WebRwanda.com

🔒
❌
There are new available articles, click to refresh the page.
Today — October 19th 2019Panorama

Mu mujyi wa Kigali hagiye kuba amavugurura azorohereza abagenda mu modoka rusange

By Editor

Urwego rw’igihugu ngenzuramikorere (RURA) rwatangiye imirimo yo gutangiza uburyo bushya bwo gutwara abagenzi mu buryo bwa rusange mu mujyi wa Kigali. RURA iravuga ko aya mavugurura agamije gutanga serivisi nziza kandi zijyanye n’igihe n’iterambere rirambye ry’umugi, ndetse no korohereza abagenzi kugera  iyo bajya badatinze mu nzira.

Aya mavugurura yo gutwara abagenzi mu mujyi wa Kigali azaba ageze ku kiciro cyayo  cya kabiri “Public Transport Generation Two” (PT-G2), uhereye ku kiciro cyiswe  PT-G0  aho mbere yo mu mwaka wa 2013 muri Kigali abagenzi batwarwaga mu buryo butari bufite amategeko abugenga ndetse nta n’uburyo bwo kugenzura uko abantu batwarwaga.   Buri muntu wese wabaga afite imodoka yayishyiraga mu muhanda agatwara abagenzi, bagatwarwa nabi kubera ko imodoka zari ntoya izi zitwa Mini Bus, bagatinda ku nzira, isuku nke yabaga muri izo modoka ndetse bamwe ntibagezwe aho bashakaga kugera.

Nyuma mu mwaka wa 2013 aricyo kiciro cyiswe PT-G1  habaye amavugurura aho RURA yatangiye gushyira muri gahunda uburyo bwiza bwo gutwara abagenzi buteguye neza kurusha ubwa mbere (PT-G0) ndetse RURA ikajya igenzura  uburyo bwo gutwara abagenzi mu buryo bwa rusange.

Kuri ubu RURA iravuga ko guhera muri Gicurasi umwaka utaha wa 2020 hazatangira ikiciro gishya kiswe PT-G2 kizamara imyaka itanu kikazarangira mu mwaka w’2025. Icyo kiciro kizarangwa n’amavugurura mu buryo bwo gutwara abagenzi  mu buryo bwa rusange hano mu mujyi wa Kigali cyane cyane kikazarangwa  n’ikoranabuhanga.

Ubwo yavugaga  kuri  iki kiragano gishya kuri uyu wa Kane tariki ya 17 Ukwakira, umuyobozi  mukuru wa RURA, Lt Col Patrick Nyirishema avuga ko muri iki kiciro cya PT-G2 hazaba amavugurura ajyanye n’igihe cyane cyane  mu ikorabuhanga aho buri modoka izaba ifite ingengabihe y’igihe igerera aho ikura abagenzi ndetse n’umugenzi akaba afite uburyo bw’ikoranabuhanga muri telefoni zigezweho, uburyo bumufasha kumenya igihe imodoka iri bugerere aho ihagarara kugira ngo ayijyemo atagombye guhaguruka mu rugo ngo ajye ku muhanda kuhahagarara amasaha ayitegereje.   Ngo ibi bizafasha ikigo ngenzura mikorere RURA kumenya niba imodoka yageze aho yagombaga gukura abagenzi ko yahagereye igihe ndetse ikahavira ku gihe cyagenwe.

Ubu buryo bushya kandi buzorohereza abashoferi  bakora mu bigo bitwara abagenzi aho bazaba bafite amasezerano y’akazi abagenga, bikabaha umutuzo n’umutekano mu kazi kabo, hazongerwa  umubare w’amasosiyete yatwaraga abagenzi  mu buryo bwa rusange hano muri Kigali binyuze mu  gupiganirwa amasoko, bikazatuma abantu bacika ku kugenda mu modoka zabo bwite kuko biri mu biteza umuvundo w’amamodoka mu mihanda.

Nyirishema avuga ko    ubu buryo buje gushimangira ishyirwa mu bikorwa ry’igishushanyo mbonera cy’Umujyi wa Kigali aho hazaba uburyo burambye bwo gutwara abagenzi mu mujyi wa Kigali  kandi bugezweho.

Yagize ati: “Twavuye kure  aho abagenzi batwarwaga mu buryo budasobanutse nta burengenzira bafite, ariko ubu tugeze ku cyiciro cya kabiri aho abagenzi bazajya batwarwa mu buryo bugezweho, kandi bafite uburenganzira, turifuza kugera aho igihugu kifuza kuba kigeze kandi tuzahagera buhoro buhoro. Kuva mu mwaka wa 2026  tuzatangira ikiciro cya  Gatatu PT-G3.”

Yakomeje avuga ko umujyi wa Kigali mu mwaka wa 2013 wahoze ufite ibyerekezo imodoka zitwara abagenzi zanyuragamo 41, ariko ubu kubera imihanda yagiye yubakwa myinshi  ubu ibyerekezo bimaze kugera kuri 80 mu mujyi wa Kigali.

Nyirishema yakomeje avuga ko kubera ikiragano gishya cyo gutwara abagenzi kizatangira umwaka utaha muri Gicurasi kizarangwa n’ikoranabuhanga nta mugenzi uzongera kugirana amakimbirane n’abashoferi kubera uburyo bw’ikoranabuhanga buzaba burimo.

Kuri ubu moto zibarirwa ku gipimo cya 60 ku ijana nk’ubryo bwo gutwara abagenzi mu mujyi wa Kigali, 34 ku ijana ni abatunze imodoka zabo bwite bakazifashisha mu ngendo, mu gihe ingendo mu buryo bwa rusange ndetse n’andi mamodoka manini  buri kimwe kiri ku gipimo cya 3 ku ijana.

Ubushakashatsi bugaragaza ko  muri  Kigali habarirwa imodoka  450 zitwara abagenzi mu buryo bwa rusange  mu gihe haba abagenzi  babarirwa mu 18,394. Kubwa Lt Col Nyirishema ngo imodoka ziri muri Kigali zirahagije ugereranyije n’abagenzi bahari ariko haracyari imbogamizi yo kwiyongera ku buryo bw’abantu bishakira ubundi buryo bwo kugenda, akizeza ko icyo kibazo kizakemurwa n’izi mpinduka nshya zigiye gutangira.

Ubwanditsi

Kamonyi/Kayenzi: Umukecuru w’imyaka 80 akurikiranweho ubufatanye mu bujura buciye icyuho

By Editor

Mu rukerera rwo kuri uyu wa Gatandatu tariki ya 12 Ukwakira 2019, Polisi y’u Rwanda ikorera mu murenge wa Kayenzi mu karere ka Kamonyi yafashe abasore  batandatu n’umukecuru umwe ufite imyaka 80 bamaze kwiba ibicuruzwa muri butike ya Gatete Janvier, umucuruzi mu isantere ya Kayenzi.

Polisi y’u Rwanda dukesha iyi nkuru itangaza ko uyu mukecuru akurikiranweho kuba yaranze gutanga amakuru y’aho ibicuruzwa biri nyamara mu gihe bariya basore babyibaga bagiye kubihisha mu nzu ye ndetse inzego z’umutekano zajya gusaka zikabisangamo. Gusa, uyu mukecuru ntabwo yafunzwe, arakurikiranwa ari iwe mu rugo.

Umuvugizi wa Polisi mu Ntara y’Amajyepfo Chief Inspector of Police (CIP) Sylvestre Twajamahoro, avuga ko mu rukerera rwa tariki ya 12 Ukwakira Polisi y’u Rwanda ubwo yari  mu gikorwa cy’umutekano yatabajwe n’umuturage w’umucuruzi mu isantere ya Kayenzi witwa Gatete Janvier avuga ko hari abajura bamaze gutobora inzu ye y’ubucuruzi bakamwiba ibicuruzwa n’amafaranga.   Ako kanya Polisi ifatanyije n’abanyerondo bahise bakurikirana bashobora gufata bariya basore uko ari batandatu n’uriya mukecuru.

CIP Twajamahoro yagize ati: “Umucuruzi  witwa Gatete Janvier yaradutabaje bihurirana n’uko twari tukiri mu bikorwa by’umutekano twari twarayemo, twahise dufatanya n’abanyerondo turakurikirana tubasha gufata bariya basore ndetse tunabasangana bimwe mu bicuruzwa bari bamaze kwiba.”

Umucuruzi avuga ko ibicuruzwa  yibwe ari  amajerikani  5 y’amavuta yo guteka,  imifuka 11 y’umuceri, amacupa 24 y’ikinyobwa kitwa Umuhuza, amacupa 12 y’inzoga ya  wisiki (Whisky), ndetse n’amafaranga y’u Rwanda ibihumbi bitandatu (6,000).

CIP Twajamahoro  avuga  ko abo bajura babigabanye hanyuma mu rugo rw’umukecuru hafatiwe umufuka umwe w’umuceri n’ijerikani imwe y’amavuta yo guteka.

Yaboneyeho gukangurira abaturage gukaza amarondo ndetse anasaba abacuruzi kujya bagira abazamu bararira amazu yabo y’ubucuruzi mu rwego rwo kwicungira umutekano.

Yagize ati: “Icyo dukangurira abaturage ni ugukaza amarondo kuko no kugira ngo bariya bafatwe abari baraye irondo babigizemo uruhare kuko bafatanyije na Polisi barabatanga tanga barafatwa, abacuruzi nabo turabasaba kujya bagira abazamu barinda amazu yabo y’ubucuruzi mu rwego rwo kwicungira umutekano.”

Yakomeje agira inama  urubyiruko rw’insoresore birirwa bifashe mu mifuka bwakwira bakajya kwiba ibya rubanda gukura amaboko mu mifuka bagashaka imirimo ibateza imbere bakareka kwiba.

Ati: “Ruriya rubyiruko turarugira inama yo kwibumbira mu makoperative rugakora ndetse ntibabura abafatanyabikorwa igihe cyose bishyize hamwe bagakora, inaha  hari ibikorwa byinshi bajyamo bagakora batiriwe bajya kwiba.”

Abafashwe bashyikirijwe Urwego rw’Igihugu rw’Ubugenzacyaha(RIB) kugira ngo bakurikiranwe ku  cyaha bakoze. Ni mu gihe hakirimo gushakishwa aho  bahishe ibindi bicuruzwa bibye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange ingingo yaryo ya   166  ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2), ihazabu y’amafaranga y’u Rwanda atari munsi ya miliyoni imwe (1.000.000Frw) ariko atarenze miliyoni ebyiri (2.000.000Frw), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ingingo ya 167 ivuga ko ibihano ku cyaha cyo kwiba byikuba kabiri (2) iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira.

Rwanyange Rene Anthere

Hari abana n’urubyiruko bahura n’uburwayi bwo mu mutwe kubera amakimbirane yo mu ngo n’ibiyobyabwenge

By Editor

Amakimbirane yo mu ngo ndetse no gukoresha ibiyobyabwenge bigira uruhare runini ku ihungabana ry’abana. Ibi kandi ni kimwe mu bishobora gutera uburwayi bwo mu mutwe nk’uko ubushakshatsi bubigaragaza.

Ku wa 10 Ukwakira 2019, mu karere ka Nyamagabe, ubwo hazirikanwaga abahuye n’ikibazo cy’uburwayi bwo mu mutwe, Umuyobozi w’Ikigo k’Igihugu kita ku buzima (RBC), Dr Nsabimana Sabin yavuze ko ubushakashatsi bwagaragaje ko mu bitera abana n’urubyiruko uburwayi bwo mu mutwe higanjemo agahinda gakabije, kwigunga, amakimbirane yo mu ngo no gukoresha ibiyobyabwenge n’ibisindisha.

Dr Nsabimana agira ati “…si ibyo gusa kuko hari n’amafirime y’urukozasoni urubyiruko rureba harimo n’iz’imirwando na byo bibagiraho ingaruka zikomeye; aho usanga bamwe barataye amashuri bikabaviramo kwishora mu busambanyi bakiri bato, abandi bariyahura kubera kutamenya ko bafite ikibazo ngo babavuze hakiri kare.”

Umuyobozi w’Ikigo k’Igihugu kita ku buzima (RBC), Dr Nsabimana Sabin.

Yakomeje agaragaza ko 20 ku ijana y’abana n’urubyiruko bafite uburwayi bwo mutwe, na ho 10 ku ijana bafite hagati y’imyaka 10 na18 nabo bararwaye. Ikindi ni uko kimwe cya gatatu (1/3) cy’abarokotse Jenoside yakorewe Abatutsi bafite ibibazo byo mu mutwe biturutse ku gahinda gakabije n’ihungabana.

Dr Kayiteshonga Yvonne, uyobora ishami  rishinzwe gukurikirana abafite uburwayi bwo mu mutwe muri RBC, yavuze ko bitewe n’ubuzima  abanyarwanda babayemo hagenda hagaragara ikibazo byo mu mutwe.

Asaba abantu kugira urukundo, bakirinda amakimbirane mu ngo ya hato na hato. Agira ati “ikibazo cyo mu mutwe n’ibintu bisanzwe kuri buri wese, ariko biba byiza iyo umuntu yivuje hakiri kare kuko ni indwara ivurwa igakira iyo yamenyekanye hariri kare. Duharanire ko abana bacu bahura n’icyabateraa kurwara mu mutwe.”

Dr Kayiteshonga Yvonne, uyobora ishami rishinzwe gukurikirana abafite uburwayi bwo mu mutwe muri RBC.

Guverineri w’Intara y’Amagepfo, CGP Gasana Emmanuel, asaba ababyeyi kuba hafi y’abana babo  babarinda kwishora mu biyobyabwenge, anabasaba kandi kwirinda amakimbirane mu ngo, kuko na byo biri mu bitera ingaruka mbi ku bana.

Yibukije ababyeyi kujya bamenya imyigire y’abana babo kandi ibibazo bikajya biganirwaho mu nzego zose ariko cyane cyane mu mugoroba w’ababyeyi. Agira ati “Urubyiruko rwangirika tureberera, ariko rero nta mpamvu yo kubarekera mu biyobyabwenge n’ibindi byose byakwangiza ubuzima bwabo.”

Guverineri w’Intara y’Amagepfo, CGP Gasana Emmanuel.

Mu karere ka Nyabagabe habarurwa abafite ibibazo by’uburwayi bwo mu mutwe bagera kuri magana akenda (900). Abaturage basabwa kwirinda kubaha akato, ahubwo bakwiye kubaba hafi.

Aragirimana Clever uhagarariye ishyirahamwe ry’abarwayi bo  mutwe avuga ko bashinzwe gukusanya uburwayi bose ndetse n’abari ku muhanda  kugira ngo bavurwe kandi bagerageze kwiteze imbere. Basaba ko na bo bakwiye kugira ijambo kugira ngo bage bagaragaza akarengane kabo kandi bumvwe.

Uwabega Chantal, utuye mu karere ka Nyamagabe, avuga ko abona ibibazo byinshi biterwa n’uko ababyeyi benshi bahugira mu gushaka imibereho, bigatuma bamwe mu bana bararuka bakishora mu biyobyabwenge. Avuga ko umwana we yabinyoye kuko batajyaga bamuganiriza, bikaba byaranamuviriyeko kwiyahura kubera amakimbirane yari mu muryango wabo.

Uyu mwaka insanganyamatsiko yo kwizihiza Umunsi Mpuzamahanga w’ubuzima bwo mu mutwe, igira iti “Twite ku buzima bwo mu mutwe bw’abana n’urubyiruko”.

Abajyanama b’ubuzima bo mu karere ka Nyamagabe bitabiriye umunsi mpuzamahanga w’ubuzima bwo mu mutwe.

Munezero Jeanne d’Arc

Kirehe: Umuturage yafashwe aha umupolisi ruswa y’amafaranga ibihumbi mirongo itatu

By Editor

Ashatse kugombora ibicuruzwa bya magendu byari byafashwe, ku wa 8 Ukwakira 2019, umuturage utuye mu murenge wa Gahara yashatse guha ruswa y’amafaranga ibihumbi mirongo itatu (30.000Frw) Komanda wa Polisi muri Sitasiyo ya Polisi ikorera mu murenge wa Kigarama,

Umuvugizi wa Polisi mu Ntara y’Iburasirazuba Chief Inspector of Police (CIP) Hamdun Twizeyimana avuga ko mu ijoro ryo ku itariki ya 07 Ukwakira 2019, aribwo  abanyerondo bo mu mudugudu wa Gasenyi mu ka kagari ka Nyakebera mu murenge wa Kigarama, bafashe abasore bane (4) bambutsa rwihishwa  imifuka 40 irimo amacupa yo gupakiramo inzoga zitemewe bivugwa ko ari za Nduwayezu Noel wafashwe atanga ruswa.

Aba basore  bakuraga aya macupa mu gihugu cya Tanzaniya bayazana mu Rwanda, bamaze gufatwa amakuru yageze kuri Nduwayezu wari wabahaye akazi ko kuyambutsa atangira gushaka uko yahura n’umuyobozi wa Polisi kugira ngo amuhe ruswa amuhe iyo mifuka irimo amacupa ndetse n’indi  igera kuri 80 yari ikiri muri Tanzaniya  ngo nayo ayireke yinjire mu gihugu.

CIP Twizeyimana yagize ati: “Nduwayezu  yamaze kumenya ko ibicuruzwa bye byafashwe ahamagara umuyobozi w’umudugudu ngo abahuze n’umuyobozi   wa Polisi mu murenge wa Kigarama, bwarakeye barahura, amwemerera amafaranga; ariko kuko umuyobozi wa Polisi ku murenge yari yamaze kubivugana n’abandi bapolisi ko hari umuntu ugiye kumuha ruswa, bahise baza bamufatira mu cyuho amaze kuyamuha.”

Umuvugizi wa Polisi mu Ntara y’Iburasirazuba yaboneho kongera gukangurira abaturage kwirinda gutanga ruswa, ariko cyane cyane kuyiha abapolisi, kuko nibo bashinzwe kuyirwanya. Yakomeje asaba  abaturage gukora ibintu binyuze mu mucyo aho guhora biringiye kuzatanga ruswa.

Yagize ati: “Nta kuntu wajya guha ruswa umupolisi kandi ubizi ko muri iki gihugu ruswa ari ikizira, byongeye ukayiha  abapolisi aribo bashinzwe kuyirwanya, uzajya ayitanga azajya ahita afatwa.  Turashishikariza abaturage gukora ibintu binyuze mu mucyo bakirinda kwiringira kuzatanga ruswa kugira ngo bakore ibinyuranyije n’amategeko.”

Inshuro nyinshi Polisi y’u Rwanda ikangurira abaturarwanda kwirinda gutanga  ruswa, ikabakagurira kunyura mu nzira zemewe n’amategeko kugira ngo bahabwe  ibyo bemererwa n’amategeko.  Abaturage bibutswa ko mu Rwanda ruswa  itihanganirwa ku gipimo cya zero kuko uyitanze n’uyakira bose  bahanwa n’amategeko.

Nduwayezu Noel  yashyikirijwe urwego rw’igihugu rw’ubugenzacyaha (RIB) ikorera kuri sitasiyo  ya Kirehe  kugira ngo akorerwe  dosiye.

Itegeko nimero  54/2018 ryo kuwa 13/08/2018 rirwanya ruswa rivuga ko  igikorwa icyo ari cyo cyose gikorewe mu nzego za Leta, iz’abikorera, sosiyete sivili, n’imiryango mpuzamahanga ikorera cyangwa ishaka gukorera mu Rwanda, kigamije gusaba, kwakira cyangwa gutanga indonke mu buryo bunyuranyije n’amategeko hagamijwe kwigwizaho umutungo udashobora gusobanura inkomoko yawo cyagwa gukora ishimishamubiri kugira ngo hakorwe umurimo cyangwa igikorwa mu buryo bunyuranije n’amategeko byaba bikozwe na nyir’ubwite cyangwa binyujijwe ku wundi muntu. Ruswa igaragarira muri kimwe mu bikorwa bikurikira

Ingingo ya 4 y’iryo tegeko ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose.  Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

Ubwanditsi

Itangazo ry’Ibyemezo by’Inama y’Abaminisitiri idasanzwe yo ku wa 10/10/2019

By Editor

None ku wa Kane, tariki ya 10 Ukwakira 2019, Inama y’Abaminisitiri idasanzwe yateraniyemuri Village Urugwiro, iyobowe na Nyakubahwa Perezida wa Repubulika, Paul KAGAME.

  1. Inama y’Abaminisitiri yemeje imyanzuro y’Inama y’Abaminisitiri yo ku itariki ya 29 Nyakanga 2019.
  2. Ashingiye ku bubasha ahabwa n’Amategeko, Nyakubahwa Perezida wa Repubulika yamenyesheje Inama y’Abaminisitiri ko yahaye imbabazi abagororwa mirongo itanu na babiri (52) bari barakatiwe n’inkiko kubera icyaha cyo kwihekura no gukuramo inda.
  3. Inama y’Abaminisitiri yemeje imishinga y’amategeko ikurikira:
  • Umushinga w’itegeko ryemera kwemeza kuba kimwe mu bihugu bihuriye ku masezerano mpuzamahanga yerekeye gushyira ibimenyetso ku bintu biturika bikozwe muri pulasitiki kugira ngo bitahurwe, yakorewe i Montréal ku wa 1 Werurwe 1991;
  • Umushinga w’itegeko ryemera kwemeza kuba kimwe mu bihugu bihuriye ku masezerano mpuzamahanga arebana n’ikurwaho ry’ibikorwa binyuranyije n’amategeko byabangamira umutekano w’iby’indege za gisivili, yakorewe i Beijing ku wa 10 Nzeri 2010;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ku masezerano mpuzamahanga yerekeye ikurwaho ry’ifatira ry’indege rinyuranyije n’amategeko, yakorewe i Beijing ku wa 10 Nzeri 2010;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ahindura amasezerano mpuzamahanga yakorewe i Montréal ku wa 4 Mata 2014, ku byaha n’ibindi bikorwa bikorewe mu ndege;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ahindura amasezerano mpuzamahanga mu by’indege za gisivili, yashyiriweho umukono i Montréal ku wa 6 Ukwakira 2016;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ahindura amasezerano mpuzamahanga mu by’indege za gisivili, yashyiriweho umukono i Montréal ku wa 6 Ukwakira 2016.
  • Inama y’Abaminisitiri yemeje Iteka rya Perezida ryemera kwemeza burundu amasezerano yakorewe i Moscow ku wa 5 Ukuboza 2018, hagati ya Guverinoma ya Repubulika y’u Rwanda na Guverinoma y’Uburusiya, ku bufatanye mu rwego rw’ikoreshwa ry’ingufu za Nikeleyeri mu buryo bugamije amahoro.
  1. Inama y’Abaminisitiri yemeje amateka ya Minisitiri w’Intebe akurikira:
  • Iteka rya Minisitiri w’Intebe rivana ubutaka buherereye mu Karere ka Rubavu buri mu kibanza gifite UPI: 3/03/04/05/1069, mu mutungo rusange wa Leta, rikabushyira mu mutungo bwite wayo;
  • Iteka rya Minisitiri w’Intebe rishyiraho Bwana HABIMANA Donathna Madamu UWASE Alicenk’Abashinjacyaha ku Rwego Rwisumbuye;
  • Iteka rya Minisitiri w’Intebe rishyiraho Lieutenant MUKAMANA Christinenk’ Umushinjacyaha wa Gisirikare;
  • Iteka rya Minisitiri w’Intebe ryirukana burundu mu bakozi ba Leta, Madamu MUKAKARANGWA Francisca Emmanuelwari Umuyobozi w’Ishami rishinzwe guhuza ibikorwa bya SACCOs mu Kigo cy’Igihugu cy’Amakoperative (RCA) kubera amakosa akomeye yakoze mu kazi.
  1. Inama y’Abaminisitiri yemeje amateka ya Minisitiri akurikira:
  • Iteka rya Minisitiri ryemeza ifungurwa ry’agateganyo ry’abagororwa ibihumbi bibiri na magana ane na mirongo itanu n’umwe (2 451) babisabye kandi bakaba bujuje ibiteganywa n’amategeko;
  • Iteka rya Minisitiri rishyiraho Lt UMUSINDI Oliviernk‘Umwanditsi w’Urukiko mu Rukiko Rukuru rwa Gisirikare;
  • Iteka rya Minisitiri ryemerera Ishuri rikuru ry’Ubuhinzi n’Ubworozi (RICA) gutangira gukora nk’ishuri rikuru ryigenga.
  1. Inama y’Abaminisitiri yemeje ko aba bakurikira bahagarira ibihugu byabo mu Rwanda ku rwego rw’Abambasaderi:
  • Bwana ABDULLA MOHD A.Y.AL-SAYED: Ambasaderi wa Leta ya Katari mu Rwanda ufite ikicaro i Kigali;
  • Bwana MARTIN KLEPETKO: Ambasaderi wa Repubulika ya Cekisolovaliya mu Rwanda ufite ikicaro iNayirobi;
  • Madamu RIITTA SWAN: Ambasaderi wa Repubulika ya Finilande mu Rwanda ufite ikicaro i Dar es Salaam;
  • Bwana SLAIMAN ARABIAT: Ambasaderi w’Ubwami bwa Yorudaniya mu Rwanda ufite ikicaro i Nayirobi.
  1. Inama y’Abaminisitiri yashyize mu myanya abayobozi ku buryo bukurikira:
  • Mu Kigo k’Igihugu cy’Amahugurwa mu by’Imicungire y’Abakozi n’Umutungo(RMI)

– Bwana MUKWIYE Norbert: Director of administration and finance unit;

– Madamu UZAMUKUNDA Christine:Director of ICT and e- learning unit.

  • Mu Kigo k’Igihugu cy’Ubushakashatsi n’Iterambere mu byerekeye Inganda (NIRDA)

– Bwana KAGERUKA Hurbert: Director of laboratory unit;

– Bwana MBARAGA Nkejuwimye Serge: Director of technology monitoring and knowledge management unit.

  • Mu Ishuri Rikuru ry’u Rwanda ry’Imyuga n’Ubumenyingiro/NGOMA (RP/IPRC-NGOMA)

BwanaMURINDAHABI Jean de Dieu: Director of research, consultancy and  production unit.

  • Mu Ishuri Rikuru ry’u Rwanda ry’Imyuga n’Ubumenyingiro/KIGALI (RP/IPRC-KIGALI)

Bwana RWUMUKARAGO Alain: Director of research, consultancy and   production unit.

  1. Mu bindi.
  • Minisitiri muri Perezidansi ya Repubulika yamenyesheje Inama y’Abaminisitiri ko ukwezi kwahariwe kuzirikana Ubumwe n’Ubwiyunge kwatangiye ku itariki ya mbere Ukwakira kukazasozwa ku ya 31 Ukwakira 2019. Insanganyamatsiko y’uyu mwaka ni “Imyaka 25 mu nzira y’Ubumwe n’Ubwiyunge: Ubumwe bwacu, amahitamo yacu.”
  • Minisitiri w’Imari n’Igenamigambi yamenyesheje Inama y’Abaminisitiri ko:

– Ibirori by’umunsi wo gushimira Abasora bizabera i Kigali mu Intare Conference Arena ku wa 22 Ugushyingo 2019, ku nsanganyamatsiko igira iti “Dusore Neza, Twubake u Rwanda Twifuza.’’

– Kuva tariki ya 23 kugeza 31 Ukwakira 2019, ari icyumweru cyahariwe kuzigama. Insanganyamatsiko ni: “Izigamire ugire ejo heza”, ikaba yuzuzanya na gahunda y’ubwizigame bw’igihe kirekire/EJO HEZA.

  • Minisitiri w’Ubucuruzi n’Ingandayamenyesheje Inama y’Abaminisitiri ko Umuryango Mpuzamahanga w’Amakoperative uzakorera inama yawo Mpuzamahanga mu Rwanda kuva tariki ya 14 kugeza ku ya 17 Ukwakira 2019, muri Kigali Convention Center.
  • Minisitiri w’Ibidukikije yamenyesheje Inama y’Abaminisitiri ko:

– Igihembwe cyo gutera amashyamba cya 2019/2020 no kwizihiza isabukuru ya 44 y’Umunsi wo gutera amashyamba bizaba ku itariki ya 09/11/2019 bikazabera mu Murenge wa Rukumberi, mu Karere ka Ngoma. Insanganyamatsiko y’uyu mwaka ni “Amashyamba ni inkingi y’imibereho myiza y’abaturage’’.

– Kuva ku tariki ya  8 kugeza ku ya 11 Ukwakira 2019 mu Rwanda hari kubera inama igamije kurebera hamwe uburyo bushya bwo gukomeza kwita ku bidukikije no guteza imbere inganda muri Afurika.

–      Kuva muri Kanama 2019, u Rwanda rwabaye umunyamuryango w’Ihuriro rigamije kugabanya ikoreshwa rya Karubone (Carbon Neutrality Coalition).

  • Minisitiri w’Uburinganire n’Iterambere ry’Umuryango yamenyesheje Inama y’Abaminisitiri ko:

–      Ku itariki ya 11 Ukwakira 2019, u Rwanda ruzizihiza Umunsi Mpuzamahanga w’umwana w’Umukobwa muriKigali Convention Center. Insanganyamatsiko ni: “Ntegurira ejo heza undinda gusambanywa.”

–      Ku itariki ya 15 Ukwakira 2019, u Rwanda ruzizihiza Umunsi Mpuzamahanga w’Umugore wo mu cyaro. Insanganyamatsiko ni:”Umuryango utekanye kandi uteye imbere.” Ku rwego rw’Igihugu, ibirori byo kwizihiza uyu munsi bizabera mu Murenge wa Byumba mu Karere ka Gicumbi;

–      Kuva tariki ya 25 kugeza ku ya 27 Ugushyingo 2019, u Rwanda ruzakira Inama Mpuzamahanga k’uburinganire n’ubwuzuzanye bw’abagore n’abagabo izabera muri Kigali Convention Center.

  • Minisitiri w’Ubuzima yamenyesheje Inama y’Abaminisitiri ko:

– U Rwanda rurateganya gutangiza ubukangurambaga bugamije gukingira icyorezo giterwa na Virusi ya Ebola (EBV). Hazakingirwa abantu bakuru, ingimbi n’abangavu ndetse n’abana bafite imyaka 2 batuye hafi y’aho icyo cyorezo cyagaragaye.

– Ku itariki ya 5 Ukuboza 2019, u Rwanda ruzatangiza ku mugaragaro Ikigo kivura kanseri mu Bitaro bya Gisirikare.

  • Minisitiri w’Ibikorwa by’Ubutabazi yamenyesheje Inama y’Abaminisitiri kotariki ya 31 Ukwakira 2019 u Rwanda ruzizihiza Umunsi Mpuzamahanga wo kugabanya ingaruka ziterwa n’ibiza. Ku rwego rw’Igihugu, umuhango uzabera mu Murenge wa Karama, Akarere ka Kamonyi.
  • Minisitiri w’Urubyiruko yamenyesheje Inama y’Abaminisitiri kokuva tarikiya 9 kugeza ku ya 11 Ukwakira 2019mu Rwanda hari kubera inama ya Youth Connekt Africa Summit 2019.
  • Minisitiri w’Ubuhinzi n’Ubworozi yamenyesheje Inama y’Abaminisitiri ko ku itariki ya 31 Ukwakira 2019 u Rwanda ruzizihiza Umunsi Mpuzamahanga w’Ibiribwa, uzaberamu Murenge wa Nyabirasi mu Karere ka Rutsiro. Insanganyamatsiko ni: “ Ibikorwa byacu nibyo shingiro ry’ejo hazaza. Indyo yuzuye mu isi izira inzara.”
  • Umuyobozi bw’Ikigo gishinzwe Mine, Peterori na Gazi akaba n’umwe mu bagize Guverinoma yamenyesheje Inama y’Abaminisitiri ko kuva tariki ya 28 kugeza 29 Ukwakira 2019, muri Kigali Convention Center, hazabera inama ya mbere y’Ihuriro ry’Ibihugu bigize Afurika y’Iburasirazuba n’iyo Hagati bicukura amabuye y’agaciro.

Iri tangazo ryashyizweho umukono na

KAYISIRE Marie Solange

Minisitiri mu Biro bya Minisitiri w’Intebe Ushinzwe Imirimo y’Inama y’Abaminisitiri

Amakuru adahagije atuma bamwe mu bimurwa kubera inyungu rusange bataka akarengane

By Editor

Kutagira amakuru ahagije ku “Nyungu rusange” hamwe nicyo bakora igihe batanyuzwe n’igenagaciro ryakozwe ni zimwe mu mpamvu zituma bamwe bimuwe ku mpamvu z’inyungu rusange basiragira mu nzego z’ubuyobozi zitandukanye bataka akarengane.

Itegeko n° 32/2015 ryo ku wa 11/06/2015 ryatangajwe mu Igazeti ya Leta ya Repubulika y’u Rwanda n°35 yo ku wa 31/8/2018 ryerekeye kwimura abantu ku mpamvu z’inyungu rusange, riteganya ibigenderwaho ngo abantu bimurwe kubw’inyungu rusange.

Bamwe mu baturage twaganiriye bavuze ko kutamenya ibikubiye muri iryo tegeko bituma hari abatamenya ingingo zibarengera.

Bizumuremyi Damas wo mu murenge wa Byumba mu karere ka Gicumbi, avuga ko ubwo hatangiraga imirimo yo gukora umuhanda Base –Gicumbi mu mwaka wa 2016, kuva ubwo kugeza ubu atarahabwa ingurane y’imitungo ye, ndetse atazi igenagaciro yakorewe.

Ati “Sinanyuzwe n’igenagaciro ryakozwe kuko bampaga amafaranga adahwanye n’imitungo yanjye. Nyuma y’umwaka batubariye, nibwo najyanye ikibazo mu nzego zitandunye, guhera ku kagari kugera ku karere ariko nabuze undenganura, kuko bambwiraga ko natinze kugaragaza ikibazo cyanjye, ngo iminsi itegeko riteganya yararenze; kandi njye sinzi ibiri muri iryo tegeko. Sinzi niba ririmo n’ingingo yandengera.”

Abaturage bo mu Karere ka Rutsiro mu murenge wa Rusebeya, mu tugari twa Rubonde na Mukura bakomwe na Pariki ya Gishwati-Mukura, bo bavuga ko hashize imyaka itatu babwiwe ko hari imitungo yabo izajya mu gice cyahariwe Pariki, bakaba barabujijwe no kugira igikorwa kirambye bakorera ku butaka bwabo.

Nyirahabineza Rosalie ati “Twari dufite imirima twahingagamo imyaka itandukanye ikadutungira imiryango, none hashize imyaka itatu bataraduha ingurane. Hari ibihingwa tutemerewe guhinga. Abayobozi batubwiye ko n’inzu dutuyemo tuzazimurwamo kubera inyungu rusange. Twategereje ingurane twarahebye.”

“Abatamenya amakuru ni abatitabira inama z’abaturage”

Umukozi ushinzwe ubutaka mu karere ka Gicumbi, Sinumvayabo Emmanuel, avuga iyo hagiye kuba igikorwa cyo kwimura abaturage ku mpamvu z’inyungu rusange, ubuyobozi bubibamenyesha mu nama rusange.

Ati “Dukorana inama n’abaturage tukabibasobanurira, abo bavuga ko nta makuru baba bafite ni babandi batitabira inama. Abo bandi na bo bavuga ko batanyuzwe n’igenagaciro, icyo nahamya ni uko abafite ibikorwa aho uriya muhanda ugomba kunyura bose batarishyurwa, ariko ntawe ndabona uvuga ko atanyuzwe n’igenagaciro ryakozwe.”

Ikindi kifuzo cy’abaturage ni uko igihe bagiye kwimurwa n’umushoramari, bajya biyumvikanira na we ku ngurane, hatagize urundi rwego rubajya hagati.

Umukozi w’Ikigo cy’Igihugu gishinzwe imiturire (RHA) ushinzwe kwimura abantu ku mpamvu zijyanye n’inyungu rusange, Kobukye Frank, avuga ko inshingano zo kumenyesha abaturage ibirebana n’ibikorwa by’inyungu rusange bikorwa n’Akarere aho icyo gikorwa giherereye bafatanyije n’urwego rwimura, kandi ko utanyuzwe n’igenagaciro ryakozwe ajurira.

Ati “Itegeko rivuga ko kuvuguruza agaciro kahawe ubutaka n’ibyabukoreweho bikorwa mu gihe kitarenze iminsi irindwi nyuma y’uko urwego rwimura rwemeje raporo yakozwe n’abagenagaciro.”

Yavuze ko ku ndishyi ikwiye ko Ingingo ya 39 ivuga ko hashingiwe ku biciro biri ku isoko, uwimurwa ahabwa n’indishyi y’ihungabana ritewe no kwimurwa ingana na 5 ku ijana by’ingurane agomba guhabwa. Ibi ni uburenganzira bw’uwimurwa kandi twizeye ko bwubahirizwa.

Uyu muyobozi yanavuze ko kuba abaturage bakwiyumvikanira n’umushoramari ushaka kubimura hashyirwa mu bikorwa igishushanyo mbonera byemewe, gusa batumvikanye, imihango irebana no kwimura abantu ku mpamvu z’inyungu rusange irakurikizwa.

Itegeko risobanura ko kwimura abantu ku nyungu rusange bikorwa na leta, ibigo bya Leta n’inzego z’ibanze zifite ubuzima gatozi bwo gukura umuntu mu mutungo we ku mpamvu z’inyungu rusange, ariko habanje gutangwa indishyi ikwiye.

Emma-Marie Umurerwa

Gicumbi: Hamenwe litiro zirenga 1000 za Kanyanga n’ibindi biyobyabwenge

By Editor

Buri wa kabiri mu gihugu hose haba inteko rusange z’abaturage, bakaganiriramo ibintu bitandukanye byiganjemo umutekano, iterambere n’imibereho myiza, bakanahakemurira ibibazo bitandukanye ndetse bakanavuga n’ibitagenda neza muri rusange bagafatira ingamba hamwe zo kubikemura. Akenshi muri izo nama abanturage baba basuwe n’abayobozi batandukanye

Nk’uko tubikesha Polisi y’u Rwanda, ku wa Kabiri tariki ya 08 Ukwakira 2019, Umuyobozi w’Akarere ka Gicumbi, Ndayambaje Felix, yifatanyije n’abaturage bagera ku 1, 500 bo mu mirenge ya Cyumba na Kaniga mu nteko rusange y’abaturage ari kumwe n’Umuvugizi wa Polisi mu ntara y’Amajyaruguru, Chief Inspector of Police (CIP) Alexis Rugigana. Aba bayobozi baganiriye n’abaturage ku ngingo zitandukanye  nyuma yo kuganira habaye  igikorwa cyo kumenera mu ruhame ibiyobyabwenge  bakanakangurirwa  kubyirinda.

Ibiyobyabwenge byamenwe  birimo Kanyanga litiro 1034, Urumogi  udupfunyika 49.063, Zebra amapaki 1935, Chief Warage amapaki 31, Blue sky amapaki 407, African gin amapaki 35, Chase vodka amapaki 2000, Mayirungi amapaki 486, Cliff  amaduzeni 35, Akeza nyako litiro 1,5 na Kabaruka ibiro 25. Ibi byose bikaba byarafashwe mu gihe kingana n’amezi abiri (2) bifatiwe mu mirenge ya Cyumba na Kaniga, bifatanwa abantu  bagera ku 120.

Umuyobozi w’akarere ka Gicumbi Ndayambaje Felix, nyuma yo kumena ibi biyobyabwenge mu ruhame yasabye abaturage kubyirinda no kubirwanya kuko nta cyiza na kimwe cyabyo.

Yagize ati: “Ingaruka z’ikoreshwa ry’ibiyobyabwenge ni ukugira uburwayi, guhomba ayo wabishoyemo, gukora ibyaha bitandukanye umutekano muke mu baturage, gucibwa amande ndetse no gufungwa kubabifatanwe. Ni ku bw’iyo mpamvu dusaba buri wese ubigiramo uruhare guca ukubiri nabyo, kuko n’ingamba zo gufata ababyishoramo zakajijwe.”

Yabasabye kwirinda kwambuka umupaka batabifitiye uburenganzira cyangwa guca mu nzira zitagenwe kuko ari icyaha gihanwa n’amategeko kandi ko uzagifatirwamo wese azabihanirwa. Aha yababwiye ko abitwikira ijoro bakajya gutunda ibi biyobyabwenge bibwirako bihishe inzego z’umutekano ko bakwiye kubizinukwa kuko nta kabuza batazabura gufatwa kandi bakabihanirwa.

Umuvugizi wa Polisi mu Ntara y’Amajyaruguru CIP Rugigana, nawe yibukije abaturage ko kurwanya ibiyobyabwenge bitareba inzego z’umutekano gusa cyangwa abandi bantu ko  n’abaturage ubwabo bagomba kubigiramo uruhare.

Yagize ati: “Ingaruka z’ikoreshwa ry’ibiyobyabwe ntabwo zigera k’ubikoresha gusa cyangwa ku muryango we gusa, ahubwo zigera no ku muryango nyarwanda muri rusange. Kuko ababikoresha iyo bamaze kubinywa nibo bafata abana ku ngufu, nibo bavamo abajura, nibo bateza urugomo, nibo bateza amakimbirane mu ngo no mubaturanyi, nibo bakubita bakanakomeretsa n’ibindi bitandukanye. Niyo mpamvu kubirwanya no kubikumira bisaba uruhare n’imbaraga bya buri wese.”

Aba bayobozi bose basoje bashimira abaturage bagize uruhare mu ifatwa ry’ibi biyobyabwenge, banaboneraho no kubasaba kujya bahanahana amakuru hagati yabo no kuyamenyesha inzego z’umutekano cyane cyane Polisi kugira ngo ibyaha bikumirwe bitaraba.

Panorama

Etincelles iyoboye urutonde rwa Shampiyona 2019/2020

By Editor

Ku munsi wa kabiri wa Shampiyona y’Umupira w’amaguru mu Rwanda, ikipe ya Etincelles iyoboye urutonde n’amanota atandatu (6) kuko yatsinze imikino yombi uko ari ibiri.

Ikipe ya Rayon Sports, Police FC, APR FC na Gasogi FC ziza ku mwanya wa kabiri n’amanota ane (amanota ane (4). Bugesera FC, Marines FC na Kiyovu ziza ku mwanya wa gatatu n’amanota atatu (3). Ku mwanya wa kane haza Mukura VS na Musanze FC zifite amanota abiri (2). Ku mwanya wa gatanu haza Sunrise FC, Espoir na AS Kigali zifite inota rimwe (1) na ho ku myanya ya haza amakipe yatsinzwe imikino yambi ni ukuvuga ko afite zeru (0) ariyo Gicumbi na Heroes FC.

Nk’uko tubikesha Ishyirahamwe ry’umupira w’amaguru mu Rwanda (FERWAFA), ikipe ya Etincelles FC n’iya Gasogi zarigaragaje mu mikino yo ku munsi wa Kabiri wa Shampiyona y’umupira w’amaguru mu Rwanda 2019/2020.

Ku wa kabiri tariki ya 8 Ukwakira 2019, Rayon Sports FC yatsinze AS Kigali (2-0), Bugesera FC itsindirwa iwayo na APR FC (0-1). Ku wa gatatu tariki ya 9 Ukwakira 2019, Gasogi United yakiriye Marines FC iyitsinda 1-0 ; Gicumbi itsindwa iwayo na AS Muhanga 0-1 ; musanze FC inganya na Police FC ubusa ku busa, Sunrise FC yakiriye Mukura VS zinganya ubusa ku busa, Espoir FC yakira SC Kiyovu iyitsindira iwayo igitego 1-0, na ho Heroes FC yakiriye Etincelles FC itsindwa ibitego 3-0.

Rwanyange Rene Anthere

Rubavu: Abagore babiri b’abavunjayi bafatiwe gukora binyuranije n’amategeko

By Editor

Umujyi wa Gisenyi ubamo urujya n’uruza rw’abantu kuko uri ku mupaka uhuza u Rwanda na Repubulika ya Demokarasi ya Congo. Abo bantu bakenera cyane amadolari kuko ariyo bifashisha mu guhaha muri Congo. Usanga abagore ku mihanda aribo benshi bayacuruza.

Nk’uko tubikesha Polisi y’u Rwanda, ku wa mbere tariki mbere tariki ya 06 Ukwakira 2019, mu mujyi wa Gisenyi hafatiwe abagore babiri ku mupaka uhuza u Rwanda na Repubulika ya Demokarasi ya Congo bavunja amafaranga mu buryo bunyuranyije n’amategeko

Polisi y’u Rwanda itangaza ko abafashwe ni Betaniya Febronie na Muhawenimana Monique. Betaniya bamufatanye amafaranga y’u Rwanda 148, 000 na 166, 500 by’amanyekongo, mu gihe Muhawenimana we yafatanwe ibihumbi 134,150 by’amafaranga y’u Rwanda n’ibihumbi 158, 600 by’amanyekongo.

Chief Inspector of Police (CIP) Emmanuel Kayigi, umuvugizi wa Polisi mu ntara y’Iburengerazuba avuga ko aba bombi bafatiwe mu bikorwa bisanzwe bikorwa na Polisi byo kurwanya abavunja amafaranga mu buryo bunyuranyije n’amategeko.

Yagize ati: “Nta gihe Polisi y’u Rwanda idakangurira abantu ko kuvunja no gucuruza amafaranga bifite amategeko abigenga ndetse ikanabakangurira gukurikiza ayo mategeko kugira ngo babashe gukorera mu mucyo.”

Akomeza agira ati: “Ivunja nk’iri rikorwa mu buryo butemewe abarikora ntibishyura imisoro n’amahoro, nta n’ubwo bakurikiza andi mabwiriza abigenga, ibi bishobora no kuba habamo gushuka abaturage rimwe na rimwe bakaba babaha n’amafaranga atujuje ubuziranenge, ikindi kandi binatesha agaciro ifaranga ry’igihugu. Akaba ariyo mpamvu dusaba buri wese ugira uruhare muri iki gikorwa kinyuranyije n’amategeko kukirinda no kukirwanya kuko amategeko agihanira”.

Amabwiriza yasohotse mu 2013 arebana n’ivunjwa n’icuruzwa ry’amafaranga y’amanyamahanga mu Rwanda mu ngingo yaryo ya 3 avuga ko nta muntu wemerewe kuvunja amafaranga y’amanyamahanga usibye abafite uburenganzira bahawe na Banki Nkuru y’Igihugu.

Ingingo ya 223 irebana no gucuruza cyangwa kuvunja amafaranga mu buryo butemewe n’amategeko, mu gitabo giteganya ibyaha n’ibihano mu Rwanda, ivuga ko muntu wese, ku buryo ubwo ari bwo bwose, ucuruza cyangwa uvunja amafaranga y’Igihugu cyangwa amafaranga y’amahanga, mu buryo bunyuranyije n’amategeko, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi atandatu (6) ariko kitarenze imyaka ibiri (2) n’ihazabu y’amafaranga y’u Rwanda atari munsi y’ibihumbi magana abiri (200.000Frw) ariko atarenze miliyoni eshatu (3.000.000Frw) cyangwa kimwe gusa buri ibyo bihano.

Ubwanditsi

Bugesera/Kamabuye: Ubushimusi bw’inka bushobora kubaca ku gutunga

By Editor

Abatuye mu murenge wa Kamabuye mu karere ka Bugesera, baratabaza nyuma yo kubona ko ubushimusi bw’inka bukomeje nubwo hari harafashwe ingamba zo kuraza inka mu biraro rusange, ikibazo gikomeye ni uko na ho abashimusi bazisangamo.

Ikibazo cy’ubushimusi bw’inka, ni kimwe mu bibazo by’ingutu ukigera mu murenge wa Kamabuye mu karere ka Bugesera abaturage bagusanganiza, bavuga ko byageze ku rwego rukomeye.

Abaturage bavuga ko ubusanzwe ubu bujura bwari buhari, biza kugera ubwo hafatwa gahunda yo kujya baraza inka mu biraro rusange aho hari abazirarira, nyamara ariko ngo ibi ntibyacitse kuko abajura bazisanga muri ibyo biraro bakaziba.

Umuturage utashatse ko tuvuga amazina ye, yagize ati “twazijyanye mu biraro rusange tuzi ko zitazongera kwibwa, none turabona byananiranye, kuko ubu n’izo twari dusigaranye tugiye kuzigurisha rwose.”

Mugenzi we nawe twasanze mu kagari ka Kampeka, avuga ko batazihanganira guhora bibwa inka. Uyu twamusanze ikiraro ke nta nka zirimo, avuga ko yazigurishije kubera kwanga ko zibwa agahomba.

Agira ati “ntubona kiriya kiraro ko nta nka iherukamo, banyibiye iya mbere mu kiraro rusange, mbonye ukuntu na bagenzi banjye barimo kuzibiba, mfata ikemezo cyo kuzigurisha izari zisigaye kuko yari iya kabiri nibwe. Ibi rero byatumye ducika intege zo korora.”

Aba baturage bakomeza bavuga ko ubundi inka zabo zajyaga zishimutwa zikajyanwa i Burundi, kubera ko uyu murenge unahana imbibi n’igihugu cy’u Burundi, nyamara ariko kuri ubu bavuga ko ngo hari amamodoka arara agenda ijoro, bakeka ko inka zishimutwa zaba zibagwa bagatwara inyama. Barasaba ko uwajya afatwa yibye yahanwa ku buryo bwihanukiriye.

Umusaza twaganiriye, agira ati “twebwe ikibazo gikomeye dufite ni icy’ubujura bw’inka, akaba ari wo mutekano tubuze inaha. Twifuza ko uwajya afatwa, bajya bamuhana bihanukiriye n’abandi bakaboneraho.”

Umunyamabanga Nshingwabikorwa w’Umurenge wa Kamabuye, Murenzi Jean Marrie Vianney, avuga ko ubuyobozi bwahagurukiye ubu bujura, aho iyo inka yibiwe mu gikumba rusange abaraye irondo kuri icyo gikumba bayiriha.

Agira ati “dukurikije uko mbere byari bimeze zitarajyanwa mu bikumba rusange, tubona ubu byaragabanutse, gusa ariko koko hari izikibwa. Zimwe mu ngamba ni uko iyo inka yibwe, abaraye izamu aho nibo bayiriha; gusa nanone dufite ikibazo cy’abagabo usanga biyibisha inka zabo bagamije kutazisangira n’abo bashakanye kubera amakimbirane baba bafitanye mu miryango, ariko nabyo twarabihagurukiye.”

Murenzi akomeza avuga ko uretse izi ngamba zo kurihisha, mu guca ubujura mu murenge wa Kamabuye, kuri ubu wafashe gahunda y’uko abaturage bagomba kujya bavuga abo bakekaho ko ari abajura.

Agira ati “Dusaba abaturage kutubwira abo bakeka ko ari abajura kabone nubwo baba batafatiwe mu cyuho. Abo tubajyana muri taranziti tukabaha amasomo bakanadufasha gufata abajura kandi ibi ni ibintu dukomeje gukora.”

Ku kibazo cy’amamodoka agenda nijoro abaturage bakeka ko yaba atwaramo inyama z’inka zibwe, ubuyobozi bw’umurenge busaba abaturage kujya batanga amakuru kuyo baketse, kugira ngo ifatwe isakwe, kuko muri uyu murenge hari na sitasiyo ya Polisi.

Iki kibazo si mu murenge wa Kamabuye gusa gikunze kugarukwaho, kuko no mu yindi mirenge igize akarere ka Bugesera, abaturage bakomeje gutaka ubujura, bikaba bisaba ko ubuyobozi burushaho gukaza ingamba kuko bikomeje gutya bishobora guca intege aborozi.

Habimana Cypridion

Before yesterdayPanorama

Kamonyi/Kayenzi: Umukecuru w’imyaka 80 akurikiranweho ubufatanye mu bujura buciye icyuho

By Editor

Mu rukerera rwo kuri uyu wa Gatandatu tariki ya 12 Ukwakira 2019, Polisi y’u Rwanda ikorera mu murenge wa Kayenzi mu karere ka Kamonyi yafashe abasore  batandatu n’umukecuru umwe ufite imyaka 80 bamaze kwiba ibicuruzwa muri butike ya Gatete Janvier, umucuruzi mu isantere ya Kayenzi.

Polisi y’u Rwanda dukesha iyi nkuru itangaza ko uyu mukecuru akurikiranweho kuba yaranze gutanga amakuru y’aho ibicuruzwa biri nyamara mu gihe bariya basore babyibaga bagiye kubihisha mu nzu ye ndetse inzego z’umutekano zajya gusaka zikabisangamo. Gusa, uyu mukecuru ntabwo yafunzwe, arakurikiranwa ari iwe mu rugo.

Umuvugizi wa Polisi mu Ntara y’Amajyepfo Chief Inspector of Police (CIP) Sylvestre Twajamahoro, avuga ko mu rukerera rwa tariki ya 12 Ukwakira Polisi y’u Rwanda ubwo yari  mu gikorwa cy’umutekano yatabajwe n’umuturage w’umucuruzi mu isantere ya Kayenzi witwa Gatete Janvier avuga ko hari abajura bamaze gutobora inzu ye y’ubucuruzi bakamwiba ibicuruzwa n’amafaranga.   Ako kanya Polisi ifatanyije n’abanyerondo bahise bakurikirana bashobora gufata bariya basore uko ari batandatu n’uriya mukecuru.

CIP Twajamahoro yagize ati: “Umucuruzi  witwa Gatete Janvier yaradutabaje bihurirana n’uko twari tukiri mu bikorwa by’umutekano twari twarayemo, twahise dufatanya n’abanyerondo turakurikirana tubasha gufata bariya basore ndetse tunabasangana bimwe mu bicuruzwa bari bamaze kwiba.”

Umucuruzi avuga ko ibicuruzwa  yibwe ari  amajerikani  5 y’amavuta yo guteka,  imifuka 11 y’umuceri, amacupa 24 y’ikinyobwa kitwa Umuhuza, amacupa 12 y’inzoga ya  wisiki (Whisky), ndetse n’amafaranga y’u Rwanda ibihumbi bitandatu (6,000).

CIP Twajamahoro  avuga  ko abo bajura babigabanye hanyuma mu rugo rw’umukecuru hafatiwe umufuka umwe w’umuceri n’ijerikani imwe y’amavuta yo guteka.

Yaboneyeho gukangurira abaturage gukaza amarondo ndetse anasaba abacuruzi kujya bagira abazamu bararira amazu yabo y’ubucuruzi mu rwego rwo kwicungira umutekano.

Yagize ati: “Icyo dukangurira abaturage ni ugukaza amarondo kuko no kugira ngo bariya bafatwe abari baraye irondo babigizemo uruhare kuko bafatanyije na Polisi barabatanga tanga barafatwa, abacuruzi nabo turabasaba kujya bagira abazamu barinda amazu yabo y’ubucuruzi mu rwego rwo kwicungira umutekano.”

Yakomeje agira inama  urubyiruko rw’insoresore birirwa bifashe mu mifuka bwakwira bakajya kwiba ibya rubanda gukura amaboko mu mifuka bagashaka imirimo ibateza imbere bakareka kwiba.

Ati: “Ruriya rubyiruko turarugira inama yo kwibumbira mu makoperative rugakora ndetse ntibabura abafatanyabikorwa igihe cyose bishyize hamwe bagakora, inaha  hari ibikorwa byinshi bajyamo bagakora batiriwe bajya kwiba.”

Abafashwe bashyikirijwe Urwego rw’Igihugu rw’Ubugenzacyaha(RIB) kugira ngo bakurikiranwe ku  cyaha bakoze. Ni mu gihe hakirimo gushakishwa aho  bahishe ibindi bicuruzwa bibye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange ingingo yaryo ya   166  ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2), ihazabu y’amafaranga y’u Rwanda atari munsi ya miliyoni imwe (1.000.000Frw) ariko atarenze miliyoni ebyiri (2.000.000Frw), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ingingo ya 167 ivuga ko ibihano ku cyaha cyo kwiba byikuba kabiri (2) iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira.

Rwanyange Rene Anthere

Hari abana n’urubyiruko bahura n’uburwayi bwo mu mutwe kubera amakimbirane yo mu ngo n’ibiyobyabwenge

By Editor

Amakimbirane yo mu ngo ndetse no gukoresha ibiyobyabwenge bigira uruhare runini ku ihungabana ry’abana. Ibi kandi ni kimwe mu bishobora gutera uburwayi bwo mu mutwe nk’uko ubushakshatsi bubigaragaza.

Ku wa 10 Ukwakira 2019, mu karere ka Nyamagabe, ubwo hazirikanwaga abahuye n’ikibazo cy’uburwayi bwo mu mutwe, Umuyobozi w’Ikigo k’Igihugu kita ku buzima (RBC), Dr Nsabimana Sabin yavuze ko ubushakashatsi bwagaragaje ko mu bitera abana n’urubyiruko uburwayi bwo mu mutwe higanjemo agahinda gakabije, kwigunga, amakimbirane yo mu ngo no gukoresha ibiyobyabwenge n’ibisindisha.

Dr Nsabimana agira ati “…si ibyo gusa kuko hari n’amafirime y’urukozasoni urubyiruko rureba harimo n’iz’imirwando na byo bibagiraho ingaruka zikomeye; aho usanga bamwe barataye amashuri bikabaviramo kwishora mu busambanyi bakiri bato, abandi bariyahura kubera kutamenya ko bafite ikibazo ngo babavuze hakiri kare.”

Umuyobozi w’Ikigo k’Igihugu kita ku buzima (RBC), Dr Nsabimana Sabin.

Yakomeje agaragaza ko 20 ku ijana y’abana n’urubyiruko bafite uburwayi bwo mutwe, na ho 10 ku ijana bafite hagati y’imyaka 10 na18 nabo bararwaye. Ikindi ni uko kimwe cya gatatu (1/3) cy’abarokotse Jenoside yakorewe Abatutsi bafite ibibazo byo mu mutwe biturutse ku gahinda gakabije n’ihungabana.

Dr Kayiteshonga Yvonne, uyobora ishami  rishinzwe gukurikirana abafite uburwayi bwo mu mutwe muri RBC, yavuze ko bitewe n’ubuzima  abanyarwanda babayemo hagenda hagaragara ikibazo byo mu mutwe.

Asaba abantu kugira urukundo, bakirinda amakimbirane mu ngo ya hato na hato. Agira ati “ikibazo cyo mu mutwe n’ibintu bisanzwe kuri buri wese, ariko biba byiza iyo umuntu yivuje hakiri kare kuko ni indwara ivurwa igakira iyo yamenyekanye hariri kare. Duharanire ko abana bacu bahura n’icyabateraa kurwara mu mutwe.”

Dr Kayiteshonga Yvonne, uyobora ishami rishinzwe gukurikirana abafite uburwayi bwo mu mutwe muri RBC.

Guverineri w’Intara y’Amagepfo, CGP Gasana Emmanuel, asaba ababyeyi kuba hafi y’abana babo  babarinda kwishora mu biyobyabwenge, anabasaba kandi kwirinda amakimbirane mu ngo, kuko na byo biri mu bitera ingaruka mbi ku bana.

Yibukije ababyeyi kujya bamenya imyigire y’abana babo kandi ibibazo bikajya biganirwaho mu nzego zose ariko cyane cyane mu mugoroba w’ababyeyi. Agira ati “Urubyiruko rwangirika tureberera, ariko rero nta mpamvu yo kubarekera mu biyobyabwenge n’ibindi byose byakwangiza ubuzima bwabo.”

Guverineri w’Intara y’Amagepfo, CGP Gasana Emmanuel.

Mu karere ka Nyabagabe habarurwa abafite ibibazo by’uburwayi bwo mu mutwe bagera kuri magana akenda (900). Abaturage basabwa kwirinda kubaha akato, ahubwo bakwiye kubaba hafi.

Aragirimana Clever uhagarariye ishyirahamwe ry’abarwayi bo  mutwe avuga ko bashinzwe gukusanya uburwayi bose ndetse n’abari ku muhanda  kugira ngo bavurwe kandi bagerageze kwiteze imbere. Basaba ko na bo bakwiye kugira ijambo kugira ngo bage bagaragaza akarengane kabo kandi bumvwe.

Uwabega Chantal, utuye mu karere ka Nyamagabe, avuga ko abona ibibazo byinshi biterwa n’uko ababyeyi benshi bahugira mu gushaka imibereho, bigatuma bamwe mu bana bararuka bakishora mu biyobyabwenge. Avuga ko umwana we yabinyoye kuko batajyaga bamuganiriza, bikaba byaranamuviriyeko kwiyahura kubera amakimbirane yari mu muryango wabo.

Uyu mwaka insanganyamatsiko yo kwizihiza Umunsi Mpuzamahanga w’ubuzima bwo mu mutwe, igira iti “Twite ku buzima bwo mu mutwe bw’abana n’urubyiruko”.

Abajyanama b’ubuzima bo mu karere ka Nyamagabe bitabiriye umunsi mpuzamahanga w’ubuzima bwo mu mutwe.

Munezero Jeanne d’Arc

Kirehe: Umuturage yafashwe aha umupolisi ruswa y’amafaranga ibihumbi mirongo itatu

By Editor

Ashatse kugombora ibicuruzwa bya magendu byari byafashwe, ku wa 8 Ukwakira 2019, umuturage utuye mu murenge wa Gahara yashatse guha ruswa y’amafaranga ibihumbi mirongo itatu (30.000Frw) Komanda wa Polisi muri Sitasiyo ya Polisi ikorera mu murenge wa Kigarama,

Umuvugizi wa Polisi mu Ntara y’Iburasirazuba Chief Inspector of Police (CIP) Hamdun Twizeyimana avuga ko mu ijoro ryo ku itariki ya 07 Ukwakira 2019, aribwo  abanyerondo bo mu mudugudu wa Gasenyi mu ka kagari ka Nyakebera mu murenge wa Kigarama, bafashe abasore bane (4) bambutsa rwihishwa  imifuka 40 irimo amacupa yo gupakiramo inzoga zitemewe bivugwa ko ari za Nduwayezu Noel wafashwe atanga ruswa.

Aba basore  bakuraga aya macupa mu gihugu cya Tanzaniya bayazana mu Rwanda, bamaze gufatwa amakuru yageze kuri Nduwayezu wari wabahaye akazi ko kuyambutsa atangira gushaka uko yahura n’umuyobozi wa Polisi kugira ngo amuhe ruswa amuhe iyo mifuka irimo amacupa ndetse n’indi  igera kuri 80 yari ikiri muri Tanzaniya  ngo nayo ayireke yinjire mu gihugu.

CIP Twizeyimana yagize ati: “Nduwayezu  yamaze kumenya ko ibicuruzwa bye byafashwe ahamagara umuyobozi w’umudugudu ngo abahuze n’umuyobozi   wa Polisi mu murenge wa Kigarama, bwarakeye barahura, amwemerera amafaranga; ariko kuko umuyobozi wa Polisi ku murenge yari yamaze kubivugana n’abandi bapolisi ko hari umuntu ugiye kumuha ruswa, bahise baza bamufatira mu cyuho amaze kuyamuha.”

Umuvugizi wa Polisi mu Ntara y’Iburasirazuba yaboneho kongera gukangurira abaturage kwirinda gutanga ruswa, ariko cyane cyane kuyiha abapolisi, kuko nibo bashinzwe kuyirwanya. Yakomeje asaba  abaturage gukora ibintu binyuze mu mucyo aho guhora biringiye kuzatanga ruswa.

Yagize ati: “Nta kuntu wajya guha ruswa umupolisi kandi ubizi ko muri iki gihugu ruswa ari ikizira, byongeye ukayiha  abapolisi aribo bashinzwe kuyirwanya, uzajya ayitanga azajya ahita afatwa.  Turashishikariza abaturage gukora ibintu binyuze mu mucyo bakirinda kwiringira kuzatanga ruswa kugira ngo bakore ibinyuranyije n’amategeko.”

Inshuro nyinshi Polisi y’u Rwanda ikangurira abaturarwanda kwirinda gutanga  ruswa, ikabakagurira kunyura mu nzira zemewe n’amategeko kugira ngo bahabwe  ibyo bemererwa n’amategeko.  Abaturage bibutswa ko mu Rwanda ruswa  itihanganirwa ku gipimo cya zero kuko uyitanze n’uyakira bose  bahanwa n’amategeko.

Nduwayezu Noel  yashyikirijwe urwego rw’igihugu rw’ubugenzacyaha (RIB) ikorera kuri sitasiyo  ya Kirehe  kugira ngo akorerwe  dosiye.

Itegeko nimero  54/2018 ryo kuwa 13/08/2018 rirwanya ruswa rivuga ko  igikorwa icyo ari cyo cyose gikorewe mu nzego za Leta, iz’abikorera, sosiyete sivili, n’imiryango mpuzamahanga ikorera cyangwa ishaka gukorera mu Rwanda, kigamije gusaba, kwakira cyangwa gutanga indonke mu buryo bunyuranyije n’amategeko hagamijwe kwigwizaho umutungo udashobora gusobanura inkomoko yawo cyagwa gukora ishimishamubiri kugira ngo hakorwe umurimo cyangwa igikorwa mu buryo bunyuranije n’amategeko byaba bikozwe na nyir’ubwite cyangwa binyujijwe ku wundi muntu. Ruswa igaragarira muri kimwe mu bikorwa bikurikira

Ingingo ya 4 y’iryo tegeko ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose.  Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

Ubwanditsi

Itangazo ry’Ibyemezo by’Inama y’Abaminisitiri idasanzwe yo ku wa 10/10/2019

By Editor

None ku wa Kane, tariki ya 10 Ukwakira 2019, Inama y’Abaminisitiri idasanzwe yateraniyemuri Village Urugwiro, iyobowe na Nyakubahwa Perezida wa Repubulika, Paul KAGAME.

  1. Inama y’Abaminisitiri yemeje imyanzuro y’Inama y’Abaminisitiri yo ku itariki ya 29 Nyakanga 2019.
  2. Ashingiye ku bubasha ahabwa n’Amategeko, Nyakubahwa Perezida wa Repubulika yamenyesheje Inama y’Abaminisitiri ko yahaye imbabazi abagororwa mirongo itanu na babiri (52) bari barakatiwe n’inkiko kubera icyaha cyo kwihekura no gukuramo inda.
  3. Inama y’Abaminisitiri yemeje imishinga y’amategeko ikurikira:
  • Umushinga w’itegeko ryemera kwemeza kuba kimwe mu bihugu bihuriye ku masezerano mpuzamahanga yerekeye gushyira ibimenyetso ku bintu biturika bikozwe muri pulasitiki kugira ngo bitahurwe, yakorewe i Montréal ku wa 1 Werurwe 1991;
  • Umushinga w’itegeko ryemera kwemeza kuba kimwe mu bihugu bihuriye ku masezerano mpuzamahanga arebana n’ikurwaho ry’ibikorwa binyuranyije n’amategeko byabangamira umutekano w’iby’indege za gisivili, yakorewe i Beijing ku wa 10 Nzeri 2010;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ku masezerano mpuzamahanga yerekeye ikurwaho ry’ifatira ry’indege rinyuranyije n’amategeko, yakorewe i Beijing ku wa 10 Nzeri 2010;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ahindura amasezerano mpuzamahanga yakorewe i Montréal ku wa 4 Mata 2014, ku byaha n’ibindi bikorwa bikorewe mu ndege;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ahindura amasezerano mpuzamahanga mu by’indege za gisivili, yashyiriweho umukono i Montréal ku wa 6 Ukwakira 2016;
  • Umushinga w’itegeko ryemera kwemeza kuba kimwe mu bihugu bihuriye ku masezerano y’inyongera ahindura amasezerano mpuzamahanga mu by’indege za gisivili, yashyiriweho umukono i Montréal ku wa 6 Ukwakira 2016.
  • Inama y’Abaminisitiri yemeje Iteka rya Perezida ryemera kwemeza burundu amasezerano yakorewe i Moscow ku wa 5 Ukuboza 2018, hagati ya Guverinoma ya Repubulika y’u Rwanda na Guverinoma y’Uburusiya, ku bufatanye mu rwego rw’ikoreshwa ry’ingufu za Nikeleyeri mu buryo bugamije amahoro.
  1. Inama y’Abaminisitiri yemeje amateka ya Minisitiri w’Intebe akurikira:
  • Iteka rya Minisitiri w’Intebe rivana ubutaka buherereye mu Karere ka Rubavu buri mu kibanza gifite UPI: 3/03/04/05/1069, mu mutungo rusange wa Leta, rikabushyira mu mutungo bwite wayo;
  • Iteka rya Minisitiri w’Intebe rishyiraho Bwana HABIMANA Donathna Madamu UWASE Alicenk’Abashinjacyaha ku Rwego Rwisumbuye;
  • Iteka rya Minisitiri w’Intebe rishyiraho Lieutenant MUKAMANA Christinenk’ Umushinjacyaha wa Gisirikare;
  • Iteka rya Minisitiri w’Intebe ryirukana burundu mu bakozi ba Leta, Madamu MUKAKARANGWA Francisca Emmanuelwari Umuyobozi w’Ishami rishinzwe guhuza ibikorwa bya SACCOs mu Kigo cy’Igihugu cy’Amakoperative (RCA) kubera amakosa akomeye yakoze mu kazi.
  1. Inama y’Abaminisitiri yemeje amateka ya Minisitiri akurikira:
  • Iteka rya Minisitiri ryemeza ifungurwa ry’agateganyo ry’abagororwa ibihumbi bibiri na magana ane na mirongo itanu n’umwe (2 451) babisabye kandi bakaba bujuje ibiteganywa n’amategeko;
  • Iteka rya Minisitiri rishyiraho Lt UMUSINDI Oliviernk‘Umwanditsi w’Urukiko mu Rukiko Rukuru rwa Gisirikare;
  • Iteka rya Minisitiri ryemerera Ishuri rikuru ry’Ubuhinzi n’Ubworozi (RICA) gutangira gukora nk’ishuri rikuru ryigenga.
  1. Inama y’Abaminisitiri yemeje ko aba bakurikira bahagarira ibihugu byabo mu Rwanda ku rwego rw’Abambasaderi:
  • Bwana ABDULLA MOHD A.Y.AL-SAYED: Ambasaderi wa Leta ya Katari mu Rwanda ufite ikicaro i Kigali;
  • Bwana MARTIN KLEPETKO: Ambasaderi wa Repubulika ya Cekisolovaliya mu Rwanda ufite ikicaro iNayirobi;
  • Madamu RIITTA SWAN: Ambasaderi wa Repubulika ya Finilande mu Rwanda ufite ikicaro i Dar es Salaam;
  • Bwana SLAIMAN ARABIAT: Ambasaderi w’Ubwami bwa Yorudaniya mu Rwanda ufite ikicaro i Nayirobi.
  1. Inama y’Abaminisitiri yashyize mu myanya abayobozi ku buryo bukurikira:
  • Mu Kigo k’Igihugu cy’Amahugurwa mu by’Imicungire y’Abakozi n’Umutungo(RMI)

– Bwana MUKWIYE Norbert: Director of administration and finance unit;

– Madamu UZAMUKUNDA Christine:Director of ICT and e- learning unit.

  • Mu Kigo k’Igihugu cy’Ubushakashatsi n’Iterambere mu byerekeye Inganda (NIRDA)

– Bwana KAGERUKA Hurbert: Director of laboratory unit;

– Bwana MBARAGA Nkejuwimye Serge: Director of technology monitoring and knowledge management unit.

  • Mu Ishuri Rikuru ry’u Rwanda ry’Imyuga n’Ubumenyingiro/NGOMA (RP/IPRC-NGOMA)

BwanaMURINDAHABI Jean de Dieu: Director of research, consultancy and  production unit.

  • Mu Ishuri Rikuru ry’u Rwanda ry’Imyuga n’Ubumenyingiro/KIGALI (RP/IPRC-KIGALI)

Bwana RWUMUKARAGO Alain: Director of research, consultancy and   production unit.

  1. Mu bindi.
  • Minisitiri muri Perezidansi ya Repubulika yamenyesheje Inama y’Abaminisitiri ko ukwezi kwahariwe kuzirikana Ubumwe n’Ubwiyunge kwatangiye ku itariki ya mbere Ukwakira kukazasozwa ku ya 31 Ukwakira 2019. Insanganyamatsiko y’uyu mwaka ni “Imyaka 25 mu nzira y’Ubumwe n’Ubwiyunge: Ubumwe bwacu, amahitamo yacu.”
  • Minisitiri w’Imari n’Igenamigambi yamenyesheje Inama y’Abaminisitiri ko:

– Ibirori by’umunsi wo gushimira Abasora bizabera i Kigali mu Intare Conference Arena ku wa 22 Ugushyingo 2019, ku nsanganyamatsiko igira iti “Dusore Neza, Twubake u Rwanda Twifuza.’’

– Kuva tariki ya 23 kugeza 31 Ukwakira 2019, ari icyumweru cyahariwe kuzigama. Insanganyamatsiko ni: “Izigamire ugire ejo heza”, ikaba yuzuzanya na gahunda y’ubwizigame bw’igihe kirekire/EJO HEZA.

  • Minisitiri w’Ubucuruzi n’Ingandayamenyesheje Inama y’Abaminisitiri ko Umuryango Mpuzamahanga w’Amakoperative uzakorera inama yawo Mpuzamahanga mu Rwanda kuva tariki ya 14 kugeza ku ya 17 Ukwakira 2019, muri Kigali Convention Center.
  • Minisitiri w’Ibidukikije yamenyesheje Inama y’Abaminisitiri ko:

– Igihembwe cyo gutera amashyamba cya 2019/2020 no kwizihiza isabukuru ya 44 y’Umunsi wo gutera amashyamba bizaba ku itariki ya 09/11/2019 bikazabera mu Murenge wa Rukumberi, mu Karere ka Ngoma. Insanganyamatsiko y’uyu mwaka ni “Amashyamba ni inkingi y’imibereho myiza y’abaturage’’.

– Kuva ku tariki ya  8 kugeza ku ya 11 Ukwakira 2019 mu Rwanda hari kubera inama igamije kurebera hamwe uburyo bushya bwo gukomeza kwita ku bidukikije no guteza imbere inganda muri Afurika.

–      Kuva muri Kanama 2019, u Rwanda rwabaye umunyamuryango w’Ihuriro rigamije kugabanya ikoreshwa rya Karubone (Carbon Neutrality Coalition).

  • Minisitiri w’Uburinganire n’Iterambere ry’Umuryango yamenyesheje Inama y’Abaminisitiri ko:

–      Ku itariki ya 11 Ukwakira 2019, u Rwanda ruzizihiza Umunsi Mpuzamahanga w’umwana w’Umukobwa muriKigali Convention Center. Insanganyamatsiko ni: “Ntegurira ejo heza undinda gusambanywa.”

–      Ku itariki ya 15 Ukwakira 2019, u Rwanda ruzizihiza Umunsi Mpuzamahanga w’Umugore wo mu cyaro. Insanganyamatsiko ni:”Umuryango utekanye kandi uteye imbere.” Ku rwego rw’Igihugu, ibirori byo kwizihiza uyu munsi bizabera mu Murenge wa Byumba mu Karere ka Gicumbi;

–      Kuva tariki ya 25 kugeza ku ya 27 Ugushyingo 2019, u Rwanda ruzakira Inama Mpuzamahanga k’uburinganire n’ubwuzuzanye bw’abagore n’abagabo izabera muri Kigali Convention Center.

  • Minisitiri w’Ubuzima yamenyesheje Inama y’Abaminisitiri ko:

– U Rwanda rurateganya gutangiza ubukangurambaga bugamije gukingira icyorezo giterwa na Virusi ya Ebola (EBV). Hazakingirwa abantu bakuru, ingimbi n’abangavu ndetse n’abana bafite imyaka 2 batuye hafi y’aho icyo cyorezo cyagaragaye.

– Ku itariki ya 5 Ukuboza 2019, u Rwanda ruzatangiza ku mugaragaro Ikigo kivura kanseri mu Bitaro bya Gisirikare.

  • Minisitiri w’Ibikorwa by’Ubutabazi yamenyesheje Inama y’Abaminisitiri kotariki ya 31 Ukwakira 2019 u Rwanda ruzizihiza Umunsi Mpuzamahanga wo kugabanya ingaruka ziterwa n’ibiza. Ku rwego rw’Igihugu, umuhango uzabera mu Murenge wa Karama, Akarere ka Kamonyi.
  • Minisitiri w’Urubyiruko yamenyesheje Inama y’Abaminisitiri kokuva tarikiya 9 kugeza ku ya 11 Ukwakira 2019mu Rwanda hari kubera inama ya Youth Connekt Africa Summit 2019.
  • Minisitiri w’Ubuhinzi n’Ubworozi yamenyesheje Inama y’Abaminisitiri ko ku itariki ya 31 Ukwakira 2019 u Rwanda ruzizihiza Umunsi Mpuzamahanga w’Ibiribwa, uzaberamu Murenge wa Nyabirasi mu Karere ka Rutsiro. Insanganyamatsiko ni: “ Ibikorwa byacu nibyo shingiro ry’ejo hazaza. Indyo yuzuye mu isi izira inzara.”
  • Umuyobozi bw’Ikigo gishinzwe Mine, Peterori na Gazi akaba n’umwe mu bagize Guverinoma yamenyesheje Inama y’Abaminisitiri ko kuva tariki ya 28 kugeza 29 Ukwakira 2019, muri Kigali Convention Center, hazabera inama ya mbere y’Ihuriro ry’Ibihugu bigize Afurika y’Iburasirazuba n’iyo Hagati bicukura amabuye y’agaciro.

Iri tangazo ryashyizweho umukono na

KAYISIRE Marie Solange

Minisitiri mu Biro bya Minisitiri w’Intebe Ushinzwe Imirimo y’Inama y’Abaminisitiri

Amakuru adahagije atuma bamwe mu bimurwa kubera inyungu rusange bataka akarengane

By Editor

Kutagira amakuru ahagije ku “Nyungu rusange” hamwe nicyo bakora igihe batanyuzwe n’igenagaciro ryakozwe ni zimwe mu mpamvu zituma bamwe bimuwe ku mpamvu z’inyungu rusange basiragira mu nzego z’ubuyobozi zitandukanye bataka akarengane.

Itegeko n° 32/2015 ryo ku wa 11/06/2015 ryatangajwe mu Igazeti ya Leta ya Repubulika y’u Rwanda n°35 yo ku wa 31/8/2018 ryerekeye kwimura abantu ku mpamvu z’inyungu rusange, riteganya ibigenderwaho ngo abantu bimurwe kubw’inyungu rusange.

Bamwe mu baturage twaganiriye bavuze ko kutamenya ibikubiye muri iryo tegeko bituma hari abatamenya ingingo zibarengera.

Bizumuremyi Damas wo mu murenge wa Byumba mu karere ka Gicumbi, avuga ko ubwo hatangiraga imirimo yo gukora umuhanda Base –Gicumbi mu mwaka wa 2016, kuva ubwo kugeza ubu atarahabwa ingurane y’imitungo ye, ndetse atazi igenagaciro yakorewe.

Ati “Sinanyuzwe n’igenagaciro ryakozwe kuko bampaga amafaranga adahwanye n’imitungo yanjye. Nyuma y’umwaka batubariye, nibwo najyanye ikibazo mu nzego zitandunye, guhera ku kagari kugera ku karere ariko nabuze undenganura, kuko bambwiraga ko natinze kugaragaza ikibazo cyanjye, ngo iminsi itegeko riteganya yararenze; kandi njye sinzi ibiri muri iryo tegeko. Sinzi niba ririmo n’ingingo yandengera.”

Abaturage bo mu Karere ka Rutsiro mu murenge wa Rusebeya, mu tugari twa Rubonde na Mukura bakomwe na Pariki ya Gishwati-Mukura, bo bavuga ko hashize imyaka itatu babwiwe ko hari imitungo yabo izajya mu gice cyahariwe Pariki, bakaba barabujijwe no kugira igikorwa kirambye bakorera ku butaka bwabo.

Nyirahabineza Rosalie ati “Twari dufite imirima twahingagamo imyaka itandukanye ikadutungira imiryango, none hashize imyaka itatu bataraduha ingurane. Hari ibihingwa tutemerewe guhinga. Abayobozi batubwiye ko n’inzu dutuyemo tuzazimurwamo kubera inyungu rusange. Twategereje ingurane twarahebye.”

“Abatamenya amakuru ni abatitabira inama z’abaturage”

Umukozi ushinzwe ubutaka mu karere ka Gicumbi, Sinumvayabo Emmanuel, avuga iyo hagiye kuba igikorwa cyo kwimura abaturage ku mpamvu z’inyungu rusange, ubuyobozi bubibamenyesha mu nama rusange.

Ati “Dukorana inama n’abaturage tukabibasobanurira, abo bavuga ko nta makuru baba bafite ni babandi batitabira inama. Abo bandi na bo bavuga ko batanyuzwe n’igenagaciro, icyo nahamya ni uko abafite ibikorwa aho uriya muhanda ugomba kunyura bose batarishyurwa, ariko ntawe ndabona uvuga ko atanyuzwe n’igenagaciro ryakozwe.”

Ikindi kifuzo cy’abaturage ni uko igihe bagiye kwimurwa n’umushoramari, bajya biyumvikanira na we ku ngurane, hatagize urundi rwego rubajya hagati.

Umukozi w’Ikigo cy’Igihugu gishinzwe imiturire (RHA) ushinzwe kwimura abantu ku mpamvu zijyanye n’inyungu rusange, Kobukye Frank, avuga ko inshingano zo kumenyesha abaturage ibirebana n’ibikorwa by’inyungu rusange bikorwa n’Akarere aho icyo gikorwa giherereye bafatanyije n’urwego rwimura, kandi ko utanyuzwe n’igenagaciro ryakozwe ajurira.

Ati “Itegeko rivuga ko kuvuguruza agaciro kahawe ubutaka n’ibyabukoreweho bikorwa mu gihe kitarenze iminsi irindwi nyuma y’uko urwego rwimura rwemeje raporo yakozwe n’abagenagaciro.”

Yavuze ko ku ndishyi ikwiye ko Ingingo ya 39 ivuga ko hashingiwe ku biciro biri ku isoko, uwimurwa ahabwa n’indishyi y’ihungabana ritewe no kwimurwa ingana na 5 ku ijana by’ingurane agomba guhabwa. Ibi ni uburenganzira bw’uwimurwa kandi twizeye ko bwubahirizwa.

Uyu muyobozi yanavuze ko kuba abaturage bakwiyumvikanira n’umushoramari ushaka kubimura hashyirwa mu bikorwa igishushanyo mbonera byemewe, gusa batumvikanye, imihango irebana no kwimura abantu ku mpamvu z’inyungu rusange irakurikizwa.

Itegeko risobanura ko kwimura abantu ku nyungu rusange bikorwa na leta, ibigo bya Leta n’inzego z’ibanze zifite ubuzima gatozi bwo gukura umuntu mu mutungo we ku mpamvu z’inyungu rusange, ariko habanje gutangwa indishyi ikwiye.

Emma-Marie Umurerwa

Gicumbi: Hamenwe litiro zirenga 1000 za Kanyanga n’ibindi biyobyabwenge

By Editor

Buri wa kabiri mu gihugu hose haba inteko rusange z’abaturage, bakaganiriramo ibintu bitandukanye byiganjemo umutekano, iterambere n’imibereho myiza, bakanahakemurira ibibazo bitandukanye ndetse bakanavuga n’ibitagenda neza muri rusange bagafatira ingamba hamwe zo kubikemura. Akenshi muri izo nama abanturage baba basuwe n’abayobozi batandukanye

Nk’uko tubikesha Polisi y’u Rwanda, ku wa Kabiri tariki ya 08 Ukwakira 2019, Umuyobozi w’Akarere ka Gicumbi, Ndayambaje Felix, yifatanyije n’abaturage bagera ku 1, 500 bo mu mirenge ya Cyumba na Kaniga mu nteko rusange y’abaturage ari kumwe n’Umuvugizi wa Polisi mu ntara y’Amajyaruguru, Chief Inspector of Police (CIP) Alexis Rugigana. Aba bayobozi baganiriye n’abaturage ku ngingo zitandukanye  nyuma yo kuganira habaye  igikorwa cyo kumenera mu ruhame ibiyobyabwenge  bakanakangurirwa  kubyirinda.

Ibiyobyabwenge byamenwe  birimo Kanyanga litiro 1034, Urumogi  udupfunyika 49.063, Zebra amapaki 1935, Chief Warage amapaki 31, Blue sky amapaki 407, African gin amapaki 35, Chase vodka amapaki 2000, Mayirungi amapaki 486, Cliff  amaduzeni 35, Akeza nyako litiro 1,5 na Kabaruka ibiro 25. Ibi byose bikaba byarafashwe mu gihe kingana n’amezi abiri (2) bifatiwe mu mirenge ya Cyumba na Kaniga, bifatanwa abantu  bagera ku 120.

Umuyobozi w’akarere ka Gicumbi Ndayambaje Felix, nyuma yo kumena ibi biyobyabwenge mu ruhame yasabye abaturage kubyirinda no kubirwanya kuko nta cyiza na kimwe cyabyo.

Yagize ati: “Ingaruka z’ikoreshwa ry’ibiyobyabwenge ni ukugira uburwayi, guhomba ayo wabishoyemo, gukora ibyaha bitandukanye umutekano muke mu baturage, gucibwa amande ndetse no gufungwa kubabifatanwe. Ni ku bw’iyo mpamvu dusaba buri wese ubigiramo uruhare guca ukubiri nabyo, kuko n’ingamba zo gufata ababyishoramo zakajijwe.”

Yabasabye kwirinda kwambuka umupaka batabifitiye uburenganzira cyangwa guca mu nzira zitagenwe kuko ari icyaha gihanwa n’amategeko kandi ko uzagifatirwamo wese azabihanirwa. Aha yababwiye ko abitwikira ijoro bakajya gutunda ibi biyobyabwenge bibwirako bihishe inzego z’umutekano ko bakwiye kubizinukwa kuko nta kabuza batazabura gufatwa kandi bakabihanirwa.

Umuvugizi wa Polisi mu Ntara y’Amajyaruguru CIP Rugigana, nawe yibukije abaturage ko kurwanya ibiyobyabwenge bitareba inzego z’umutekano gusa cyangwa abandi bantu ko  n’abaturage ubwabo bagomba kubigiramo uruhare.

Yagize ati: “Ingaruka z’ikoreshwa ry’ibiyobyabwe ntabwo zigera k’ubikoresha gusa cyangwa ku muryango we gusa, ahubwo zigera no ku muryango nyarwanda muri rusange. Kuko ababikoresha iyo bamaze kubinywa nibo bafata abana ku ngufu, nibo bavamo abajura, nibo bateza urugomo, nibo bateza amakimbirane mu ngo no mubaturanyi, nibo bakubita bakanakomeretsa n’ibindi bitandukanye. Niyo mpamvu kubirwanya no kubikumira bisaba uruhare n’imbaraga bya buri wese.”

Aba bayobozi bose basoje bashimira abaturage bagize uruhare mu ifatwa ry’ibi biyobyabwenge, banaboneraho no kubasaba kujya bahanahana amakuru hagati yabo no kuyamenyesha inzego z’umutekano cyane cyane Polisi kugira ngo ibyaha bikumirwe bitaraba.

Panorama

Etincelles iyoboye urutonde rwa Shampiyona 2019/2020

By Editor

Ku munsi wa kabiri wa Shampiyona y’Umupira w’amaguru mu Rwanda, ikipe ya Etincelles iyoboye urutonde n’amanota atandatu (6) kuko yatsinze imikino yombi uko ari ibiri.

Ikipe ya Rayon Sports, Police FC, APR FC na Gasogi FC ziza ku mwanya wa kabiri n’amanota ane (amanota ane (4). Bugesera FC, Marines FC na Kiyovu ziza ku mwanya wa gatatu n’amanota atatu (3). Ku mwanya wa kane haza Mukura VS na Musanze FC zifite amanota abiri (2). Ku mwanya wa gatanu haza Sunrise FC, Espoir na AS Kigali zifite inota rimwe (1) na ho ku myanya ya haza amakipe yatsinzwe imikino yambi ni ukuvuga ko afite zeru (0) ariyo Gicumbi na Heroes FC.

Nk’uko tubikesha Ishyirahamwe ry’umupira w’amaguru mu Rwanda (FERWAFA), ikipe ya Etincelles FC n’iya Gasogi zarigaragaje mu mikino yo ku munsi wa Kabiri wa Shampiyona y’umupira w’amaguru mu Rwanda 2019/2020.

Ku wa kabiri tariki ya 8 Ukwakira 2019, Rayon Sports FC yatsinze AS Kigali (2-0), Bugesera FC itsindirwa iwayo na APR FC (0-1). Ku wa gatatu tariki ya 9 Ukwakira 2019, Gasogi United yakiriye Marines FC iyitsinda 1-0 ; Gicumbi itsindwa iwayo na AS Muhanga 0-1 ; musanze FC inganya na Police FC ubusa ku busa, Sunrise FC yakiriye Mukura VS zinganya ubusa ku busa, Espoir FC yakira SC Kiyovu iyitsindira iwayo igitego 1-0, na ho Heroes FC yakiriye Etincelles FC itsindwa ibitego 3-0.

Rwanyange Rene Anthere

Rubavu: Abagore babiri b’abavunjayi bafatiwe gukora binyuranije n’amategeko

By Editor

Umujyi wa Gisenyi ubamo urujya n’uruza rw’abantu kuko uri ku mupaka uhuza u Rwanda na Repubulika ya Demokarasi ya Congo. Abo bantu bakenera cyane amadolari kuko ariyo bifashisha mu guhaha muri Congo. Usanga abagore ku mihanda aribo benshi bayacuruza.

Nk’uko tubikesha Polisi y’u Rwanda, ku wa mbere tariki mbere tariki ya 06 Ukwakira 2019, mu mujyi wa Gisenyi hafatiwe abagore babiri ku mupaka uhuza u Rwanda na Repubulika ya Demokarasi ya Congo bavunja amafaranga mu buryo bunyuranyije n’amategeko

Polisi y’u Rwanda itangaza ko abafashwe ni Betaniya Febronie na Muhawenimana Monique. Betaniya bamufatanye amafaranga y’u Rwanda 148, 000 na 166, 500 by’amanyekongo, mu gihe Muhawenimana we yafatanwe ibihumbi 134,150 by’amafaranga y’u Rwanda n’ibihumbi 158, 600 by’amanyekongo.

Chief Inspector of Police (CIP) Emmanuel Kayigi, umuvugizi wa Polisi mu ntara y’Iburengerazuba avuga ko aba bombi bafatiwe mu bikorwa bisanzwe bikorwa na Polisi byo kurwanya abavunja amafaranga mu buryo bunyuranyije n’amategeko.

Yagize ati: “Nta gihe Polisi y’u Rwanda idakangurira abantu ko kuvunja no gucuruza amafaranga bifite amategeko abigenga ndetse ikanabakangurira gukurikiza ayo mategeko kugira ngo babashe gukorera mu mucyo.”

Akomeza agira ati: “Ivunja nk’iri rikorwa mu buryo butemewe abarikora ntibishyura imisoro n’amahoro, nta n’ubwo bakurikiza andi mabwiriza abigenga, ibi bishobora no kuba habamo gushuka abaturage rimwe na rimwe bakaba babaha n’amafaranga atujuje ubuziranenge, ikindi kandi binatesha agaciro ifaranga ry’igihugu. Akaba ariyo mpamvu dusaba buri wese ugira uruhare muri iki gikorwa kinyuranyije n’amategeko kukirinda no kukirwanya kuko amategeko agihanira”.

Amabwiriza yasohotse mu 2013 arebana n’ivunjwa n’icuruzwa ry’amafaranga y’amanyamahanga mu Rwanda mu ngingo yaryo ya 3 avuga ko nta muntu wemerewe kuvunja amafaranga y’amanyamahanga usibye abafite uburenganzira bahawe na Banki Nkuru y’Igihugu.

Ingingo ya 223 irebana no gucuruza cyangwa kuvunja amafaranga mu buryo butemewe n’amategeko, mu gitabo giteganya ibyaha n’ibihano mu Rwanda, ivuga ko muntu wese, ku buryo ubwo ari bwo bwose, ucuruza cyangwa uvunja amafaranga y’Igihugu cyangwa amafaranga y’amahanga, mu buryo bunyuranyije n’amategeko, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi atandatu (6) ariko kitarenze imyaka ibiri (2) n’ihazabu y’amafaranga y’u Rwanda atari munsi y’ibihumbi magana abiri (200.000Frw) ariko atarenze miliyoni eshatu (3.000.000Frw) cyangwa kimwe gusa buri ibyo bihano.

Ubwanditsi

Bugesera/Kamabuye: Ubushimusi bw’inka bushobora kubaca ku gutunga

By Editor

Abatuye mu murenge wa Kamabuye mu karere ka Bugesera, baratabaza nyuma yo kubona ko ubushimusi bw’inka bukomeje nubwo hari harafashwe ingamba zo kuraza inka mu biraro rusange, ikibazo gikomeye ni uko na ho abashimusi bazisangamo.

Ikibazo cy’ubushimusi bw’inka, ni kimwe mu bibazo by’ingutu ukigera mu murenge wa Kamabuye mu karere ka Bugesera abaturage bagusanganiza, bavuga ko byageze ku rwego rukomeye.

Abaturage bavuga ko ubusanzwe ubu bujura bwari buhari, biza kugera ubwo hafatwa gahunda yo kujya baraza inka mu biraro rusange aho hari abazirarira, nyamara ariko ngo ibi ntibyacitse kuko abajura bazisanga muri ibyo biraro bakaziba.

Umuturage utashatse ko tuvuga amazina ye, yagize ati “twazijyanye mu biraro rusange tuzi ko zitazongera kwibwa, none turabona byananiranye, kuko ubu n’izo twari dusigaranye tugiye kuzigurisha rwose.”

Mugenzi we nawe twasanze mu kagari ka Kampeka, avuga ko batazihanganira guhora bibwa inka. Uyu twamusanze ikiraro ke nta nka zirimo, avuga ko yazigurishije kubera kwanga ko zibwa agahomba.

Agira ati “ntubona kiriya kiraro ko nta nka iherukamo, banyibiye iya mbere mu kiraro rusange, mbonye ukuntu na bagenzi banjye barimo kuzibiba, mfata ikemezo cyo kuzigurisha izari zisigaye kuko yari iya kabiri nibwe. Ibi rero byatumye ducika intege zo korora.”

Aba baturage bakomeza bavuga ko ubundi inka zabo zajyaga zishimutwa zikajyanwa i Burundi, kubera ko uyu murenge unahana imbibi n’igihugu cy’u Burundi, nyamara ariko kuri ubu bavuga ko ngo hari amamodoka arara agenda ijoro, bakeka ko inka zishimutwa zaba zibagwa bagatwara inyama. Barasaba ko uwajya afatwa yibye yahanwa ku buryo bwihanukiriye.

Umusaza twaganiriye, agira ati “twebwe ikibazo gikomeye dufite ni icy’ubujura bw’inka, akaba ari wo mutekano tubuze inaha. Twifuza ko uwajya afatwa, bajya bamuhana bihanukiriye n’abandi bakaboneraho.”

Umunyamabanga Nshingwabikorwa w’Umurenge wa Kamabuye, Murenzi Jean Marrie Vianney, avuga ko ubuyobozi bwahagurukiye ubu bujura, aho iyo inka yibiwe mu gikumba rusange abaraye irondo kuri icyo gikumba bayiriha.

Agira ati “dukurikije uko mbere byari bimeze zitarajyanwa mu bikumba rusange, tubona ubu byaragabanutse, gusa ariko koko hari izikibwa. Zimwe mu ngamba ni uko iyo inka yibwe, abaraye izamu aho nibo bayiriha; gusa nanone dufite ikibazo cy’abagabo usanga biyibisha inka zabo bagamije kutazisangira n’abo bashakanye kubera amakimbirane baba bafitanye mu miryango, ariko nabyo twarabihagurukiye.”

Murenzi akomeza avuga ko uretse izi ngamba zo kurihisha, mu guca ubujura mu murenge wa Kamabuye, kuri ubu wafashe gahunda y’uko abaturage bagomba kujya bavuga abo bakekaho ko ari abajura.

Agira ati “Dusaba abaturage kutubwira abo bakeka ko ari abajura kabone nubwo baba batafatiwe mu cyuho. Abo tubajyana muri taranziti tukabaha amasomo bakanadufasha gufata abajura kandi ibi ni ibintu dukomeje gukora.”

Ku kibazo cy’amamodoka agenda nijoro abaturage bakeka ko yaba atwaramo inyama z’inka zibwe, ubuyobozi bw’umurenge busaba abaturage kujya batanga amakuru kuyo baketse, kugira ngo ifatwe isakwe, kuko muri uyu murenge hari na sitasiyo ya Polisi.

Iki kibazo si mu murenge wa Kamabuye gusa gikunze kugarukwaho, kuko no mu yindi mirenge igize akarere ka Bugesera, abaturage bakomeje gutaka ubujura, bikaba bisaba ko ubuyobozi burushaho gukaza ingamba kuko bikomeje gutya bishobora guca intege aborozi.

Habimana Cypridion

Nyaruguru: Umugabo yafashwe amaze kwica inyamanswa ebyiri muri Pariki ya Nyungwe

By Editor

Polisi y’u Rwanda itangaza ko Nzamwita Innocent w’imyaka 39 y’amavuko yafashwe yafashwe ku cyumweru tariki ya 6 Ukwakira 2019, ubwo yari amaze kwica inyamanswa ebyiri zo mu bwoko bw’ifumberi.

Uyu mugabo avuga ko yari asanzwe ajya kuzitega akazica ari kumwe na mugenzi we witwa Nzaramyimana Bosco, aba bombi bakaba ari abaturage bo mu murenge wa Muganza mu karere ka Nyaruguru.

Umuyobozi wa Polisi mu karere ka Nyaruguru Superintendent of Police (SP)  Boniface  Kagenza, avuga ko kugira ngo uyu Nzamwita afatwe byaturutse ku makuru yatanzwe n’abashinzwe kurinda Parike ya Nyungwe, bakaba baramufashe mu gitondo cyo ku cyumweru  avuye kwica izo nyamanswa.

Yagize ati: “Ubundi uriya mugabo ngo yari yaraye ateze imitego muri pariki noneho ziriya nyamanswa zifatirwamo araza azisangamo arazibaga. Abashinzwe kurinda ishyamba rya Nyungwe bamufashe ari mu gitondo asohoka mu ishyamba.”

Uriya mugabo wafatanywe inyama za ziriya nyamaswa aremera icyaha yakoze akavuga ko yari inshuro ya kabiri ajya kwica inyamaswa, akavuga ko ubundi yajyaga ajyanayo n’umuturanyi we witwa Nzaramyimana Bosco.

Nzamwita akomeza avuga ko iyo bamaraga kuzica inyama zazo bazijyanaga mu rugo bakazisangira n’abaturanyi babo.

SP Kagenza arakangurira abanyarwanda cyane cyane abaturiye Parike ya Nyungwe kwirinda kwica inyamanswa zo muri pariki kuko ari icyaha gihanirwa n’amategeko. Yakameje agaragaza ingaruka bashobora guhura nazo harimo kuba barasirwa mu ishyamba bikekwa ko ari abagizi ba nabi ndetse no kuba bakwandura indwara ziba mu nyamanswa.

Yagize ati: “Icyo dusaba abaturage ni ukwirinda kujya guhiga muri Nyungwe ndetse no mu yandi mashyamba. Bariya bantu bashobora kurasirwayo bakeka ko ari abagizi ba nabi, ziriya nyamanswa bajya kurya zishobora kwanduza abaturage indwara zitandukanye. Byongeye kandi igikorwa cyo guhiga inyamanswa muri pariki z’igihugu ni icyaha gihanirwa n’amategeko, turasaba abaturage kubyirinda.”

Umuyobozi wa Polisi mu karere ka Nyaruguru yakomeje akangurira abaturage cyane cyane abaturiye Parike ya Nyungwe kujya bihutira gutanga amakuru ku bantu bose bakekaho kujya muri Pariki guhiga inyamanswa zaho.

Ati: “Icyo dusaba abaturage n’ubufatanye mu gutanga amakuru kandi bakayatangira ku gihe nk’uko basanzwe babigenza. Turanabasaba kandi kwirinda kurya inyama zose babonye  batizeye ko zapimwe cyane ko ziriya nyamwanswa  zo mwishyamba akenshi ziba zifite za Virusi zakwanduza abantu uburwayi.”

Nzamwita Innocent yashyikirijwe urwego rw’igihugu rw’ubugenzacyaha kugira ngo ubushinjacyaha bumukorere dosiye.

Ingingo ya 58 yo mu itegeko  n°48/2018 ryo ku wa 13/08/2018 rigenga ibidukikije rivuga ko  Umuntu wese uhiga, ugurisha, ukomeretsa cyangwa wica inyamaswa yo mu bwoko bw’inyamaswa bukomye n’ibizikomokaho, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka  itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi ya miliyoni eshanu (5.000.000Frw) ariko atarenze miliyoni indwi (7.000.000Frw).

Ubwanditsi

❌