. Bari bicaye barebana, ubona baganira rwose nta kurangara kandi ikiganiro cyabashimishije. Sinabashaga kwumva ibyo bari kuganira, ariko byari byoroshye ko umuntu yabitekereza. Narebaga uko uyu mugabo yunama cyane kugira ngo avugishe umwana we, ndeba n'uko uyu mwana yari amukurikiye amaso ku yandi. Mbese nari kubasha nte kumenya ikintu bari bari kuganira ? Nagize amatsiko cyane kubera ko bombi, buri umwe wese yari afite bibiriya imbere ye.

Uyu mubyeyi, yarari gusobanurira umwana we, umurongo wo muri Bibiriya, ukabona arakoza urutoki ku murongo wanditsemo. Mbese umutwe w'amagambo wari uwuhe? Ntabwo nabimenye, gusa icyo nizemo ntabwo ari ho cyari kiri.

Natangajwe n'uyu mubyeyi ufata isaha imwe cyangwa abiri kuwa gatandatu mu gitondo kugira ngo asobanurire umuhungu we ukuri kuri mw'ijambo ry'Imana.

Mbese amaherezo ibihe nk'ibyo bizagira ingaruka ki ku buzima bw'uyu mwana ?

Birumvikana ko bizamufasha mw'iyubakwa ry'ubuzima bwe bwa gisore, ndetse abaye n'umugabo ukuze ufite n' urugo ndetse. Uyu mwana azaba afitanye n'Imana ubucuti bukomeye.

Mbega amahirwe yo kurera abana ! Ntabwo ari bose babonye ayo mahirwe.

Kubyara ntabwo bihagije. Birasaba no kubagaburira, ukabashakira ibiryo bakeneye kugira ngo bakure, babyibuhe nk'abantu nyine baremwe n'Imana kandi na none bazabe n'abana b'Imana.

Kubagaburira numvamo ko atari kubashakira ibiryo bakeneye bifasha umubiri gusa, ahubwo nanone ni ugushaka n'ibifasha imitima, by'umwuka. Ibyo biba bihagije.

Bamwe bambwira bati, « bafite abarimu babo b'ishuri ry'icyumweru », « twebwe ntabwo twamenya uko bigisha abana », bati : « ntituri abigisha », noneho aho bikomereye cyane abandi bati : « nta mwanya twabona. »
Kuri aba bose ndagira ngo twibukiranye ibi :

« Nuko mubike ayo magambo yanjye mu mitima yanyu no mu bugingo bwanyu, muyahambire ku maboko yanyu ababere ikimenyetso, muyashyire ku mpanga zanyu hagati y'amaso yanyu. Mujye muyigisha abana banyu, mujye muyavuga mwicaye mu mazu yanyu, n'uko mugenda n'uko muryamye n'uko mubyutse. Kandi muzayandike ku nkomanizo z'amazu yanyu no ku byugarira byanyu, kugira ngo iminsi yanyu igwirire mwebwe n'abana banyu mu gihugu Uwiteka yarahiye ba sekuruza banyu ko azabaha, ihwane n'iyijuru riri hejuru y'isi.( Gutegeka kwa kabiri 11 :18-21)

Iyi mirongo yerekana neza ko Imana yaduhaye umunezero wo kurera abana. Ibyo bisobanura ko kandi ari twe yahaye ububasha bwo kuyihagararira twereka abana urukundo rwayo kuri bo.
Mwami warakoze kuduha abarimu bitanga batwigishiriza abana, ariko ibyo babakorera ntibigomba gukuraho umwihariko wacu wo kwiyigishiriza abana bacu.

Ntidushobora kandi ntitugomba kugira undi muntu wese duharira iyo nshingano yacu yo kwiyigishiriza abana bacu. Imana izatubaza buryo ki twitangiye icyo gikorwa.

Ahari mwambwira muti : « Mbese nabibasha nte n'intambara, n'ibyaha nisanganiwe zitanyoroheye ? »

Imana iratuzi, ntitegereje muri twe kwera cyane, ahubwo ko tuyitegera amatwi, kandi tukita ku burere bw'abana yaduhaye ibitewe n' ubuntu.
Mbese wayicumuyeho ? ninde se utarabikora ? Ntutinye gusaba Imana imbabazi uko byaba bimeze kose irakubabarira. Ubutware Imana yaguhaye ntibuzakurwaho niba uzi kuyisaba imbabazi.

Urukundo mukundana nk'abashakanye ndetse mukanarugeza no ku bana, ruzababera urugero rw'urukundo Imana ibakunda. Mbega inshingano ! yego birakwiye, dufite ubuntu busaga bwadufasha kwuzuza izo nshingano.

Mwaba muriho mwembi uko mwashakanye, waba usigaye uri umwe, mwene Data ntucogore.! Imana iri kumwe nawe kugira ngo igushoboze. Izaguha intwaro ukeneye nuzimusaba..

Mu gihe nk'iki usanga umuryango ariwo ntego satani arasaho cyane, inshingano yacu nk'abizera ni ngari cyane. Imiryango yacu niyo cyitegererezo Imana yahisemo kugira ngo umuntu wese arebereho urukundo Imana idukunda. Twongere twibukiranye ariya magambo ari mu rwandiko rwa Yohana noneho duhange amaso uwaduhaye ayo masezerano.

3Yohana : 4, « Nta cyantera umunezero waruta uwo kumva ko abana banjye bagendera mu kuri »
Inyigisho ya Eric-Vincent Dufour

Ubuzima bufite intego (Umunsi 9, Igice 2)

By Ismael KAYISHEMA

Uyu munsi turakomeza umunsi wa 9 igice 2 ku intego ivuga ngo "Ni iki gitera Imana guseka?"

Kwizera Imana byimazeyo ni ukwizera ko izi neza ibirutaho kuba byiza ku mibereho yawe. Ukizera ko izasohoza amasezerano yayo, ko izagutabara mu bibazo byawe, ndetse igakora n'ibidashoboka biramutse bibaye ngombwa. Bibiliya iratubwira ngo “Uwiteka anezererwa abamwubaha anezererwa abategreza imbabazi ze” Zaburi 147:11

Nowa byamutwaye imyaka 120 ngo yuzuze iriya nkuge. Ndibwira ko hari iminsi yahuraga n'urucantege. Uko imyaka yashiraga akabona nta mvura igwa nibwirako abaturanyi bamusekaga bakamwita “umusazi wibwirako Imana imuvugisha” Nibwirako abana ba Nowa bumvaga bafite ipfunwe iyo babonaga icyo cyato kinini cyuzuye imbere y'inzu yabo. Ariko Nowa arakomeza yizera Imana.

Ni hehe mu buzima bwawe wumva ukeneye kwizera Imana kurushaho ? Kwizera Imana nabyo ni uburyo bwo kuyiramya. Nk'uko ababyeyi bishima iyo abana badashidikanya urukundo n'ubushishozi byabo, ni ko no kwizera kwawe kunezeza Imana. Bibiliya iravuga ngo “Udafite kwizera ntashobora kunezeza Imana” Abaheburayo 11:6

Imana iranezerwa iyo tuyumviye n'umutima wose

Kurokora inyamaswa ntizitsembwe n'umwuzure warimbuye isi yose byasabaga ubwitonzi mu myiteguro kugeza ku tuntu duto cyane. Byose byagombaga gukorwa nk'uko Imana yabiteguye. Ntabwo Imana yari yavuze ngo “Nowa, wubake ubwato uko ubonye” Yari yamuhaye amabwiriza asobanutse yerekeranye n'ubunini , imiterere, n'umubare w'inyamaswa azashyiramo. Bibiliya itubwira uko Nowa yabigenje igira iti “Nowa agenza atyo, ibyo Imana yamutegetse byose aba ari byo akora”Itangiriro 6:22

Batubwira neza ko Nowa yumviye muri byose ? (nta bwiriza na rimwe yirengagije), kandi byose abikora uko yategetswe ?(yubahiriza igihe n'uburyo Imana yamubwiye kubikora). Ibyo ni byo nita gukorana umutima wose . Ntibitangajeko Imana yishimiraga Nowa. Ari wowe Imana igusabye kubaka ubwato nka buriya , ntiwabanza kuyibaza ibibazo bimwe na abimwe,ukayereka imboganmizi biteye ndetse ukayereka n'impungenge zawe? Nowa we si ko yabigenje . Yumviye Imana atabanje kubaza. Ibyo ni ukuvuga ngo yakoze byose Imana itegeka nta kwitangira nta gushidikanya. Ntakubanza kubyigizayo ntakuvuga ngo “reka mbanze mbisengere” Ni ukubikora udakererewe. Buri mubyeyi azi neza ko iyo umwana atinze kumvira byitwa agasuzuguro.

Ntabwo Imana ikugomba ibisobanuro cyangwa impamvu kuri buri kintu igutegeka gukora. Gusobanukirwa bizaba biza ariko kumvira byo ntibitegereza. Kumvira utazuyaje bizakwigisha byinshi ku Mana kuruta iminsi y'ubuzima bwose ujya impaka kuri bibiliya. Mu by'ukuri, hari n'amategeko y'Imana utazigera usobanukirwa keretse utangiye kuyashyira mu bikorwa. Kumvira bikingura umuryango wo gusobanukirwa.

Kenshi tugerageza kumvira Imana ariko by'igice.Dushaka kwihitiramo amategeko twumvira. Tugakora urutonde rw'amategeko twumvira, andi tukayihorera kuko dutekereza ko atajyanye n'igihe , akomeye asaba byinshi cyangwa adashimwa n'abantu. Ukumva umuntu umwe ati nzajya mu rusengero ariko se ni ngombwa gutanga icyacum ? Undi ati nzasoma Bibiliya ariko sinzababarira uwangiriye nabi. Urebye neza kumvira igice ni kimwe no kutumvira.

Kumvira byimazeyo bikorwa mu munezero, ndetse ushyizeho umwete. Bibiliya iravuga ngo “Mukorere Uwiteka munezerewe”Zaburi 100:2
Ibyo ni byo Dawidi yagaragazaga aho agira ati “Uwiteka, ujye unyereka ibyo nkora nanjye nzabikora. Kugeza kumperuka y'ubuzima bwanjye nzakumvira” Zaburi 119:33

Yakobo yandikiye abakirisito arababwira ati “Tunezeza Imana kubw'ibyo dukora, si kubw'ibyo twizera gusa” Yakobo 2:24. Ijambo ry'Imana ribisobanura neza ko udashobora kwironkera agakiza. Agakiza ni ubuntu, ntikava mu byo dukora. Ariko nk'umwana w'Imana ushobora kunezeza so wo mu ijuru kubwo kumwumvira.


“KWIZERA IMANA BYIMAZEYO NI UKWIZERA KO IZI NEZA IBIRUTAHO KUBA BYIZA MU MIBEREHO YAWE”

Igikorwa cyose cyo kumvira nacyo ni ubundi buryo bwo kuramya. Kuki kumvira binezeza Imana? Kuko biyigaragariza by'ukuri ko uyikunda. Yesu yaravuze ati “Nimunkunda muzitondera amategeko yanjye” Yohana 14:15

Murakoze Uwiteka abarinde tuzakomeza ubutaha n'igice cya gatatu

Dore ibintu 7 byagufasha kuba umuririmbyi mwiza

By Claire

1. Ita ku buzima bwawe

Gerageza nibura ku munsi unywe ibirahuri 8 by'amazi, kugirango membrane zitanga ijwi zihore zibobereye zimererwe neza.

*Fata umwanya uruhuke, burya sibyiza na gato kuririmba ufite stress cyangwa se unaniwe.

*Niba wanyweye amazi akonje cyane sibyiza kuririmba, koresha amazi ashyushye cyangwa icyayi.

*Sibyiza kunywa itabi kuko ryangiza inzira ijwi rinyuramo.

*Hariho ibiribwa bitari byiza ku muririmbyi urugero: ibiryo birimo urusenda, alcohol, ikawa ndetse n'ibikomoka ku mata.

2. Kora imyitozo ngorora jwi mbere yo kuririmba

Kimwe n'umubiri muri rusange twese tuziko ukenera siporo kugirango ukore neza ninako ijwi ryacu rikenera imyitozo.

3. Itoze kuririmba nibura iminota 30 ku munsi

Abantu benshi baririmba aruko bageze aho biri ngombwa nko munsengero, mu bitaramo n'ahandi ariko birya ntibyakuza ijwi ryawe pe. Gufata buri 30 min ku munsi ukaririmba n' iby'ingenzi gusa sibyiza kuririmba cyane mu ijoro ribanziriza umunsi wo kuririmba (Perfomance)

4. Ifate amajwi kugirango nawe ubwawe wiyumve

Fata indirimbo uzi neza nawe uyiririmbe wifata amajwi nurangiza uyumve uyigereranye niyo warikodinze gutyo gutyo ugenda wumva amakosa buhoro buhoro uko ubisubiramo urushaho gukora ibintu byiza

5. Gerageza kujyanishwa ijwi nibyo uri kuririmba

Nibyiza kuririmba ibintu wumva neza kandi ukagerageza gusa nabyo, niba utiyizeye uzajye mu ndorerwamo uririmbe wireba hanyuma wishyiremo ko ari abantu benshi uri kuririmbira, hanyuma urebe uko uba usa mu maso kdi burya birangira n'ijwi ariko rigiye

Burya iyo umuntu ari kuririmba abandi bashobora kumureba bakabona koko ko ibyo aririmba bimwuzuye cyangwa ko aribyo yafashe mu mutwe gusa gerageza gushyiramo amarangamutima aho biri ngombwa.

6. Ririmba buhoro

Hariho abatekereza ko kuririmba basakuza aribyo bituma baririmba neza ariko burya byangiza icyo twakwita vocal cords buhoro buhoro ijwi rikagenda ripfa kugeza ubwo utazabasha kuririmba,

Ntago ari ukuririmba wongorera ariko gusakuza cyane nabyo sibyiza.

7. Koresha umubiri wawe ndetse n'umwuka

Umubiri wawe ugomba kugerageza kugenyeganyega mu gihe urimo kuririmba, niba uri kuririmba, uburyo uhagararamo uri kuririmba ijwi ryo mumutwe bugomba gutandukana n'igihe ijwi riri munda kdi ukamenya umwuka usohora n'igihe cyo kuwusohora.

Sibyiza kugira ibindi bitekerezo bitandukanye n'umwanya urimo wo kuririmba.

Dore impamvu utakagombye gutinya ahazaza

By Claire

Uko iminsi ishira, isi itera imbere bamwe babona ibyiza abandi bakagira ibibazo bitandukanye, iterambere ryiyongera, imyigire itera imbere, ikizere cyo kubaho kiyongera hamwe na hamwe, amafaranga menshi abatu batunze mbese ibyiza twavuga isi igenda igeraho ntibibujije abantu kugira ubwoba bw'ahazaza cyangwa bw'amaherezo yabo.

Gusa hariho impamvu ndetse ziri mu ijambo ry'Imana ziri bukwereke ko udakwiriye gutinya ahazaza.

Byukuli nta muntu numwe uriho kwi'isi waba yarahaye Imana igitekerezo mbere yuko abaho ati “Mana ndashaka ko undema nkazavugira muri iki gihugu cyangwa kiriya nkazavukira mu muryango umeze gutya nkaziga amashuri aya naya cyangwa uti nkazakora akazi aka naka” nukuvuga rero ngo ntaruhare umuntu yagize kugira ngo abeho ninayo mpamvu guhangayika ari uk'ubusa.

Dore rero za mpamvu
*Ugomba kumenya ko Imana iri hejuru ya byose
Impamvu ya mbere rero nuko Imana iri hejuru ya byose kandi niyo mubyeyi wacu. Hariho agakuru kamwe hano k'umwana wari ari mu ndege yasinziriye ashiduka yumva urusaku rwinsi basakuza bati turapfuye!!! umwana yegura umutwe abwira uwo bari bicaranye ati humura ntacyo tuba umuntu utwaye ndamuzi ni Papa!!!

Mbega umwana utangaje, mu byukuli afitiye ikizere Papa we kiruta ibibazo bari gucamo mu kirere, nawe rero menya ko Imana ari umubyeyi wawe kandi izi buri kimwe ukenera umunsi ku wundi witinya Imana ni Papa.

Iyo ni yo yicaye hejuru ku rusenge rw'ijuru, abaturage bo mu isi bameze nk'ubuzīkira. Ni yo ibamba ijuru nk'inyegamo, ikaribamba nk'ihema ryo kubamo Yesaya 40:22

*Imana ipfumbase ubuzima bwawe.
Ijambo ry'Imana ritubwira ko bishoboka ko umubyeyi yakwibagirwa umwana we bitewe n'impamvu zitandukanye ariko Imana yo yirahiriye ko itazatwibagira, Imana iha agaciro ubuzima bwawe kandi yavuze ko ibyo yibwira kukugirira Atari ibibi ko ahubwo ari ibyiza, kubimenya bikiza umutima utinya bikawuha gukomera.

Mbese ibishwi bibiri ntibabigura ikuta rimwe? Ariko nta na kimwe kigwa hasi ngo gipfe, So atabizi, ndetse n'imisatsi yo ku mitwe yanyu irabazwe yose. Nuko ntimutinye, kuko muruta ibishwi byinshi. Matayo 10:29-31

*Imana iri mw'iherezo
Mu byukuli Imana dukore ni Imana ihoraho idapfa, Imana yo ubwayo yarivugiye ngo “ Ndi Alpha na Omega kandi buri kimwe cyose kirimo hagati aho, Imana ihagarara mw'itangira ry'ikintu ikamenya aho kizasorera.

Ahahise hacu aho turi none naho tuzaba duhagaze ubutaha byose ntanakimwe gisoba Imana, Imana ntitungurwa, Irabizi, irabireba kandi Imana ishyiraho ahazaza ha buri wese kandi ikahakurikirana kabone nubwo waba uca mu bikomeye.

Icyo ugomba gutekereza nuko utagomba kugira ubwoba, waba usigaje iminota itanu cyangwa imyaka itanu ngo ubeho zirikana ko umwuka wahawe Atari uw'ubwoba ahubwo wahawe Umwuka w'imbaraga umwuka wo gukunda Imana n'umwuka w'ubutwari ntagikwiriye kuguhangayikisha.

Uwahanitse ikirerere afite ubuzima bwawe mu biganza bye ejo hawe niwe uhabitse azabitunganya we ubwe.

Imana ibahe umugisha!

Mbese bimaze iki gutanga ubuhamya?

By Claire

Abantu benshi bafite ibintu bikomeye cyane Imana yabakoreye, ariko ababasha kubivuga ni bake, bitewe n'impamvu zitandukanye, hariho abatinya kubutanga ngo wenda abandi batamenya intege nke zabo bagize mu buzima, hakabaho nabumva ko ntacyo bimaze mbese ari ibisanzwe nyamara gutanga ubuhamya ni byiza ndetse cyane bifasha benshi.

Dore bimwe mu byiza byo gutanga ubuhamya:

1.Ubuhamya bukomeza umuntu

Hari igihe umuntu atanga ubuhamya bw'ibyo yanyuzemo mu buzima, wenda ni ubuzima bukakaye bugoye nyuma Imana ikamugirira neza, wenda n'indwara yarwaye ikomeye Imana irayimukiza, ibi rero iyo abivuze bikomeza abakiri guca mu bikomeye bakagira ibyiringiro ko nabo igihe gishobora kugera bakamera neza.

2.Buhumuriza umuntu uri guca mu bikomeye

Iyo umuntu atanze ubuhamya nk'uko twabivuze haruguru habaho ihumure kubabyumva abari bahangayitse bakagira ihumure bitewe n'uwaciye mu bikomeye Imana yagiriye neza.

3.Birema icyizere bigatuma akomera mu kigeragezo

Gutanga Ubuhamya bituma ababyumva barushaho kwizera Imana no gukora kwayo bakamenya ko ishobora byose.

4.Biruhura umutima w'uwabutanze

Burya iyo umuntu yatuye akavuga ikintu cyamubaye ho kari ukuntu yumva aruhutse, burya si ibibi gusa n'ibyiza nabyo iyo ubyatuye ukabivuga wumva uruhutse mu mutima.

5.Busiga inyigisho ku muntu wabwumvise

Ubuhamya burigisha bitewe n'uwabwumvise bitewe n'inyigisho iri muri bwo ubuhamya busigira ubwumvise isomo

6.Burema ibyiringiro ku muntu wari utentebutse

Hariho igihe umuntu aba yacitse intege yumva nta wundi ufite ibibazo biremereye nk'ibye, ariko yakumva ubuhamya akamera nka wa muntu ujya kwa muganga arembye yagerayo akabona undi muntu wenda gupfa akumva yahita anitahira mbese akumva arakize, ubuhamya rero ni nkako bumeze buremera ibyiringiro uwari ucitse intege.

6.Butuma imbaraga z'Imana zimenyekana

Buriya rero Imana niziza, imirimo itangaza ikora ishaka ko abantu bayimenya bakamenya n'imbaraga zayo, iyo igukoreye ikintu gikomeye gishobora gukomeza n'abandi ukicecekera ntago uba ukoze neza. Imana iba ishaka ko umuntu abivuga akatura gukomera kwayo abantu benshi bakamenya ko iriho kandi ko ikora ibikomeye bitarondoreka.

Ufite ubuhamya wifuza gusangiza abandi watubwira tukagufasha kubutambutsa.

[email protected]

Icyo wakora kugirango udasiga umwana arira

By Claire

Abana cyane cyane bari hagati y'umwaka n'imyaka itatu ntibaba bashaka gusigara mu rugo iyo babona ababyeyi babo bagiye. Benshi rero bararira ugasanga ababyeyi bakora ibishoboka ngo barinde umwana ako gahinda gusa akenshi babikoranabi.

Dore uburyo bwiza wabikoramo :

Abana bato bari mu kigero cy'imyahka hagati 1-3 bakunze kutemera ko ababyeyi babo babasiga murugo ahubwo babona bagiye bagasigara barira, bamwe mu babyeyi ntibamenya uburyo bwiza bafatamo abana babo kuburyo batabasigana agahinda cyangwa bari kurira.

Uyu munsi rero turakubwira bimwe mubyo wakora mugihe ugiye kugenda kugirango umwana adasigara arira

1. Muteguze ko uri bugenda

Cya gihe uri kwitegura bibwire umwana, ntacyo bitwaye kumubwira aho ugiye ukamubwira igihe uri buzire ushobora kumubwira n'icyo ugiye gukora yo cyane ko iyo atangiye kuvuga hari n'ubwo nawe abikwibariza sibyiza rero kumubeshya.

2. Sibyiza kumwihisha

Inkuru dukesha agasaro.com bavuga ko mugihe ugiye kugenda ukwiye kwirinda kwihisha umwana ngo ugende atakureba ahubwo ushobora kumusezera neza ukamubwira ko muri bwongere kubonana.
Kwihisha umwana bituma yibaza impamvu atakubona kandi wari uhari bigatuma arira cyane ndetse agatangira no kugutakariza ikizere.

3. Mureke aguherekeze

Niba usoje kwitegura ugiye mwemerere aguherekeze nurangiza umusezere neza asubire murugo hamwe n'umurera.

Ubwa mbere n'ubwa kabiri bishobora kudahita bikunda nubundi umwana agasigara arira ariko buhoro buhoro uko ubimumenyereza ugenda ukongera ukagaruka birangira abimenyereye.

Biruta cyane kubeshya umwana ibintu bitandukanye, burya ntako bisa kubakira ku kuri bituma umwa akura ari umunyakuri kandi agirira ikizere ababyeyi be.

[email protected]

Ubuhamya bwa Mike Imana yakuye mu biyobyabwenge byaramugize nk'imusazi

By Claire

“kugira ngo ubahumure amaso na bo bahindukire bave mu mwijima bajye mu mucyo, bave no mu butware bwa Satani bajye ku Mana, bahereko bababarirwe ibyaha byabo baraganwe n'abejejwe no kunyizera.” Ibyak 28:18

Nitwa Mike, Ntago nshaka kwinjira cyane ahahise hanjye, ariko ndababwira ho bicyeya. Navukiye New York umuryango wanjye wose niho ukomoka. Umuryango wanjye wimukiye Chicago nkiri muto aho rero niho nakuriye.

Natangiye kunywa inzoga mfite imyaka 11, natangiye kunywa ibiyobyabwenge mfite imyaka 14. Nanyweye ibyitwa marijuwana kuva 1970, urumva nari nkiri mu myaka cumi na, naranywaga kuburyo buteye ubwoba. Ariko kubw'ubuntu bw'Imana naje kurangiza amashuri yisumbuye mu 1981.

Ubuzima bwanjye bwo muri iyo myaka bwari ubwo gukora urugomo n'ibindi bikorwa bibi cyane bigayitse. Nari umurakare ndetse numvaga nta muntu ukinyitayeho kubw'ibikorwa bibi nakoraga.

Mu 1983 naje gukunda umukobwa ariko ngira ibyago uwundi muhungu aramuntwara, nararakaye cyane nywa ibiyobyabwenge by'ukuli numvaga ndibukore ibara, ariko Polisi iramfata banyambura uruhushya rwo gutwara banamfunga imyaka 5.

Mu 1984 nashatse uburyo bwo gutoroka, narabishoboye ndagenda njya kure, ariko baje kumfata barongera baramfunga mpaka ya myaka nyirangije.

Nasohotse muri gereza ariko numva narataye igihe, imyaka namaze mfunze yarambabaje, abo nasize tungana bari barageze kuri byinshi ariko burya Imana iyo ifite umugambi k'umuntu ntiyabura uko imufata.

Nasohotse mo aho numva mfite ingamba zo gushaka uko nava ku biyobyabwenge ariko ntago byari kunkundira pe, burya koko Yesu niwe wenyine umara inyota z'ibyaha.

Naje guhura n'umukobwa turakundana ariko nkajya ngerageza kumuhisha ko nywa ibiyobyabwenge kuko najye nubwo nabinywaga sinari nkibikunda urabona hari ukuntu uba udakunda ikintu ariko hakabaho imbaraga zigusunikira kugikora pe narabinywaga ariko nkumva uwampa nkabireka burundu namushimira.

Umukobwa tumaze kumenyerana narabimubwiye gusa nari nziko ariwo munsi wanjye nawe wo gutandukana gusa namubereye umunyakuri mubwira ko rwose nifuza kubireka ambwira ko hari ahantu ajya ajya gusengera ngo ko ninjyayo hari igihe byangirira umumaro.

Naramwumviye turajyana tukinjira mu rusengero tumaze kwicara hari hagezweho umwanya w'ubutumwa bwiza (Ijambo ry'Imana) umupasiteri wabwirije wagirango ninjye yari yibasiye ibintu byose nanyuzemo nibyo yivugiye gusa, nabonaga yambonye mbese wagira ngo mvuka yarahari kugeza uwo munsi ninjiye mu rusengero.

Ijambo yavuze rikomeye yaravuze ngo Yesu aragukunda yazanywe mw'isi no gushaka uwazimiye, aravuga ngo nawe umeze nk'uba mw'isi yawe uhorana inyota y'ibyaha Yesu yayikumara. Yesu niwe karuhura n'ibindi n'ibindi numvaga koko arinjye abwira yatinze kurangiza kubwiriza nahagurutse atarahamagara n'abashaka kwihana.

Napfukamye imbere ndira cyane nsaba Imana imbabazi, narize amarira menshi amagambo agera aho aranshirana ndarira koko! Sinanibutse ko umukobwa dukundana ari aho, nagiye kumva numva ikintu kimeze nk'umuyaga mwinshi kiraje kirahuha ngira ngo byabaye mu rusengero rwose ariko ninjye wabyumvaga gusa numvise ikintu kimeze nk'umuzigo kimvuyeho, numva ijwi rivugira muri uwo muyaga ngo ndi “Yesu ugukunda ibyaha byawe urabibabariwe”.

Kuva nakwakira Yesu nk'umwami n'umukiza nkabatizwa no mumazi menshi ndababwira ngo Yesu amara inyota, Yesu akiza ibyaha Yesu ni umunyembabazi pe! Yarambabariye ubu sinababwira amahoro mfite uko angina.

Wamukobwa twaje gukorana ubukwe nyuma nkomeza no kwiga narangije kwiga mbona n'akazi ubu umuryango wacu umeze neza kuko urimo Yesu byuzuye
Ubu njye n'umufasha wanjye dufitanye abana babiri b'abakobwa, ubu ndi umupilote w'indege twese murugo turakijijwe mu rugo dufite amahoro sinkinywa ibiyobyabwenge numva n'inyota yabyo nahoranaga Yesu yarayimaze.

Imana yakoze umurimo ukomeye mu mutima wanjye abanzi mbere nkimeze nk'umusazi iyo duhuye birabagora kubyemera, ariko ninjye Yesu yagiriye neza. Nta murimo adashobora mu buzima bw'umuntu uwo ariwe wese.

Kwemera gusa ko uri umunyabyaha ukamwemerera ashobora guhindura ubuzima bwawe ukareka guta igihe mu bidafite umumaro nababwiye ngo igihe nataye nywa ibiyobyabwenge meze nk'umusazi nta kibi ntinya iyo mbitekereje birambabaza cyane ariko muri byose ndashimira Yesu ko atemeye ko mbipfira mo akampa agakiza, ubu nkaba ndi umwana w'Imana.

Yesu ni umunyembabazi.

[email protected]

Mugihe wumva nta sengesho usigaje inyuma wakora iki?

By Claire

"Ku bw'umutima w'imbabazi w'Imana yacu, Ni wo uzatuma umuseke udutambikira uvuye mu ijuru, Ukamurikira abicaye mu mwijima no mu gicucu cy'urupfu, No kuyobora ibirenge byacu mu nzira y'amahoro.”(Luka1:78)

Mu buzima bwacu bwa buri munsi hari byinshi Imana idushoboza kugera ho tukabiyishimira, ariko hakabaho n'ibyo dusigara dusengera biduhangayikishije tutarabona kandi rimwe na rimwe nta n'icyo twabikoraho uretse gusenga tugategereza Imana.

Hari ubwo rero bigera aho umuntu akumva nta bwoko bw'isengesho bubaho atasenze, hariho abahitamo kurenga imisozi batuyeho bakajya kure, hari abahitamo kwibabaza ngo wenda Imana yabona umubabaro wabo vuba, mbese na bimwe Bibiliya yita uburyo bwose bwo gusenga bakabukoresha ariko ntibahite babona igisubizo basengeye.

Hariho n'abageraho bakatuza akanwa kabo bati “Mana rero turakubohoye ibi byo rwose turabiretse twabonye bidashoboka” ariko se koko hariho ikintu kinanira Imana mugihe cyashyizweho? Ahubwo dore ikintu gikomeye Imana yaduhishe n'ukumenya igihe cyashyizweho ariko idusaba kwizera gusa nibyo byacu.

Bijya bishyika nanone ko umuntu ageraho agahitamo guceceka igihe n'umwanya wose yafataga wo gusenga akabireka no kwizera kukamushiramo pe. Dore uyu mugabo wari umutambyi witwaga Zakariya Bibiliya itubwira ko nawe yigeze guhura n'ikibazo gikomeye cyo kubura urubyaro, bitewe n'imyaka myinshi cyane yarategereje, yarasengaga umunsi k'uwundi umwaka k'uwundi, none bitakunda akumva ejo bizemera uyu mwaka wakwanga akumva utaha bizakunda nyamara igihe kiba kirekire arangije acika intege pe.

Ibaze ko na Malayika uhagarara imbere y'Imana yiyiziye we ubwe, akamubwira ati witinya Zakaliya Imana yumvise gusenga kwawe, ariko nabwo ntabashe kubyizera. Guhera agishinga urugo akiri umusore yasabaga Imana umwana none ndebera umusatsi we wabaye imvi gusa gusa! Yumvaga yaratakaje ibyiringiro ndetse bigera naho yumva ntacyo avuze mu bantu.

Zakaliya yumvaga Imana yaramwimye umwana mu gihe yarafite ubushobozi bwo kumubyara none ndebera ageze aho twita muza bukuru.

Zakariya abaza marayika ati “Ibyo nzabibwirwa n'iki, ko ndi umusaza n'umugore wanjye akaba ari umukecuru?”(Luka1:18)

Tuvugishije ukuli kw'abantu ibyo Zakaliya yavugaga byarumvikanaga rwose no gutekereza ko Imana itumvaga amarira arira byarumvikanaga, ariko Imana ishaka lko tuyizera no mubyo tubona ko bidashoboka!

Uko gushidikanya yagiriye imbere ya Malayika niko kwatumye agobwa ururimi amezi icyenda yose mbese yabihawe nk'impano ya bucece kugeza igihe Elizabeth yabyariye Imana iramusubiza nk'uko yari yarabimusezeranije

Amasengesho dusenga afite imbaraga zitangaje

Sinabona uburyo nakugereraniriza imbaraga isengesho rifite ariko reka twifashishe uru rugero: Uzafate ibuye urijugunye mu Kiyaga maze urebe ikizabaho, uko byagenda kose ibuye rinyeganyeza iamazi, uzabibona ibyo bita (ondes) byishushanya mu mazi burya n'ibyerekana ko yakozwe ho, Niko isengesho rimera.

Nuko dore uragobwa ururimi, kandi ntuzabasha kuvuga kugeza umunsi ibyo bizakuberaho, kuko utemeye ko amagambo yanjye azasohora mu gihe cyayo.(”Luka 1:20)
Tubyibuke Zakaliya yari umutambyi, yasengeye abantu benshi Imana irabasubiza ariko we mwumvise uburyo yategereje akaruha, nyamara Imana ntiyitaye ku muruho cyangwa kugucika intege ahubwo yitaye kucyo yakugambiriye ho isi itararemwa kandi izagisohoza.

ariko marayika aramubwira ati “Witinya Zakariya, kuko ibyo wasabye byumviswe. Umugore wawe Elizabeti azakubyarira umuhungu, uzamwite Yohana. Azakubera umunezero n'ibyishimo, kandi benshi bazanezererwa kuvuka kwe, kuko azaba mukuru imbere y'Umwami Imana. Ntazanywa vino cyangwa igishindisha cyose, kandi azuzuzwa Umwuka Wera ahereye akiva mu nda ya nyina.

Benshi mu Bisirayeli azabahindurira ku Mwami Imana yabo, azagendera imbere yayo mu mwuka n'ububasha bya Eliya, asanganye imitima ya ba se n'iy'abana, n'abatumvira Imana azabayobora mu bwenge bw'abakiranutsi, ngo ategure ubwoko bwatunganirijwe Umwami Imana.” Luka1:13-17

Imana yumvise gusenga kwawe!

Bibiliya ivuga ko mw'ituze no mu byiringiro harimo igisubizo, imigisha yose yose yo muri Yesu Imana yayigeneye abayubaha, ntacyo byamarira Imana kukwima ibyiza ariko Imana nayo igira igenamigambi, umuntu wese yaremye imufiteho umuteguro ndetse ifite icyo izamumaza mw'isi, ndebera nawe ukuntu zakaliya nanubu tumwigiraho gukora kw'Imana gutangaje nyamara we cyera ari muri byo bihe bibi yumvaga Imana itamwitayeho ahubwo ko yamuremeye kumubabaza nyamara sibyo! Ahubwo Imana yagirango nabo mugihe kizaza bazamenye imbaraga z'Imana zitagereranywa.

Mugihe Zakaliya yumvaga amase ngesho amushiranye nibwo Malayika w'Imana yamusuye ariko marayika aramubwira ati “Witinya Zakariya, kuko ibyo wasabye byumviswe. Umugore wawe Elizabeti azakubyarira umuhungu, uzamwite Yohana. (Luka1:13)

Iyo wumva ntako utagize ntaburyo utasenze ugomba gukomeza gucungana no kwizera ukakurind kuko turabizi ko Imana ihora ariyo kwizerwa mubyo ikora nibyo ivuga.

Imbaraga Imana ifite ziyihesha ububasha bwo guhindura ibidashoboka bikaba ibishoboka!

Imana ishimwe.

[email protected]

Ntiwigirire nabi imana ishaka kuguha ubuzima bushya

By Claire

Hariho abantu bahorana ibitekerezo byo kwiyahura bitewe n'ibibazo bacamo mu buzima, ibikomere bitandukanye, kwirukanwa ku kazi, gutandukana n'abo bashakanye guhohoterwa n'abo babana n'ibindi.

Bibaho ndetse cyane umuntu agategura uburyo azabikoramo, igihe azabikorera ndetse yemwe akanandika ibaruwa isezera abo asize, mbega ibintu bibi cyane!!!

Ikibazo cyo kwiyahura kigenda gifata intera uko iminsi ishira, ubushakashatsi bwakozwe bugaragaza ko nta kigero cy'abantu kitarimo iki kibazo, mu bana bato, mu basore n'inkumi, mu bubatse ingo ndetse no mu ba kecuru n'abasaza usanga hose usangamo iki kibazo.

Mu gihugu cy'Ubufaransa haheruse gukorwa ubushakashatsi basanga imfu z'abapfa bazize kwiyahura naho zigenda ziyongera uko imyaka ishira
Mu baturage 100000, abantu 6,4 barapfa nukuvuga kuva kumyaka 15-24, naho 12,2 hagati ya 25-34 nabo bakazira kwiyahura, naho 22,2 bri hagati 35-44 hapfa kandi 20,6 hagati y'imyaka 65-74, 40,3 nibo bapfa hagati y'imyaka 85-94

Ikigereranyo cyakozwe na OMS kigaragaza ko kw'isi mu mwaka wa 2000 abantu bagera kuri miliyoni biyahuye, bivuze ko mw'isegonda umuntu yabaga yiyahuye. Ikigereranyo cy'ubwiyahuzi cyazamutseho 60% mu myaka 45 ishije. Biragaragara ko iki ari ikibazo gihangayikishije.

Hariho impamvu nyinshi zitera uyu mutima wo kwiyahura

Benshi bagira igitekerezo cyo kwiyahura wenda babitewe n'indwara bafite baziko zitazakira, imibereho itari myiza y'umuryango, amakimbirane mubo babana, byose bigatuma umuntu abona ko kubaho ntacyo bimumariye birutwa no gupfa.

Ariko se niki wakora mugihe wumva ibyo bitekerezo byuzuye umutima wawe?

Nibyo koko urababaye ndetse agahinda ufite karumvikana ariko hariho ikintu kimwe ukwiriye gutekereza, hariho umuntu ugukunda, ukumva kuruta abandi ukwihanganira mu ntege nke zawe ugira abandi badashobora kwihanganira, wumva neza amarangamutima yawe akamenya n'umubabaro wawe!

Imana ifitiye umuti ikibazo cyawe ndetse n'igisubizo ku buribwe ufite, Imana ishobora gukiza umutima wawe washenjaguritse, mbegse wakwemera kongera gutangirana urugendo nayo.

Nta kibazo na kimwe kitagira igisubizo. Buri kimwe gifite igisubizo kandi buri gisubizo ni Yesu.
Humura ntago byakurangiriye ho ahubwo uyu munsi atura ko ubuzima butangiye, Yesu aragukunda cyane!

“Uzi imyicarire yanjye n'imihagurukire yanjye, Umenyera kure ibyo nibwira. Ujya urondora imigendere yanjye n'imiryamire, Uzi inzira zanjye zose. Kuko ijambo ritaraba mu rurimi rwanjye, Uba umaze kurimenya rwose, Uwiteka. Ungose inyuma n'imbere, Unshyizeho ukuboko kwawe” Zaburi 139:2

Reka turebe gato kubuhamya bwa Auger

Rimwe akazi nakoragaho baranyirukanye bantunguye bimbera bibi cyane birananira kubyakira numva isi inshiriyeho numva ubuzia burahagaze numva mpindutse umusazi.

Naratashye ngeze mu rugo mfata umwanzuro njye ubwanjye wo kwiyahura kandi yewe ubwo nari umukristo naravutse ubwa kabiri nzi neza ko kwiyahura Imana ibyanga ko ari icyaha, ariko satani anziba ibitekerezo numva nicyo cyamfasha mu buzima, ubwo nari mfashe imiti yica ngiye kuyinywa numvise umushyitsi udasanzwe umutima uratera cyane nzunga isereri numva ijwi rimbwira ngo have have wikwigirira nabi!

Nabaye nk'uwikanga yamiti ndayijugunya ndapfukama nsaba Imana imbabazi, benedata ubu nabonye akazi keza karuta na kamwe banyirukanyeho, narashatse mfite urugo rwiza mbese ubuzima bwabashye bushya, mbese ubwo iyo niyahura? Ni ibintu bibi cyane umuntu abikora ameze nkaho ibindi bitekerezo byahagaze hasigaye mo ibyo gusa!

Ariko ijambo ry'Imana rivuga neza ko Yesu ariwe buruhukiro kandi ko yiteguye kukuruhura imvune zo mumutima.

“Mwese abarushye n'abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu, Matayo 11:28-29.”

Imana ibahe umugisha.

[email protected]

Ababyeyi batewe impungenge na Smartphone zikoreshwa n'abana

By Claire

Ababyeyi bo muri iyi minsi batewe impungenge n'iterambere rizamuka umunsi k'uwundi cyane cyane irijyanye n'ikorana buhanga, aha baribanda kuri izi smartphone bavuga ko ziri gufasha abana babo kwangirika ndetse ngo n'imyitwarire igahinduka.

Umunyamakuru w'agakiza.org yegereye ababyeyi batandukanye ababaza ki kibazo, bamwe baremeza ko smartphone ari nziza rwose ngo ko zibafasha kuvugana n'abana babo umwanya k'uwundi ngo ndetse bituma nabo bamenya aho isi igeze.

Abandi nabo bakavuga ko ngo zibayobereza abana ngo kuko bajya kuri internet bakahakura ibintu bibi nk'amashusho y'ubusambanyi, kunywa ibiyobyabwenge ngo ndetse n'iyindi mico itari myiza, ngo hari nubwo kandi abana barangara ntibabashe kwita kunshingano zitandukanye baba bafite harimo kwiga neza ndetse n'uturimo two murugo rimwe na rimwe baba bakwiriye kwita ho.

Bakomeza bagira bati hakenewe uburyo bwo kwigisha abana bacu uko bakoresha izi smartphone mu buryo bwiza ngo kuko nibititabwaho ziborekera abana.
Twabajije umubyeyi umwe impamvu abona ari bibi yarangiza akemera kuyigurira umwana we aradusubiza ati “sinakwanga kuyimugurira kuko mbyanze bwacya akayinjirana mu nzu ayikuye ahandi hatari heza ati ariko ndahangayitse pe!”

Amakuru dukura kuri BreakPoint.org/phone. avugako koko izi mpungenge zifitwe n'ababyeyi benshi ngo ariko iki ngenzi atari ukugira impungenge gusa ahubwo ngo hakwiriye kubakwa ubucuti bukomeye hagati y'ababyeyi n'abana ngo ndetse n'ikizere.

Kuburyo umubyeyi amenya umunsi kuwundi ngo ni ibiki umwana ahugiyemo, ngo ndetse kuburyo n'ikibazo cyose umwana yibajije ashobora kugirira ikizere umubyeyi akaba yamusobanuza.

Umugabo witwa David Eaton wakoze ubushakashatsi kuri iki kibazo yasanze ahanini abana bakoresha smartphone mu buryo bubi baba batagira umwanya uhagije wo kwicarana n'ababyeyi babo ngo baganire barebana, ngo hari nubwo usanga abana batinya kwegera ababyeyi babo bitewe n'uburyo babitwara ho, abana rero bagashaka uburyo bwiza bwo kwisubiza ibibazo batavuganye n'ababyeyi babo.

David akomeza avuga ko ngo mbere y'uko umubyeyi agurira umwana smartphone haba hakwiriye kubanza kubaho ikiganiro mbese umubyeyi akaba koko yasobanurira umwana mu bugwaneza nk'uko ijambo ry'Imana ribivuga, akamubwira ibyiza n'ibibi byayo hanyuma akayimuha nk'uko aba yabigambiriye.

[email protected]

Inkuru ibabaje: Umwana w'umupasiteri yahitanywe n'urubura

By Claire

Abana babiri babakobwa umwe w'imyaka 12 n'undi w'imyaka 9 ubwo bari basohotse mu rusengero bagwiriwe n'urubura rwinshi umwe w'imyaka 12 yitaba Imana.

Uwo mwana wapfuye yitwa Esther Jung ari nawe mwana w'umushumba w'iryo torero, yasohotse mu materaniro yo kucyumweru mu rusengero ruherereye Chicago agiye gukinira mu rubura ngo kuko yabikundaga cyane. Nyuma y'isaha imwe rero basohotse we na mugenzi we ababyeyi b'umwana witabye Imana batangiye gutekereza impamvu atahise agaruka kandi hanze hari hakonje batangira kugira ubwoba.

Amakuru dukesha www.christianheadlines.com avugako ababyeyi bahise biyemeza gusohoka bashakisha abana ariko basanga urubura rwabatwikiriye.

Esther Jung rero basanze yapfuye naho mugenzi we umwuka utarahera ariko ameze nabi bihutiye kumujyana kwa muganga gusa kurubu amakuru aturuka kubitaro aho umwana arwariye aravuga ko agenda amera neza.

Umuturanyi wa Jung Peg Gradl, yatangaje ko Jung yakundaga gukinira mu rubura ndetse no kurukinisha yubakamo utuntu dutandukanye, gusa ikibabaje nuko birangiye rumuhitanye “Imana imwakire”

Polisi ya Chicago irihanganisha ababyeyi babuze umwana inakomeza kwibutsa ababyeyi ko bakwiriye kuba maso bagakurikirana imyifatire y'abana umwanya k'uwundi, ndetse bakita no kumikino bakina ngo kuko hari ishobora gushyira ubuzima bwabo mu kaga.

Mbese uracyashidikanya kuri Yesu?

By Claire

Muri iki gihe hariho abantu koko bakibaza uwo Yesu ariwe by'ukuli, bamwe bakavuga bati ni uw'I Betelehemu ku Mugabo witwa Yozefu ndetse n'umubyeyi we Maliya bakumva nibyo gusa , abandi nabo bakumva ni Yesu wo kumusaraba wababajwe irya mibabaro yose dusoma mu byanditswe, hakabaho nabo Yesu yihishurira bakamumenya by'ukuli .

Hariho abantu nanone bashobora kuba bagishidikanya kuri Yesu Bibaza by'Ukuli yesu ninde? kumumenya nukumenya izina rye no kurivuga kenshi birahagije? Yesu asate? Ateye ate? Akunda iki? Imico n'imyifatire ye ni iyihe? Yesu ni muntu ki?
Uyu munsi rero twagukusanirije ibijyanye n'ibihamya Yesu ubwe yihamirije asobanura neza uwo ariwe ngo hato hatagira umushidikanyaho.

1.Ni inzira n'ukuli n'ubugingo
Yesu aramubwira ati “Ni jye nzira n'ukuri n'ubugingo: nta wujya kwa Data ntamujyanye. (Yohana 14:6)

2. Ni ukuzuka n'ubugingo
Yesu aramubwira ati “Ni jye kuzuka n'ubugingo, unyizera naho yaba yarapfuye azabaho. (Yohana11:25)

3.Ni umwungeri mwiza
Ni jye mwungeri mwiza. Umwungeri mwiza apfira intama ze, ariko uragirira ibihembo, utari umwungeri bwite kandi n'intama atari ize, iyo abonye isega rije asiga intama agahunga, isega rikazifata rikazitatanya. Kuko ari uw'ibihembo, arahunga ntiyite ku ntama. Ni jye mwungeri mwiza kandi menya izanjye, izanjye zikamenya. (Yohana10:11-14)

4.Niwe rembo ry'intama
Nuko Yesu arongera arababwira ati “Ni ukuri, ni ukuri, ndababwira yuko ari jye rembo ry'intama. (Yohana10:7)

5.Ni umucyo w'isi
Yesu yongera kubabwira ati “Ni jye mucyo w'isi. Unkurikira ntazagenda mu mwijima na hato, ahubwo azaba afite umucyo w'ubugingo.” (Yohana 8:12)

6.Ni umutsima w'ubugingo
Yesu arababwira ati “Ni jye mutsima w'ubugingo, uza aho ndi ntazasonza na hato, n'unyizera ntabwo azagira inyota na hato. Ariko nababwiye yuko mwambonye, nyamara ntimwizera. Uwo Data yampaye wese aza aho ndi, kandi uza aho ndi sinzamwirukana na hato.

Kuko ntavanywe mu ijuru no gukora ibyo nishakiye, ahubwo nazanywe no gukora ibyo uwantumye ashaka, kandi ibyo uwantumye ashaka ni ibi: ni ukugira ngo mu byo yampaye byose ntagira na kimwe nzimiza, ahubwo ngo nzakizure ku munsi w'imperuka. Kuko icyo Data ashaka ari iki: ni ukugira ngo umuntu wese witegereza Umwana akamwizera ahabwe ubugingo buhoraho, nanjye nzamuzure ku munsi w'imperuka.”

Nuko Abayuda baramwitotombera kuko yavuze ati “Ni jye mutsima wavuye mu ijuru.” Bati “Uyu si we Yesu mwene Yosefu, ntituzi se na nyina? Ni iki gituma avuga ko yavuye mu ijuru?” Yesu arabasubiza ati “Mwe kwitotomba.

Nta wubasha kuza aho ndi, keretse arehejwe na Data wantumye, nanjye nkazamuzura ku munsi w'imperuka. Byanditswe mu byahanuwe ngo ‘Bose bazigishwa n'Imana.' Umuntu wese wumvise ibya Data akabyiga aza aho ndi. Si umuntu wabonye Data, keretse uwavuye ku Mana, uwo ni we wabonye Data. Ni ukuri, ni ukuri, ndababwira yuko uwizera ari we ufite ubugingo buhoraho. Ni jye mutsima w'ubugingo. (Yohana6:35-48)

7. Ni umuzabibu w'ukuli
Ndi umuzabibu w'ukuri, kandi Data ni nyirawo uwuhingira. Ishami ryose ryo muri jye ritera imbuto arikuraho, iryera imbuto ryose aryanganyaho amahage yaryo ngo rirusheho kwera imbuto. None mumaze kwezwa n'ijambo nababwiye. Mugume muri jye, nanjye ngume muri mwe. Nk'uko ishami ritabasha kwera imbuto ubwaryo ritagumye mu muzabibu, ni ko namwe mutabibasha nimutaguma muri jye. “Ni jye muzabibu, namwe muri amashami. Uguma muri jye nanjye nkaguma muri we, uwo ni we wera imbuto nyinshi, kuko ari nta cyo mubasha gukora mutamfite. (Yohana 15:1-5)

Uretse ibi dukuye mu byanditswe nanone Yesu agenda yiyereka umuntu kugiti cye mu buryo butandukanye kandi bwiza kuko yesu muri kamere ye ni mwiza nibyo akora n'ibyiza, iyo umushakanye umwete wose arakwiyereka mu buryo bumwe cyangwa ubundi.

Umuririmbyi niwe wavuze ati “njya ninginga Imana ngo ikwereke Yesu” nanjye ndinginga Imana ngo iguhishurire Yesu by'ukuli ikugeze ku rwego utakimushidikanya ho.

Imana iguhe umugisha.

[email protected]

Menya uburyo wafasha abana kwihanganira ibijyanye no gupfusha.

By Claire

Iyo umuryango runaka wapfushije, ababyeyi kimwe n'abandi bavandimwe n'incuti, akenshi ntibamenya icyo bavuga cyangwa icyo bakora kugira ngo bafashe abana kwihanganira ibyabaye. Nyamara burya, abana bakenera ko abantu bakuru babafasha kwihanganira ibihereranye no gupfusha.

Dore bimwe mu bibazo bikunze kubazwa ku bihereranye no gufasha abana gusobanukirwa iby'urupfu.

Ni gute wasobanurira abana iby'urupfu?

Ni byiza gusobanura ibintu mu magambo yoroshye. Kandi nanone utange ibisobanuro by'ukuri. Ntuzuyaze gukoresha amagambo yabigenewe nka “yapfuye” n'“urupfu.” Urugero, ushobora kwicarana n'umwana, ukamukikira, maze ukamubwira uti “twagize ibyago bikomeye. Papa yarwaye mu buryo bukomeye indwara idasanzwe [cyangwa se ubimubwire ukundi ariko utamubeshya] none yapfuye.

Kuba yapfuye nta we byaturutseho. Tuzagira agahinda kenshi ko kumubura kuko twamukundaga kandi na we yadukundaga.” Icyakora nanone, ni byiza gusobanurira uwo mwana ko we ubwe cyangwa se umubyeyi we wasigaranye na we atazahita apfa ngo kubera ko na we ajya arwara rimwe na rimwe.

Batere inkunga yo kubaza ibibazo. Bashobora kubaza bati “bapfa gute?” Ushobora kubasubiza muri ubu buryo uti “‘bapfa' iyo umubiri uhagaze gukora maze umuntu ntiyongere kugira ikintu abasha gukora mu byo yakoraga ntashobore kongera kuvuga, kureba cyangwa se kugira ikintu na kimwe yumva.”

Ku mubyeyi w'umukristo ubasobanurira ko ubuzima butarangirira mw'isi ko nanyuma y'urupfu abakijijwe basongera bakabaho. Luka 23:43, Yohana 5:28,29

Mbese, hari ibyo ugomba kwirinda kuvuga?

Nta cyo bimaze kuvuga ko uwapfuye yagiye mu rugendo rwa kure. Ubwoba bwo kuba bamusize ni bwo buhangayikisha umwana, cyane cyane iyo yapfushije umubyeyi.

Kubwira umwana ko uwapfuye yagiye mu rugendo, bishobora kurushaho guhinga mu mwana igitekerezo cy'uko bamutaye maze agatekereza ati ‘nyogokuru yansize ntiyanansezeraho!' Gira amakenga nanone ntubwire umwana muto ko uwapfuye yasinziriye.

Abana bakunze gufata ibintu uko byakabaye ijambo ku rindi. Umwana niyumva ko gusinzira ari kimwe no gupfa, ashobora kujya atinya kujya kuryama nijoro.
Mbese, abana bagomba kugira uruhare mu mihango y'ihamba?

Ababyeyi bagomba kwita ku byiyumvo by'abana. Niba badashaka kujya muri iyo mihango, ntubahatire kuyijyamo cyangwa se ngo ubumvishe ko bagize nabi kuba batayigiyemo.

Niba bashaka kuyijyamo, basobanurire neza uko biza kugenda, niba hari buze kuba hari isanduku [irimo umurambo], niba se iri bube ifunguye cyangwa se ifunze. Ubasobanurire ko bashobora kubona abantu benshi barira kubera ko bababaye. Nanone ubareke babaze ibibazo.

Unabahumurize ubabwira ko bashobora kuza kwigendera igihe bashakiye.

Abana babyifatamo bate iyo bapfushije?

Akenshi abana bumva ari bo batumye uwo bakundaga apfa. Kubera ko hari igihe umwana ashobora kuba yarigeze kurakarira uwapfuye, ashobora kwibwira ko ubwo burakari cyangwa se amagambo ashingiye ku burakari yamubwiye ari yo yatumye apfa. Bishobora kuba ngombwa kumuhumuriza ugira uti ‘ibitekerezo byawe n'amagambo uvuga si yo yatuma umuntu arwara, kandi si na yo yatuma umuntu apfa.'
Umwana muto ashobora gukenera guhumurizwa bene ubwo buryo incuro nyinshi.
Mbese, byaba byiza guhisha abana agahinda ufite?

Kuririra imbere y'abana ni ibintu bisanzwe kandi bishobora kugira icyo bifasha ku buzima. Yewe, ntibinashoboka gukumira ibyiyumvo byawe imbere y'abana; bakunze kwitegereza no kumenya ko hari ikintu kitagenda. Kugaragaza agahinda kawe mu buryo butaryarya, bituma bamenya ko kugira agahinda no kugaragaza rimwe na rimwe ibyiyumvo ari ibintu bisanzwe.

[email protected]

Uko neguriye ubuzima bwanjye Yesu n'uko yabuhinduye bushya

By Claire

Ubu ni ubuhamya bwa Glenis, wakize indwara z'umutima binyuze mu kwiyegurira Yesu Kristo.

“Mbere yuko nakira Yesu nk'umwami n'umukiza w'ubugingo bwanjye, najyaga niyumva neza ko mfite ikibazo mu buzima mbese meze nk'umuntu utuzuye neza mu mutima cyangwa se meze nk'ufite ikintu abura.

Kugira ngo rero icyo cyuho niyumvaga mo ngisibe nashatse umugabo kugira ngo wenda abashe kuzuza ibyifuzo byanjye uburyo ubwo aribwo bwose cyangwa inzira zo ari zo zose byasabaga narazicaga ubu sinabura kuvuga ko nanyuze munzira z'icyaha.

Muby'ukuli sinarinzi ibyo ndi kunyuramo mu buzima ndetse n'impamvu mpitamo izo nzira mbi nkabikora ntatekereje n'ingaruka zitandukanye byangira ho.
Ku myaka 25 nashatse umugabo dukorana ubukwe ariko by'ukuli sinakubwira ngo uwo mugabo twashakanye naramukundaka gusa mumyaka 3 nabyaye umwana w'umuhungu mu mihangayiko numva uwo twashakanye ntamukunda pe.

By'ukuli nakomeje kumva ngifite ikintu mbura. Numvaga ntacyo mfite muri njye cyo gutanga pe aha ndavuga urukundo.

Numvaga nshaririwe bitewe n'ahahise hanjye ndetse n'ibyaha nakoraga.
Uwo mugabo numvaga mufitiye urwango ntazi uko nasobanura. Ndabyibuka rimwe ubwo nari ndi gutegura amafunguro ya nimugoroba umugabo wanjye yarinjiye, kuziko hari hariho amazi ari kubira nyateruraho ngo nyamumeneho cyakora ndashima Imana ko yabibonye mbere akitaza ntacyo yabaye.

Mu myaka 5 umugabo wanjye yaje gushaka ko tujya kuba muri Australiya gushaka ubuzima gusa kubera ukuntu nakundaga Papa wanjye numvaga ntamusiga nararize cyane byarangoye kumusiga ariko ntakundi byari kugenda. Gusa kubera kutakira ahahise hanjye ndetse no kubana nuwo mugabo, nanone kugenda ngasiga Papa byose byarambabaje ndetse kubera umumamaro ukomeye bimviramo kugira Depression.

Twagezeyo ubuzima bubanza kudukomerera kuko ntakazi twese twari dufite, ariko tuza kukabona ndetse tuniyubakira inzu yacu ubwo umwana wanjye nawe yari amaze gukura.

Umunsi umwe rero naje kwiyumvamo kujya mu rusengero, njye n'umuhungu wanjye tujya mu rusengero rwari muri ako gace, mbere yuko dutaha umukobwa muto wasengeraga aho ampa umurongo wo muri Bibiliya arambwira ngo njye mpasoma, rwose namwakiranye ikinyabupfura ndetse n'ibyo ambwiye ndabikora, ku munsi ukurikiye nasubiye yo sinongeye gusiba na rimwe.

Kuva ubwo iyo nabonaga ibintu bitagenda neza murushako rwanjye nirukiraga muri Bibiliya ngashakamo inama zamfasha, igitabo cyamfashije cyane ni icy'IMIGANI, nasanzemo ubwenge bwinshi bwamfashije kugaruka ku murongo ndihana ntangira ubuzima bushya.

Mbere yaho nababwiye ko nabaga mu mwijima sinari nzi gusenga ariko igihe ninjiye mu rusengero nicishije bugufi, nakiriye imbaraga z'Imana zidasanzwe menya neza ko ndi umunyabyaha nemera guhinduka Yesu yinjira muri njye ubwo.

Buhoro buhoro urugo rwanjye rwagiye rubiha umugabo wanjye yaje guhinduka aba mubi noneho akajya ataha yasinze arwana noneho asigaye ajya no mu ndaya, kubona ibyo bitangira kugenda nanone binca intege rwose sinabashije kwakira iyo myitwarire mibi ntari menyereye.

Njye nawe twarabyumvikanye duhitamo gutandukana, gusa nari ntwite umwana wa 2 gusa ntakundi byagombaga kugenda.

Hariho umubyeyi umwana we yari inshuti n'umuhungu wanjye yaje kunsura amfasha gukora isuku mu nzu nyuma yaho turasenga numva avuze ururimi ntamenyetreye arambwira ngo Imana ivuganye nawe narasetse kuko siniyumvishaga ukuntu Imana yavugana n'umuntu gusa birashira yisubirira iwe ariko duhana gahunda yuko tuzajyana gusenga.

Naje kujya mu rusengero nanone nemera kwigira umubatizo, benedata sinababwira ibyambayeho umunsi nabatizwaga, nuzuye umwuka wera mvuga mu ndimi nshya Imana inyuzuza imbaraga zayo, koko navuye aho nabaye mushya bya nyabyo.

Natangiye kujya numva ijwi ry'Imana ku buzima bwanjye Imana impa ibyishimo ntari narigeze ngira numva ya marangamutima yahoraga atuzuye numva nduzuye bya nyabyo by'ukuli nabaye mushya sinkiri Glenis wa kera, ubu ndi icyaremwe gishya.

Umutima narwaraga warakize sinkihangayika, buri gihe mbona urukundo Imana inkunda kuruta ibindi bintu byose. Nkunda gusoma ijambo ry'Imana rimpanira gukiranuka ndetse nkunda no gufata umwanya nkaritekerezaho (meditation) umunsi kuwundi ngenda mbona icyo Imana inshakaho.

Mbatuye ijambo ry'Imana rivugango mubanze mushake ubwami bw'Imana no gukiranuka kwayo ibindi muzabyongererwa hanyuma.

Ndagusengeye uyu munsi ngo Imana iguhe umugisha kandi ndifuza ko ubu buhamya bwagutera imbaraga ukamenya ko Imana ishobora byose. Amen.”

[email protected]

Dore ibintu umunani byagufasha kubaho unezerewe

By Claire

Iyo witegereje imibereho abantu babayemo usanga nta numwe utifuza kubaho anezerewe yishimye afite umutekano wuzuye mbese yumva aguwe neza.

Imana yagize neza kwandikisha ijambo ryayo kugirango muri iki gihe natwe izadufashe, kuko ijambo ry'Imana niryo muyobozi wizewe udashobora kuyobya urisoma.

Uyu munsi rero twasuye igitabo cy'imigani dusanga harimo ibintu bitandukanye bishobora gufasha umuntu kubaho neza yishimye afite amahoro ndetse ayahesheje n'abandi. Harimo byinshi ariko twagukusanirije ibintu umunani by'ingenzi byagufasha kugira umunezero wuzuye aribyo ibi bikurikira:

1.Kugira neza
Abakwiriye kubona ibyiza ntukabibime, Niba bigushobokera. (Imigani 3:27)

2.Gushaka ubwenge
Ubwenge muri byose ni bwo ngenzi, Nuko rero shaka ubwenge, Ndetse ibyo utunze
byose ubishakishe ubuhanga. (Imigani4:7)

3.Kwirinda ubunebwe
Uti “Henga nsinzire gato, nihweture kanzinya, Kandi nipfunyapfunye nsinzire.” 11Nuko ubukene buzakugeraho nk'umwambuzi, N'ubutindi bugutere nk'ingabo. (Imigani 6:10-11)

4.Kugira ukuli
Kuko akanwa kanjye kaza kuvuga ukuri, Kandi gukiranirwa ari ikizira kuri jye. (Imigani 8:7)

5.Kubahiriza amategeko mu gihe ahari
Umunyabwenge mu mutima yemera amategeko, Ariko umupfu w'umunyamagambo azagwa. (Imigani 10:8)

6.Kwirinda amagambo
Ugenda ari inzimuzi amena ibanga, Nuko ntukiyuzuze n'ukunda kuvugagura. (Imigani 20:19)

7.Kugira ubuntu
Umunyabuntu azabyibuha, Kandi uvomera abandi na we azavomerwa.(Imigani11:25)

8.Kuba umugwaneza muri byose
Gusubizanya ineza guhosha uburakari, Ariko ijambo ribabaza ribyutsa umujinya.(Imigani 15:1)

Imana ibahe umugisha

[email protected]

  • January 23rd 2019 at 02:39
❌