WebRwanda.com

πŸ”’
❌
There are new available articles, click to refresh the page.
Today β€” July 17th 2019The Kigali Post

Basize isomo ry'urukundo: Bapfuye ku munsi umwe, nyuma y'imyaka 71 bashyingiranwe

By Nizeyimana Selemani

Iyi ntabwo ari inkuru ishyira imbere cyane urupfu, ahubwo irazirikana inkuru nziza n'isomo ry'ubuzima n'urukundo mu isi y'iki gihe benshi bemeza ko yahindutse, imibanire mu bantu n'urukundo hagati y'abashakanye bikangirika cyane.

Herbert Delaigle wari ufite imyaka 94 y'amavuko n'umugore we Marilyn Frances DeLaigle wari ufite imyaka 88 y'amavuko, bashizemo umwuka mu gihe cy'intera y'amasaha 12 gusa hagati yabo maze basiga inkuru y'urukundo ruhamye dore ko bari bamaze imyaka 71 yose barushinganye.

Basigiye isi inkuru nziza y'urukundo

Uyu musaza n'umukecuru bari batuye Georgie, bapfuye ku wa Gatanu ushize tariki ya 12 Nyakanga. Basize abana batandatu, abuzukuru 16 n'abuzukuruza 25 ndetse n'ubuvivi butatu.

β€œBirashimishije cyane uburyo babanye imyaka 71 none ubu bakaba bari kumwe mu ijuru”, umuryango wabo mu kubabika mu itangazo bahaye WRDW.

Marilyn Frances na Herbert bahuriye mu gace ka Waynesboro muri Georgia ho muri Leta Zunze Ubumwe za Amerika ubwo yari afite imyaka 16 gusa mu gihe uwaje kumubera umugabo yari afite imyaka 22.

Marilyn Frances DeLaigle yakoraga muri resitora ubwo Herbert yamurabukagwa akamubenguka akamusaba ko basohoka, maze nyuma y'umwaka umwe basohokanye bwa mbere, bararushinga.

"Frances yakoraga mu ka resitora (cafΓ©) twari dufite muri Waynesboro bitaga White Way CafΓ© (…) nakomeje kumwitegereza uko yinjiraga asohoka, maze muhanga amaso. Nyuma nishyizemo akanyabugabo ndagenda musaba niba yanyemerera igihe kimwe tukazasohokana.", Herbert mu 2018 ubwo yaganiraga na WRDW yari yabasuye ubwo bizihizaga imyaka 70 bamaze babana.

Ubwo bizihizaga imyaka 70 bamaranye basuwe na WRDW-TV ibakorera ikiganiro kihariye

Muri iki kiganiro cyo mu 2018, Herbert yahishuye ko bwa mbere basohokana bagiye kureba filime ari nabwo uyu musore wari wamaze gukunda bihebuje uyu mukobwa yamubajije niba yamwemerera akamubera umugabo, undi abyemera atazuyaje.

Frances avuga ko byamurenze kumva agiye kuba umugore wa Herbert Delaigle, ariko yari afite impungenge ko bitazaba. Aganira na WRDW yagize ati "Iteka yarakerererwaga."

Ku munsi w'ubukwe habuze gato ngo pasiteri yange kubasezeranya kuko bari bakerereweho hafi isaha kugera ku rusengero nkuko Herbert yabitangaje, ariko nyuma yo kugerageza kumwinginga aza kubemerera kubashyingiranya.

Herbert na Frances bakundanye imyaka 72 ubariyemo n'umwaka bamaze bateretana

Herbert yabaye umusirikare wa Amerika mu gihe cy'imyaka 22. Yarwanye urugamba rwo muri Koreya na Vietnam ndetse banabaye imyaka 6 mu Budage ubwo yari mu rugamba rw'intambara ya kabiri y'isi. Frances yavuze ko 'igihe kinini yakundaga (umugabo we) kuba ari ku rugamba, ariko iyo yabaga ari mu rugo yamusetsaga cyane akamushimisha ndetse bagakunda gufatana ibiganza'.

Ubwo bizihizaga isabukuru y'imyaka 70 ishize babana, babajijwe ibanga ryatumye bakundaga cyane ndetse urukundo rwabo rukaramba. Frances yagize ati "Iteka yagaragazaga (umugabo we) ubwuzu bw'urukundo, kwihangana n'umutima mwiza."

Herbert we mu magambo make yagize ati ibanga ni "garagaza urukundo rwawe", maze Frances yongeraho ati "kandi mubane hafi."

Bakundaga gufatana mu kiganza

Herbert yapfuye saa munani n'iminota 20 zo mu ijoro rishyira igitondo (2:20 a.m.) naho Frances aramukurikira nyuma y'amasaha 12 kuko yapfuye saa munani n'iminota 20 zo ku mugoroba (2:20 p.m.).

Umwe mu bahungu babo yavuze ko nyina yari aryamye ku buriri iruhande rwa se ubwo yapfaga, ngo ubwo bazaga gufata se, imihumekere ya nyina yarahindutse, atangira guhumeka nabi, aranatitira cyane nk'aho yamenye ko umugabo we yapfuye.

Abahanga mu by'ubuzima bagaragaza ko mu gihe umwe mu bashakanye yitabye Imana nyuma y'urupfu rw'uwo bashakanye cyangwa se iyo umuntu apfuye nyuma yo gupfusha inshuti ye magara akenshi biba bitewe n'umutima umenetse unanirwa kwihanganira kubura uwo wakundaga. Ngo imvamutima zikomeye zishobora guca intege umutima bigatuma uhagarara mu buryo butunguranye.



Isezerano ry'urukundo rwabo barikomeyeho kugeza batabarutse

Afurika y'Epfo: Umuhanzi Johnny Clegg bitaga 'Umuzulu w'umuzungu' yapfuye -Amwe mu mateka ye

By Nizeyimana Selemani

Umuhanzi wari warubatse ibigwi bikomeye muri Afurika y'Epfo, Johnny Clegg wahuzaga injyana z'umuziki w'ikizulu n'ibicurangisho bya kizungu ndetse akaba umwe mu bifashishije ubuhanzi mu kurwanya politike y'ivangura-ruhu (apartheid), yatabarutse kuri uyu wa Kabiri tariki ya 16 Nyakanga 2019.

Ni amakuru yemejwe n'uwari uhagarariye inyungu ze (manager) wavuze ko yashizemo umwuka nyuma y'igihe kinini ahanganye n'indwara ya kanseri.

Kanda hano hasi wumve indirimbo ye "Asimbonanga" yamamaye cyane

Johnny Clegg yavukiye mu Bwongereza ariko akurira mu gace ka Kwa Zulu Natal ndetse akaba yaravugaga akanaririmba mu Kizulu. Yacuranze mu matsinda agizwe n'abafite impu zitandukanye (multiraciaux) ya Juluka na Savua mu myaka ya 1970 na 1980 mbere y'uko atangira kuririmba ku giti cye (solo).

Johnny Clegg yapfuye afite imyaka 66 y'amavuko kuko yavutse ku ya 7 Kamena 1953

Johnny Clegg yakundwaga kubera umuziki we. Ariko muri Afurika y'Epfo uyu mugabo yari afite icyo asobanuye kinini kirenze gusa kuba umuhanzi. Ni umugabo w'umuzungu warenze ku mategeko agacurangana n'abirabura mu gihe cya Apartheid aho byari bibujijwe.

Ni umugabo w'umuzungu wize kuvuga no kuririmba Ikizulu. Yari ikimenyetso cy'ubumwe, umunyafurika, ikiraro hagati y'imico itandukanye mu gihugu nka Afurika y'Epfo kigihangana no kurenga amateka y'ivangura cyanyuzemo.

Johnny Clegg n'ababyinnyi ba Savuka ubwo bataramiraga ZΓ©nith de Paris ku ya 10 Gicurasi 1988, mu bitaramo byo kurwanya Aparthaid

Umuziki we wagize uruhare runini mu kunga abanyafurika y'epfo mu gihe guverinoma ya Apartheid yategekaga abaturage ko bagomba kwivangura bashingiye ku ibara ry'uruhu ryabo maze abazungu akaba aribo bashyirwa imbere naho abirabura bagatsikamirwa.

Clegg n'umuziki we byabaye ihurizo rikomeye kuri guverinoma y'agatsiko gato k'abazungu yayoboraga Afurika y'Epfo, aho yagaragazaga ko Apartheid ari amahitamo ya politike ariko uwo mupaka ukaba ushobora kurengwa n'abaturage.

Ku myaka 17 yatangiye kuririmbana n'abirabura mu gihe abazungu basabwaga kutagira aho bahurira n'abirabura

Ubushake bukomeye yagaragaje mu kurwanya Apartheid byatumye akundwa cyane n'abirabura bo muri Afurika y'Epfo ndetse ahinduka ikimenyetso cya Afurika y'Epfo igendera kuri demokarasi, ndetse uyu muhanzi ni umwe mu batoranijwe mu birori byo kwibuka Nelson Mandela mu 2013.

"Johnny yaruhukiye mu mahoro uyu munsi (ku wa Kabiri), yari akikijwe n'umuryango we i Johannesburg (...), nyuma y'imyaka ine n'igice yari ishize ahangana na kanseri. (…) Yagize uruhare rukomeye muri Afurika y'Epfo agaragariza abantu imico itandukanye ndetse abashyira hamwe (…) Yatweretse icyo bisobanuye guha agaciro indi mico ariko adatakaje ibimuranga.", ibyatangajwe n'uwari umujyanama we Roddy Quin kuri shene ya televiziyo ya SABC.

Ibinyamakuru bitandukanye byagiye byandika ku mateka adasanzwe ye

Johnny Clegg yavomye mu muco wa kizulu inganzo ye yamufashije gukora umuziki w'impinduramatwara aho ijyana nyafurika ihuzwa n'imirya ya gitari n'ibindi bicurangisho bya kizungu.

Alubumu ye "Scatterlings of Africa" yo mu 1982 yatumye amenyekana cyane ndetse ikundwa muri hit-parades mu Bwongereza no mu Bufaransa.

Imwe mu ndirimbo ye yamamaye cyane ku isi hose ni "Asimbonanga" (ijambo ry'ikizulu, bisobanuye ntabwo twamubonye) yahimbiye Nelson Mandela ufatwa nk'uri ku isonga mu ntwari zarwanyije apartheid.

Kanda hano urebe ubwo yaririmbaga "Asimbonanga" agasanganirwa ku rubyiniro na Nelson Mandela mu 1999 mu Budage

Uyu muhanzi akanaba umubyinnyi wahitanywe na kanseri y'impindura (pancrΓ©as) yari aherutse gukora ibitaramo mu bice bitandukanye by'isi asezera ku bafana be cyane cyane aho yari akunzwe mu Burayi.

RDC: Wa mu pasiteri wanduye Ebola wagaragaye i Goma, byarangiye apfuye

By Denise IRANZI

Nyuma y'uko i Goma mu murwa mukuru w'Intara ya Nord-Kivu, umujyi uhana imbibi n'akarere ka Rubavu mu Ntara y'Uburengerazuba bw'u Rwanda, hagaragaye umuntu wa mbere udwaye Ebola, ku mugoroba wo kuri uyu wa Kabiri byatangajwe ko yapfuye.

Mu ijoro ryo ku Cyumweru ni bwo uyu murwayi yagaragaye maze ku wa Mbere abayobozi bafata icyemezo cyo kumwohereza i Butembo mu mujyi yaturutsemo.

Uyu murwayi yapfiriye mu mbagukiragutabara (ambulance) yari imujyanye i Butembo kamwe mu duce iki cyorezo cya Ebola cyashinzemo imizi mu burasirazuba bwa Repubulika Iharanira Demokarasi ya Congo.

Mu nzira agenda nibwo uyu murwayi yaje gushiramo umwuka nkuko byemejwe na Sylvain Kanyamanda uyobora umujyi wa Butembo. Uyu nyakwigendera ni umugabo w'umupasiteri wanduye Ebola mu gihe yasengeraga abayoboke i Butembo abarambitseho ibiganza.

Ibimenyetso bya mbere byatangiye kugaragara mu cyumweru gishize, ariko akomeza kuvurirwa mu rugo n'umuganga. Ubwo yageraga i Goma muri iyi weekend ishize, isuzuma ryo muri laboratwari ni ryo ryemeje ko uyu mupasiteri yanduye virus ya Ebola.

Mbere y'uko hagaragara uyu muntu wa mbere wanduye Ebola i Goma, iyi ndwara byari byagaragajwe ko iri mu bilometero bisaga ijana mu majyaruguru mu gace ka Butembo, Beni hamwe na Ituri yari iri ku rugero rwo hasi.

Iki cyorezo ni ku nshuro ya kabiri kibasiye iki gihugu ndetse kikaba icya mbere kimaze guhitana benshi aho kugeza magingo aya abarenga 1600 bamaze guhitanwa nacyo mu gihe abagore, abagabo n'abana barenga 2500 bamaze kwandura iki cyorezo kuva cyagaragara, ubu hashize umwaka.

CECAFA Kagame Cup: Ibigugu Rayon Sports na TP Mazembe byasezerewe, Azam FC na KCCA zikatisha itike ya 1/2

By Nizeyimana Selemani

Abiri mu makipe yahabwaga amahirwe yo kwegukana igikombe cya Cecafa Kagame Cup, Rayon Sports yo mu Rwanda na TP Mazembe yo muri Repubulika Iharanira Demokarasi ya Congo yatunguwe asezererwa muri 1/4.

Ku mugoroba wo kuri uyu wa Kabiri tariki ya 16 Nyakanga 2019 I bwo kuri stade ya Kigali hatangiye imikino ya 1/4 cy'iyi mikino ahakinwe imikino ibiri ya mbere yabimburiwe n'uwahuje TP Mazembe yazamutse ari iya mbere mu itsinda A hamwe na Azam FC yazamutse ari iya kabiri mu itsinda B.

Ni umukino ikipe ya TP Mazembe yahabwagamo amahirwe ariko yaje gutungurwa n'iyi kipe yo muri Tanzaniya ifite iki gikombe cya Cecafa giheruka.

Igitego cya mbere cyatsinzwe na TP Mazembe ku munota wa 22 gitsinzwe na Ipamy Giovani ariko ku munota wa 27 gusa Selman Iddi ahita yishyurira Azam FC mu gihe igitego cya kabiri cyanahaye itsinzi iyi kipe cyatsinzwe na Obrey Chirwa ku munota wa 69.

Nyuma y'uyu mukino hahise hakurikiraho uwahuje Rayon Sports ifite igikombe cya shampiyona yo mu Rwanda ikaba yarazamutse ari iya kabiri mu itsinda A hamwe na KCCA ifite igikombe cya shampiyona cyo muri Uganda yazamutse ari iya mbere mu itsinda B.

Ikipe ya KCCA ni yo yafunguye amazamu ku munota wa 33 gitsinzwe na Kizza Mustafa mu gihe Rugwiro Herve yaje kwishyurira Rayon Sports ku munota wa 48 ndetse ikomeza gusatira ishaka igitego cya kabiri, ariko icyizere cy'Aba-Rayon nticyamaze kabiri kuko ku munota wa 66 Jackson Nunda yateretsemo igitego cya kabiri nyuma y'amakosa ya kapiteni Rutanga Eric na Cyiza Hussein bagonganye mu kibuga hagati bagatakaza umupira.

Kuri uyu wa Gatatu iyi mikino irakomeza aho ikipe ya Gor Mahia yo muri Kenya icakirana na Green Eagles yo muri Zambia maze irokoka ikazahura muri 1/2 na KCCA FC mu gihe undi mukino utegerejwe uhuza APR FC na AS Maniema maze ikomeza ikazahura muri 1/2 na Azam FC.

  • July 17th 2019 at 02:01

Umwaka w'imikino ushize Rayon Sports yinjije miliyoni 323,149,135 Frw, ikoresha 322,740,450, yunguka ibihumbi 408 Frw

By KP

Mu rwego rwo kumurikira Komite nshya yatorewe kuyobora Rayon Sports uko ihagaze, iyi kipe yagaragaje uko yakoresheje umutungo yari ifite ndetse n'ayo yinjije mu mwaka ushize w'imikino wa 2018/19.

Kuri iki Cyumweru ni bwo Rayon Sports yabonye ubuyobozi bushya bukuriwe na Munyakazi Sadate wasimbuye Muvunyi Paul wari umaze hafi imyaka ibiri ari Perezida wayo.

Nkuko inkuru dukesha IGIHE ibivuga, iyi kipe yagaragaje ko mu mwaka ushize w'imikino, yungutse ibihumbi 408 725 Frw nyuma yo gukoresha asaga miliyoni 322 (322,740,410 Frw).

Rayon Sports igaragaza ko yinjije asaga gato miliyoni 80 mu mikino yakiriye ku bibuga bitandukanye mu gihe ayo yahawe n'Ishyirahamwe ry'Umupira w'Amaguru mu Rwanda (FERWAFA) agera kuri miliyoni 27 n'ibihumbi 700 Frw.

Abafatanyabikorwa bayo batandatu bayihaye miliyoni 114 Frw zirimo 30 zatanzwe n'Uruganda rwenga ibinyobwa bisembuye n'ibidasembuye rwa Skol; Impuzamashyirahamwe y'Umupira w'Amaguru muri Afurika (CAF) iyiha ibihumbi $30 mu gihe amafaranga yagurishijwe abakinnyi agera kuri miliyoni 59 Frw naho iyi raporo ikagaragaza ko kandi abafana b'iyi kipe bayihaye asaga miliyoni 13.65 Frw binyuze mu cyiswe Fan Base.

Abakinnyi n'abakozi ba Rayon Sports bahembwe miliyoni 120.35 Frw, miliyoni 22.34 zitangwa nk'uduhimbazamusyi mu gihe izisaga 90 Frw zakoreshejwe mu kwitegura imikino.

Rayon Sports yakoresheje asaga miliyoni 13 Frw mu kugura abakinnyi mu mwaka ushize w'imikino, miliyoni 34 Frw zishyurwa Akagera Business Group nka avance y'imodoka y'abakinnyi mu gihe kandi hakoreshejwe agera kuri miliyoni 42 Frw mu matike y'indege ubwo iyi kipe yakinaga CAF Confederation Cup mu mwaka ushize.

Muri rusange, Rayon Sports yinjije 323,149,135 Frw, ikoresha 322,740,450, aho igaragaza ko yungutse 408,725 Frw.

Iyi kipe izahura na KCCA muri ΒΌ cya CECAFA Kagame Cup kuri uyu wa Kabiri, tariki ya 16 Nyakanga 2019, izahagararira u Rwanda muri CAF Champions League nyuma yo kwegukana Igikombe cya Shampiyona mu mwaka ushize w'imikino.

Rayon Sports iri kwitegura umwaka mushya w'imikino, yaguze abakinnyi 14 bashya.

Perezida Kagame yashyizeho abahagararira u Rwanda mu mahanga bashya

By Denise IRANZI

Itangazo ryaturutse muri Serivisi z'Ibiro bya Minisitiri y'Intebe rivuga ko ashingiye ku biteganywa n'Itegeko Nshinga rya Repubulika y'u Rwanda ryo mu 2003 ryavuguruwe muri 2015, cyane cyane mu ngingo yaryo ya 111; None ku wa 15 Nyakanga 2019, Nyakubahwa Perezida wa Repubulika yashyizeho Abazahagarira u Rwanda mu bihugu by'amahanga mu buryo bukurikira:

Repubulika ya Angola: Wellars Gasamagera

Muri Canada: Prosper Higiro

Muri Repubulika ya Rubanda y'Ubushinwa: James Kimonyo

Muri Repubulika IharaniraDemokarasi ya Kongo: Vincent Karega

Repubulika y'Abarabu ya Misiri: Alfred Kalisa

Repubulika y'u Bufaransa: Dr Francois Xavier Ngarambe

Repubulika ya Ghana: Aissa Kirabo KACYIRA

Ubwami bwa Maroc: Sheikh Saleh Habimana

Muri Repubulika ya Koreya:Yasmin Amri Sued

Leta ya Qatar: Francois NKURIKIYIMFURA

Leta ya Afurika y'Epfo: Eugene SEGORE Kayihura

Repubulika ya Singapore: Jean de Dieu UWIHANGANYE

Ubusuwisi: Marie Chantal RWAKAZINA

Muri Tanzania: Maj General Charles Karamba

Muri Leta Zunze Ubumwe z'Abarabu: Emmanuel HATEGEKA

Source:RBA

Kigali: Hateguwe amarushanwa yo kubyina agamije gufasha abanyeshuri baje mu biruhuko

By KP

'250 Youth' ni ihuriro ry'urubyiruko rwishyize hamwe mu rwego rwo kuzamura impano za bagenzi babo aho basanzwe bategura amarushanwa ahuriza hamwe urubyiruko rufite impano, ibikorwa bategura kenshi mu biruhuko.

Kuri ubu '250 Youth' ikaba yongeye gutegurira urubyiruko ruje mu biruhuko amarushanwa yo kubyina agamije kubahuriza hamwe bakagaragaza impano aho kujya mu bindi bishuko byakwangiza ubuzima bwabo.

Abafite impano zo kubyina barahamagarirwa kudacikwa

Nkuko abari gutegura aya marushanwa babidutangarije, ngo amatsinda yishyize hamwe ndetse abishaka azajya anyura ku rubuga rw'iyi kompanyi rwa 250youth.rw akiyandikisha naho amarushanwa nyirizina yo akazabera kuri Club Rafiki i Nyamirambo ahasanzwe habera imikino itandukanye y'imyidagaduro.

Muri aya marushanwa ateganijwe gutangira tariki ya 2 Kanama 2019 aho abarushanwa bazatoranywamo abazagera finali mu biruhuko bikuru.

Uko ubigenza ngo wiyandikishe

Abazatsinda aya marushanwa bazegukana amafaranga y'u Rwanda ibihumbi magana atanu (500,000frw) ku itsinda rya mbere, ibihumbi 400frw ku itsinda rya kabiri n'ibihumbi 200frw ku itsinda rya gatatu.

Mu kiganiro n'umwe mu bari gutegura aya marushanwa yabwiye Kigalipost ko 'ikigamijwe ari uguhuriza hamwe urubyiruko rufite impano rukaba hamwe mu biruhuko rukagira icyo ruhugiraho aho kwishora mu biyobyabwenge cyangwa ibindi byakwangiza ubuzima bwabo!'

Nubwo abategura iri rushanwa bifashishije Kigali Convention Centre nk'akarango ka Kigali mu kwamamaza, biteganijwe ko bizabera i Nyamirambo kuri Club Rafiki

  • July 15th 2019 at 05:07

Impaka ku muyobozi w'Imbonerakure wagizwe umuyobozi wa RTNB i Burundi

By KP

Umuyobozi w'umutwe w'urubyiruko rw'ishyaka riri ku butegetsi mu Burundi, Imbonerakure, yagizwe umuyobozi wa Radio na Televiziyo by'igihugu, icyemezo cyateje impaka ku mpande zinyuranye.

Perezida Pierre Nkurunziza yagize Eric Nshimirimana umuyobozi wa RTNB, mu gihe hasigaye umwaka umwe hakaba amatora y'umukuru w'igihugu, amatora Perezida Nkurunziza yavuze ko ataziyamamazamo.

Nkuko iyi nkuru dukesha BBC Gahuza ikomeza ibivuga, imwe mu miryango iharanira uburenganzira bwa muntu ishinja Imbonerakure gukora ubwicanyi n'urugomo mu midugararo yabaye mu Burundi nyuma y'igerageza ryo guhirika ubutegetsi ryaburijwemo mu 2015.

Ubutegetsi bw'u Burundi buhakana ibirego biregwa Imbonerakure, ndetse n'ibikorwa byo guhohotera abatavuga rumwe n'ubutegetsi.

Lewis Mudge, umuyobozi w'umuryango Human Rights Watch muri Afurika yo hagati, avuga ko guha uwo mwanya Bwana Nshimiyimana bibabaje ku bahemukiwe n'Imbonerakure.

Ati: "Ni we wategekaga ibyo bikorwa. Ibikorwa birimo kwica, gufunga, gutera ubwoba, bigikomeje uyu munsi". Akavuga ko Bwana Nshimiyimana yakabaye ahubwo aryozwa ibyo bikorwa.

Umunyamakuru wo muri RTNB utifuje gutangazwa yavuze ko, "guha Nshimiyimana uyu mwanya bigamije guha ishyaka CNDD-FDD uburenganzira bwose kuri iki gitangazamakuru gikurikirwa kurusha ibindi n'abaturage mu byaro".

Willy Nyamitwe, umujyanama wa Perezida Nkurunziza, avuga ko guha uriya mwanya Bwana Nshimiyimana bidakwiye kugira uwo bitungura kuko "abayobozi bose bo muri CNDD-FDD bahoze ari Imbonerakure kandi Imbonerakure ari irerero ry'abayobozi".

Bwana Nyamitwe ahakana ibyaha biregwa Imbonerakure.

Iperereza ryakozwe na komisiyo ishinzwe uburenganzira bwa muntu mu muryango w'abibumbye rivuga ko Imbonerakure zikomeje ibikorwa byo guhohotera abatari mu ishyaka CNDD-FDD riri ku butegetsi mu gihe hitegurwa amatora.

Uhagarariye Uburundi muri ONU yavuze ko iryo perereza ari "impapuro z'ibibeshyo".

  • July 15th 2019 at 04:33

Goma: Bwa mbere hagaragaye umurwayi wa Ebola

By Denise IRANZI

Mu Burasirazuba bwa Repubulika Iharanira Demokarasi ya Congo i Goma, umujyi uhana imbibi n'akarere ka Rubavu mu Ntara y'Uburengerazuba bw'u Rwanda, hagaragaye umuntu udwaye Ebola.

Ni amakuru yahamijwe na Minisiteri y'Ubuzima muri iki gihugu ndetse na OMS nyuma y'isuzuma rya laboratwari.

Uyu murwayi ni umupasiteri w'imyaka 46 wageze muri aka gace mu gitondo cyo kuri iki Cyumweru cyashize avuye ahitwa Butembo, kamwe mu duce twashegeshwe n'iyi ndwara.

Minisiteri y'Ubuzima muri RDC yasabye abaturage gukomeza kuba maso no kurangwa n'ituze.

Ubuyobozi kandi bwavuze ko ibyago byo kuba iyi ndwara yakwirakwira cyane muri uyu mujyi wa Goma biri hasi cyane kuko uyu murwayo yabonywe byihuse ndetse n'abandi bagenzi 18 bari kumwe muri bus bahise bamenyekana ndetse baratangira gukurikiranwa kuva kuri uyu wa Mbere tariki ya 15 Nyakanga 2019 nkuko itangazo rya Minisiteri y'Ubuzima yabishimangiye mu itangazo yashyize hanze.

  • July 15th 2019 at 04:19

Munyakazi Sadate watorewe kuyobora Rayon Sports, yijeje kuyigeza muri 1/2 cya 'Champion League'

By KP

Kuri iki Cyumweru tariki ya 14 Nyakanga 2019 ni bwo habaye inama y'Inteko rusange y'ikipe ya Rayon Sports yabereye 'Tuza Inn' mu karere ka Bugesera, ahatowe komite nshya maze Perezida aba Munyakazi Sadate wasimbuye Paul Muvunyi wagizwe Perezida w'icyubahiro.

Ni mu gihe Visi Perezida yabaye Twagirayezu Thadee wari usanzwe ashinzwe imyitwarire (discipline), akaba yasimbuye Muhirwa Frederic.

Uyu Munyakazi Sadate wagizwe Perezida ni umugabo w'imyaka 38 ufite umugore n'abana batanu. Muri iyi minsi yagaragaraga cyane mu bikorwa bya Rayon Sports dore ko ari we usanzwe akuriye MK SKy Vision iherutse gutangiza umushinga wo gufasha iyi kipe kubaka Stade wiswe 'Gikundiro Stadium'.

Uyu mugabo kandi yari umwe mu bajyanama ba komite icyuye igihe mu myaka ibiri ishize, akaba yari anakuriye Fan Club yitwa Trust Supporters, imwe mu zikomeye zishyigikira Rayon Sports.

Itangishaka King Bernard wari usanzwe ari Umunyamabanga Mukuru wa Rayon Sports, ubu yagizwe CEO naho Muhire Jean Paul wahoze ari umubitsi wa Rayon Sports, agirwa umunyamabanga, asimburwa na Cyiza Richard ku mwanya w'Umubitsi mu gihe Zitoni Pierre Claver yakomeje kuba umunyamategeko.

Mu ijambo rye, Munyakazi Sadate yashimiye Komite icyuye igihe ibyo yagezeho harimo kwegukana igikombe cya shampiyona no kugera muri 1/4 cya Total CAF Confederation Cup, aboneraho kubasezeranya ko azakomereza aho bari bagejeje. Ati "Igikombe cyo sinavuga ngo nzacyegukana ahubwo nzakirinda, mu marushanwa nyafurika ngere muri 1/2."

Abayobozi batorewe kuyobora Rayon Sports mu myaka ibiri 2019-2021

Perezida w'icyubahiro : Paul Muvunyi
Perezida : Munyakazi Sadate
Visi perezida wa mbere : Thadee Twagirayezu
Umubitsi : Cyiza Richard
Umunyamabanga : Muhire Jean Paul
Itangishaka Bernard King : CEO
Umunyamategeko : Zitoni Pierre Clavere
Itangazamakuru n'itumanaho : Mugabo Justin
Ushinzwe imishinga : Claude Mushimire
Ushinzwe Tekiniki : Eric Nsabimana

Komite Ngenzuzi

Perezida : Dusayidirane Jean Nepo
Visi perezida : Jean Paul Ndosimana
Umunyamabanga : Gaparayi Justitia

Komite nkemurampaka

Perezida : Umugiraneza Jean Michel
Visi Perezida : Bagwaneza Theopista
Umunyamabanga : Ernest Nsangabandi

  • July 15th 2019 at 04:02

CAN 2019: Algerie na Senegal zageze ku mukino wa nyuma

By Nizeyimana Selemani

Ikipe y'igihugu ya Senegal hamwe na Algerie ni zo zizahurira ku mukino wa nyuma w'igikombe cy'ibihugu cya Afurika (CAN 2019) uteganijwe kuri uyu wa Gatanu tariki ya 19 Nyakanga 2019.

Algerie ifite igikombe cya Afurika cyo mu 1990 yageze ku mukino wa nyuma nyuma yo gutsinda Nigeria ibitego 2-1 mu mukino w'ishiraniro aho kapiteni wabo Riyad Mahrez yababoneye igitego cya kabiri cy'intsinzi ku munota wa nyuma w'inyongera muri ine umusifuzi yari yongeyeho.

Riyad Mahrez na abgenzi be bishimira igitego cy'intsinzi

Uyu musore yari yanagize uruhare ku gitego cya mbere cyitsinzwe na William Troost-Ekong ku munota wa 40 mu gihe rutahizamu Odion Ighalo yaje kukishyura kuri penaliti ku munota wa 72.

Abanya-Algerie bashimishijwe n'intsinzi yabo yaturutse kure

Ikipe ya Senegal yo yerekeje ku mukino wa nyuma itsinze Tuniziya igitego 1-0 mu mukino nawo utari woroshye aho iminota 90 isanzwe y'umukino yarangiye ari 0-0 mu gihe hagati mu mukino amakipe yombi yabonye penaliti ikazihusha.

Umunya-Tuniziya Ferjani Sassi ni we wabanje kuyihusha ku munota wa 75 nyuma yaho Kalidou Koulibaly akoreye umupira mu rubuga rw'amahina. Ku unota wa 81 Senegal nayo yabonye penaliti nyuma y'ikosa ryari rikorewe Ismail Sarr ariko Henri Saivet arayihusha.

Sadio Mane na bagenzi be bafashije Senegal kwerekeza ku mukino wa nyuma nyuma y'imyaka 17

Igitego cy'intsinzi cyabonetse ku munota wa 101 cyitsinzwe na Dylan Bronn nyuma y'amakosa y'umuzamu, maze bihesha Senegal kwerekeza ku mukino wa nyuma yaherukagaho mu myaka 17 ishize ubwo yatsindirwaga ku mukino wa nyuma na Cameroun mu 2002 kuri penaliti.

Senegal na Algerie zigiye kongera guhura mu gihe zari no mu itsinda rimwe aho Algerie yatsinze Senegal igitego 1-0 izamuka iyoboye itsinda.

  • July 15th 2019 at 03:26

CECAFA Kagame Cup 2019: Gahunda y'uko amakipe azahura muri 1/4

By Nizeyimana Selemani

Irushanwa rya Cecafa Kagame Cup 2019 rihuza amakipe yo mu karere ka Afurika y'Iburasirazuba no hagati, rikomeje kubera hano mu Rwanda, aho kuri ubu amakipe 8 azakina imikino ya 1/4 yamenyekanye nyuma yaho kuri iki Cyumweru tariki ya 14 Nyakanga 2019 ari bwo hasozwaga imikino yo mu matsinda.

Duhereye mu itsinda A ryakiniraga i Kigali, ikipe yatumiwe muri aya marushanwa ya TP Mazembe y'i Lubumbashi muri Repubulika Iharanira dEmokarasi ya Congo yazamutse ari iya mbere, ikurikirwa na Rayon Sports banganya amanota 6 ariko ikayirusha ibitego izigamye.

Mu itsinda B ryakiniraga i Huye, ikipe ya KCCA yo muri Uganda yazamutse ari iya mbere ikurikirwa na Azam FC inafite iki gikombe giheruka mu gihe Mukura CS yasigaye.

Mu itsinda C ryakiniraga naryo i Kigali, ikipe ya APR FC yazamutse ari iya mbere naho Green Eagles yo muri Zambia nayo yaje muri iri rushanwa nk'umutumirwa izamuka ari iya kabiri mu gihe mu itsinda D ryakiniraga i Rubavu, ikipe ya Gor Mahia yazamutse ari iya mbere ikurikirwa na Maniema Union nayo yaje nk'umutumirwa iturutse muri Repubulika Iharanira Demokarasi ya Congo.

Dore uko imikino y'amatsinda yarangiye amakipe ahagaze

Itsinda A


Itsinda B


Itsinda C


Itsinda D

Uko amakipe azahura muri 1/4

Ku wa Kabiri, tariki 16 Nyakanga 2019

TP Mazembe vs Azam FC
KCCA vs Rayon Sports FC

Ku wa Gatatu, tariki 17 Nyakanga 2019

APR FC vs AS Maniema Union
Gor Mahia vs Green Eagles FC

Biteganijwe ko muri 1/2, ikipe izaba yarokotse hagati ya APR FC na Maniema Union izahura n'ikipe izaba yakomeje hagati ya TP Mazembe na Azam FC naho izarokoka hagati ya KCCA na Rayon Sports FC izacakirane n'izaba yazamutse hagati ya Gor Mahia vs Green Eagles FC.

Imikino ya 1/2 izaba tariki ya 19 Nyakanga 2019 mu gihe umukino wa nyuma wo uzaba ku ya 21 Nyakanga 2019.

Tubibutse ko ikipe izegukana Cecafa Kagame Cup izahembwa igikombe giherekejwe n'ibihumbi 30 by'amadorali y'Amerika (asaga miliyoni 27frw) naho iya kabiri ibone ibihumbi 20 by'amadorali (asaga miliyoni 18frw) mu gihe iya gatatu izabona ibihumbi 10 by'amadorali (asaga miliyoni 9frw).

  • July 15th 2019 at 02:54

James Bond: 'Agent 007' azaba ari umugore w'umwirabura

By Nizeyimana Selemani

Byaragoranye cyane kumva ko filime James Bond yakinwa n'umwirabura, ariko kuri iyi nshuro uretse kuba ari umwirabura ahubwo ni n'umugore. Lashana Lynch ni we uzakira ari 'Agent 007' muri James Bond nshya.

Hagitangira kuvugwa ibya filime nshya ya James Bond n'isezera rya Daniel Craig, agiye gusimburwa aho umwongereza Idris Elba ari we wahabwaga amahirwe yo gukina muri iyo filime ariko aza gucibwa intege n'uburyo abantu batabyakiriye neza ndetse ntibatinye kumugaragariza ivanguraruhu, bahamya ko nta mwirabura ushobora gukina ari 'Agent 007'.

Kuri ubu rero, Lashana wamenyekanye cyane nka Maria Rambeau muri filime ya 'Captain Marvel' ni we ugiye gusimbura Daniel Craig, ndetse ubu filime yatangiye gukorwa ikazajya hanze mu mwaka utaha wa 2020. Azagaragara mu mwambaro ndetse na nimero 007 ubusanzwe byari bifitwe n'abagabo gusa kandi nabo b'abazungu.

Lashana ni we ugiye kuba Agent 007

"Mu ntangiriro za filime, hari aho M, azaba 007 kwinjira. Niho Lashana ahita agaragara, umugore, mwiza w'umwiraburakazi... Bond aracyari Bond. Gusa nka 007 yasimbujwe umugore udasanzwe." Umwe mu bagize ikipe itunganya iyi filime waganiriye na DailyMail.

Lashana Lynch w'imyaka 31 y'amavuko abaye 007 wa 9 nyuma ya Barry Nelson, Sean Connery, David Niven, George Lazenby, Roger Moore, Timothy Dalton, Pierce Brosnan na Daniel Craig bose bari abagabo b'abazungu. Agiye gukina James Bond ya 25, izaba yitwa Bond 25.


Craig Daniel na Lashana mu biganiro bivuga kuri Bond 25

Yesterday β€” July 16th 2019The Kigali Post

Umwaka w'imikino ushize Rayon Sports yinjije miliyoni 323,149,135 Frw, ikoresha 322,740,450, yunguka ibihumbi 408 Frw

By KP

Mu rwego rwo kumurikira Komite nshya yatorewe kuyobora Rayon Sports uko ihagaze, iyi kipe yagaragaje uko yakoresheje umutungo yari ifite ndetse n'ayo yinjije mu mwaka ushize w'imikino wa 2018/19.

Kuri iki Cyumweru ni bwo Rayon Sports yabonye ubuyobozi bushya bukuriwe na Munyakazi Sadate wasimbuye Muvunyi Paul wari umaze hafi imyaka ibiri ari Perezida wayo.

Nkuko inkuru dukesha IGIHE ibivuga, iyi kipe yagaragaje ko mu mwaka ushize w'imikino, yungutse ibihumbi 408 725 Frw nyuma yo gukoresha asaga miliyoni 322 (322,740,410 Frw).

Rayon Sports igaragaza ko yinjije asaga gato miliyoni 80 mu mikino yakiriye ku bibuga bitandukanye mu gihe ayo yahawe n'Ishyirahamwe ry'Umupira w'Amaguru mu Rwanda (FERWAFA) agera kuri miliyoni 27 n'ibihumbi 700 Frw.

Abafatanyabikorwa bayo batandatu bayihaye miliyoni 114 Frw zirimo 30 zatanzwe n'Uruganda rwenga ibinyobwa bisembuye n'ibidasembuye rwa Skol; Impuzamashyirahamwe y'Umupira w'Amaguru muri Afurika (CAF) iyiha ibihumbi $30 mu gihe amafaranga yagurishijwe abakinnyi agera kuri miliyoni 59 Frw naho iyi raporo ikagaragaza ko kandi abafana b'iyi kipe bayihaye asaga miliyoni 13.65 Frw binyuze mu cyiswe Fan Base.

Abakinnyi n'abakozi ba Rayon Sports bahembwe miliyoni 120.35 Frw, miliyoni 22.34 zitangwa nk'uduhimbazamusyi mu gihe izisaga 90 Frw zakoreshejwe mu kwitegura imikino.

Rayon Sports yakoresheje asaga miliyoni 13 Frw mu kugura abakinnyi mu mwaka ushize w'imikino, miliyoni 34 Frw zishyurwa Akagera Business Group nka avance y'imodoka y'abakinnyi mu gihe kandi hakoreshejwe agera kuri miliyoni 42 Frw mu matike y'indege ubwo iyi kipe yakinaga CAF Confederation Cup mu mwaka ushize.

Muri rusange, Rayon Sports yinjije 323,149,135 Frw, ikoresha 322,740,450, aho igaragaza ko yungutse 408,725 Frw.

Iyi kipe izahura na KCCA muri ΒΌ cya CECAFA Kagame Cup kuri uyu wa Kabiri, tariki ya 16 Nyakanga 2019, izahagararira u Rwanda muri CAF Champions League nyuma yo kwegukana Igikombe cya Shampiyona mu mwaka ushize w'imikino.

Rayon Sports iri kwitegura umwaka mushya w'imikino, yaguze abakinnyi 14 bashya.

Perezida Kagame yashyizeho abahagararira u Rwanda mu mahanga bashya

By Denise IRANZI

Itangazo ryaturutse muri Serivisi z'Ibiro bya Minisitiri y'Intebe rivuga ko ashingiye ku biteganywa n'Itegeko Nshinga rya Repubulika y'u Rwanda ryo mu 2003 ryavuguruwe muri 2015, cyane cyane mu ngingo yaryo ya 111; None ku wa 15 Nyakanga 2019, Nyakubahwa Perezida wa Repubulika yashyizeho Abazahagarira u Rwanda mu bihugu by'amahanga mu buryo bukurikira:

Repubulika ya Angola: Wellars Gasamagera

Muri Canada: Prosper Higiro

Muri Repubulika ya Rubanda y'Ubushinwa: James Kimonyo

Muri Repubulika IharaniraDemokarasi ya Kongo: Vincent Karega

Repubulika y'Abarabu ya Misiri: Alfred Kalisa

Repubulika y'u Bufaransa: Dr Francois Xavier Ngarambe

Repubulika ya Ghana: Aissa Kirabo KACYIRA

Ubwami bwa Maroc: Sheikh Saleh Habimana

Muri Repubulika ya Koreya:Yasmin Amri Sued

Leta ya Qatar: Francois NKURIKIYIMFURA

Leta ya Afurika y'Epfo: Eugene SEGORE Kayihura

Repubulika ya Singapore: Jean de Dieu UWIHANGANYE

Ubusuwisi: Marie Chantal RWAKAZINA

Muri Tanzania: Maj General Charles Karamba

Muri Leta Zunze Ubumwe z'Abarabu: Emmanuel HATEGEKA

Source:RBA

Kigali: Hateguwe amarushanwa yo kubyina agamije gufasha abanyeshuri baje mu biruhuko

By KP

'250 Youth' ni ihuriro ry'urubyiruko rwishyize hamwe mu rwego rwo kuzamura impano za bagenzi babo aho basanzwe bategura amarushanwa ahuriza hamwe urubyiruko rufite impano, ibikorwa bategura kenshi mu biruhuko.

Kuri ubu '250 Youth' ikaba yongeye gutegurira urubyiruko ruje mu biruhuko amarushanwa yo kubyina agamije kubahuriza hamwe bakagaragaza impano aho kujya mu bindi bishuko byakwangiza ubuzima bwabo.

Abafite impano zo kubyina barahamagarirwa kudacikwa

Nkuko abari gutegura aya marushanwa babidutangarije, ngo amatsinda yishyize hamwe ndetse abishaka azajya anyura ku rubuga rw'iyi kompanyi rwa 250youth.rw akiyandikisha naho amarushanwa nyirizina yo akazabera kuri Club Rafiki i Nyamirambo ahasanzwe habera imikino itandukanye y'imyidagaduro.

Muri aya marushanwa ateganijwe gutangira tariki ya 2 Kanama 2019 aho abarushanwa bazatoranywamo abazagera finali mu biruhuko bikuru.

Uko ubigenza ngo wiyandikishe

Abazatsinda aya marushanwa bazegukana amafaranga y'u Rwanda ibihumbi magana atanu (500,000frw) ku itsinda rya mbere, ibihumbi 400frw ku itsinda rya kabiri n'ibihumbi 200frw ku itsinda rya gatatu.

Mu kiganiro n'umwe mu bari gutegura aya marushanwa yabwiye Kigalipost ko 'ikigamijwe ari uguhuriza hamwe urubyiruko rufite impano rukaba hamwe mu biruhuko rukagira icyo ruhugiraho aho kwishora mu biyobyabwenge cyangwa ibindi byakwangiza ubuzima bwabo!'

Nubwo abategura iri rushanwa bifashishije Kigali Convention Centre nk'akarango ka Kigali mu kwamamaza, biteganijwe ko bizabera i Nyamirambo kuri Club Rafiki

Impaka ku muyobozi w'Imbonerakure wagizwe umuyobozi wa RTNB i Burundi

By KP

Umuyobozi w'umutwe w'urubyiruko rw'ishyaka riri ku butegetsi mu Burundi, Imbonerakure, yagizwe umuyobozi wa Radio na Televiziyo by'igihugu, icyemezo cyateje impaka ku mpande zinyuranye.

Perezida Pierre Nkurunziza yagize Eric Nshimirimana umuyobozi wa RTNB, mu gihe hasigaye umwaka umwe hakaba amatora y'umukuru w'igihugu, amatora Perezida Nkurunziza yavuze ko ataziyamamazamo.

Nkuko iyi nkuru dukesha BBC Gahuza ikomeza ibivuga, imwe mu miryango iharanira uburenganzira bwa muntu ishinja Imbonerakure gukora ubwicanyi n'urugomo mu midugararo yabaye mu Burundi nyuma y'igerageza ryo guhirika ubutegetsi ryaburijwemo mu 2015.

Ubutegetsi bw'u Burundi buhakana ibirego biregwa Imbonerakure, ndetse n'ibikorwa byo guhohotera abatavuga rumwe n'ubutegetsi.

Lewis Mudge, umuyobozi w'umuryango Human Rights Watch muri Afurika yo hagati, avuga ko guha uwo mwanya Bwana Nshimiyimana bibabaje ku bahemukiwe n'Imbonerakure.

Ati: "Ni we wategekaga ibyo bikorwa. Ibikorwa birimo kwica, gufunga, gutera ubwoba, bigikomeje uyu munsi". Akavuga ko Bwana Nshimiyimana yakabaye ahubwo aryozwa ibyo bikorwa.

Umunyamakuru wo muri RTNB utifuje gutangazwa yavuze ko, "guha Nshimiyimana uyu mwanya bigamije guha ishyaka CNDD-FDD uburenganzira bwose kuri iki gitangazamakuru gikurikirwa kurusha ibindi n'abaturage mu byaro".

Willy Nyamitwe, umujyanama wa Perezida Nkurunziza, avuga ko guha uriya mwanya Bwana Nshimiyimana bidakwiye kugira uwo bitungura kuko "abayobozi bose bo muri CNDD-FDD bahoze ari Imbonerakure kandi Imbonerakure ari irerero ry'abayobozi".

Bwana Nyamitwe ahakana ibyaha biregwa Imbonerakure.

Iperereza ryakozwe na komisiyo ishinzwe uburenganzira bwa muntu mu muryango w'abibumbye rivuga ko Imbonerakure zikomeje ibikorwa byo guhohotera abatari mu ishyaka CNDD-FDD riri ku butegetsi mu gihe hitegurwa amatora.

Uhagarariye Uburundi muri ONU yavuze ko iryo perereza ari "impapuro z'ibibeshyo".

Goma: Bwa mbere hagaragaye umurwayi wa Ebola

By Denise IRANZI

Mu Burasirazuba bwa Repubulika Iharanira Demokarasi ya Congo i Goma, umujyi uhana imbibi n'akarere ka Rubavu mu Ntara y'Uburengerazuba bw'u Rwanda, hagaragaye umuntu udwaye Ebola.

Ni amakuru yahamijwe na Minisiteri y'Ubuzima muri iki gihugu ndetse na OMS nyuma y'isuzuma rya laboratwari.

Uyu murwayi ni umupasiteri w'imyaka 46 wageze muri aka gace mu gitondo cyo kuri iki Cyumweru cyashize avuye ahitwa Butembo, kamwe mu duce twashegeshwe n'iyi ndwara.

Minisiteri y'Ubuzima muri RDC yasabye abaturage gukomeza kuba maso no kurangwa n'ituze.

Ubuyobozi kandi bwavuze ko ibyago byo kuba iyi ndwara yakwirakwira cyane muri uyu mujyi wa Goma biri hasi cyane kuko uyu murwayo yabonywe byihuse ndetse n'abandi bagenzi 18 bari kumwe muri bus bahise bamenyekana ndetse baratangira gukurikiranwa kuva kuri uyu wa Mbere tariki ya 15 Nyakanga 2019 nkuko itangazo rya Minisiteri y'Ubuzima yabishimangiye mu itangazo yashyize hanze.

Munyakazi Sadate watorewe kuyobora Rayon Sports, yijeje kuyigeza muri 1/2 cya 'Champion League'

By KP

Kuri iki Cyumweru tariki ya 14 Nyakanga 2019 ni bwo habaye inama y'Inteko rusange y'ikipe ya Rayon Sports yabereye 'Tuza Inn' mu karere ka Bugesera, ahatowe komite nshya maze Perezida aba Munyakazi Sadate wasimbuye Paul Muvunyi wagizwe Perezida w'icyubahiro.

Ni mu gihe Visi Perezida yabaye Twagirayezu Thadee wari usanzwe ashinzwe imyitwarire (discipline), akaba yasimbuye Muhirwa Frederic.

Uyu Munyakazi Sadate wagizwe Perezida ni umugabo w'imyaka 38 ufite umugore n'abana batanu. Muri iyi minsi yagaragaraga cyane mu bikorwa bya Rayon Sports dore ko ari we usanzwe akuriye MK SKy Vision iherutse gutangiza umushinga wo gufasha iyi kipe kubaka Stade wiswe 'Gikundiro Stadium'.

Uyu mugabo kandi yari umwe mu bajyanama ba komite icyuye igihe mu myaka ibiri ishize, akaba yari anakuriye Fan Club yitwa Trust Supporters, imwe mu zikomeye zishyigikira Rayon Sports.

Itangishaka King Bernard wari usanzwe ari Umunyamabanga Mukuru wa Rayon Sports, ubu yagizwe CEO naho Muhire Jean Paul wahoze ari umubitsi wa Rayon Sports, agirwa umunyamabanga, asimburwa na Cyiza Richard ku mwanya w'Umubitsi mu gihe Zitoni Pierre Claver yakomeje kuba umunyamategeko.

Mu ijambo rye, Munyakazi Sadate yashimiye Komite icyuye igihe ibyo yagezeho harimo kwegukana igikombe cya shampiyona no kugera muri 1/4 cya Total CAF Confederation Cup, aboneraho kubasezeranya ko azakomereza aho bari bagejeje. Ati "Igikombe cyo sinavuga ngo nzacyegukana ahubwo nzakirinda, mu marushanwa nyafurika ngere muri 1/2."

Abayobozi batorewe kuyobora Rayon Sports mu myaka ibiri 2019-2021

Perezida w'icyubahiro : Paul Muvunyi
Perezida : Munyakazi Sadate
Visi perezida wa mbere : Thadee Twagirayezu
Umubitsi : Cyiza Richard
Umunyamabanga : Muhire Jean Paul
Itangishaka Bernard King : CEO
Umunyamategeko : Zitoni Pierre Clavere
Itangazamakuru n'itumanaho : Mugabo Justin
Ushinzwe imishinga : Claude Mushimire
Ushinzwe Tekiniki : Eric Nsabimana

Komite Ngenzuzi

Perezida : Dusayidirane Jean Nepo
Visi perezida : Jean Paul Ndosimana
Umunyamabanga : Gaparayi Justitia

Komite nkemurampaka

Perezida : Umugiraneza Jean Michel
Visi Perezida : Bagwaneza Theopista
Umunyamabanga : Ernest Nsangabandi

  • July 15th 2019 at 04:02

CAN 2019: Algerie na Senegal zageze ku mukino wa nyuma

By Nizeyimana Selemani

Ikipe y'igihugu ya Senegal hamwe na Algerie ni zo zizahurira ku mukino wa nyuma w'igikombe cy'ibihugu cya Afurika (CAN 2019) uteganijwe kuri uyu wa Gatanu tariki ya 19 Nyakanga 2019.

Algerie ifite igikombe cya Afurika cyo mu 1990 yageze ku mukino wa nyuma nyuma yo gutsinda Nigeria ibitego 2-1 mu mukino w'ishiraniro aho kapiteni wabo Riyad Mahrez yababoneye igitego cya kabiri cy'intsinzi ku munota wa nyuma w'inyongera muri ine umusifuzi yari yongeyeho.

Riyad Mahrez na abgenzi be bishimira igitego cy'intsinzi

Uyu musore yari yanagize uruhare ku gitego cya mbere cyitsinzwe na William Troost-Ekong ku munota wa 40 mu gihe rutahizamu Odion Ighalo yaje kukishyura kuri penaliti ku munota wa 72.

Abanya-Algerie bashimishijwe n'intsinzi yabo yaturutse kure

Ikipe ya Senegal yo yerekeje ku mukino wa nyuma itsinze Tuniziya igitego 1-0 mu mukino nawo utari woroshye aho iminota 90 isanzwe y'umukino yarangiye ari 0-0 mu gihe hagati mu mukino amakipe yombi yabonye penaliti ikazihusha.

Umunya-Tuniziya Ferjani Sassi ni we wabanje kuyihusha ku munota wa 75 nyuma yaho Kalidou Koulibaly akoreye umupira mu rubuga rw'amahina. Ku unota wa 81 Senegal nayo yabonye penaliti nyuma y'ikosa ryari rikorewe Ismail Sarr ariko Henri Saivet arayihusha.

Sadio Mane na bagenzi be bafashije Senegal kwerekeza ku mukino wa nyuma nyuma y'imyaka 17

Igitego cy'intsinzi cyabonetse ku munota wa 101 cyitsinzwe na Dylan Bronn nyuma y'amakosa y'umuzamu, maze bihesha Senegal kwerekeza ku mukino wa nyuma yaherukagaho mu myaka 17 ishize ubwo yatsindirwaga ku mukino wa nyuma na Cameroun mu 2002 kuri penaliti.

Senegal na Algerie zigiye kongera guhura mu gihe zari no mu itsinda rimwe aho Algerie yatsinze Senegal igitego 1-0 izamuka iyoboye itsinda.

  • July 15th 2019 at 03:26
❌