WebRwanda.com

🔒
❌
There are new available articles, click to refresh the page.
Before yesterdayNezerwa.com

Iyo utica icyaha ngo ukineshe kiba kikwica buhoro buhoro utabizi

By Ubwanditsi

Abizera Imana, twavuye mu ngeso mbi z'isi tugowe maze twinjira mu mukumbi w'abana b'Imana, icyo duhamagarirwa ni ukwezwa buri gihe mu ngeso zacu zose. Niyo mpamvu tudasabwa kurwanya icyaha tutavuga ngo iki ni gito cyangwa iki ni kinini. Umwuka Wera niwe udushoboza kandi iyo tumwemereye nta kabuza turanesha.

Icyaha nirwo rusika rwonyine rudutandukanya n'Imana. Twahagurutse dufite intego yo kukirwanya ku buryo n'abadakijijwe bataramenya agakiza k'Imana bareba abakijijwe bakababonamo koko imbuto z'ako gakiza, badapfa kuvuga ibyo biboneye, bigengesera muri byose.

Uko iminsi igenda yigira imbere, ubona abantu bamwe bagenda batinyuka ibyaha bari bararetse, ariko tuzirikane ko tujya mu ijuru; igihugu cy'isezerano. Iyo utica icyaha ngo ukirwanye ukineshe rwose muri wowe wisanga ahubwo cyo kiba kiri kukwica utabizi.

Twiyambure kandi turwane intambara yo kurekura burundu ingeso mbi zitwizingiraho, tuzibone kure nk'izibambwe ku buryo dusigara tutakigeragezwa nabyo; ibyo bizadufasha kubana n'Imana tubohotse.

Bibiliya ivuga iki ku cyaha?

Dusoma ngo “ubwo azaza azatsinda ab'isi, abemeze iby'icyaha n'ibyo gukiranuka n'iby'amateka iby'icyaha, kuko batanyizeye, n'ibyo gukiranuka kuko njya kwa Data, kandi namwe muzaba mutakimbona, n'iby'amateka kuko umutware w'ab'iyi si aciriweho iteka.” (Yohana 16: 8-11)

Satani ahora ashaka uko yakwigarurira abantu bahoze mu mwijima we bagakizwa; ababuza gutsemba ibyaha burundu muri bo, ugasanga umuntu agendana ingeso za kamere ya kera yanze kwihana.

Nyamara si ngombwa ko abantu bingingirwa kwihana ahubwo umuntu yari akwiye kumenya guhungisha ubugingo bwe akaza kuri Yesu akamupfukamira akamubwira ibyaha bimugoye n'ibimunesha, Yesu akamukiza kuko mubo yacunguje amaraso ye nawe urimo. Ab'isi bakigendera mu ngeso mbi bo bahishwe iryo banga ariko twe abarimenye ntidukwiye kuripfusha ubusa.

Hari ubwo ibyaha abantu baziruye bigumaho igihe kirekire, abantu bakabyeza, bagasigara babifata nk'ukuri, nyamara iyo wemereye Umwuka Wera aguha icyerekezo kugira ngo ubeho ubuzima butababaza Imana. Ntukavuge ngo ubwo runaka abikora kandi ari umuntu w'Imana buriya si icyaha. Twirinde kandi tube maso.

Umuntu mwiza atanga ibyiza abikuye mu butunzi bwe bwiza, n'umuntu mubi atanga ibibi abikuye mu butunzi bwe bubi. “Kandi ndababwira yuko ijambo ry'impfabusa ryose abantu bavuga, bazaribazwa ku munsi w'amateka. Amagambo yawe ni yo azagutsindishiriza kandi n'amagambo yawe ni yo azagutsindisha.” (Matayo 12: 35-37)

Aha baribanda ku cyaha cy'amagambo, usanga abantu bapfa kwivugira ibyo biboneye; nyamara ikintu cyose gisohoka mu kanwa kawe Imana izakikubaza; ahubwo ibidukwiye ni uko, uko tubonye uburyo tuba tugomba kuvuga ijambo ryiza ribera abaryumvise umugisha. Iyo wemeye kurekura ibibi wakoraga uba ugomba gufungurira urukundo rw'Imana rukagwira muri wowe, bitabaye ibyo wakingurira ibizira bizakurimbura.

Abantu babajije Yesu bati: “Mwigisha, itegeko rikomeye mu mategeko ni irihe?” Na we aramusubiza ati “Ukundishe Uwiteka Imana yawe umutima wawe wose n'ubugingo bwawe bwose n'ubwenge bwawe bwose. Iryo ni ryo tegeko rikomeye ry'imbere. N'irya kabiri rihwanye naryo ngiri: Ukunde mugenzi wawe nk'uko wikunda.” (Matayo 22: 36-38)

Simoni w'umukonikoni niwe wabonye urukundo rwa benedata yifuza kuba nkabo, ariko ataretse nibyo yari arimo; abwira ba Petero ati: mumpe ububasha nk'ubwanyu, baramubwira bati “uri ikirura mu ntama.” Yumvise ko bimusaba kubanza kurekura ibyo yagenderagamo agasa nabo, bituma yihana. Nawe ni byiza ko ufata akanya ukibaza uti ese narakijijwe by'ukuri nemera kureka no kuzinukwa ibya kera nahozemo?

Ingaruka z'icyaha iyo utacyihannye neza

1.Icyaha gitandukanya umuntu n'Imana, kigashyira ubwenge bw'umuntu mu mwijima ibi bigatuma ahora mu butamenya kandi yararemwe mu ishusho y'Imana ngo nawe abe uw'umucyo. (Abefeso 4: 18)

2.Icyaha kinyaga umudendezo umuntu yari afite, nyamara yari akwiye kuba uwabohotse kuko nta mahoro y'umunyabyaha. (Yohana 8: 34)

3.Icyaha gitera ubukene bwo mu mutima ukumva ntunyurwa n'ibyo ubonera mu gakiza wakiriye, naho wahora mu masengesho ugasanga ntacyo bikumarira umeze nk'uta umwanya wawe.

4.Icyaha gitera umuntu kuba mu bubata ugasanga hari ibyaha byakuziritse, keretse iyo wemereye Umwuka Wera ukatura, ukavuga impamvu utakigira umunezero. Dawidi we amaze gusambana n'umugore wa Uliya, yarihannye atakambira Uwiteka aravuga ngo “unsubize umunezero w'agakiza” kuko yari azi akamaro ntagereranywa k'uwo munezero ku buzima bwe.

5.Icyaha kizana umuvumo wo mu buryo bwose (Abagalatiya 3: 10); ariko iyo ukijijwe neza Imana ijya ibitsembaho byose ugasigara ubohotse, uruhutse ukumva nta kibazo na kimwe muri wowe, ukumva nta kibaho ku isi kikurutira kumenya Imana.

Dushobozwa byose na Kristo uduha imbaraga. Imana ikugirire neza ubashe kurwanya ibyaha muri wowe nibwo uzabasha rwose gusingira neza umugambi w'Imana ku buzima bwawe. Imana iragukunda.

Nezerwa.com

  • December 21st 2016 at 13:19

Burya urukundo si ubuki cyangwa chocolate gusa nkuko benshi mu bakundana babihamagarana

By Ubwanditsi

Ariko Abafarisayo bumvise yuko yatsinze Abasadukayo, bakananirwa kumusubiza, bateranira hamwe, umwe muri bo w'umwigishamategeko amubaza amugerageza ati "Mwigisha, itegeko rikomeye mu mategeko ni irihe?"

Na we aramusubiza ati: "Ukundishe Uwiteka, Imana yawe umutima wawe wose n'ubugingo bwawe bwose n'ubwenge bwawe bwose. Iryo ni ryo tegeko rikomeye ry'imbere. N'irya kabiri rihwanye na ryo ngiri 'Ukunde mugenzi wawe nk'uko wikunda.' Muri ayo mategeko yombi, amategeko yose n'ibyahanuwe ni yo yuririraho." (Mat.22:34-40)

Iri jambo ryandikiwe ab'i Korinto ariko kandi ni ijambo ryawe uyu munsi, uwo waba uri we wese, n'icyo waba ukora cyose ugikorane urukundo. Muri iyi si yuzuyemo ibibazo by'ingutu bishakirwa ibisubizo mu nama zikomeye zitandukanye, ariko ikibazo ni uko umuti ushakirwa aho utari. Intandaro y'ibi bibazo, ibyinshi ni ukubura k'urukundo mu bantu.

Hari ubushakashatsi buherutse gushyirwa hanze mu mwaka ushize wa 2015 bwagaragaje ko 50% by'ubutunzi bw'isi bufitwe na 1% gusa y'abatuye isi. Ni ukuvuga ko abasigaye 99% bagabana icya kabiri cy'ubutunzi bwose bwo ku isi; niyo mpamvu benshi bapfa bishwe n'inzara bitewe no kwikubira kwa bamwe. Nta gisubizo gishobora kuzaboneka kuri bibazo nk'ibi isi ifite, mu gihe cyose isi itaramenya uburemere bw'URUKUNDO ariko kandi tukamenya icyo uru RUKUNDO tuvuga ari cyo.

Ni ibihe bimenyetso byerekana uburemere nyakuri bw'urukundo

1. Urukundo turubona nk'itegeko-nshinga ryo mu ijuru: Ubundi ku banyamategeko, itegeko-nshinga niryo tegeko riruta ayandi mategeko mu gihugu kuko ari ryo yose yuririraho. Ubu buremere ntibupimwa n'iminzani y'abantu ahubwo ni Umwami Yesu ubwe wabihamije n'akanwa ke imbere y'abafarisayo bifuzaga impaka.

2. Urukundo nirwo rugaragaza ko turi abizera ba Yesu koko: Si uko tuba tuzi kubwiriza cyane, si n'uko twaba tumaze iminsi myinshi mu itorero. Dusoma ngo "...ibyo ni byo bose bazabamenyeraho ko muri abigishwa banjye, nimukundana." (Yoh.13:34-35)

3. Urukundo ruri ku rutonde rw'imbuto z'Umwuka Wera. Urukundo nirwo ruza ku mwanya wa mbere ndetse n'andi mategeko iyo uyasesengira ubona rugenda rugarukamo.

4. Ikindi kigaragaza uburemere bw'urukundo ni uko mu bizerekana ko Yesu agiye kugaruka harimo nuko urukundo ruzakonja nkuko tubisoma muri Matayo 24:12.

5. Ibindi byose bizashira keretse urukundo. “Urukundo ntabwo ruzashira. Guhanura kuzarangizwa no kuvuga izindi ndimi kuzagira iherezo, ubwenge nabwo buzakurwaho…” (1 Abakorinto13:8)

6. Ntiwabona icyo wagura urukundo. Uwatanga ibyo atunze byose kugira ngo agure urukundo yagawa. “Amazi menshi ntiyazimya urukundo n'inzûzi zuzuye ntizarurenga hejuru. Umuntu watanga ibyo afite mu rugo rwe byose kugira ngo agure urukungo yagawa rwose. (Indirimbo za Salomo 8:7)

Udafite urukundo ashobora kuvuga indimi z'abamalayika, kumenya ibihishwe byose, kugira ubwenge bwose mu by'Imana ndetse n'iby'isi, ndetse yabasha no kugira kwizera kwimura imisozi, yatanga n‘ibye byose no kwitanga nawe ubwe agatwikwa. Nyamara ntacyo ibyo byamugira cyo kuko hari icyibanze adafite. (1 Abakorinto 13:1-3)

Ni ikihe gisobanuro nyakuri cy'Urukundo?

1-Urukundo ni ukwihangana. Burya urukundo si ubuki, cyangwa shokola (chocolat) nkuko abenshi mu bakundana usanga babihamagarana, kuko niba tubonye ko urukundo ari ukwihangana, bivuga ko umuntu yihanganira ibintu bibabaje, bisharira, bigoye, bivunanye n'ibindi nk'ibyo ruhura nabyo byo kwihanganira.

2-Urukundo ni ukugira neza. Ntibishoboka ko wakwatura ko ugira urukundo nyamara muri wowe udatanga nta nuwo ugirira impuhwe.

3-Urukundo ni ukutagira ishyari. Kunezeranwa n'abishimye ni wo muco w'urukundo. Nyamara ubu kimwe mu bigisigaye bituma abantu benshi badashima Imana mu ruhame, ni uko urukundo rwabuze. Ibi bigaragara aho umuntu ashima Imana ibyo yamukoreye bamwe mubo abimwiye, aho kwishimana nawe ahubwo kubibabwira bakabifata ko uri kubishongoraho, kubashinyagurira no kubaratira ko wateye indi ntambwe bo batarageraho; imwe mu mpamvu zatumye hari abantu bamwe baretse burundu gushima Imana mu ruhame bagahitamo kwicecekera. Ibi byose ni uko bibagiwe ko urukundo rw'ukuri rutagira ishyari

4-Urukundo ntirushaka ibyarwo. Ufite urukundo ntareba inyungu ze bwite gusa. Ntugahitemo kubana n'umuntu kubera gusa ko mufite icyo mumarirana, ahubwo n'uwo ubona ko wagirira umumaro nubwo we yagaragara ko ntacyo yakumarira uzabane nawe, urwo ni rwo rukundo Bibiliya idusaba kugira.

5-Urukundo ntirutekereza ikibi ku bantu. Urukundo ntirugira inzika, nta nubwo rutekereza kugira nabi mu buryo ubwari bwo bwose.

6-Urukundo ni ukubabarira byose. Nubwo hari abantu bamwe bafite ibyo bamaze gusa n'abavangura mu bindi bakavuga ko kubibabarira byo bidashoboka. Ukumva umuntu ati: “Iki nakikubabarira ariko uramutse ukoze iki na kiriya byo sinakwihanganira…” Nyamara urukundo tubwirizwa n'Ibyanditswe byera ntacyo rutababarira. (1 Abakorinto 13:4-7)

Ntiwabasha gukunda Imana utarasobanukirwa urwo yagukunze. Ntiwabibasha utamenye uko yatanze Umwana wayo w'ikinege Yesu agatambwa ku bwacu.

Ntiwakunda na mugenzi wawe utamenye ibyo byombi. Ubashije kumenya imbabazi ugirirwa n'Imana umunsi ku wundi ko utazikwiye ahubwo uzihabwa kubw'ubuntu gusa, byatuma nawe ubabarira mugenzi wawe ataranagusaba imbabazi. Uru rukundo rero ntirwitura inabi wagiriwe, ikibi nticyiturwa ikibi ahubwo icyiza gisimbuzwa ikibi nkuko tubisoma ngo “ibyo mukora byose mubikorane urukundo. (1 Abakorinto 16:14)

Twigāne Imana nk'abana bakundwa nayo; ibyo idukorera bitubere nk'igishushanyo-mbonera cy'ibyo natwe dukwiye kugirira abandi. Ibyo dukennye mu mitima tubiyibwire, tuyisabe itwihishurire mu rukundo rwayo. Amen!

Past. GATANAZI Justin
Rejoice Africa Ministries
NEZERWA.Com

Hari ibyiza bitagereranywa bigera ku wumviye umuhamagaro w'Imana

By Ubwanditsi

Petero ahamagarwa na Yesu amusanze ku nyanja, mu byukuri yari amuhamagariye gukora umurimo w'Imana wo kubwiriza ubutumwa bwiza no kuzana abantu ku Mana. Yesu ahamagara Petero yaramubwiye ati: “ nubwo wajyaga uroba amafi mu nyanja ariko ubu noneho nguhinduye umurobyi w'abantu ugiye kujya uroba abantu ubavana kwa Satani mu rupfu ubazana mu gakiza k'Imana” Luka 5: 10.

Impamvu Yesu yashatse guhindurira Petero akazi, Yesu yashakaga ko Petero noneho akoresha imbaraga ze mu gukiza intama zazimiye, Yesu yashakaga ko none areka kuroba agatangira gukora imirimo izamuhesha ingororano zitangirika.

Nyamara Petero ntiyumvuye ijwi ry'Umwami Yesu, Bibiliya itugaragariza ko Simoni Petero yabwiye bagenzi be ati: “Ngiye kuroba” Yohana 21: 3 maze nabo bemera kujyana na we.

Bibiliya itubwira yuko ngo na bagenzi be bari bemeye kujyana nawe kuroba, bageze ku nyanja, bakesheje ijoro ryose baroba ariko ntibagira icyo bafata. Nubwo Petero yari umuhanga uzobereye kuroba, nubwo yari afite ubunararibonye muri uwo mwuga, ariko iryo joro byamubereye igitangaza ayoberwa uko byagenze.

JPEG - 198.9 kb
Umuhanuzi Yona yanze kumvira Imana amara mu nda y'urufi iminsi itatu hanyuma kubwo umugambi w'Imana, urufi rujya kumuruka i Nineve abaho barakizwa

Petero iyo yabaga yagiye ku murimo w'Imana hari benshi bakizwaga ku bwe, iyo yabaga yasenze hari ababonaga amahoro, indwara zigakira ku bwe. Ni iki cyatumye Petero aruhira ubusa ijoro ryose? Nta yindi mpamvu yatumye ahura na kariya kaga ku nyanja ni uko yari yataye umuhamagaro we wo kubwiriza ubutumwa bwiza, ahubwo asubira mu byo yari yabujijwe kongera gukora, bituma atahabonera umugisha.

Nubwo kenshi twirwanirira tugashaka kwerekeza mu nzira twihitiyemo ubwacu, aho Imana idashaka ko tujya rimwe na rimwe hari nubwo Imana iba yarakweruririye ikakwereka umurimo wayo ugomba gukora ariko ukanga ukayihunga ukajya mu zindi gahunda zawe.

Kuko Imana ikunda umuntu itagambirira kumubabaza, nta mugisha ushobora kubonera aho wahungiye ijwi ryayo kugeza ubwo ugarutse mu cyo yaguhamagariye gukora hanyuma ukabona kubona imigisha yayo itandukanye iba yarahaguteguriye.

Ariko kuko Yesu ari umutunzi w'imbabazi arahagoboka n'ijwi ryiza ryuzuye imbabazi arababaza ati : “Yemwe bana banjye mufite icyo kurya?” Baramusuzbiza bati: “Nta cyo” Yohana 21: 5 arababwira ati: “nimujugunye urushundura iburyo bw'ubwato nibwo mufata” Nuko bararujugunya, kubera ifi nyinshi bahise bafata, urushundura rwenze gucika ntibaba bakibasha kurukurura.Kubwo kumvira Imana byatumye bafata ifi nyinshi ndetse bananirwa gukurura urushundura.

Nshuti muvandimwe, niwemera kumvira Imana uzabera inshuti zawe umugisha, uzabera abaturanyi bawe umunyamugisha, abavandimwe bawe bazakubonamo uwakamaro kuri bo, niwemera kumvira umuhamagaro w'Imana igihugu cyawe kizagira umugisha kubwawe.

Hari byinshi Imana izakora kubwo kwigomwa ibyawe byakunezezaga ukumvira umuhamagaro w'Imana ku buzima bwawe.
Nyamara ariko hari n'abatubereye urugero rwiza bumvira Imana

Dusoma mu gitabo cy'Itangiriro 6: 13 inkuru z'umugabo wumviye Imana witwa Nowa, Uwiteka aramubwira ati : “Nitegereje mu isi yose mbona ari wowe unkiranukira muri iki gihe abantu bose babaye babi bangomeye, none kubw'ibyo baza inkuge.”

Mu by'ukuri urebye hari impamvu zari gutuma Nowa atemera kubaza inkuge: iyambere ni uko kuva Nowa yaremwa yabaho yari atarabona imvura, kuko kuva mu iremwa ry'isi, Imana yajyaga itotesha ubutaka ikoresheje ikime kiva mu ijuru gusa, nta mvura yari yarigeze igera ku isi muri icyo gihe.

Ariko uku kutamenya imvura kwa Nowa ntibyari ibye, icye cyari ukumvira gusa. Impamvu ya kabiri, kugira ngo Nowa abone buri bwoko bw'inyamaswa y'isekurume n'inyagazi cyane cyane mu nyamaswa z'inkazi azinjize mu nkuge byari bikomeye cyane byari kumugora rwose. Ariko akimara kumvira gusa, ibintu byose byaramwubashye buri gikoko ahamaye cyose kikamwitaba nta mananiza.

Niwumvira Imana ibintu byose bizakubaha, niwemera kumvira Imana ibyari byaragusuzuguye byose bizakumvira utagowe, ibintu byose bizajya ku murongo, ibitagenda bizagenda neza utavunitse kuko wemeye kumvira Imana. Nuramuka wumviye Imana hari ibintu bitagiraga umurongo uzaha umurongo mu izina ry'Uwiteka Imana.

Imana irangije ibwira Nowa ukuntu igiye kurimbura abatuye isi kuko bahindutse babi cyane, Nowa ntiyigeze aburana n'Imana ahubwo yashyize mu bikorwa icyo abwiwe n'Uwiteka gukora. Nowa abaza inkuge yinjiramo, amaze kwinjiramo n'ibindi byose yari yategetswe n'Imana kwinjiza mu nkuge, umwuzure waraje urimbura isi Nowa arokokana n'abamwumviye bakinjirana nawe mu nkuge.

Mu bice 9 by'icyo gitabo cy'Itangiririo duhereye ku murongo wa mbere, tubona uburyo Imana yahaye Nowa umugisha n'abana be bose, imuha isezerano rikomeye kuko gusa yemeye kumvira. Imana idufashe

NEZERWA.com

  • November 17th 2016 at 05:09

Prophet Sultan Eric uhanurira abantu yabanje kubaka ituro riremereye, ni ishyaka ry'umurimo cyangwa ni ubucuruzi ?

By Ubwanditsi

Umuhanuzi Sultani Eric uyobora itorero Zeal of the Gospel church rikorera i Nyamirambo mu mujyi wa Kigali, afite gahunda itamenyerewe cyane mu yandi matorero ya hano mu Rwanda yo gusengera abantu akabahanurira ariko babanje kumuha ituro riremereye dore ko abashyitsi abaca ibihumbi 20 naho abasangwa akabaca ibihumbi 10 by'amanyarwanda.

Gusengera abantu no kubahanurira ubabwira ibizababaho mu buzima bwabo ni gahunda nshya y'itorero Zeal of the Gospel church rikuriwe na Prophet Sultan Eric.

Ni itorero rimaze imyaka itanu rikorera mu Rwanda, icyicaro gikuru kikaba giherereye i Nyamirambo ku muhanda ujya ku Mumena utari winjira mu muhanda w'amabuye. Kuri ubu ku mbuga nkoranyambaga cyane cyane izihurirwaho n'abakristo, hari kuvugwa cyane iyi gahunda ya Prophet Sultan yo guhanurira abantu bishyuye amafaranga atari macye dore ko atapfa kubonwa n'umuntu uwo ariwe wese. Na we urabyumva 20.000 Frw hano mu Rwanda ni amafaranga abonwa n'umugabo.

Prophet Sultani Eric akaba yarashyizeho gahunda yo kubonana n'umuntu wese ubishaka, akamuhanurira abanje kumwishyura, ubundi ngo agatahana igitangaza cye. Muri iyi gahunda ye nshya, dore amagambo yatangaje mu rwego rwo kwamamaza iyi gahunda idasanzwe.

Benshi babonye iryo tangazo ntabwo barivuzeho rumwe kuko hari abemeranya na Sultani hakaba n'abavuga ko ari ukurya amafaranga y'abanyarwanda babashukishije ubuhanuzi ndetse abandi bakavuga ko ibimenyetso by'abahanuzi b'ibinyoma.

“Ushaka kumenya icyo Imana ivuga ku buzima bwawe, ejo hazaza hawe, urashaka gukira indwara, ntucikwe n'umugisha wo kwibonanira n'umuhanuzi w'Imana muri mwenyine muri gahunda nshya ya Zeal of the Gospel church. Abashyitsi ni 20.000Frw, naho abasangwa ni 10.000Frw. Kwakirwa ni buri munsi. Ijambo rivuye ku Mana ryahindura ubuzima bwawe." Iryo ni itangazo ryamamaza iyi gahunda."

JPEG - 353.9 kb
Nguku uko ibiciro bihagaze muri iri torero ryitwa Zeal of the Gospel church

Umwe mu bakristo wagize icyo avuga kuri iyi gahunda idasanzwe yadukanywe ya Prophet Sultan Eric, yagize ati "Ubu se uyu atandukaniye he n'abahanzi bitwa abaramyi binjiriza abantu muri za concerts zabo cyangwa abashumba baka ibitambo n'imbuto zo kubiba n'ibindi.

Njye mbona nta gitangaza uyu akoze ahubwo ari ibisanzwe usibye ko abikoze mu buryo bwe." Umuvugabutumwa Uwagaba Caleb Joseph wo mu itorero Bethesda Holy church aganira na Inyarwanda.com, yavuze ko guhanurira abantu wabanje kubarya amafaranga ari ibintu bibabaje cyane ndetse bikaba bimuteye ubwoba, gusa ngo byose byarahanuwe ko mu gihe cy'imperuka hazaduka abahanuzi b'ibinyoma, yagize ati:

"...Biratangaje kandi birababaje gusa na none ibi byarahanuwe iminsi ya nyuma tuyirimo. 'Icyo gihe umuntu nababwira ati Dore Kristo ari hano cyangwa ati dore ari hariya ntimuzabyemere kuko hazaduka abiyita Kristo n'abahanuzi b'ibinyoma bakora ibimenyetso n'ibitangaza kugira ngo babone uko bayobya n'intore niba bishoboka. Mariko 13: 21-22 Mfite ubwoba ko no mu Rwanda bihageze nonese ubwo ntihasigaye kuvuga ngo yemwe yemweee nimuze mwakire ibitangaza byanyu ku giciro utasanga ahandi."

Nyuma yo kubona aya makuru ndetse no kuganira na bamwe mu bakristo batunga agatoki Prophet Sultan Eric bamushinja gucuruza ijambo ry'Imana, ubutekamitwe n'ibindi bashingiraho bamwita umuhanuzi w'ibinyoma, ndetse hakaba n'abavuga ko bamuzi neza ko ari umunyabuntu, Inyarwanda.com, twegereye umwe mu byegera bya Prophet Sultan Eric adutangariza impamvu bahisemo kujya bishyuza abakristo n'abandi bose bashaka guhanurirwa.

Amafaranga yakwa ngo ni ituro ry'umuhanuzi ndetse no kugerageza kwizera kwabo
Pastor Alex Ruberwa umwe mu bayobozi ba Zeal of the Gospel church, yabwiye Inyarwanda.com ko kwishyuza abantu kugira ngo bahanurirwe ari mu rwego rwo kugerageza ukwizera kwabo.

Yavuze ko atari ubucuruzi cyangwa kunyunyuza ababagana ahubwo ko ari ituro ry'umuhanuzi. Yavuze ko no muri Bibiliya hari abantu bajyaga bageragezwa hagapimwa kwizera kwabo mbere yo gukorerwa igitangaza. Yaduhaye urugero rw'umunyacyubahiro wasabwe kwibira inshuro 7 muri Yorodani akabona gukira ibibembe. Yunzemo ko iyo baguhanuriye watanze amafaranga, ijambo ry'ubuhanuzi ubwiwe uribyaza umusaruro. Yagize ati:

"Muri rusange ni ituro ry'umuhanuzi ariko akenshi aba ari ugupima kwizera kw'abantu kuko abantu benshi baza imbere y'abakozi b'Imana ntabwo baba bizeye aba ari ukugerageza ama chance (amahirwe) kubera ko ava iruhande rwawe akajya no kwa muganga kandi yari yaje ngo mumusengere indwara runaka ariko nta kwizera, na we ukaba ubizi ko atakwizeye. Rero rimwe na rimwe hari igihe ushyiraho ituro ari ugupima kwizera kw'umuntu. Si uko umuntu aba akeneye amafaranga cyane ahubwo ni ugupima kwizera kw'umuntu kugira ngo urebe ko akwizereyemo kuko umuntu waguhaye ibihumbi 10 (10.000Frw) ijambo wamuhaye aribyaza umusaruro akaryakirana umutima wizeye. Ni motivation yacu kugira ngo abantu ntibapfe kuza batizeye."

Pastor Alex Ruberwa yakomeje ati: "Ni nka kwa kundi umuhanuzi yabwiye Namani kugenda akidumbaguza muri Yorodani, biriya ni condition yo kupima niba umuntu yizeye. Iriya ni gahunda y'umuntu ukeneye privacy hari abantu badakunda ko babahanurira muri rusange nibo bareba umuhanuzi gutyo ku ruhande ariko abandi tubahanurira ku buntu muri rusange(mu ruhame)."

JPEG - 197.2 kb
Umuhanuzi Sultan Eric umuyobozi mukuru wa Zeal of the Gospel church mu Rwanda

Menya byinshi usobanukirwe ibimenyetso biranga umuntu urwaye impyiko

By Ubwanditsi

Inzobere mu buvuzi bw'impyiko Emile Rwamasirabo, arasobanura ibimenyetso by'indwara y'impyiko, agasaba ubonye ibyo bimenyetso kwihutira kwa muganga.

Bimwe mu bimenyetso by'indwara y'impyiko ni: kwihagarika inkari nkeya cyangwa ukazibura, kwihagarika amaraso, kubyimba umubiri wose, kugabanuka k'umuvuduko w'amaraso, kugabanuka kw'imyunyu ngugu mu maraso, kuribwa ahagana inyuma mu mugongo cyangwa mu maguru no kugira isesemi ishobora gutuma uruka.

Umuganga w'inzobere mu kuvura impyiko, Dr Rwamasirabo Emile ukora mu Bitaro byitiriwe Umwami Faisal (KFH), anasesengura birambuye ibintu 3 by'ibanze bitera indwara z'impyiko.

Dr Rwamasirabo Emile inzobere mu kuvura impyiko

Avuga ko muri byo harimo ibishobora gutera indwara z'impyiko bitaziturutseho ubwazo, izifata umubiri nyuma zikazafata n'imyiko (pre-renal), ibituruka ku mpyiko ubwazo (renal) n'ibiza nyuma y'uko impyiko zifatwa (post-renal).

Ibishobora gutera indwara z'impyiko bitaziturutseho

Mu bintu bishobora gutera indwara z'impyiko ariko bidaturutse ku mpyiko ubwazo, Dr Rwamasirabo avugamo indwara zibasira umubiri zigatera kugabanuka kw'amaraso, nko kuruka cyane, kunanirwa k'umutima, gucibwamo (diarrhee) diyabete no gutakaza amaraso menshi nko mu bihe by'impanuka.

Uko kugabanuka kw'amaraso bituma ajya mu mpyiko agabanuka ntizibashe kuyungurura neza imyanda yo mu maraso hanyuma bikazitera uburwayi.

Ibituruka mu mpyiko ubwazo

Mu ndwara z'impyiko ziterwa na zo ubwazo, Dr Rwamasirabo avugamo indwara ya kanseri n'indwara ziterwa n'ubwirinzi bw'umubiri ubwawo (maladie auto-immune).

Umuntu ufite ubwo burwayi, umubiri we ukora abasirikare barwanya ibice by'umubiri noneho bigatera ibyo bice kwangirika cyangwa gukora nabi kandi mu bice by'umubiri impyiko na zo zirimo.

Ibibazo biza nyuma y'impyiko

Dr Rwamasirabo asobanura ko impyiko ubwazo iyo zirwaye akenshi inkari zidasohoka ngo zijye hanze, uko kugumamo bikaba bitera ubundi burwayi bwazo ndetse n'ubw'ibindi bice byo hanze yazo ariko bifatwa nk'inzira y'inkari.

Mu bishobora gutuma ibyo bice bidakora neza harimo kanseri zibasira uruhago rw'inkari, kanseri y'ubugabo (prostate), indwara nk'igituntu, rubagimpande, n'ubwandu butandukanye bushobora gufunga inzira y'inkari.

Dr Rwamasirabo ashishikariza abantu bose kwisuzumisha indwara z'impyiko cyane abafite uburwayi bwabakururira ibyago byo kurwara impyiko bwavuzwe hejuru.

Src: Izuba rirashe

  • November 1st 2016 at 01:11

Sobanukirwa impano y'ubwenge itangwa n'Umwuka Wera

By Rejoice Africa Ministries

Umwuka w'Imana ni Umwuka w'ubwenge, n'umukiristu wese wuzuzwa uwo Mwuka ahabwa ubwenge bw'ukuri. Uwiteka yavuze kuri Besaleli mwene Uri ati: « Mwuzuze Umwuka w'Imana ngo agire ubwenge bwo guhimba n'ubwo gutora n'ubuhanga n'ubukorikori bwose bwo guhimba imirimo y'ubuhanga, no gucura izahabu n'ifeza n'imiringa, no gukeba amabuye yo gukwikira, no kubaza, no kugira ubukorikori bwose » Kuva 31: 3-5

Icyo gice cya Bibiliya kitubwira yuko ubwo bwenge bwa Besaleli yagiraga ubwo gukora imirimo myinshi y'Ihema, atari ubwa kavukire. Kandi ntiyabugize mu buryo bwo kwiga cyangwa kwimenyereza mu myaka myinshi ahubwo yabugize mu buryo bwo kuzuzwa Umwuka Wera w'Imana.

Uko ni ko byabaye no kuri Sitefano, uwapfiriye Imana wa mbere. Yari yuzuye kwizera n'Umwuka Wera, niyo mpamvu yuzuye n'ubwenge Ibyakozwe n'intumwa 6: 10.

Bwa bwenge twahawe n'Umwuka Wera ni ubw'Umwuka kandi si kimwe n'ubwenge twaherewe mu nyigisho nyinshi cyangwa se kuba inararibonye. Intumwa Pawulo yaravuze iti: « Ubwenge tubuvuga mu batunganijwe rwose ariko ubwo bwenge si ubw'iki gihe cyangwa ubw'abatware b'iki gihe bashiraho » 1Aabakorinto 2: 6.

Yongera ati: « Mu batware b'iki gihe nta wabumenya kuko iyo babumenya ntibaba barabambye Umwami w'icyubahiro ariwe Kristo Yesu. Ahubwo tuvuga ubwenge bw'ubwiru bw'Imana ari bwo bwenge bwahishwe. Imana yaringanije ibihe byose bitarabaho ngo buduheshe icyubahiro » 1Abakorinto 2: 8. Kubaha Uwiteka ni ishingiro ry'ubwenge. Nuko rero umukiristu agomba kubaha Imana cyane kugira ngo agire ubwenge bw'ukuri.

« Ubu bwenge bwiza buva mu ijuru buraboneka, kandi ni ubw'amahoro, ni ubw'ineza bwemera kugirwa inama bwuzuye imbabazi n'izindi mbuto nziza, butarobanura ku butoni, kandi butagira uburyarya » Yakobo 3: 17.

Ubwenge bwo mu ijuru buruta ubwenge bw'abantu. « Ubupfu bw'Imana burusha abantu ubwenge kandi intege nke z'Imana zirusha abantu imbaraga » 1Aabakorinto 1: 25.

Dusoma mu rwandiko Pawulo yandikiye Abakolosayi 2: 3 « Muri we (Kristo Yesu) ni mwo ubutunzi bwose bw'ubwenge no kumenya bwahishwe.» Natwe iyo twuzura Umwuka we tugabirwa ubwo bwenge. Salomo warushaga abandi bose ubwenge yaravuze ati: « Ubwenge bugira akamaro ko kuyobora. » Umubwiriza 10: 10. Impano y'Umwuka yitwa ijambo ry'ubwenge, ni ubushobozi bwo kuvuga amagambo akwiriye mu buryo bukwiriye no mu gihe gikwiriye.

Ijambo ry'ubwenge ni impano y'Umwuka ifite akamaro kenshi mu murimo w'Imana . Ijambo ry'Imana riti: « Umunyabwenge agarura imitima » Igitabo cy'Imigani 11: 30.

Iyo twitegereza abagabo n'abagore bakoreshejwe cyane n'Imana, tubona ko bari bafite ubwenge bwinshi. Bavugaga amagambo akwiriye mu gihe gikwiriye, kandi mu buryo butuma abumvise bafashwa mu mitima. Bakamenya aho baturuka abanyabyaha, bakamenya n'uruhare babarasamo imyambi y'Ijambo ry'Imana Ibyakozwe n'intumwa 2: 37-39.

Amagambo y'ubwenge ya Yesu yagize umumaro ubwo yahuraga n'umusamariyakazi.

Tubona akamaro k'ubwo bwenge iyo dusomye mu butumwa bwiza uko bwanditswe na Yohana 4: 1 igihe Yesu yahuye n'umusamariyakazi. Ubwo Yesu yavuganye nawe aherako amwereka ibyaha bye, uwo mugore nta gushidikanya yagombaga kumuhunga bigatuma atagera ku gakiza. Ariko none yabaye umugabo wo guhamya uko imbaraga z'agakiza zishobora guhindura umuntu. Ibyo byose byatewe n'uko Yesu yamusanze mu bwenge no mu rukundo.

Mbere Yesu yamusabye amazi yo kunywa nuko umugore atega amatwi cyane. Yongera kumutekerereza iby'amazi y'ubugingo amara inyota yo mu mutima, bituma uwo mugore atangira kuyifuza. Igihe yari yamubwiye guhamagara umugabo we niho imibereho yo mu byaha yamugaragariye. Ibyo byamuteye kwibwira ko Yesu ari umuhanuzi. Nuko yiringira Yesu amukingurira umutima we. Mu gihe kirekire yajyaga yibaza ku byerekeye kubaha Imana. Ni nacyo cyatumye amubaza ati: « Ba sogokuruza bacu basengeraga kuri uyu musozi namwe mukagira ngo I Yerusalemu niho bakwiriye gusengera. »

Mu mutima we w'ibyaha n'irari ribi byo mu myaka myinshi, hasigayemo icyifuzo cyavuye ku Mana: Icyo kwezwa gucungurwa n'icyo gukorera Imana. Mu magambo make Yesu yamusobanuriye ibyo kubaha Imana nyakuri, nawe yumvise neza . Yesu ati: « Mugore nyizera igihe kizaza ubwo bazaba batagisengera Data kuri uyu musozi cyangwa I Yerusalemu. Dore mwebweho musenga icyo mutazi, ariko twebweho dusenga ibyo tuzi kuko agakiza kava mu Bayuba. Ariko igihe kiraje ndetse kirasohoye, ubwo abasenga by'ukuri basengera Data mu Mwuka no mu kuri. Kuko Data ashaka ko bene abo ari bo bamusenga. Imana ni Umwuka n'abayisenga bakwiriye kuyisengera mu Mwuka no mu kuri » Yohana 4: 21-24.

Umusamariyakazi yuzuzwa imbaraga z'ayo magambo y'Umwami Yesu ati: « Nzi yuko Mesiya azaza ari we witwa Kristo kandi ubwo azaza azatubwira byose. » Yasize ikibindi cye aragenda ajya mu mudugudu, abanza guhamya yuko yasanze Umukiza w'abantu.

Ukwizera kwe gushyashya n'uguhinduka kwe mu mutima byamuteye kugira umwete kugira ngo bose babone cya gitangaza yabonye ku buntu. Yesu yagaruye umutima w'uyu munyabyaha ku bw'amagambo ye y'ubwenge, na we yahamije y'uko Yesu ari umucyo w'isi n'Umukiza w'abanyabyaha bazimiye.

Ni kuki abakuru b'amatorero bahura n'ibikomeye ndetse bikabananira?

Amagambo y'ubwenge afite akamaro ko kurangiza impaka mu matorero. Kenshi Abakuru b'Amatorero bahura n'ibikomeye ndetse bikabananira. Dusoma kuby'ab'Itorero ry'I Korinto uko bahatiwe kuburanira ku bakiranirwa kuko batemeye. Ubwo buryo butuma Pawulo ahana ababugize bose. Pawulo yandikanye ishyaka ati: « Iyo umuntu wo muri mwe afite icyo apfa na mugenzi we mbese ahangara kuburanira ku bakiranirwa, ntaburanira ku bera? Ntimuzi ko abera bazacira ab'isi urubanza?

Kandi ubwo ari mwe muzacira ab'isi urubanza, ntimushobora no guca imanza z'ibintu bito hanyuma y'ibindi? Nkanswe iby'ubu bugingo! Nuko rero niba mufite imanza zo gucibwa ku byerekeye iby'ubu bugingo, ni iki gituma mubishyira abadafite icyo bahuriyeho n'Itorero, ngo abe ari bo bazica? Ibyo mbivugiye kubakoza isoni » 1Abakorinto 6: 1-4.

Pawulo amaze kubabwira ko bakoze nabi, abereka ibikwiriye mu Matorero y'Imana. Arababaza ati: « Mbese koko nta munyabwenge n'umwe uba muri mwe wabasha gucira bene Se urubanza? » 1Abakorinto 6: 5. Pawulo abona ko ibitari byiza mu bantu b'Imana bikwiriya gucirwa urubanza, ariko si ku bakiranirwa ahubwo ni ku Bera b'Itorero.

Iyo amatorero aba afite abakristu bahawe impano y'ubwenge, kandi abakristu bakabumvira, ibikomeye byinshi byarangira vuba. Byanarinda Amatorero kwirema ibice no gucika intege.

Dosoma mu Byakozwe n'intumwa 6: 1 ku by'amakimbirane yashoboraga kwangiza Itorero. Abayuda ba Kigiriki batangiye kwitotombera Abaheburayo, kuko abapfakazi babo bacikanwaga ku igerero ry'iminsi yose. Ibi byose byabaye mu gihe cy'ububyutse n'umubare w'abakiristu wiyongeraga cyane. N'ubwo Satani atashoboye kwangiza Itorero mu buryo bw'akarengane gatewe n'abanyarukiko, yagerageje kubikora mu buryo bw'intonganya n'ukwinuba by'abakristu.

Nyamara intumwa zari zifite impano z'Umwuka, Satani ntiyashoboye gusohoza imigambi ye mibi. Abakuru b'Itorero bamaze kumva iby'uko kwinuba, bateranya abigishwa bose barababwira bati: « Ntibikwiriye ko tureka kwigisha Ijambo ry'Imana ngo twicare ku meza tugabura.

Nuko bene Data mutoranye muri mwe abantu barindwi bashimwa, buzuye Umwuka Wera n'ubwenge tubashyire kuri uwo murimo. Ariko twebweho tuzakomeza gusenga no kugabura Ijambo ry'Imana » Ibyakozwe n'Intumwa 6: 2-4.

Ubwo buryo bwo gukora bwagaragaje ubwenge bw'ukuri bw'intumwa. Ntizashoboye kwica amatwi kwibwira ngo: « Niba bashaka kwinuba binube bazacogora. » Icyakora bikomeje byazagira ingaruka mbi kuko byanditswe muri Yakobo 3: 5 ngo « Murebe namwe, ishyamba naho ari rinini rite, uburyo ritwikwa n'agashashi gato cyane! »

Ukwinuba guto gushobora kugwira kugeza ubwo kwatera intonganya nini ikarimbura Itorero. Niyo mpamvu intumwa zimaze kuburirwa, zihutiye kubahoza no guhosha ibyo byose.

Intumwa hari icyo zakoze, zashoboye gutoranya bamwe muri bene Data no kubashyira ku murimo wo kugabura ibyo kurya. Kubw'ubwenge bwazo habayeho amahoro mu Itorero n'ububyutse burakomera. « Nuko Ijambo ry'Imana rikomeza kwamamara umubare w'abigishwa ugwira I Yerusalemu abatambyi benshi bumvira uko kwizera » Ibyakozwe n'intumwa 6: 7.

Impano yo kuvuga Ijambo ry'Imana ry'ubwenge igira akamaro mu gihe cyo gutabara abari mu makuba n'umubabaro byo mu mutima. Birashiboka ko abakiristu nubwo batunganye rwose kandi bifuza cyane kuba mu bushake bw'Imana, bahura n'ibikomeye badashobora kwikiza ubwabo. Ntidushobora kumenya iby'Imana ibakorera.

Bahwana na Asafu wanditse muri Zaburi 73: 13-24 ngo « Ni ukuri nogereje ubusa umutima wanjye, kudacumura nagukarabiye ubusa kuko natewe n'ibyago umunsi ukira ngahanwa ibihano mu bitondo byose. » Bategerezaga umucyo bakabona umwijima, biringiraga itangaza bakagenda mu rwijiji Yesaya 59: 9

Mu makuba barabaza nka Dawidi ngo « Mana yanjye Mana yanjye ni iki kikundekesheje ukaba kure ntuntabare? » Zaburi 22: 1, cyangwa nka Yeremiya 14: 8,9 ngo « Ayiii, Byiringiro by'Isiraheli, Umukiza we wo mu gihe cy'amakuba kuki waba umeze nk'umushyitsi mu gihugu. Kuki wamera nk'umuntu wumiwe, nk'intwari inaniwe kurokora? » Abo bantu umunsi wabo wahindutse ijoro, umunezero wabo wahindutse umubabaro, ibyiringiro byabo byahindutse ukwiheba. Kubw'ibyo bakwiriye umufasha ushobora kubayobora no kubamenyesha, si ubwenge gusa, ahubwo n'umutima, yuko « ku bakunda Imana byose bifataniriza hamwe kutuzanira ibyiza » Abaroma 8: 28.

Icya ngombwa kugira ngo umuntu ashobore kubafasha atyo, ni impano yo kuvuga ijambo ry'ubwenge, ariko si bwa bwenge ab'iki gihe bamenye ahubwo ni ubwenge bw'ubwiru bw'Imana, ari bwo bwenge bwahishwe bukomoka ku Mwuka 1Abakorinto 2: 8-13.

Iyo inshuti za Yobu zigira iyo mpano, ntizajyaga kumubabaza zimubwira yuko ari ibyaha bye byamuteye iyo mibabaro yose. Ntizashoboye kumumenyesha yuko agakiza k'Imana atari ak'igihe cy'umunezero gusa, ahubwo hari nubwo kaba ak'igihe cy'ibigeragezo n'amakuba.

Impano y'ubwenge igira akamaro mu gufasha bagenzi bacu baguye mu byaha.
Impano y'ubwenge ifite igiciro cyinshi, igihe dushaka gufasha abakristo baguye mu byaha. Muri iki gihe abaguye benshi bakurikira inzira mbi ariko bashobora gukizwa, bafashijwe n'abafite impano yo kuvuga Ijambo ry'ubwenge. Bamwe baguma mu byaha kuko mu cyimbo cyo kubafasha abakristo babakangisha kubw'icyaha cyabo. Abandi baguma mu byaha kuko benshi batabitaho.

Iyo umukiristu aguye mu cyaha undi akamubwira amagambo akomeye gusa bimutera kwinangira umutima cyangwa kwiheba; biraruhije ko yagaruka. Ikindi kandi niba uwaguye akundwakajwe cyane byamutera kwibwira yuko ari nta cyaha yakoze. Biradukwiriye ko twamuhugura uburyo butuma amenya ko yacumuye bikamutera kugira umutima wo kwihana. Ariko hamwe n'ibyo biradukwiriye kumwereka n'urukundo, bituma yumva ko tudashaka kumwikoreza undi mutwaro ahubwo dushaka kuwumukuraho. Niba twifuza kugira dutyo, dukeneye bwa bwenge Umwuka Wera wenyine ashobora kuduha.

Iyi mpano y'ubwenge kandi idufasha no kwikura imbere y'abanzi bacu

Iyo dusoma mu Byakozwe n'intumwa 6: 9, 10 tubona yuko impano y'ubwenge idufasha cyane mu gihe cyo kwikiza abanzi bacu. Tuhasoma ngo « ariko abantu bamwe bo mu masinagogi… Barahaguruka bajya impaka na Sitefano nyamara ntibabasha gutsinda Ubwenge n'Umwuka bimuvugisha. » Nubwo Sitefano yari wenyine n'abanzi be ari benshi, ni we wabatsinze. Nyamara si ukuvuga kwe kwiza kwamubashishije gusubiza abo banzi bari bazabiranyijwe n'uburakari, ahubwo ni ubwo bwenge yahawe n'Umwuka Wera.

Henshi mu butumwa Bwiza Yesu yerekana ko Umwuka Wera ashaka kandi ko ashobora guha abizera ubwenge bwo kwiregura mu bikomeye byabo. Muri Luka 21: 12 yavuze bitaraba yuko abigishwa be bazababazwa kubwe ati: « Ariko ibyo byose bitaraza bazabafata babarenganye, babajyane mu masinagogi no mu mazu y'imbohe, babashyire abami n'abategeka babahora izina ryanjye. » Yongera ati: « Nuko mumaramaze mu mitima yanyu yuko mutazashaka ibyo mwireguza icyo gihe kitaragera, kuko nzabaha ururimi n'ubwenge iby'abanzi banyu bose batazabasha kuvuguruza cyangwa gutsinda. » Luka 21: 14, 15

Umukiristu umaze kugirirwa nabi n'abanzi be, ntakabakangije amagambo akomeye kugira ngo yiregure. Nta na rimwe Yesu yagenje atyo. Dusoma mu rwandiko rwa mbere rwa Pereto 2: 23 ngo « Yaratutswe ntiyabasubiza yarababajwe ntiyabakangisha ahubwo aritanga yiha Idaca urwa kibera. » Ariko kandi ntagomba no kugira ubwoba cyangwa guhagarika umutima. Ibimukwiriye ni ukwicisha bugufi no kumera nk'umwana w'intama Yesaya 53: 7, ariko hamwe n'ibyo agomba gukomera agashira ubwoba nk'intare, akemera gufatanya n'abandi umunezero no mu gihe cy'imibabaro myinshi Ibyakozwe n'Intumwa 4: 19, 20; 5: 41.

Asubize neza ibibazo byo kumushinyagurira yibuke iteka kugerageza gufasha abamurega n'abacamanza be Ibyakozwe n'intumwa 26: 27-29.

Ibya ngombwa kugira ngo umuntu agenze atyo, ni ukwiha Imana rwose no kuzuzwa Umwuka Wera, bigatuma ahabwa amagambo y'ubwenge akwiriye uwo mwanya.

Impano y'ubwenge itanga no kubasha guhishura ibihishwe

Impano yo kuvuga ijambo ry'ubwenge ihesha uyifite guhishurira abizera ibyo biringizwa n'iyabahamagaye; bakamenya n'ubutunzi bw'ubwiza bw'ibyo azaraga abera, bamenya kandi n'ubwinshi bw'imbaraga zayo butagira akagero, izo iha twebwe abizeye nk'uko imbaraga z'ububasha bwayo ziri.

Abefeso 1: 18, 19 Pawulo yari afite iyo mpano, kubw'ibyo kuvuga nk'uko byanditswe mu 1Abakorinto 2: 9 ngo « iby'ijisho ritigeze kureba n'iby'ugutwi kutigeze kwumva, ibitigeze kwinjira mu mutima w'umuntu, ibyo byose Imana yabiteguriye abayikunda. »

Yari afite ubushobozi bwo kumenya imigambi yera y'Imana, yari yaheshejwe ubwiru bwayo, n'ibitekerezo byayo, kugira ngo abimenyeshe abantu. Ariko Imana yabiduhishurishije Umwuka wayo, kuko Umwuka arondora byose, ndetse n'amayoberane y'Imana 1Abakorinto 2: 10.

Yakobo yanditse ati : « Ariko niba hariho umuntu muri mwe ubuze ubwenge abusabe Imana, iha abantu bose itimana, kandi azabuhabwa. » Yakobo 1: 5
Iyo dutekereje akamaro k'impano y'ubwenge n'uko ikwiriye kuba mu Itorero ry'Imana, bitugaragariza ko buri mukiristu akwiriye kuyifuza no kuyishaka, yaba umukuru w'Itorero cyangwa se mu bandi bakiristu.

Ubutaha tuzarebera hamwe ubusobanuro bw'impano ya kabiri muri izi icyenda.
Hari icyifuzo, igitekerezo, inyunganizi cyangwa ikindi cyose wifuza kutubwira kuri iri

Ntugahweme kudusigira igitekerezo cyawe hano hasi ahabigenewe kuko ni icy'ingenzi kuri twe no ku murimo w'Imana. Nyuma yo gusuzumwa gihita kigaragara ku rubuga.

Rejoice Ministries

Impamvu abahamya ba Yehova badaterwa amaraso ntibanemere umusaraba

By Ubwanditsi

Abahamya ba Yehova, hari byinshi badahuriraho n'abandi bantu bo mu madini atandukanye ya gikirisitu n'ubwo bose bemera Imana imwe Yehova ndetse n'umwana wayo Yesu Kristo bita umucunguzi wabo.

Mu byo badahuza n'abandi bizera Kristo harimo ko bo badakoresha umusaraba, kuko bavuga ko Yesu atapfiriye ku musaraba ahubwo yapfiriye ku giti, ntibemera no guterwa amaraso iyo byabaye ngombwa ko umuntu arwara akaremba kuburyo akenera kongererwa amaraso.

N'ibindi birimo ko bataririmba indirimbo yubahiriza igihugu cyangwa ngo bubahirize ibendera ryacyo, byinshi mu byo batemera bakavuga ko ari Bibiliya ibibategeka, kuko itabyemera.

Nk'uko urubuga jw.org, rw'abahamya ba Yehova (Jehovah's Witnesses), rubitangaza, hari ibintu byinshi abahamya ba Yehova batemeranywaho n'abandi bakirisitu bose bemera Yehovah (Imana), kandi bose bakoresha Bibiliya ijambo ry'Imana.

Imwe mu mpamvu ituma batemera umusaraba, ngo ni uko Bibiliya ivuga ko Yesu atapfiriye ku musaraba, ahubwo yapfiriye ku giti, kandi Bibiliya ikaba isaba abakristo ko bahunga ibikorwa byo gusenga ibigirwamana, harimo no gukoresha umusaraba. (1 Abakorinto 10:14; 1 Yohana 5:21)

Yesu yaravuze ati: “Nibyo bose bazabamenyeraho ko muri abigishwa banjye, nimukundana!” (Yohana 13:34, 35). Abasobanuzi ba Bibiliya bavuga ko aha yashakaga kuvuga ko abigishwa be bari kuzarangwa n'urukundo ruzira ubwikunde, Atari umusaraba wagombaga kubaranga.

Ibyo guterwa amaraso

Icy'ingenzi kurushaho, ni uko Imana yadutegetse kwirinda amaraso, kuko ashushanya ikintu cyera, ibuza kandi kugaburira umubiri amaraso (Abalewi 17:11, Abakolosayi 1:20, Ibyakozwe 15:20), Bibiliya ntiyemera imiti cyangwa uburyo bwo kuvurwa bufitanye isano n'ubupfumu (Abagalatiya 5:19-21)

Kuri uru rubuga rw'abahamya ba Yehovah handitswe ubusobanuro ku myizerere yabo ku bijyanye no guterwa amaraso mu magambo akurikira, “Twe n'imiryango yacu duharanira icyatuma twivuza neza uko bishoboka kose, iyo turwaye, twivuza ku baganga bafite ubuhanga bwo kutuvura cyangwa kutubaga bitabaye ngombwa ko badutera amaraso.”

“Twishimira cyane iterambere ryagezweho mu by'ubuvuzi, ariko hari uburyo bwo kuvurwa hadakoreshejwe amaraso bukoreshwa mu kuvura abarwayi b'Abahamya, busigaye bukoreshwa no mu kuvura abantu bose.”

“Mu bihugu byinshi, umurwayi uwo ari we wese ashobora guhitamo kuvurwa hadakoreshejwe amaraso kugira ngo yirinde ingaruka ziterwa no guterwa amaraso, urugero nk'indwara zandurira mu maraso, iziterwa n'ubwivumbure bw'umubiri n'izindi ziterwa n'amakosa y'abaganga.”

“Icyakora, uburyo bwinshi bwo kuvurwa ntibunyuranyije n'amahame yo muri Bibiliya. Ku bw'ibyo, umuntu ni we wihitiramo uburyo yakoresha. Umuhamya umwe ashobora kwemera gukoresha uburyo runaka cyangwa imiti runaka, undi akabyanga (Abagalatiya 6:5)

  • October 1st 2016 at 00:31

Sibura amariba yawe yasibamye ubone uko usingira isezerano ryawe

By Ubwanditsi

« Malayika w'Uwiteka yiyereka uwo mugore aramubwira ati "Dore uri ingumba ntiwigeze kubyara, ariko uzasama inda ubyare umwana w'umuhungu. Nuko ndakwinginze wirinde kunywa vino cyangwa igisindisha kandi ntukarye ikintu cyose gihumanya, kuko uzasama inda ukabyara umuhungu. Kandi ntihazagire umwogosha kuko uwo mwana azaba Umunaziri ahereye akiva mu nda ya nyina, kandi ni we uzatangira gukiza Abisirayeli amaboko y'Abafilisitiya. » (Abacamanza 13: 3-5)

Dusoma muri Yohana 7: 39 aho Yesu yihamiriza ati: "Unyizera, imigezi y'amazi izatemba iva mu nda ye..." niko Yesu yadusezeranije. Yesu ibyo yakoze ni uko iyi migezi yayishyize muri twebwe.

Iriba ridushishikaje ni iriba rya Yesu. Burya nta wakwera imbuto z'Umwuka Wera adakijijwe cyangwa se ngo abone imbaraga zo kunesha icyaha adafite iri riba muri we. Nubwo waba uri inyangamugayo, ariko udafite Yesu muri wowe, ntiwaba umutsinzi.

Hari uruhare rwawe mu kumenya aho iriba ryawe ryasibiwe

Iriba ry'umugabo mu rugo nirisibama ab'urugo bazahagirira ingorane, iriba ry'umuririmbyi niriba risibwe nta musaruro w'indirimbo ze nubwo yaririmba neza. Ikibazo gikomeye turi guhura nacyo mu bo mu nzu y'Imana, ni uko benshi bacyeza abami babiri. Bagaha Imana wa mwanya bari mu rusengero ariko kandi biyoberanya, bagera hanze bagakorera na Satani, bakijandika mu byaha biteye isoni.

Ukuvuka kwa Samusoni ni umushinga w'Imana. Erega nawe kuba uri umukiristu ukaba uri mu bana b'Imana, si amahirwe yabonywe na bose; uri mu mugambi w'Imana kandi mu mushinga wayo inateganya n'ibizawushyira mu ngiro. Nubwo ababyeyi ba Samusoni batabyemeraga ko arongora umufilisitiya ariko uwo wari umugambi w'Imana kuko niho habonetse impamvu yo kurwanya Abafilisitiya.

Samusoni yatangiye kujya asiba amariba yo muri we, ubwo yajyaga kurara kwa maraya. Kubw'umugambi w'Imana ntiyamureka akomeza gutsinda abafilisitiya. Ariko, uko yakomeje kuhatinda niko byaje kuzabyara intambwe ya mbere y'ugusibama kw'amariba ye.

Bakundwa bene Data, nidutinda hirya y'Imana bizatumaramo imbaraga nta kabuza. Delila yatindanye na Samusoni amubaza adacogora ibanga rye rihishwemo imbaraga ze, buhoro buhoro Samusoni kubera gutindana na Delila agera ubwo amumenera ibanga ry'umusatsi we ko yogoshwe yamera nk'abandi bose.

Kuba nk'abandi bose ni ikindi kintu gikomeye kitumaramo imbaraga. Delila yumva neza ko Samusoni noneho amubwiye ibiri ku mutima we byose, aramusinziriza ahita amwogosha. Ubu abenshi ibyo baziririzaga kera bagenda babisubiramo ngo ni ukujyana n'igihe, ni ukujyana n'iterambere. Nyamara igikwiye ni uko tubaza Imana ikaduha kurobanura ibinyuranye bidufasha kumenya ibyacu n'ibitari ibyacu.

Samusoni akangutse yisanze nta mbaraga agifite nka mbere, bamwitura umujinya wose, kugeza ubwo bamunogoye n'amaso bamuhanisha kujya asya ingano z'abanzi be. Nshuti mukundwa, Satani ntakagushyikire kuko yazakwitura umujinya w'igihe cyose wari waramubujije amahwemo.

Muri uru rugendo turimo tujya iwacu, ntacyo Umwami Yesu atakoze ngo atwereke ko ari we wenyine ufite byose twifuza mu kubaho kwacu; ahubwo ikibazo ni twebwe. Tunyura mu mataba, tukanyura no mu misozi kandi aho hose niko harushya umugenzi. Ariko, Imana ishimwe kuko yahisemo ko amasōko tuyagendana.

Kubahisemo bakanizera kuyagendana ntabwo bazigera bagira inyota yo kongera gukora ibyaha baretse, ahubwo babibona nk'ibibabwe nabyo bikababona uko. Imana ishimwe.

Hari impamvu zisiba amariba y'abakiristu bamwe: ni ugutinda muri zone (ahantu) ya Satani no gushaka kumera nk'abandi bose. Tindana na Yesu uzasa nawe kuko niwe ufite amagambo meza y'ubugingo, nutinda hanze ye bizakumaramo imbaraga. Imana idufashe!

Rejoice Africa Ministries
NEZERWA.Com

  • September 29th 2016 at 03:00

Sobanukirwa uko Imana ivuga utagushwa n'ibyo yakubwiye aho kugukomeza

By Ubwanditsi

Yeremiya Imana yaramusanze imwibutsa ko yamumenye itaramurema mu nda ya nyina umubyara ndetse ko Imana yamwejeje ataravuka maze imushyiriraho kuba umuhanuzi uhanurira amahanga yose, maze Imana imwongereraho ko imuhaye ubutware mu ijambo ko ashyiriwe hejuru y'amahanga n'ibihugu by'abami kurandura, gusenya kurimbura no kūbika, kubaka no gutera imbuto. (Yeremiya 1:4-10)

Nubwo Yeremiya yakoze imirimo myinshi y'ubutwari yaje kugera aho yitiranya imvugo y'Imana, maze nawe yiyumvisha ko kuba afite isezerano ry'Imana atakagombye guca mu bikomeye nk'ibyo yari agezemo niko kuvuga ngo “Ayii Uwiteka waranshutse nemera gushukwa, undusha amaboko nicyo gituma unsinda, mpindutse urw'amenyo umunsi wose, umuntu wese aranseka.” (Yeremiya 20: 7)

Bene Data umurimo wo gukorera Imana ni umurimo usaba kwihangana, cyane cyane ko utabonekamo umunezero w'ibihe byose, ariko ntabwo ari uko Imana yadushutse ntanubwo ari ukuduhima ngo yange gusohoza ibyo yavuze ahubwo imvugo yayo ni imvugo izimije kandi isobetsemo ubuhanga bwayo bisaba rero ko urushaho kuyegera kugira ngo hato utazatwara ibyayo uko bitari bikaba byanakugusha.

Mwibuke Yohana Umubatiza ni umwe mu bo Yesu Kristo ubwe yatangiye ubuhamya bwiza, yewe nawe ubwe yakoze umurimo ukomeye wo kwamamaza inkuru nziza y'agakiza ndetse agera n'aho ahabwa kubatiza Umwami Yesu ariko nawe yageze muri gereza, cyane ko yumvaga ntacyamuhangara ari kumwe na Yesu, maze amutumaho ati: “mumumbarize ngo mbese ni wowe wa wundi ukwiriye kuza cyangwa dutegereze undi?”

Nyamara Yesu yamusubije agira ati: “Mugende mumubwire ibyo mubonye n'ibyo mwumvise. Umurimo w'Imana uracyakorwa, ibitangaza birakoreka kandi hahirwa uwo ibyanjye bitazagusha.” (Luka 7: 19)

Ariko noneho Uwiteka yakuremye wowe Yakobo kandi akakubumba wowe Isiraheli, aravuga ati: “witinya kuko nagucunguye, naguhamagaye mu izina ryawe uri uwanjye. Nunyura mu mazi nzaba ndi kumwe nawe, nuca no mu migezi ntizagutembana. Nunyura mu muriro ntuzashya, kandi ibirimi by'umuriro ntibizagufata kuko ndi Uwiteka Imana yawe, Uwera wa Isiraheli, Umukiza wawe. (Yesaya 43: 1-3)

Aya ni amagambo y'ubuhanuzi yahanurirwaga ubwoko bw'Abisiraheli, kubwo gucungurwa Imana yabo ari nayo yacu yari ibafitiye. Ubu rero ni ubuhanuzi bukomeye natwe twizereramo tukizera ko Imana yacu izabana natwe mu buzima butandukanye tuba turimo.

Gusa na none n'ubwo iri jambo turyizereramo dutyo kandi koko niko biri, hari igihe usanga abantu bamwe baryigishwa cyangwa bakarifata bijyanye n'amarangamutima yabo bakishyiramo ko kuba ari abakozi b'Imana cyangwa kuba barakijijwe bisobanuye ko bagiye kuba mu mudendezo.

Nyamara si uko biri kuko Imana yashakaga kutubwira ko naho ibigeragezo by'abakiranutsi bizaba byinshi bikamera nk'amazi ahurura, ukaba wageragezwa bikakumerera nk'umuriro ugutwika, udakwiye gutinya. Humura uzabibamo ariko amaherezo niwizera Iyaguhamagaye ko ishobora byose uzabisohokamo amahoro nk'intwari inesheje.

Mu by'ukuri iyi Mana twizeye ntabwo yahindutse iracyadukunda, ndetse yiteguye no kutugirira neza ahubwo birakwiye ngo imvugo yayo tuyisobanukirwe neza rwose, kuko akenshi hari igihe tuyumva nabi bigatuma tuyivovotera tukayishyiraho urubanza, ariko birakwiye ko dusobanukirwa imvugo yayo, ubuzima bwa hano mu isi twazabusoza tutagushijwe n'iby'Imana ahubwo bikatubera inkomezi.

Rejoice Africa Ministries
NEZERWA.Com

  • September 29th 2016 at 01:05

Wari uzi ko ibyo uha umwanya mu bitekerezo byawe ari ingaruka z'ibyo uzaba byo!

By Ubwanditsi

Burya ibyo dutekereza ni byo bivamo ibyo dukora, ushoboye kugenzura no gutegeka ibyo utekereza, imikorere, imivugire n'imyitwarire yahinduka, ariko burya uko utekereza ni ko uri, ibi bigaragara mu gitabo cy'Imigani 23 :7 ku bemera Bibiliya.

Nk'uko Bibiliya ikomeza ibivuga ngo byaba byiza buri wese ashoboye kurinda ibyinjira mu mitima we, cyangwa ibyinjira mu bitekerezo bye. Umwami Salomo yavuze ijambo ryiza aho yagiraga ati : "Rinda umutima wawe kuruta ibintu byose birindwa kuko muri wo ari ho iby'ubugingo bikomoka." Imigani 4 :23.

Yakobo na we yatwigishije ko ibyaha bitangirira mu bitekerezo (Yakobo 1:13-15) haravuga gati: "Umuntu niyoshywa gukora ibyaha ye kuvuga ati Imana ni yo inyoheje kuko bidashobka ko Imana yoshywa n'ibibi cyangwa ngo na yo igire uwo ibyohesha, ahubwo umuntu wese yoshywa iyo akururwa n'ibyo ararikiye bimushukashuka. Nuko iryo rari riratwita rikabyara ibyaha, ibyaha na byo bimaze gukura bikabyara urupfu."

Bityo ibyo uhaye ikaze mu bwonko bwawe cyangwa mu mutima wawe igihe kirekire, igihe kiragera ukabishyira mu bikorwa.

Ibyinjira mu mutwe biza ari nk'ibitekerezo bikazabyara ibikorwa. Bya bikorwa bimaze igihe kirekire ubigenderamo bikabyara akamenyero. Ibyo wamenyereye gukora bigeraho bigahinduka imiterere yawe.Ya miterere yawe ni yo ivamo uwo uzaba we.

Buri wese agomba kwitondera ibyo atekereza, kuko burya uko utekereza niko uri, mu rwego rwo kugira ngo dutegeke ibyo dutekereza, byaba byiza tutagiye duha ikaze ibibonetse byose ngo byinjire mu mitima yacu, ahubwo tugashungura tukareba ibyatugirira umumaro bikawugirira n'abandi akaba ari byo twemerera bikinjira.

Shaka uko wakuzuza mu biterezo byawe ibintu bizima bigira umumaro, byubaka kandi bifite icyo byakungura bikungura n'abandi. Ibihabanye n'ibyo zibukira ujugunye kure ni ibigamije kukwangiza gusa.

Ibisigaye, iby'ukuri byose, ibyo kubahwa byose, ibyo gukiranuka byose, ibiboneye byose, iby'igikundiro byose, n'ibishimwa byose, nihaba hariho ingeso nziza kandi hakabaho ishimwe, abe aribyo mwibwira. (Abafilipi 4:8)

Nurangiza usenge iri sengesho uti: "Mana undememo umutima wera, unsubizemo umutima ukomeye". (Zabuli 52:12).

NEZERWA.Com

  • September 27th 2016 at 02:01

Ibisobanuro birambuye kuri Antichrist, imikorere ye n'uko wamwirinda

By Ubwanditsi

Abantu bakunda kwibaza ku izina ryumvikana hirya no hino ku isi no mu Rwanda hadasigaye; izina “anti-kristu”. Nk'uko ikibi n'icyiza bidasigana, aho wumvise “Kirisitu” na “anti-kirisitu” urahamwumva.

Muri iyi nkuru turabagezaho muri make bimwe mu bivugwa kuri anti-kirisitu n'uko yakwirindwa cyangwa wanesha imikorere ye.

Anti-kirisitu bisobanuye iki?

Anti-kirisitu cyangwa “antichrist” mu Cyongereza, ni amagambo 2 afatanye; Anti: bisobanura kurwanya, na Christ: bisobanura Kristo; muri make anti-kristo bisobanura: urwanya Kristo. Urwanya Kristo rero nta wundi ni Satani.

Nk'uko Imana ari umwuka, Anti-kirisitu na we ni umwuka. Ntushobora kumurebesha amaso y'umubiri nk'uko n'Imana udashobora kuyirebesha amaso y'umubiri, kandi nk'uko udashobora kubona ingabo z'Imana ari zo abamalayika, ni nako n'ingabo za satani (anti-kristo) ari zo abadayimoni udashobora kuzibonesha amaso yawe y'umubiri.

Anti-kirisitu akora ate?

Nk'uko Imana, ibyo ikorera mu Isi ikoresha abamalayika na Mwuka wera, hanyuma Mwuka wera nawe agakoresha akanakorana n'abantu bamwumviye bamera gukorana nawe. Uku niko na Anti-kirisitu akoresha abadayimoni, abadayimoni nabo bagakoresha abantu babumviye banemeye gukorana n'iyi myuka y'abadayimoni.

Iyo Bibiliya itubwiye ngo: hari igihe kizagera Anti-kirisitu agakora ku mugaragaro, ntibivuze ko icyo gihe abantu noneho bazamurebesha amaso y'umubiri, ahubwo ni uko ibikorwa bye yiyoberanyirizamo bizaba noneho bitacyihishira.

Ubu muri iki gihe akoresha amayeri yo kwiyoberanya cyane mu bintu byinshi binyuranye, ku buryo bimenywa gusa n'abegera Imana ikabahishurira iyo mikorere, ariko icyo gihe Bibiliya ivuga nibwo azaba atagikeneye gukorera mu mayobera kuko umucyo w'Imana (Umwuka Wera) wamubangamiraga uzaba wavuye mu isi, nkuko tubisoma ngo “kandi none muzi yuko ikimubuza ari ukugira ngo azahishurwe mu gihe cye kuko amayoberane y'ubugome n'ubu yatangiye gukora, ariko ntazahishurwa keretse uyabuza ubu akuweho.” (2 Abatesalonike 2: 6-7)

Anti-kirisitu akoresha nde?

Ntabwo uzigera na rimwe ubona Anti-kirisitu n'amaso yawe, ahubwo uzamubonera mu bantu akoreramo n'ibikorwa abo bantu baba bakora bidasanzwe ndetse ubona rwose binatangaje.

Ikindi ni uko umuntu wese uzumva avuga cyangwa yigisha ngo Yesu si we Kristo, si umwana w'Imana, si Umucunguzi n'Umukiza w'abantu, si we muhuza w'abantu n'Imana…. mbese amuvuga bitandukanye n'uko wowe umuzi mu byanditswe byera Bibiliya; uwo muntu uzamenye ko ari intumwa ya Anti-kirisitu.
Bibiliya iratubwira ngo “Iki abe ari cyo kibamenyesha Umwuka w'Imana: umwuka wose uvuga ko Yesu Kristo yaje afite umubiri ni wo wavuye ku Mana, ariko umwuka wose utavuga Yesu utyo, ntiwavuye ku Mana ahubwo ni umwuka wa anti-kristo, uwo mwumvise ko azaza kandi none umaze kugera mu isi.” (1 Yohana 4: 2-3)

“Mbese umunyabinyoma ninde? Ni uhakana ko Yesu ari Kristo, agahakana Data wa twese n'Umwana we, uwo ni we anti-kristo.” (1 Yohana 2: 22)

Mu madini amwe nawe uzi, ujya ubona... urareba ayigisha ibijyanye n'ibi tukubwiye haruguru hanyuma wifatire umwanzuro wawe.

Hari n'abandi baza babeshya ko bizera Kristo kugira ngo basohoze imigambi ya anti-kristo, abantu ntibarabukwe ibiri kuba. Urugero ni nk'abavuga ko Yesu Kristo yarangije byose abantu bose bazajya mu ijuru, ubuntu bagiriwe bwarangije byose, nta cyaha kigikorwa ngo kibarwe imbere y'Imana... n'ibindi bigoramye nk'ibyo, mbese bashaka kuvuga ko Yesu yatanze uburenganzira bwo gukora ibyaha nta kibazo.

Nubona cyangwa ukumva umuntu uvuga cyangwa yigisha atyo, uzamenye ko ari igikoresho cya Anti-kirisitu ufite intego yo gushora abakristu mu byaha agambiriye gusiba inzira yo gukiranuka mu mitima yabo, iyo Kristo Yesu yaciriye abantu.

Anti-kristo kandi akoresha cyane abantu bo mu nzego nyinshi zikomeye zitandukanye mu isi: amadini na za Leta z'ibihugu ari nabyo azifashisha cyane mu gihe cye cyo gukorera kumugaragaro, ubwo Umwuka Wera umubuza azaba yakuwe mu isi. Tuzabigarukaho ubutaha.

“Kuza kw'uwo mugome kuri mu buryo bwo gukora kwa satani, gufite imbaraga zose n'ibimenyetso n'ibitangaza by'ibinyoma, n'ubuhenzi bwose bwo gukiranirwa ku barimbuka, kuko batemeye gukunda ukuri ngo bakizwe.” (2 Abatesalonike 2: 9-10)

Ibanga ryo gutsinda Anti-kirisitu ni irihe?

Hari abahitamo kwitandukanya n'ibikorwa byose by'amadini, amatorero, ubutegetsi n'ubuyobozi bwo mu isi mu rwego bita ko ari urwo kwirinda ibikorwa bya Anti-kirisitu. Ubwo nabwo ni ubuyobe bukomeye kuko ubuyobozi bushyirwaho n'Imana. Nubwo anti-kristo nawe agerageza kubukoresha mu buryo bw'ibanga rikomeye mu gusohoza imigambi ye mibi mu isi, ariko Imana idutegeka kumvira abatuyobora.

Dusoma ngo: “Mwumvire ababayobora mubagandukire, kuko ari bo baba maso barinda imitima yanyu nk'abazabibazwa. Nuko rero mubumvire kugira ngo babikore banezerewe kandi batagononwa, kuko kubikorana akangononwa kutagira icyo kumarira mwebwe.” (Abaheburayo 13:17)

Bibiliya ikongera ikatubwira ngo: “Umuntu wese agandukire abatware bamutwara, kuko ari nta butware butava ku Mana n'abatware bariho bashyizweho n'Imana. Nicyo gituma ugandira umutware aba yanze itegeko ry'Imana, kandi abaryanga bazatsindwa n'urubanza….” (Abaroma 13:1-7)

Ibanga ryo gutsinda anti-kristo rero nta rindi ni uko buri jambo ryose wumvise ryigishwa banza urigenzuze ibyandistwe byera ari yo Bibiliya twahawe nk'intwaro twifashisha. Ikindi, reka kujarajara we kumva abakubwira ngo aha niho Imana iba kurusha hariya, hanyuma nawe ubyakire utyo umire bunguri udashishoje.

Guma hamwe kuko ntaho Imana itakumvira uyisenganye umutima ukiranuka kandi wizeye, kandi nta n'aho uwo mwuka wa satani ahejwe kugera. Guma mu itorero ryawe iryo ari ryo ryose urimo, uribemo uri maso, buri kimwe cyose we kucyakira ngo uhite umira bunguri ahubwo ubanze ukigenzuza ijambo ry'Imana, kandi ukumvira abakuyobora muri byose uretse “icyaha” kuko ibyaha ari byo byonyine bishobora kubuza umuntu kuzabona ubugingo buhoraho.

Dusoma muri Bibiliya ngo: “Bana bato, tugeze mu gihe cy'imperuka kandi nkuko mwumvise yuko anti-kristo azaza, niko na none hamaze kwaduka ba anti-kristo benshi ndetse ni byo bitumenyesha ko igihe cy'imperuka gisohoye.” (1 Yohana 2: 18)

Tube maso kuko gukora kwa Satani kuri mu mayobera n'amayeri menshi atangaje rwose, azamenywa gusa n'abahora bari maso bagenzuza ijambo ry'Imana buri kimwe cyose kigenda cyaduka buri munsi kuri iyi si. Imana ibahe umugisha ibashoboze kurobanura ibinyuranye. Amen

Rejoice Africa Ministries
NEZERWA.Com

Umusaza Simiyoni wateruye Yesu mu mavuko ye yari muntu ki?

By Ubwanditsi

Umusaza Simiyoni yari umukiranutsi witonda, kandi yategerezaga ihumure ry'Abisiraheli. Yari yarahanuriwe n'Umwuka Wera wari muri we ko atazapfa atabonye ihumure ry'Abisiraheli. Nubwo abantu benshi bari bazi ko Mesiya azavuka, si benshi muri bo bamenye ko yavutse. - Luka 2:25-35

Ibi ni ibintu bitandatu by'ingenzi byaranze umusaza Simiyoni :

1.Simiyoni yari umukiranutsi: Icyo dupfana n'Imana ni uko dukiranuka. Hahirwa abafite inzara n'inyota byo gukiranuka, kuko ari bo bazahazwa. Gukiranuka ntabwo bikomeye, Uwiteka umucamanza iyo atubonyeho amaraso y'Umwana wayo ntaducira urubanza rubi ahubwo atwita abakiranutsi. Kandi mu gitabo cy'Ibyahishuwe 12:11 havuga ko tuneshesha amaraso y'Umwana w'Intama no guhamya kwacu.

Hari igihe ureba abantu uko bitwara ukibaza niba bagira Imana muri bo. Ni byiza kwitonda kuko hari abananiwe kwitonda harimo amakorari agezweho, abahanzi ku giti cyabo, abavugabutumwa bagezweho, abanyempano bakomeye ariko ubu ntiwabashaka ngo ubabone bazize kutitonda. Nuko rero uhagaze yirinde atagwa kuko uwambara imyambaro y'urugamba ajya kurwana ntakwiye kwirata nk'uwiyambura atabarutse.

2.Yari ategereje ihumure ry'Abisirayeli : Ese wowe utegereje iki? Abantu bamwe icyo bategereje ni uko amasezerano yabo asohora gusa. Ni byiza, ariko dukwiye kuba dutegereje guhembuka kw'itorero rikagira ubumwe nk'ubwo mu gihe cy'intumwa. Ihumure riruta ayandi ni ukuzabona Yesu agarutse kuko imiruho n'imihati izaba ishize.

JPEG - 63.1 kb
Simiyoni amaze guterura umukiza Yesu ati: "Noneho urasezerere umugaragu wawe amahoro nk'uko wabivuze. kuko amaso yanjye abonye agakiza kawe, ako witeguye kera" kuba umucyo uvira amahanga

3. Umwuka Wera yari ari muri we: Mfite akabazo k'amatsiko: Ugira Umwuka Wera muri wowe? Uru rugendo rwakugora utagira Umwuka Wera kuko, Yesu yavuze ko icyagira umumaro ari uko agenda hanyuma Umwuka akaza akatwigisha byose birimo no gukiranuka. Ni na we udusengera akatunihira iminiho.

4.Yari yarabwiwe n'Umwuka ko atazapfa atabonye Mesiya: Simeyoni yari abitse amazerano y'Imana. Yesu yavuze ko intama ze zumva ijwi rye zikamukurikira. - Yohana 10:10

5. Ajyanwa n'Umwuka mu rusengero: Mu gitabo cy'Abaroma 8:14, havuga ko abayoborwa n'Umwuka ari bo bana b'Imana. Ni byiza kumvira Umwuka Wera akakuyobora mu kuri kose.

6. Yakikiye Yesu yumva ibintu birahindutse ajya mu Mwuka udasanzwe atangira guhanura: Nta kabuza nidukura ibishimwa mu bigawa tuzaba nk'akanwa k'Imana. - Yeremiya 15:19

Simiyoni yari amaze imyaka myinshi ategereje ko Yesu Kristo avuka. Byatumye n'Imana imurinda ntiyapfa, kuko yari yaramusezeranyije ko atazapfa atarabona umukiza w'Abisiraheli. Akimuterura ashima Imana agira ati ”Noneho urasezerere umugaragu wawe amahoro nk'uko wabivuze. kuko amaso yanjye abonye agakiza kawe, ako witeguye kera kuba umucyo uvira amahanga.” - Luka 2:29

Niba ubitse amasezerano y'Imana humura uzayabona kandi azasohora. Guma uyategereze ukiranuka kandi wizeye, ibindi Imana izabikora neza kuko irinda ijambo ryayo ikazarisohoza - Yeremiya 1:12.

Izi nyigisho zitangwa na Pasiteri Habyarimana Desiré. ukwifuriza umugisha w'Imana no gukora imirimo yo gukiranuka wubaha Imana. Na yo izakurinde gusubira inyuma uzagire imigisha yose iva mu kubaha Imana, amen.

Rejoice Africa Ministries
NEZERWA.Com

  • September 21st 2016 at 17:00

Uribaza uti - Nzanesha nte iki cyaha gihora kinesha?

By Ubwanditsi

Hari umu papa umwe wo mu Mwuka yakundaga kumbwira ngo “wowe biharire Imana gusa izabikora.”

Iryo jambo ryahoraga ringora igihe kinini cyane kumenya icyo rivuze. Nahoraga nibaza nti, “Ni kuki ntamenya mu by'ukuri icyo bishatse kuvuga?” Ko mpora ngerageza gushaka kubaho ubuzima buzira icyaha ariko ngatsindwa? Byaba bivuze ko ntari nakizwa?

Buri uko twumvise cyangwa tugasoma ijambo ry'Imana, ubwo nibwo twibonamo neza uko tugenda tugabanukirwa, turi munsi y'urugero rw'ukwera kw'Imana. Mu gihe Bibiliya ivuga ngo: “mugire umwete wo kubana n'abantu bose amahoro n'uwo kwezwa, kuko utejejwe atazareba Umwami Mana.” (Abaheburayo 12: 14)

Bivuga ngo niba ntejejwe rwose sinshobora kuzareba Umwami Mana? Kwezwa ni iki? Ni ukubaho ubuzima butagira ibyaha byinshi cyangwa ibyaha binini bikomakomeye gusa…?

Oya! Kwezwa ni ukutaba mu cyaha rwose - kibe kinini cyangwa gito.

Imana ni iyera kandi ivuga yeruye ko ijuru ritazinjirwamo n'ikintu cyose gihumanye, nkuko tubisoma mu gitabo cy'Ibyahishuwe 21: 27 ngo “Muri rwo ntihazinjiramo ikintu cyose gihumanya cyangwa ukora ibizira akabeshya, keretse abanditswe mu gitabo cy'ubugingo cy'Umwana w'Intama.”

None se, dushobora dute kuba muri iyi si tutagwa mu cyaha? Itegeko ry'Imana rigira amabwiriza menshi. Imana iravuga iti: “Musenge mudacogora, mukunde n'abanzi banyu kandi mubasengere, ntiwifuze ibya mugenzi wawe, ntukavuge ibinyoma, ntugatekereze nabi, ntukange abandi, baho mu kwizera, ikitajyanye no kwizera ni icyaha… n'ibindi n'ibindi.

Birashoboka ko buri gihe ugerageza guhagarara neza ariko nyuma y'igihe gito ukisanga wongeye kugwa, nyuma yaho ugasanga wicira imanza ndetse no kugira ubwoba ko uzasigara ku munsi wo kuzamurwa kw'itorero, cyangwa se ku munsi wa nyuma wo gupfa.

Abandi na bo bacitse intege bakavuga bati: “Ntibishoboka kubaho mu buzima nyakuri bw'agakiza” bagafata umwanzuro wo gusubira inyuma mu byaha nka mbere.

Ariko se koko ni iki Imana idutegerejeho? Uwiteka aravuga ati: “Mbese umunyetiyopiya yabasha guhindura ibara ry'umubiri we, cyangwa ingwe ubugondo bwayo? Namwe ni uko ntimwabasha gukora ibyiza, kandi mwaramenyereye gukora ibibi. (Yeremiya 13: 23)

Ubwirabure bw'umunyetiyopiya n'ubugondo bw'ingwe ni umwimerere wabyo. Natwe icyaha nicyo twamenyereye. Bibiliya ivuga yeruye aho Dawidi yavuze ngo “dore naremanywe gukiranirwa, mu byaha nimo mama yambyariye.” (Zaburi 51: 7)

Nutangira kwihata no kwisunikamo kugira ngo urebe ko wabaho ubuzima buzima nk'uko itegeko ribivuga gusa cyangwa ubwenge bwawe bukuyobora, uzisanga watakaje umwanya wawe kandi uzabaho ubuzima bwo guhora utakaza icyizere gusa. Mu gukora ibyo, Imana iravuga ngo aho uba ushaka kubikorana ishyaka riva mu bwenge bwawe gusa.

Dusoma ngo: “Kuko ubwo bari batazi gukiranuka kw'Imana uko ari kwo, bagerageje kwihangira gukiranuka kwabo, bituma basuzugura gukiranuka kw'Imana.” (Abaroma 10: 3) Kuko ni nk'uko twavuga tuti: “Ah, narwanye kugeza ubwo njye ubwanjye nesheje!”

Yesaya nawe arabivuga ati: “Kuko twese twahindutse abanduye, kandi n'ibyo twakiranutse byose bimeze nk'ubushwambagara bufite ibizinga…” (Yesaya 64: 5)

Imbaraga zacu zose kenshi usanga tuzitakaza mu mwanya w'ibintu bidafite intego n'umusaruro muzima bitugezaho ahubwo bikadusiga nk'ibikoresho birimo ubusa. Umwami Yesu aravuga ngo “….kuko ari ntacyo mubasha gukora mutamfite.” (Yohana 15: 5)

Iyo ukomeje gutsimbarara ku mbaraga zawe wenyine, ukwo ni ukwishyira hejuru, ukwo ni ukwanga guca bugufi ngo wemere ufashwe.

Nubona hari icyaha runaka kigutsikamira kigahora kikugora mu buzima bwawe, reka kwigeragereza ubwawe kukireka kuko ntiwabyishoboza rwose, niyo mpamvu ari ibyangombwa cyane kubaho mu buzima bwo kwihana, irembo ryo kwihana rigahora ryuguruye kuri wowe igihe cyose ucumuye ku Mana.

Hamwe n'ibyo, reka gukomeza gushaka kunezeza Imana ukoresheje imbaraga zawe kuko ntiwarenga n'umutaru numwe, ahubwo kora ibi bikurikira :
• Emera ko hari icyaha mu buzima bwawe
• Gambirira kutazongera gukora icyo cyaha ukundi
• Ihane icyo cyaha imbere y'Imana yawe
• Pfukama imbere y'Imana, ubwire Mwuka Wera uti: “ Sinabasha njye ubwanjye Mana. Mfasha kunesha iki cyaha.” Nta cyaha kitari munsi y'ubuntu bw'Imana – cyaba ari ubusinzi, ubusambanyi, ibiyobyabwenge, iby'amarozi,... n'ibindi.
• Komeza gusaba imbazazi n'ubuntu bw'Imana kugira ngo ikomeze kukongerera imbaraga zigufasha kuva muri uwo mworera.
Uku ni uguca bugufi imbere y'Imana. Ibyanditswe biravuga ngo, nuko mwicishe bugufi muri munsi y'ukuboko gukomeye kw'Imana, kugira ngo ibashyire hejuru mu gihe gikwiriye. Muyikoreze amaganya yanyu yose kuko yita kuri mwe.” (1 Petero 5: 6-7)

Gukiranuka muri ubu buzima tubayemo birashoboka. Si kubw'imbaraga zacu ahubwo ni amaraso ya Yesu ahora atwoza mu buryo bwihariye kandi bwuzuye nkuko tubisoma ngo “Ariko nitwatura ibyaha byacu, niyo yo kwizerwa kandi ikiranukira kutubabarira ibyaha byacu no kutwezaho gukiranirwa kwose.” (1 Yohana 1: 9) Hanyuma n'Umwuka Wera ukadufasha guhora dutsinda, no kongera kandi gutsinda kurushaho.

NEZERWA.Com

  • September 20th 2016 at 04:31

Kanseri diyabete n'igifu ni zimwe mu ndwara zikizwa no kunywa amazi kenshi mu buzima bwacu

By Ubwanditsi

Abaturage bo mu gihugu cy'Ubuyapani bamaze kubigira akamenyero ko kunywa amazi mbere y'uko bagira ikindi bafata (kurya cyangwa kunywa ikindi kinyobwa kitari amazi) mu gitondo.

Ibi kandi bikaba bishimangirwa n'abashakashatsi badahwema kugaragaza bimwe mu byiza bitagereranywa byo kunywa byibura ikirahuri kimwe buri gitondo mbere y'uko ugira ikindi ufata.

Aba bashakashatsi baboneyeho kugaragaza zimwe mu ndwara zishobora gukizwa no kunywa amazi, zaba izoroheje ndetse n'izikomeye, aha kandi bakomeza bakangurira abantu bose cyane cyane abarwaye zimwe muri izo ndwara kugerageza gukurikiza izi nama ndetse bakaba banatanze zimwe mu nzira zakurikizwa mu gihe banywa ayo mazi.

JPEG - 150.6 kb
Amazi ni ikinyobwa cy'ingezi mu buzima bwa muntu

UBURYO USHOBORA KUNYWA AMAZI AKABA YAGUKIZA:

.Uko ubyutse ushobora kunywa ibirahuri 4 bya mili-litiro 160 mbere y'uko ugira icyo ufata cyangwa ukoza mu kanwa.

.Tegereza gato iminota 45 maze ubone kugira icyo ukoza mu kanwa kurya cyangwa kunywa ikindi (muri iyi minota ushobora kuba usukura amenyo yawe ndetse no mu kanwa muri rusange ariko nta cyo kurya ufata mbere y'uko iyi minota ishira)

.Nyuma y'iminota 15 ya buri funguro irinde guhita ugira icyo unywa, ahubwo wongere kugirafa byibuze nyuma y'amasaha 2

Ku bashaje cyane ndetse n'abarwaye indwara bitakorohera gukurikiza izi nama, bashobora guhera ku kirahuri kimwe bakagenda bigira imbere buhoro buhoro uko iminsi igenda yigira imbere. Ikindi ni uko ubu buryo bushobora gukiza abarwaye ndetse n'abatarwaye bakaba bagira ubuzima buzira umuze.

Zimwe mu ndwara zishobora gukira ndetse n'inshuro wakora ibi kugira ngo ubashe gukira:
.Umuvuduko mwinshi w'amaraso (mu minsi 30)
.Igifu (mu minsi 10)
.Diyabete (mu minsi 30)
.Impatwe/Constipation (mu minsi 10)
.Kanseri (mu minsi 180) n'izindi

JPEG - 85.4 kb
Kugira ngo amazi akugirire akamaro, hakenewe isuku ihagije mu gihe ugiye kuyanywa

Ni byiza ko ibi rero natwe twabigira akamenyero kugira ngo tubashe kubaho mu buzima buzira umuze. Impuguke zivuga ko kunywa amazi akonje cyane mu gihe cyo gufata ifunguro atari byiza kuko bishobora gukurizamo indwara nka kanseri bitewe n'ibinure biba byaturutse kuri ya mafunguro wafashe bikaba byakwibumbira hamwe kubera ubukonje bw'icyo kinyobwa wanyoye.

Ibyiza ni uko mu gihe dufata amafunguro twajya tunywa amazi cyangwa icyayi bishyushye.

Ntitwasoza tutabibukije ko kunywa amazi afite isuku ari imwe mu nzira zo kwirinda indwara nyinshi zituruka ku mwanda.

NEZERWA.Com

  • September 20th 2016 at 02:55

Menya amagambo agize indirimbo « Izina rikomeye » ya Maranatha Men

By Ubwanditsi

Itsinda ry'abasore Maranatha Men ni abasore baririmba indirimbo zihimbaza bahuriye muri korali yitwa Maranatha Family bakaba babarizwa bose mu itorero ry'abadivantiste b'umunsi wa karindwi.

Iyo korali yavutse ishinzwe n'abanyeshuri biga mu kigo cy'amashuri yisumbuye cyitwa APPACE giherereye mu mugi wa Kigali. Ni muri urwo rwego bashatse ko abantu bumva indirimbo zabo cyane cyane bibanda ku magambo yazo.

Izina rikomeye

Izina rikomeye haba mu isi no mu ijuru
Ni ryo twe twamamaza isi yose iririmbe
Haleluya - Haleluya
Rikora ibitangaza isi yose iririmbe
Haleluya – Haleluya
Amahanga apfukame isi yose iririmbe
Haleluya

Wansobanurira ute ko uwazanywe mu ngombyi
Abasha gusubirayo ari we uyikoreye
Uwavukanye ubuhumyi abasha ate kureba
Utigeze kuvuga abasha ate kuririmba
Uwamaze iminsi ine mumva yahamagarwa akitaba
N'ibindi yabikora…

Izina twamamaza nta rindi ni irya Yesu
Niwe ufite ubushobozi bwo gukiza abo mu isi
Yababariye igisambo kiri ku musaraba
Yakijije Zakayo amuha umutima mushya
Uwamaze iminsi ine mumva yahamagarwa akitaba
N'ibindi yabikora…

Kanda hano wumve iyi ndirimbo - IZINA RIKOMEYE - ya Maranatha Men

  • September 19th 2016 at 13:05

Rinda ijisho ryawe ni ryo rembo rikuru ry'ibikwangiza

By Ubwanditsi

Umwami Yesu yaravuze ati: “Itabaza ry'umubiri ni ijisho. Nuko rero ijisho ryawe iyo rirebye neza, n'umubiri wawe wose ugira umucyo. Ariko iyo ribaye ribi, umubiri wawe wose ugira umwijima. Witonde rero umucyo ukurimo utaba umwijima. Niba umubiri wawe wose usābwa n'umucyo ari nta mwanya n'umwe ufite umwijima, umubiri wose uzaba ufite umucyo nk'uko itabaza rikumurikishiriza umucyo waryo.” (Luka 11: 34-36)

Mu buryo bwinshi umwanzi wacu satani akunze kutugerageresha, ni ukutunyaga umwanya mwiza tuba twifuza kubana n'Imana. Bibe mu mwanya wo gusenga, gutekereza ku Mana, gusoma Bibiliya, kuba mu materaniro yera,... n'ibindi.

Satani azi neza ko natubasha agatuma umwanya wacu munini twakabaye tubana n'Imana tuwukoresha mu bindi bidafite umumaro, iherezo ry'inzira tugana rizatugusha mu mutego ukomeye, kuko na Bibiliya ibivuga iti: “Ntimuyobe: Imana ntinegurizwa izuru, kuko ibyo umuntu abiba ari byo azasarura. Ubibira umubiri we, muri uwo mubiri azasaruramo kubora, ariko ubibira Umwuka muri wo azasaruramo ubugingo buhoraho.” (Abagaratiya 6: 7-8)

Kugira ngo akwibe uwo mwanya atyo, yuzuza ibintu byinshi mu bitekerezo byawe kugira ngo bibe ari byo utakazaho umwanya wawe munini (hafi ya wose) ubitekerezaho gusa. Kandi inzira yoroshye yo kubyuzuza muri wowe ni uko uba wabihanze amaso. Ibyinshi uhora wibaza cyangwa se bihora bigaruka mu bitekerezo byawe igihe cyose ni uko uba wabirebye ukabyitaho, bikinjira mu bwonko, bikiganza no mu bitekerezo byawe, hanyuma rero washaka no kubyisibamo bikanga. Bigahinduka intambara ikomeye mu mutima wawe.

Kandi ikintu cyose gituma dutekereza ibindi bihabanye no gutekereza kuri Kristo Yesu, icyo ni ikimenyetso kiba kigaragaza ko hari umwijima warangije kugera muri twe. Niba njye ndi umuntu utekereza Kristo kuko nageze mu rusengero ku cyumweru gusa, iki ni ikimenyetso rwose ko hari umwijima warangije kunyinjirana muri njye ntabizi n'ijisho ryanjye rirahumye. Ibi ni ukubera ko mu mutima wanjye simbona neza Kristo Yesu rwose ahubwo ndeba gusa bya bindi byanyinjiranye byuzuye umutima.

Yesu Kristo ni byose! Dusabwa kumutekereza buri saha na buri munota. Icyo dushaka gukora cyose gisabwa kubanza gupimwa kigashyirwa ku munzani wa Kristo, ukabanza kwibaza uti: “Iki kintu ndimo gutekereza/ ngiye kuvuga/ ngiye gukora ndacyemererwa nk'umukiristu, mbese Imana irakinyemerera?

Hari ubwo kandi Umwuka Wera avugana natwe aciye mu ntekerezo zacu, icyo gihe nibwo umuntu amenya ko icyo kintu akwiriye kugikora cyangwa atacyemerewe. Ariko iyo wazimije Umwuka Wera muri wowe menya ko n'intekerezo zawe zidashobora kuyoborwa ahakwiriye. Ubwo nibwo utanashobora gutekereza kuri Kristo Yesu kuko mo imbere haracyarimo umwijima kandi adashobora guturana nawo.

Mu butumwa bwiza bwa Yesu Kristo nk'uko bwanditswe na Matayo 15: 11, Yesu aravuga ati: “Ikijya mu kanwa si cyo gihumanya umuntu ahubwo ikiva mu kanwa ni cyo kimuhumanya.” Gusa aha Yesu yarimo avuga ku byo kurya kandi imitima yacu ntikenera ibyo byo kurya kuko bihita bijya mu gifu, ntibijya mu mutima.

Ariko nk'uko amaso (twakwita irembo ryinjiriramo ibijya mu ntekerezo) ibyinshi byinjira mu muntu ntibibarika kandi bikamwangiza buhoro buhoro kurusha ibyamuvamo, kuko ibimuvamo biba ari umusaruro w'ibimurimo (ibyamwinjiyemo).

Kristo akavuga ati: “kiriya gisohoka mu muntu nicyo gihumanya.” Aha yashakaga kuvuga ibitekerezo bibi: nk'ubugome, uburakari, ishyari, kwifuza kubi,... n'ibindi. Hanyuma ariko se ibi bitekerezo mbere yo gutangira kuva mu muntu biba byamugezemo bite? Igisubizo ni uriya murongo wa 11 twasomye hejuru muri Luka, ni cya gihe ijisho ryafungutse rigaha urwaho ibyo rireba rikanabitindaho bikinjira mu muntu bityo.

Muri ubu buzima tubamo hari byinshi cyane bitugose bihumanya, urugero ni za filime. Hari filime nyinshi cyane benshi bazibamo bakabifata nk'igice kimwe bifashisha bidagadura, ariko ukuri ni uko muri izo filime umwanzi satani yarangije guhishamo imitego n'uburyo bwinshi azi neza ko, nubwo wowe utabizi, ariko harimo byinshi bihumanya bigenda bikibika mu bwonko bwawe buri uko ubihanga amaso buhoro buhoro. Nyuma y'igihe runaka ubwenge bwawe bugasigara ari byo butekereza gusa gusa (automatically) n'aho wowe waba utashatse kubitekereza.

Ndatekereza ko ushobora kuba wisanga mu bihe nk'ibyo unabiturijemo, mu bwenge bwawe ukisanga hari nk'indirimbo ihora ikugarukamo wumvise nko muri publicite runaka, wumva kenshi kuri radiyo, utunze iwawe, uhora wumva mu modoka,... ibyo uhora ubona ukumva kenshi bihora byigarura muri wowe mu buryo udasobanukirwamo. Hakaba nubwo ugerageza kubisiba no kubyirukana inyuma y'ibitekerezo byawe ariko ukumva birongera bigaruka bigaruka... Ni kuki? Ni ukubera ko wabihanze amaso cyane cyangwa wabiteze amatwi cyane maze ibyo bikinjira byinjiranye n'ububi bwabyo bikajya mu mutima no mu ntekerezo zawe bikigumiramo.

Ngaho mfasha gutekereza nko ku muntu utajya mu rusengero na rimwe, cyangwa akajyayo nk'isaha imwe gusa nabwo aruko ari ku cyumweru. Muri we bimera bite? Ninde uzabasha kubimukiza? Ni Imana cyangwa ni umwanzi satani?

Ibindi satani akoresha yangiza ijisho ryacu, ni ibi binyamakuru byerekana abantu bambaye ubusa bigishanya uburyo bwo gukora imibonano mpuzabitsina. Abanditsi b'ibi bitabo cyangwa ibindi byitwa ko bigamije kwigisha, bandika izi nyandiko no kwerekana amashusho ari nayo yibanze satani agenderaho aduhumanya. Iyo ubajije aba banditsi babyo bazakubwira ko babikora kugira ngo bigishe, bahugure, bongerera ubumenyi abantu. Iyo ubyumvise wumva rwose ari byiza kandi ari n'ubwitange bukomeye. Nyamara nta kuri na guto bifite! Kuko iyo biza kuba ari ukuri, kuki batandikaho amasomo yo muri Bibiliya mu gihe buri wese azi neza ko Bibiliya yuzuye ubwenge bwose bwakwigisha umuryango (abantu) muri rusange?

Ibindi ni amafoto n'ama-videwo agaragaza ibikorwa by'urukozasoni (Pornography). Ibi nta washidakanya ko rwose byibasiye ubwonko bwa benshi muri iki gihe cyane cyane urubyiruko n'abandi nka bo, mu bigaragara mu by'ukuri ubona ntacyo bitwaye, nyamara nta kamaro kabyo rwose. Umuntu abiha umwanya akabihanga amaso cyane bigatuma umutima n'ibitekerezo bye byokamwa n'umwijima w'icuraburindi mu buryo we atazi.

Umuntu umwe yaratubwiye ari: Nibuka igihe kimwe nanjye nakundaga kuvuga nti: “umuziki w'isi ufite ubutumwa n'impanuro nziza pe, kandi ugenzuye usanga hari ibihura n'inyigisho za Bibiliya. Nkwiye kuzumva no kuzitaho ntazasigara inyuma.”

Icyo ni ikinyoma cy'umwanzi gikomeye! Ufite ibiryo byiza bisukuye biri no ku isahani isukuye neza, hanyuma bikavangwamo ikiyiko kimwe gusa cy'ibitaka, ntabwo wavuga ngo ibi biryo ni bizima bifite isuku ngo ni uko umwanda ungana na 1% gusa. Oya! Ibiryo byose biranduye rwose! Ngibyo ibyo mu muziki w'isi. Nubwo waba ufite amagambo runaka meza ariko umwuka uri inyuma yayo ni mubi, iyo umaze kwinjira muri wowe uhita utangira guhindanya umubiri wawe wose, nk'uko Yesu abivuga muri Luka 11 nkuko twabibonye hejuru. Ukuri ni uko ikidusunikira kuwumva si ukumva inyigisho ahubwo ni uguhaza ukwifuza kw'umubiri. Umubiri ufite ukwifuza kw'uburyo butandukanye: kurya, kwinezeza no kwidagadura nk'umuziki, kwifuza gukura, gutera imbere,.... n'ibindi

Icyo dusabwa gukora ni iki?

Umurimo wa mbere ni ukurinda rwose intekerezo dutekereza. Ibi bizadufasha gusobanukirwa neza: Ese iki ni iki tureba, Iki ni iki turi kumva,... bidufashe guhunga no gutera umugongo ibyo byose bitwangiza tutabizi. Kuko ibitugose impande n'impande ntibibarika, igikuru ni ukurushaho gusaba Umwuka Wera akaduhe imbaraga zo kubinesha, akaduhe ububasha bwo gutekereza cyane ku Kristo Yesu kurusha gutakaza intekerezo zacu kuri ibyo byose bidafite umumaro, byangiza ubugingo bwacu n'umubiri udasigaye.

Haranditswe ngo: Ibisigaye bene Data, iby'ukuri byose, ibyo kubahwa byose, ibyo gukiranuka byose, ibiboneye byose, iby'igikundiro byose n'ibishimwa byose, nihaba hariho ingeso nziza kandi hakabaho ishimwe abe ari byo mwibwira. (Abafilipi 4: 8)

Nta handi dushobora kubona amagambo nk'aya atari mu ijambo ry'Imana ari ryo Bibiliya Yera.

Nshuti, ntibyoroshye kunesha ba gato ibiturwanya mu buryo bwose, ibidukururira kubigana ni byinshi kurusha imbaraga zacu za kimuntu.
Duhora dukirana n'imyuka mibi ifite uburambe n'ubunararibonye bw'imyaka myinshi mu bibi no kuyobya. Kandi akazi kayo ni ako, amanywa n'ijoro kugira ngo bemeze neza ko baguhejeje mu mwijima kuzageza ku munsi wa nyuma. Watekereza kureka ibyo byose bikurwanya ukavuga uti: “Sinabasha kwicara ntumvise imiziki y'isi, sinabasha kwicara ntasomye ibinyamakuru byigisha uko basambana, sinabasha kwicara nterebye byibuze agafilime kamwe k'urukozasoni (pornography), sinabasha kwicara nterebye agafilime kamwe k'intambara, cyangwa ko guterana ibipfunsi,... n'ibindi

Nibyo rwose, Ntiwabibasha! Ariko ikibazo si ukubireka kubw'imbaraga zacu. Ikibazo ni ukwemera guca bugufi munsi y'ukuboko kw'Umwami Yesu no kumubwira uti: “Mwami Yesu ndifuza kukumvira, ku mbaraga zanjye sinabasha rwose byarananiye kwikura muri uyu mwijima uri muri njye, ndasenze ngo umfashe.”

Umwami Yesu Kristo ni mwiza, ni mwiza rwose! Wowe umusange utaryarya, ibyo byose by'isi ukunda bikagutwara umwanya wose buri munsi, bituma utamenya ko uri uw'igiciro mu maso y'Imana. Uzahita umenya ko guhora muri ibyo byose nta kamaro bihinduke nk'umwanda imbere yawe. Kugera kuri iyo ntambwe, ako si akazi ka muntu na gato rwose. Ni Umwuka Wera wenyine ubasha kuhatugeza. Ariko udaciye bugufi no kumutakambira usigara mu mwijima ukumva ko bidashoboka kuwuvamo ukanesha, nyamara ahubwo n'ibyo bitekerezo bigushuka bityo ari ibinyoma by'umwanzi satani.

Humura nturarenga ihaniro, Hunga udapfa! Garukira Imana yawe ikubohore iyo minyururu ikuboshye. Satani arakorana umwete kandi imikorere ye yuzuye amayeri menshi yibasira abamuyobotse buhoro buhoro.

NEZERWA.Com

Yesu yahinduye ubuzima bwanjye ndatangara! - Ubuhamya

By Ubwanditsi

Yitwa Jenny, akaba akomoka mu gihugu cya Hayiti, aratanga ubuhamya bw'ukuntu yakiriye agakiza.

Mbere y'uko mpinduka, nari umukobwa w'ikirara, umeze nk'utararezwe. Sinifuzaga na rimwe no guherekeza mama ku rusengero. Rimwe na rimwe najyagayo ari uburyo bwo kwitemberera.

Nari mbizi ko Imana ibaho ariko nkanga kuyisenga. Ubwo narebaga amashusho yerekana urupfu, no kurimbuka, nibwo natangiye kugira ubwoba, cyane cyane gutekereza ko nzapfa ntarizera Kristo mu buzima. Nibwo natangiye guhindura imyitwarire.

Umunsi umwe njye na mama twari tuvuye gusura inshuti baradushimuta. Nagize ubwoba bwinshi ndangije mpiga umuhigo ndavuga ngo ‘'Mana nunkura aha hantu nzakwemera nkwakire nk'Umwami n'Umukiza wanjye.'' Umunsi ukurikiyeho, twembi baraturekuye. Nategereje gihe kirekire mbere yo guhigura wa muhigo nahize ariko nyuma nza kwakira Yesu mu bugingo bwanjye, numvise mbaye mushya, ibintu byose birahinduka.

Ibyo byabereye hafi y'urusengero aho mbarizwa kugeza ubu. Nyuma naje kuba njyenyine, nsubira inyuma kubera kuba njyenyine ngwa mu byaha byo kuryamana n'abo duhuje ibitsina. Ntekereza ko nabitewe no kuba njyenyine kuko ntari mfite uwo kuncyaha ngo angire inama.

Nahoraga numva ijwi rinsaba kubireka nkabivamo ngakizwa neza ariko nkabura imbaraga. Imana yaje kunyoherereza inshuti barantungura muri ibyo bikorwa by'urukozasoni.

Imana yarahantabariye ingarura mu murongo wayo, ubu ndanesha hamwe na Yesu, ariko kandi harimo inyungu kubana na bene data kuko mufashanya guhugurana no kubwirana amakuru yo mugihugu cyo mu ijuru.

Imitekerereze yanjye yarahindutse. Nubwo abadayimoni bakomeje kungenza mu gihe nari maze guhinduka, Imana yampaye intsinzi. Ikiza cyo kubaho muri ubu buzima bw'agakiza nuko nubwo ushobora guhura n'ibigukomereye bimeze nk'ibikuboshye, Imana ishobora byose irakubohora mu kanya nk'ako guhumbya.

Burya ubasha kugira uruhare mu gitangaza cyawe!

By Ubwanditsi

Kuko yavuze bikaba, Yategetse bigakomera. (Zaburi 33: 9)

Bibiliya ni igitabo kigizwe cyane cyane n'amateka y'ibitangaza Imana yagiye ikora bikomeye. Si buri wese wahita yumva ubwo butabazi bwavuye mu ijuru butyo: inyanja itukura yacitsemo kabiri Abisiraheli barambuka, indwara zikaze zakize abantu bareba, ugutsinda intambara mu buryo butangaje.

Birumvikana ko Imana yacu ni Imana itangaje!

Ibitangaza by'Imana bigaragarira cyane ku bintu bigaragarira amaso yacu ko bidashoboka, hari ubwo Imana inyuranya n'ibyo twita ihame ry'ibiboneka bimwe na bimwe, ikabikora ku bushake ishaka gusa kugaragaza ubudahangarwa bwayo n'imbaraga igira.

Urugero ni igihe Yesu yagendagenze hejuru y'inyanja cyangwa igihe indogobe yari ihetse Baramu yahanuraga ikanga gukomeza urugendo ibonye Malayika w'Imana nyamara Baramu we atamubona… n'ibindi

Uko byaba bimeze kose, itegeko ryarangije gutorwa cyangwa ntiritorwe ko uba uku n'uku, Senga Imana ikoreshe imbaraga uyiziho maze urebe ngo ibyigize intakorwaho biracika intege ugakomeza.

Ijugunye mu Nyanja y'amasengesho no mu migambi y'Imana kugira ngo ikore ibitangaza bituma ugera kubyo wateguriwe kugeraho. Imana iravuga bikaba kandi yategeka bigakomera.

Imana yawe ishoboye kugira icyo ikora gikomeye kandi gitangaje ku buzima bwawe no guhindura byinshi ku amateka yawe. Birumvikana ko uri guca mu bigoye, ariko Imana itegereje ko uzamura ijwi ryawe ukayihamagara, ukazamura ukwizera kwawe imbere y'intebe y'imbazi kugira ngo ubona gutabarwa nayo.

Kugira ngo ubone Imana ikora, ni uko ureka imigambi yayo ikabanza imbere y'iyawe. Iri niryo hame ry'ibanze. Ugukora kw'Imana ntigusigana n'ubushake bwayo ahubwo birajyana. Ibitangaza biva mu kwemera gushyira mu bikorwa ugushaka kw'Imana. Uru nirwo rufunguzo rwonyine rufungura ibitangaza bikomeye ku buzima bwawe.

Sengana natwe iri sengesho: Mwami Mana ndifuza kugaruka mu migambi yawe no mu masezerano yawe. Maze gusobanukirwa ko ninkumvira birampesha kugaruka nkinjira mu buzima bw'ibitangaza. Urakoze Yesu Amen

Rejoice Ministries

  • September 17th 2016 at 02:30

Sobanukirwa n'impano yo kuvuga mu ndimi z'Umwuka Wera

By Ubwanditsi

Icya mbere tubona ku byerekeye iyo mpano y'Umwuka Wera, ni uko ibivugwa ari ururimi nyarwo. Mu gitabo cye ku munsi wa Pentekote, Luka atumenyesha uko abigishwa bujujwe Umwuka Wera batangira kuvuga izindi ndimi. Abayuda b'abaturage b'abanyamadini bati: “Twese turabumva bavuga ibitangaza by'Imana mu ndimi z'iwacu”. Iyo mpano uko yari iri kuri uwo munsi, ni ko iri uyu munsi wa none.

Ivugabutumwa mu rundi rurimi rw'Umwuka abantu ntibashobora kubisobanukirwa kuko atari ururimi rwabo ahubwo ari urw'abamalayika. Dusoma muri 1 Abakorinto 13: 1 dutyo: “Nubwo navuga indimi z'abantu n'izabamalayika…” Ntabwo ari ukuvuga ko bavuga neza cyane uko bamwe bakeka, ahubwo bavuga indimi z'abamalayika mu mbaraga z'Umwuka Wera. Bamwe bavuga ko ibyo bumva atari ururimi nyarwo. Ariko kandi niba atari urwo mu isi, ni urwo mu ijuru.

Abavuga indimi nyinshi bavuga inkuru zitari zimwe. Kenshi imitima yabo ivugana n'Imana nk'abatoni bayo uko bavuga. “Utavuga ururimi rutamenyekana si abantu abwira, keretse Imana; kuko ari nta wumva ahubwo mu Mwuka avuga amayobera” 1 Abakorinto 14: 2.

Ni ubwo bwoko bw'ururimi Pawulo yagaragaje igihe avuga ati: “Nzajya nsengesha umwuka wanjye kandi nzaririmbisha Umwuka wanjye” 1 Abakorinto 14: 15. “Iyo nsenga mu rurimi rutamenyekana, umwuka wanjye urasenga ariko ubwo bwenge bwanjye ntibugira icyo bwungura abandi.” (1 Abakorinto 14: 14).

Bene urwo rurimi ntibikwiriye kuruhindura kuko ari ubwiru hagati y'umukwe n'umugeni (Kristo Yesu n'umukiristu). Nta wundi ugomba kubumenya.

Hari n'igihe urwo rurimi ruvuga ibyerekeye Umwami n'ibitangaza bye: nk'ibyabaye ku munsi wa Pentekote, abantu batari bamwe bavuze ngo “turabumva bavuga ibitangaza mu ndimi z'iwacu” Ibyakozwe n'intumwa 2: 11.

Kandi no mu gihe cyacu abantu bavuga batyo. Kenshi ababyumva bamenya ibivugwa, ariko rimwe na rimwe ntibabimenya, icyo gihe ibivugwa bigomba gusobanurwa.

Mu gitabo cyerekana ububyutse bwa Pantekote handitswemo inkuru y'umugore mu gihe cy'iteraniro wavuze indimi nshya, abatuye mu Buyapani bari bicaye inyuma ye batangira kurira. Nyuma umukiristu arabegera atangira kubabaza uko bameze, maze nabo bati: “ Ongera utubwire mu rurimi rwacu uko kuntu yapfiriye abantu bo mu Buyapani.” Uwo mugore ababwira ubuhamya bw'agakiza ka Yesu nubwo yabivuze mu rurimi atazi kuko yari yaruhawe n'Umwuka Wera kuruvuga.

Impano yo kuvuga indimi nyinshi izana umugisha mwinshi. Iradufasha cyane mu masengesho. Mu rurimi Imana yonyine imenya, umwuka wacu ubwira Imana ibyifuzo byacu. Gusenga muri ubwo buryo kuzanira imitima yacu umugisha mwinshi. Hari ubwo gusenga mu rundi rurimi bitugirira akamaro kuruta gusenga mu bwenge bwacu, ndetse rimwe na rimwe iyo mpano ituma haba ububyutse mu banyabyaha.

Hariho umugabo ukomeye yari umuhakanamana ni ukuvuga umuntu utizera ko Imana ibaho. Umunsi umwe yumvise ko abakiristu bo mu mudugudu w'iwabo bari babatijwe mu Mwuka Wera, bakavuga indimi nyinshi, izi nkuru zamuteye kujya mu rusengero rwabo kubashinyagurira kubw'ibyo yise ubusazi. Inyigisho zamaze igihe kirekire ariko nta wavuze mu rundi rurimi maze umuyobozi ababwira ko inyigisho zirangiye, hakurikiraho amasengesho. Uwo mugabo utizera yasigayemo maze ahabwa kumva icyo yari ategereje cyane.

Muri ako kanya umukiristu umwe utarize cyangwa ngo agere no mu ishuri rihanitse atangira kuvuga mu cyongereza atazi ubwe icyo avuga icyo ari cyo ariko uwo muhakanamana yamenye buri jambo ryose. Ni nk'igihano cy'Imana kubw'impamvu ye yo kujya mu rusengero gushinyagurira abakiristu no kubw'ibyaha bye ahisha mu mutima we. Maze wa mukiristu uvuga indimi, akomeza avuga mu cyongereza amubwira urubanza ruzamucirwaho niba yanga guhindukirira Imana. Uwo mugabo w'umuhakanamana yumvise nk'inkota imusonga mu mutima, apfukamira Imana, ayisaba imbabazi yiha Imana kuba uwayo iteka ryose.

Ya mpamvu yamuteye gushinyagurira abakiristu niyo yamuteye guhindukirira Imana. Iyi mpamvu yakoze umurimo mu mutima we kurusha inyigisho nyinshi kuko yatanzwe n'umuntu utamenye ubwe ibyo avuga ibyo ari byo, ariko yari yabihawe mu mbaraga z'Umwuka Wera.

Umurimo wa mbere w'impano yo kuvuga indimi nyinshi ni uko uyifite yiyungura. “Uvuga ururimi rutamenyekana ariyungura, ariko uhanura yungura itorera.”1Abakorinto 14: 4.

Iryo jambo “kwiyungura” cyangwa “kunguka” mu kigereki ni ukuvuga gufasha gukurira mu Mwuka no gukomezwa mu bwenge, n'ubuntu, n'ukwera. Gukoresha neza iyo mpano gukwiriye umukiristo wese, kugira ngo urusheho guhabwa umugisha.

Buri mukiristu wese uziko afite iyo mpano yo kuvuga indimi nyinshi azi ko yiyungura, mu rusengero rwo mu mutima ashobora kugira inyigisho n'amasengesho umunsi wose. Kenshi ahabwa umugisha uvuye ku Mana igihe ari wenyine, arakomezwa mu kwizera no mu rukundo kuri Kristo. Amaze kurambirwa kurwanira ibyaha n'iby'iyi si byose, asenga mu ndimi nshya ibyo bimutera imbaraga nshya n'ibyiringiro bishya.

Handitswe muri 1 Abakorinto 14: 22 ko indimi zitamenyekana zibera abatizera ikimenyetso yuko Imana ibaho kandi ko ikorera mu bantu bayo, ni ko impano yo kuvuga indimi nshya ari ikimenyetso cy'abizera.

Ku byerekeye gukoresha neza impano yo kuvuga indimi nyinshi, Pawulo yanditse muri 1 Abakorinto 14: 26, 27 ati: “Iyo muteranye bimera bite? Umuntu wese afite indirimbo… cyangwa ururimi rutamenyekana cyangwa amagambo yo kurusobanura. Nuko rero byose bikorerwe kugira ngo abantu bunguke.” Impano yo kuvuga indimi nyinshi ntikwiye gukoreshwa kurenza urugero mu Itorero.

Hari inyigisho kuri byo. “Niba hariho abavuga ururimi rutamenyekana, havuge babiri cyangwa batatu badasaga, kandi bavuge bakurikirana umwe asobanure.” 1Abakorinto 14: 27 Umukiristu mbere yo kuvuga indimi nshya mu iteraniro, abanze amenye yuko umusobanuzi arimo. Ariko nihaba hatariho usobanura, uvuga ururimi acecekere mu iteraniro, yibwire kandi abwirire Imana mu mutima we.” 1 Abakorinto 14: 28. “Yibwire” ni ukuvuga kwibwira ubwe n'ijwi rito, bituma atabuza abandi kumva inyigisho.

Ururimi rutari ubutumwa bugenewe iteraniro, ntiruvugwe n'ijwi rirenga mu rusengero. Intumwa Pawulo atumenyesha ko yarushaga abandi bakiristo bose kuvuga indimi nshya zitamenyekana. 1 Abakorinto 14: 18. Ariko mu iteraniro, aho kuvuga amagambo igihumbi mu rurimi rutamenyekana, yahisemo kuvuga amagambo atanu ayavugishije ubwenge bwe. Ibi yabivugiye ko hatari hariho umusobanuzi.

Ayo magambo yatumye abanzi b'ububyutse bwa Pentekote bavuga ko iyo mpano ari ntoya hanyuma y'izindi mpano z'Umwuka. Kandi bavuga ko yanditswe hanyuma y'izindi mpano z'Umwuka, kubw'ibyo ari nto: Ariko si byo kuko igituma Pawulo yakundaga kuvugisha ubwenge bwe kurusha kuvuga mu rurimi, nuko ururimi rutamenyekana rutungura (kunguka) iteraniro. Ariko niba hariho usobanura byose birahinduka kuko ubusobanuro bwungura iteraniro ryose.

Impano yo kuvuga indimi nyinshi ntishobora gusimbura iyo kuvuga ijambo ry'ubwenge, n' iyo kuvuga ijambo ry'ubwenge ntishobora gusimbura iyo kuvuga mu ndimi ahubwo buri mpano ifite umurimo wayo. Kubw'ibyo dukwiye kuzifuza zose. Bamwe bakeka ko bakwiye kuvuga indimi n'ijwi rirenga. Si byiza. Imbaraga z'umubiri si zo ziha ubutumwa agaciro, ahubwo ni imbaraga z'Umwuka Wera ziburimo.

Ubusanzwe uvuga indimi zitamenyekana ntakwiye kurogoya uwigisha ubutumwa bwiza. Hari abantu bakeka ko kuvuga indimi nshya kuruta kwigisha Ijambo ry'Imana, ariko si ko biri. Umubwiriza wabatijwe mu Mwuka Wera, akaguma muri izo mbaraga kandi wahawe ubutumwa bwe n'Imana, inyigisho ze ni iz'Umwuka nk'ubutumwa buvugwa mu ndimi n'ubusobanuro.

Umuntu wese wahawe impano yo kuvuga indimi nyinshi, akwiye kwitonda iteka ngo ayikoreshe mu gihe gikwiriye mu buryo bwo kwiyungura no kungura Itorero. Yirinde kuyikoresha mu buryo bwo kuyizanira umugayo abanzi b'Imana. Imana iduhe ubuntu n'imbaraga byo gukoresha neza impano twahawe na yo. Ubuntu bw'Umwami wacu Yesu Kristo bubane namwe.

NEZERWA.Com

  • September 16th 2016 at 23:06

Menya amagambo y'indirimbo “Dutarame” ya Brian Blessed afatanije na Alpha hamwe na Jules Sentore

By Abel Mwizerwa

DUTARAME

Reka nguhimbaze nguhe icyubahiro
Erega Mana urabikwiriye
Reka ngushime Mana

Hari benshi batarama bataramira ubusa wee
Hari n'abandi batarama bataramira ibigirwa-mana weee
Cyo nimuze dutarame, ayi eeh dutaramire Imana
Abakobwa mutarame ayi eeh n'abasore dutarame
Abakuru mukome amashyi tubyinire Uhoraho
Tumuvugirize impundu wee arakomeye arakarama

Dutarame dutarame… iyeeh dutarame
Dutaramire Imana wee… iyee dutarame
Ayiii dutarame dutarame… iyeeh dutarame
Tubyinire uhoraho… iyeeh dutarame….

Uuumh! Ngutuye umutima wanjye ubwenge n'umubiri mana
Ndambuye amaboko yanjye ngo ngutaramire
Mwami uganjije hose mukiza wo kwizerwa

Dutarame dutarame… iyeeh dutarame
Dutaramire uhoraho… iyee dutarame
Dutaramire nyaguhora ku ngoma… iyeeh dutarame
Byina wikunde uberwe neza… iyeeh dutarame….

Mureke njye muririmbire mureke njye mutambire
Mureke muvuge ibigwi Uwiteka wampaye amahoro
Uwiteka yampaye umunezero
Yankuye ku cyavu anyicazanya n'ibikomangoma
Iyeeeh! Iyeeeh! Iyeeeh! Iyeeeh! Iyeeeh! Iyeeeh!
Mureke njye mutambire Mureke muvuge ibigwi
Akwiriye icyubahiro, Iyeeeh! Iyeeeh! Iyeeeh!
Iyeeeh! Iyeeeh! Iyeeeh! Iyeeeh! Iyeeeh! Iyeeeh

KANDA HANO WUMVE IYI NDIRIMBO "DUTARAME"

NEZERWA.Com

  • September 16th 2016 at 00:45

Gusohoza ibyo Imana yakubwiye ntibiyisaba ubufasha kuko yihagije

By Ubwanditsi

Urukundo rw'Imana ni kimwe mu bintu bikomeye bituma igera aho idusezeranya kuzadukorera ibintu runaka mu buzima bwacu. Isezerano ry'Imana riza ari irikuzamura rikagushyira ku rundi rwego, riza ari irikuvana ku mwanya rigushyira ku w'isumbuyeho.

Isezerano rishobora kuza kandi ari irikubwira kurindwa kwawe. Impamvu y'iri sezerano ryo kurindwa ni uko haba hari ibikurwanya, hari izindi mbaraga zishaka kurwanya umugambi w'Imana kuri wowe, ariko nkuko tubizi umugambi w'Imana uza uherekejwe n'imbaraga zayo zikomeye kugira ngo ziwushyigikire hanyuma usohore. N'isezerano ry'Imana rero riba rihishwe mu mugambi w'Imana.

Imana nta kintu ikubwira gishyashya kuri yo, ishobora kukubwira ikintu ukumva ni gishya kuri wowe ariko ku Mana ntabwo aba ari gishya kuko ikubwira n'ubundi ibisanzwe bihishwe mu mugambi wayo, noneho muri wa mugambi wayo muremure ikagenda ikuvunguriraho duke duke. Bivuga ngo ibyo uzi ni bike cyane ugereranije n'umugambi w'Imana igufiteho.

Hari umuntu uhabwa isezerano hari n'Imana iritanga

Uwahawe isezerano hari icyo aba asabwa cyitwa gutegereza, muri icyo gihe uwatanze isezerano (Imana) aba arimo gutegura, kuko ibintu byose by'Imana bigira igihe cy'umuteguro.

Aha rero uwahawe isezerano we nubwo aba asabwa gutegereza ariko yakwibaza ngo nzategereza kugeza gihe ki? Igihe ntiyakimenya kuko ibyo yasezeranijwe aba azabibona igihe kigeze. Icyo gihe kiba kizwi n'uwatanze isezerano ari we Mana. Kuko Imana yatanze isezerano, ikubwira izi icyo izakora izi n'igihe izagikorera nubwo uwasezeranijwe we aba atazi icyo gihe kuko we aba asabwa gusa gutegereza.

Igihe cy'Imana rero ntabwo umuntu apfa kukimenya kuko ni igihe kizwi nayo mu bwenge bwayo mu mikorere yayo no mu kubaho kwayo. Ikindi ni uko mu gihe igusezeranya iba izi n'uko byose bizagenda n'igihe bizabera, wowe icyawe ni ugutegereza wihanganye, ukiranuka kandi wizeye. Aya ni amagambo atatu adatana mu masezerano y'Imana.

Kenshi iyo umuntu abwiwe iby'Imana atangira kubishushanya mu bwenge bwe: “ati buriya bizagenda gutya, bizaca muri izi nzira.” Ariko mu by'ukuri uzasanga inshuro nyinshi izo nzira wibwira atari ko bizagenda. Uko igihe cy'Imana ari ibanga ryayo ni nako n'inzira zayo ari ibanga ryihariwe nayo gusa.

Urugero: Imana ishobora kukubwira iti: “Nzagukiza indwara urwaye”. Ariko ntikubwiye niba izanyura mu baganga, ntikubwiye niba iziyizira ubwayo igategeka ugakira, ntinavuze yuko izohereza umuntu akakuramburaho ikiganza. Icyo yavuze ni uko izagukiza gusa ibindi ni ibyayo. Umuntu rero niko ameze, ntiwirenganye ntiwabuza umutima wawe gutekereza utyo ariko ibyiza ni uko, ibyo uketse utabifata nk'ihame kuko inzira z'Imana n'izacu biratandukanye rwose.

Muvandimwe mwene Data nagira ngo nkwibutse ko kuzasohoza ibyo Imana yakubwiye nta handi izajya gutira imbaraga zo kubikora. Umuntu ashobora kugusezeranya ati: “ejo nzaza kugusura” ariko hagera rwose bikamunanira kandi koko neza neza ukabona ko byamunaniye.

Ariko Imana iyo yagusezeranije nta bundi bufasha ikenera, irihagije mu byawe kuko nta nakimwe kiyinanira niko yabwiye Yeremiya. Iyo yagusezeranije irabikora rwose kuko itabasha kwibagirwa ishobora byose. Uku niko dusoma ngo: “kuko ari nta jambo Imana ivuga ngo rihere” Luka 1: 37

NEZERWA.Com

  • September 15th 2016 at 01:55

Niba nawe ukunda kujya muri Sauna - Hari ibyo ukwiye kwitondera

By Ubwanditsi

Abantu bajya muri Sauna (sawuna) baba bumva umubiri umeze nabi bashaka kongera kumererwa neza. Abahanga mu by'ubuzima basobanura ko umuntu uvuye muri sauna aba akwiye kunywa amazi mbere y'ibindi bintu kuko ari yo yonyine abasha kumugarurira ayo aba yatakaje mu gihe asohora ibyuya mu bushyuhe bukabije aba avuyemo.

Bavuga kandi ko umuntu urwaye indwara iyo ari yo yose aba agomba kujya muri sauna ari uko afite uruhushya rwa muganga ubifitiye ububasha kuko ashobora kugira ingaruka ayirimo cyangwa ayivuyemo.

Kuri ibi hiyongeraho ko abafite ikibazo cya kanseri badakwiye kujya muri sauna. Inzobere mu kugorora umubiri mu Bitaro by'u Rwanda bya Gisirikare (RMH), Gasherebuka Damascène, asaba abantu bajya muri sauna ko batagomba kumaramo umwanya urenze iminota 20 kuko bigira ingaruka mu buzima cyane ku bantu b'igitsina gabo.

Ati: « muri sauna habamo ubushyuhe burenze ubwo umubiri ukeneye, abagabo iyo batinzemo bishobora kubagiraho ingaruka ku buzima bw'imyororekere kuko ubwo bushyuhe bushobora kwangiza agasabo k'intanga ngabo nazo ubwazo zikangirika. »

Sauna igira ubushyuhe buri hejuru ya dogere selisiusi 40 cyangwa no hejuru yazo kandi ubusanzwe umubiri w'umuntu ugira uburi hagati ya 34 -37.

Uyu muganga wazobereye mu bijyanye n'ubugororamubiri akomeza avuga ko bitewe
n'ibibazo by'umubiri abantu baba bafite, buri nzu ikorerwamo sauna iba ikwiye kugira umuntu uba agomba gufasha umuntu ugiriye ikibazo cy'uburwayi muri sauna nk'uko bigenda ahantu hari ubwogero rusange (piscine).

Umwe mu bantu bakunze kujya muri sauna yatangarije iki kinyamakuru ko kujya muri sauna bituma umubiri ugarura itoto ariko bisaba umuntu kwitonda kuko hari ababa barwaye indwara zibatungura. Atanga urugero ku ndwara z'umutima, diyabete n'izindi.

  • September 14th 2016 at 23:59

Gushyingirana hagati y'amadini ya gikirisitu biracyari ikibazo mu Rwanda. Abanyamadini babivugaho iki?

By Ubwanditsi

Mu madini amwe n'amwe ya gikirisitu, ntibashyingirana. Ibi ngo biterwa n'amahame ngengamyitwarire ya buri dini aba atandukanye, dore ko bamwe badatinya no kwita abandi abapagani.

Kuba mu Rwanda hari amatorero n'amadini afata gushyingirana hagati yayo nk'umuziro bivuze ko niba umukobwa/umusore runaka yakundanye n'abo mu idini ritandukanye n'iryabo iyo bageze igihe cyo gusezerana mu rusengero bahura n'amananiza.

Ikinyamaku IGIHE cyaganiriye n'ibyiciro bitandukanye birimo abangiwe gusezerana n'abagiye gusezeranira mu yandi madini bagacibwa mu matorero yabo.

Uyu ati: “Nangiwe gusezerana n'umukobwa twakundanye, bambwira ko ari ikizira.”

Umwe mu baganiriye n'iki kinyamakuru, ni umugabo uvuga ko yakundanye n'umukobwa wo mu rindi dini ritandukanye n'iryo yasengeragamo.

Ati “Umukobwa na we yari akijijwe ariko tudasengera mu idini rimwe. Umushumba wanjye yarambwiye ngo uwo mukobwa ni ikizira ntibadusezeranya. Kubera ko nari umuririmbyi mu rusengero, bambwiye ko nindamuka ngiye gusezeranira aho umukunzi wanjye asengera bazanshyira inyuma y'itorero (bazanca) ndatinya. Byarangiye twishyingiye.”

Undi ati “Umugabo wanjye yari uwo mu rindi dini rya gikirisitu, yanga kuza mu ryanjye ngo abe ariho dusezeranira. Byabaye ngombwa ko dusezeranira mu idini rye bituma aho nasengeraga bangira igicibwa.”

Icyo abanyamadini babivugaho

Umuvugizi wungirije w'Itorero rya ADEPR, Bishop Tom Rwagasana yavuze ko batanga gushyingirana n'andi matorero.

Yagize ati «Ntitwanga gushyingirana n'andi matorero ya gikirisitu. Iyo abashaka gushyingirwa bafite ubuhamya bwiza nta kabuza turabashyingira. Iyo umukobwa cyangwa umusore wacu ashaka kujya gushyingirirwa mu rindi torero na bwo ntitubyanga, baragenda bagashyingirwa, babishaka bakazagaruka bagakomeza imirimo bakoraga mu Itorero nta kibazo.»

Musenyeri Birindabagabo Alexis, uyobora Diyoseze ya Gahini mu itorero Anglican, akaba n'umuyobozi w'Umuryango ‘Peace Plan' uhuriwemo n'amadini n'amatorero atandukanye, yatangarije IGIHE ko abagifite imyumvire yo kwanga gusezeranya abo badahuje imyemerere bakwiye kwisubiraho.

Yagize ati «Abayobozi b'amadini n'amatorero duhurira mu miryango itandukanye ya gikirisitu. Sinakwanga ko umukirisitu nyoboye ajya gusezeranira mu rindi torero. Nta n'uwo nakwanga gusezeranya. Hari abajyaga bita abandi ibizira bakumva ko ari bo bazajya mu ijuru bonyine bagaha abandi akato, ariko ubu ubona ko bigenda bigabanuka, bagenda basobanukirwa ko Yesu Kristo watubambiwe ari umwe.»

Akomeza avuga ko kubuza umuntu gusezeranira mu idini rya gikirisitu ahisemo ari ukumubuza uburenganzira bwe, ibi ngo abakibitsimbarayeho bakwiye kubireka.

JPEG - 32.6 kb
Hari abavuga ko bangirwa kubana kuko badahuje idini cyangwa itorero
  • September 13th 2016 at 12:56

Umubiri wanjye wunguka iki iyo ndiye umuceri?

By Ubwanditsi

Burya ni byiza kumenya ibyo wunguye umubiri wawe mu byo uriye nk'uko ari byiza ko umucuruzi amenya ibyo yungutse igihe yaranguye ngo atavaho akagwa mu gihombo kitagaruzwa ntabimenye!

Umuceri nk'ikiribwa cyo mu bwoko bw'ibinyampeke (cereal) gihingwa henshi kandi gikunzwe cyane n'abantu b'ingeri zose ku isi. Buri mwaka umusaruro wacyo ku isi ugera kuri toni miliyoni 500. Iki kiribwa kikaba gikunze guhingwa cyane mu bihugu by'uburasirazuba bw'isi: Ubushinwa, Ubuhinde, Indoneziya n'ahandi.

Nk'uko bigaragazwa n'inzobore (specialiste) mu kubaga urwungano ngogozi (churirgie de l'appareil digestif) Dr. George Pamplona Roger mu gitabo cye yise "Health Food" yagaragaje ko umuceri ari kimwe mu biribwa byunganira abazahajwe n'indwara y'impiswi. Ibindi byunganira umurwayi w'impiswi ni nk'urubuto rwitwa Pomme ndetse na Yaourt.

JPEG - 77.3 kb
Umuceri ni kimwe mu biribwa byunganira abazahajwe n'indwara y'impiswi.

Ibanga umuceri ufite mu kuvura impiswi

Umuceri worohera igogora (digestible), kandi ugasana akarandaryi (muqueuse) ko mu mara kaba kangijwe n'uburwayi butera impiswi, bityo bikabuza amaraso gukomeza kuza ahari ikibazo (action astringente). Ikindi ni uko umuceri utagira ibyitwa Gliadine (gluten) biboneka mu ngano bishobora gutuma umuntu uziriye arwara impiswi itewe na Coeliaque. Aha umurwayi akoresha amazi yawo akongeramo akunyu gake ndetse n'ikiyiko cy'umutobe w'indimu.

Ibindi twunguka mu muceri

1. Umuceri utera imbaraga kuko muri garama 100 uduha ingufu zingana na 1508 kJ, Uturinda indwara y'umuvuduko w'ikirenga izwi nka Hypertention kubera ko ukennye ku munyu witwa sodiyumu.

2. Umuceri ugabanya urugimbu mu mubiri bitewe n'ibikatsi ugira cyane cyane iyo utanyujijwe mu nganda ngo ukoborwe.

3. Umuceri wongerera umubiri imyunyu-ngugu ikenewe ku rugero rwiza iyo umubiri wayitakarije mu burwayi bw'impiswi.

Aho byavuye: Santé par les aliments page 212

  • September 12th 2016 at 23:31

Mu gusengera u Rwanda, Bishop Rugagi yahanuye ko Imana igiye guha amahoro abarundi n'imipaka igafunguka

By Ubwanditsi

Itorero rya Redeemed Gospel Church Rwanda ryongeye gutegura igiterane ngaruka-mwaka kizamara iminsi 40, kuwa Gatandatu tariki ya 10 Nzeri 2016 bibanze ku nyigisho n'amasengesho yo gusabira igihugu.

Iki giterane cy'amasengesho cyatangiye kuwa 1 Nzeri kizasozwa kuwa 10 Ukwakira 2016. Ku munsi wa cumi cyabereye aho iri torero ryimukiye mu mugi wa Kigali mu nyubako yahoze ikoreramo Banki ya Kigali.

Mu nyigisho zatanzwe ku munsi wa cumi, Bishop Rugagi Innocent uyoboye itorero Redeemed Gospel Church yasengeye u Rwanda arusabira amahoro ndetse n'inzego zose z'ubuyobozi yazisabiye umugisha mu mikorere ya buri munsi ngo bagire imbaraga zikomeza gukora ibizamura igihugu.

JPEG - 99.5 kb
Bishop Rugagi Innocent yasengeye u Rwanda afashe ibendera ry'igihugu cyarwo n'iry'icya Isiraheli

Yavuze ko yizeye neza ko Imana igiye guha umugisha u Rwanda nk'uko yabigiriye Abayisiraheli. Yagize ati “Imigisha Imana yasezeranyije Isiraheli natwe tuyiboneho. Imana ya Isiraheli ni Imana y'u Rwada, ni iy'abanyarwanda.»

Mu buhanuzi bwe kuri uwo munsi, Bishop Rugagi Innocent yavuze ko ibibazo byose u Burundi burimo bigiye gukemuka ndetse n'imipaka ikongera igafunguka. Yasabye impunzi z'Abarundi aho ziri hose kudacibwa intege n'akaduruvayo kari mu gihugu cyabo kuko ngo “Imana igiye kubakorera ibitangaza.”

Yagize ati “Imana igiye guha umugisha Abarundi, igiye guha amahoro Abarundi, mpagaze mu mavuta y'ubuhanuzi ndasengera u Burundi. Ndashimira ko mbonye imipaka y'igihugu ifungutse. Aho Abarundi bose bari mbatuyeho umugisha.”

Igiterane cyaranzwe n'ibihe bidasanzwe birimo ubutumwa bwo mu ndirimbo no mu ijambo ry'Imana buherekejwe n'ubuhanuzi Bishop Rugagi avuga ko “Imana yanyujije mu mukozi wayo kugira ngo bugere ku bantu.”

JPEG - 168 kb
Bishop Rugagi Innocent

Mu bakirisitu Bishop Rugagi yahanuriye harimo umukobwa yabwiye ko Imana igiye kumuhindurira amateka ikamuvana mu kazi kamuteshaga agaciro yakoraga ikamuha akandi ko gucuruza. Hari n'undi mukobwa yabwiye ko Imana yamubwiye ko ikuyeho impanuka yashoboraga kuzahitana mukuru we uba i Nairobi.

Iki giterane cyitabiriwe n'abantu bari baturutse mu ntara zose z'igihugu n'abashumba b'amatorero yo mu Rwanda n'abavugabutumwa banyuranye barimo n'abaturutse hanze y'igihugu.

Mu gihe cy'iminsi 40 y'iki giterane kizabonekamo abakozi b'Imana bavuye hirya no hino ku isi: nka Apôtre Peter Nyaga wo muri Tanzania, Juliane Kyula wo muri Kenya, Bishop Ashili wo muri mu Afurika y'Epfo, Pastor Jacob wo muri Australia n'abandi.

  • September 12th 2016 at 14:21

Nasanze nta hantu kure Imana itagukura kandi nta hantu kure Imana itakugeza – Ubuhamya!

By Ubwanditsi

Nitwa Habiyaremye Olivier,mvuka muri Ruhondo . Nkimara kuvuka, data na mama bahise batandukana, mama anjugunya kwa nyogokuru, nyogokuru akajya anjyana gusaba mw'isoko no mu bapadiri bari batuye hafi y'iwacu. Icyo gihe nacuramye umusatsi, ndwara bwaki, amatama arabyimba.

Bimaze gukomera, nyogokuru yanjyanaga mu bapadiri bakampa ibijumba, imboga z'ibyatsi, indagara zisekuye n'igikoma. Maze imyaka umunani imfashanyo irahagarara nyogokuru ahita anshakira akazi ko kuragira intama kuri Mukungwa bakampemba amafaranga Magana inani y'amanyarwanda ( 800frw). Nyuma y'amezi atanu nkora ako kazi bampembye umwana w'intama.

Nyuma y'igihe gito marume yibye ibigori bamuca 2500frw, babuze icyo bishyura bagurisha wa mwana w'intama wanjye. Naje kubona akandi kazi ko kuragira ingurube bampemba ikibwana cy'ingurube. Kubera impamvu z'ubukene cyananiye kucyitaho kirasonza, kirwara n'amavunja nkuko nanjye nari nyarwaye nyuma kiza gupfa.

Hagati aho, umuturannyi yambwiye ko yamboneye akazi ko kuragira inka I Gitarama mbura itike mpita niba urukwavu rwa nyogokuru ndugurisha 450frw. Muri ayo mafaranga naguriyemo icupa ry'urwagwa uwari unjyanye kuri ako kazi, asigaye nyagira itike. Twagiye mu modoka ipakiye imizigo yo mu bwoko bwa dayihatsu. Yatugejeje ku rugarika.

Aho kurugarika, nabonye akazi ku mugabo witwa Butare Bernard nkajya mpembwa 1500frw ku kwezi. Nyuma y'aho narahavuye njya gukora akazi k' ubuzamu I Kigali. Icyo gihe nibwo nagiye mu giterane cy'ivugabutumwa mvayo nakiriye Yesu nk'umwami n'umukiza w'ubugingo bwanjye. Kuva icyo gihe natangiye gusenga, Imana ikajya ivugana nanjye.

Yambwiye ko izangirira neza kandi ko izankoresha ahantu hatandukanye. Naje kuva mu kazi k'ubuzamu ntangira gukora umurimo w'ivugabutumwa bwiza. Imana yampaye agaciro gakomeye, nagiye mw'ivugabutumwa muri Afrika y'epfo ndetse n' I Arusha muri Tanzaniya. Ubu mfite inzu n'imodoka.

Nyuma nagiye gusura nyogokuru musaba imbabazi mwishyura na rwa rukwavu nari naramwibye mugurira inka mwubakira n'ikiraro cyayo.Ndashima Imana ko nyogokuru atagisaba, ubu afite ibyokurya bimuhagije.
Imana yangiriye neza nawe yakugirira neza, nuyubaha izagutabara nkuko yantabaye.

source: agakiza.org

  • September 12th 2016 at 13:21

Kuki imyitwarire nk'iyi ikomeje kugaragara mu nsengero abashumba barebera?

By Ubwanditsi

Mu gihe iterambere rirushaho kuzamuka byihuse muri iki gihe, ni nako usanga abakurikiranira hafi iby'umuco badahwema gusa n'abatabaza bavuga ko utakaza indangagaciro zawo bitewe n'imyitwarire y'abantu bo mu gihe tugezemo.

Kuba by'umwihariko bamwe mu rubyiruko bagenda bigana imico n'imyitwarire by'ahandi bituma barushaho kuyirarikira maze bagakora iyo bwabaga ngo bisanishe nabo.

Igitera impungenge kikanatera kwibaza byinshi, ni uko usanga no mu bakiristo basenga by'umwihariko ab'igitsina-gore barangwa n'imyambarire iteye isoni badatinya no kuyinjirana ahera h'Imana mu rusengero mu gihe baje gusenga; byaba ari ku munsi w'icyumweru n'indi minsi isanzwe y'amateraniro.

Bene aba bakiristu cyane cyane abagore n'abakobwa; kuko ari bo bigaragaraho cyane, usanga baje mu rusengero bambaye imyenda (mini-jupe) isa n'ishotora ababareba inagaragaza ubwambure bwabo cyangwa se ugasanga bambaye udupantaro tubahambiriye cyane tubonerana ku buryo hari n'igihe ubona umwenda w'imbere, ndetse rimwe na rimwe ukabona bambaye imyenda yo hejuru igaragaza imyanya y'amabere uko yakabaye.

Nyamara ibi bice baba berekana uretse n'umuco nyarwanda, na Bibiliya ibyita imyanya y'ibanga. Bivuga ngo ni imyanya igomba kurebwa no kumenywa na nyirayo wenyine.

Ni iyihe mpamvu ibatera gutinyuka kuyizana no mu nzu y'Imana?

Kumenya impamvu itera aba bantu gukora ibi, iragoye:

1. Hari ubikora mu rwego rwo kwigana abandi bantu yabonanye iyo myambarire, tutareka kuvuga ko iba inateye isoni, cyane cyane ko hari nubwo uyambaye ubona ari umuntu wiyubashye wamureba ukagira isoni ari wowe, ukipfuka mu maso!

2. Hari ubyambara ashaka kwerekana imyenda idasanzwe atunze iwe no kwerekana ikimero n'uko umubiri we uteye no gushaka gukurura abasore n'abagabo bamwitegereza.

3. Ntawabura no kuvuga ko hari kandi n'ubikora ashaka kugaragaza ko aberwa no gushaka kwemeza bagenzi be b'abagore n'abakobwa ko abarenze n'ibindi.

Iruhande rw'izi mpamvu tubonye haruguru, iri nyamukuru ni uko bene uyu witwara atya aba azi ko mu rusengero naho ari ahantu hahurira abantu benshi baturutse imihanda yose byakoroha ko bamurebera icyarimwe.

JPEG - 261.3 kb
Umugore cyangwa umukobwa uza ameze atya atera abamubona kujarajaza intekerezo zabo

Hari ibikorwa bakora ntihagire urabukwa nyamara bo bazi ibyo barimo!

Akenshi bene aba bantu iyo bari mu rusengero usanga ari bo bashaka kugaragara mu mirimo myinshi kurusha abandi, ndetse byaba na ngombwa ukabona ari bo batanga abandi kujya imbere mu gihe cyo gutanga amaturo, gushima Imana n'ibindi nk'ibyo; wagenzura neza ukabona ko bene uyu ashaka kurangaza abantu gusa, agenda buhoro buhoro kugira ngo bamutindeho bamureba.

Hari udashobora gukora ibi ahubwo akajya asohoka buri kanya; yinjira cyangwa asohoka. Ibi bituma arushaho kugaragara cyane ari nako abamuhozaho ijisho bibaza kuri iyo myambarire ye ndetse bamwe mu bamutinzeho bakaba banahavana amarari y'uburyo butandukanye. Nyamara ibi si ibyo gushimwa na gato ntibikwiye umukiristu uvuga ko yubaha Imana atayiryarya.

Bene Data, Bibiliya iratwihanangiriza itwibutsa ngo “Mbese ntimuzi yuko imibiri yanyu ari insengero z'Umwuka Wera uri muri mwe, uwo mufite wavuye ku Mana? Kandi ntimuri abanyu ngo mwigenge kuko mwaguzwe igiciro, nuko rero nimutume imibiri yanyu ihimbaza Imana gusa.” (1 Abakorinto 6:19-20)

Abayoboye umukumbi w'Imana, hari ababona nta kidasanzwe kibirimo

Ikibabaje ni uko hari ubwo bamwe mu bakozi b'Imana Bibiliya iha inshingano zo kureberera umukumbi w'Imana, usanga babona iyi myitwarire igayitse mu nzu y'Imana ukabona rwose ntacyo bayivugaho cyangwa se ngo banayifatire ibyemezo ikumirwe, kuko akenshi ikiba kibashishikaje ari ukubona abantu binjira mu nsengero bayoboye kubwo gushaka umubare munini w'ababagana gusa.

Bigatera ikibazo gikomeye rero, iyo ubona bamwe mu bashumba b'igitsina-gore ari bo barangwa n'imwe muri iyi myambarire y'utujipo dukabije ubugufi, amapantaro abahambiriye cyane n'indi myenda ibambika ubusa nk'iyo, ugasanga baratanga urugero rubi ku bana b'abakobwa bakiri bato bitwa ko bayoboye. Ariko birakwiye ko Umushumba abera icyitegererezo n'urugero rwiza intama ayoboye.

JPEG - 348.8 kb
Ese koko ni ukujyana n'iterambere cyangwa ni ukutihesha agaciro?

Ese koko mu nzu y'Imana niho abantu bari bakwiriye kuza kwerekanira ikimero, kuberwa n'ubwiza bw'imyambaro idasanzwe batunze? Oya siko biri. Inzu y'Imana ni iyo gusengeramo no guhimbaza Imana. “Kuko turi abo yaremye ituremeye imirimo myiza muri Kristo Yesu, iyo Imana yiteguriye kera kugira ngo tuyigenderemo.” (Abefeso 2:10)

Nshuti muvandimwe, ihema ry'Imana rirera kandi biradukwiye ko turyinjiramo dutinya tunahinda umushyitsi kuko nubwo ari ahantu hadahēza buri wese, ariko ni ahantu Imana iba hatandukanye rwose n'ahandi twirirwa muri gahunda zacu. Mwibuke Uwiteka abonye Mose aza yerekeza ku gihuru cyaka, aramubwira ngo “Wikwegera hano, kandi kwetura inkweto mu birenge byawe, kuko aho uhagaze aho ari ahera.” (Kuva 3:5)

Mu by'ukuri Uwiteka yashakaga kubwira Mose ko abanza kwibuka yuko aho ari kugana aho, ari ahera, hatandukanye n'ahandi yari ari. Bityo yigenzure yitunganye mbere yo kuhegera kuko Imana yera ihari.

Mu gice cya kabiri, tuzatanga izindi mpuguro nk'izi no ku basore n'abagabo cyane cyane mu ihema ry'Imana (mu rusengero) kuko nabo hari bamwe ubonana imyitwarire idakwiye umukiristu w'umusore cyangwa umugabo wiyubaha. Imana idufashe!

Rejoice Africa Ministries
NEZERWA.Com

Ugukiranuka nyakuri ni ukuhe?

By Ubwanditsi

“…mukambara umuntu mushya waremewe ibyo gukiranuka no kwera bizanywe n'ukuri nk'uko Imana yabishatse.” (Abefeso 4:24)

Umurongo ubanza uvugitse neza cyane mu busemuzi bwa Bibiliya yitwa “Amplified Bible”. Uravuga ngo, “Mukambara kamere nshya (uwahinduwe mushya) waremwe mu ishusho y'Imana, (asa n'Imana) mu gukiranuka no kwera nyakuri.” Interuro ivuga ngo, “mu ishusho y'Imana…” ivuga “kimwe n'Imana”.

Waremewe rero kuba kimwe n'Imana mu gukiranuka no kwera nyakuri. Kandi se gukiranuka ni iki? Ni ukwigaragaza kw'ugushaka na kamere bya Data wa twese.

Rero, iyo Bibiliya ivuga kwambara umuntu mushya waremewe mu gukiranuka, bivuga ko ugomba kugendera mu mucyo w'uwo uri we: werekana ishusho y'ugushaka na kamere bya Data! Imbaraga zo kumunezeza iteka, ahantu hose, no muri byose.

Ibi kandi bijyana no kwamamaza ubuhamya bw'imiterere yuwo Data wa twese ari we Mana, ukamamaza na kamere ye ukoresheje ubuzima bwawe, ukoresheje ibikorwa n'amagambo biri mu mwuka wawe. Wahamagariwe kugaragaza no gusakaza ugushaka, umugambi n'imiterere by'Imana. Uku ni ko gukiranuka nyakuri.

Yesu yaje mu ishusho igaragaza ugushaka na kamere bya Data; bivuga, ukwigaragaza kwo gukiranuka kw'Imana Nkuru. Kimwe n'ibyo, gukiranuka kwacu ni ukwigaragaza kw'ugushaka na kamere bya Data wo mu ijuru biba muri twe!

Mu gitabo cy'Abaheburayo 1:3 hatubwira ko Yesu yari ishusho igaragaza Data. Ijambo “igaragaza” rivuga kwerekana, guhishura, gusobanura no kwemeza. Yari uhagarariye Data mu buryo bwuzuye. Kandi Bibiliya ivuga ko uko Ari, ari ko natwe turi muri iyi si. (1Yohana 4:17)

Twahawe impano y'ubushobozi n'imbaraga byo kugaragaza, guhishura no kwemeza ugushaka na kamere bya Data ahantu hose no muri byose. Uyu ni umuhamagaro wacu; ibi ni byo yatwohereje gukora! Uyu ni wo murage wacu. Imana ihabwe icyubahiro!

Isengesho ryawe aka kanya:

Data Mwiza, Ndagushimira ko wangize ukurabagirana k'ubwiza bwawe, ndetse n'ugaragaza, agahishura, ndetse akanerekana ugushaka kwawe na kamere yawe ahantu hose; no muri byose. Ndagendera mu kuri k'ubuzima bushya bwo gukiranuka nakiriye muri Kristo, mu Izina rya Yesu. Amen.

Pastor Chris
Nezerwa.com

  • September 12th 2016 at 03:31

Ntugasuzugure Ubuhanuzi ahubwo bugenzuze Ibyanditswe byera

By Ubwanditsi

Nuko bene Data, mwifuze guhanura kandi ntimubuze abandi kuvuga indimi zitamenyekana. Ariko byose bikorwe neza uko bikwiriye, no muri gahunda. (1Abakorinto 14:39-40)

Mu gitabo cy'Ibyakozwe n'Intumwa 2:17; Petero yasubiyemo amagambo y'umuhanuzi Yoweli: Imana iravuze iti: “Uku ni ko bizaba mu minsi y'imperuka, nzasuka ku Umwuka wanjye ku bantu bose kandi abahungu n'abakobwa banyu bazahanura …”

Ibi byasohoye ku munsi wa Pentekote ubwo Umwuka Wera yamanukiraga intumwa za Yesu zimaze igihe zimutegereje. Muri iki gitabo cy'Ibyakozwe n'Intumwa 1:8, Yesu yavuze ko muzahabwa imbaraga Umwuka Wera nabamanukira. Bumwe mu buryo bwo gukoresha izo mbaraga ni mu mpano y'ubuhanuzi.

Impano y'ubuhanuzi ni umuryango uganisha ku bitangaza; ni inzira yo kuzana imbaraga zidasanzwe z'Imana mu buzima bwawe, mu butunzi bwawe, mu kazi kawe, cyangwa mu bo uyoboye niba uri umuvugabutumwa cyangwa umushumba uyoboye umukumbi w'Imana. Bityo, ugomba gusenga ugasaba Imana iyi mpano yo guhanura! Nuvuga mu ndimi umwanya uhagije, ni kimwe mu bitanga amavuta y'Umwuka wera yo guhanura.

Icyo gihe, ijambo ry'Imana rizatangira kubira muri wowe. Kandi ayo mavuta iyo akujeho, n'Ijambo rigakomeza kubira imbere muri wowe, ujye uriha umwanya; ureke risohoke. Ubwo ni ubuhanuzi.

Guhanura ni ukuvuga amagambo afite ubushobozi buva ku Mana; amagambo afite ubuzima. None rero, ntugasuzugure ubuhanuzi. Ubuhanuzi ni nk'umucyo uyobora. Mu buhanuzi niho abantu bamenyeye ko Yesu agiye kuza. Hariho ubuhanuzi bwinshi ko Umukiza – Mesiya yagombaga kuza mu isi. Gihamya Imana yari ifitiye abantu yo kumenya neza Mesiya ku buryo bahamya bakavuga bati “Uyu ni Mesiya,” nta yindi uretse Ijambo ryayo ryavuzwe n'abahanuzi kuri Yesu Kristo ari we Mesiya uzaza. Ubuhanuzi ni ubwa ngombwa.

Ese hari ubuhanuzi ku buzima bwawe? Pawulo yabwiye Timoteyo ati “Mwana wanjye Timoteyo, ndakwihanangiriza nkurikije ubuhanuzi bwa kera bwahanuye ibyawe, kugira ngo buduheshe kurwana intambara nziza” (1Timoteyo 1:18). Shōra urugamba ukoresheje ubwo buhanuzi. Fata ijambo ryose ry'ubuhanuzi ku buzima bwawe kandi urifate ukomeje.

Niba bishoboka, bwandike kugira ngo utabwibagirwa cyangwa ukazabwitiranya, kuko satani ntanezezwa na gato nuko wazasingira ibyo wasezeranijwe n'Imana biciye mu buhanuzi bwawe.

Isengesho ryawe aka kanya:

Data mwiza, ngushimiye impano y'ubuhanuzi. Umutima wanjye n'akanwa kanjye byuzuye amagambo y'imbaraga, ndetse n'aka kanya, ngo bitere impinduka mu buzima bwanjye n'ahankikije hose. Ntangaje ko ubuzima bwanjye bubereyeho icyubahiro cyawe; ejo hazaza hanjye ni aho gutunganirwa, kujya mbere no kugubwa neza mu Butumwa bwiza bwa Yesu Kristo! Mbeho iteka mu mahoro, mu buzima buzira umuze, ndetse no mu buntu bwawe iteka ryose, mu Izina rya Yesu. Amen.

Pastor Chris
NEZERWA.Com

  • September 12th 2016 at 00:07

Hindura imikorere biragukwiye kugira icyo uhindura uyu munsi

By Ubwanditsi

Kandi abacira uyu mugani ati “Hāriho umuntu wateye umutini mu ruzabibu rwe, bukeye araza awushakaho imbuto arazibura. Abwira umuhinzi ati: ‘Dore none uyu mwaka ni uwa gatatu, nza gushaka imbuto kuri uyu mutini sinzibone. Uwuce, urakomeza kunyunyuriza iki ubutaka?' Na we aramusubiza ati ‘Databuja, uwureke uyu mwaka na wo, nywuhingire nywufumbire, ahari hanyuma wakwera imbuto. Icyakora nutera uzawuce.' ” (Luka 13:6-9).

Icyanditswe cyo hejuru ni umugani Umwami Yesu Kristo yaciye ashimangira umumaro wo kwera imbuto mu Bwami bw'Imana. Nyiri uruzabibu yaje ashaka imbuto ku giti cy'umutini cyari gihari ariko arazibura. Maze abwira umuhinzi ati: “Uwuce.”

Umuhinzi ariko, asaba andi mahirwe y'igihe cyo guhingira icyo giti, wenda cyazatanga imbuto. Bitagenda bityo, kigatemwa.

Umutini nta gaciro wari ufite mu ruzabibu igihe cyose utatangaga imbuto. Kimwe n'ibyo, Umukristo ni igiti cyo gukiranuka mu ruzabibu rw'Umwami Imana, kandi aba ategerejweho kwera imbuto (Yesaya 61:3).

Umukristo utera imbuto zo gukiranuka ni nk'igiti cy'umutini nyiri uruzabibu yavuze ngo bace, ndetse akakibwira ngo, “…uyu mutini urakomeza kunyunyuriza iki ubutaka?” Mu yandi magambo, kuki watakaza ubutaka bwiza ku giti kidatanga umusaruro?

Abakristo bamwe bamaze igihe kinini baravutse ubwa kabiri, ari byo kwakira agakiza kabonerwa muri Yesu Kristo, ariko ugasanga nta muntu n'umwe barayobora kuri Yesu; nta wundi muntu mushya barazana mu rusengero ngo nawe yinjire mu mukumbi mwiza w'Intama z'Imana. Uko ni ukuba nk'umutini utera imbuto.

Ahari niba ari uko wari umeze, hindura imikorere biragukwiye ko ugira icyo uhindura uyu munsi ugirire akamaro n'umuyoboro mwiza abataramenya ibyiza biri mu Mana: Icya mbere, saba Imana imbabazi kuko uzi gukora neza ntabikore Bibiliya ibyita icyaha (Yakobo 4:17). Hanyuma, usabe Umwuka Wera agushoboze kandi akuyobore ugire uwo uhamiriza Yesu Kristo uyu munsi.

Tangira uyu munsi ubwire abandi ibya Yesu n'inkuru nziza ze, ubabwire uwo Yesu ari we kuri wowe n'ubuntu bwe butanga agakiza butarobanuye.

Pawulo yaravuze ati: “Urukundo rwa Kristo ruraduhata, kuko twemejwe yuko nk'uko Umwe yapfiriye bose ari ko bose bapfuye” (2Abakorinto 5:14). Gira umwete wo kwerera imbuto Umwami waguhamagaye akaguha kumumenya, akagushyira mu murimo we kuko abikwifuzaho.

Rejoice Africa Ministries
NEZERWA.Com

  • September 11th 2016 at 08:37

Kureka umugore wa kabiri birangoye kuko niwe ubyara uwambere tumaze imyaka 9 nta mwana. NKORE IKI?

By Ubwanditsi

Uyu mugabo ni umukiristu yatubwiye ko asengera mu itorero rimwe rikorera mu mugi wa Kigali. Yatangiye ubuhamya bwe agisha inama agira ati:

Ndi umugabo (amazina munyihanganire kutayavuga kubera impamvu bwite) ntuye mu mugi wa Kigali ahitwa I Kinyinya, maze imyaka 9 nshatse umugore nkunda w'isezerano ariko muri iyo myaka yose tumaze nta mwana twigeze tubona. Twasengewe n'abantu benshi batandukanye, abahanuzi bavuye hirya no hino ariko turategereza na nubu twarahebye.

Nagiye kwa muganga ngo ndebe niba ari njye ufite ikibazo basanga ndi muzima rwose nyuma n'umugore wanjye nawe ajya ku bitaro ahatandukanye n'aho nagiye nawe biba uko, hanyuma twafashe umwanzuro wo kujyana twembi ku rindi vuriro rikorera mu ntara y'amajyepfo kugira ngo turebe ko koko ibyo batubwiye ari ukuri dusanga rwose nta kibazo twembi dufite turi bazima.

Arakomeza agisha inama ati: Ibi twabikoze hashize nk'imyaka igera kuri 7 dutegereje umwana ariko byaranze, bigeze aho njye numva kwihangana birananiye nshaka undi mugore wa kabiri ku ruhande (twavuga ko ari inshoreke) mushaka uwa mbere w'isezerano atabizi. Ariko igitangaje ni uko uwo mugore wa kabiri nkimushaka twahise tubyarana, abyara abana babiri b'impanga beza ubu tumaze imyaka 2 tubana.

Maze kubona ibi bibaye byaranyobeye, ariko ni nako nakomeje kujya numva nta mahoro yuzuye mfite kugeza ubwo nabibwiye umugore wanjye wa mbere (uw'isezerano) mubwira byose ntaho mukinze, mbona abaye nk'ukubiswe n'inkuba ariko ntiyagira ikindi arenzaho mbona aracecetse kugeza n'ubu tubanye dutyo.

Nyamara uyu mugore wa kabiri ntabwo azi ko ibyo byose nabibwiye uriya wambere ariko aziko mufite kuko uyu wakabiri dusengera mu rusengero rumwe.
Buri uko ninjiye mu rusengero, icyo kintu gihora kinkomanga ku mutima yuko nakoze amahano nkinjira undi mugore kandi bitemewe ku mukiristu dore ko ndi umudiyakoni mu rusengero nsengeramo rwa…… (twirinze kuvuga aho asengera).

Kenshi numva ijambo ry'Imana rikansinda, n'umutima wanjye uhora unkomanga kuri icyo kintu ariko kumureka byarananiye kuko nkunda abana bikomeye ku buryo numvaga ntari kubyihanganira kumara iyo myaka yose nta mwana.

Ndabinginze bene Data, kuba mbinyujije kuri uru rubuga mwihangane munyumve ko ari uko binkomereye cyane, kumara imyaka 9 nta mwana turabona, uruvugo rw'abantu namwe ntimuruyobewe, ubwo simvuze mu gushaka kwanjye kwa mbere amagambo yavuzwe ku mukobwa nari nshyingiranywe nawe ariwe mugore wa mbere, ubwo tumaze imyaka 4 gusa bahise baduca mu muryango w'iwabo w'umugore nuw'iwacu ngo twaciye umuryango kuko tutabyara,.. n'ibindi byinshi biremereye ntavuze ariko mwumve ko bitari bitworoheye na mba. Aha ku bantu bashatse (ndavuga abagore n'abagabo) nibo babyumva cyane.

Bavandimwe nimungire inama y'icyo nakora nk'abakiristu, nk'abavandimwe kuko nubwo icyaha narangije kugikora ngaca inyuma uwo twashakanye nkabyarana n'undi mugore, ariko inama zanyu ziramfasha kumenya uko nifata. None se uwo mugore nabasha kumureka kandi ari we umpa kubona abana?

Kugumana nawe ko bishobora kuzambuza ijuru ndagira nte? Umugore wanjye wa mbere ko adakoma yaruciye akarumira nzamenya ajya abifata ate? Mbese ubwo Imana yambabarira koko? Nkore iki?

Mbizeyeho inama nziza Imana ibahe umugisha.

NEZERWA.Com

  • September 11th 2016 at 04:03

Ni iki kizerekana ko turi abigishwa ba Yesu?

By Ubwanditsi

Bakundwa, dukundane kuko urukundo ruva ku Mana. Umuntu wese ukunda yabyawe n'Imana kandi azi Imana. Udakundana ntazi Imana kuko Imana ari urukundo - 1 Yohana 4:7-8

Umuntu nakubwira ngo aragukunda ntagire icyo aguha, azaba akubesha. Imana yaradukunze, iduha Yesu nk'uko tubisoma mu butumwa bwiza bwa Yohana 3:16 hagira hati: ‘‘Kuko Imana yakunze abari mu Isi cyane, byatumye itanga umwana wayo w'ikinege kurira ngo umwizera wese atarimbuka, ahubwo ahabwe ubugingo buhoraho.''

Bibiliya itubwira ko Yonatani na Dawidi bakundanaga urukundo rumeze nk'agati gakubiranye: 1 Samweli 18:1 ; ni uko Dawidi amaze kuvugana na Sawuli, umutima wa Yonatani uherako uba agati gakubiranye n'uwe, kandi Yonatani akamukunda nk'uko yikunda.

Natangajwe n'ukuntu Sawuli yabonye Dawidi akamubonamo umushumba w'intama, ariko Yonatani we abonye Dawidi aravuga ngo uyu azaba umwami, bituma amukunda. Imana iturinde amaso areba nk'aya Sawuli, kuko dufite ba Dawidi batagaragara ariko bazavamo abantu bakomeye mu gihe kiri imbere.

Bibiliya itubwira ko ibyo wakora byose udafite urukundo, nta cyo byakumarira. Nubwo navuga indimi z'abantu n'iz'abamarayika, ariko singire urukundo, mba mpindutse nk'umuringa uvuga cyangwa icyuma kirenga. - 1 Abakorinto 13 :1.

Bibiliya itubwira ko mu minsi y'imperuka urukundo rwa benshi ruzakonja. Ese uzasigara muri abo bake bazarusigarana cyangwa uzajyana n'abo benshi urwabo ruzakonja? Umuntu udafite urukundo asigara yizirikanaho ubwe, adaha agaciro abandi. “Kuko abantu bazaba bikunda, bakunda impiya, birarira, bibona, batukana, batumvira ababyeyi babo, indashima, batari abera…” - 2 Timoteyo 3: 2.

Abantu babajije Yesu itegeko riruta ayandi, arabasubiza ati “Ukundishe Uwiteka Imana yawe umutima wawe wose… “, irya kabiri risa n'iryo ni iri ngo “Ukunde mugenzi wawe nk'uko wikunda.“

Yesu yaravuze ati: ‘‘Nari nshonje murangaburira, nari umushyitsi murancumbikira, nari mu nzu y'imbohe muransura… Iyo yose ni imirimo y'urukundo abantu bazagororerwa.” Kuko Mariya yakundaga Yesu, yazindukiye ku mva ye atwaye ibihumura neza, asanga Yesu atarimo, biramubabaza cyane. Abonye umuntu bugufi bw'aho, aramubaza ati “Mbwira aho bashyize umwami wanjye.”

Yesu avuganye na we, aramumenya amuha ubutumwa ashyira abigishwa. Ibaze urukundo rwatumye ajya gusiga ibihumura neza umurambo! Yaramukundaga pe! Dukunde Yesu kandi natwe dukundane, kuko udakundana ntazi Imana, kandi ikizagaragaza ko turi abigishwa ba Yesu ni ugukundana.

Bene Data, urukundo rurihangana, rukagira neza, urukundo ntirugira ishyari, urukundo ntirwirarira, ntirwihimbaza, ntirukora ibiteye isoni, ntirushaka ibyarwo, ntiruhutiraho, ntirutekereza ikibi ku bantu, ntirwishimira gukiranirwa kw'abandi, ahubwo rwishimira ukuri, rubabarira byose, rwizera byose, rwiringira byose, rwihanganira byose. - 1 Abakorinto 13:4-7. Mbifurije kugira urukundo.

NEZERWA.Com

  • September 10th 2016 at 02:10

Pasiteri Ezra Mpyisi amerewe nabi n'itorero rye azira kuvuga ko amadini yose ari aya Satani

By Ubwanditsi

Pasiteri Ezra Mpyisi, Umukambwe umaze imyaka 65 ari umuvugabutumwa mu itorero ry'Abadivantisiti b'umunsi wa karindwi mu Rwanda, yibasiwe n'abayobozi b'iri torero ndetse bajya banamukumira bamuziza ko yavuze ko amadini yose ari aya Satani, n'iri abarizwamo akanabwirizamo ubutumwa rikaba ari irya Satani.

Mu kwezi kwa Kamena uyu mwaka wa 2016, nibwo Pasiteri Ezra Mpyisi yatangarije ikinyamakuru Ukwezi.com ko atemeranya na gato n'abavuga ko amadini n'amatorero ari iby'Imana, ahubwo ngo amadini yose ni aya satani, kuko adakurikiza ibyo Bibiliya yigisha ahubwo agakurikiza inyungu z'abantu ku giti cyabo basobanura Bibiliya mu buryo bugoretse.

Ku bijyanye n'itorero ry'Abadivantisi b'umunsi wa karindwi abarizwamo, na ryo icyo gihe yavuze ko ari irya satani kuko ari ryo muri Bibiliya mu gitabo cy'Ibyahishuwe bita "Lawodokiya", kandi ngo bagenzi be basengera muri iri torero bamenye ko bafite akaga gakomeye, kuko ngo Imana ivuga ko badashyushye cyangwa ngo babire ahubwo bakaba ari akazuyazi.

Nyuma y'uko ibi abitangaje, bamwe mu bayobozi b'itorero ry'Abadivantisiti b'umunsi wa karindwi abarizwamo baramuhamagaye baramugaya cyane nk'uko yabishimangiye mu kiganiro yagiranye n'ikinyamakuru Ukwezi.com kuri uyu wa Kane.

Avuga ko bamurakariye cyane kandi bakamufatira ingamba zirimo izo kumukumira, bamubuza kujya kubwiriza ahantu hamwe na hamwe.

JPEG - 28.4 kb
Pasiteri Ezra Mpyisi

Ezra Mpyisi ati: "Barankumira cyane, barandwanya hari aho banga ko njya kubwiriza kugira ngo ntajyayo nkavuga ukuri ariko hari ubwo bagera aho bakangarukira. Gusa ntibanciye intege, ahubwo batumye ndushaho kuko njyewe sinkorera abantu nkorera Imana."

Arakomeza ati: "Ntabwo wanezeza abantu ngo unezeze n'Imana, ntibishoboka. Ubu barashobewe, narababwiye nti ahubwo ndatangiye ngiye kuvuga ibirenze ibyo. Yesu yabwiye abakuru b'amadini ati mwa ndyarya mwe, muri ibituro bisize ingwa. Naho ubundi dushaka ikinezeza abantu, nta buryo uzavugira Imana hanyuma ngo unezeze abantu kandi unezeze n'Imana, iyo kimwe gihombye ikindi kirahomboka, ntibyahomboka byombi, ntiwagira abantu ngo ugire n'Imana."

Pasiteri Ezra Mpyisi avuga ko abamurakariye batitaye ku mpamvu yatumye avuga ko amatorero yose ari aya Satani, kuko we abivuga yashakaga kwerekana uburyo badashingira kuri Bibiliya n'ibyanditswemo ahubwo bakita ku by'inyungu zabo.

source: ukwezi

Rinda iby'igiciro wagabiwe ubikomeze kuko hari izindi mbaraga zishaka kubyonona

By Ubwanditsi

Ndaza vuba, komeza ibyo ufite hatagira ugutwara ikamba ryawe. Jya uba maso ukomeze ibisigaye bigiye gupfa, kuko nabonye ko ari nta mirimo mwakoze itunganye rwose imbere y'Imana yanjye. Nuko ibuka ibyo wākiriye n'ibyo wumvise ubyitondere kandi wihane. Ariko rero nutaba maso nzaza nk'umujura, nawe ntuzamenya igihe nzagutungurira. (Ibyahishuwe 3:11,2-3)

Bizaba nk'iby'umuntu wari ugiye kuzindukira mu kindi gihugu, ahamagara abagaragu be abasigira ibintu bye… Maze iminsi myinshi ishize, shebuja w'abo bagaragu araza, abarana na bo umubare w'ibyo yabasigiye. (Matayo 25:14, 19)

Hari ibyo Imana yahaye umuntu, ariko Satani n'abadayimoni bahora bashaka kubitunyaga. Kandi n'ubu hari ibimaze kwangirika byinshi, ariko ijwi ry'Imana riratubwira ngo nidukomeze n'ibyo dufite kuko nabyo bigenzwa ngo binyagwe. Ikigambiriwe ni ukutubuza ikamba ryambikwa abanesheje. Yesu azaza nk'umujura, ntawe uzabimenya.

Imana isanga Yohana imutegeka kwandikira amatorero. Ageze ku itorero ry'i Filadelifiya, Imana irabibwira ko ari yo ikinga ntihagire ukingura, yakingura ntihagire ukinga kandi ari Uwera! (Amasezerano yose uko Imana iyatanga, yakomejwe n'amaraso... isi niba izavaho, ijuru rikavaho, uwizera azabona amasezerano ye... No 15 Indirimbo z'Agakiza). Nyamara abantu bibagiwe izi mbaraga z'Imana, bibereye mu bitotsi; ntibakinamenya imigambi y'Imana.

Iri torero, bashimwe kwitondera ijambo ry'Imana no kwihangana mu bigeragezo ntibihakane izina rya Yesu. Kubw'ibyo, Imana isezeranya ko ikinguye urugi imbere yabo kandi ntawe uzarukinga. Nyamara ubu hariho ababona byanze bakemera kwangirisha imibiri yabo ngo baronke ibyo mu isi. Ikindi yabasezeranije ni uko abayuda bishushanya izabazana imbere yabo bapfukamye. Hari igihe Imana ijya yemeza abantu ko yagukunze!

Umuntu akwiye gukomeza iby'igiciro, kandi akabikomeza kuko hari izindi mbaraga zibishaka ukaba wabibura. Abantu b'umumaro (VIP) bararindwa, ndetse n'amafaranga ararindwa kuko ari ay'igiciro. Hari ibyo twahawe tuzabona mu bugingo bw'iteka, ariko hari n'ibyo twakiriye mu buzima bw'ino aha.

Ni ibiki Imana yaduhaye dukwiriye kurinda?

1. Igihe

Iyi ni impano Imana yaduhaye. Ninde wavuganye n'Imana mbere yo kuvuka ngo imubesheho, ahitemo aho azavukira n'icyo azaba cyo? Mu gitabo cy'Umubwiriza 3:2 “buri cyose gifite igihe cyacyo, hariho igihe cyo kuvuka n'icyo gupfa.” Burya uwavutse afite n'igihe cyagenwe cyo gupfa, ariko biranashoboka ko umuntu yakwibwa agapfa mbere y'igihe cyari kigenwe.

Niko Samusoni byamugendekeye kubera Delila, apfa nabi akiri muto. Iyo ukoze neza wongererwa iminsi yo kubaho. Urugero: Lazaro, Dorukasi na Tabita… "Imirimo ajya ampa ninyirangiza, azampamagara angeze mu ijuru..."

Birakwiye ko utunganya imirimo yakuremeye muri Kristo Yesu mu gihe cyawe. Ujye wibuka Umuremyi wawe utaragera aho gusubira iwanyu h'iteka. Dusoma muri Yakobo 4:13-17: hagereranije abantu n'igihu kiza gato kikongera kikagenda, natwe tujye tuzirikana ko tubaho igihe gito. Na Zaburi 144:4 igereranya iminsi y'umuntu nk'igicucu gishira, ku bw'izo mpamvu dusabe Imana itwigishe kubara iminsi yacu, ducunguza uburyo umwete.

2. Ubushobozi

Ubushobozi kandi twabwita italanto. Italanto cyari igipimo cy'uburemere, kiza kuba urugero rw'agaciro k'ubutunzi. Ariko italanto igasobanurwa kandi nk'ibintu karemano bitigwa mu ishuri cyangwa umuntu yashoboye gukora. Hari ibyo Imana yaduhaye ngo tubiyikoreshereze nk'impano, nabyo ni italanto. Ubu bushobozi Imana yahaye umuntu, bwaba ari karemano, bwaba ari ubwo yakiriye kubw'Umwuka Wera, izabimubaza uko yabikoresheje.

Ugukoresha Italanto twahawe niko kwera imbuto. Ubushobozi buri mu muntu bubasha kumubeshaho akabona ibihembo, ni byiza. Umuririmbyi ukorera Korali ahembwa si bibi, ariko arabazwa ni ryari akora akorera Korali, ni ryari akora akorera Imana?

Ibyo Imana yaduhaye nk'italanto tujye tubikoresha dushaka ibihembo byo mu isi ariko dushake umwanya tubikoreshe mu kwagura ubwami bw'Imana. Hazabaho igihe cyo kuzabarana na Yesu. Itorero ry'i Makedonia, batangaga batarebye ubushobozi bwabo buke. (2 Abakorinto 8:1-5 )

3. Ubutunzi

Ubutunzi twabuhawe n'Imana kuko yabishatse. Tubukoreshe neza nk'abazabubazwa n'Imana. Uwahawe byinshi azabazwa byinshi n'uwahawe bike azabazwa bike. Dukoresha ubutunzi mu kudutunga, mu kwishyura ibyo dukeneye n'ibindi, ariko twibuke ko hari igice kigomba kuba mu buturo bw'Imana.

Abanyamakedoniya batangaga birenze ubushobozi bwabo kuko babanje kwiha Umwami Yesu. Kwiha Yesu ni ukumukingurira umutima akaza muri wowe. Icya kabiri ni ukwemera kuyoborwa na Yesu ubutitsa.

Dukwiriye kwiha Umwami Yesu, tukajya tumwumvira, akatuyobora ngo tubashe gukoresha neza igihe, ubushobozi n'ubutunzi Imana yaduhaye. Ntitwabibasha ubwacu, keretse Kristo natugiraho ububasha tukamwemerera akatwerekera. Niba hari aho tutakoresheje neza igihe cyacu, impano karemano n'ubutunzi twahawe dusabe imbabazi kandi twinginge Imana idushoboze kurinda neza ibyo twahawe. Amen!

Past. GATANAZI Justin
NEZERWA.Com

  • September 9th 2016 at 02:59

“ISIS ifite umugambi wo kurimbura amatorero ya Gikristu” - Shiraz Maher

By Ubwanditsi

Shiraz Maher, umwe mu bahoze ari abarwanyi bakomeye b'umutwe w'iterabwoba ugendera ku mahame ya kisilamu (biyita abarwanyi ba leta ya kisilamu:ISIS) yatangaje ku mugaragaro ko ISIS ifite umugambi wo kurimbura burundi andi matorero yose ya gikristu aho ava akagera.

Uyu mugabo ubu witandukanije n'ibikorwa bya ISIS, yabwiye Charismanews dukesha iyi nkuru ko ahamya bidasubirwaho ko umugambi aba barwanyi biyitirira Leta ya Kisilamu wo gukuraho andi matorero ya Gikristu bigoye kuwuhagarika aho yemeza ko watangiye kera kandi ISIS idateze gucika intege.

yagize ati “Bafite (abarwanyi ba ISIS ) umugambi wo kurimbura, wo gukuraho buri torero rya Gikristu ryose”.

JPEG - 22.9 kb
Shiraz Maher, wahoze ari umurwanyi ukomeye wa ISIS ubu yitandukanije n'ibikorwa by'iterabwoba

Yakomeje avuga ko nubwo ISIS ifite imyigishirize ya Theorogy iri hasi ugereranije n'andi matorero, ifite umugambi wo kugira umuyobozi wabo Abu Bakr al-Baghdadi umuyobozi uvuga rikijyana kandi uhagarariye buri kimwe cyose ku Isi kandi akavugira Islamu ikagira ijambo rikomeye ku Isi.

Shiraz Maher witandukanije n'ibikorwa by'iterabwoba ubu akaba akora mu kigo cy'ubushakashatsi cyo mu Bwongereza The International Centre for the Study of Radicalisation at King's College, London ahamya ko ISIS ari umutwe ukomeye kandi ufite ubushobozi bwo kuba wakwigarurira abantu benshi nubwo ufite theorogy iri hasi.

Ese imibabaro n'ibigeragezo byakuraho umugambi Imana igufitiye?

By Ubwanditsi

Kwihanganira ibigeragezo ni inyigisho ya ngombwa ku Mukristu wese, kuko kuba Umukristu bitavanaho ibigeragezo. Abatubanjirije mu byo kwizera, nabo bagiye bageragezwa mu buryo butandukanye, icyo basabwaga kwari ukwihangana no kwizera, ahasigaye Imana ikabaha imbaraga bakanesha.

Umuvugabutumwa Gato Christophe wateguye iyi nyigisho, avuga ko Yozefu yarose inzozi azirotorera bene se, yarose abona imiba 11 yubarara hagasigara umuba umwe uhagaze, arongera abona izuba n'ukwezi nabyo bimwikubita imbere, bacyumva izo nzozi, ishyari rirahaguruka bumva ko aribo bazamwubarara imbere akaba umutware wabo.

Nyuma yo kurotora izo nzozi yahuye n'ibigeregezo n'imibabaro itandukanye, bene se bamutaye mu rwobo, nyuma bamukuramo baramugurisha kubera ishyari bamugiriye, ariko Yosefu yarihanganye aranesha kugeza igihe Imana yasohoreje ibya za nzozi (Itangiriro 37:5-12).

Yozefu yahuye n'ibigeragezo, ndetse n'imibabaro myinshi, ariko ntiyavuye ku Mana, cyangwa ngo ayivovotere umwuka w'Imana yabanye nawe, mubyamugeragezaga byose.(Itangiriro 39).

Yosefu yarazi ko umugambi mwiza w'Imana wihishe inyuma y'ibyo bigeragezo byose yahuraga nabyo, bigatuma ayubaha muri byose, akirinda gukora icyaha (Itangiriro 45:8).

Imibabaro uhura nayo cyangwa ibigeragezo, ntibishobora gukuraho na gato icyo Imana yagusezeranyije, wibuke ko kwihangana gutera kunesha. (2 Petero 1:6).

Mwene data ibigeragezo ufite, cyangwa imibabaro, Imana irabizi kandi bizagira iherezo, wibuke ko ijambo ryayo rivuga ngo hahirwa uwihanganira ibimugerageza, kuko namara kwemerwa azambikwa ikamba ry'ubugingo (Yakobo 1:12).

NEZERWA.Com

  • September 8th 2016 at 01:05

Menya amagambo agize indirimbo « ABOVE ALL » ya Don Moen

By Ubwanditsi

ABOVE ALL

Above all powers, above all kings
Above all nature and all created things
Above all wisdom and all the ways of man
You were here before the world began

Above all kingdoms, above all thrones
Above all wonders the world has ever known
Above all wealth and treasures of the earth
There's no way to measure what You're worth

Crucified, laid behind the stone
You lived to die, rejected and alone
Like a rose, trampled on the ground
You took the fall and thought of me
Above all

KANDA HANO WUMVE IYI NDIRIMBO « ABOVE ALL » YA DON MOEN

  • September 3rd 2016 at 03:03

Urupfu rwa Yesu no kuzuka kwe ni igitambo cya burundu ku bizera!

Mu itangira ry'imirimo yayo, Imana irema umuntu yamuremye ari mwiza imwishimiye kuko ni yo ubwayo yashatse ko umuntu agira ishusho yayo kugira ngo ase nayo. Nkuko tubisoma mu gitabo cya mbere cya Mose cyitwa Itangiriro, Umuntu yaremwe ku munsi wa gatanu Imana iravuga iti: “Tureme umuntu agire ishusho nk'iyacu ase natwe atware ibiri mwisi byose.” Itangiriro 1:26.

Imaze kurema umuntu yamuremye imukunze kandi yifuza ko abaho mu munezero wayo ari na cyo cyatumye imuremera ingobyi ya Edeni yari irimo byose yifuza. Nubwo yabikoreye umuntu nyamara umuntu yaje guteshuka ku nshingano yari yarahawe n'Uwiteka aragoma akora icyaha ahemukira Imana bituma imwirukana muri ya ngobyi ya Edeni umuntu ahinduka ikivume atyo.

Ariko kuko Imana ubwayo ari urukundo rutangaje muri yo, ntiyaretse ngo umuntu akomeze kuba ikivume agume kure yayo, ahubwo Kuko Imana yakunze abari mwisi cyane (umuntu yaremye) ibi byatumye yiyemeza gutanga umwana wayo w'ikinege (Yesu) kugira ngo uzemera wese kumwizera ntazarimburwe n'icyo cyaha yakoze ahubwo azahabwe ubugingo buhoraho Yohana 3.16.

Nubwo Yesu uyu yaziye abari mu isi bose kugira ngo abacungure yongere abunge n'Imana, yaje mube ntibamwemera bahitamo kumwica. Ariko kuko gupfa kwe byari mu mugambi w'Imana, yemeye ko yicwa kugira ngo abere umuntu igitambo cya burundu, bityo bimwunge na yo.

Amaze gupfa igitambo kiraboneka ku munsi wa gatatu nk'uko yari yarabibwiye abigishwa be, asohoka mu rupfu azukana icyubahiro.

Yesu amaze kuzuka yiyeretse abigishwa be ku Nyanja ya Tiberiya, ubu bwari ubwa gatatu abiyereka nyuma yuko avuye mu mva hanyuma y'ibyo asubira mu ijuru kuko umurimo we wo gucungura umuntu yari awusoje Yohana 21.1-14.

Ishimwe ritagereranywa duhorana mu mitima yacu ni uko Imana itemeye ko turimbuka tuzize ibyaha byacu ahubwo ikemera ko umwana wayo ahinduka icyaha kubwacu akabambwa ku musaraba, agapfa ndetse agahambwa mu mva azize twe kugira ngo twongere twiyunge na Data wa twese, dusubire kongera kwitwa abana bayo nka mbere maze tuzaragwe n'ubugingo buhoraho.

Nubwo yapfuye agahambwa ariko ntiyaheze mu mva kuko nyuma y'iminsi itatu gusa, Yesu Kristo Umwana w'Ihoraho yarazutse ubu ni muzima yahawe ubutware bwose mu ijuru no mu isi natwe twahindutse abana b'Imana kubwe. Imana ishimwe!

NEZERWA.Com

  • September 3rd 2016 at 00:33

Kwemera kugendana n'Imana bifite umugisha w'umwihariko!

“Amaze kubyara, Enoki agendana n'Imana imyaka magana atatu, ayibyaramo abahungu n'abakobwa. Iminsi yose Enoki yaramye n'imyaka magana atatu na mirongo itandatu n'itanu, kandi Enoki yagendanaga n'Imana, ntiyaboneka kuko Imana yamwimuye.”

Iri jambo ntabwo ari rishya mu matwi ya benshi, kuko abantu barikoresha kenshi kandi rigashimwa iyo uryumvise uba wumva ari byo rwose, gusa ikibazo twibaza ni ukwibaza icyo kugendana n'Imana ari cyo n'akamaro kabyo.

Twifashishije umurongo dusomye haruguru, dushobora kubonamo igisubizo cy'ibi bibazo byose twibajije.

Icya mbere ntabwo bakoresha ijambo “kugendana” bavuga umuntu umwe gusa, ahubwo birumvikana ko bivuga babiri cyangwa se abarenze babiri, ariko kuri ubu baratwereka Enoki ndetse n'Imana.

Icya kabiri ntushobora kugendana n'umuntu nkuko tubibona muri iyi mvugo yakoreshejwe muri iki cyanditswe utaziranye n'uwo murimo kugendana noneho bikarushaho kugira ireme iyo muri babiri mwenyine.

Icya gatatu ni uko kugira ngo urugendo rwanyu rugire igisobanuro ugomba kumenya aho muvuye n'aho mugana mwembi.

Bityo twavuga ko Enoki yari azi Imana mu buryo bwimbitse byatumye agendana na yo, maze Bibiliya ikamutangira ubuhamya ko yagendanye n'Imana ndetse by'umwahiriko igihe kirekire kingana n'imyaka magana atatu.

Ikindi kandi yari umubyeyi ufite abana n'umuryango yitagaho, ariko ibyo byose ntibyamubujije kugendana n'Imana mu buryo bukomeye nk'ubwo abenshi muri twe tuba twifuza kugendana na yo.

Icyo benshi twakwibaza ni umugisha nyakuri uri mu kugendana n'Imana bene aka kageni kuko ikintu nk'iki kidasanzwe mu byukuri wibaza icyo kimaze. Na none tubona igisubizo kidasanzwe muri icyo cyanditswe, aho tubwirwa ko Imana yaje kumwimura adapfuye ntiyongera kuboneka.

Ibi byo kwimurwa n'Imana se byaba mu by'ukuri bivuze iki?

Tubona neza icyo bisobanuye iyo tubisomye mu gitabo cy'Abaheburayo 11: 5. Aha ho batubwira ko Enoki yajyanwe mu ijuru adapfuye! Mbega umugisha udasanzwe mu buzima bw'uyu mugabo w'Imana!

Bavandimwe, ntabwo Imana yahindutse. Idushishikariza kugendana na yo mu bihe byacu byose kuko ishaka kuduhishurira byinshi bitangaje biri mu kubana nayo cyane bituma mu by'ukuri tugendera mu buzima bw'ikirenga.

Aho twimurwa mu by'ubu buzima maze tukagendera mu butsinzi, hejuru y'urupfu na Satani, hejuru y'indwara ndetse n'ibindi byose bitubera inzitizi zo kunezererwa agakiza gakomeye Imana yatugeneye.

Icyo Imana ishaka ni uko tuyimenya hanyuma bikadufasha kugendana na yo aho igenda itwimura, kugeza ubwo rwose tuba tutakibonwa n'ibibonetse byose! Dusoma aho Yesu ahamya ati: “umbonye aba abonye data! (Yohana 14: 9)

Ushaka kumenya Imana menya Yesu numumenya uzaba umenya na Data wa twese ari we Mana ihoraho kandi ndakwizeza ko hari ikintu gikomeye kizahinduka kikaba cyiza kurushaho mu buzima bwawe. Imana iragukunda!

NEZERWA.Com

Imana yemera ko ugeragezwa kuko nta cyubahiro kibaho kitagira amateka

By Ubwanditsi

“Kuko uzibagirwa umubabaro wawe, uzawibuka nk'amazi amaze gutemba kandi ubugingo bwawe buzarabagirana kurusha amanywa y'ihangu. N'aho haba umwijima hazatambika umuseke kandi uzaba amahoro kuko hariho ibyiringiro. Ni ukuri uzakebuka ibigukikije, wiruhukire mu mahoro, uzaryama he kugira ugutera ubwoba.” Yobu 11: 16-19

Ni byiza kumenya yuko niba twarasobanukiwe ko Abizera turi ibisubizo by'amasengesho ya bamwe basengera mu isi, twari dukwiye no gusobanukirwa ko mbere yuko Imana idushyiraho nk'abakozi bagabura ibyayo, ibanza gufata umwanya wo kudutegura.

Muri Kristu, habaho ubuzima nyuma y'imibabaro. Nk'uko tubisoma muri Bibiliya Ijambo ry'Imana, nubwo yari izi neza ko yatoranirije Mose kuzabohora ubwoko bwayo muri Egiputa, Imana yohereje Mose mu butayu ahamara igihe kinini, nyuma imuvanayo.

Wakwibaza uti ni mpamvu ki yabigenje ityo? Ni ukubera ko nta muntu uyobora abandi inzira atazi. Nyuma y'imyaka 40 y'ubuzobere, Mose yarakomeye amenya neza ubutayu icyo ari cyo, aba umuntu ushoboye no kuba yabwambutsa ubwoko bw'Imana.

Witegereze neza ibibazo uri kunyuramo, kuko bishobora kuguhishurira mbese ni bantu ki Imana iguhamagarira gutabara cyangwa gufasha muri ubu buzima. Mu byukuri Mose ntabwo yari azi impamvu yatinze mu butayu, uko ni nako benshi muri twe usanga kenshi twibaza ku bitubaho, ukibaza ngo « kuki ? » cyangwa se uti: « Ni mpamvu ki y'ibi? »

Kandi tuzi yuko ku bakunda Imana byose bifataniriza hamwe kubazanira ibyiza, ari bo bahamagawe nk'uko yabigambiriye. Abaroma 8: 28

Mu by'ukuri, Imana ntijya yemera na rimwe ko abantu banyura mu bintu bibabaje nta mpamvu. Izi ko abantu bayo bakeneye amateka kuko ntabwo habaho icyubahiro nta mateka.

Twibaze ibi: Ni gute wafasha gukiza umuntu watawe urimo kubabazwa, mu gihe wowe utigeze ubabazwa ngo ube ubifiteho ubuhamya? Ni gute wavuga ku bukene cyangwa wabwira umukene amagambo y'inkomezi kandi nta kintu wigeze ubura mu buzima bwawe?

Ni gute wabwira abandi ko hashobora kubaho ubuzima bwiza bwagutse kandi bunejeje ku muntu watawe n'umukunzi we, nyamara wowe utarigeze kubaho ubuzima bwo gutandukana n'umukunzi wawe, cyangwa utanazi ubuzima bwo kwagukirwa no guhemburwa? Birashoboka ko wenda ibi wabibasha kubivuga, ariko simpamya neza yuko ibyo uvuga byanyura abakumva.

Imana ntabwo yishimira ibikugerageza. Ariko izi uburyo ki izabihindukiza bikakuzanira ibyiza, ukabera abandi ubuhamya. Izaguhindura urugi rw'ibyiringiro kugira ngo, binyuze mu mateka yawe benshi bunamure imitwe, basubirane umucyo mu maso habo, basubirane ibyiringiro kubwawe, bahamye bati : « Burya koko muri Kristo Yesu habaho ubuzima nyuma yo kubabara! »

Wiheranwa n'agahinda k'uruhererekane rw'ibyo ubona, komeze inzira ugere ku ntego itumye uriho uyu munsi.

Icyo nkundira iyi Mana twakurikiye ni uko nubwo yakwemera ko ugeragezwa ntishobora kukureka burundu ngo igutere umugongo Oya! Ntabwo ikujya kure ahubwo uko uyegera nayo igenda irushaho kuguha imbaraga zo kubikomeramo kugeza ubwo ubisohotsemo nk'intwari inesheje. Imana iragukunda!

NEZERWA.Com

  • August 30th 2016 at 01:12
❌