WebRwanda.com

🔒
❌
There are new available articles, click to refresh the page.
Today — May 30th 2020Kigali Today

Nyabihu: Nyuma y'ibiza byibasiye agace ka Shyira ubuzima bwaragarutse #Rwanda #RwOT via @kigalitoday

By Editor

Uwo Murenge wa Shyira wo mu Karere ka Nyabihu, ni umwe mu yibasiwe cyane n'ibiza by'imvura, aho ibiraro byaridutse, ibiro by'umurenge birengerwa n'amazi y'imvura, ndetse n'inzu z'abaturage zirasenyuka kugeza ubwo bamwe mu baturage bahasiga ubuzima bitewe n'iyo mvura idasanzwe yaguye mu ijoro ryo ku itariki 6 Gicurasi 2020.

Abaturage ntibashoboraga kugana ibitaro bya Shyira n'ibigo nderabuzima mu buryo bworoshye, kugeza ubwo n'abaganga babuze uburyo bwo gusura ibigo nderabuzima kubera ko imihanda yari yangiritse.

Umurwayi wagezwaga mu bitaro ni uturiye ibitaro na bwo hagakoreshwa ingobyi za kinyarwanda, kugeza ubwo ubitaro biva ku barwayi 120 byakiraga buri munsi bigera ku barwayi batarenze 30.

Mu kiganiro kirambuye Kigali Today yagiranye na Dr. Zimaziki Théogène, Umuyobozi w'ibitaro bya Shyira ku murongo wa telefoni, yagize ati “Amazi yuzuye ahakikije ibitaro aho abaturage baturuka, ibiraro birariduka abaturage babura aho banyura ku buryo byagoye benshi, baba abarwayi, abarwaza, abaganga n'abakozi, kugera ku bitaro byari bigoye cyane”.

Ibitaro bya Shyira bikomeje gutanga serivisi z
Ibitaro bya Shyira bikomeje gutanga serivisi z'ubuvuzi nyuma y'uko inzira zisibuwe

Akomeza agira ati “N'amazi icyo gihe yarabuze mu bitaro, umuriro uragenda kuko amapoto yose yari yaguye kubera inkangu. Ibyo ntibyatinze byabaye mu minsi mike itarenze itatu amazi arongera araboneka, umuriro uraboneka, ndetse n'inkangu zari zaridukiye mu mihanda ijya mu bitaro zahise zivanwamo, ariko n'ubundi dusigarana ikibazo cy'uko nta kigo nderabuzima na kimwe twabashaga kugeraho, uretse Poste de santé imwe yegereye ibitaro ni yo twabashaga kugeraho”.

Dr. Zimaziki yavuze ko nta murwayi wigeze ugira ikibazo nyuma y'uko hitabajwe ingobyi za kinyarwanda mu kugeza abarwayi mu bitaro, gusa umubare w'abagana ibitaro ukomeza kugaragara ko ari muto kurusha uko byari bisanzwe.

Yagize ati “Mu by'ukuri ubona ko abagana ibitaro batangiye kugaruka nk'uko byari bisanzwe aho dutangiye kubona abarwayi bagera muri 80 ku munsi, mu gihe mu byumweru bibiri bishize twajyaga twakira abatarenze 30 kubera ibiza”.

Muri uwo murenge, inzira z'abanyamaguru zamaze kuba nyabagendwa, aho ibiraro birimo icya Nyamutera gikoreshwa n'abanyamaguru cyamaze kuzura, abanyamaguru kandi bashyirirwaho uburyo buboroheye bwo kwambuka ahahoze ikiraro cyo ku mugezi wa Giciye, mu gihe n'ikiraro cy'imodoka kiri mu nzira yo kuzura”.

Ku kiraro gihuza Akarere ka Nyabihu, Gakenke na Muhanga na cyo cyari cyararidutse ubu umirimo yo kugitunganya igeze kure nk'uko umuyobozi w'ibitaro akomeza abivuga.

Ibiraro byagiye byangizwa n
Ibiraro byagiye byangizwa n'ibiza by'iyo mvura

Ati “Ku kiraro cyari cyarasenyutse kiduhuza n'Akarere ka Gakenke na Muhanga uyu munsi cyangwa ejo imodoka zizaba zigenda kuko imirimo yo kucyubaka igeze ku musozo. Bamaze kugishyiraho bari kucyicazaho neza, ku buryo haba za Gakenke, Muhanga na Musanze umuntu ashobora kujyayo. Umuntu yavuga ko imirimo yo gutuma ibyangijwe n'ibiza bigaruka imeze neza”.

Uwo muyobozi w'ibitaro yashimiye Umukuru w'igihugu Paul Kagame wabasuye muri ibyo bihe bari mu bibazo by'ibiza, yemeza ko urwo ruzinduko ari kimwe mu byabahaye imbaraga.

Ati “Burya iyo umubyeyi yagusuye urishima cyane ukabona ko ibibazo biri gukemuka byose. Ibi byose nkubwira biri gukorwa, byagiye bikorwa n'ubuyobozi bwite bw'igihugu, kugeza ubu ibintu bimeze neza n'ibyo bisigaye bifite inyigo ku buryo bizakemuka vuba”.

Mu bindi bikorwa remezo byazahajwe n'ibiza, harimo n'ibiro by'Umurenge wa Shyira watewe n'umuvu w'amazi yinjiye mu biro bitangirwamo serivisi zinyuranye.

Umunyamabanga nshingwabikorwa w'Umurenge wa Shyira Bizimana Placide, yavuze ko iyo nyubako ubu yasukuwe ikaba ikomeje gutangirwamo serivisi nk'uko byari bisanzwe.

Abo ni ba Gitifu bo mu mirenge ihana imbibi n
Abo ni ba Gitifu bo mu mirenge ihana imbibi n'uwa Shyira aho bakomeje kungurana ibitekerezo mu gukemura ikibazo cy'ibiza byugarije ako gace

Yagize ati “Amazi yari yuzuye mu biro by'inyubako y'umurenge, dufatanyije n'abaturage tuhakorera umuganda turahasukura, igisigaye ni ukureba uburambe bw'inyubako ariko ubundi akazi karakomeje. Birumvikana hari inyandiko zangiritse kubera ayo mazi n'ubwo atari zose, urumva ibiza nk'ibyo ntibyabura icyo byangiza kuko amazi yinjiye mu nzu hose, inyinshi mu zangiritse ni izishaje, turacyashaka uburyo twazisimbuza”.

Gitifu yavuze ko abayobozi b'imirenge ikikije ako gace bamaze guhura aho bafashe ingamba zo kubungabunga ayo mazi y'imvura mu kongera ibiti no gucukura n'imirwanyasuri.

Isosiyete y'ubwubatsi yitwa Engineering Brigade ku bufatanye n'Ikigo cy'Igihugu cy'Ubwikorezi, ni byo bigo biri kwifashishwa mu gutunganya inzira n'ibiraro byagiye byangirika, aho Gitifu Bizimana avuga ko mu minsi ya vuba n'inzira z'imodoka zongera kuba nyabagendwa, ahari gukorwa ikiraro cya Kiruruma ku mugezi wa Mukungwa, ikiraro cyo ku mugezi wa Nyamutera, ikiraro cyasenyutse cy'imodoka cyo ku mugezi wa Giciye kiri mu nzira zo kuzura.

Kuba izo nzira zikorwa, ni kimwe mu bikomeje gushimisha abaturage basanzwe basaba serivisi zinyuranye nk'uko umwe muri bo yabitangarije Kigali Today.

Perezida Kagame yahise asura Nyabihu mu duce twari twugarijwe n
Perezida Kagame yahise asura Nyabihu mu duce twari twugarijwe n'ibiza

Ati “Ntako ubuyobozi butagize ngo budufashe mu biriya bihe. Twari tuzi ko tutazongera kubona inzira kuko ibiraro byari byaridutse imihanda yarengewe, ariko ubu turi kugera ku murenge, tukajya mu bitaro no mu bigo nderabuzima tukivuza. Dushimiye n'Umukuru w'Igihugu watuzirikanye aradusura, ubu turi amahoro”.

Gitifu Bizimana avuga ko kuba Umukuru w'Igihugu yarabasuye byatumye bakora cyane mu rwego rwo kumwereka ko ubuyobozi buri gukora ibishoboka, kugira ngo yumve ko ibibazo by'abaturage biri gukemuka.

Ati “Turashima Umuyobozi w'Igihugu wumvise uburemere bw'ikibazo akagera aho cyabereye, biraduha imbaraga zo kuba twakora ibishoboka kugira ngo na we nibura abone igisubizo cy'uko abaturage bari kubona inzira, ubuhahirane, inzira zibajyana kwivuza, mbese imbaraga zose turazikoresha dufatanyije n'izindi nzego”.

Ku itariki 16 Gicurasi 2020, ni bwo Perezida Paul Kagame yasuye ako gace k'Umurenge wa Shyira mu Karere ka Nyabihu nk'ahantu ibiza byibasiye, mu rwego rwo gushaka uburyo ibyangijwe n'ibiza byakongera kubakwa, hagamijwe gufasha abaturage kongera kugana amavuriro n'izindi serivisi bakenera.

Ni ibiza byahitanye abantu 72 mu turere tunyuranye tugize Intara y'Amajyaruguru, Uburengerazuba n'Amajyepfo.


Abakinnyi ba Paris Saint-Germain bifatanyije n'Abanyarwanda mu kwibuka Jenoside yakorewe Abatutsi #Rwanda #RwOT via @kigalitoday

By Editor

Ni ubutumwa bwatanzwe mu gihe kuva tariki ya 7 Mata 2020, Abanyarwanda n'inshuti z'u Rwanda bari mu minsi 100 yo kwibuka Jenoside yakorewe Abatutsi, igahitana abarenga miliyoni.

Ubwo butumwa bwatanzwe mu majwi n'amashusho areshya n'amasegonda 40. Butangirwa n'amagambo y'ikinyarwanda agira ati “Twibuke twiyubaka”, avugwa na Kylian Mbappé, akakirwa n'Umunyasenegal Idrissa Gana Gueye, n'abandi bakinnyi bagakomeza, bugasozwa n'ubundi n'amagambo agira ati “Twibuke twiyuba”.

Ubwo butumwa bwabo bugira buti “Twibuke Twiyubaka. Rwanda, abakinnyi ba Paris Saint-Germain bagufitiye ubutumwa. Twifatanyije nawe mu kwibuka Jenoside yakorewe Abatutsi. Mu myaka 26 ishize, wagaragaje ubumwe, kwihangana n'impinduka z'intangarugero Isi yose ishobora kukwigiraho. No muri ibi bihe bikomeye, turi kumwe nawe dukomeza gushyigikira intambwe u Rwanda rukomeje gutera. Si twe tuzarota dusura u Rwanda mu gihe cya vuba. Twibuke twiyubaka”.

U Rwanda rwagiranye amasezerano y'ubufatanye bw'imyaka itatu na paris Saint-Germain, kuva mu kwezi k'Ukuboza 2019.

Remember, Unite, Renew. Paris Saint-Germain is standing with Rwanda 🇷🇼 to remember the Genocide against the Tutsi. #Kwibuka26 #Rwanda pic.twitter.com/mx2juqxPp0

— Paris Saint-Germain (@PSG_inside) May 29, 2020


The Ben azaririmba mu gitaramo azahuriramo n'abahanzi 16 barimo Davido #Rwanda #RwOT via @kigalitoday

By Editor

Ikigo cy'Abanyafurika y'Epfo cyitwa MultiChoice Africa gicuruza amashusho ku ikoranabuhanga ni cyo cyateguye iki gitaramo hagamijwe gukusanya inkunga izafasha imiryango yagizweho ingaruka n'icyorezo cya Covid-19, ariko bafatanya na Africa Music Fest na One Africa Global Foundation.

Ni igitaramo cyahurijwemo abahanzi 16 b'ibyamamare bo muri Afurika bafite amazina azwi kurusha abandi, mu Rwanda The Ben akaba ari we watoranyijwe kuririmba muri iki gitaramo.

Mu kiganiro yagiranye na KT Press, The Ben yagize ati “Ni igihe cya Afurika cyo gufatanya Abanyafurika bagashaka ibisubizo by'abavandimwe babo. Nanjye rero nishimiye guhagararira igihugu cyanjye u Rwanda.”

Umuhanzi Davido wo muri Nigeria aha yari mu gitaramo yakoreye i Kigali muri Werurwe 2020
Umuhanzi Davido wo muri Nigeria aha yari mu gitaramo yakoreye i Kigali muri Werurwe 2020

The Ben yavuze ko yiteguye gukora igitaramo hamwe n'abacuranzi be ndetse n'ikipe imufasha, akavuga ko azatanga icyo afite cyose mu muziki ngo ashimishe abazakurikira iki gitaramo.

Igitaramo The Ben aririmbamo kuri iki cyumweru, kiratangira saa moya z'umugoroba kirangire saa yine kinyujijwe ku mirongo ya Murandasi y'ikigo MultiChoice Africa buri muhanzi akaba azaririmbira mu rugo iwe, kubera gahunda yo kuguma mu rugo.

Aba ni bo bahanzi bazaririmba hamwe na The Ben muri iki gitaramo
Aba ni bo bahanzi bazaririmba hamwe na The Ben muri iki gitaramo

Umumotari ufite mubazi ni we uzemererwa gusubukura akazi mu Mujyi wa Kigali - RURA #Rwanda #RwOT via @kigalitoday

By Editor
Gucomokora Mubazi bishobora gutuma umumotari ahagarikirwa gukora ako kazi
Gucomokora Mubazi bishobora gutuma umumotari ahagarikirwa gukora ako kazi

Iyo mubazi ihagaze agaciro k'amafaranga y'u Rwanda ibihumbi 250 iri gutangirwa ubuntu ku bamotari bo mu Mujyi wa Kigali, hakaba hateragnyijwe ko nibura mubazi ibihumbi 10 zizaba zamaze guhabwa abamotari kugeza ku wa mbere tariki ya 01 Kamena 2020.

Mubazi kuri moto igiye gutangira gukoreshwa ku buryo umumotari azajya yishyuza abagenzi abanje kwerekwa uburebure bw'urugendo akoze, ibyo bikiyongeraho kwishyura hifashishijwe ikoranabuhanga kugira ngo umumotari abashe kwishyura 10% by'amafaranga yishyuwe kuri mubazi.

Igiciro cy'urugendo kikaba ari amafaranga 300frw kuri kilometero ebyiri za mbere ni ukuvuga, ayo akiyongera bitewe n'urugendo rurengaho.

Umuyobozi ushinzwe gutwara abantu n'ibintu muri RURA Anthony Kulamba, avuga ko ikoranabuhanga rya mubazi kuri moto rifite inyungu nyinshi kuko rizajya rifasha umumotari kumenya urugendo akora agamije inyungu kandi rikamufasha kugenzura uko moto imwinjiriza.

Avuga ko umumotari agomba gukoresha iyo mubazi kugira ngo bigabanye umwanya yajyaga amara yumvikana n'umugenzi ku mafaranga y'urugendo kuko ubu igiciro cy'urugendo cyamaze gutangazwa.

Icyakora Kulamba avuga ko mubazi zihari zidahagije bityo ko abamotari bo mu Mujyi wa Kigali ari bo batangira kuzihabwa abakorera mu ntara bo bazakomeza kuzitegereza ariko na bo zizabageraho.

Agira ati “Mubazi zirahari kandi zirimo gutangwa mu Mujyi wa Kigali, abamotari bo mu Mujyi wa Kigali bagomba gutangira bazifite, abo mu ntara bo hari izatumijwe ziri hafi yo kwinjira mu gihugu na bo zizabageraho”.

Mu gihe mubazi zitarageza igihe cyo kuba zakwishyurirwaho hakoreshejwe uburyo bw'amakarita, Kulamba asaba abagenzi n'abamotari kwirinda kwishyurana bahererekanya amafaranga kuko bishobora kongera ibyago byo gukwirakwiza Coronavirus.

Umuyobozi w'ihuriro ry'amakoperative y'abatwara abangenzi kuri moto Daniel Ngarambe, avuga ko abamotari biteguye gukurikiza amabwiriza yose kugira ngo uburyo bushya bwo gukoresha mubazi no kwirinda Coronavirus burusheho kubaha umusaruro.

Kutatsa mubazi igihe cy'urugendo bizashyira umumotari mu bihano

Urwego ngenzuramikorere (RURA) rugaragaza ko abamotari bazitwaza ko bagiye mu bindi bintu nko gutwara abagore babo n'abana kuri moto ntibatse mubazi, bazafatirwa imyanzuro irimo no kuba bahagarikirwa gukora akazi ko gutwara abagenzi kuri moto.

Mubazi izajya ifasha umugenzi kumenya icyerecyezo ajyamo n
Mubazi izajya ifasha umugenzi kumenya icyerecyezo ajyamo n'umubare w'amafaranga yishyura

Agira ati “Tuzajya duhana abazajya badashyiraho mubazi zabo bitwaje ko bagiye mu bukwe n'ibindi kuko bakwiye no kumenya gukoresha mubazi bakibarira izo ngendo bakoze bakareba ibyo bashoyemo kuko tuzajya tubagenzura tubereke igihe bakoresheje mubazi n'igihe batazikoresheje utabyubahirije tube twamufatita ibihano birimo no kubahagarikira akazi”.

Ngarambe avuga ko hazajya habaho kugenzura uburyo gukoresha mubazi byitabwaho kuko ari bwo buryo bwemerewe gukoreshwa mu kwishyuza umugenzi uzafatwa yarenze ku mategeko azahanwa.

Agira ati “Abamotari bitonde kuko nanjye nshobora kuza nkagutega ngira ngo ndebe uko ukurikiza amabwiriza. None se bazabwirwa n'iki uwo batwaye! Kudashyiraho mubazi bivuze gushaka kwishyurana mu ntonki kandi ari byo turi kwanga”.

Mu bice by'icyaro abaturage bagaragaza ko bashobora kutoroherwa no kwishyura hakoreshejwe mobile money na Airtel Money kimwe no mu mujyi, aho bigaragara ko kwishyura muri ubwo buryo bifite umubare ntarengwa, ibyo RURA ikaba igiye kubiganiraho na kompanyi z'itumanaho kugira ngo zizorohereze abaturage.


Hari abagira impungenge zo kugenda mu ndege itwawe n'umugore – Lieutenant Mwiza #Rwanda #RwOT via @kigalitoday

By Editor

Muri 2017, Lt. Mwiza yoherejwe muri Sudani y'Epfo mu butumwa bw'amahoro bw'Umuryango w'Abibumbye (UNMISS) aho yafatanyaga na mugenzi we gutwara kajugujugu zifashishwaga muri ubwo butumwa.

Lieutenant Ariane Mwiza w'imyaka 25 y'amavuko ubu ari mu butumwa nk'ubwo, akaba amaze koherezwamo inshuro eshatu, kandi avuga ko yumva nta mpungenge afite zo gukora ako kazi.

Muri iki gihe abagore boherezwa mu butumwa bwo kugarura no kubungabunga amahoro hirya no hino ku isi. Bakora akazi katoroshye aho bamwe bakora akazi ko gutwara indege, abandi bakajya ku rugamba rwo kugarura umutekano ku butaka, abandi bagakora mu buvuzi, hakaba n'abakora akazi k'Abapolisi.

Ubushakashatsi bugaragaza ko iyo abagore bahawe umwanya mu butumwa bw'amahoro, umusaruro ugerwaho mu gihe gito kuko bagira ubumenyi bwihariye mu kumvikanisha abahanganye kandi bakagira n'impano mu kumva neza ikibazo kiba cyavutse.

Nyamara imibare y'Umuryango w'Abibumbye igaragaza ko umubare w'abagore mu butumwa nk'ubwo ukiri muto. Iyo mibare igaragaza ko mu bantu ibihumbi 98 bari ahantu 13 hatandukanye ku isi mu butumwa bw'amahoro, abagore bangana na 6%.

U Rwanda rwifatanyije n'Isi kwizihiza Umunsi Mpuzamahanga wahariwe kuzirikana abagore bari mu butumwa bw'Umuryango w'Abibumbye.

Kuri uyu munsi, Ikinyamakuru KT Press cyegereye Lieutenant Ariane Mwiza umaze igihe muri ubwo butumwa, asobanura byinshi byerekeranye n'akamaro k'umugore cyangwa umukobwa mu kugarura amahoro no kumvikanisha impande ziba zihanganye. Yanagarutse ku kamaro yasanzemo katuma abandi bakobwa n'abagore bashishikarira kujya muri ibyo bikorwa byerekeranye n'umutekano.

Lieutenant Ariane Mwiza w'imyaka 25 y'amavuko, yize amashuri yisumbuye muri Lycée Notre Dame de Citeaux. Avuga ko ubu arimo kwiga ibyerekeranye n'imibanire y'Ibihugu (International Relations) muri Kaminuza.

Yize ibijyanye no gutwara indege mu ishuri rya Akagera Aviation riherereye mu Rwanda, akaba yarabyize kuva mu mwaka wa 2014 kugeza muri 2016. Mu mwaka wakurikiyeho yahise atangira kujya mu butumwa bw'amahoro.

Ubwo yajyaga muri ubwo butumwa ku nshuro ya mbere, avuga ko kuri we yabonaga ari ibintu bidasanzwe kandi biteye amatsiko, kuko aribwo bwa mbere yari yoherejwe mu kazi nk'ako hanze y'igihugu.

Ati “Biba bishimishije kwisanga ukorana n'abantu bo mu bihugu bitandukanye. Umenya imico y'ahantu hatandukanye, ukagera no mu bindi nihugu biba bishyushye cyane cyangwa bikonje cyane ugereranyije n'igihugu cyawe cy'amavuko. Imbogamizi zibamo ni uko wisanga ukora akazi kiganjemo abagabo benshi, ku buryo bamwe ndetse batekereza ko ari akazi gakorwa n'abagabo gusa, kuko usanga abagore bakora ako kazi ari bake cyane.”

“Ntiwapfa kumva ijwi ry'umugore uvugira ku maradio abari mu butumwa bakoresha bavugana, ndetse usanga hari abagira impungenge zo kugenda mu ndege itwawe n'umugore. Icyakora izo mpungenge zigenda zishira, kuko hari abo usanga bishimye iyo babonye ko bagiye gutwarwa n'umugore.”

Ku kibazo cy'umubare muto w'abagore bari mu butumwa bwo kugarura amahoro, Lieutenant Mwiza asanga uwo mubare ukwiye kuzamurwa, hagashyirwaho gahunda zikundisha abagore n'abakobwa kujya mu gisirikare no mu gipolisi, ndetse bamwe bakoherezwa muri ubwo butumwa mu rwego rw'amahugurwa, kwiyungura ubumenyi no kwimenyereza.

Mwiza avuga kandi ko abagore bari muri ubwo butumwa bunguka ubumenyi bwo gukemura amakimbirane haba mu bihugu by'amahanga ndetse no mu bihugu byabo bakomokamo, ndetse bikanabafasha no kubera abandi icyitegererezo, bakamenya no kwikorera ubuvugizi bakabukorera n'abandi bagore, cyane cyane baharanira uburenganzira bwabo, dore ko usanga abagore hirya no hino ku isi bagikandamizwa.

Ku kibazo cy'umubare muto w'abagore bari mu butumwa bwo kugarura amahoro, Lieutenant Mwiza asanga uwo mubare ukwiye kuzamurwa, hagashyirwaho gahunda zikundisha abagore n'abakobwa kujya mu gisirikare no mu gipolisi, ndetse bamwe bakoherezwa muri ubwo butumwa mu rwego rw'amahugurwa, kwiyungura ubumenyi no kwimenyereza.

Mwiza avuga kandi ko abagore bari muri ubwo butumwa bunguka ubumenyi bwo gukemura amakimbirane haba mu bihugu by'amahanga ndetse no mu bihugu byabo bakomokamo, ndetse bikanabafasha no kubera abandi icyitegererezo, bakamenya no kwikorera ubuvugizi bakabukorera n'abandi bagore, cyane cyane baharanira uburenganzira bwabo, dore ko usanga abagore hirya no hino ku isi bagikandamizwa.

Abajijwe agaciro yumva guhagararira igihugu cye mu butumwa bw'amahoro mu mahanga bivuze kuri we, Lt mwiza yasubije ko guhagararira igihugu cye mu mahanga ari ishema kuri we.

Ati “Kuko icyo nkoze cyose ngikora mu izina ry'Igihugu cyanjye, nitwaje ibendera ry'Igihugu. Iyo ntekereje ko mpagarariye igihugu bintera umwete wo kuzuza inshingano zanjye uko bikwiye.”

Lieutenant Mwiza yasoje ikiganiro yagiranye na KT Press ashishikariza abandi bakobwa n'abagore gukunda akazi kerekeranye n'umutekano, ati “Kuko niba narabishoboye, n'abandi babishobora.”


Munyakazi Sadate byemejwe ko ahagarariye Rayon Sports mu mategeko #Rwanda #RwOT via @kigalitoday

By Sports

Hari hashize iminsi mu ikipe ya Rayon Sports havugwa ibibazo bijyanye n'imiyoborere y'iyi kipe, byatumye haniyambazwa Urwego rw'Igihugu rw'Imiyoborere RGB.

Amakuru yizewe agera kuri Kigali Today aremeza ko nyuma yo gusuzuma ibijyanye n'iki kibazo, RGB yemeje ko Munyakazi Sadate ari we wemewe nk'umuyobozi wemewe n'amategeko wa Rayon Sports.

Mu gushaka kumenya neza aya makuru, twavuganye n'ushinzwe kumenyekanisha amakuru muri RGB Fréderick Ntawukuriryayo, atumemyenyesha ko Munyakazi Sadate yemerewe guhagararira Rayon Sports mu mategeko.

Ntawukuriryayo yagize ati "Nyuma yo gusuzuma ibibazo biri muri Rayon Sports, twasanze Munyakazi Sadate ari we uhagarariye Rayon Sports mu mategeko, abandi mu mategeko ntibemewe."


  • May 29th 2020 at 20:47

Nyaruguru: Abarokotse Jenoside bakiriye bate igihano cyahawe Ladislas Ntaganzwa? #Rwanda #RwOT via @kigalitoday

By Editor
Ladislas Ntaganzwa yakatiwe gufungwa burundu
Ladislas Ntaganzwa yakatiwe gufungwa burundu

Perezida wa Ibuka mu Karere ka Nyaruguru, Bertin Muhizi, agira ati “Turabanza gushima ubutabera bw'u Rwanda kubera ko uriya mugabo yagize uruhare mu kwica Abatutsi babarirwa mu bihumbi 30 bari bahungiye muri kiliziya ya Cyahinda. Yahamwe n'ibyaha, arakatirwa. Ni ikigaragaza ko ubutabera bw'u Rwanda bwaduhaye ubutabera nyabwo.”

Michel Nsengiyumva, Perezida wa Ibuka mu Murenge wa Cyahinda (hamwe mu hari hagize Komini Nyakizu), avuga ko no gufatwa ngo aburanishwe na byo byabashimishije.

Ati “Twabanje kwishima agifatwa kuko yari amaze igihe kirekire ashakishwa kandi ari mu bari ku isonga mu kwica Abatutsi i Nyakizu. Kuba noneho yanakatiwe byadushimishije kurusha.”

Ku rundi ruhande ariko, ngo kuba atarakatiwe burundu y'umwihariko nk'uko byari byagenze muri Gacaca, ngo bituma yumva igihano yahawe kidahagije.

Ati “Mu gihe cya Gacaca yari yakatiwe burundu y'umwihariko n'Inkiko Gacaca z'imirenge ine yose. Keretse niba igihano cya burundu y'umwihariko cyaravanyweho, ariko cyari cyahuriweho n'inkiko enye kubera uburemere bw'ibyaha yakoze.”

Nsengiyumva anavuga ko atemeranya no kuba Ntaganzwa yarahanaguweho icyaha cyo gushishikariza abantu gukora Jenoside, kuko ngo ari we wategetse ko Abatutsi babarirwa mu bihumbi 30 bari bahungiye mu kiliziya i Cyahinda bicwa.

Bernard Kabahuza wari wahungiye i Cyahinda akaza kurokoka, na we avuga ko Ntaganzwa ari we watanze itegeko ryo kwica abari bahungiye i Cyahinda, kandi ngo ni na we wazanye abajandarume babimburiye abicanyi, babarasa.

Ati “Icyo gihe nari mfite imyaka 11, ariko ibyabaye ndabyibuka. Icyo gihe hari abari baturutse muri komine Mubuga, afata megaphone arabahamagaza ngo nibatahe, kandi ngo nibamara iminota itanu bataragenda baramubona. Iminota itanu ntiyashize, bahise batangira kurasa.”

Ladislas Ntaganzwa yari Burugumesitiri wa Komine Nyakizu mu gihe cya Jenoside yakorewe Abatutsi mu mwaka wa 1994.

Ashyikirizwa ubutabera yaregwaga ibyaha bitanu birimo icya Jenoside, icyo gushishikariza abantu gukora Jenoside, icyo kurimbura imbaga, icyo kwica nk'icyaha cyibasiye inyoko muntu, n'icyaha cyo gukoresha imibonano mpuzabitsina ku gahato nk'icyaha cyibasiye inyoko muntu.

Urugereko rw'urukiko rukuru ruburanisha ibyaha mpuzamahanga n'ibyaha byambukiranya imipaka rw'i Nyanza, kuwa kane tariki ya 28 Gicurasi 2020 rwamuhamije ibi byaha byose, ariko rumuhanagurahpo icyo gushishikariza abantu gukora Jenoside.

Nubwo abarokotse Jenoside b'ahahoze ari muri Komini Nyakizu bavuga ko igihano cya burundu y'umwihariko ari cyo cyari kimukwiye ku bw'uburemere bw'ibyaha yakoze, icyo gihano cyakuwe mu bihano byemewe mu Rwanda, mu itegeko ryasohotse mu mwaka wa 2018.


COVID-19 nta muntu irica mu Rwanda - MINISANTE #Rwanda #RwOT via @kigalitoday

By Editor
Minisitiri w
Minisitiri w'Ubuzima Dr Daniel Ngamije

Abo bantu batandatu babonetse mu bipimo 1,340 byafashwe uyu munsi, ibipimo byose hamwe bimaze gufatwa bikaba ari 65,608 ari na byo byabonetsemo abarwayi 355.

Itangazo rya Minisiteri y'Ubuzima riravuga ko abantu babiri mu bari barwaye COVID-19 bakize kuri uyu wa Gatanu, abamaze gukira bose hamwe baba 247.

Abakirwaye COVID-19 mu Rwanda ni 108, kugeza kuri uyu wa Gatanu icyo cyorezo kikaba nta muntu kirahitana mu Rwanda.


Burundi: Ibyavuye mu matora bikomeje kutavugwaho rumwe #Rwanda #RwOT via @kigalitoday

By Editor
Nahimana Dieudonné (Ifoto: Indundi)
Nahimana Dieudonné (Ifoto: Indundi)

Yabivugiye mu kiganiro yagiranye n'abanyamakuru kuri uyu wa Gatanu tariki 29 Gicurasi 2020. Dieudonné Nahimana yabonye amajwi ari munsi ya 1%, ariko kandi avuga ko n'ubwo hari ibitaragenze neza muri aya matora, abona ko adafite byinshi byatuma agana urukiko rushinzwe kurinda itegeko nshinga mu Burundi. Imwe mu nenge yavuzeho, hari nko kuba hari aho abatora bategekwaga gutora umuntu runaka ku gahato.

Akomeza asaba abatangajwe na Komisiyo y'Amatora mu Burundi (CENI) ko batsinze amatora cyangwa ko batsinzwe, ko bakwiye kwemera ko ikintu cy'ingenzi ku gihugu ari umutekano hagati y'Abarundi, bityo ko nta muntu ukwiye gupfa cyangwa ngo agirirwe nabi azira ibitekerezo bye cyangwa uwo ari we.

Evariste Ndayishimiye wo mu ishyaka CNDD-FDD ni we watangajwe na komisiyo y'amatora (CENI) ko yegukanye intsinzi n'amajwi 68%, akurikirwa na Agathon Rwasa wo mu ishyaka CNL ritavuga rumwe n'ubutegetsi wagize amajwi 22%.

Ishyaka CNL na ryo ryatangaje ko muri ayo matora hagaragayemo ibitaragenze neza byinshi, rikaba ryemeza ko ari ryo ryatsinze amatora n'amajwi arenga 58%.

Ku wa kane w'iki cyumweru Agathon Rwasa yagejeje ikirego cye mu rukiko rushinzwe kurinda itegeko nshinga, mu gihe risabwa kuba ryatangaje ibyavuye mu matora mu buryo ntakuka ku itariki ya 04 Kamena 2020.


Facebook yitandukanyije na Twitter mu kugenzura ibitekerezo by'abakoresha izo mbuga #Rwanda #RwOT via @kigalitoday

By Editor
Facebook na Twitter ntibivuga rumwe ku ngingo yo kugenzura ibitekerezo binyuzwa kuri izo mbuga nkoranyambaga
Facebook na Twitter ntibivuga rumwe ku ngingo yo kugenzura ibitekerezo binyuzwa kuri izo mbuga nkoranyambaga

Trump avuga ko ibi ari ukuziha uburenganzira burenze mu kugenzura ibitekerezo by'abazikoresha. Mu gushimangira impamvu y'iri teka, yatanze urugero agira ati: “Ibaze ukoresha umuyoboro runaka uhamagara umuntu, ba nyiri uwo muyoboro bagahindura ibyo uvuga, uwo ubwira akumva ibyo bashaka ko uvuga wowe utabivuze”. Yavuze kandi ko agiye gusaba ibigo bikomeye muri Amerika kugabanya amafaranga biha imbuga nkoranyambaga.

Mark Zuckerberg washinze akaba ari na we muyobozi mukuru wa Facebook, yatangaje ko yitandukanyije na Twitter, ndetse ko ibyo Twitter yakoze Facebook idashobora kubikora.

Mu kiganiro yagiranye n'igitangazamakuru Fox News, yagize ati: “Nizeye nkomeje cyane ko Facebook idashobora kuba umusifuzi w'ibyo abantu bavuga ku mbuga nkoranyamabaga. Ntitwivanga mu bitekerezo byaba ibya politiki n'ubuzima bw'abantu. Icyo tutakwemerera gusa, ni ibitekerezo bifite aho bihuriye n'iterabwoba cyangwa ibyahungabanya umutekano mu gihugu.”

Trump yanditse kuri urwo rubuga rwa Twitter avuga ko gutora hakoreshejwe uburyo bw'ikoranabuhanga, hoherezwa impapuro z'itora ku iposita kugira ngo abaturage bari hirya no hino batore, bishobora gutuma amatora ataba mu mucyo, kuko byateza ubujura mu matora. Munsi y'iyi nyandiko ya Trump, Twitter yahise isubiza ko ubu butumwa bwa Trump ababusoma bakwiye kubwitondera kuko ari amakuru adafitiye gihamya.

Perezida Trump, ukurikirwa n'abasaga miliyoni 80 kuri Twitter, yavuze ko Twitter nidahindura imikorere, azafunga urukuta rwe.


  • May 29th 2020 at 17:03

Cyuve: Abantu batahise bamenyekana batemye amasaka y'umuturage #Rwanda #RwOT via @kigalitoday

By Editor
Aya ni amasaka yatemwe
Aya ni amasaka yatemwe

Sebikari Emmanuel, umuturage watemewe amasaka, yavuze ko yari agiye kwahira ubwatsi bw'amatungo ahagana saa yine z'amanywa, ageze mu murima we asanga amasaka bayatemaguye agwa mu kantu.

Ati “Nageze mu murima ejo mu ma saa yine n'igice, nsanga umurima wose batemye bayararitse. Igitangaje ni uko murima wanjye ukikijwe n'indi mirima ihinzemo amasaka, batema ayanjye gusa. Ni umurima munini nari ntegerejemo umusaruro w'amafaranga asaga ibihumbi ijana”.

Sebikari yatangarije Kigali Today ko hari abo akekaho kubigiramo uruhare, barimo abo bafitanye isano aho bamaze iminsi bamubwira amagambo mabi akamutera impungenge ku mutekano we.

Ati “Ndabazi tumaze iminsi dufitanye ibibazo, abaturage bambwiye ko hari uwahoze yigamba avuga ko yishimiye ko amasaka yanjye yatemwe, ngo ndi kuzira ibyaha byanjye, amaze iminsi ampiga ngo natumye umugore we agenda nyuma y'uko namukizaga ubwo bari mu makimbirane. Hari n'uwo mperutse gusanga afite umuhoro yiruka kuri murumuna we ashaka kumutema, ndamufata kuva icyo gihe agenda yigamba avuga ko ngo nzamubona”.

Nyirahabizanye Agnes uyobora umudugudu wa Mugarama wabereyemo ibyo, yavuze ko mu ma saa tanu yahamagawe na Sebikari amubwira ko amasaka ye bayatemaguye.

Avuga ko ubwo yahageraga atabaye, yasanze umurima wose w'amasaka bawutemye ati “Akigera mu murima we agasanga amasaka ye bayatemye yahise antabaza, ngezeyo nsanga koko amasaka ye bayatemye umurima wose bawararitse. Ni umurima uri hagati y'indi na yo ihinzemo amasaka, ariko barebye aye aba ari yo batema ibyo bikaba biteye urujijo”.

Uwo muyobozi w'Umudugudu yavuze ko akimara kubona ibyo bibazo yahise atanga raporo ku nzego zimukuriye, hakaba hagishakishwa ababa bihishe inyuma y'icyo cyaha ngo babihanirwe.

Cyuve ni Umurenge ukomeje kuvugwamo ibikorwa bibi binyuranye, kugeza ubu uwahoze ayobora uwo murenge akaba ari muri gereza akekwaho gukubita no gukomeretsa ku bushake aho afunganywe n'umuyobozi w'akagari na ba Dasso babiri.


Abasirikare baregwa gufata abagore ku ngufu, bamwe bafunzwe iminsi 30 y'agateganyo abandi bararekurwa #Rwanda #RwOT via @kigalitoday

By Editor

Bose uko ari batanu bahanaguweho ibyaha byo guta izamu no kwinjira mu nzu z'abaturage nta burenganzira, nyuma yo kubura ibimenyetso bifatika byatuma bakomeza kubikurikiranwaho.

Aba basirikare b'ipeti rya Private(Pte) bari bahawe igifungo cy'agateganyo cy'iminsi 30 ku itariki 13 Gicurasi 2020, bahita bajurira.

Amazina yabo ni Pte Ndayishimiye Patrick, Pte Nishimwe Fidele, Pte Gatete François, Pte Gahirwa John na Pte Twagirimana Theoneste, ndetse n'umusivili witwa Ntakaziraho Donat wari umunyerondo, ariko ntabwo we yigeze ajurira.

Nyuma yo kumva kwiregura kw'abo basirikare bose(hari ku wa Gatanu tariki 22 Gicurasi 2020), Urukiko rwategetse ko Pte Patrick Ndayishimiye hamwe na Pte Nishimwe Fidèle bafungwa by'agateganyo, ku bw'impamvu ruvuga ko zikomeye zituma ibyaha bibahama.

Urukiko rusanga Pte John Gahirwa, Pte François Gatete na Pte Theoneste Twagirimana nta mpamvu ifatika yatuma bakomeza gukurikiranwaho guhishira ibyaha bya Pte Ndayishimiye Patrick na Pte Nishimwe Fidèle.

Pte Ndayishimiye Patrick yari yireguye avuga ko uwamureze ko yamusambanyije ku gahato ngo bari basanzwe baziranye, ndetse ko baryamanye mbere yaho mu kwezi kwa mbere kwa 2020.

Yavuze ko umugore umushinja kumufata ku ngufu muri Werurwe 2020 ari ibinyoma yahimbye agamije kumwihimuraho, kuko ngo Pte Ndayishimiye yari yaramwanze ashingiye ku myitwarire mibi yamubonyeho.

Pte Ndayishimiye yavuze ko iyo aza gusambanya uwo muntu ku gahato ngo atari kubura gutabaza, kandi ko imyenda bivugwa ko yari yambaye itandukanye n'iyo abasirikare bambara boherejwe gucunga umutekano mu baturage.

Pte Ndayishimiye yakomeje yiregura avuga ko uwamureze yavuze ko yasambanyijwe na Ndayishimiye Patrick ufite inyinya, w'igikara kandi mugufi biringaniye, nyamara Urukiko rukaba rwasanze uregwa nta nyinya afite kandi atari igikara.

Urukiko ariko rwasanze uwo bari kumwe Pte Nishimwe Fidèle ari we ufite inyinya kandi na we aregwa gukoresha umuntu imibonano mpuzabitsina ku gahato, n'ubwo yireguye avuga ko itariki bivugwa ko yakoze icyo cyaha ngo atari yagiye mu kazi, yewe ngo nta n'imibonano mpuzabitsina yakoze.

Ku cyaha cyo gukubita no gukomeretsa Pte Ndayishimiye Patrick avuga ko aregwa n'uwitwa Shema, ngo ntacyo yakoze ahubwo uwo Shema yakubiswe n'abandi bantu.

Shema avuga ko yakubiswe na Pte Ndayishimiye Patrick ku itariki ya 24 Werurwe 2020, mu gihe umutangabuhamya we avuga ko yakubiswe tariki ya 12 Werurwe 2020.

Pte Ndayishimiye avuga ko igihe kivugwa ko yakubise Shema ngo atari yagiye mu kazi, ndetse ko muri raporo y'umutekano ikorwa buri munsi, nta na hamwe higeze havugwa ko hari abasirikare bamereye nabi abaturage.

Ubushinjacyaha buvuga ko abatanze ikirego bashinja Pte Ndayishimiye Patrick kubakubita buri gihe uko aje ku kazi mu mudugudu wa Kangondo II muri Nyarutarama.

Pte Ndayishimiye Patrick yari yireguye ku cyaha cy'ubujura avuga ko abamurega ntabo azi kandi ibyo ntabyabaye, mu gihe ubushinjacyaha bwo buvuga ko yabyemeye mu gihe hakorwaga inyandikomvugo.

Umwunganizi mu mategeko w'aba basirikare, Me Moses Sebudandi yari yabwiye urukiko ko ubushinjacyaha nta bimenyetso bihagije bufite, kuko ngo ibyo buvuga byose bishingiye ku magambo adafite ibindi biyashyigikira.


Abanyarwanda bari barabuze uko bava muri UAE kubera COVID-19 bageze mu Rwanda #Rwanda #RwOT via @kigalitoday

By Editor

Ku isaha ya saa saba n'iminota 15 z'amanywa nibwo Abo bantu baje mu ndege yo muri Leta zunze Ubumwe z'Abarabu bari bageze ku kibuga cy'indege cya Kanombe babanza gupimwa icyorezo cya COVID-19 bajyanwa mu nyubako bagomba kubanza kumaramo iminsi mbere y'uko basubira mu miryango yabo.

Bose ku maso bari bakeye bishimye ko bongeye kugera mu gihugu cyabo nyuma y'ibihe babyifuza ariko ntibibakundire.

Kigali Today iganira na Niyonkuru Deo umunyeshuri wari uhagarariye abandi banyarwanda biga muri UAE yatangaje ko bafite ibyishimo nyuma y'igihe kinini cyari gishize bifuza kugaruka mu Rwanda nyuma y'uko icyorezo cya COVID-19 gihagaritse imirimo n'ingendo abanyarwanda bari mu bihugu by'Abarabu bakabura imirimo.

Agira ati “Icyo nakubwira ni ibyishimo kuko Abanyarwanda bari hariya batakaje akazi, ibyo kurya byari bibagoye ni ibyishimo kuri twese twashoboye kuza dufite akanyamuneza.”

Niyonkuru avuga ko ari bo biguriye urupapuro rw'urugendo ku giciro kiri hejuru kubera ko babonaga nta yandi mahitamo.

Ati “Itike y'indege nitwe twayiyishyuriye, Ambasade yakoze ibiganiro mu buyobozi bwa hariya kugira ngo batwemerere indege, naho kuza turi bakeya ni uko abandi bafite ibindi bibahugije, abari bafite ibibazo bakaba bahisemo gutaha.”

Akomeza avuga ko itike y'indege bayishyuye amafaranga akoreshwa mu bihugu by'abarabu 1550 kuza gusa (abarirwa mu bihumbi 391 by'u Rwanda) mu gihe basanzwe bishyura amafaranga yo muri icyo gihugu 1300 kuza mu Rwanda no gusubirayo (ni ukuvuga abarirwa mu bihumbi 328 mu mafaranga y'u Rwanda).

Kigali Today yaherukaga gukora inkuru ivuga uburyo Abanyarwanda bari mu bihugu by'Abarabu barimo gufashwa na Ambasade ngo batahe mu Rwanda

Iki gihe hari hatanganjwe ko itariki yo gutaha ari tariki 16 Gicurasi 2020 ariko byagiye byimuka kugera kuri iyi tariki 29 Gicurasi. Niyonkuru avuga ko byatewe n'uko umubare indege yashakaga wari utaruzura.

Agira ati; “Impamvu amatariki yahindaguritse ni uko indege yasabaga ko yahagurukana nibura abantu 60, bwa mbere dusaba twari 36 haba kurindira kugira ngo umubare uboneke, kandi itike yari ihenze muri icyo gihe.”

Abajijwe ku kigiye gukurikiraho, yavuze ko bagiye gupimwa hakarebwa niba nta barwaye COVID-19, ubundi bajyanwe mu nyubako bategererezamo, aho basabwa kuziyishyurira ubundi bakomereze mu miryango yabo aho bazakomeza gucungirwa hafi.

Avuga ko nubwo bishimiye kugera mu Rwanda kwishyura igihe bari mu kato bizabahenda, ati “Ikibazo ni uko ahantu bashyizeho kujya mu kato hari ahahenze kandi tuje twari mu bibazo by'ubukene byiyongeraho kwishyura itike y'indege ihenze.”

Akomeza agira ati “Muri twe harimo n'abanyeshuri bari bamaze igihe batiga babaho mu bibazo, ubu bagerageje kwishakamo itike, kubabwira kwishyura aho baba mu kato biragoye.”

Benshi mu Banyarwanda bari muri Leta zitandukanye za UAE harimo Dubai, Abu Dhabi, Sharjah, Ajman, Umm Al Quwain, Ras Al Khaimah ndetse na Fujairah bari barahagaritse ibikorwa by'ubukungu bakoraga kubera icyorezo cya COVID-19.


CAF igiye guha buri shyirahamwe ry'umupira w'amaguru Miliyoni 187 #Rwanda #RwOT via @kigalitoday

By Sports

Nyuma y'aho amashyirahamwe y'umupira w'amaguru menshi muri Afurika yasubitse shampiyona ndetse n'andi marushanwa, ibi bikagira ingaruka ku bukungu bw'amakipe menshi, CAF yafashe umwanzuro wo kugira icyo yafasha buri shyirahamwe muri Afurika.

Ni muri urwo rwego, CAF igomba gutanga Miliyoni 10.8 z'amadollars ku mashyirahamwe 54 abarizwa muri CAF, bivuze ko byibura buri shyirahamwe rizahabwa amadollars ibihumbi 200, ahwanye na 187,233,384 Frws.

Ibi byaje nyuma y'inama yahuje inama ya CAF yabaye kuri uyu wa kane Tariki 28/05/2020, bafata uyu mwanzuro wo gufasha kubera ingaruka z'ubukungu zatewe na COVID-19, ikaba kandi CAf yari iherutse no gutanga andi mafaranga ifasha amakipe yabonye itike yo kugera mu matsinda ya CAF Champions League na CAF Confederation Cup.

Kugeza ubu kandi CAF iratangazo iri gushaka andi mafaranga yazafasha amashyirahamwe kuba yasubukura ibikorwa by'imikino byasubitswe mu mezi ashize, ikaba inakomeje kuganira n'inzego z'ubuzima by'umwihariko OMS ngo irebe uburyo amarushanwa ya CAF yazasubukurwa mu minsi iri imbere.


  • May 29th 2020 at 13:28

Uko mbibona: Si ngombwa gutega moto ku rugendo rutarengeje kilometero eshatu #Rwanda #RwOT via @kigalitoday

By Editor

Mu gihe abantu benshi bifuza ko Moto zakomorerwa zikongera gukora akazi ko gutwara abagenzi mu mujyi no mu gihugu muri rusange; reka tugerageze gusesengura inyungu yo kuba tudafite Moto zigenda mu mujyi muri iki gihe.

Mu by'ukuri muri Kigali sinaherukaga kubona abantu benshi bagenda n'amaguru. Ariko kuva ku itariki 4 Gicurasi 2020 aho abantu barekuriwe kujya mu kazi ariko Moto ntizirekurwe; nagiye mbona abantu benshi bifata bakagenda n'amaguru mu mihanda. Akenshi nibwira ko baba bari kugenda ingendo zitari ndende kuko urugendo rurerure barukora na bisi.

Kugenda n'amaguru urugendo rwa kilometero 3 buri munsi ni byiza ku mubiri w'umuntu. Biturinda indwara zikomeye kandi zitwara amafaranga menshi yo kwivuza. Iyo ugenda n'amaguru uba ukoze ka siporo kandi utavunitse. Kandi bifasha ubwonko ndentse n'ingingo nyinshi zo mu mubiri. Usanga abantu bafata umwanya rimwe mu cyumweru wo kujya muri siporo ngo barwanye umubyibuho cyangwa birinde umuvuduko w'amaraso. Iyi siporo ikorwa rimwe mu cyumweru usanga ntacyo imarira umubiri. Abahanga bavuga ko biba byiza ko umuntu akora ka siporo gake aho gukora siporo nyinshi rimwe mu cyumweru.

Iyo Moto ziri mu mihanda ziboneka abantu usanga bagira ubute bwo gukora ingendo yewe na za zindi ngufi. Urugero ugasanga umuntu ushaka kuva ku Giporoso ajya kwa Lando afashe Moto (ahantu hatari na kilometero imwe). Ibi byabaye umuco muri Kigali; usanga kugenda ku maguru byarahariwe abantu b'icyiro runaka (abakene) keretse iyo ari Car Free Day. Ubaye ufite gahunda n'umuntu y'akazi akabona uje n'amaguru ututubikana byakuviramo kukabura. Ibi nabigereranya n'umuntu wibwira ko kurya ifiriti ari iby'abakire. Mu by'ukuri ifiriti ziraryoha ariko kuzihorera ni ukwangiza ubuzima.

Muri iyi minsi birashimishije kubona abantu b'ingeri zose (abakene n'anakire) bagenda n'amaguru mu mihanda myinshi ya Kigali. Bintera kwibwira ko biramutse bikomeje bityo impfu ziterwa n'umubyibuho ukabije cyangwa umuvuduko w'amaraso cyangwa iturika ry'imitsi yo mu bwonko zizagabanuka, Abanyakigali bakagira ubuzima bwiza.

Ya mafaranga abantu batangaga bagendera kuri Moto; akiyongeraho ayo batangaga bajya muri Gym, akiyongeraho ayo batangaga bivuza indwara ziterwa no kudakora siporo buri munsi bazayazigama bayakoreshe ibikorwa bindi bibateza imbere. Urugero umuntu ukoresha Moto buri munsi mu ngendo zose akora dufate ko akoresha byibuze 1,000 RWF ku munsi muri izo ngendo zose. Bivuze ko mu mwaka ashobora kuba akoresha 300,000 RWF. Ubwo twafashe ko mu minsi 365 y'umwaka asohoka mu rugo iminsi 300 gusa indi 65 akaguma imuhira (konji, umuganda n'izindi mpamvu). Aya mafaranga ushobora gusanga ahwanye n'imishahara ibiri y'uwo muntu cyangwa se ugasanga atanahwanye n'umushara n'umwe w'uwo muntu iyo uwo muntu atunzwe n'abandi (umwana mu rugo). Ibi aba ari igihombo gikomeye kuri uwo muntu ndetse n'abamutunze.

Wa muntu ukunda kugendera kuri Moto asigaye akenera kujya muri Gym yishyura 50,000 RWF ku kwezi, ubwo mu mwaka akishyura 600,000RWF. Mu mwaka uwo muntu atakaza amafaranga ayingayinga miliyoni y'amafaranga y'u Rwanda kubera ko yanga gukoresha amaguru ye akora ingendo ngufi (zitarengeje 3km) ahubwo agakoresha Moto. Mu myaka itanu uwo muntu abaye agendera ku maguru mu ngendo ze ntiyakenera Gym; kandi yazigama iyo miliyoni y'amafaranga y'u Rwanda. Noneho akazayakoresha ibindi bintu byamubyarira inyungu kandi yaramba kugira ngo azabashe kurya iyo nyungu atuje.

Moto rero ni nka rya terambere ryadufasha iyo turikoresheje neza; ariko kandi rikaba ryaturimbura iyo tutarikoresheje neza. Gutega moto zitwara abagenzi biryohera abanyamujyi bigatuma batibuka igihombo cy'ubuzima zibatera.

Muri iyi nyandiko nibanze ku nyungu ebyiri gusa; yo kugira amagara meza no kuzigama amafaranga twagakoresheje tugendera kuri Moto.


Alex Muyoboke ari mu gihombo gikomeye yatewe na #COVID19 #Rwanda #RwOT via @kigalitoday

By Editor
Alex Muyoboke
Alex Muyoboke

Aganira na KT Press, ishami rya Kigali Today ryandika mu cyongereza, Muyoboke yavuze ko mbere ya covid-19 yari yabashije kubona amasezerano yari kumuhesha ibihumbi 17 by'Amadolari ya Amerika, ahwanye na Miliyoni 16 n'ibihumbi 200 mu mafaranga y'u Rwanda.

Alex Muyoboke wigeze gukorana n'abahanzi nka Tom Close, Meddy n'abandi, aremeza ko mu minsi ya mbere ya covid-19 yari yaraguze headphones cg ecouteurs zitagira imigozi (wireless), yagombaga gukoresha muri Republika Iharanira Demokarasi ya Congo no muri Congo Brazzaville.

Muyoboke yabwiye KT Press ko muri ibyo bihugu byombi ari ho yari yizeye gusarura akayabo ka miliyoni 16 n'ibihumbi 200 frw, kuko hatari hagera utubyiniro dukoresha izo headphones umuntu akoresha wenyine akumva indirimbo ashaka, abandi na bo bakumva izabo nta rusaku ruhari.

Abanyarwenya, abategura ibitaramo, ibirori n'inama, abaririmbyi, mbese muri rusange abatunzwe n'ubuhanzi bose bamaze igihe batinjiza agafaranga kubera ko ibitaramo ari bimwe mu bikorwa byahagaritswe kubera Coronavirus.

Umuhanzi Safi Madiba aherutse kwemeza ko yahombye Miliyoni 14 z'Amafaranga y'u Rwanda nyuma yo gusubika ibitaramo yiteguraga gukorera muri Leta zunze Ubumwe za Amerika na Canada.

Tugarutse kuri Alex Muyoboke, uyu mugabo wagize uruhare rugaragara mu guteza imbere impano no kuzamura abahanzi bo mu Rwanda, aravuga ko muri iyi minsi ubuzima butamworoheye kuko akazi kamutunze kahagaze.

Mu bahanzi yazamuye bakagera ku rwego rushimishije, harimo Meddy, The Ben, Tom Close, Dream Boyz, Social Mula, Urban Boyz n'itsinda rya Charly na Nina.


#Kwibuka26: Mu mpera za Gicurasi 1994 Jenoside yakomeje gukaza umurego mu Majyepfo #Rwanda #RwOT via @kigalitoday

By Editor
Aha i Kabgayi hiciwe Abatutsi bari bahahungiye
Aha i Kabgayi hiciwe Abatutsi bari bahahungiye

1) IYICWA RY'ABATUTSI BARENGA 500 BAVANYWE MU MAZU YA KILIZIYA GATOLIKA BARI BAHUNGIYEMO I KABGAYI

Uko ingabo za Leta y'abicanyi n'Interahamwe/Impuzamugambi zagendaga zitsindwa, Jenoside igahagarikwa n'ingabo za FPR-INKOTANYI, benshi mu bicanyi bagahunga i Kigali, aho bageraga hose bakahasanga Umututsi baramwicaga. Niko byagendekeye Abatutsi bari bataricwa i Kabgayi. Mu mpera z'ukwezi kwa Gicurasi 1994 hagati ya tariki 28 na 30, Interahamwe zatwaye Abatutsi barenga magana atanu (500) bamwe zibakuye mu nzira aho bageragezaga kugana i Kabgayi bahizeye ubuhungiro, abandi zibavanye mu mpunzi z'abatutsi zari zikambitse mu mazu atandukanye ya Kiliziya gatorika i Kabgayi zijya kubica.

MINUAR niyo yabaye iya mbere mu gutangaza ayo makuru ku wa 31 Gicurasi 1994 aho umwe mu bayobozi bayo, Dr Abdul Kadia, wari umwe mu bungirije Jenerali Dallaire, yatangarije itangazamakuru ko abantu barenga 500 bishwe n'ingabo za Leta i Gitarama barimo benshi bavanywe i Kabgayi. Dr Kadia yavuze ko MINUAR igiye gukora iperereza kuri ubwo bwicanyi.

Radiyo mpuzamahanga zitandukanye zatangaje iby'ubwo bwicanyi harimo RFI mu makuru yo ku wa 31 Gicurasi 1994. Radio y'Abadage, Deutsche Welle yo ku wa 31 Gicurasi 1994 nayo yemeje ayo makuru inavuga ko MINUAR yohereje intumwa zayo i Kabgayi gukora iperereza kuri ubwo bwicanyi. Amakuru kandi yemejwe na Radiyo BBC.

Ubuhamya bw'abacitse ku icumu rya Jenoside yakorewe Abatutsi i Kabgayi busobanura ko mu bihe bitandukanye muri 1994, impunzi z'Abatutsi zimaze kugera i Kabgayi, Interahamwe za MRND n'Impuzamugambi za CDR n'abandi bahutu bo mu Mashyaka ya Hutu Power, bagiye baza buhoro buhoro gutwara ku gahato Abatutsi bakajya kubica. Benshi muribo biciwe kuri Nyabarongo batabwa mu mazi. Abakobwa n'abagore bo barimo benshi baroshywe muri Nyaborongo ari bazima ; abandi basambanywa ku gahato mbere yo kwicwa.

Ingabo za FPR-INKOTANYI zabohoye Kabgayi ku wa 02 Kamena 1994.

2) INGABO ZA FPR-INKOTANYI ZAKOMEJE KUBOHORA IBICE BY'UMUJYI WA KIGALI NA GUVERINOMA Y'ABATABAZI IHUNGIRA KU KIBUYE

Ku wa 26 Gicurasi 1994, ingabo za FPR-INKOTANYI zigaruriye burundu bimwe mu bice by'Umujyi wa Kigali bya Kicukiro na Gatenga, barokora bamwe mu Batutsi n'abandi baturage bari mu maboko y'abicanyi. Gatenga cyari igice kirimo Interahamwe nyinshi zari zikuriwe n'uwitwa TWAHIRWA Seraphin wari umukozi wa Minisiteri y'imirimo ya Leta (MINITRAPE), ubu wihishe mu Bubiligi. Abasilikare ba Leta y'abicanyi n'Interahamwe zayo batangiye guhunga Umujyi wa Kigali, berekeza i Gitarama na Ruhengeri.

Ku itariki 27 Gicurasi 1994, MINUAR yatangiye kuvana abantu bari bihishe muri Hotel des Mille Collines ibajyana aho bifuje. Bamwe bifuje kujya mu gice cyari kikigenzurwa na Guverinoma y'Abatabazi, abandi benshi bajya mu gicye cyari cyarabohojwe na FPR-INKOTANYI.

Ingabo za FPR-INKOTANYI zakomeje gusaba ko abasilikare ba Leta bashyira intwaro hasi, bakareka ubwicanyi, bagafatanya gusana ibyangiritse no kubaka igihugu, ariko biba iby'ubusa. Kuri iyi tariki, igice kirenga icya kabiri cy'u Rwanda cyari kimaze kubohorwa n'ingabo za FPR-INKOTANYI.

Kuri iyo tariki kandi, MINUAR yatangaje ko ibona mu minsi ya vuba, ingabo za FPR-INKOTANYI zizaba zimaze kwigarurira Umujyi wose wa Kigali.

Ku wa 28 Gicurasi 1994, Radiyo Mpuzamahanga y'Abafransa (RFI) yatangaje ko abagize Guverinoma y'Abatabazi bavuye i Gitarama, bagahungira ku Kibuye. Umunyamakuru wa RFI, Monique Mass, wari mu Rwanda yagiye i Nyamata avuga ko abaturage barenga icya kabiri cy'abari batuye mu Mujyi wa Nyamata mbere ya Jenoside batsembwe n'Interahamwe zifatanyije n'ingabo za Leta. Ibyo byanemejwe na Profeseri Alain Verhaegen w'Umubiligi mu kiganiro yahaye RFI i Bruxelles avuye mu Rwanda mu kazi yakoranaga n'umuryango w'abaganga batagira imipaka (Medecins Sans Frontieres Belgique).

Uwo munsi, Ambasaderi Amuri SUED wari mu bavanywe muri Hotel des Mille Collines na MINUAR agasanga FPR-INKOTANYI, nawe yatangaje kuri RFI uburemere bw'ubwicanyi bwa Jenoside yakorewe Abatutsi, bukozwe na Leta y'Abatabazi n'Interahamwe, asaba ko urugamba FPR-INKOTANYI irwana rwo guhagarika Jenoside rukwiye gushyigikirwa n'isi yose.

3) BAMWE MU BANYAMAHANGA BARERUYE BEMEZA KO IYICWA RY'ABATUTSI MU RWANDA ARI UMUGAMBI WA LETA, ARIKO LETA Y'ABICANYI IKOMEZA KUBIHAKANA

Guhera tariki 22 Gicurasi 1994, Komisiyo y'Umuryango w'Abibumbye Ishinzwe Uburenganzira bwa Muntu yatangiye inama yigaga ku miterere y'ubwicanyi bwakorerwaga Abatutsi mu Rwanda, ari nako itangaza ko abakora ubwicanyi mu Rwanda bashobora kuzabibazwa mu nkiko. Muri iyo nama, Musenyeri Desmund Tutu, ukomoka muri Afurika y'Epfo yafashe ijambo yamagana ikorwa rya Jenoside mu Rwanda, nawe asaba ko ababukora bakurikiranwa.

Stanislas Mbonampeka, wari visi perezida wa kabiri wa P.L. Power, umwe mu ntumwa zari zoherejwe muri iyo nama na Guverinoma y'abicanyi yamagana Desmund Tutu abeshya ko nta bwicanyi bukorwa na Leta yari ahagarariye, ko abicwa bakwiye kubazwa FPR. Mbonampeka ntiyari ayobewe ko i Gitarama, Kibuye n'ahandi hariho hicwa Abatutsi icyo gihe, ko atari mu bice byagenzurwaga na FPR-INKOTANYI. Yabivugaga ashaka kuyobya uburari, avana icyaha kuri Leta ye. Mbonampeka avuye Geneve yagiye i Paris mbere yo kugaruka mu Rwanda.

Ku itariki ya 24 Gicurasi 1994, Radiyo Mpuzamahanga y'Abafransa (RFI) yatangaje ko Umuryango mpuzamahanga uharanira uburenganzira bwa muntu, Amnesty International, wamaganye ubwicanyi bukorwa n'ingabo za Leta y'u Rwanda na Guverinoma y'Abatabazi.

Ku itariki 25 Gicurasi 1994, intumwa y'Umuryango w'Abibumbye, Iqbar Riza, wari mu ruzinduko mu Rwanda, yabonanye n'abahagarariye Guverinoma y'u Rwanda, ariko ntibyagira icyo bitanga mu ihagarikwa rya Jenoside. Iqbar Riza yabasanze mu ndiri yabo i Gitarama aho bari bakambitse.

UMWANZURO

Jenoside yakorewe Abatutsi ni igikorwa kibi cya Leta yiyise iy'Abatabazi. Jenoside yakomeje gukorwa mu gihe mu Muryango w'Abibumbye bari bakirwana n'amagambo yo kwemeza inyito y'ubwo bwicanyi, ariko ntibagire ubutwari bwo gufata ibyemezo bihagarika ubwicanyi bwakorerwaga Abatutsi.

Iyi nyandiko yo ku wa 29/05/2020, Kigali Today iyikesha Komisiyo y'Igihugu yo Kurwanya Jenoside (CNLG).


Musanze: Ikibazo cy'ibura ry'amazi kigiye gukemuka burundu #Rwanda #RwOT via @kigalitoday

By Editor
Kimwe mu bigega biri kubakwa byitezweho kongera ingano y
Kimwe mu bigega biri kubakwa byitezweho kongera ingano y'amazi

Uyu mushinga uri gushyirwa mu bikorwa n'Ikigo cy'igihugu gishinzwe gukwirakwiza amazi isuku n'isukura (WASAC), ku bufatanye n'Akarere ka Musanze ku nkunga ya Banki y'Isi, biteganyijwe ko uzarangirana n'uyu mwaka wa 2020.

Abaturage barimo n'abatuye mu bice bikunze kubura amazi mu Mujyi wa Musanze, bavuga ko bamaze igihe bahanganye n'ingaruka z'iki kibazo; biteze ko nigikemuka izaba ari intambwe nziza itewe.

Mukamurenzi Esther wo mu Kagari ka Kabeza mu Murenge wa Cyuve yagize ati “Ikibazo cy'amazi kiri mu bitugoye cyane, ingo nyinshi muri uyu Mudugudu wa Karinzi ntiziyafite, n'aho ari ahora yabuze tukajya kuyavoma bidusabye gukora urugendo rw'isaha. Iyo tugize amahirwe tukabona ayo gutekesha ibyo kurya, gufura byo tubitekereza rimwe na rimwe, muri make isuku ni nke”.

Ibura ry'amazi hari abaryungukiramo cyane cyane abajya kuvomera ababa bayakeneye. Uwiringiyimana ukora akazi ko gutwara igare, ni umwe mu bantu bakora akazi ko gutunda amazi ayagemura mu ngo ziyakeneye. Yabwiye Kigali Today ko nibura ashobora gukorera amafaranga ari hagati y'ibihumbi bine n'ibihumbi icumi ku munsi, kubera ko afite abantu benshi avomera amazi.

Ikwirakwizwa ry
Ikwirakwizwa ry'amazi meza rizakemura ikibazo cy'ibura ryayo rya hato na hato

Yagize ati “Nkora akazi ko kujya kuvomera abantu amazi nkoresheje igare. Hari igihe ngeza no ku majerekani 100 ku munsi. Mba nakoze urugendo rw'ibirometero bitatu njya kuyavoma, ijerekani imwe nyibarira amafaranga ari hagati ya 100 na 130 bitewe n'aho nyakuye. Aya yiyongeraho andi 20 cyangwa 30 y'ikiguzi cy'amazi ubwo nkabara ko nyigeza ku muntu uyikeneye ihagaze amafaranga 150. Ni akazi kavunanye ariko karantunze”.

Ku rundi ruhande ariko, hari abivovotera gutakaza amafaranga menshi ku munsi kubera amazi baba bakeneye.

Umwe muri bo yagize ati “Nibura mu rugo dukenera gukoresha amajerekani atanu y'amazi ku munsi, wibaze amafaranga binsaba kwishyura atari munsi ya magana atandatu; kuyabona ntibyoroshye kandi hari ibindi umuntu aba akeneye bimusaba amafaranga nko kurya, n'utundi tuntu dutandukanye. Urumva ko amafaranga ni menshi, dukeneye ko batwegereza amazi meza”.

Ikigo gishinzwe amazi isuku n'isukura (WASAC), kivuga ko ibibazo biterwa n'ingano y'amazi akiri make kigaragara mu Karere ka Musanze, uyu mwaka wa 2020 ugomba kurangira gikemutse.

Impamvu ni uko hari umushinga watangiye gushyirwa mu bikorwa wo kubaka ibigega bine bifite ubushobozi bwa meterokibe z'amazi zisaga ibihumbi bitanu byatangiye kubakwa, imiyoboro migari ireshya na kilometero 47 n'imiyoboro mito y'amazi ireshya na kilometero 100.

Aha abakozi barashyira ibihombo binini bizatwara amazi biyakwirakwiza mu Mujyi wa Musanze
Aha abakozi barashyira ibihombo binini bizatwara amazi biyakwirakwiza mu Mujyi wa Musanze

Murigo Jean Claude, Umuyobozi wa WASAC ishami rya Musanze yagize ati “Hari ibibazo by'imiyoboro mito kuko myinshi muri yo yashyizweho mu gihe Akarere ka Musanze kari gatuwe n'ingo ibihumbi bitatu none zigeze ku bihumbi 16. Urebye ukuntu abaturage biyongereye ayo mazi ntiyarakibahaza.

Ni yo mpamvu muri uyu mushinga twatangiye gushyira mu bikorwa turi kubaka ibigega byagutse, imiyoboro y'amazi migari n'imito, ikindi ni uko hazubakwa utuzu tw'amazi turenze 25 mu Mujyi wa Musanze.

Ibi bizakemura ikibazo cy'ibura ry'amazi tumaze igihe duhanganye na cyo kandi twizeza abaturage ko uyu mwaka uzarangira byamaze gushyirwa mu bikorwa”.

Uyu mushinga wo gukwirakwiza amazi meza mu Mujyi wa Musanze uzarangira utwaye miliyari zisaga esheshatu z'amafaranga y'u Rwanda.


Abamotari bahawe amezi abiri bakabona kwishyura uruhushya rwo gutwara abagenzi #Rwanda #RwOT via @kigalitoday

By Editor
Abamotari bahawe amezi abiri bakabona kwishyura impushya zo gutwara abagenzi
Abamotari bahawe amezi abiri bakabona kwishyura impushya zo gutwara abagenzi

Ubuyobozi bwa RURA butangaza ko nyuma y'ibiganiro byayihuje n'abayobozi b'inzego z'abamotari, bemeranyijwe ko ku badafite ubushobozi bwo kwishyura ubwishingizi bwa moto, harebwa uko bafashwa kugira ngo batangire akazi bazazishyure nyuma.

Amabwiriza yo kurwanya ikwirakwizwa ry'icyorezo cya Coronavirus nk'uko aherutse gutangazwa n'Inama ya Guverinoma, ateganya ko abamotari bazasubukura akazi ko gutwara abagenzi kuri moto ku ya 01 Kamena 2020.

Amabwiriza ya RURA na yo hari ibyo ateganya ngo abamotari bazabashe gusubukura imirimo banarushaho kwirinda no kurinda abo batwaye, icyorezo cya Coronavirus.

Mu kiganiro Ubyumva Ute cya KT Radio kuri uyu wa 28 Gicurasi 2020, hibukijwe ko ibyo abamotari basabwa kubahiriza birimo kugira isuku, bahanaguza ingofero bambika abagenzi umuti wabugenewe, kwambara agatambaro muri izo ngofero no kwambara neza agapfukamunwa.

Umuyobozi w'impuzamakoperative y'abamotari mu Rwanda Daniel Ngarambe, avuga ko bishimiye kuba bongeye gusubira mu kazi kuko ngo ubuzima bwabo bwari bumaze kugera ahabi, bakaba bagomba gukora bubahiriza amabwiriza kugira ngo batongera guhagarikirwa imirimo kubera kwitwara nabi.

Agira ati “Turashimira Leta ukuntu yabaye hafi abamotari mu gihe gishize hakagira bamwe bahabwa ubufasha kuko bari batagikora, nta cyo binjiza, natwe turizeza ko tugiye gukora kandi tugakurikiza amabwiriza ku buryo ejo butazacya twasubiye mu rugo”.

Abamotari ariko basaba kuba bihanganiwe ntibahanirwe kutuzuza ibyangombwa birimo n'uruhushya rwo gutwara abagenzi kuri moto, ubwishingizi ndetse no kugura imiti yo gufasha abagenzi kwisukura.

Umuyobozi w'abamotari avuga ko amakoperative babarizwamo akwiye kubafasha kuzuza ibikenewe, naho ku bijyanye n'ibyo RURA na Polisi basaba kuzuza mu muhanda, ngo hateganyijwe kubadohorera igihe gito bitegura.

Anthony Kulamba, Umuyobozi w'ishami ry'ubwikorezi muri RURA, avuga ko hari ibizaganirwaho birimo ibijyanye n'ubushobozi ariko ko kwitwararika ku mabwiriza byo kutabikora bishobora kuzabyarira umumotari ibihano birimo no guhagarikirwa amasezerano.

Biteguye gusubukura akazi ku wa Mbere 01 Kamena 2020
Biteguye gusubukura akazi ku wa Mbere 01 Kamena 2020

Agira ati “Ikijyanye n'uruhushya rukwemerera gutwara umugenzi kuri Moto tuzi ko abamotari bari barahagaritse akazi turabihanganira amezi abiri ari imbere kugira ngo babanze bagere ku muhanda.

Turanabasabira abapolisi bashinzwe kugenzura ibinyabiziga babe baretse kubafata kugira ngo habanze haboneke uburyo bakwishyuramo izo mpushya, icyakora ufite ubushobozi bwo kwishyura we yagenda akishyura nta kibazo ariko ku bo impushya zarangiye turaba tubihanganiye”.

Abamotari kandi boroherejwe guhabwa mubazi zibafasha kwishyuza umugenzi bitewe n'urugendo yakoze, aho umugenzi azajya yishyura 300frw kuri kilometero ebyiri zibanza mu rugendo rwe, hanyuma akiyongera ukurikije urugendo yongeraho, ayo yishyuye akaba ari na yo umumotari azajya atangaho 10% y'ikoranabuhanga rya mubazi kuko zo zatangiwe ubuntu.


Menya abagore bahesha ishema u Rwanda mu butumwa bw'amahoro ku Isi #Rwanda #RwOT via @kigalitoday

By Editor
Major Stella Uwineza, umwe mu bagore b
Major Stella Uwineza, umwe mu bagore b'Abanyarwanda bari mu butumwa bw'amahoro bwa Loni muri Sudani y'Epfo

Umunyamabanga Mukuru wa Loni, António Guterres, uri buyobore ibikorwa byo kuzirikana abasize ubuzima bwabo mu bikorwa by'ubutumwa bw'amahoro kuva mu 1948, ndetse no kuzirikana ku ruhare rw'abakiri muri ibi bikorwa, yavuze ko uruhare rw'abagore ari ingenzi kandi ko babikora neza.

Ati “Abagore bakunze kwisanga mu baturage dukorera, bikadufasha kunoza uburyo bwo kurinda abaturage, guteza imbere uburenganzira bwa muntu no kuzamura imikorere, nubwo abagore bagize gusa 6% by'abasirikare, abapolisi n'abasivili bari mu butumwa bw'amahoro”.

U Rwanda ruri mu bihugu bifite umubare munini w'abagore bari hirya no hino mu butumwa bw'amahoro bwa Loni, haba mu gipolisi no mu gisirikare.

Major Stella Uwineza w'imyaka 39, ni umwe mu Banyarwandakazi bari mu butumwa bw'amahoro bwa Loni. Uyu mubyeyi w'abana batatu, ubu yoherejwe mu butumwa bw'amahoro muri Sudani y'Epfo, aho ubu ari inshuro ya kabiri ajya muri ubu butumwa, nyuma yo kuva muri i Darfur muri Sudani hagati ya 2010 na 2011.

Nubwo yagombaga gusoza ubutumwa bwe bw'umwaka muri Werurwe, icyorezo cya Coronavirus cyatumye agumayo, kugeza igihe bizashobokera ko basimburwa akagaruka mu Rwanda.

Agira ati “Ninjiye mu gisirikare muri 2002, nagiye mu butumwa bw'amahoro inshuro ebyiri. Icyo navuga ni uko abagore bari muri uyu mwambaro wa Loni bafite ubumenyi n'ubushobozi bwo gukora icyo ari cyo cyose bagenzi babo b'abagabo bashobora gukora. Dukorera hamwe mu buryo bumwe”.

Arakomeza ati “Nyamara, nasanze abagore bari mu butumwa bw'amahoro bafasha abaturage b'aho bakorera cyane cyane abana n'abagore kwigirira icyizere. Batwisanzuraho byoroshye, kandi bakatugirira icyizere kurusha uko bakigirira bagenzi bacu b'abagabo”.

Avuga ko imico igenda itandukana bitewe b'ibihugu, akavuga ko hamwe na hamwe nko muri Sudani y'Epfo na Sudani, mu muco wabo abagore batisanzura ku bagabo. Mu bice bakoreramo, abagore n'abana bizera abagore bari mu butumwa bw'amahoro, kandi bakirekura bakabaganiriza.

Major Stella uwineza
Major Stella uwineza

Ati “Baradusanga bakatubwira ingorane bafite. Batuvugisha byoroshye nk'iyo hari ikirego cyo gukurikirana nko gufata ku ngufu. Mu by'ukuri ibi bidutera umuhate wo gukora uko dushoboye mu gufasha imiryango dukoreramo. Bituma twumva ko hari ikinyuranyo turi kugaragaza”.

Mu bantu ibihumbi 90 bari mu butumwa bw'amahoro bwa Loni, abagore ni 6% gusa. Major Uwineza avuga ko hakenewe abandi bakobwa n'abagore binjira mu gisirikare, kuko byatuma n'umubare w'abagore bajya mu butumwa bw'amahoro wiyongera.

Agira ati “dukeneye gushishikariza abakobwa kwinjira mu nzego z'umutekano. Nta kintu na kimwe batashobora gukora. Amahugurwa tubona adutegurira guhangana n'ikibazo icyo ari cyo cyose no gukorera ahantu hose”.

Avuga ko ingorane ahura nay o gusa ari ugukumbura umuryango we n'abana be bafite imyaka 10, irindwi n'ibiri, gusa kuzirikana inshingano afite, bituma yihanganira igihe amara ku kazi, yizeye ko azabonana n'umuryango we, nubwo kubera Covid-19 agomba gutegereza ikindi gihe.

Maj Uwineza ati “Ndashimira umugabo wanjye. Aranshyigikira cyane. Iyo ntahari, yita kuri buri kintu cyane cyane abana. Mvugana na bo buri munsi nkamenya uko bameze”.

Yongeraho ko aterwa ishema no kuba yambaye ibendera ry'igihugu mu butumbwa bw'amahoro.

Ati “Bintera ishema kuemenya ko ndi gukorera igihugu cyanjye no kugira uruhare mu kugarura amahoro mu bihugu bya Afurika. Imyaka 10 cyangwa irenga iri imbere, nzajya nsubiza amaso inyuma, mvuge nti ndi umwe mu babigizemo uruhare”.

Impinduka ku baturage

Uruhare rw'abagore bari mu butumwa bw'amahoro rugaragazwa na Major Dinah Mutesi, ubu uri mu butumwa bw'amahoro bwa Loni muri repubulika ya Santarafurika, uvuga ko abagore bagira uruhare runini mu kugarura amahoro, bitewe n'ubushobozi bifitemo bwo kumva abantu.

Major Dinah Mutesi (ubanza ibumoso), we ari muri Repubulika ya Santarafurika
Major Dinah Mutesi (ubanza ibumoso), we ari muri Repubulika ya Santarafurika

Maj. Mutesi, na we wagiye mu butumwa bw'amahoro i Darfur muri Sudani, avuga ko ubunararibonye bwo gukorera mu bice bitandukanye, no mu mico itandukanye, byamuhaye ubumenyi n'ubushobozi bwo gukemura ibibazo bikomeye.

Agira ati “Kuva ku bunararibonye bwa mbere muri Darfur hagati ya 2010 na 2012 n'ubutumwa ndimo ubu muri Santarafurika, nakwemeza ko abagore kimwe na bagenzi babo b'abagabo bashobora gukorera mu bihe n'ahantu hagoranye.

I Darfur hari hashyushye gahoro hakanakonja, mu gihe muri Santarafurika harashyuha, ariko nashoboye gukorera muri ibyo bice nta kibazo. Bivuze ko abagore bashoboye byose kimwe n'abagabo”.

Maj Mutesi winjiye mu gisirikare muri 2003, avuga ko abagore bagira uruhare runini mu butumwa bw'amahoro, aho bafatwa nk'abahuza ku mpande zose, kandi bakagira uruhare runini mu kwita ku bagizweho ingaruka cyane cyane abagore n'abana.

Ati “Aho nabaye hose, nasanze abagore bari mu butumwa bw'amahoro bagirirwa icyizere n'abaturage. Urugero i Darfur, abagore ntibashoboraga kwegera abagabo ngo bababwire. Byasabaga bagenzi babo b'abagore kugira ngo birekure.

Iyo twasuraga abagore mu nkambi cyangwa mu magereza, byabaga bishimije kubona ari twe bahitamo kwizera bakatuganiriza ku byababayeho nko gufatwa ku ngufu, hanyuma tukabaganiriza tukabafasha. Byonyine no kutubona byabaga bihagije kubafasha gukira ihungabana, twarabigishije kandi tubafasha muri byinshi”.

Baba bakorana n
Baba bakorana n'abandi baturuka mu bindi bihugu

Nk'ababyeyi, Maj Mutesi avuga ko abagore bari mu butumwa bw'amahoro bari mu mwanya mwiza wo kuba umusemburo w'amahoro, kuko ari bo bumvwa kandi bakizerwa n'impande zose.

Imbogamizi ikomeye avuga ko yahuye nay o, ni imico itandukanye mu bihugu boherezwamo aho abagore bategera abantu, gusa binyuze muri gahunda zitandukanye, bagenda babigisha hakagaragara impinduka muri iyo miryango ahanini iba ishyira abagabo imbere kurusha abagore.

Maj Mutesi na we avuga ko abakobwa benshi bakwiye gushishikarizwa kwinjira mu nzego z'umutekano, hanyuma bakajya mu butumwa bw'amahoro guhindura isi.

Ati “Abakobwa bakwiye kumenya ko kuba umusirikare cyangwa umupolisi ari akazi nk'akandi, kandi bikaba umuhamagaro wo gukorera igihugu, ikintu gikwiye kubatera ishema. Imyumvire y'uko kujya mu igisirikare bikomeye irashaje”.

Ati “RDF yahaye amahirwe angina ku bakobwa n'abagore. Ntabwo batubogamiraho kuko turi igitsina cy'intege nke. Dushoboye gukora imirimo imwe n'abagabo. Ndashishikariza abakobwa gufata ibi nk'amahirwe yo kwiteza imbere no gukorera igihugu cyabo”.

Kuba ari umubyeyi w'abana babiri, ntibyamubujije kugera ku nzozi ze. Avuga ko uburyo bwo kwinjira mu giisirikare ku bakobwa ubu bworoshye kurusha igehe bo binjiriyemo, ariko we na bagenzi be bakaba barabishiboye kandi bakagenda bazamuka mu mapeti, ubu bakaba bahagarariye igihugu ku mugabane.

Avuga ko abagore b'Abanyarwanda bari mu butumwa bw'amahoro bafite isura nziza aho bari hose, kandi bagaragaza impinduka mu baturage, ari na yo mpamvu Loni ikomeza gushishikariza abakobwa n'abagore kwitabira ibikorwa by'ubutumwa bw'amahoro.

Umuvugizi w'Ingabo z'u Rwanda Lt. Col Innocent Munyengango, yabwiye Kigali Today ko intego ya RDF ari ukurenza 30% iteganywa n'Itegeko Nshinga rya Repubulika y'u Rwanda.

Agira ati “Politiki y'uburinganire n'ubwuzuzanye iva muri politiki y'igihugu, iri mu Itegeko Nshinga. Intego yacu ni ukurenza 30%. Uburyo bwo kwinjiza mu ngabo, bwemerera ibitsina byombi kwinjira. Muri butumwa bw'amahoro bwa Loni, twitwara neza kurusha ibihugu byinshi.

Dusabwa akenshi kohereza abagore benshi kandi turabikora. Nubwo RDF ari urwego rutanga amahirwe angana, buri gihe dushishikariza abakobwa kwinjramo, kuko umubare wabo ukiri muto.

Yavuze ko abagore b'Abanyarwanda bari mu butumwa bw'amahoro bitwara neza buri gihe, ko ndetse abenshi muri bo begukana imidari mu gihe baba basuwe aho bakorera.

Kugeza ubu u Rwanda rufite abantu 6,546 bari mu butumwa bw'amahoro bwa Loni mu bihugu bitandukanye. Lt Co. Munyengango avuga ko ubu gusimburana byabaye bihagaze kugeza igihe icyorezo cya Covid-19 kizagabanuka.

Umunyamabanga Mukuru wa Loni yavuze ko ubu ku isi yose abantu 95,000 barimo abacivili, abasirikare n'abapolisi, bari mu butumwa bw'amahoro bwa Loni, avuga ko “bari guhura n'imbogamizi ikomeye kurusha mu bindi bihe, yo kugarura amahoro no gucunga umutekano nk'inshingano yabo y'ibanze, banafasha ibihugu kurwanya icyorezo cya Covid-19”.


❌