WebRwanda.com

πŸ”’
❌
There are new available articles, click to refresh the page.
Yesterday β€” November 21st 2019The Kigali Post

JosΓ© Mourinho ni we wasimbuye Mauricio Pochettino muri Tottenham

By Nizeyimana Selemani

Mu gitondo cyo kuri uyu wa Gatatu tariki ya 20 Ugushyingo ni bwo byemejwe ko umunya-Portugal Jose Mourinho yagizwe umutoza mushya wa Tottenham asimbuye umunya-Argentine Mauricio Pochettino wirukanwe ku mugoroba wo kuri uyu wa Kabiri.

Mu itangazo ryashyizwe hanze n'iyi kipe y'i London, Jose Mourinho wari umaze iminsi adafite ikipe kuva yakwirukanwa muri Manchester United mu Ukuboza 2018, byatangajwe ko yahawe amasezerano azamugeza mu mwaka w'imikino 2022-2023.

Jose Mourinho uzajya uhembwa amapawundi miliyoni 15 k'umwaka, yahawe akubye hafi kabiri ayahabwaga Mauricio Pochettino

Ku rubuga rwa Tottenham, Mourinho yavuze ko ashimishijwe cyane no kuza 'mu ikipe ifite ibigwi bikomeye kandi y'abafana badasanzwe'. Yongeyeho ko anyuzwe n'Urwego rw'ikipe ndetse kimwe mu byamukururiye kuyitoza akaba ari abakinnyi bayo beza.

Mauricio Pochettino yirukanwe mu buryo butunguranye ku mugoroba wo kuri uyu wa Kabiri

Tottenham ibaye ikipe ya gatatu mu Bwongereza, Jose Mourinho atoje nyuma ya Chelsea (2004-2007, 2013-2015) na Manchester United (2016-2019). Andi makipe y'ibigugu i Burayi amaze gutoza ni FC Porto yo muri Portugal (2002-2004), Inter Milan yo mu Butaliyani(2008-2010) na Real Madrid yo muri Esipanye (2010-2013). Aho byibuze afite igikombe kimwe cya shampiyona muri ibi bihugu bine amaze gutozamo.

Mourinho yari amaze iminsi ari umusesenguzi kuri Sky Sports

Kugeza ubu Jose Mourinho ni umwe mu batoza batatu gusa bamaze gutwara Champions League inshuro ebyiri mu makipe abiri atandukanye harimo mu 2004 muri FC Porto na Inter Milan mu 2010. Ndetse amaze kwegukana ibikombe bitatu bya Premier League hamwe na Chelsea (2005, 2006, 2015).

β€œMuri Jose, dufite umwe mu batoza b'indashyikirwa muri ruhago (…) Afite ubunararibonye buhagije…”Umuyobozi w'ikipe ya Tottenham, Daniel Levy ubwo yavugaga kuza rya Mourinho aho yashimangiye ko ari umutoza w'umuhanga kandi wagiye yegukana ibikombe n'imidari aho yagiye anyura hose.

Mourinho arasabwa gusubiza Tottenham mu myanya myiza nyuma yo gutangira nabi

Umunya-Argentine Mauricio Pochettino wari wabashije kugeza Spurs ku mukino wa nyuma wa UEFA Champions League umwaka ushize, yirukanwe nyuma yo gutangira nabi umwaka mushya w'imikino aho ubu iyi kipe iri ku mwanya wa 14 muri shampiyona y'Ubwongereza. "Umusaruro wo mu rugo mu mpera z'umwaka w'imikino ushize ndetse no mu ntagiriro z'uyu byari uruca ntege.", ibyatangajwe n'iyi kipe mu itangazo yashyize hanze ubwo yasezereraga uyu mutoza ku wa Kabiri.

Ikindi cyababaje ubuyobozi n'abafana ba Tottenham harimo kuba barasezerewe mu gikombe cy'igihugu n'ikipe yo mu cyiciro cya kane ndetse ikaba itaratsinda umukino n'umwe kuva yatsinda Southampton ku ya 28 Nzeri 2019, aho ubu imaze kunganya gatatu itsindwa kabiri.

Jose Mourinho aje asanga Tottenham iri nyuma ho amanota 11 muri Top4

Daniel Levy (iburyo), Umuyobozi wa Tottenham na Mauricio Pochettino bari bamaze kugerana kuri byinshi ndetse uyu muyobozi yavuze ko nubwo batandukanye n'uyu mutoza, azahora mu mateka y'ikipe yabo

Harry Kane yashimiye Mauricio Pochettino ibyo bageranyeho mu myaka itanu n'igice bamaranye, amwifuriza ishya n'ihirwe

Mu 2015 ubwo yatozaga Chelsea, Mourinho yavuze ko adashobora na rimwe gutoza Tottenham kubera urukundo afitiye abafana ba Chelsea, ariko ibi yabishyize ku ruhande ayerekezamo

Mourinho muri iyi minsi ubwo yasesenguraga kuri Sky Sports, yanengaga cyane Tottenham

Perezida Kagame yahamagariye ibihugu bigize G20 gushora imari mu Rwanda

By Nizeyimana Selemani

Perezida wa Repubulika, Paul Kagame asanga kuba ibigo bikomeye byo mu bihugu byateye imbere bikomeje kwitabira ishoramari ku mugabane wa Afurika ari ikimenyetso cy' intambwe imaze guterwa n' uyu mugabane mu kubaka ubukungu bwizewe.

Ibi yabivugiye mu nama ihuza abayobozi b' ibihugu 20 bikize ku isi (G20) n' ab'ibihugu bya Afurika biri muri gahunda izwi nka Compact with Africa ibera i Berlin mu Budage.

Ibihugu 12 byo ku mugabane wa Afurika bifite ubukungu bwihuta biri mu murwa mukuru w' u Budage, Berlin aho baganira n' abagenzi babo bo mu bihugu 20 bikize ku isi mu ihuriro rizwi nka G20 Compact with Afurika.

U Rwanda ni kimwe muri ibi bihugu bya Afurika bigize iyi gahunda yatangijwe muri 2017.

Abasesengura ibya politiki bemeza ko kuba u Rwanda rutumirwa kenshi muri G20 ndetse rukaba ruri muri iri huriro bifite igisobanuro mu isura rufite ku ruhando mpuzamahanga.

Dr Havugimana Emmanuel agaragaza impamvu abona zituma u Rwanda rutumirwa mu nama nk'izo zikomeye ku rwego mpuzamahanga.

Yagize ati "Ni igihugu gito, gituwe n' abaturage benshi b' abahanga, gifite ubuyobozi bwiza, kandi noneho amateka twanyuzemo mu 1994, abantu bakaza aho igihugu cyari kigeze, gisa nk' aho cyazimanganye ku ikarita y' isi, nyuma y' imyaka 25 kikaba gitangiye kuba intanga rugero muri izo ngero nagiye ntanga, bituma n' abazungu bavuga bati bariya bantu, ibanga ryabo ni irihe!? Reka duhure na bo, ni yo mpamvu HE bamutumira muri G20 akagenda agatanga ibitekerezo bye bakamutega amatwi, burya ni uko batabivugira ahabona ariko baravuga bati uyu muntu ni umuhanga, niko basigara babibwirana buriya."

Na ho umusesenguzi Tombola Gustave we yagize ati "Barashaka kumva, bati byagenze bite, kugira ngo Volkswagen yumve ko yajya mu Rwanda. Impamvu yabyo. Zirahari, hari umutekano mu gihugu, kandi na byo, security ni kimwe mu bibazo G20 igomba kwigaho, kuko security, ifasha mu iterambere ry' ubukungu."

Iri huriro rigamije gushishikariza abashoramari bo mu bihugu 20 bikize kurusha ibindi ku isi gushora imari ku mugabane wa Afurika, hagaragazwa amahirwe atandukanye ari kuri uyu mugabane.

Kugeza ubu hari ibigo bikomeye ku rwego mpuzamahanga byamaze gushora imari kuri uyu mugabane ukungahaye ku mutungo kamere ndetse utuwe na miliyari 1 na miliyoni zisaga 200 z' abaturage.

Mu ijambo rye ku bitabiriye iyi nama, Perezida wa Repubulika Paul Kagame yashimiye ubufatanye hagati ya G20 n' ibihugu bya Afurika mu kureshya abashoramari, aho yatanze ingero rw' ibishoboka muri Afrika ashingiye ku byagezweho mu Rwanda.

Yagize ati "Urugero ni ubufatanye u Rwanda rwagiranye na Volkswagen, Siemens na yo ubu na yo yamaze kuza kimwe na ACP. Bigaragaza ubukungu bushikamye bw' umugabane wacu, mu bihugu bitandukanye, ndetse amavugurura yagiye akorwa mu koroshya ubucuruzi, kandi ibi birimo gutanga umusaruro w' ibyagezweho, turifuza rero gukomeza kubona ishoramari ryisumbuyeho riturutse mu Budage, mu Burayi, no muri G20 muri ubu bufatanye bwubatswe, ubwo rero ndifuza gushimira Volkswagen ku bufatanye dufitanye bugaragaza ibishobora muri Afrika."

Perezida wa Repubulika avuga ko u Rwanda n' ubwo ari igihugu gito ku buso, ariko gifite icyerekezo cyagutse mu iterambere.

Kuri Dr Havugimana na Dr Tombola, Afurika mu mahuriro n' inama nk' izi igomba kujyana ijwi rimwe kandi ikareshya ishoramari rifitiye inyungu impande zombi kandi mu bwubahane.

Ibihugu bya Afurika biri mu ihuriro Compact with Africa mu bufatanye na G20, ni Benin, Misiri, Cote d' Ivoire, Ethiopia, Ghana, u Rwanda, Senegal, Burkina Fasso, Ghana, Guinea, Togo na Tunisia.

Src:RBA

Imurikagurisha ry'ibikorerwa mu Rwanda rizamara amatsiko n'inyota abazaryitabira

By Nizeyimana Selemani

Kuva kuri uyu wa Kane tariki ya 21 Ugushyingo kugeza ku ya 04 Ukuboza 2019 i Gikondo muri Expo Grounds hazaba habera imurikagurisha ry'ibikorerwa mu Rwanda (Made in Rwanda Expo) byitezwe ko izaba ifite umwihariko ntagereranywa mu kugaragaza intambwe 'Made in Rwanda' igezeho.

Nkuko byasobanuwe mu kiganiro kigenewe itangazamakuru cyabaye kuri uyu wa Kabiri, Urugaga rw'Abikorera (PSF) na Minisiteri y'Ubucuruzi n'Inganda byagaragaje ko iri murikagurisha rizaba umwanya mwiza wo kwereka abanyarwanda intambwe imaze guterwa n'inganda zo mu Rwanda mu guhaza ibyifuzo byabo ku isoko mu ngeri zinyuranye.

Umuyobozi Mukuru ushinzwe ibikorwa mu rugaga rw'abikorera (PSF), Faustin Karasira asobanurira abanyamakuru bimwe mu bizagaragara muri iri murikagurisha, yagize ati "Hari ibice (sectors) byinshi birimo ICT, ubwubatsi, ubuhinzi, ibikoresho bitandukanye byo mu nzu, amabuye y'agaciro, imyenda itari twa dushati tw'ibitenge (…), hari ibikorwa bitandukanye ndetse na serivisi z'amafaranga, byose bizaba bihari."

Umuyobozi Mukuru ushinzwe ibikorwa muri PSF, Faustin Karasira (ibumoso) na Kamugisha Samuel, Umuyobozi Mukuru ushinzwe guteza imbere Inganda n'abikorera muri Minisiteri y'Ubucuruzi n'Inganda

Faustin Karasira yakomeje avuga ko abazitabira iri murikagurisha bazabona ibintu bitandukanye bari basanzwe bumva kuri radiyo cyangwa bakabona kuri televiziyo harimo nk'amapikipiki y'amashanyarazi, telefone zikorerwa mu Rwanda, imodoka ziteranyirizwa mu Rwanda n'ibindi byose 'bazaba bafite amahirwe yo kuba babyibonera ndetse bagahura n'abasanzwe babikora bakaba babaha amakuru ahagije'

Umuyobozi Mukuru ushinzwe guteza imbere Inganda n'abikorera muri Minisiteri y'Ubucuruzi n'Inganda, Kamugisha Samuel nawe yahamagariye abanyarwanda kutazacikwa no kuza kwihahira ibicuruzwa bitandukanye muri iri murikagurisha dore ko by'akarusho bihuriranye n'iminsi mikuru isoza umwaka.

Kamugisha yavuze ko nyuma y'ubukangurambaga bwashyizwemo imbaraga na leta y'u Rwanda bwo guteza imbere ibikorerwa mu Rwanda (Made in Rwanda), kuri ubu bishimira umusaruro bimaze gutanga kandi ko n'abazitabira iri murikagurisha bazaba abahamya b'intambwe ishimishije imaze guterwa dore ko nka leta banifuza ko ibikorerwa mu Rwanda binarenga imipaka bikagera ku isoko mpuzamahanga.

Ubwo abanyamakuru basobanurirwaga ibyitezwe muri iri murikagurisha

Iri murikagurisha rizafungurwa ku mugaragaro ku wa Gatanu tariki 22 Ugushyingo, rikazitabirwa n'abamurika basaga 400, mu gihe byitezwe ko rizakira abakiliya barenga ibihumbi ijana basuye kandi bakanyurwa n'ibyo babonye nkuko byatangajwe na Faustin Karasira unashishikariza abantu kudasura gusa ko ahubwo bakwiye no guhaha.

Tubibutse ko kwinjira muri iri murikagurisha hazifashishwa uburyo bw'ikoranabuhanga bwa 'Mobile Money'.

Ikiraro cyo mu kirere mu ishyamba rya Nyungwe ku mwanya wa mbere ku isi (Urutonde&Amafoto)

By Nizeyimana Selemani

Ikiraro kiri mu kirere cy'ishyamba rya Nyungwe "Nyungwe Canopy Walkway" kifashishwa n'abasura iyi parike, cyashyizwe ku mwanya wa mbere ku isi yose.

Ni urutonde rwashyizwe hanze na Lonely Planet, igitabo kiyobora ba mukerarugendo cy'abanya-Australia.

Nyungwe Canopy Walkway yabaye iya mbere ku rutonde rw'ibindi biraro 11 byashyizwe ahagaragara muri iki gitabo, aharimo ibiraro byo mu bihugu biri mu mpande zose z'isi.

Dore urutonde rw'ibi biraro uko ari 11
1.
Ikiraro cyo muri parike ya Nyungwe kiza ku isonga

2.
Redwoods Nightlights, New Zealand

3.
Arbor Day Farm Tree Adventure, Nebraska, Leta Zunze Ubumwe za Amerika

4.
Daintree Discovery Centre Aerial Walkway, Queensland, Australia

5.
Treetop Walk Bavarian Forest, Ubudage

6.
Monteverde SkyWalk, Costa Rica

7.
Tahune Airwalk, Tasmania, Australia

8.
Canopy Walkway in the Amazon jungle, Peru

9.
Sequoia Aerial Adventure, California, Leta Zunze Ubumwe za Amerika

10.
OCBC Skyway, Singapore

11.
Tree Top Canopy Walk, Borneo, Malaysia

Src:Lonely Planet

CAN2021: Amavubi yaherewe isomo rya ruhango muri Mozambique

By Nizeyimana Selemani

Ikipe y'igihugu y'u Rwanda yatangiye nabi urugendo rwo gushaka itike y'igikombe cya Afurika kizabera muri Cameroun mu 2021, aho yatsinzwe ibitego 2-0 n'ikipe y'igihugu ya Mozambique mu mukino wa mbere wabereye kuri Estadio Zimpeto iherereye i Maputo ku mugoroba wo kuri uyu wa Kane tariki ya 14 Ugushyingo 2019.

Ni umukino abasore b'umutoza Mashami Vincent barushijwe bigaragara cyane cyane mu kibuga hagati ahanini bitewe nuko abasore barimo Yannick Mukunzi, Niyonzima Ally na Amran Nshimiyimana basanzwe bifashishwa batari bahari.

Ikipe ya Mozambique yakiniraga imbere y'abafana bayo yatangiye yotsa igitutu izamu rya Kimenyi Yves ariko uyu muzamu n'abamyugariro be babanza kwihagararaho kugeza ubwo ku munota wa 24 akagozi kacitse nyuma yaho izamu rya Amavubi ryugarijwe maze bikaviramo Rwatubyaye gukora umupira mu rubuga rw'amahina, umusifuzi agatanga penaliti yinjijwe neza na Edson Andre Stoe.

Nyuma y'iminota ibiri gusa Stanley Ernesto yaboneye Mozambique igitego cya kabiri arobye umuzamu Kimenyi Yves ku mupira wari uhinduwe na Francisco Lopez Albino.

Nyuma yo kubona ko hari icyuho gikomeye ku bakinnyi bo hagati bakina bafasha ba myugariro, umutoza Mashami Vincent ntiyarindiriye ko igice cya mbere kirangira kuko yahise akora impinduka zihuse yinjiza Niyonzima Olivier Sefu mu kibuga asimbuye Muhire Kevin ku munota wa 41. Uyu mukinnyi yazanye impinduka agerageza gutunganya amakosa yagaragaraga hagati mu kibuga.

Abakinnyi 11 Mashami yari yahisemo gutangiza mu kibuga/ Funclub

Igice cya kabiri Amavubi yagerageje gushaka uko yakwishyura ariko Mozambique iyibera ibamba ahubwo ikomeza kugenda inahusha ubundi buryo nubwo ho byibuze abasore ba Mashami nabo banyuzagamo ukabona bageze imbere y'izamu. Ku munota wa 74 Sibomana Patrick Pappy yinjiye mu kibuga asimbuye Muhadjili Hakizimana wagize umukino mwiza.

Ku munota wa 88 umuriro wabuze muri stade umukino uhagarara iminota hafi itatu, ugarutse ntihagira indi mpinduka iba umukino urangira ari 2-0.

Iyi ntsinzi ya Mozambique yahise iyihesha umwanya wa mbere n'amanota atatu mu itsinda F dore ko undi mukino wakinwe ku wa Gatatu wahuje Cap-Vert yari yasuye Cameroun banganyije 0-0 bityo aya makipe akaba akurikira n'inota 1 mu gihe Amavubi aza ku mwanya wa nyuma mbere y'uko kuri iki Cyumweru tariki ya 17 Ugushyingo 2019 yakira Cameroun kuri stade ya Kigali i Nyamirambo mu gihe Cap-Vert izaba yakiriye Mozambique.

Tubibutse ko muri iri tsinda F, ikipe ya Cameroun yo ifite itike bidasubirwaho kuko ari yo izakira imikino ya nyuma y'igikombe cya Afurika (CAN 2021) bivuze ko indi tike imwe igomba gushakirwa hagati y'u Rwanda, Mozambique na Cap-Vert.

  • November 15th 2019 at 01:21

Muraza kutubona! Perezida Kagame yaburiye abari imbere mu gihugu bagambirira guhungabanya umudendezo wacyo

By KP

Perezida wa Repubulika Paul Kagame yongeye kwibutsa ko umutekano w'igihugu ari ntakorwaho, ndetse anaburira uwatekereza kuwuhungabanya ko bizamuhenda cyane.

Ibi Umukuru w'Igihugu yabitangaje ubwo yakiraga indahiro z'abayobozi batandukanye barimo bagize guverinoma n'abayobozi bakuru mu ngabo z'u Rwanda.

Mu ijambo yavugiye mu muhango wo kurahira mu bagize guverinoma na bamwe mu bayobozi bakuru mu Ngabo z'u Rwanda kuri uyu wa Kane, Perezida wa Repubulika Paul Kagame yavuze ko abagerageza guhungabanya umutekano ntaho bamenera.

Yagize ati ''Umutekano twari tumaze kuwufata nk'ikintu gisanzwe, kandi nibyo ni ko bikwiye ko duharanira kugira Igihugu gitekanye ku buryo biba ibintu bisanzwe. Bizakomeza bityo, uko byagenda kose n'icyo byadusaba cyose. Tuzakora ibishoboka byose ku buryo umuntu wese uzagerageza guhungabanya umutekano wacu bigomba kumuhenda ndetse ku rwego rwo hejuru. Hazakorwa igishoboka cyose cyatuma tugira ituze n'umutekano w'Igihugu cyacu, n'abaturage bacu ndetse n'iterambere.''

Perezida Kagame ageza impanuro ku bayobozi barahiriye inshingano nshya bahawe

Umukuru w'Igihugu yakuriye inzira ku murima bamwe mu bo yavuze ko bari imbere mu gihugu bashyigikirwa n'abari hanze yacyo.

Ati ''Ku bantu bihisha inyuma y'ibidafite agaciro, ndetse bagashyigikirwa n'abantu bo hanze, bakaryoherwa.... muraza kutubona. Ababikora bakwiye kwitandukanya na byo hakiri kare. Ntabwo waba hano ngo wungukire ku mutekano n'amahoro twaharaniye, twameneye amaraso mu myaka myinshi, ngo nurangiza unyure inyuma uduteze ibibazo. Tuzagushyira aho ukwiye kuba, nta kabuza.''

Abarahiye ni Minisitiri w'ibidukikije Dr Mujawamariya Jeanne d'Arc, Minisitiri wa Siporo Aurore Mimosa Munyangaju na Minisitiri w'Umutekano Gen. Patrick Nyamvumba.

Minisitiri w'Ibidukikije, Jeanne d'Arc Mujawamariya arahira

Harahiye kandi Edouard Bamporiki wagizwe Umunyamabanga wa Leta muri Minisiteri y'Urubyiruko n'Umuco na Ignatienne Nyirarukundo, Umunyamabanga wa Leta muri Minisiteri y'Ubutegetsi bw'Igihugu ushinzwe imibereho myiza y'abaturage.

Minisitiri mushya wa Siporo, Aurore Mimosa Munyangaju

Minisitiri w'Umutekano, Gen Patrick Nyamvumba

Umunyamabanga wa Leta muri Minisiteri y'Ubutegetsi bw'Igihugu ushinzwe imibereho myiza y'abaturage, Ignatienne Nyirarukundo

Umunyamabanga wa Leta muri Minisiteri y'Urubyiruko n'Umuco, Edouard Bamporiki

Umukuru w'Igihugu yanakiriye Indahiro z'abayobozi bakuru mu Ngabo z'u Rwanda barimo Umugaba Mukuru w'ingabo z'u Rwanda, Gen Jean Bosco Kazura, Umugaba Mukuru w'inkeragutabara Gen Fred Ibingira, Umugenzuzi mukuru w'Ingabo z'u Rwanda, Lt Gen Jacques Musemakweli ndetse n'Umugaba wungirije w'inkeragutabara Maj Gen Innocent Kabandana.

Umugaba Mukuru w'Ingabo z'u Rwanda, Gen Jean Bosco Kazura

Umugaba Mukuru w'inkeragutabara Gen Fred Ibingira

Umugaba Mukuru wungirije w'Inkeragutabara, Gen Maj Innocent Kabandana

Umugenzuzi Mukuru (Inspector General) wa RDF, Lieutenant General Jacques Musemakweli

Bamwe mu bahawe izi nshingano na bo bavuga ko biteguye gutanga umusanzu wabo mu guharanira kurushaho kuzamura imibereho y'Abanyarwanda binyuze mu nzego nshya bagiye gukoreramo.

Umunyamabanga wa Leta muri Minisiteri y'Urubyiruko n'Umuco, Edouard Bamporiki yagize ati ''Umuco ufite igisobanuro gisanzwe gisobanurwa ariko tuzashyira imbaraga mu kugisobanura cyane aho duhuza umurage w'abakurambere bacu, ibyo duhanga n'ibyo duhaha kugira ngo ufite kimwe muri byo atajya yibwira ko afite umuco kuko bihungabanya umuco. Ahandi mbona dukwiye gushyira imbaraga ni ukubyaza impano abanyarwanda bafite umusaruro bashobora kuzitekereza nka zahabu ariko yatakaye ahantu hihishe gufasha rero izo mpano kugira ngo zidutungire igihugu, zituzamurire igihugu.''

Na ho Umunyamabanga wa Leta muri Minisiteri y'Ubutegetsi bw'Igihugu, Nyirarukundo Ignatienne yagize ati ''Umunyarwanda akumva ko anejerejwe cyangwa arajwe ishinga no kubaho kandi akabaho neza, agakunda umuryango we akikunda, kandi uko kubaho neza akabiharanira akabigiramo uruhare rugaragara ni byo Leta ikagira ibyo ifasha, ibijyanye no gutanga umurongo ariko na nyir'ubwite akumva ko afite inshingano yo kwita ku muryango,''

Minisitiri wa Siporo, Aurore Mimosa Munyangaju yavuze ko mu byo azashyira imbere hamo guteza imbere imikino mu rubyiruko.

Ati ''Hari gahunda zabagaho za inter scolaire mu mashuri ni ho tubona ko tugiye gushyira imbaraga zikomeye kuko iyo uzamura urubyiruko uhereye mu mashuri uhereye mu bana bato ni na bwo ubasha kubona ba bana bafite impano kugira ngo ubazamure neza.''

Perezida wa Repubulika yanibukije abarahiye ko inshingano ya mbere ibategereje ari uguharanira imibereho myiza y'abanyarwanda.

Yagize ati ''Muje muri izi nshingano mugihe dutangiye urundi rwego rw'icyerekezo cy'amajyambere y'igihugu cyacu. ikindi imbaraga, imitekerereze n'imikorere muzanye muri iyi mirimo ubwo bizagomba kuganishwa muri iyo nzira. Icya kabiri ni uko mu byo dukora byose twifuza guhindura Igihugu cyacu ku buryo ni ugukomeza guhindura mu byukuri inzira iracyari imwe, ku buryo ubukungu, imibereho myiza by'Abanyarwanda bikomeza kwiyongera.''

Tariki 4 Ugushyingo 2019 ni bwo Perezida wa Repubulika Paul Kagame yakoze impinduka muri Guverinoma,impinduka zageze no mu buyobozi bukuru bw'ingabo z'u Rwanda.

Kugeza aya magingo 48% by'abagize guverinoma batangiranye na manda ya 2017-2024 nibo bakiri mu myanya yabo.

RBA

  • November 14th 2019 at 14:25

John Legend ni we mugabo mwiza kuruta abariho bose. Dore abamubanjirije(Urutonde&Amafoto)

By Jolie Chadia

Nyuma y'umwaka Idris Elba ariwe mugabo mwiza kurusha abariho bose(sexiest man alive), People yamusimbuje umuririmbyi John Legend.

Nk'uko ikinyamakuru People kibigenza buri mwaka, aho gitora umugabo ufatwa nk'aho ari mwiza kuruta abandi bariho bose, kuri iyi nshuro yatangaje ko ari umuririmbyi John Legend, wagaragaje ko yatunguwe ariko ko yananezerewe cyane.

Yagize ati "Byanejeje cyane ariko kandi numva ngize ubwoba kuko mpanzwe amaso. Buri wese agiye kujya ansesengura areba niba koko mbikwiriye. Ikindi kandi nje nkurikiye Idris Elba, ibitanyorohereza na gato."

Legend yatangiye kwamamara cyane mu mwaka wa 2004 amaze gukora album yise "Get Lifted" akaba yaragiye yongera kwamamara kwe, dore ko amaze no kwegukana Grammy Awards 10, Oscar 1 ndetse na Golden Globe.

1985 Mel Gibson

1986 Mark Harmon

1987 Harry Hamlin

1988 John F. Kennedy, Jr.

1989 Sean Connery

1990 Tom Cruise

1991 Patrick Swayze

1992 Nick Nolte

1993 Richard Gere na Cindy Crawford (Sexiest Couple Alive)

1994 Keanu Reeves

1995 Brad Pitt

1996 Denzel Washington

1997 George Clooney

1998 Harrison Ford

1999 Richard Gere

2000 Brad Pitt

2001 Pierce Brosnan

2002 Ben Affleck

2003 Johnny Depp

2004 Jude Law

2005 Matthew McConaughey

2006 George Clooney

2007 Matt Damon

2008 Hugh Jackman

2009 Johnny Depp

2010 Ryan Reynolds

2011 Bradley Cooper

2012 Channing Tatum

2013 Adam Levine

2014 Chris Hemsworth

2015 David Beckham

2016 Dwayne Johnson

2017 Blake Shelton

2018 Idris Elba

2019 John Legend

Klyian Mbappe wifuzwa bikomeye na Real Madrid ashobora guca agahigo ko kugurwa akayabo

By Nizeyimana Selemani

Ikipe ya Real Madrid biravugwa ko yiteguye gukora ibishoboka byose ikazana Umufaransa Kylian Mbappe i Santiago Bernabeu.

Ibinyamakuru bitandukanye birimo Le Parisien na CalcioMercato byatangaje ko iyi kipe y'ikigugu muri Esipanye yiteguye guhara asaga miliyoni 400 z'amayero kugira ngo igure uyu mukinnyi w'imyaka 20 y'amavuko ukinira Paris Saint-Germain.

Ibi biramutse bibaye uyu rutahizamu ufite impano idashidikanywaho yahita aca agahigo ko kuba umukinnyi wa mbere uguzwe amafaranga menshi ku isi kari gasanganywe Neymar ubwo yavaga muri Barcelona yerekeza muri PSG mu 2017 aguzwe amapawundi miliyoni 198.

Mbappe ashobora kuba umukinnyi wa mbere ku isi uguzwe amafaranga menshi

Hashize igihe kinini Mbappe bivugwa ko agomba kuzerekeza muri Esipanye, ibi byatangiye kunuganugwa kuva yatangira kwigaragaza ku ruhando mpuzamahanga ubwo yari akiri muri Monaco ku myaka 17 gusa y'amavuko.

Kugeza ubu amaze gutsinda ibitego 67 anatanga imipira 31 yabyaye ibitego mu mikino 104 gusa amaze gukina ndetse ubu abakurikiranira hafi bemeza ko ashobora kuzaba umukinnyi watsinze byinshi muri shampiyona y'Abarasansa muri uyu mwaka.

Zidane arifuza bikomeye Mbappe ngo aze afashe ubusatirizi bwa Real Madrid

Mbappe yari umukinnyi wazaga ku isonga mu bashakagwa na Zidane mu mpeshyi ishize aho yashakaga kumusimbuza Gareth Bale gusa byarangiye uyu musore agumye i Paris maze Real Madrid ibasha kugura Luka Jovic imukuye muri Eintracht Frankfurt na Eden Hazard yakuye muri Chelsea.

Kuba ikipe ya PSG nayo yifuza Umunya-Brazil, Vinicius Junior, ibi bishobora gutuma aya makipe yakwicara akaganira kuko nubwo uyu munya-Brazil yari yitezweho byinshi muri Real Madrid kuva yatangira kuyikinira mu mwaka w'imikino ushize, nyuma yaho Zidane agarutse ntiyakomeje kubona umwanya uhagije wo gukina aho muri uyu mwaka ubu amaze gukina imikino ine gusa abanje mu kibuga, indi itanu akinjira asimbuye.

Mbappe ashobora kubisikana na Vinicius Junior

Gusa mu byumweru bishize hagaragaye gyterana amagambo hagati y'Umuyobozi wa siporo muri PSG, Leonaldo n'umutoza Zinedine Zidane nyuma yaho uyu mutoza avuze ko inzozi za Mbappe ari ukuzakinira Real Madrid maze Leonaldo akamwiyama guhoza mu kanwa umukinnyi wabo.

  • November 13th 2019 at 09:05

U Rwanda rwashyikirije Uganda imibiri y'abaturage bayo barashwe bashaka kwinjiza magendu

By Nizeyimana Selemani

Kuri uyu wa Kabiri tariki ya 12 Ugushyingo 2019 ni bwo leta y'u Rwanda yashyikirije iya Uganda imirambo y'abaturage bayo babiri barashwe na polisi y'u Rwanda mu ijoro ryo ku wa Gatandatu rishyira ku Cyumweru tariki ya 10 Ugushyingo ubwo bageragezaga kwinjiza magendu mu gihugu.

Muri iki gikorwa cyo guha imirambo hari abayobozi bo ku mpande z'ibihugu byombi aho ku ruhande rw'u Rwanda hari Umuyobozi w'Akarere ka Nyagatare, Mushabe David Claudien ari kumwe n'Umuyobozi wa Polisi mu Ntara y'Iburasirazuba, ACP Hatari Emmanuel mu gihe ku ruhande rwa Uganda hari Komiseri w'Akarere ka Rukiga akanaba n'Umuyobozi w'Akanama k'Umutekano muri ako gace, Muhindo Pulkeria n'Umuyobozi wa Polisi mu Karere ka Rukiga, Sselunjoji Edda.

Byari biteganijwe ko uyu muhango utangira saa Yine z'amanywa ariko watangiye saa Tanu zirenga kuko habanje kurebwa niba koko iyo mirambo ari iya Job Ebyayishanga w'imyaka 32 na Bosco Tuheirwe w'imyaka 35 bombi bafite ubwenegihugu bwa Uganda.

Nkuko IGIHE cyabyanditse nyuma habayeho impaka ku rupapuro rw'ihererekanwa ry'imirambo Uganda ivuga ko ishaka urupapuro rwa Polisi rwerekana ko abo baturage barasiwe mu Rwanda nyuma y'isaha urwo rupapuro rwabonetse impande zombi zirusinyaho ubundi Uganda itwara imirambo y'abaturage bayo.

Ubwo abayobozi ku ruhande rw'u Rwanda basinyaga ku rupapuro rwemeza ko abo baturage barasiwe mu Rwanda

Umuyobozi w'Akarere ka Nyagatare, Mushabe David Claudien, yavuze ko Polisi y'u Rwanda yabanje guhagarika abo baturage bari bazanye magendu mu Rwanda banayicishije mu nzira zitemewe ngo bashaka kuyirwanya mu rwego rwo kwitabara irarasa hapfamo babiri abandi basubira inyuma ku butaka bwa Uganda.

Yakomeje avuga ko ibyabaye byasigiye impande zombi amasomo.

Ati "Kuri njye navuga ko ibyabaye hari isomo twabyigiyemo abaturage bacu yaba abo mu Rwanda na Uganda, dufite inzira zemewe n'amategeko bakwiye gucamo ariko hari bamwe batabyubahiriza dukwiye kubashishikariza kuzikoresha."

Yasabye abayobozi ba Uganda gukomeza kugira inama abaturage babo yo gukoresha inzira zemewe n'amategeko.

Abayobozi ku ruhande rwa Uganda ubwo basinyaga ko bakiriye imirambo y'abaturage babo barashwe bashaka kwinjiza magendu mu Rwanda banyuze ahatemewe

Umuyobozi wari uhagarariye Akarere ka Rukiga, Muhindo Pulkeria, yashimiye Leta y'u Rwanda ku bwo kubaha imirambo y'abaturage babo.

Yagize ati "Mbere na mbere twihanganishije abaturage ba Uganda n'abaturage ba Kamwezi ku bwo kubura abahungu babo gusa turashimira Leta y'u Rwanda yaduhaye imirambo yabo mu buryo bwiza tukaba twayakiriye mu buryo buzwi, gusa ntabwo kubica wari wo mwanzuro mwiza bari gufatwa bagafungwa.”

Yakomeje avuga ko ibihugu byombi bikwiye gukomeza gushyira imbere umubano mwiza nk'ibituranyi no gushishikariza abaturage babyo guhagarika ibikorwa bya magendu.


Nyuma yo guhabwa imirambo y'abaturage barasiwe mu Rwanda bashaka kwinjira binyuranyije n'amategeko, abahagarariye Uganda bahise basubira mu gihugu cyabo

Leta ya Uganda kandi yandikiye iy'u Rwanda ndetse inasohora itangazo ivuga ko yamaganye ibyo bikorwa by'iraswa ry'abaturage b'icyo gihugu bikozwe n'inzego z'umutekano z'u Rwanda.

Uganda ivuga ko yamaganye "mu magambo akomeye ashoboka" iyicwa ry'abaturage bayo bishwe n'inzego z'umutekano z'u Rwanda zibashinja gukora ubucuruzi bwa magendu ku mupaka usangiwe".

Iri tangazo rigira riti: "Icyo cyaha bacyekwaho ntabwo gishobora gusobanura ikoreshwa ry'imbaraga z'umurengera, [biriya] ni icyaha cy'abashinzwe umutekano b'u Rwanda ku basivile badafite intwaro ku mupaka duhuriyeho".

Uganda isaba ko hakorwa iperereza rihuriweho kuri ubwo bwicanyi, ababikoze bakabiryozwa.

  • November 13th 2019 at 02:56

Mu myaka 5 u Rwanda rwahaye Congo Kinshasa miliyari 1,2 kubera ingagi zayo zahimukiye

By Nizeyimana Selemani

Mu myaka 5 ishize Leta y'u Rwanda imaze gushyikiriza iya Congo-Kinshasa amafaranga y'u Rwanda asaga miliyari imwe na miliyoni 200 kubera umuryango w'ingagi w'icyo gihugu umaze hafi imyaka 15 wimukiye ku ruhande rw'u Rwanda.

Ni mu gihe hashize ukwezi kurenga umuryango w'ingagi z'u Rwanda nawo wimukiye ku ruhande rwa Uganda.

Ingagi zo mu misozi miremire, ni umwihariko w'agace k'ibirunga kazwi nka β€˜Virunga massive', gahuriweho n'ibihugu by'u Rwanda, Uganda na DRC.

Ni inyamaswa ziteye amatsiko, k'uburyo amashyushyu aba ari yose ku bagiye kuzisura ku nshuro ya mbere.

Mu byo ingagi zihuriyeho n'abantu, harimo kubaho bishingiye ku miryango kuko buri yose igira umuryango ibarizwamo.

Kugeza ubu mu miryango y'ingagi isurwa na ba mukerarugendo basura pariki y'igihugu y'ibirunga, harimo n'uwitwa Kwitonda waturutse muri RDC mu myaka 15 ishize.

Umuyobozi wa Pariki y'Igihugu y'Ibirunga, Uwingeri Prosper, avuga ko u Rwanda rumaze guha DRC miliyoni n'ibihumbi 300 by'amadorali ya USA, ni ukuvuga asaga miliyari imwe na miliyoni 200 z'amafaranga y'u Rwanda nk'uko biteganywa n'amasezerano ibihugu by'u Rwanda, Uganda na DRC bifitanye, avuga ko cyaba igihugu ingagi zikomokamo n'icyo zimukiyemo bigabana amadevize azitangwaho buri ruhande rugatwara 50%.

Yagize ati β€˜β€˜Ino parike tuyihuriyeho ari ibihugu 3, muri make turavuga ngo ingagi ziyibamo kimwe n'izindi nyamaswa nta mupaka zizi. Nko mu myaka 5 cyangwa 6 ishize twahaye DRC arenga miliyoni y'amadorali; buri mwaka cyangwa buri kwezi uko uwo muryango tuba twawukoresheje niko tugabana n'ayo mafaranga. Aho twatangiriye ayo masezerano muri 2006 buri mwaka twagiye tugabana, bityo bivuze ko n'iyo group ivuye mu Rwanda ikajya muri DRC cg Uganda birongera bikagenda bityo''.

Uwingeri avuga kandi ko yizeye ko igihugu cya Uganda cyizashyira mu bikorwa ayo masezerano, nyuma yaho umuryango w'ingagi 17 zikomoka mu Rwanda witwa Hirwa nawo wimukiye mu gice cya Uganda, ukwezi kurenga kukaba kwirenze.

Ati β€˜β€˜Amasezerano arahari kandi nk'uko twatanze urugero nta gihugu cyari cyagaragaza ko amasezerano abangamye. Nta mpungenge rwose ndetse tuzajya no kubafasha kuzimenyereza no kumenya izo ari zo kuko aho zigiye ntabwo bahita bamenya ngo iyi ni iyihe. Turabikora rero byose biri muri ayo masezerano noneho no gusangira umutungo bigakurikira.''

Parike 3 z'ibihugu by'u Rwanda, Uganda na DRC zihuriye ku birunga zifite ubuso bwa km2 zisaga 2000. Kugeza ubu zibarirwamo ingagi zisaga 600, aho u Rwanda rwihariye izirenga 50% cyakora ku buso buto bungana na hegitari 160.

RBA

  • November 13th 2019 at 01:24
Before yesterdayThe Kigali Post

Perezida Kagame yahamagariye ibihugu bigize G20 gushora imari mu Rwanda

By Nizeyimana Selemani

Perezida wa Repubulika, Paul Kagame asanga kuba ibigo bikomeye byo mu bihugu byateye imbere bikomeje kwitabira ishoramari ku mugabane wa Afurika ari ikimenyetso cy' intambwe imaze guterwa n' uyu mugabane mu kubaka ubukungu bwizewe.

Ibi yabivugiye mu nama ihuza abayobozi b' ibihugu 20 bikize ku isi (G20) n' ab'ibihugu bya Afurika biri muri gahunda izwi nka Compact with Africa ibera i Berlin mu Budage.

Ibihugu 12 byo ku mugabane wa Afurika bifite ubukungu bwihuta biri mu murwa mukuru w' u Budage, Berlin aho baganira n' abagenzi babo bo mu bihugu 20 bikize ku isi mu ihuriro rizwi nka G20 Compact with Afurika.

U Rwanda ni kimwe muri ibi bihugu bya Afurika bigize iyi gahunda yatangijwe muri 2017.

Abasesengura ibya politiki bemeza ko kuba u Rwanda rutumirwa kenshi muri G20 ndetse rukaba ruri muri iri huriro bifite igisobanuro mu isura rufite ku ruhando mpuzamahanga.

Dr Havugimana Emmanuel agaragaza impamvu abona zituma u Rwanda rutumirwa mu nama nk'izo zikomeye ku rwego mpuzamahanga.

Yagize ati "Ni igihugu gito, gituwe n' abaturage benshi b' abahanga, gifite ubuyobozi bwiza, kandi noneho amateka twanyuzemo mu 1994, abantu bakaza aho igihugu cyari kigeze, gisa nk' aho cyazimanganye ku ikarita y' isi, nyuma y' imyaka 25 kikaba gitangiye kuba intanga rugero muri izo ngero nagiye ntanga, bituma n' abazungu bavuga bati bariya bantu, ibanga ryabo ni irihe!? Reka duhure na bo, ni yo mpamvu HE bamutumira muri G20 akagenda agatanga ibitekerezo bye bakamutega amatwi, burya ni uko batabivugira ahabona ariko baravuga bati uyu muntu ni umuhanga, niko basigara babibwirana buriya."

Na ho umusesenguzi Tombola Gustave we yagize ati "Barashaka kumva, bati byagenze bite, kugira ngo Volkswagen yumve ko yajya mu Rwanda. Impamvu yabyo. Zirahari, hari umutekano mu gihugu, kandi na byo, security ni kimwe mu bibazo G20 igomba kwigaho, kuko security, ifasha mu iterambere ry' ubukungu."

Iri huriro rigamije gushishikariza abashoramari bo mu bihugu 20 bikize kurusha ibindi ku isi gushora imari ku mugabane wa Afurika, hagaragazwa amahirwe atandukanye ari kuri uyu mugabane.

Kugeza ubu hari ibigo bikomeye ku rwego mpuzamahanga byamaze gushora imari kuri uyu mugabane ukungahaye ku mutungo kamere ndetse utuwe na miliyari 1 na miliyoni zisaga 200 z' abaturage.

Mu ijambo rye ku bitabiriye iyi nama, Perezida wa Repubulika Paul Kagame yashimiye ubufatanye hagati ya G20 n' ibihugu bya Afurika mu kureshya abashoramari, aho yatanze ingero rw' ibishoboka muri Afrika ashingiye ku byagezweho mu Rwanda.

Yagize ati "Urugero ni ubufatanye u Rwanda rwagiranye na Volkswagen, Siemens na yo ubu na yo yamaze kuza kimwe na ACP. Bigaragaza ubukungu bushikamye bw' umugabane wacu, mu bihugu bitandukanye, ndetse amavugurura yagiye akorwa mu koroshya ubucuruzi, kandi ibi birimo gutanga umusaruro w' ibyagezweho, turifuza rero gukomeza kubona ishoramari ryisumbuyeho riturutse mu Budage, mu Burayi, no muri G20 muri ubu bufatanye bwubatswe, ubwo rero ndifuza gushimira Volkswagen ku bufatanye dufitanye bugaragaza ibishobora muri Afrika."

Perezida wa Repubulika avuga ko u Rwanda n' ubwo ari igihugu gito ku buso, ariko gifite icyerekezo cyagutse mu iterambere.

Kuri Dr Havugimana na Dr Tombola, Afurika mu mahuriro n' inama nk' izi igomba kujyana ijwi rimwe kandi ikareshya ishoramari rifitiye inyungu impande zombi kandi mu bwubahane.

Ibihugu bya Afurika biri mu ihuriro Compact with Africa mu bufatanye na G20, ni Benin, Misiri, Cote d' Ivoire, Ethiopia, Ghana, u Rwanda, Senegal, Burkina Fasso, Ghana, Guinea, Togo na Tunisia.

Src:RBA

Imurikagurisha ry'ibikorerwa mu Rwanda rizamara amatsiko n'inyota abazaryitabira

By Nizeyimana Selemani

Kuva kuri uyu wa Kane tariki ya 21 Ugushyingo kugeza ku ya 04 Ukuboza 2019 i Gikondo muri Expo Grounds hazaba habera imurikagurisha ry'ibikorerwa mu Rwanda (Made in Rwanda Expo) byitezwe ko izaba ifite umwihariko ntagereranywa mu kugaragaza intambwe 'Made in Rwanda' igezeho.

Nkuko byasobanuwe mu kiganiro kigenewe itangazamakuru cyabaye kuri uyu wa Kabiri, Urugaga rw'Abikorera (PSF) na Minisiteri y'Ubucuruzi n'Inganda byagaragaje ko iri murikagurisha rizaba umwanya mwiza wo kwereka abanyarwanda intambwe imaze guterwa n'inganda zo mu Rwanda mu guhaza ibyifuzo byabo ku isoko mu ngeri zinyuranye.

Umuyobozi Mukuru ushinzwe ibikorwa mu rugaga rw'abikorera (PSF), Faustin Karasira asobanurira abanyamakuru bimwe mu bizagaragara muri iri murikagurisha, yagize ati "Hari ibice (sectors) byinshi birimo ICT, ubwubatsi, ubuhinzi, ibikoresho bitandukanye byo mu nzu, amabuye y'agaciro, imyenda itari twa dushati tw'ibitenge (…), hari ibikorwa bitandukanye ndetse na serivisi z'amafaranga, byose bizaba bihari."

Umuyobozi Mukuru ushinzwe ibikorwa muri PSF, Faustin Karasira (ibumoso) na Kamugisha Samuel, Umuyobozi Mukuru ushinzwe guteza imbere Inganda n'abikorera muri Minisiteri y'Ubucuruzi n'Inganda

Faustin Karasira yakomeje avuga ko abazitabira iri murikagurisha bazabona ibintu bitandukanye bari basanzwe bumva kuri radiyo cyangwa bakabona kuri televiziyo harimo nk'amapikipiki y'amashanyarazi, telefone zikorerwa mu Rwanda, imodoka ziteranyirizwa mu Rwanda n'ibindi byose 'bazaba bafite amahirwe yo kuba babyibonera ndetse bagahura n'abasanzwe babikora bakaba babaha amakuru ahagije'

Umuyobozi Mukuru ushinzwe guteza imbere Inganda n'abikorera muri Minisiteri y'Ubucuruzi n'Inganda, Kamugisha Samuel nawe yahamagariye abanyarwanda kutazacikwa no kuza kwihahira ibicuruzwa bitandukanye muri iri murikagurisha dore ko by'akarusho bihuriranye n'iminsi mikuru isoza umwaka.

Kamugisha yavuze ko nyuma y'ubukangurambaga bwashyizwemo imbaraga na leta y'u Rwanda bwo guteza imbere ibikorerwa mu Rwanda (Made in Rwanda), kuri ubu bishimira umusaruro bimaze gutanga kandi ko n'abazitabira iri murikagurisha bazaba abahamya b'intambwe ishimishije imaze guterwa dore ko nka leta banifuza ko ibikorerwa mu Rwanda binarenga imipaka bikagera ku isoko mpuzamahanga.

Ubwo abanyamakuru basobanurirwaga ibyitezwe muri iri murikagurisha

Iri murikagurisha rizafungurwa ku mugaragaro ku wa Gatanu tariki 22 Ugushyingo, rikazitabirwa n'abamurika basaga 400, mu gihe byitezwe ko rizakira abakiliya barenga ibihumbi ijana basuye kandi bakanyurwa n'ibyo babonye nkuko byatangajwe na Faustin Karasira unashishikariza abantu kudasura gusa ko ahubwo bakwiye no guhaha.

Tubibutse ko kwinjira muri iri murikagurisha hazifashishwa uburyo bw'ikoranabuhanga bwa 'Mobile Money'.

Ikiraro cyo mu kirere mu ishyamba rya Nyungwe ku mwanya wa mbere ku isi (Urutonde&Amafoto)

By Nizeyimana Selemani

Ikiraro kiri mu kirere cy'ishyamba rya Nyungwe "Nyungwe Canopy Walkway" kifashishwa n'abasura iyi parike, cyashyizwe ku mwanya wa mbere ku isi yose.

Ni urutonde rwashyizwe hanze na Lonely Planet, igitabo kiyobora ba mukerarugendo cy'abanya-Australia.

Nyungwe Canopy Walkway yabaye iya mbere ku rutonde rw'ibindi biraro 11 byashyizwe ahagaragara muri iki gitabo, aharimo ibiraro byo mu bihugu biri mu mpande zose z'isi.

Dore urutonde rw'ibi biraro uko ari 11
1.
Ikiraro cyo muri parike ya Nyungwe kiza ku isonga

2.
Redwoods Nightlights, New Zealand

3.
Arbor Day Farm Tree Adventure, Nebraska, Leta Zunze Ubumwe za Amerika

4.
Daintree Discovery Centre Aerial Walkway, Queensland, Australia

5.
Treetop Walk Bavarian Forest, Ubudage

6.
Monteverde SkyWalk, Costa Rica

7.
Tahune Airwalk, Tasmania, Australia

8.
Canopy Walkway in the Amazon jungle, Peru

9.
Sequoia Aerial Adventure, California, Leta Zunze Ubumwe za Amerika

10.
OCBC Skyway, Singapore

11.
Tree Top Canopy Walk, Borneo, Malaysia

Src:Lonely Planet

CAN2021: Amavubi yaherewe isomo rya ruhango muri Mozambique

By Nizeyimana Selemani

Ikipe y'igihugu y'u Rwanda yatangiye nabi urugendo rwo gushaka itike y'igikombe cya Afurika kizabera muri Cameroun mu 2021, aho yatsinzwe ibitego 2-0 n'ikipe y'igihugu ya Mozambique mu mukino wa mbere wabereye kuri Estadio Zimpeto iherereye i Maputo ku mugoroba wo kuri uyu wa Kane tariki ya 14 Ugushyingo 2019.

Ni umukino abasore b'umutoza Mashami Vincent barushijwe bigaragara cyane cyane mu kibuga hagati ahanini bitewe nuko abasore barimo Yannick Mukunzi, Niyonzima Ally na Amran Nshimiyimana basanzwe bifashishwa batari bahari.

Ikipe ya Mozambique yakiniraga imbere y'abafana bayo yatangiye yotsa igitutu izamu rya Kimenyi Yves ariko uyu muzamu n'abamyugariro be babanza kwihagararaho kugeza ubwo ku munota wa 24 akagozi kacitse nyuma yaho izamu rya Amavubi ryugarijwe maze bikaviramo Rwatubyaye gukora umupira mu rubuga rw'amahina, umusifuzi agatanga penaliti yinjijwe neza na Edson Andre Stoe.

Nyuma y'iminota ibiri gusa Stanley Ernesto yaboneye Mozambique igitego cya kabiri arobye umuzamu Kimenyi Yves ku mupira wari uhinduwe na Francisco Lopez Albino.

Nyuma yo kubona ko hari icyuho gikomeye ku bakinnyi bo hagati bakina bafasha ba myugariro, umutoza Mashami Vincent ntiyarindiriye ko igice cya mbere kirangira kuko yahise akora impinduka zihuse yinjiza Niyonzima Olivier Sefu mu kibuga asimbuye Muhire Kevin ku munota wa 41. Uyu mukinnyi yazanye impinduka agerageza gutunganya amakosa yagaragaraga hagati mu kibuga.

Abakinnyi 11 Mashami yari yahisemo gutangiza mu kibuga/ Funclub

Igice cya kabiri Amavubi yagerageje gushaka uko yakwishyura ariko Mozambique iyibera ibamba ahubwo ikomeza kugenda inahusha ubundi buryo nubwo ho byibuze abasore ba Mashami nabo banyuzagamo ukabona bageze imbere y'izamu. Ku munota wa 74 Sibomana Patrick Pappy yinjiye mu kibuga asimbuye Muhadjili Hakizimana wagize umukino mwiza.

Ku munota wa 88 umuriro wabuze muri stade umukino uhagarara iminota hafi itatu, ugarutse ntihagira indi mpinduka iba umukino urangira ari 2-0.

Iyi ntsinzi ya Mozambique yahise iyihesha umwanya wa mbere n'amanota atatu mu itsinda F dore ko undi mukino wakinwe ku wa Gatatu wahuje Cap-Vert yari yasuye Cameroun banganyije 0-0 bityo aya makipe akaba akurikira n'inota 1 mu gihe Amavubi aza ku mwanya wa nyuma mbere y'uko kuri iki Cyumweru tariki ya 17 Ugushyingo 2019 yakira Cameroun kuri stade ya Kigali i Nyamirambo mu gihe Cap-Vert izaba yakiriye Mozambique.

Tubibutse ko muri iri tsinda F, ikipe ya Cameroun yo ifite itike bidasubirwaho kuko ari yo izakira imikino ya nyuma y'igikombe cya Afurika (CAN 2021) bivuze ko indi tike imwe igomba gushakirwa hagati y'u Rwanda, Mozambique na Cap-Vert.

  • November 15th 2019 at 01:21

Muraza kutubona! Perezida Kagame yaburiye abari imbere mu gihugu bagambirira guhungabanya umudendezo wacyo

By KP

Perezida wa Repubulika Paul Kagame yongeye kwibutsa ko umutekano w'igihugu ari ntakorwaho, ndetse anaburira uwatekereza kuwuhungabanya ko bizamuhenda cyane.

Ibi Umukuru w'Igihugu yabitangaje ubwo yakiraga indahiro z'abayobozi batandukanye barimo bagize guverinoma n'abayobozi bakuru mu ngabo z'u Rwanda.

Mu ijambo yavugiye mu muhango wo kurahira mu bagize guverinoma na bamwe mu bayobozi bakuru mu Ngabo z'u Rwanda kuri uyu wa Kane, Perezida wa Repubulika Paul Kagame yavuze ko abagerageza guhungabanya umutekano ntaho bamenera.

Yagize ati ''Umutekano twari tumaze kuwufata nk'ikintu gisanzwe, kandi nibyo ni ko bikwiye ko duharanira kugira Igihugu gitekanye ku buryo biba ibintu bisanzwe. Bizakomeza bityo, uko byagenda kose n'icyo byadusaba cyose. Tuzakora ibishoboka byose ku buryo umuntu wese uzagerageza guhungabanya umutekano wacu bigomba kumuhenda ndetse ku rwego rwo hejuru. Hazakorwa igishoboka cyose cyatuma tugira ituze n'umutekano w'Igihugu cyacu, n'abaturage bacu ndetse n'iterambere.''

Perezida Kagame ageza impanuro ku bayobozi barahiriye inshingano nshya bahawe

Umukuru w'Igihugu yakuriye inzira ku murima bamwe mu bo yavuze ko bari imbere mu gihugu bashyigikirwa n'abari hanze yacyo.

Ati ''Ku bantu bihisha inyuma y'ibidafite agaciro, ndetse bagashyigikirwa n'abantu bo hanze, bakaryoherwa.... muraza kutubona. Ababikora bakwiye kwitandukanya na byo hakiri kare. Ntabwo waba hano ngo wungukire ku mutekano n'amahoro twaharaniye, twameneye amaraso mu myaka myinshi, ngo nurangiza unyure inyuma uduteze ibibazo. Tuzagushyira aho ukwiye kuba, nta kabuza.''

Abarahiye ni Minisitiri w'ibidukikije Dr Mujawamariya Jeanne d'Arc, Minisitiri wa Siporo Aurore Mimosa Munyangaju na Minisitiri w'Umutekano Gen. Patrick Nyamvumba.

Minisitiri w'Ibidukikije, Jeanne d'Arc Mujawamariya arahira

Harahiye kandi Edouard Bamporiki wagizwe Umunyamabanga wa Leta muri Minisiteri y'Urubyiruko n'Umuco na Ignatienne Nyirarukundo, Umunyamabanga wa Leta muri Minisiteri y'Ubutegetsi bw'Igihugu ushinzwe imibereho myiza y'abaturage.

Minisitiri mushya wa Siporo, Aurore Mimosa Munyangaju

Minisitiri w'Umutekano, Gen Patrick Nyamvumba

Umunyamabanga wa Leta muri Minisiteri y'Ubutegetsi bw'Igihugu ushinzwe imibereho myiza y'abaturage, Ignatienne Nyirarukundo

Umunyamabanga wa Leta muri Minisiteri y'Urubyiruko n'Umuco, Edouard Bamporiki

Umukuru w'Igihugu yanakiriye Indahiro z'abayobozi bakuru mu Ngabo z'u Rwanda barimo Umugaba Mukuru w'ingabo z'u Rwanda, Gen Jean Bosco Kazura, Umugaba Mukuru w'inkeragutabara Gen Fred Ibingira, Umugenzuzi mukuru w'Ingabo z'u Rwanda, Lt Gen Jacques Musemakweli ndetse n'Umugaba wungirije w'inkeragutabara Maj Gen Innocent Kabandana.

Umugaba Mukuru w'Ingabo z'u Rwanda, Gen Jean Bosco Kazura

Umugaba Mukuru w'inkeragutabara Gen Fred Ibingira

Umugaba Mukuru wungirije w'Inkeragutabara, Gen Maj Innocent Kabandana

Umugenzuzi Mukuru (Inspector General) wa RDF, Lieutenant General Jacques Musemakweli

Bamwe mu bahawe izi nshingano na bo bavuga ko biteguye gutanga umusanzu wabo mu guharanira kurushaho kuzamura imibereho y'Abanyarwanda binyuze mu nzego nshya bagiye gukoreramo.

Umunyamabanga wa Leta muri Minisiteri y'Urubyiruko n'Umuco, Edouard Bamporiki yagize ati ''Umuco ufite igisobanuro gisanzwe gisobanurwa ariko tuzashyira imbaraga mu kugisobanura cyane aho duhuza umurage w'abakurambere bacu, ibyo duhanga n'ibyo duhaha kugira ngo ufite kimwe muri byo atajya yibwira ko afite umuco kuko bihungabanya umuco. Ahandi mbona dukwiye gushyira imbaraga ni ukubyaza impano abanyarwanda bafite umusaruro bashobora kuzitekereza nka zahabu ariko yatakaye ahantu hihishe gufasha rero izo mpano kugira ngo zidutungire igihugu, zituzamurire igihugu.''

Na ho Umunyamabanga wa Leta muri Minisiteri y'Ubutegetsi bw'Igihugu, Nyirarukundo Ignatienne yagize ati ''Umunyarwanda akumva ko anejerejwe cyangwa arajwe ishinga no kubaho kandi akabaho neza, agakunda umuryango we akikunda, kandi uko kubaho neza akabiharanira akabigiramo uruhare rugaragara ni byo Leta ikagira ibyo ifasha, ibijyanye no gutanga umurongo ariko na nyir'ubwite akumva ko afite inshingano yo kwita ku muryango,''

Minisitiri wa Siporo, Aurore Mimosa Munyangaju yavuze ko mu byo azashyira imbere hamo guteza imbere imikino mu rubyiruko.

Ati ''Hari gahunda zabagaho za inter scolaire mu mashuri ni ho tubona ko tugiye gushyira imbaraga zikomeye kuko iyo uzamura urubyiruko uhereye mu mashuri uhereye mu bana bato ni na bwo ubasha kubona ba bana bafite impano kugira ngo ubazamure neza.''

Perezida wa Repubulika yanibukije abarahiye ko inshingano ya mbere ibategereje ari uguharanira imibereho myiza y'abanyarwanda.

Yagize ati ''Muje muri izi nshingano mugihe dutangiye urundi rwego rw'icyerekezo cy'amajyambere y'igihugu cyacu. ikindi imbaraga, imitekerereze n'imikorere muzanye muri iyi mirimo ubwo bizagomba kuganishwa muri iyo nzira. Icya kabiri ni uko mu byo dukora byose twifuza guhindura Igihugu cyacu ku buryo ni ugukomeza guhindura mu byukuri inzira iracyari imwe, ku buryo ubukungu, imibereho myiza by'Abanyarwanda bikomeza kwiyongera.''

Tariki 4 Ugushyingo 2019 ni bwo Perezida wa Repubulika Paul Kagame yakoze impinduka muri Guverinoma,impinduka zageze no mu buyobozi bukuru bw'ingabo z'u Rwanda.

Kugeza aya magingo 48% by'abagize guverinoma batangiranye na manda ya 2017-2024 nibo bakiri mu myanya yabo.

RBA

John Legend ni we mugabo mwiza kuruta abariho bose. Dore abamubanjirije(Urutonde&Amafoto)

By Jolie Chadia

Nyuma y'umwaka Idris Elba ariwe mugabo mwiza kurusha abariho bose(sexiest man alive), People yamusimbuje umuririmbyi John Legend.

Nk'uko ikinyamakuru People kibigenza buri mwaka, aho gitora umugabo ufatwa nk'aho ari mwiza kuruta abandi bariho bose, kuri iyi nshuro yatangaje ko ari umuririmbyi John Legend, wagaragaje ko yatunguwe ariko ko yananezerewe cyane.

Yagize ati "Byanejeje cyane ariko kandi numva ngize ubwoba kuko mpanzwe amaso. Buri wese agiye kujya ansesengura areba niba koko mbikwiriye. Ikindi kandi nje nkurikiye Idris Elba, ibitanyorohereza na gato."

Legend yatangiye kwamamara cyane mu mwaka wa 2004 amaze gukora album yise "Get Lifted" akaba yaragiye yongera kwamamara kwe, dore ko amaze no kwegukana Grammy Awards 10, Oscar 1 ndetse na Golden Globe.

1985 Mel Gibson

1986 Mark Harmon

1987 Harry Hamlin

1988 John F. Kennedy, Jr.

1989 Sean Connery

1990 Tom Cruise

1991 Patrick Swayze

1992 Nick Nolte

1993 Richard Gere na Cindy Crawford (Sexiest Couple Alive)

1994 Keanu Reeves

1995 Brad Pitt

1996 Denzel Washington

1997 George Clooney

1998 Harrison Ford

1999 Richard Gere

2000 Brad Pitt

2001 Pierce Brosnan

2002 Ben Affleck

2003 Johnny Depp

2004 Jude Law

2005 Matthew McConaughey

2006 George Clooney

2007 Matt Damon

2008 Hugh Jackman

2009 Johnny Depp

2010 Ryan Reynolds

2011 Bradley Cooper

2012 Channing Tatum

2013 Adam Levine

2014 Chris Hemsworth

2015 David Beckham

2016 Dwayne Johnson

2017 Blake Shelton

2018 Idris Elba

2019 John Legend

Klyian Mbappe wifuzwa bikomeye na Real Madrid ashobora guca agahigo ko kugurwa akayabo

By Nizeyimana Selemani

Ikipe ya Real Madrid biravugwa ko yiteguye gukora ibishoboka byose ikazana Umufaransa Kylian Mbappe i Santiago Bernabeu.

Ibinyamakuru bitandukanye birimo Le Parisien na CalcioMercato byatangaje ko iyi kipe y'ikigugu muri Esipanye yiteguye guhara asaga miliyoni 400 z'amayero kugira ngo igure uyu mukinnyi w'imyaka 20 y'amavuko ukinira Paris Saint-Germain.

Ibi biramutse bibaye uyu rutahizamu ufite impano idashidikanywaho yahita aca agahigo ko kuba umukinnyi wa mbere uguzwe amafaranga menshi ku isi kari gasanganywe Neymar ubwo yavaga muri Barcelona yerekeza muri PSG mu 2017 aguzwe amapawundi miliyoni 198.

Mbappe ashobora kuba umukinnyi wa mbere ku isi uguzwe amafaranga menshi

Hashize igihe kinini Mbappe bivugwa ko agomba kuzerekeza muri Esipanye, ibi byatangiye kunuganugwa kuva yatangira kwigaragaza ku ruhando mpuzamahanga ubwo yari akiri muri Monaco ku myaka 17 gusa y'amavuko.

Kugeza ubu amaze gutsinda ibitego 67 anatanga imipira 31 yabyaye ibitego mu mikino 104 gusa amaze gukina ndetse ubu abakurikiranira hafi bemeza ko ashobora kuzaba umukinnyi watsinze byinshi muri shampiyona y'Abarasansa muri uyu mwaka.

Zidane arifuza bikomeye Mbappe ngo aze afashe ubusatirizi bwa Real Madrid

Mbappe yari umukinnyi wazaga ku isonga mu bashakagwa na Zidane mu mpeshyi ishize aho yashakaga kumusimbuza Gareth Bale gusa byarangiye uyu musore agumye i Paris maze Real Madrid ibasha kugura Luka Jovic imukuye muri Eintracht Frankfurt na Eden Hazard yakuye muri Chelsea.

Kuba ikipe ya PSG nayo yifuza Umunya-Brazil, Vinicius Junior, ibi bishobora gutuma aya makipe yakwicara akaganira kuko nubwo uyu munya-Brazil yari yitezweho byinshi muri Real Madrid kuva yatangira kuyikinira mu mwaka w'imikino ushize, nyuma yaho Zidane agarutse ntiyakomeje kubona umwanya uhagije wo gukina aho muri uyu mwaka ubu amaze gukina imikino ine gusa abanje mu kibuga, indi itanu akinjira asimbuye.

Mbappe ashobora kubisikana na Vinicius Junior

Gusa mu byumweru bishize hagaragaye gyterana amagambo hagati y'Umuyobozi wa siporo muri PSG, Leonaldo n'umutoza Zinedine Zidane nyuma yaho uyu mutoza avuze ko inzozi za Mbappe ari ukuzakinira Real Madrid maze Leonaldo akamwiyama guhoza mu kanwa umukinnyi wabo.

  • November 13th 2019 at 09:05

U Rwanda rwashyikirije Uganda imibiri y'abaturage bayo barashwe bashaka kwinjiza magendu

By Nizeyimana Selemani

Kuri uyu wa Kabiri tariki ya 12 Ugushyingo 2019 ni bwo leta y'u Rwanda yashyikirije iya Uganda imirambo y'abaturage bayo babiri barashwe na polisi y'u Rwanda mu ijoro ryo ku wa Gatandatu rishyira ku Cyumweru tariki ya 10 Ugushyingo ubwo bageragezaga kwinjiza magendu mu gihugu.

Muri iki gikorwa cyo guha imirambo hari abayobozi bo ku mpande z'ibihugu byombi aho ku ruhande rw'u Rwanda hari Umuyobozi w'Akarere ka Nyagatare, Mushabe David Claudien ari kumwe n'Umuyobozi wa Polisi mu Ntara y'Iburasirazuba, ACP Hatari Emmanuel mu gihe ku ruhande rwa Uganda hari Komiseri w'Akarere ka Rukiga akanaba n'Umuyobozi w'Akanama k'Umutekano muri ako gace, Muhindo Pulkeria n'Umuyobozi wa Polisi mu Karere ka Rukiga, Sselunjoji Edda.

Byari biteganijwe ko uyu muhango utangira saa Yine z'amanywa ariko watangiye saa Tanu zirenga kuko habanje kurebwa niba koko iyo mirambo ari iya Job Ebyayishanga w'imyaka 32 na Bosco Tuheirwe w'imyaka 35 bombi bafite ubwenegihugu bwa Uganda.

Nkuko IGIHE cyabyanditse nyuma habayeho impaka ku rupapuro rw'ihererekanwa ry'imirambo Uganda ivuga ko ishaka urupapuro rwa Polisi rwerekana ko abo baturage barasiwe mu Rwanda nyuma y'isaha urwo rupapuro rwabonetse impande zombi zirusinyaho ubundi Uganda itwara imirambo y'abaturage bayo.

Ubwo abayobozi ku ruhande rw'u Rwanda basinyaga ku rupapuro rwemeza ko abo baturage barasiwe mu Rwanda

Umuyobozi w'Akarere ka Nyagatare, Mushabe David Claudien, yavuze ko Polisi y'u Rwanda yabanje guhagarika abo baturage bari bazanye magendu mu Rwanda banayicishije mu nzira zitemewe ngo bashaka kuyirwanya mu rwego rwo kwitabara irarasa hapfamo babiri abandi basubira inyuma ku butaka bwa Uganda.

Yakomeje avuga ko ibyabaye byasigiye impande zombi amasomo.

Ati "Kuri njye navuga ko ibyabaye hari isomo twabyigiyemo abaturage bacu yaba abo mu Rwanda na Uganda, dufite inzira zemewe n'amategeko bakwiye gucamo ariko hari bamwe batabyubahiriza dukwiye kubashishikariza kuzikoresha."

Yasabye abayobozi ba Uganda gukomeza kugira inama abaturage babo yo gukoresha inzira zemewe n'amategeko.

Abayobozi ku ruhande rwa Uganda ubwo basinyaga ko bakiriye imirambo y'abaturage babo barashwe bashaka kwinjiza magendu mu Rwanda banyuze ahatemewe

Umuyobozi wari uhagarariye Akarere ka Rukiga, Muhindo Pulkeria, yashimiye Leta y'u Rwanda ku bwo kubaha imirambo y'abaturage babo.

Yagize ati "Mbere na mbere twihanganishije abaturage ba Uganda n'abaturage ba Kamwezi ku bwo kubura abahungu babo gusa turashimira Leta y'u Rwanda yaduhaye imirambo yabo mu buryo bwiza tukaba twayakiriye mu buryo buzwi, gusa ntabwo kubica wari wo mwanzuro mwiza bari gufatwa bagafungwa.”

Yakomeje avuga ko ibihugu byombi bikwiye gukomeza gushyira imbere umubano mwiza nk'ibituranyi no gushishikariza abaturage babyo guhagarika ibikorwa bya magendu.


Nyuma yo guhabwa imirambo y'abaturage barasiwe mu Rwanda bashaka kwinjira binyuranyije n'amategeko, abahagarariye Uganda bahise basubira mu gihugu cyabo

Leta ya Uganda kandi yandikiye iy'u Rwanda ndetse inasohora itangazo ivuga ko yamaganye ibyo bikorwa by'iraswa ry'abaturage b'icyo gihugu bikozwe n'inzego z'umutekano z'u Rwanda.

Uganda ivuga ko yamaganye "mu magambo akomeye ashoboka" iyicwa ry'abaturage bayo bishwe n'inzego z'umutekano z'u Rwanda zibashinja gukora ubucuruzi bwa magendu ku mupaka usangiwe".

Iri tangazo rigira riti: "Icyo cyaha bacyekwaho ntabwo gishobora gusobanura ikoreshwa ry'imbaraga z'umurengera, [biriya] ni icyaha cy'abashinzwe umutekano b'u Rwanda ku basivile badafite intwaro ku mupaka duhuriyeho".

Uganda isaba ko hakorwa iperereza rihuriweho kuri ubwo bwicanyi, ababikoze bakabiryozwa.

Mu myaka 5 u Rwanda rwahaye Congo Kinshasa miliyari 1,2 kubera ingagi zayo zahimukiye

By Nizeyimana Selemani

Mu myaka 5 ishize Leta y'u Rwanda imaze gushyikiriza iya Congo-Kinshasa amafaranga y'u Rwanda asaga miliyari imwe na miliyoni 200 kubera umuryango w'ingagi w'icyo gihugu umaze hafi imyaka 15 wimukiye ku ruhande rw'u Rwanda.

Ni mu gihe hashize ukwezi kurenga umuryango w'ingagi z'u Rwanda nawo wimukiye ku ruhande rwa Uganda.

Ingagi zo mu misozi miremire, ni umwihariko w'agace k'ibirunga kazwi nka β€˜Virunga massive', gahuriweho n'ibihugu by'u Rwanda, Uganda na DRC.

Ni inyamaswa ziteye amatsiko, k'uburyo amashyushyu aba ari yose ku bagiye kuzisura ku nshuro ya mbere.

Mu byo ingagi zihuriyeho n'abantu, harimo kubaho bishingiye ku miryango kuko buri yose igira umuryango ibarizwamo.

Kugeza ubu mu miryango y'ingagi isurwa na ba mukerarugendo basura pariki y'igihugu y'ibirunga, harimo n'uwitwa Kwitonda waturutse muri RDC mu myaka 15 ishize.

Umuyobozi wa Pariki y'Igihugu y'Ibirunga, Uwingeri Prosper, avuga ko u Rwanda rumaze guha DRC miliyoni n'ibihumbi 300 by'amadorali ya USA, ni ukuvuga asaga miliyari imwe na miliyoni 200 z'amafaranga y'u Rwanda nk'uko biteganywa n'amasezerano ibihugu by'u Rwanda, Uganda na DRC bifitanye, avuga ko cyaba igihugu ingagi zikomokamo n'icyo zimukiyemo bigabana amadevize azitangwaho buri ruhande rugatwara 50%.

Yagize ati β€˜β€˜Ino parike tuyihuriyeho ari ibihugu 3, muri make turavuga ngo ingagi ziyibamo kimwe n'izindi nyamaswa nta mupaka zizi. Nko mu myaka 5 cyangwa 6 ishize twahaye DRC arenga miliyoni y'amadorali; buri mwaka cyangwa buri kwezi uko uwo muryango tuba twawukoresheje niko tugabana n'ayo mafaranga. Aho twatangiriye ayo masezerano muri 2006 buri mwaka twagiye tugabana, bityo bivuze ko n'iyo group ivuye mu Rwanda ikajya muri DRC cg Uganda birongera bikagenda bityo''.

Uwingeri avuga kandi ko yizeye ko igihugu cya Uganda cyizashyira mu bikorwa ayo masezerano, nyuma yaho umuryango w'ingagi 17 zikomoka mu Rwanda witwa Hirwa nawo wimukiye mu gice cya Uganda, ukwezi kurenga kukaba kwirenze.

Ati β€˜β€˜Amasezerano arahari kandi nk'uko twatanze urugero nta gihugu cyari cyagaragaza ko amasezerano abangamye. Nta mpungenge rwose ndetse tuzajya no kubafasha kuzimenyereza no kumenya izo ari zo kuko aho zigiye ntabwo bahita bamenya ngo iyi ni iyihe. Turabikora rero byose biri muri ayo masezerano noneho no gusangira umutungo bigakurikira.''

Parike 3 z'ibihugu by'u Rwanda, Uganda na DRC zihuriye ku birunga zifite ubuso bwa km2 zisaga 2000. Kugeza ubu zibarirwamo ingagi zisaga 600, aho u Rwanda rwihariye izirenga 50% cyakora ku buso buto bungana na hegitari 160.

RBA

  • November 13th 2019 at 01:24

T.I. asuzumisha ubusugi bw'umukobwa we w'imyaka 18 buri mwaka

By Jolie Chadia

Umuraperi Clifford Joseph Harris Jr. uzwi nka T.I yatangaje ko buri mwaka ajyana umukobwa we kwa muganga gusuzumisha ko akiri isugi.

Ibi yabitangarije mu kiganiro 'Ladies like us' ubwo yabazwaga niba kugeza ubu yari yaganiriza umukobwa we ubu ufite imyaka 18 y'amavuko ku byerekeranye n'ubuzima bw'imyororokere ndetse n'imibonano mpuzabitsina.

Mu gusubiza iki kibazo, T.I yavuze ko ibyo babiganira cyane ndetse ko ikirenze kuri ibyo, buri mwaka bajya kwa muganga gusuzumisha ko umukobwa akiri isugi. Ati "Ntitwabiganiriyeho gusa ahubwo tujya no kwa muganga buri mwaka kureba ko akiri isugi."

Umukobwa wa T.I. Deyjah Harris, akoreshwa ikizamini gisuzuma ubusugi buri mwaka

T.I yavuze ko ibi babitangiye ubwo umukobwa we yuzuzaga imyaka 16 y'amavuko, ndetse akaba yaranamusinyijishe urupapuro rumuhesha uburenganzira rwo kumenya uko ubuzima bwe buhagaze, ibi bikamuhesha uburenganzira bwo guhabwa icyemezo cyemeza ko umukobwa we ari isugi buri mwaka.

T.I. n'abakobwa be

Ibi ntibyavuzweho rumwe cyane cyane ku mbuga nkoranyambaga, aho benshi bashinja T.I kuba umubyeyi w'umunyagitugu ndetse ko ahohotera umukobwa we, amukoza n'isoni mu bantu, bituma n'umukobwa we ahita areka kumukurikirana (unfollow) ku mbuga nkoranyambaga zose.

Deyjah ntagikurikirana se ku mbuga nkoranyambaga

❌