WebRwanda.com

🔒
❌
There are new available articles, click to refresh the page.
Today — November 17th 2019ISIMBI.RW

Umutoza wa APR FC amaze icyumweru mu Bubiligi

By Canisius Kagabo

Umutoza mukuru w'ikipe ya APR FC, Adil Erradi Mohammed, amaze icyumweru mu Bubiligi aho yagiye mu kiruhuko.

Imyitozo y'iyi kipe y'ingabo z'igihugu ndetse n'umukino wa gishuti iyi kipe yaraye itsinzemo Etoile del'Est ibitego 4-0, byose byatojwe n'umutoza wungirije, Dr. Nabil Bakrawi kuko umutoza mukuru atari mu Rwanda.

Uyu mutoza yavuye mu Rwanda nyuma y'umukino w'umunsi wa 8 wa shampiyona APR FC yanganyijemo na Kiyovu Sports 0-0 tariki ya 8 Ugushyingo 2019, amakuru agera ku kinyamakuru ISIMBI, avuga ko uyu mutoza ukomoka muri Maroc unafite ubwenegihugu bw'u Bubiligi, tariki ya 9 Ugushyingo ari bwo yahagurutse mu Rwanda ajya mu Bubiligi ari naho atuye.

Biteganyijwe ko uyu mutoza agera mu Rwanda mu mu ijoro ryo kuri iki Cyumweru, aho azaba aje gufatanya n'ikipe kwitegura umukino w'umunsi wa 9 wa shampiyona iyi kipe izakiramo Espoir FC tariki ya 22 Ugushyingo 2019.

Umutoza wungirije niwe wasigaranye ikipe
Erradi amaze icyumweru mu biruhuko

Nicki Minaj agiye kureka gukoresha Instagram

By Our Reporter

Umuraperikazi w'umunyamerika, uherutse gutangaza ko yabaye ahagaritse umuziki, Nicki Minaj yavuze ko agiye kureka gukoresha Instagram bitewe n'uko uru rubuga rwazanye uburyo bwo kurukoresha bwo kuba abantu batabasha kubona abantu bakunze 'likes' ibyo bashyizeho.

Ibi Nicki Minaj yabitangaje mu ntangiriro z'iki cyumweru, hari nyuma y'uko umuyobozi wa Instagram, Adam Mosseri atangaje ko mu cyumweru gitaha nta muntu uzajya ubasha kureba 'likes' zakowe ku mashusho cyangwa ifoto runaka.

Ibi Nicki Minaj abinyujije kuri Instagram Staries, yasobanuye ko Instagram yabikoze mu rwego rwo kubima ibiraka.

Ngo abantu benshi bajyaga babaha ibiraka bitewe n'uburyo bakurikirwa kuri Instagram, likes bafite n'ibindi, none ngo Instagram ibikoze mu rwego rwo kubahombya kuko nta muntu uzongera gupfa kubaha ibintu ngo babamamarize.

Nicki Minaj, ubu kuri Instagram akurikirwa n'abantu bagera kuri miliyoni 108, muri Nzeri 2019, uyu muraperikazi ukunzwe ku Isi hose yafashe umwanzuro wo kuba ahagaritse umuziki.

Clarisse Karasira yasohoye amashusho y'indirimbo « Sangwa Rwanda » ihamagarira abanyamahanga gusanga u Rwanda

By Sylvestre Ntirushwa

Umuhanzikazi nyarwanda wigaruriye imitima ya benshi kubera injyana n'ijwi rye rihogoza, Clarisse Karasira yashyize hanze amashusho y'indirimbo ye nshya yise « Sangwa Rwanda » ihamagarira abanyamahanga gusanga u Rwanda.

Amashusho y'iyi ndirimbo ifite iminota itanu n'amasegonda icumi, yasohotse ku gicamunsi cy'ejo hashize ku wa 15 Ugushyingo 2019.

Muri iyi ndirimbo, uyu muhanzikazi aba agaragaza ibyiza by'u Rwanda birimo udusozi twiza, utugezi dutemba, ibirunga, amashyamba, imisozi, ibisiza, inyamaswa n'ibindi bituma abanyamahanga basura u Rwanda.

Mu nyikirizo y'iyi ndirimbo agira ati « Sangwa sangwa Rwanda weee, sangwa sangwa rwiza weee, usagamba n'amahoro, jya mbere se bwiza bw'Imana wee ! »

Mu bindi aheraho ahamagarira abanyamahanga gusanga u Rwanda ni iterambere, kandi agaragaza ko abaje mu Rwanda bakirwa neza cyane, ndetse n'abatuye mu Rwanda bakaba batengamaye kubera ko ari igihugu cy'amahoro n'amajyambere agereranya n'umutima w'Afurika.

Nk'uko bigaragara mu mashusho y'iyi ndirimbo, Karasira yakoresheje n'abazungu babyina kinyarwanda nk'ikimenyetso cy'uko buri gihe u Rwanda rugendwa na bose kubera ibyiza birutatse.

Amajwi y'iyi ndirimbo yatunganyijwe na Producer JIMMY naho mu buryo bw'amashusho itunganywa na AB GODWIN.

Clarisse Karasira wiyita umukobwa w'Imana n'u Rwanda yamenyekanye kandi akundwa mu zindi ndirimbo zitandukanye zirimo ‘Ntizagushuke', ‘Twapfaga iki', ‘Gira neza' n'izindi nyinshi zitandukanye.

Reba hano amashusho y'iyi ndirimbo

Imwe mu myanzuro yafatiwe mu nama yahuje ubuyobozi bwa AS Kigali n'abakinnyi

By Canisius Kagabo

Nyuma y'ibibazo by'umusaruro muke ndetse n'umwuka mubi uvugwa mu ikipe ya AS Kigali, ku munsi w'ejo habaye inama yahuje abakinnyi ba AS Kigali ndetse n'ubuyobozi bw'iyi kipe bwari buyobowe na perezida wayo Shema Fabrice.

Ni inama yabaye nyuma y'uko iyi kipe yashoye amafaranga menshi ku isoko igura abakinnyi benshi kandi beza ariko ikaba iri ku mwanya 14 mu makipe 16 aho ifite amanota 7 mu mikino 8.

Yabaye nyuma yo kwegura kwa bamwe mu bayobozi barimo uwari perezida Pascal Kanyandekwe ndetse n'umunyamabanga Komezusenge Daniel.

Iyi nama idasanzwe yari igamije kureba ikibazo kiri muri AS Kigali gituma ikipe ibura umusaruro kandi bigaragara ko ifite abakinnyi beza mu gihugu.

Hakaba harabayeho gusasa inzobe, aho abakinnyi babwiye perezida Shema Fabrice uyuboye iyi kipe by'agateganyo ko uretse kuba hari umwuka mubi hagati y'abakinnyi n'umutoza Eric Nshimiyimana, batishimiye uburyo abayobozi bafata abakinnyi.

Aba bamuhaye urugero rwo kuba hari umukinnyi waguzwe ariko akaba atarabona amafaranga ye yaguzwe, ngo ntazakina yishimye cyangwa ngo atange ibyo agomba gutanga.

Bamubwiye kandi ko nta kuntu basaba umukinnyi umusaruro kandi amaze amezi 2 adahembwa, kuko aba afite ibibazo byinshi uretse gushakira intsinzi ikipe haba hiyongereyeho n'ibibazo by'umuryango.

Amakuru agera ku kinyamakuru ISIMBI yahawe n'umwe mubari muri iyi nama, ni uko ubuyobozi bwabijeje ko bagiye gukora ibishoboka byose abakinnyi batarabona amafaranga baguzwe (recruitment) bakayabona vuba.

Hafashwe umwanzuro w'uko umushahara wo yabijeje ko bitaranze ku wa Mbere bazaba bamaze kubona amafaranga yabo yose, gusa ngo nabo nibadakora ibyo basabwa, hari bamwe mu bakinnyi bazabigenderamo.

Ku mutoza Eric Nshimiyimana, Shema Fabrice yavuze ko ibyavuzwe ko yahawe umukino umwe yawutsindwa agahita asezererwa atari byo ko ahubwo ari itangazamakuru riba rishaka gushyushya abantu mu mitwe, gusa yibukije uyu mutoza ko nawe atazakomeza kwihanganirwa nakomeza gutsindwa, yabasabye gutsinda byanze bikunze umukino w'umunsi wa 9 iyi kipe izakinamo Kiyovu Sports iri ku mwanya wa 5 n'amanota 15.

Iyi nama yabaye aba basore bamaze gukina n'abakorerabushaka ku munsi w'ejo i Nyamirambo, nta kintu yigize ivuga kuri Tity wahagaritswe igihe cy'ukwezi, azakomeza gukorera imyitozo mu bato b'iyi kipe.

Abakinnyi basabwe gutsinda umukino wa Kiyovu Sports byanze bikunze

AMAFOTO: Reba buri mukinnyi wa Rayon Sports nimero yahawe kwambara

By Canisius Kagabo

Ku mugoroba wo kuri uyu wa Gatanu, habaye umuhango wa Rayon Sports Day, ni umuhango iyi kipe yerekaniyemo abakinnyi izakoresha muri uyu mwaka w'imikino ndetse n'imyambaro iyi kipe izambara, na nimero buri mukinnyi azambara.

Uyu munsi wabaga ku nshuro wayo wa mbere ndetse ukazajya uba ngaruka mwaka, witabiriwe n'abafana benshi cyane b'iyi kipe, Stade Regional yari yakiriye uyu muhango ikaba yari yuzuye.

Ni umuhango witabiriwe n'abakinnyi b'iyi kipe bagera kuri 21, aho abandi bagera kuri 4 batabonetse, Rutanga Eric, Iranzi Jean Claude na Kimenyi Yves bari mu ikipe y'igihugu, ni mu gihe na Kakule Mugheni Farbrice atahabonetse.

Dore abakinnyi 21 berekanywe

Sekamana Maxime
Mugisha Gilbert
Umunyezamu Mazimpaka Andre
Myugariro Rugwiro Herve azajya yambara nimero
Iragire Saidi azajya yambara nimero 2
Habimana HusseinEto'o azajya yambara nimero 20
Nshimiyimana Amran azajya yambara nimero 5
Olokwei Commodore azajya yambara nimero 11
Tumusiime Alitijan azajya yambara nimero 28
Niyomwungeri Mike azajya yambara nimero 26
Nizeyimana Mirafa azajya yambara nimero 8
Irambona Eric azajya yambara nimero 17
Michael Sarpong azajya yambara nimero19
Oumar Sidibe azajya yambara nimero 9
Runanira Amza azajya yambara nimero 6 (photo: Funclub)
Ciza Hussein Mugabo azajya yambara nimero 10 (photo: Funclub)
Bizimana Yannick azajya yambara nimero 23 (photo: Funclub)
Nsengiyumva Emmanuel Ganza azajya yambara 29
Ndizeye Samuel azajya yambara nimero 25
Iradukunda Eric Radu azajya yambara nimero 14
Nyandwi Sadam azajya yambara nimero16

AMAFOTO: UMURERWA Delphin

Rayon Sports itsinze Gasogi United

By Canisius Kagabo

Rayon Sports itsinze Gasogi United ibitego 3-1, mu mukino wa gishuti wateguwe mu rwego rwo kumurika imyenda ya Rayon Sports.

Wari umukino wa gishuti wateguye mu rwego rwo gufasha Rayon Sports kumurika imyenda mishya izakoresha muri uyu mwaka w'imikino, ni nabwo Gasogi United nayo yakinishije imyenda mishya yaguze izakomeza gukoresha muri uyu mwaka w'imikino.

Umukino waherukaga guhuza aya makipe ni uwo muri shampiyona aho banganyije 0-0.

Ni umukino wagiye kuba abaperezida b'amakipe bomyombi bahize gutsindana. watangijwe n'umunota wo kwibuka Katauti wahoza atoza iyi kipe.

Gasogi United niyo yanjiye mu mukino neza aho yatsinze igitego cya mbere ku munota wa 10 ku gitego cyatsinzwe na Nyakagezi kuburangare bwa myugariro Iradukunda Eric Radu.

Iki gitego cyaje kwishyurwa na Bizimana Yannick ku munota wa 40 ku mupira Dagnogo yazamukanye iburyo awugaruye mu rubuga rw'amahina ubura uwutera ugera kwa Irambona uwugaruye mu rubuga rw'amahina usanga Bizimana Yannick at atsinda igitego cyiza yibirinduye.

Dagnogo yaje gutsinda igitego cya kabiri ku munota wa 44 ku mupira yari ahawe na Oumar Sidibe.

Ku munota wa 51 rayon Sports yatsinze igitego cya 3 ku isoto rikomeye ryatewe na Rugwiro Herve. Umukino warangiye ari 3-1.

Mu mafoto reba uko umuhango kumurika imyenda ya Rayon Sports wagenze

By Canisius Kagabo

Rayon Day ni umunsi Rayon Sports yateguwe wo kumurika imyenda ikipe iyi kipe izakoresha umwaka w'imikino wa 2019-2020, igishushanyombonera cya Gikundiro Stadium ndetse n'irerero ry'iyi kipe hateguwe umukino wa gishuti uza guhuza iyi kipe na Gasogi United uri bube nyuma y'uyu muhango.

byari biteganyijwe ko stade ifungurwa saa 12h ariko saa 15h zirengaho iminota nibwo umuntu wa mbere yari yinjiye muri Stade.

Ni umuhango Rayon Sports yerekaniyemo imyenda mishya ndetse n'abakinnyi izakoresha muri uyu mwaka w'imikino.

Mu bakinnyi berekanywe ntiharimo kapiteni w'iyi kipe Rutanga Eric, Iranzi Jean Claude na Kimenyi Yves bari mu ikipe y'igihugu.

18:40: Umuango urasojwe

Umuhango usojwe no kwerekana igishushanyo mbonera cya Gikundiro Stadium izubakwa kuri hegitari 13.5.

18:36: Michael Sarpong

Ni rutahizamu ukomoka mu gihugu cya Ghana, baramuhamagaye maze abafana bose bahagaurukira icyarimwe bagaragaza ko bishimiye uyu rutahizamu wabahesheje igikombe cya shampiyona cy'umwaka ushize.

Uyu mukinnyi akaba ahawe nimero 19 azajya yambara, umunyamabanaga wa FERWAFA, Uwayezu Regis niwe uyimuhaye.

Akaba ari nawe usoje uyu muhango wo kwerekana iyi myambaro abakinnyi bazakoresha.

18:34: Irambona Eric

Ni myugariro ukina ku ruhande rw'ibumoso, akaba ari nawe mukinnyi umaze imyaka myinshi muri iyi kipe, aho amaze imyaka 8, uyu mwaka azajya yambara nimero 17. Nimero ayihawe n'umutoza Espinoza.

18:31: Iragire Saidi

Ni myugariro w'umunyarwanda winjiye muri iyi kipe avuye muri Mukura VS, akina mu mutima w'ubwugarizi, akaba azajya yambara nimero 2.

18:30: Nshimiyiman Amran

Ni umusore ukina hagati mu kibuga, yinjiye muri Rayon Sports avuye muri APR FC muri uyu mwaka. Azajya yambara nimero 5.

18:27: Habimana Hussein

Ni myugariro w'umunyarwanda winjiye muri iyi kipe mu mwaka ushize w'imikino, akaba yahawe nimero 20 ari yo azajya akinisha muri uyu mwaka.

18:21: Nizeyimana Mirafa

Ni umusore w'umunyarwanda ukina hagati mu kibuga, yakinnye mu makipe atandukanye nka Etincelles, Marines, Police FC na APR FC mbere yo kwerekeza muri Rayon Sports, akaba yakiriwe n'amashyi menshi cyane y'abafana, uyu mukinnyi ukina hagati mu kibuga akaba azajya yambara nimero 8.

18: 20: Olokwei Commodore

Ni umusore ukina hagati mu kibuga ukomoka mu gihugu cya Ghana, akaba yaraje muri iyi kipe uyu mwaka asimburana na mwene wabo, Donkor Prosper, muri uyu mwaka azajya yambara nimero 11.

18:17: Niyomwungeri Mike

Ni umusore ukiri muto cyane waje, akaba ahawe nimero 26.

18:14: Oumar Sidibe

Ni umusore ukomoka mu gihugu cya Mali, yanyuze mu makipe atandukanye nka AS Vita Club, azajya yambara nimero 9. Yambitswe n'umuyobozi w'uruganda rwa Skol itera inkunga iyi kipe.

18:10: Myugariro Ndizeye Samuel

Ni umusore ukina mu bwugarizi mu mutima, afite kandi ubushobozi bwo gukina no ku mpande yugarira, azajya yambara nimero 25.

18:07: Nyandwi Sadam

Ni umusore utangiye umwaka we wa 3 muri Rayon Sports, akaba ari umwe mu bakinnyi bafashije iyi kipe kugera mu matsinda ya CAF Confederations Cup, akaba akina ku ruhande rw'iburyo inyuma, muri uyu mwaka azajya yambara nimero 16. Yambitswe na D'Amour ushinzwe imyinjirije kuri stade.

18:04: Ciiza Hussein Mugabo

Ni umukinnyi iyi kipe yaguze imukuye mu ikipe ya Mukura VS nyuma yo gusoza amasezerasno ye. Azajya akoresha nimero 10. Ikaba yambitswe na Fan Base.

18:02: Runanira Hamzah

Ni umusore ukiri muto iyi kipe yakuye muri Marines FC, azajya yambara nimero 6

17:59: Hahise hakurikiraho, Tumusiime Altijan

Uyu musore ni murumuna Manishimwe Djabel nawe wahoze akinira ikipe ya Rayon Sports ariko ubu akaba akinira APR FC. Tumusiime azajya yamabara nimero 28, ayambitswe n'ishyirahamwe ry'abanyamakuru ba siporo mu Rwanda 'AJSPOR'.

17:56: Hakurikiyeyo Sekamana Maxime

Sekamana Maxime, umwe mu bakinnyi iyi kipe yaguze imukuye muri mukeba APR FC niwe wakurikiyeho, akaba yahawe nimero 24.

17:54: Rutahizamu ukiri muto iyi kipe yakuye muri AS Muhanga niwe ukurikiyeho

Bizimana Yannick, rutahizamu washegeshe amakipe menshi cyane umwaka ushize w'imikino, ahawe nimero 23 azajya akoresha muri uyu mwaka w'imikino akaba ayihawe na Sembagare.

17:50: Myugariro wo kurahande rw'iburyo

Iradukunda Eric Radu niwe ukurikiyeho, nk'ibisanzwe azengurutse nawe imbere y'abafana b'iyi kipe bamuha amashyi menshi cyane, akaba azajya yambara nimero 14.

17: 47: Hasotse Mugisha Gilbert

Uyu musore nawe yakiranywe amashyi menshi cyane n'abafana ba Rayon Sports, akaba azajya yambara nimero 12.

17:45: Hasohotse umunyezamu wa 3

Nsengiyumva Emmanuel, umunyezamu wa 3 wa Rayon Sports, ahawe nimero 29 ari yo azajya yambara muri uyu mwaka w'imikino.

Saa 17:42: Umukinnyi wa 2 arasohotse

Hakurikiyeho Mazimpaka Andre, nazwe anyuze imbere y'abafana bamuha amashyi menshi, ahita nawe ahabwa jersey na nimero 30 azajya yambara.

Saa 17:38: Nibwo umuhango nyirizina utangiye

Bahereye kuri Rugwiro Herve aho asohotse mu rwambariro araza azenguruka imbere y'abafana ubundi ajya ahateguwe ahabwa jersey ya nimero 4 azajya yambara muri uyu mwaka w'imikino

AMAFOTO: Umurerwa Delphin

Itariki y'igitaramo ngarukakwezi cya mbere cya ‘Seka Live' kizagaragaramo abanyarwenya bakomeye muri Afurika

By Sylvestre Ntirushwa

Kompanyi ‘Arthur Nation' itegura ibitaramo by'urwenya ngarukakwezi bizwi nka ‘Seka Live' yamaze gutangaza itariki izaberaho igitaramo cya mbere kizagaragaramo n'abanyarwenya bakomeye muri Afurika.

Arthur Nation ikuriwe n'umunyarwenya ukomeye mu Rwanda akaba n'umunyamakuru wa Radiyo Kiss Fm, Arthur Nkusi yatangaje iby'iki gitaramo kigiye kuba ngaruka kwezi ibinyujije ku rukuta rwayo rwa Instagram.

Nk'uko bigaragara ku ifoto imenyesha iki gitaramo, mu banyarwenya mpuzamahanga batumiwe bagitumiwemo barimo Umunya-Nigeria Afamefuna Klint Igwemba uzwi cyane ku izina rya Klint Da Drunk ndetse n'Umunyakenya Sande Bush uzwi ku izina rya Dr Ofweneke.

Uretse aba banyarwenya mpuzamahanga bagitumiwemo, hazagaragaramo n'Abanyarwanda barimo Merci, Zabba, Divine, Milly, Patrick ndetse na Seka Rising Stars.

Biteganyijwe ko iki gitaramo kizabera muri Kigali Marriot Hotel ku wa 24 Ugushyingo 2019 guhera saa kumi n'ebyiri z'umugoroba (6:00 PM).

Uretse aba banyarwenya bazasetsa abitabiriye iki gitaramo hazagaragaramo n'itsinda ry'abahanzi baririmba bibumbiye muri Neptunez Band n'abavangavanga imiziki (DJs) ba Nep DJs.

Amatike yo kwinjira muri iki gitaramo ni ibihumbi makumyabiri (20,000Rwf) mu myanya y'icyubahiro n'ibihumbi icumi (10,000Rwf) mu myanya isanzwe ndetse abantu bakaba bashobora gutangira kugura amatike yabo mbere banyuze ku rubuga rwa www.rgtickets.com.

Ibitaramo bya Seka Live byabaye mu myaka ishize, byitabiriwe n'abanyarwenya batandukanye bakomeye muri Afurika barimo Teacher Mpamire, Anne Kansiime na Alex Muhangi b'Abagande, Chipukeezy w'Umunyakenya, Kigingi w'Umurundi ndetse n'abandi batandukanye.

Ubugugu n'ubusambo bwa Clapton Kibonke, kimwe mu byaba byaratumye atandukana n'abagize Bigomba Guhinduka

By Our Reporter

Iminsi ibiri irashize, abanyarwenya babiri 5K Etienne na Japhet bamenyekanye nka Bigomba Guhunduka, batandukanye na Daymakers yabarebereraga iyobowe na Clapton Kibonke, bivugwa aba basore banze gukomeza gukora hagahembwa Clapton Kibonke.

Daymakers ni itsinda ry'abanyarwenya ryari rigizwe na Clapton Kibonke akaba n'umuyobozi waryo, Etienne na Japhet bazwi nka Bigomba Guhinduka, Makanika, Nimu Roger na Divine.

Iri tsinda kandi rikaba ryari riherutse gutandukana n'undi munyarwenya, Zaba Missed Call.

Etienne uzwi nka 5K na Japhet batangiye kumenyekana mu mpera za 2018 bitewe n'urwenya rwa Bigomba Guhinduka bazanye, barukora mu buryo butari bumenyerewe.

Ni urwenya batangira bavuga ku kintu runaka kitagenda neza bikiranya ku ngingo runaka basa n'abasetsa ariko na none harimo ubutumwa bageneye abantu, bagasoza bagira bati #BigombaGuhunduka.

Japhet na Etienne bazwi nka Bigomba Guhinduka

Aba basore babarizwaga muri Daymakers, bigaruriye imitima ya benshi mu gihugu, kugeza ubwo bakoraga igitaramo cya mbere cya #BigombaGuhinduka tariki ya 27 Mata 2019 mu ihema rya Camp Kigali, abantu baraje babura n'aho bicara, nyuma yaho tariki ya 28 Kamena 2019 bakoreye ikindi gitaramo i Musanze.

12 Ukwakira 2019 aba basore bateguye #BigombaGuhinduka igice cya kabiri, nacyo cyabereye mu ihema rya Camp Kigali, babonye abantu benshi.

Itandukaniro ry'iyi Bigomba Guhinduka n'iya mbere ni uko iya kabiri bari bafite umuterankunga ari we MTN wari wishyuye byose.

Amakuru agera ku kinyamakuru ISIMBI yahawe n'umwe mu nshuti z'aba banyarwenya, ni uko MTN yishyuye buri kimwe, salle n'ibindi byose igerekaho miyoni 6 yahaye Daymakers.

Nyuma y'ukwezi kumwe iki gitaramo kibaye, tariki ya 13 Ugushyingo 2019, nibwo 5K Etienne na Japhet buri umwe yashyize ku rukuta rwe rwa Instagram ko yamaze gutandukana na Dayamakers ariko bazakomeza gukorana nk'ikipe ya Bigomba Guhunduka.

Bamwe mu bari bagize itsinda rya Daymakers Japhet(ibumoso), Clapton Kibonke, Makanika(nawe ushobora kurivamo) na 5K Etienne(iburyo)

Ubwo ISIMBI yageragezaga kumenya ikintu cyatandukanyije aba banyarwenya, yavuganye na Japhet ariko mu magambo make yavuze ko bavuye mu ntoki z'ubuyobozi bwa Daymakers bwarebereraga inyungu zabo nta kindi kirenzeho.

Amakuru agera ku kinyamakuru ISIMBI yahawe n'umwe mu bantu ba hafi na Daymakers, avuga ko bapfuye ubugugu n'ubusambo bwa Kibonke akaba n'umuyobozi wa Daymakers, kuko aba basore batishimiye amafaranga bishyuwe.

Amakuru avuga ko ufashe miliyoni 6 MTN yishyuye, ukongeraho ayaguzwe amatike, Daymakers yakuyemo amafaranga akabakaba miliyoni 10.

Amakuru kandi avuga ko abantu kibonke yakoresheje muri iki gitaramo nta na miliyoni 2 yabishyuye kuko nk'abanyarwenya barimo Michael Sengazi, Patrick, Joshua, Kepha Lee na Bishop Gafaranga yifashishije muri iki gitaramo buri umwe yamwishyuye ibihumbi 40 by'amafaranga y'u Rwanda, ababwira ko ari ukumufasha bakazamura uruganda.

Iki gitaramo MTN yari yashyizemo amafaranga menshi

Abacuruje amatike, abari bashinzwe umutekano, Bushali waririmbye muri iki gitaramo, nabo bavugwa ko bishyuwe amafaranga make cyane.

Aba basore ba Bigomba Guhinduka bakaba batarashimishijwe n'uburyo ayo mafaranga yose yavuye muri iki gitaramo, cyanditse no ku izina ryabo, Clapton Kibonke yabishyuye amafaranga y'u Rwanda ibihumbi 500 ngo bagabane, buri umwe yafashe 250. Ibi bikaba byaratumye bahita bafata umwanzuro wo gutandukana na Daymakers.

Andi makuru kandi avuga ko na Makanika wo muri iri tsinda nawe asa nk'aho atakibarizwamo, ndetse no mu minsi ya vuba nawe ashobora kuzatandukana naryo mu buryo bweruye.

Ubwo twandikaga iyi nkuru, ISIMBI yavuganye na Clapton Kibonge avuga ko nta kintu na kimwe yufuza gutangaza kuri ibi bintu bya Daymakers.

Ni abasore bamaze kwigarurira imitima ya benshi
Inshuro zose bagiye bategura iki gitaramo cyagiye kitabirwa cyane

Nta mwanya dufite - Haruna Niyonzima

By Canisius Kagabo

Kapiteni w'ikipe y'igihugu y'u Rwanda, Haruna Niyonzima avuga ko nta mwanya bafite wo gutekereza ku byarangiye ahubwo ubu ari ukureba uburyo batsinda umukino wa Cameroun.

Ibi yabivuze nyuma yo gutsindwa na Mozambique ibitego 2-0, mu mukino wo mu itsinda F mu gushaka itike y'igikombe cy'Afurika cya 2021.

Uyu musore yavuze ko kuba bagiye gukina na Cameroun mu minsi ibiri gusa kandi batari mu Rwanda bazayisanga yo yarageze i Kigali ari ibintu bitoroshye.

Yagize ati"nk'uko umutoza yabivuze, ntabwo byoroshye kuba tugiye gukina umukino turi no hanze y'igihugu cyacu."

Yakomeje avuga ko ubu nta mwanya bafite yo gusubira mu bintu byatumye batsindwa n'ibindi bitageze neza ku mukino wa Mozambique, ahubwo ko bagomba guhita bajya mu mukino wo bazahuramo na Mozambique.

Yagize ati"Nta mwanya dufite wo kureba ibibazo cyane, ni ugushaka uburyo twashaka ibisubizo byihuse kugira ngo turebe uburyo twatsinda umukino w'i Kigali kuko bifite akamaro cyane."

Haruna Avuga ko bagifite amahirwe yo kubona itike y'igikombe cy'Afurika, bizeye kuzatsinda Cameroun ku mukino wa kabiri w'itsinda F uzaba ku Cyumweru tariki ya 17 Ugushyingo 2019.

Nta mwanya bafite wo gusubira kubyabaye ku mukino wa Mozambique

Umuhanzi Jidenna yishimiye cyane kuza mu Rwanda muri Kigali Jazz Junction

By Sylvestre Ntirushwa

Umuhanzi Jidenna Theodore Mobisson uzwi nka Jidenna watumiwe kuzaririmba mu gitaramo cya Kigali Jazz Junction cy'uku kwezi k'Ugushyingo 2019, yishimiye kuza mu Rwanda muri iki gitaramo anararika abantu bose kuzaza kwifatanya na we.

Iki gitaramo ngarukakwezi cya Kigali Jazz Junction giteganyijwe ku wa 29 Ugushyingo 2019 mu ihema rya Kigali Conference and Exhibition Village ahazwi nka Camp Kigali.

Mu bahanzi batumiwe muri iki gitaramo harimo Jidenna, umuhanzi ukomeye ukomoka muri Nigeria ariko akaba akorera umuziki muri Leta Zunze Ubumwe za Amerika wakunzwe cyane mu ndirimbo zinyuranye zirimo “Classic Man” yakunzwe n'abantu benshi cyane ku Isi.

Nk'uko yabyanditse ku rukuta rwe rwa Instagram, Jidenna yagize ati “Rwanda, nje ku bwanyu, nzaririmba muri Kigali Jazz Junction ku wa 29 Ugushyingo 2019. NIzeye kubabonayo mwese.”

Ni ubwa mbere uyu muhanzi w'imyaka 34 y'amavuko azaba ataramiye mu Rwanda aho azahurira ku rubyiniro n'umuhanzi nyarwanda ukunzwe cyane muri iyi minsi, Itahiwacu Bruce uzwi ku izina rya Bruce Melodie.

Bruce Melodie azaba yitabiriye igitaramo cya Kigali Jazz Junction nyuma y'icyo aheruka guhuriyemo na nyakwigendera Oliver Mtukudzi mu mpera z'Ukwakira 2018.

Jidenna agiye gutaramira mu Rwanda nyuma y'uko hashize amezi abiri akoze indirimbo yise “Sufi Woman” yifashishije umunyamideli ukomoka mu Rwanda witwa Uwanyuze Lilian.

Jidenna azataramira abanyarwanda mu mpera z'uku kwezi

Mashami Vincent aricuza

By Canisius Kagabo

Umutoza w'ikipe y'igihugu y'u Rwanda avuga ko yicuza amakosa bakoze yo guhagarara nabi mu kibuga byanavuyemo igitego cya kabiri, ariko na none ngo ni isomo rigiye ku mushafasha ku mukino azakiramo Cameroun ku munsi wo ku Cyumweru.

Amavubi y'u Rwanda yaraye atsinzwe na Mozambique ibitego 2-0 mu mukino wa mbere wo mu itsinda F mu gushaka itike y'igikombe cy'Afurika cya 2021.

Aganira n'itangazamakuru, Mashami Vincent avuga kuri uyu mukino, yavuze ko igitego cya mbere batsinzwe cya penaliti ari cyo cyabakuye mu mukino, ku giti cye yabonaga atari na penaliti.

Yagize ati"igitego cya mbere ndacyagishidikanyaho, icyemezo cy'umusifuzi, umusifuzi ashobora gutuma umukino ihindura isura, iyo ukinira hanze ugatsindwa igitego nka kiriya cya penaliti, biha imbaraga ikipe iri mu rugo, nibyo byabaye."

Yakomeje avuga ko mu minota 20 ya mbere bari bagerageje guhagarara neza mu kibuga ariko penaliti batsinzwe niyo yabakuye mu mukino bahagarara nabi.

Yagize ati"twakomeje gukina ariko igitego cya kabiri cyo ni amakosa yacu, ba myugariro bacu bahagaze nabi, rimwe na rimwe guhagagara nabi mu kibuga bibaho, bahinduye umupira mwiza ndetse nuwatsinze yatsinze igitego cyiza."

Mashami yicuza aya makosa bakoze bakoze ndetse ahamya ko ari yo agiye gukosora ku mukino wa Canmeroun uzaba ku munsi wo ku Cyumweru i Kigali mu Rwanda kuri Stade Regional ya Kigali.

Mashami ntabwo yishimiye umusifuzi kuri penaliti yatanze
Amavubi yaraye atsinzwe 2-0

Meddy agiye gusohora indirimbo yakoranye na Diamond na DJ Jordan

By Sylvestre Ntirushwa

Umuhanzi nyarwanda Ngabo Médard Jobert uzwi cyane mu muziki ku izina rya Meddy agiye gushyira hanze indirimbo yafatanyije na Diamond Platnumz na DJ we Rommy Jones uzwi nka Jordan.

Meddy n'aba bahanzi bo muri Tanzaniya banogeje ishyirwa hanze ry'iyi ndirimbo nyuma yo kwitabira igitaramo ngarukamwaka cya Wasafi Festival yari yatumiwemo cyabaye ku wa 10 Ugushyingo 2019.

Umushinga w'iyi ndirimbo watangiye mu mpera z'umwaka ushize ubwo Meddy yataramiraga muri Tanzaniya akanaboneraho gukorana indirimbo Diamond Platnumz ndetse na DJ we witwa Jordan cyangwa se Rommy Jones.

Abinyujije ku rukuta rwe rwa Instagram, Meddy yanditse agaragaza ko indirimbo yabo bombi igiye kujya hanze.

Si ibyo gusa kandi kuko Rommy Jones na we yatanze igitekerezo gishimangira ibyo Meddy yari yanditse.

Mu kwezi kwa Kanama 2019 Rommy Jones yabwiye Wasafi Radio ya Diamond ko yasabye ubushuti Meddy kuri konti ya Instagram kugira ngo bazakorane indirimbo.
Yamamaza alubumu ye yise ‘Changes' ikubiyemo indirimbo 12, Rommy Jones yavuze ko hari ho indirimbo yakoranye na Meddy wo mu Rwanda anavuga ko ari we wamukuyemuri Amerika na Diamond banoza ikorwa ry'iyi ndirimbo. Iyi ndirimbo yakorewe muri Tanzaniya ariko ikorwa na Producer Made Beats wo mu Rwanda.

Meddy amaze imyaka icyenda akorera umuziki muri Leta Zunze Ubumwe z'Amerika. Mu bihe bitandukanye yataramiye i Kigali n'ahandi hatandukanye muri Afurika kubera indirimbo ze zikundwa na benshi.

Meddy yatumiwe mu gitaramo cya Wasafi Festival cyabaye ku Cyumweru tariki ya 10 Ugushyingo 2019, aho yahuriyemo n'abandi bahanzi bakomeye muri Afurika nka Wizkid, Diamond na Tiwa Savage.

Jay Polly yanyomoje iby'uko ashyamiranye n'umugore we

By Sylvestre Ntirushwa

Umuraperi Tuyishime Joshua wamamaye ku izina rya Jay Polly yanyonoje amakuru amaze iminsi acaracara avuga ko ashyamiranye n'umugore we nyuma yo gufungurwa muri Mutarama uyu mwaka.

Uku gushyamirana kwatangiye kuvugwa ubwo Jay Polly yafungwaga, azira gukubita no gukomeretsa umugore we Uwimbabazi Sharifa akamukura amenyo, bituma akatirwa igifungo cy'amezi atanu n'urukiko rw'ibanze rwa Gasabo ku wa 24 Kanama 2018 nyuma yo kwemera icyaha no guca bugufi agasaba imbabazi akagabanyirizwa igihano cyagombaga kuba igifungo cy'umwaka.

Mbere y'uko afungwa Jay Polly yari yasabye imbabazi umugore we ndetse amugurira andi menyo asimbura ayakutse.

Jay Polly yafunguwe ku wa 1 Mutarama 2019 nyuma yo kurangiza igihano cye, yakiranwa urugwiro n'umugore we n'umwana.

Nyuma y'ibi bibazo byose byashyamiranije Jay Polly n'umugore we, abantu bakomeje gukwirakwiza amagambo y'uko nyuma yo gufungurwa n'ubundi yakomeje kugirana ibibazo bya hato na hato n'umugore we gusa yabinyomoje mu kiganiro yagiranye n'umunyamakuru w'Isango Star nyuma yo kubazwa impamvu babyinanye mu ndirimbo kandi bivuguwa ko batabanye neza.

Yagize ati “Umugore wanjye twabyinanye mu ndirimbo ‘Nari high' kuko tumeranye neza ndetse ni ibintu dukora kugira ngo twuzuze inshingano zose tuba dusabwa muri business zacu. Kubera ko dusanzwe dukorana, igikenewe turagikora, ikidakenewe tukakireka.”

Jay Polly uherutse gusora amajwi y'indirimbo ‘Bipapare' yavuze ko mu cyumweru gitaha ari bwo azashyira hanze amashusho yayo ndetse anemeza ko yasubiyemo amashusho y'indirimbo ‘Nyirizina' nyuma y'uko amashsusho y'iya mbere atari yishimiwe n'abakunzi be.

Uyu muraperi kandi yakomoje kuri alubumu yise “Mu nkuta enye” yitegura gushyira hanze mu minsi ya vuba, avuga ko nubwo yari yateganyije iyi alubumu izaba iriho indirimbo umunani ariko abona ko ashobora kuzongera.

Iyi alubumu yitegura gushyira hanze imaze kugeraho indirimbo eshanu ari zo: ‘Umusaraba wa Joshua', ‘Inshuti nyazo', ‘Nyirizina', ‘Nari high' yafatanyije n'abahanzi bo muri The Mane na ‘Bipapare'.

Jay Polly ngo abanye neza n'umugore we bafitanye n'umwana

BDF imaze gutanga agera kuri miliyari 80 mu mishinga, ivuga ko igifite imbogamizi

By Our Reporter

Ikigega gifasha imishinga mito n'iciriritse (BDF) kivuga ko kimaze gutanga agera kuri miliyari 80, ndetse kikaba cyishimira ko hari icyo kimaze guhindura ku buzima bw'abanyarwanda n'ubwo bagihura n'imbogamizi zimwe na zimwe harimo abakigana batujuje ibisabwa.

Ibi BDF yabitangarije mu kiganiro nyunguranabitekerezo yagiranye n'itangazamakuru ku munsi w'ejo hashize ku wa Kane tariki ya 14 Ugushyingo 2019.

Kugira ngo BDF yishingire cyangwa itere inkunga umushinga wawe hari ibisabwa, nko kuba ukorana n'ikigo cy'imari runaka, kuko ari ho ujyana umushinga wawe bawemera BDF ikabona kuwutera inkunga, kugira uruhare mugutanga ingwate byibuze ya 25% n'ibindi.

BDF yishingira ingwate iri hagati 50%-75% by'inguzanyo yatanzwe n'ibigo by'imari ku ngano y'ingwate yasabwe, indi ikabazwa nyirayo. BDF kandi ntirenza miliyoni magana atanu (500 000000 Frw).

Umugwaneza Carine ushinzwe imenyekanishabikorwa muri BDF, avuga ko kuva 2011 BDF yashingwa, bishimira ibyo bagezeho.

Yagize ati"kuva twatangira muri 2011 navuga ko muri BDF tumaze kubona ifite akamaro cyane mu banyarwanda, hari benshi bifuza serivisi zayo ku buryo hari abatari bake bamaze kutugana kandi byagiriye akamaro."

Yakomeje avuga ko kugeza ubu bagihura n'imbogamizi z'abantu babagana bifuza inguzanyo ariko batujuje ibisabwa.

Yagize ati"imbogamizi duhura nazo, n'ubwo tubereyeho gufasha abo bato, amafaranga tubona hari uburyo tugomba kuyatangamo, hari ibyo tugenderaho ntabwo dupfa kuyatanga, ari byo usanga ari imbongamizi ba rwiyemezamirimo bagenda bahura nazo kugira ngo babashe kubona kuri ya mafaranga, nk'urugero natanga ku rubyiruko hari abatubwira ko n'aya 25% mudusaba ntayo tubasha kubona izo ni zimwe mu mbogamizi tumaze guhura nazo.”

BDF ikaba isaba abafata inguzanyo bishingiwe na BDF, ko igihe bahuye n'imbogamizi mu mikorere bahita begera BDF ikabaha inama ku cyakorwa aho guhunga cyangwa ngo yihishe ikigo cy'imari na BDF.

Mu kiganiro nyuguranabitekerezo n'abanyamakuru

Yannick Mukunzi yabaye umukinnyi w'umwaka muri Sandvikens IF

By Canisius Kagabo

Umukinnyi w'umunyarwanda ukinira ikipe ya Sandvikens IF mu cyiciro cya gatatu muri Sweden, Yannick Mukunzi yatowe nk'umukinnyi w'umwaka muri iyi kipe kimwe na mugenzi we w'umunya - Sweden, Rasmus Lindgren.

Mu gihe bimenyerewe ko mu yandi makipe hatorwa umukinnyi umwe wahize abandi, iyi kipe yo ikaba yahisemo gutoranya abakinnyi babiri bahize abandi muri uyu mwaka w'imikino basoje tariki ya 2 Ugushyingo 2019 ubwo batsindwaga ku mukino usoza shampiyona na Vasalund ibitego 3-1.

Yannick Mukunzi utaritabiriye ubutumire bw'ikipe y'igihugu kubera imvune, ndetse n'imikino iheruka ikipe ye yakinnye ntiyayikinnye, yaje gutorwa nk'umukinnyi w'umwaka muri Sandvikens iF ku mwaka we wa mbere ayikiniye.

Bimwe mu byashingiweho uyu musore agirwa umukinnyi w'umwaka, ni uko kuva yagera muri iyi kipe mu ntangiriro z'uyu mwaka, yahise ajya muri 11 babanza mu kibuga b'iyi kipe ubudasimbirwa, byatumye umwe mu basore bitwaraga neza hagati mu kibuga b'iyi kipe, Slava Koidan yibagirana.

Uyu musore ngo afite ubushobozi bwo gufasha ikipe mu kugarira ndetse no gusatira igihe ikipe imukeneye, afite imbaraga ndetse n'umuvuduko byagiye bifasha ikipe ye mu kibuga hagati bigatuma yambura imipira myinshi.

Uko iminsi yagendaga ishira ari muri iyi kipe yagiye azamura urwego aho yagiye yongera imipira yatangaga ivamo ibitego ndetse no gutsinda aho yayitsindiye igitego anatanga imipira ivamo ibitego 3.

Sandvikens IF ya Yannick Mukunzi yasoje ku mwanya wa 7 muri shampiyona n'amanota 43, ni mu gihe igikombe cyegukanywe na Akropolis n'amanota 75.

Yannick Mukunzi ni umukinnyi mpuzamahanga w'umunyarwanda ukinira ikipe ya Sandvikens IF muri Sweden, yayinjiyemo mu ntangiriro z'uyu mwaka avuye muri Rayon Sports, akaba yarakuriye mu ishuri ryigisha umupira rya APR FC ndetse anakinira APR FC nkuru.

Ngo ni umukinnyi wafashije iyi kipe cyane mu kibuga hagati
Ku mwaka we wa mbere yabaye umukinnyi w'umwaka
Ubukonje ni kimwe mu bintu byagoye Yannick Mukunzi muri Sweden

Amavubi atsindiwe muri Mozambique

By Canisius Kagabo

Amavubi ntiyahiriwe n'umukino ufungura itsinda mu gushaka itike y'igikombe cy'Afurika aho yatsindiwe muri Mozambique ibitego 2-0.

Wari umukino wa mbere Amavubi yakinaga mu gushaka itike yo gushaka itike y'igikombe cy'Afurika cya 2021, muri iri tsinda F Cameron yaraye inganyije na Cape Verde 0-0.

Ni umukino Mozambique yatangiye irusha Amavubi guhera ku munota wa mbere, basatiraga cyane ariko ubwugarizi bw'Amavubi bubanza kubyitwaramo neza.

Akagozi kaje gucika ku munota wa 25 ubwo Mozambique yabonaga penaliti kumupira Rwatubyaye yari amaze gukorera mu rubuga rw'amahina, yaje kwinjizwa neza na Edson Andre.

Ku munota wa 27 Stelio Ernesto yatsinze igitego cya kabiri.

Amavubi yakomeje gushaka uko yakwishyura ndetse anakora impunduka havamo Kevin Muhire hinjiramo Niyonzima Olivier Sefu ku munota wa 43, ariko igice cya mbere kirangira ari 2-0.

Mu gice cya kabiri Amavubi yagerageje gushaka uburyo yishyura ibi bitego, Mashami Vincent akora n'izindi mpinduka havamo Hakizimana Muhadjiri hinjiramo Sibomana Patrick Papy.

Izi mpinduka ntacyo zafashije Amavubi kuko umukino warangiye ari 2-0.

Amavubi nyuma yo gustindwa uyu mukino akaba agiye guhita agaruka mu Rwanda aho aho azagera mu Rwanda ku wa Gatandatu, ku Cyumweru ikaba izakina na Cameron mu mukino nawo wo mu itsinda F.

Diana Teta azitabira Iserukiramuco rikomeye mu Bubiligi anagurishirizemo alubumu yise “Iwanyu”

By Sylvestre Ntirushwa

Umuhanzikazi nyarwanda, Diana Teta, usigaye ubarizwa ku Mugabane w'Uburayi yatumiwe kuririmba mu Iserukiramuco rikomeye mu Bubiligi azanagurishirizamo alubumu ye nshya yise ‘Iwanyu'.

Iri serukiramuco yatumiwemo rizaba ku wa Kane tariki ya 22 Gashyantare 2020 ndetse amatike yo kwinjira yatangiye kugurishirizwa ku rubuga rwa www.concertgebouw.be

Mu myanya isanzwe ni amayero makumyabiri n'atandatu (€26.00) ariko ku bantu bari munsi y'imyaka 26 y'amavuko kwinjira ni amayero cumi n'atatu (€13.00), mu gihe ku bari hejuru y'imyaka 65 y'amavuko kwinjira ari amayero makumyabiri n'atatu n'ibice mirongo ine (€23.40).

Nk'uko yabitangarije Inyarwanda dukesha iyi nkuru, Teta yavuze ko ikigamijwe ari ugusakaza umuco n'ururimi rw'aho avuka kandi ko azishimira gutanga umusanzu we muri urwo rugendo n'iyo waba muto.

Teta Diana watumiwe muri iri serukiramuco rizabera mu Mujyi wa Bruges mu Bubiligi, ari kubarizwa mu gihugu cya Suède ndetse avuga ko yatangiye kwitegura kugira ngo azahatambukane umucyo.

Yakomeje avuga ko abazitabira iki gitaramo bazaboneraho no kugura ‘CD' za alubumu ye yise “Iwanyu” zamaze gusohoka.

Ubusanzwe mu Bubiligi haba aba Wallons (bavuga Igifaransa) n'aba Flamands (Bavuga Igifurama), Teta Diana akaba yaratumiwe na ‘communauté Flamande'.

Muri iri serukiramuco kandi Teta azahuriramo na Dalilla Hermans, umugore w'umunyamakuru akaba n'umwanditsi w'ibitabo.

Iri serukiramuco rirangwa n'umuziki ndetse n'inkuru mbarankuru byose bishamikiye ku buvanganzo. Teta Diana we aherekejwe n'abacuranzi, hanyuma Dalilla Hermans we azatanga ikiganiro ku bitabo yanditse.

Teta Diana asanzwe akora umuziki w'uruvange rwa 'Gakondo' n'izindi njyana zirimo Pop&Rock, Jazz na World music, yakunzwe mu ndirimbo zitandukanye nka ‘Canga ikarita', ‘Tanga Agatego', ‘Velo' n'izindi zitandukanye.

Teta umaze imyaka itatu abarizwa ku Mugabane w'Uburayi, aheruka i Kigali mu gitaramo cya Kigali Jazz Junction yaririmbyemo ku wa 29 Werurwe 2019.

11 b'Amavubi bagiye kubanzamo ku mukino wa Mozambique

By Canisius Kagabo

Umutoza w'ikipe y'igihugu y'u Rwanda, Mashami yamaze gutoranya abakinnyi 11 bari bubanze mu kibuga ku mukino wa Mozambique mu mukino w'itsinda F mu gushaka itike y'igikombe cy'Afurika cya 2021.

Ni umukino uteganyijwe ku isaha ya saa 18:00' za hano i Kigali, ukaba uri bubere ku kibuga cya Estádio do Zimpeto muri Mozambique.

Mu bakinnyi 23 umutoza Mashami Vincent yahagurukanye mu Rwanda, uretse Emery Bayisenge wahuye n'ikibazo cy'imvune abandi bose bameze neza.

Mu bakinnyi 11 bari bubanze mu kibuga, bayobowe na kapiteni w'iyi kipe Haruna Niyonzima.

Biteganyijwe ko nyuma y'uyu mukino Amavubi azahita agaruka i Kigali aho azahagera ku wa Gatandatu mu gihe ku Cyumweru azahita akina umukino wa kabiri muri iri tsinda F na Cameron.

Dore 11 bari bubanzemo

Umunyezamu: Kimenyi Yves

Ba myugariro: Omborenga Fitina, Rwatubyaye Abdul, Nirisarike Salomon na Imanishimwe Emmanuel Mangwende

Abakina hagati: Bizimana Djihad, Muhire Kevin na Niyonzima Haruna

Ba rutahizamu: Hakizimana Muhadjiri, Kagere Meddie na Jacques Tuyisenge

Aba-Djs mpuzamahanga barimo Umufaransa Dj Shine bazagaragara mu gitaramo gisoza umwaka

By Sylvestre Ntirushwa

Mu gitaramo ngaruka mwaka kizwi nka “New Year's Count Down” kizaba ku wa 31 Ukuboza 2019, kizagaragaramo aba-Djs mpuzamahanga bo mu Rwanda no hanze yarwo.

Iki gitaramo cyateguwe na Radisson Blu Hotel & Convention Centre Kigali ku bufatanye na Rwanda Events Group cyanatumiwemo abahanzi batandukanye barimo na Fally Ipupa uri mu bahanzi bakomeye bakomoka muri Repubulika Iharanira Demokarasi ya Congo mu rwego rwo guherekeza umwaka wa 2019 no gutangira uwa 2020.

Mu bitaramo byabanjirije icy'uyu mwaka, byagaragayemo abahanzi batandukanye bakomeye muri Afurika nka Koffi Olomide, Sauti Sol, Yemi Alade n'aba-Djs bo mu Rwanda no hanze yarwo.

Aba-Djs bazafatanya na Fally Ipupa gusurutsa abazitabira iki gitaramo barimo DJ Toxxyk wo mu Rwanda watangiye gukora akazi ko kuvanga imiziki mu mwaka wa 2011.

Umunyatanzaniyakazi Dj Sinyorita uri mu bakomeye cyane mu Mujyi wa Dar es Salaam hamwe na Dj Shine wo mu Bufaransa uzwi nka “The 1 N only” watangiye kwamamara ataruzuza imyaka 20 y'amavuko, yakoranye n'abahanzi bakomeye barimo Booba, Maître Gims n'abandi. Uyu azwi mu bihugu bitandukanye byo ku migabane y'u Burayi, Aziya, Afurika n'Amerika.

Biteganyijwe ko iki gitaramo kizatangira guhera saa mbili z'umugoroba. Kwinjira bizaba ari mirongo itanu (50,000 Frw). Amatike ashobora kugurirwa ahantu hatandukanye hatoranyijwe muri Kigali harimo no kuri Convention Centre ndetse no ku rubuga rwa www.events.rw.

Muri ibi birori bisoza umwaka wa 2019 hazaraswa ibishashi bidasanzwe mu buryo buteguranywe ubuhanga nk'uko byagiye bigenda mu myaka yabanje.

DJ Shine wo mu Bufaransa
Dj Toxxyk
DJ Sonyorita wo muri Tanzania
❌