WebRwanda.com

🔒
❌
There are new available articles, click to refresh the page.
Before yesterdayUMUSEKE

Gakenke: Bake bavuga bazi RIB, yo ikavuga ko ishaka kumenyekana kurenza 90%

By Ange Eric Hatangimana

Abaturage bo mu Karere ka Gakenke bavuga ko biteguye gufatanya n’Urwego rw’Igihugu Rushinzwe Ubugenzacyaha (RIB), mu kazi ko gukumira ibyaha bitaraba ndetse no kurufasha gukurikirana ababikoze mu gihe byabaye; mu bukangurambaga bwo kumenyekanisha uru rwego hari bamwe mu baturage bavuze ko bataruzi.

Umunyamabanga wungirije wa RIB, Mme KAYIRANGABO Isabelle ni we wari mu Gakenke gusobanura ibyo bashinzwe

Kuri uyu wa gatanu tariki ya 30 Kanama 2019 RIB yakoze ubukangurambaga bwo kumenyekanyisha ibikorwa byayo mu baturage b’Akarere ka Gakenke, byabereye muri (Centre) ya Gakenke.

Guverineri w’Intara y’Amajyaruguru, GATABAZI Jean Marry Vianney yasabye abaturage kuba inshuti za RIB bagafasha mu gukumira ibyaha ndetse no gutanga amakuru ku gihe aho byabaye.

Ati “Turashaka ko buri muturage amenya RIB, turaza gukora ibishoboka byose tuzamure igipimo cy’abaturage bazi ibikorwa bya RIB ku buryo buri wese arenganurwa igihe yarenganyijwe. Yakomeje avuga ko nta muturage ukwiriye kubura uburenganzira kandi uru rwego ruhari.”

Umunyamabanga Mukuru wungirije wa RIV, Mme KAYIRANGABO Isabelle yavuze ko ubu bukangurambaga bugamije kumenyekanisha RIB mu baturage bo mu gihugu hose kugira ngo bamenye icyo ibamariye ndetse n’icyo bashobora kuyimarira na bo.

Yanavuze ko kumenya RIB bidasaba gusa kuba hakozwe ibyaha. Ati “Kumenya RIB si ukuba wakoze cyangwa wakorewe icyaha, RIB ni urwego rubereyeho gukumira ibyaha mbere na mbere. Kumenye RIB bigufasha gukumira ibyaha cyangwa uko wakwirinda kugwa mu byaha. Ubukangurambaga nk’ubu bufasha kumenya ibyaha biriho, bigafasha mu kubyirinda no kubikumira.” 

Bamwe mu baturage baganiriye na Umuseke bavuze ko bishimiye kumenya imikorere ya RIB dore ko bayumvaga mu magambo batazi icyo ikora,  abandi bavuga ko batari bayizi.

NIYOMUNGERI Theonestine yagize ati “Ndishimye kuba menye icyo RIB imaze, ntabwo nari nzi icyo ikora n’uko ikora, ariko kuba mbimenye ni byiza, ubu natwe tugiye kujya tuyiha amakuru kugira ngo iturenganure aho turengana.”

Abaturage bo mu Karere ka Gakenke bishimiye ko ibibazo bari bafite byakiriwe kandi bigahabwa umurongo n’ubuyobozi, ku buryo bagize ikizere ko bizakemuka.

Ni ubwa mbere Urwego rw’Igihugu Rushinzwe Ubugenzacyaha (RIB) rukoreye ubukangurambaga nka buriya mu Karere ka Gakenke, ariko na rwo rumaze umwaka umwe n’igice rushyizweho, abaturage bari bamenyereye ishami rya Polisi rigenza ibyaha (CID).

Urwego rw’imenyekanishabikorwa bya RIB ngo ruri kuri 18%, biyemeje kubizamura bikarenga 90%, bikazakorwa binyuze mu bukangurambaga bw’ibikorwa bihuza ubuyobozi n’abaturage.

Guverineri w’Intara y’Amajyaruguru GATABAZI Jean Marie Vianney avuga ko abaturage bamenye RIB byatuma batemera kurengana

Abaturage bo muri Gakenke bamwe bavuga ko batari bazi RIB uretse kumva ivugwa kuri radiyo

NDIKUMWENAYO Thierry/ UMUSEKE.RW i Musanze

Burera: Abamenye gusoma bakuze bashishikariza abatabizi kugana isomero

By Ange Eric Hatangimana

Abageze mu zabukuru bo mu Murenge wa Kinoni, Akarere ka Burera bavuga ko kutamenya gusoma no kwandika byabahejeje mu bukene, bagasaba  ko umubare w’amasomero wiyongera.

Abiga gusoma no kwandika bakuze bavuga ko amasomero akiri make mu Karere ka Burera

Ubwo hasozwaga icyumweru cyahariwe gusoma no kwandika, bavuze ko gusoma no kwandika ari umurage w’ubukungu utakwiye gukereswa.

Nyiramana Beatrice mu myaka 37 amaze avutse, avuga ko yabaye igihe kirekire mu mwijima w’igihu biganisha ku bukene.

Yagize ati: “Kutamenya gusoma no kwandika uba ubundikiwe n’igihu gituma udashobora kwiteza imbere, nkanjye iyo mbaze amafaranga najyaga nibwa mu bihe byashize ntaragana isomero, nsanga ari igihombo kinini cyane. Najyanaga igifuka k’ibirayi ku isoko kubera kutamenya kubara umunzani bakanyiba ubwo nkaba ndahombye.”

Kutamenya gusoma ngo no mu nzira byamubagaho akagera ku cyapa ntamenye ibyo kivuga, ubu isomero ryaramuhumuye ashobora gukoresha telefone yohereza ubutumwa.

Uyu mubyeyi akomeza asaba ubuyobozi kongera umubare w’amasomero muri Burera ngo kubera ko amateka y’imiyoborere hari abageze mu za bukuru n’ubu batazi gusoma no kwandika.

Yagize ati: “Twakuze tuzi ko umurimo ari uguhinga no korora, ibindi ko bizanwa n’amahirwe, ubwo rero twiberaga muri ibyo  ariko tumaze kubona ko utazi gusoma ntiyakwizigamira, ntashobora kohereza no kwakira amafaranga binyuze mu ikoranabuhanga.”

Avuga ko nubwo amasomero akiri make, ngo ni ngombwa ko n’ahari ashishikariza abaturage kuyagana.

Umuyobozi w’agateganyo w’inkoranyabitabo y’Igihugu  Nyirabahizi Beatha avuga ko kutamenya gusoma bidindiza iterambere, ngo kuko ubukungu bwihishe mu bitabo.

Ati: “Kuri ubu kugira ngo utere imbere ni uko uba ufite amakuru kandi byose biva ku bumenyi bushingiye ku kumenya gusoma no kwandika, ntiwashobora korora cyangwa guhinga kijyambere utafashe ibitabo bitandukanye bibivugaho ngo ubisome n’ikoranabuhanga ryakuyobora, ariko ibyo byose utabizi iterambere ryamugora.”

Avuga ko buri wese utaragize amahirwe yo kumenya gusoma no kwandika mu bihe byahise, akwiye guhagurukira kubimenya ngo igihugu cyabishyizemo ingufu kubera imiyoborere myiza.

Umuyobozi w’Akarere ka Burera, Uwambajemariya Florence avuga ko bashyize ingufu mu kwigisha gusoma no kwandika hifashishijwe uburyo bwose.

Ati: “Kuri ubu ubuyobozi bwashyize ingufu mu kwigisha abakuze n’abato batazi gusoma no kwandika kuko buriya no gusoma neza kimwe no kwandika ni kimwe mu bikumira amakimbirane.”

Akarere ngo kifashisha abafatanyabikorwa barimo amadini n’amatorero mu kwigisha bose, ndetse ngo amasomero azagenda yongerwa.

Akarere ka Burera gafite amasomero aciriritse yigisha abakuze gusoma no kwandika 224.  Abagera ku 5527 barangijemo binyuze  muri gahunfda ya Mureke Dusome.

Hari n’isomero ryitwa Sunzu Yacu rifitemo za mudasobwa.

Igihugu gifite amasomero 67 yujuje ibya ngombwa harimo ibikoresho nkenerwa by’ikoranabuhanga. Mu 2024 bateganya kongeraho andi 30  azubakwa ahatandukanye mu gihugu hose.

BAHIZI PRINCE VICTORY/Umuseke .rw

Umusore wishe abantu i Nyanza na we yarashwe, kimwe n’uwishe umugore we i Rubavu

By Ange Eric Hatangimana

Abagabo babiri, umwe w’i Nyanza, uheruka gutema abantu batanu barimo abo mu muryango we n’abaturanyi, ndetse n’uw’i Rubavu wishe umugore babanaga amutemye, inzego z’umutekano ziratangaza ko barashwe bagapfa bagerageza gucika.

Gisagara wishe mubyara we na mwishywa we mu Murenge wa Muyira na we yarashwe na Polisi

Ku wa gatanu Umuseke wari wabagejejeho inkuru y’Umugabo witwa Mahangayiko wo mu Murenge wa Nyamyumba, mu Karere ka Rubavu wishe umugore we, Uzamukunda amutemeye mu murima w’ibisheke, Mahangayiko na we yishwe arashwe atoroka Polisi.

CIP Emmanuel Kayigi yabwiye Umuseke ko Mahangayiko yarashwe saa 17h00  imodoka imuvanye aho yakoreye icyaha mu Murenge wa Nyamyumba bageze mu Murenge wa Rugerero ngo yasimbutse imodoka agira ngo acike.

Ati “Yari yabaye nk’inyamaswa yikingiranye mu nzu yanze kuvamo, abaturage bayigose bamuvugiriza induru, ubwo rero yasimbutse imodoka anyuze mu maguru y’Umupolisi na we amwirukaho amurasa agira ngo ahagarare kuko yari ashotse mu kabande. Aho bamufatiye yajyanwe kwa Muganga i Gisenyi aza kugwa mu nzira.”

Undi mugabo witwa Gisagara Innocent wo mu Murenge wa Muyira mu Karere ka Nyanza, ku wa kane tariki 29 Kanama yishe umwana w’umuhungu w’imyaka 12 wa mushikiwe amutemye, ndetse na Mubyara we wari ugiye gutabara, anakomeretsa abantu batatu barimo abaturanyi be babiri na mushikiwe yari yagambiriye kwica.

Uyu na we yarashwe mu gitondo cyo kuri uyu wa gatandatu tariki 31 Kanama 2019.

Commissioner of Police, John Bosco Kabera yemereye Umuseke amakuru yo kuraswa kwa Gisagara w’imyaka 32 y’amavuko.

Ati “Yego, yararashwe ashaka gutoroka nyuma y’aho afashwe amaze kwica abantu babiri agakomeretsa batatu. Byabaye mu mu gitondo saa kumi n’ebyiri igihe abafungwa baba bajyanywe ku musarane.”

CP Kabera asaba abaturage kudakora ibyaha, no kwemera gushyikirizwa ubutabera mu gihe bakoze icyaha bagafatwa.

Ati “Ntabwo ukwiye kwiyemeza gukora icyaha kuko uzi ko uzagerageza gucika cyangwa gutoroka.”

NIZEYIMANA Jean Pierre
UMUSEKE.RW

Bugesera: Bavuye i Kigali bajya mu muganda no gutanga Mutuweli ku batishoboye

By Ange Eric Hatangimana

Abakozi bo mu Kigo gishinzwe gutwara abagenzi mu Mujyi wa Kigali, bishyuriye Mutuweli abaturage 100 batishoboye, banabafasha gukora Umuganda ngarukakwezi.

Bamwe mu bakozi ba KBS mu Muganda ngarukakwezi wabereye mu Mudugudu wa Kagasa ya Kabiri, mu Murenge wa Gashora

Ibi bikorwa byombi byabereye mu Mudugudu wa Kagasa II, Akagari ka Ramiro mu Murenge wa Gashora mu Karere ka Bugesera.

Umuganda wakorewe hafi y’Umudugudu watujwemo abaturage bo mu Kiciro cya mbere cy’Ubudehe n’abandi bo mu cya kabiri bafite ubushobozi buke.

Umuyobozi Mukuru w’Ikigo gishinzwe Gutwara abagenzi (KBS),  Habanabakize Emmanuel avuga ko iki gikorwa cyo kwishyurira Mutuweli abatishoboye no gukorana na bo umuganda ngarukakwezi, bagitangiriye muri Kigali, ubu bakaba bariyemeje kukigeza no mu tundi Turere, buri mwaka.

Yagize ati: “Amafaranga Ikigo kinjiza kiyahabwa n’abagenzi niyo mpamvu twongera kwishakamo umusanzu uva mu bihembo byacu tukaremera abatishoboye muri bo, tunakorana na bo Umuganda wa buri kwezi.”

Bamurange Beatha umwe mu bishyuriwe Mutuweli, avuga ko ikiciro cya kabiri cy’Ubudehe yashyizwemo nta sano gifitanye n’imibereho ye kuko aheruka kwiyishyurira Ubwisungane mu kwivuza mu mwaka wa 2006.

Yagize ati: “Mfite umuryango w’abantu batandatu, no kubona ibyo bafungura ni ikibazo kitanyoroheye, ubu biranshimishije kuba aba bakozi banyishyuriye.”

Avuga ko aheruka gutunga ikarita ya Mutuweli, akiba mu Kiciro cya mbere cy’Ubudehe.

Umuyobozi w’Ishami ry’Imiyoborere mu Karere ka Bugesera, Sebatware Magellan akaba ari na we wari uhagarariye Ubuyobozi bw’Akarere, yabwiye  Umuseke ko  kwakira abantu babafasha gukora umuganda ari kimwe, kwishyurira Mutuweli abatishoboye kikaba ikindi.

Avuga ko abantu 100 bahawe ubwisungane bwo kwivuza bazazamura imibare Umurenge wa Gashora wari usanzwe ufite ukanafasha Akarere kwesa umuhigo wa Mutuweli w’Umwaka wa 2019-2020.

Ati: “Turasaba n’ibindi Bigo bitwara abagenzi gutera ikirenge mu cy’abakozi ba KBS  by’umwihariko bitaye cyane ku baturage bafite ubushobozi buke.”

Bamwe mu batuye Umudugudu b’Umurenge wa Gashora muri rusange babwiye Umuseke ko bafite impungenge ko imvura iramutse itinze kugwa bashobora guhura n’inzara kubera ko n’imyaka bari bahinze yahuye n’izuba ry’igikatu irarumba.

Ibumoso DG Habanabakize Emmanuel na Rudasingwa Victor Emmanuel Umujyanama w’Akarere ka Bugesera bakora Umuganda

Aba Bakozi bishyuriye Mutuweli abaturage 100

Umuyobozi Mukuru w’Ikigo gishinzwe Gutwara abagenzi KBS Habanabakize Emmanuel avuga ko kwishyurira Mutuweli abatishoboye ari igikorwa gikomeza.

MUHIZI ELISEE
UMUSEKE.RW/Bugesera.

Uvugwaho gucuruza urumogi ati: “ Mfashwe kubera inzara, urubyiruko ruyigabanye…”

By Jean Pierre Nizeyimana

Umusore w’imyaka 19 wafatanywe na shoferi w’ikamyo ya benz  bapakiye urumogi  rupima ibilo 23 n’igice yabwiye itangazamakuru ko yarupakiye nyuma yo kwemererwa n’umuntu ko narugeza i Kigali azahabwa Frw 30 000. Ngo yari yapakiye udupfunyika turenga 1000 ariko yatunguwo no kwerekwa ko yari apakiye udupfunyika 18 800.

Uyu musore uri mu mabyiruka avuga ko inzara no gukunda ifaranga aribyo byatumye yemerera umuntu kumuzanira urumogi aruvanye muri DRC

Uyu musore wavuganaga ikiniga avuga ko ngo hari umugabo wamuhamagaye ubwo yari agiye muri Repubulika ya Demukarasi ya Kongo amusaba kuzamuzanira iriya mari(urumogi), akamuha Frw 30 000.

Ati: “Yarambwiye ngo nomero yanjye yayihawe n’uwitwa Christophe, ansaba kuzamuzanira urumogi muri  DRC kubera imibereho mibi ndabyemera none ndafashwe.”

Asaba abandi bakiri bato kugabanya inzara kuko ngo ariyo imukozeho.

Yemeza ko imibereho mibi ari yo yamusunikiye gukora buriya bucuruzi butemewe.

Umugabo wari utwaye ikamyo yo mu bwoko bwa Benz basanzemo ruriya rumogi witwa Gerald avuga ko we yabyutse akatsa imodoka nk’uko bisanzwe, ko nta makuru y’uko yari ipakiye urumogi yari afite.

Ngo we imodoka afite aho ayiraza, agataha akaza kuyatsa urugendo rugakomeza.

Gerald ku rundi ruhande yinenga ko atasuzumye neza ibyo imodoka ye ipakiye ariko akavuga ko ibyo kurupakira nta makuru yari abiziho.

Shoferi w’ikamyo yafatiwe i Kigali yinenga ko atasuzumye umutwaro mbere yo guhaguruka

Ngo yatunguwe. Uyu mugabo ufite urugo n’abana akaba atuye mu Karere ka Kamonyi yaburiye abashoferi bagenzi be ‘kujya baba maso ntibapakire umuzigo batasuzumye.’

Umuvugizi wa Polisi mu mujyi wa Kigali CIP Marie Goretti Umutesi avuga ko kugira ngo bamenye amakuru y’uko bariya bantu bari batwaye ikiyobyabwenge babibwiwe n’abaturage nabo babibwira Polisi mu Ntara y’i Burengerazuba ifata ikamyo imwe ariko abafashwe batanga amakuru ko hari indi kamyo yerekeza i Kigali ifatwa kuri uyu wa Kane.

Ati: “ Ni amakuru twahawe n’abafatiwe Rubavu natwe turakurikirana dufata aba mureba.  Ni uruherekane rw’abantu bacuruza iki kiyobyabwenge bakivana muri Repubulika ya Demukarasi ya Kongo.”

Kuba Gerald ahakana ko atari azi ko ikamyo itwaye irimo uriya muzingo, CIP Umutesi avuga ko ari amatakirangoyi kuko ngo utapakira ibintu utazi, ugafata urugendo rwa kure utabanje gusuzuma neza.

Abafatiwe Rubavu bo kigingi avuga ko yari afite udupfunyika 15 two kwinywera… utundi ngo twashyizwemo n’abafatiwe i Kigali.

Ubwo abafatiwe i Kigali berekwaga itangazamakuru, n’abafatiwe Rubavu nabo ni uko byari bimeze.

Kigingi yabwiye Polisi ko rwose yamera ko yari afite udupfunyika 15( boulets) zo kwinywera mu rugendo.

Kuba babasanganye udupfunyika 310 ngo byamutunguye.

Avuga ko yari azi neza ko ikamyo yafatiwe i Kigali yari azi neza ko irupakiye kandi akavuga ko abayifatiwemo bagomba kuba aribo bashyize utundi dupfunyika  ‘aho yari yashyize utwo kwinywera.’

Umuvugizi wa Polisi mu Ntara y’i Burengerazuba CIP Emmanuel Kayigi yabwiye Umuseke KO abafatiwe muri Rubavu bafitanye isano, umwe akaba ari mubyara w’undi.

Yasabye abakoresha kutajya baha akazi abakozi bakemangwa kuko ngo kigingi yemereye Polisi ko yari amaze imyaka itanu anywa urumogi.

Ati” Abakoresha rwose bajye bashoshoza bareke guha akazi umuntu babona ko ashobora kuba adakurikiza amategeko.”

Iyi niyo kamyo barusanzemo

Rwari ruhishe muri iki cyuma babikamo ibikoresho bakoresha basana ikamyo bita tool box

Aba ni abafatiwe i Rubavu. Kigingi yabwiye Polisi ko yari yazanye udupfunyika 15 two kwinywera…

CIP Marie Goretti Umutesi avuga ko amakuru y’uko amakuru bayahawe na Polisi ikorera Rubavu nabo barakurikirana bafata abari bazanye urumogi i Kigali

Jean Pierre NIZEYIMANA

UMUSEKE.RW

Gasabo: REG yamutahuyeho kwiba amashanyarazi, bagiye kumufata baramubura

By Ange Eric Hatangimana

Mu igenzura risanzwe rya Sosiyete y’u Rwanda ishinzwe ingufu (REG) ikora ifatanyije n’Inzego z’umutekano kugira ngo ifate abiba amashanyarazi, nibwo umugabo wo muri Gasabo yatahuwe ko ayiba ariko bagiye kumufata arabacika.

Uwafashwe yari yaracomoye intsinga zinjiza amashanyarazi muri mubazi

Igenzura ryabaye ku wa kane tariki 29 Kanama 2019, basanga uwitwa Bamaziki ukorera i Nyacyonga, mu Kagari ka Akamatamu, Umurenge wa Jabana, muri Gasabo akoresha umuriro w’amashanyarazi mu buryo butemewe n’amategeko.

Uyu mgabo akoresha imashini zisya ibinyampeke, ariko intsinga zizihereza umuriro w’amashanyarazi ntizica muri mubazi (cash power), bigatuma amashanyarazi akoresha atayishyura.

REG ikimara kugera aho uyu mugabo akorera, yahise abimenya ko ashakishwa aza gucika Inzego z’umutekano.

Marcel Habimana Umuyobozi w’ishami rya REG muri Jabana, avuga ko kwiba umuriro w’amashanyarazi bikomeje guteza Leta igihombo, ari yo mpamvu REG ifatanyije n’izindi nzego ikomeje ibikorwa byo kubirwanya.

Ati “Kugeza ubu duhomba amafaranga arenga miliyari imwe bitewe n’abiba umuriro w’amashanyarazi n’abawukoresha ku buryo butemewe, ariko natwe ntiducika intege tuzakomeza guhiga abo babikora.”

Avuga ko abaturage bakwiriye kumenya ko kwiba umuriro w’amashyanyarazi ari icyaha gihanwa n’amategeko bityo bakwiriye kubyirinda.

Ubushakashatsi bwakozwe bwerekanye ko kugeza ubu igihombo gituruka mu kwiba umuriro w’amashanyarazi kingana n’amafranga asaga miliyari imwe na miliyoni Magana cyenda (1,900,000,000 Rwf) ku mwaka.

Ufatiwe muri bene ibi bikorwa ahanwa hakurikijwe amategeko

UMUSEKE.RW

Rubavu: Umugabo yishe umugore bahoze babana ngo bapfuye imitungo

By Ange Eric Hatangimana

Mu murenge wa Nyamyumba niho ibi byabereye mu Kagari ka Burushya mu Mudugudu wa Kaberamo ahagana ku isaha ya saa sita kuri uyu wa gatanu.

Umugabo witwa Mahangayiko yishe uwahoze ari umugore we witwa Uzamukunda.

Abasanzwe babazi bavuga ko n’ubundi aba bantu bari bafitanye amakimbirane mu bihe byahise ndetse ubuyobozi bukaba bwari bwarabatandukanyije.

Bavuga ko kuri uyu wa gatanu ahagana saa sita z’amanywa aribwo uyu mugabo yaje asanga umugore bahoze babana mu murima w’ibisheke ahita amutema ijosi ahita apfa.

Abaturanyi babo bavuga ko ibisheke byari iby’uyu mugore wishwe.

Ubuyobozi bwari bwarabagabanyije imirima umwe bamuha uruhande rwe n’undi urwe. Mu gihe ibisheke byari bigiye kwera uyu  mugore bivugwa ko yabigurishije.

Uyu wahoze ari umugabo we abimenye abwira uwabiguze ko namusanga muri uwo murima abisarura azamwica, asaba uyu mugore kumusubiza amafaranga ye.

Nyakwigendera yatemwe aje kureba niba ibisheke byeze ngo abigurishe abandi ni bwo umugabo yamusanze mu murima aramutema amukuraho ijosi.

Umuyobozi w’agateganyo w’Umurenge wa Nyamyumba, yatangarije Umuseke ko aya makuru ari yo.

Avuga ko iyi miiryango bari barayitandukanyije kubera amakimbirane banabagabanya imitungo ku buryo buri umwe yari afite ibye ariko ngo batunguwe no kumva umugabo yishe umugore.

Muri uyu Murenge bari muri gahunda y’amahugurwa ku miryango ifitanye amakimbirane, bamaze guhugura abarenze 170 mu tugari twose.

Umuyobozi asaba abaturage kwirinda amakimbirane kuko ateza ibibazo bitandukanye harimo imfu za hato na hato ndetse no gufungwa.

Uyu mugabo ubu afungiye kuri sitasiyo ya Police ya Gisenyi mu gihe umurambo w’uriya mugore wajyanywe ku Bitaro bya Gisenyi kugira ngo ukorerwe isuzuma.

UMUSEKE.RW/Rubavu

Urwandiko rwa KITUTU Kassim rusaba guhinduza izina

By Martin NIYONKURU

INGINGO Z’INGENZI Z’URWANDIKO  RWA KITUTU KASSIM RUSABAGUHINDURA IZINA

Uwitwa KITUTU KASSIM,  mwene HASSAN ALLY  na UWABANDI ZUBEDA, utuye mu Bubiligi, rue du fond jacques11,610 couillet Belgique,

Yasabye uburenganzira bwo guhinduza izina  KITUTU amazina MUVUNYI CYUSA ku mazina asanganywe KITUTU kassim akitwa MUVUNYI CYUSA Kassim mu Irangamimerere.

Impamvu atanga ni uko izina MUVUNYI ari izina rya mukuruwe ashaka kwitwa naho izina  CYUSA rikaba ari izina rye ryo mu bwana  ariko rikaba ritanditse mu gitabo cy’irangamimerere. Ikindi ni uko amazina MUVUNYI CYUSA Kassim ari amazina akoresha mu gihugu cy’Ububiligi.

Akaba asaba kwemererwa, inyuze munzira zemewe n’amategeko, gusimbuza izina KITUTU amazina MUVUNYI  CYUSA ku mazina asanganywe KITUTU Kassim bityo akitwa MUVUNYI CYUSA Kassim mu gitabo cy’irangamimere kirimo inyandiko ye   y’ivuka.

*******

Kamonyi: Imiryango 1900 ituye mu nzu zimeze nka Nyakatsi indi 300 irasembera

By Ange Eric Hatangimana

Mu nama Mpuzabikorwa y’Akarere yateranye kuri uyu wa gatanu taliki ya 30 Kanama 2019, Mayor Kayitesi Alice yavuze ko bagiye kubakira inzu imiryango 301 kuko badafite aho ikinga umusaya.

Mayor Kayitesi Alice avuga ko imiryango 1900 ituye mu nzu zimeze nka Nyakatsi, irenga 300 ikaba isembera

Umuyobozi w’Akarere ka Kamonyi yabwiye Inzego z’Ibanze bakorana ko ibibazo by’adafite amacumbi n’abatuye mu nzu zimeze nka nyakatsi ari byo bigomba kubaraza inshinga mu kubishakira ibisubizo.

Avuga ko muri uyu mwaka w’ingengo y’Imali 2018-2019 bubakiye abarenga 100 kandi bivuye mu bushobozi bw’Akarere.

Ati: “Nifuza ko iki kibazo cyo kubakira abatishoboye kitazarenza ukwezi kwa Werurwe 2020.”

Gusa avuga ko abatuye mu nzu zimeze nka Nyakatsi bazagenda basanirwa bitewe n’amikoro Akarere kazishakamo, ikibazo kihutirwa cyane ngo ni icy’abaturage badafite aho kuba.

Guverineri w’Intara y’Amajyepfo, CG Gasana Emmanuel ari na we ushinzwe kuyobora Mpuzabikorwa z’Uturere,  yahagurukije abagize Nyobozi y’Akarere, Abanyamabanga Nshingwabikorwa b’Imirenge, n’Abakuru b’Imidugudu kugira ngo bashyire mu ndahiro kurangiza iyi mihigo.

Avuga ko usibye kubakira abadafite aho kuba, bagomba kongeramo gahunda yo gushishikariza abaturage kwishyura umusanzu w’ubwisungane mu kwivuza, no kububakira Ubwiherero bwujuje ibisabwa.

Muri iyi nama Mpuzabikorwa hanavuzwe ikibazo cy’abaturage barenga 1000 bararana n’amatungo, ndetse n’abana 351 bafite imirire mibi.

Abaturage 301 badafite amacumbi basembereye mu baturanyi, abandi bahawe amacumbi y’agateganyo na Leta.

Umwaka ushize Abanyamabanga Nshingwabikorwa b’Imirenge bari bahize kubakira Ubwiherero abatari babufite, aba babwiye Umuseke ko ku bufatanye bw’Inzego bimwe muri ibi  bibazo bizarangirana n’impera z’Umwaka wa 2019.

Guverineri Gasana Emmanuel yasabye Inzego z’Ibanze kurangiza ibibazo byugarije abaturage.

Bamwe mu bakozi b’Akarere ka Kamonyi

MUHIZI ELISEE
UMUSEKE.RW/Kamonyi.

USA yatangije ishami ry’ingabo zayo ‘zirwanira mu isanzure’

By Jean Pierre Nizeyimana

Kuri uyu wa Gatanu Perezida wa USA Donald Trump yatangije ishami ry’ingabo ze zishinzwe kurinda inyungu za USA ziri mu isanzure( space). 

Iki ni ikirango cy’uriya mutwe w’ingabo za USA zirwanira mu isanzure

Iri shami ryiswe US Space Command rikaba ryahawe kuyoborwa na NASA kandi rihabwa inshingano zo gukumira igihugu icyo aricyo cyose kandi binyuze mu buryo bwose bwemewe n’Inteko ishinga amategek ya USA kugira ngo kidahungabanya inyungu za USA haba kuri Mars, ku kwezi, n’ahandi mu isanzure.

Mu ijambo rye Perezida Trump yagize ati: “ Iri shami ry’ingabo zacu zizakumira uwahungabanya inyungu zacu mu isanzure. Mu isanzure niho urugamba rwo mu myaka iri imbere ruzajya rwambikanira.”

Ikindi kandi ngo ingabo zigize uyu mutwe zizajya zirinda za satellites za USA ziri mu kirere, zikumire ko hari ibisasu bya misiles byaziraswaho biturutse ku bihugu by’abanzi.

Trump avuga ko USA igiye mu kirere bitari nka bya bindi bya Neil Armstrong byo gukandagira ku kwezi ukahashinga idarapo gusa ahubwo ngo igiyeyo kugira ngo iharambe, ihigarurire, amahanga yose abimenye.

Uyu mutwe ni uwa gatandatu w’ingabo za USA ziyoborerwa muri Minisitiri yazo yitwa Pentagon.

N’ubwo Trump yatangije uyu mutwe ariko hari abavuga ko utazatorwa mu Nteko kuko hari abadepite baba aba ‘democrats’ cyangwa aba ‘republicans’ bawukemanze.

Mu muhango wo gutangiza ku mugaragaro uyu mutwe w’ingabo za USA

Hari indege zihariye zakorewe kuzakora akazi mu isanzure

CNN

Jean Pierre NIZEYIMANA

UMUSEKE.RW

Kimwe mu byo ab’i Kigali bakwigira ku batuye Bucharest ni ukwibwiriza gusora

By Jean Pierre Nizeyimana

Umwe mu Banyarwanda baba mu murwa mukuru wa Romania ari wo Bucharest witwa Callixte Nduwayo yabwiye Umuseke ko mu gihe kirenze umwaka amaze yiga muri  University of Bucharest yasanze muri byinshi abanya Kigali bakwigira ku batuye Bucharest ari ukwibwiriza gutanga umusoro.

Palatul Parlamentului, Inteko ishinga amategeko ya Romania,

Uyu munyeshuri witwa business administration avuga ko gutanga umusoro muri Bucharest byabaye umuco k’uburyo n’abacuruzi b’ingeri zose baba bazi ko bagomba gutanga EBM, niyo waba uguze bonbon, umuneke, cyangwa ikaramu.

Kuri we ngo abatuye muri Bucharest ntibirirwa bibutswa gutanga umusoro kandi ngo ibi bituma abaturage badafungirwa business cyangwa ngo bacibwe amande y’ubukererwe.

Ati: “ Iyo urebye uburyo basobanukiwe ko gusora ari inshingano zabo usanga byarushaho gufasha Abanyarwanda muri rusange n’abatuye Kigali by’umwihariko kubaka u Rwanda binyuze mu gutanga umusoro neza kandi ku gihe.”

Ikindi avuga ko abatuye Kigali bakwiye kwigira ku batuye Bucharest ni ugukora ibintu vuba na bwangu.

Muri uriya mujyi ngo ibintu byose birihuta.

Ati: “ Twebwe hano ntabwo bus itegereza umugenzi. Niba isaha yayo yo guhaguruka ari iyi n’iyi ubwo ni iyo nyine. Iyo utinze usanga yagiye. Buri munota uba ufite icyo ugomba gukorerwaho kandi byabaye umuco.”

Muri kiriya gihugu muri rusange no muri iriya murwa mukuru ngo abaturage bazi neza amategeko kandi ntibayaca ku ruhande ngo bakore bakorera ijisho.

N’ubwo yemera ko n’i Kigali hari umutekano ariko ngo uwi Bucharest uri hejuru cyane kuko nta mugore ushobora kugira impungenge izo arizo zose zo kwamburwa isakoshi, telephone cyangwa ikindi cy’agaciro aho yaba ari hose.

Ngo niyo umuntu agize ikintu ata, barakimutorera bakamuhamagara bakakimusubiza.

Nduwayo avuga ko yasanze abatuye Bucharest baramenye kera ko kudata isashe cyangwa ikindi kintu aho umuntu abonye ari ingenzi ku bidukikije.

N’ubwo amasashe yemewe muri kiriya gihugu ndetse hakaba hari na za restaurants ku mihanda, ngo abaturage bazi neza ko nta nyungu yo guta ibyo baririyemo, banywereyemo cyangwa bakoresheje mu bundi buryo aho babonye hose.

Buri wese akora k’uburyo ibyo yakoresheje abijugunya ahabugenewe.

Muri Bucharest hari akarusho ku byerekeye gutwara abantu n’ibintu. Umuntu ashobora gufata ‘abonnement’ ku ma bus maremare kandi yihuta cyane aca mu nsi y’ubutaka bita subways cyangwa metro akayikoresha mu gihe cy’ukwezi.

Guca munsi y’ubutaka bituma abantu bihuta bityo bigatuma badakererwa kubera umubyigano w’imodoka nyinshi ziba muri uriya mujyi.

Bucharest ni umwe mu mijyi ibamo imodoka nyinshi mu Burayi.

Callixte Nduwayo usanzwe ari umunyamakuru w’Umuseke ariko wiga muri Kaminuza ya Bucharest avuga ko aho yiga yahasanze abandi Banyarwanda barindwi.

Ati: “ Wagira ngo Abanyarwanda ntaho bataba ku isi! Naje inaha mfite impungenge z’uko nzasanga arinjye Munyarwanda njyenyine ariko nishimiye kuhasanga benewacu, bamenyereza ubuzima bushya bw’inaha.”

Callixte Nduwayo, umunyamakuru w’Umuseke wiga muri imwe muri Kaminuza ziri Bucharest

University of Bucharest aho Callixte Nduwayo yiga ibijyanye na business

Bucharest: Umurwa ufite inyubako zerekana amateka y’imyubakire y’u Burayi hafi ya bwose…

Bucharest yubatswe mu Majyepfo ya Romania.  Ibarura ry’abaturage ryabaye muri 2011 ryavugaga ko uriya murwa wari utuwe n’abaturage 1. 883.425.

Ufite imirwa iwunganira( satellite cities) 19, buri murwa ugaturwa n’abaturage batari munsi y’ibihumbi 100.

Romania kandi ifite indi mijyi mito igera ku 178 buri mujyi ikaba utuwemo n’abaturage batari munsi y’ibihumbi 10.

Inyubako ziri muri Bucharest zerekana ubuhanga bw’abubatsi b’Abaromani n’abandi bo mu gihe abanyamateka bita Igihe Rwagati(Middle Ages).

Inteko ishinga amategeko ya Romania iri Bucharest niyo ya mbere ku isi nini haba mu bujyejuru, no mu buso bwayo. Ifite ibyumba 1 100 binini cyane.

Nubwo hari inyandiko zivuga ko Bucharest ishobora kuba yaratangiye kuba ahantu hashishikaje mu gihe cya kera bita antiquity, mu by’ukuri ngo yatangiye kuba umurwa mukuru wa Romania mu kinyejana cya 15 nyuma ya Yesu Kristu, ni ukuvuga mu mwaka wa 1459.

Iyi ni inyubako y’imwe muri banki zokomeye ziri Bucharest

Mu nteko ishinga amategeko ya Romania aho Abadepite baganirira ku mategeko agenga iki gihugu

Ngiyo inteko ya Romania uyirebeye mu ndege

Jean Pierre NIZEYIMANA

UMUSEKE.RW

U Bufaransa: P.Kagame arageza ijambo ku bitabiriye inama ya G7

By Jean Pierre Nizeyimana

Perezida wa Repubulika y’u Rwanda Paul Kagame yageze ahitwa Biarritz mu Bufaransa kugira ngo yitabire inama iri butangire nyuma ya saa sita kuri iki Cyumweru taliki 25, Kanama, 2019. Ari buze kubagezaho ijambo mu masaha ya nyuma ya saa sita.

Perezida Kagame ubwo yari ageze Biarritz ahari bubere inama ya G7

Ni inama ihuza ibihugu birindwi bikize ku isi ariko yatumiwemo n’ibindi bihugu biri mu nzira igana amajyambere byo muri Africa no muri Aziya.

Bitaganyijwe ko Perezida Kagame ari buvugire ijambo muri iriya nama, nyuma akaza kugirana ibiganiro byihariye na bamwe mu bakuru b’ibihugu bayitabiriye.

Bimwe mu bihugu byatumiwe muri iriya nama ni Misiri, Ubuhinde, Africa y’epfo, Senegal Chile, Australia, Burkina Faso n’u Rwanda.

Iyi  nama kandi yitabiriwe n’abafata ibyemezo muri ngeri zitandukanye, abahanga muri za Kaminuza n’abanyamakuru bagera ku bihumbi bitatu baturutse hirya no hino ku isi.

Biarritz ni umujyi wo mu Bufaransa uri mu Majyepfo ashyira uburengerazuba bw’Ubufaransa.

Uherereye ahantu hitaruye kandi hahora amahumbezi kandi haturiye agace kitwa Basque.

G7 cyangwa itsinda rya barindwi( Group of Seven) igizwe n’ibihugu birindwi aribyo Canada, Ubufaransa, Ubudage, Ubutaliyani, Ubuyapani, Ubwongereza na Leta zunze ubumwe z’Amerika.

Nyuma yo kwitabira iyi nama ku munsi wayo wa mbere, Perezida Kagame aragirana ibiganiro mu mwiherero na Perezida w’Ubufaransa Emmanuel Macron, Minisitiri w’Intebe wa Australia Scott John Morrison, Minisitiri w’Intebe wa Canada Justin Trudeau na Perezida wa Banki y’Isi David R. Malpass.

Mu itsinda riyobowe na Perezida Kagame harimo Umunyamabanga wa Leta muri Minisiteri y’ububanyi n’amahanga Amb Olivier Nduhungirehe, Minisitiri ushinzwe kwita ku bidukikije Dr Vincent Biruta n’abandi.

Imodoka Umukuru w’igihugu cy’u Rwanda yajemo ubwo yageraga i Biarritz

Abakuru b’ibihugu bigize G7 baganira. Bicaranye na Donald Tusk uyobora Umuryango w’ubumwe bw’u Burayi

Jean Pierre NIZEYIMANA

UMUSEKE.RW

Rayon Sports yakiriwe neza muri Sudan itegereje ikizava mu mukino w’ejo

By Ange Eric Hatangimana

Nyuma y’urugendo rw’amasaha agera kuri 11 Rayon Sports yakoze yerekeza i Kartum muri Sudan, iyi kipe yagzeyo ndetse yakiriwe neza itegereje kumenya ikozava mu mukino w’ejo izakinamo na Al Hilal, i Kigali bari banganyije 1-1.

Kayiranga Jean Baptiste abereka uko bagorora imitsi

Al Hilal na Rayon Sports zizakina saa moya n’igice (19h30) ku isaha yo muri Sudan n’i KIgali.

Umuvugizi wa Rayon Sports wajyanye na yo, Jean Paul NKURUNZIZA yabwiye Umuseke ko bagiye mu byiciro bitatu kandi bose bagezeyo amahoro.

Ati “Twagezeyo neza tunakirwa neza ku kibuga k’indege n’uhagarariye inyungu z’u Rwanda muri Sudan, Maj Shyaka Ismael Kajugiro.”

Ku kibuga k’indege bakiriwe kandi n’abayoboye umupira w’amaguru muri Sudan ndetse n’abayobozi ba Al Hilal.

Ku mugoroba wo ku wa gatanu Rayon Sports yakoze imyitozo kandi yagenze neza nk’uko Nkurunziza abivuga, gusa ngo Rugwiro Herve na Michel Sarpong ntibayikoze kubera umunaniro.

Ati “Bakoze imyitozo igenda neza, yari yiganjemo kuruhura ubwonko no gutekereza cyane ku mukino ubazanye muri iki gihugu no kunanura imitsi.”

Maj. Shyaka Ismael Kajugiro yaganiriye n’abakinnyi ababwira ko muri Sudan nta kibazo cy’umutekano gihari. Yababwiye ko u Rwanda hariya baruzi neza kubera ko ingabo zarwo zagiye kugarurayo amahoro mu bice binyuranye by’igihugu.

Yabasabye kwitwara neza mu mukino bagahesha ishema u Rwanda.

Rayon Sports irakora imyitozo ku masaha izakiniraho (saa 19h30), bikaba biyisaba gukoresha iminota hagati ya 20 na 30 baturutse aho bacumbitse.

Al Hilal Stadium ni cyo kibuga bazakiniraho cyakira abantu ibihumbi 25 . Al Hilal niyo ifite abafana benshi muri Sudan.

Umuvugizi wa Rayon Sports Jean Paul NKURUNZIZA yavuze ko nta bafana ba Al Hilal baje kubakomera ku kibuga k’indege babatera ubwoba.

Kayiranga Jean Baptiste uzatoza uzatoza uyu mukino Hagati Michel Sarpong uwamvaye ingofero ni Rugwiro Herve bari kukibuga mpuzamahanga cy’indege i Kartum

Abayobozi ba Al Hilal baje kwakira Abayobozi ba Rayon Sports

Mazimpaka Andre, hagati Kirasa Alain na Jules Ulimwengu ku ruhande bari kumwe n’umwe mu bayobozi ba Al Hilal

[email protected] Rayon Sports

Jean Paul NKUNDINEZA
UMUSEKE.RW

Ngoma: Batatu bafunzwe bazira kwiyitirira REG bakiba abaturage

By Ange Eric Hatangimana

Mu Karere ka Ngoma haravugwa abagabo batatu bari mu maboko y’Ubugenzacyaha kuri Station ya Kibungo bakurikiranyweho kwiba intsinga z’amashanyarazi, bafashwe biyitirira kuba abakozi b’Ikigo gikwirakwiza umuriro w’amashanyarazi mu Rwanda (REG).

Safari na Habamungu bafashwe baka amafaranga abaturage ngo bazabahe amashanyarazi

Ubuyobozi bwa REG mu Karere ka Ngoma bwaduhaye aya makuru burasaba abaturage gukomeza gutanga amakuru mu gihe babonye abiyitirira ko ari Abakozi b’iki kigo.

Abatawe muri yombi byabaye mu bihe bitandukanye, uwa mbere yitwa Majyambere wo mu Mudugudu wa Rango, Akagali ka Karama Umurenge wa Kazo.

Uyu yafashwe tariki 11 Kanama 2019 ashinjwa kwiba itsinga z’amashanyarazi azivana ku nzu z’abaturage yiyitirira ko ari umukozi wa REG.

Abandi ni uwitwa Safari na Habamungu Gilbert bo mu Murenge wa Murama, Akagali ka Sakara batawe muri yombi tariki 20 Kanama 2019 nkuko tubikesha ubuyobozi bwa REG mu Karere ka Ngoma. Aba bo ngo bafashwe baka amafaranga abaturage ngo bazabahe amashanyarazi.

Bose bari mu maboko y’ubugenacyaha RIB, kuri station ya Kibungo.

Tuganira n’Umuyobozi wa REG ishami rya Ngoma, Niyonkuru Benoit yatubwiye ko ibibazo nk’ibi bamaze iminsi bahura na byo agasaba abaturage kugira uruhare mu gucunga umutekano w’ibikorwa remezo nk’ibi.

Ati “Buri muturage, buri mufatabuguzi wacu icyo tumukangurira ni ukuduha amakuru aho abonye hose hari abantu bakora ibinyuranyije n’amategeko ku bijyanye n’amashanyarazi akaba yaduhamagara tukamufasha.”

Twagerageje kuvugana n’ubuyobozi bw’ikigo cy’igihugu cy’ubugenzacyaha mu Rwanda RIB ntibyadukundira.

Ibibazo by’ubujura bw’ibikoresho bya REG by’umwihariko itsinga z’amashanyarazi ni ubwa gatatu bibaye kuva uyu mwaka watangira muri Ngoma.

Mu minsi ishize n’ubundi byagaragaye mu Murenge wa Kazo na Rurenge, naho ikibazo cyo kwaka amafaranga abaturage biyitirira ko ari abakozi ba REG byo bibaye rimwe kuva umwaka watangira.

Majyambere yafatiwe mu cyuho yiba intsinga z’amashanyarazi

Niyonkuru Benoit Umuyobozi wa REG mu Karere ka Ngoma asaba abaturage guha amakuru inzego kugira ngo zibafashe

Elia BYUKUSENGE
UMUSEKE.RW/Ngoma

NYABIHU: Abaturage bishimiye ko ubuhinzi bw’icyayi bwabahinduye ubuzima bwabo

By Ange Eric Hatangimana

Ubwo uruganda  rw’icyayi rwa Nyabihu (Nyabihu Tea Factory) rwari mu gikorwa ngaruka mwaka cyo kwishimira umusaruro no kuganura ibyo bejeje, abahinzi b’icyayi n’abakozi badutangarije ko bishimiye ko icyayi ari inka idateka kuri bo, ngo cyabateje imbere. Bamwe bahawe inka borora, abandi bahabwa ibihembo binyuranye.

Abahawe inka bavuze ko bagiye gutera imbere

Kankundiye Elizabeth umwe mu borojwe inka akaba ahinga icyayi, avuga ko uruganda rw’Icyayi rwa Nyabihu, ruri mu batumye bahugukira guhinga icyayi ndetse bakagikundisha abana babo.

Ati: “Icyayi iyo umuze kugihinga uba uteye amafaranga. Ninjiye mu buhinzi bw’icyeyi mu 2007, ntangirira ku guhinga ubuso bungana na Are 30, ubu ngeze kuri hegitari 2.”

Avuga ko mu musaruro abona mu cyayi ariho akura ibyo akenera mu rugo.

Yagize ati “Ndishimye ko mpawe inka, izamfasha kubona ifumbire, abana bange barakomeza kumererwa neza mu mirire, ndashishikariza abato gushora imari mu buhinzi bw’icyayi.”

Ndagijimana Augustin ni umwe mu bahawe igare kubera ko ari umusoromyi (Usarura icyayi) w’indashyikirwa.

We ngo yishimira kuba uruganda rumutangira ubwishingizi mu kwivuza, rukamuha inguzanyo none ngo akaba yahembwe igare nubwo imibyizi ye yayihembwaga.

Ati: “Bampembye igare kubera ko nzinduka kare njya gusoroma icyeyi, kandi nkaba ndi umwe mu bagira ibiro byinshi ku kwezi. Nishimiye iri gare mpawe n’uruganfda rigiye kumfansha kujya nizindura nduhuke n’urugendo.”

Daniel Ufitikirezi ari mu Nama y’Ubutegetsu ya Rwanda Mountain Tea, avuga ko intego bafite ari ukuzamura ubukungu n’imibereho myiza y’abaturage.

Ati “Uruganda ntabwo rwabaho umuhinzi atariho, twifuza ko ubuzima bw’umuhinzi w’icyayi n’umukozi ugikorera akagitunganya kugeza kiba icyo kunyobwa agira ubuzima bwiza, turabiharabiharanira mu kumugezaho ibikorwa byose bituma agira ubuzima bwiza, tumugezaho ibikorwa remezo nk’amazi n’ibindi byatuma atera imbere.”

Yasabye abahinzi kwita ku cyayi muri gahunda yo kongera ubwiza n’ubwinshi bw’umusaruro kugira icyayi cy’u Rwanda gikomeze kuba mu myanya ya mbere ku masoko mpuzamahanga.

Umuyobozi Mukuru w’Uruganda, Alain KABEJA ari Kitabi muri Nyamagabe ahandi habereye nk’ibi bikorwa yavuze ko igiciro cy’amababi y’icyayi kirushaho kuba cyiza n’umuhinzi akagenda abona umusaruro acyura mu muryango we.

Mu mwaka w’ubucuruzi wa 2018 koperative, COTRAGAGI yo mu Rubaya, COOPTHEGA yo muri Nyabihu na KOBACYAMU ya Kitabi hiyongereyeho iya RUTEGROC yo mu Rutsiro n’iya COTHEGA yo mu Gatare zishyuwe zose hamwe ku mababi y’icyayi zagemuye, miliyari eshatu na miliyoni magana ane na mirongo itatu n’eshanu (3.435.000.000 Frw).

Mu bihembwe bibiri bibanza bya 2019 zimaze kwishyurwa amafranga y’u Rwanda angana na miliyoni magana inani na mirongo inani (880.000.000 Frw).

Avuga ko ifumbire yatanzwe nk’inguzanyo itabariwe inyungu y’igihe kirekire kuri za Koperative zitandukanye, mu mwaka w’Ubuhinzi wa 2018 hatanzwe toni igihumbi na magana atatu na makumyabiri (1320 tonnes) n’aho mu mwaka wa 2019 hatangwe toni igihumbi na magana abiri (1200 tonnes).

Mu kwishimira ibyo byagezweho hari n’abahawe n’amatungo magufi nk’ihene.

Abahembwe amagare bavuze babyishimiye

Prince Victory BAHIZI

UMUSEKE.RW/Nyabihu

Abatega RITCO ku muhanda Gicumbi-Gatsibo-Nyagatare babura imodoka bakarara nzira

By Ange Eric Hatangimana

*Ubuyobozi bw’Akagari bugaragaza ko bwacumbikiye abagenzi nijoro inshuro zirenze 5,
*Mbere abaturage bararaga mu modoka muri gare, umwe ataka ko afashwe ku ngufu birahagarara,
*Ngo ni ikigeragezo kuri bo kubona abagore, abagabo n’abana barara hamwe bataziranye.

Bamwe mu baturage bagenda mu mihanda y’ibitaka bahangayikishijwe no gusubika ingendo bakarara aho batateganyije bitewe no kubura imodoka zihagije zibajyana mu Turere twa Gatsibo na Nyagatare bavuye i Gicumbi, Sosiyete ya RITCO ihakorera ikoresha Busi nini nta zindi modoka zemewe gutwara abagenzi muri iyo mihanda, hari abaturage Umuseke wasanze baraye ku Biro by’Akagari i Gicumbi.

Abaturage babura imodoka bakarara nzira, RITCO ivuga ko byatewe n’uko imodoka ziri muri Controle Technique

Kubona imodoka ya RITCO ngo bisaba guhuza n’isha, usanze yahagurutse ubwo urugendo ararusubika, agashaka icumbi cyangwa agasubira imuhira bitewe n’aho ari.

Abafite imbogamizi ni abaturuka mu Karere ka Burera baca i Gicumbi bagakomeza mu Karere ka Gatsibo, cyangwa bakajya Nyagatare, ngo imodoka ibatwara bisaba gukurikiza amasaha ihagurukiraho, iyo usanze yagiye ubwo igisubizo kiba kurara nzira.

Ngendahimana Anastase twamusanze muri gare ya Gicumbi, avuga ko iyo badacumbikiwe ku Biro by’Akagari byegereye gare, bamwe barara mu tuzu twagenewe kwicarwaho n’abagenzi. Iki kibazo asaba ko cyagashakiwe umuti.

Ati “Abagabo, abagore n’abana barara hamwe bataziranye.”

Nyirahabimana ufite abana bane na we muri iki cyumweru twamusanze araye nzira, avuga ko bibabaje kuko ababyeyi barara ukubiri n’imiryango yabo, bagasasa mu biro by’Akagari umukeka umwe bose bakaryama.

Ati “Usanga nta telefoni bamwe bagira ngo babwire abagabo iyo baraye. Kurarana n’abantu baturutse impande n’impande bataziranye byakurura ibindi bibazo.”

Mbere ngo abagenzi bacumbikirwaga mu modoka ziraye muri gare haza kuvuka ikibazo aho umwe yatabaje ngo bagiye kumufata ku ngufu biba ngombwa ko nta muntu wongera gucumbikirwa mu modoka zagenewe gutwara abagenzi, kuva ubwo usanze imodoka yamusize agomba kwirwariza akajya gushaka iyo acumbika.

Mbere ngo abagenzi bararaga mu modoka umwe ataka ko afashwe ku ngufu bihita bihagarara

 

Benshi mu barara nzira nta bushobozi bwo kwishyura amacumbi bafite

Abakoresha umuhanda Gicumbi banyura Rukomo-Burimbi-Muko-Muhura-Ndatemwa berekeza Kiramuruzi nibo bafite ikibazo, ngo ubusanzwe bagera muri gare ya Gicumbi saa tatu n’igice za mu gitondo (9h00 a.m),  ukerewe arasigaye kuko imodoka ibatwara ni imwe.

Abava i Kiramuruzi bajya Gicumbi bahaguruka saa cyenda (15h00) nk’uko babidutangarije.

Ubuyobozi bwa RITCO buvuga ko muri iyi minsi imodoka ari nke bitewe n’uko bazijyanye muri Controle Technique.

Uhagarariye RITCO avuga ko babivugana n’abaturage igihe imodoka zitari bukore, ndetse ngo amasaha Bisi zigerera muri gare i Gicumbi abaturage barayazi.

RITCO imodoka zayo zitwara abaturage mu mihanda (y’ibitaka) muri kiriya gice cy’Amajyaruguru ku mafaranga make ugereranyije n’ayo izindi zagenewe gutwara abagenzi zibaca. Imbogamizi ni uko abagenzi ari benshi imodoka zo ari nke, kandi abagenzi bakagenda mu masaha anyuranye.

Batamuriza Josiane uhagarariye RITCO i Gicumbi yabwiye Umuseke ko muri iyi minsi imodoka bafite iri muri Controle Technique, bityo ko abaraye mu nzira ari abatamenye amakuru, gusa ngo ntibyari bisanzwe ko abaturage barara nzira.

Twaganiriye na we ku wa 22 Kanama 2019, avuga ko imodoka bakoreshaga zagiye muri Controle technique ngo niyo mpamvu hari abaraye muri nzira.

Ati “Ugeranyije ntabwo zimarayo iminsi, ariko ubundi abaturage bazi amasaha tubatwariraho.”

Avuga ko iyo basanze imodoka nini za RITCO zagiye hari utundi tumodoa tubapakira tukabatwara.

Ubuyobozi bw’Akagari ka Gisuna gaturanye na gare ya Gicumbi mu Murenge wa Byumba bwabwiye Umuseke ko muri uku kwezi kwa Kanama bacumbiye abaturage inshuro zigera muri eshanu.

Tariki  07 Kanama 2019 bacumbikiye abaturage 19 barimo abagore 9 n’abagabo 10, ku wa 11Kanama 2019 bacumbikiye abantu 12 barimo abagore 9 n’abagabo 3, ku wa  17  Kanama 2019  nabwo bacumbikira abantu 8, ku wa 20 Kanama 2019  bacumbikiye abantu 8 barimo abagore bane n’abana bane,  ndetse no ku wa 21 mu Biro by’Akagari haraye 12 barimo abagore batandatu, abagabo babiri n’abana bane.

Iki kibazo ubuyoboi bw’Akagari buvuga ko nta bushobozi bufite bwo kuraza abagabo n’abagore mu nzu imwe mu cyumba k’inama. Bamwe basasirwa hasi abandi bakarara bicaye mu rwego rwo gukumira ibibazo byahavuka.

Ubuyobozi busaba ko muri gare ya Gicumbi hateganywa uburyo bwo gucumbikira abagenzi mu gihe havutse ikibazo gitunguranye, bakabona aho barara kuko gare yo igira n’abashinwe umutekano.

Umuyobozi w’Akarere ka Gicumbi wungirije ushinzwe ubukungu Nteziryayo Anastase yabwiye Umuseke ko ikibazo batari bakizi, gusa ko ngo bagiye gukorana n’inzego zishinzwe gutwara abagenzi ikibazo k’imodoka nke gishakirwe umuti.

Ati “Abaturage bagomba gucumbikirana nk’uko mu muco nyarwannda byahozeho.”

Ibiro by’Akagari bibacumbikira bivuga ko nta bushobozi bubifitiye, ndetse nta kindi bufasha abo baturage uretse kubaha sima baryamaho

EVENCE NGIRABATWARE
UMUSEKE.RW/GICUMBI

Nyamasheke: Ikamyo yo mu Burundi yakoze impanuka umwe acika akaguru

By Jean Pierre Nizeyimana

Ahagana saa kumi  z’umugoroba kuri uyu wa Gatanu taliki 23, Kanama, 2019 ikamyo ifite plaque BUJ 3129 A yakoze impanuka igeze mu Murenge wa Bushekeri mu Karere ka Nyamasheke, umwe akomereka cyane mu mutwe, undi acika akaguru.

Iyi kamyo ngo yaciye akaguru umwe mu Barundi bari bayirimo undi akomereka mu mutwe bikomeye

Iyi modoka yari itwawe na Roland Rugira w’imyaka 31 na Felicien Ndayikengurukiye (bombi ni Abarundi).

Impanuka yabereye mu Mudugudu wa Gisakura, Akagakri Buvungira, Umurenge wa Bushekeri mu Karere Nyamasheke.

Rugira w’imyaka 31 yakomeretse ahandi ku mubiri harimo ku maguru no mu mugongo, ariko cyane cyane ku mutwe.

Ndayikengurukiye we yacikiye akaguru k’ibumuso, gacikira munsi y’ivi.

Undi bari bari kumwe witwa Damascene Nzabimana w’imyaka 25 na we ukomoka mu Burundi nta kintu yabaye.

Ubwo iriya kamyo yagwaga hari abandi baturage yakomerekeje bari ku muhanda barimo uwitwa Celestin Nsabimana w’imyaka 45, Emmanuel Sebagenzi w’imyaka 27 na Steven Mafene w’imyaka 32.

Polisi n’ingabo bahise batabara.

Jean Pierre NIZEYIMANA
UMUSEKE.RW

Nel Ngabo uherutse gusohora iyitwa ‘Nzahinduka’ ubu aje agira ati ‘Byakoroha’

By Martin NIYONKURU

Umuhanzi Rwangabo Byusa Nelson ukoresha izina rya Nel Ngabo wari uherutse gushyira hanze indirimbo yise Nzahinduka ubu yasohoye iyo yise ‘Byakoroha’.

Nel Ngabo ni umuhanzi ukizamuka ariko ufite impano

Nel Ngabo w’imyaka 21 ari mu bahanzi bakizamuka ariko bari gukora indirimbo zigakundwa.

Uyu munsi yasohoye indirimbo nshya yitwa ‘Byakoroha’ ije isanga iyitwa ‘Nzahinduka’ aheruka gusohora.

Indirimbo ye nshya ngo ni iy’urukundo aho aba abwira umukunzi we ko kumwanga bitakoroha.

Aririmba agira ati “Byakoroha guhindura inyanja ubutayu, byakoroha kubona ifi iguruka mu kirere, mbere y’uko ngira igitekerezo cyo kukwanga umuriro wabanza ugatoha imvura ikagwa izamuka nkabona gutekereza kukwanga…”

Nel Ngabo watangiye gukora umuziki neza ageze muri Kina Music, avuga ko bamuhisemo kuko babonye ashoboye kurusha abandi bahanzi babyifuzaga.

Yatangiye kuririmba muri 2017 akora injyana ya RnB; iyi ndirimbo akoze ni iya gatatu, ije isanga ‘Why’ na ‘Nzahinduka’.

Muri Kina Music ubu ahabana n’abandi bahanzi bafasha barimo Butera Knowless, Igor Mabano, Tom Close na Dream Boys.

Aline RANGIRA MWIHOREZE
UMUSEKE.RW

Huye:Abanyeshuri ba UR batangije uburyo bwihariye bwo gushyira mu Agaciro Dvp Fund

By Jean Pierre Nizeyimana

Kuri uyu wa Gatanu abanyeshuri bo muri Kaminuza y’u Rwanda ishami rya Huye batangije icyo bise University Students Agaciro Fund Contribution. Ngo ni uburyo abanyeshuri ba za Kaminuza za Leta n’izigenga bazakoresha mu gutera inkunga ikigega Agaciro Development Fund.

Ubwo batangizaga ku mugaragaro uburyo abanyeshuri bazajya batangamo inkunga mu Agaciro Development Fund

Umunyeshuri wo muri Kaminuza y’u Rwanda ishami rya Huye uhagarariye ishyirahamwe mpuzaturere tw’abanyeshuri biga muri Kaminuza y’u Rwanda bise DUSAF witwa Welcome Sebanani.

Sebanani yabwiye Umuseke ko igitekerezo cyo gushyiraho buriya buryo bwo gutera inkunga babushyizeho kugira ngo bigane urubyiruko rwifatanyije na FPR Inkotanyi mu rugamba rwo kubohora u Rwanda.

Ati: “ Muri iki gihe nta bundi buryo twasanze twagira uruhare mu kubaka u Rwanda no kwitanga muri uyu mujyo tudashyizeho uburyo bwo gutanga iriya nkunga yacu n’ubwo turi abanyeshuri.”

Gutanga umusanzu binyuze muri iriya gahunda yatangirijwe muri campus ya Huye bizajya bikorwa ku bushake kandi buri wese agatanga uko yifite.

Umusanzu uzakusanywa uzashyirwa mu kigega Agaciro Development Fund. N’ubwo gutangiza iyi gahunda byatangijwe ku mugaragaro kuri uyu wa Gatanu talili 23, Kanama, 2019 ngo abanyeshuri bari baratangiye kuyatanga guhera muri Werurwe, 2019.

Bari bamaze gukusanya Frw1 050 000. Aya yashyikirijwe ubuyobozi bwari buhagarariye abo mu Agaciro Development Fund muri kiriya gikorwa.

Sebanani yabwiye Umuseke ko igikorwa batangije kizakomereza no mu zindi Kaminuza zo mu Rwanda.

Uyu muhango witabiriwe n’abanyeshuri ba Kaminuza y’u Rwanda bari muri  ririya huriro, abayobozi ba Kaminuza y’u Rwanda bo ku rwego rwo hejuru barimo umuyobozi wayo wungirije ushinzwe amasomo Prof Phil Coton, Umuyobozi w’Akarere ka Huye Ange Sebutege n’abandi bakorana n’inzego z’urubyiruko mu ngeri zitandukanye.

Byatangiriye muri Kaminuza y’u Rwanda ishami rya Huye ariko bizakomereza no mu zindi Kaminuza

Prof Phil Coton wari waje ahagarariye ubuyobozi bukuru wa Kaminuza y’u Rwanda

Abanyeshuri bari bitabiriye ari benshi

Ifoto y’urwibutso y’abitabiriye kiriya gikorwa

Sebanani Welcome uhagarariye uriya muryango

Jean Pierre NIZEYIMANA

UMUSEKE.RW

Nyanza: Abarangije muri ILPD basabwe gusobanurira abaturage amategeko

By Ange Eric Hatangimana

Abanyamategeko 336 barangije mu ishuri Rikuru ryigisha rikanateza imbere amategeko (ILPD), basabwe kwegera abaturage no kubasobanurira ibijyanye n’amategeko.

Minisitiri w’Ubutabera akaba n’Intumwa Nkuru ya Leta, Johnston Busingye avuga ko amategeko ku isi ari amwe ahubwo ikinyuranyo kikaba aho ashyirirwa mu bikorwa

Abarangije barimo Abanyarwanda n’abanyamahanga bahawe Impamyabumenyi ijyanye n’amasomo yo gushyira mu bikorwa amategeko (Diploma in Legal Practice).

Minisitiri w’Ubutabera akaba n’Intumwa Nkuru ya Leta, Busingye Johnston wari Umushyitsi Mukuru muri iki gikorwa, avuga ko kwiga amategeko ari kimwe, kuyashyira mu bikorwa na byo bikaba ikindi.

Yavuze ko abarangije muri iri Shuri bakwiye kuyasobanurira abaturage batayazi kugira ngo barusheho kuyamenya no kuyifashisha igihe bibaye ngombwa, kuko igihe bafashe bubaka ubushobozi gihagije.

Yagize ati: “Ubutabera bukora bushingiye ku mategeko, ibimenyetso, n’uko ibyemezo bifatwa bishyirwa mu bikorwa.”

Busingye yavuze ko muri rusange amategeko ku rwego mpuzamahanga ari amwe, gusa avuga ko itandukaniro ririmo ari aho icyaha kiburanishirizwa.

Ati: “Mu Rwanda hari imanza bibasaba ko ziburanishirizwa mu Bunzi, ushobora gusanga ahandi atari uko bimeze yenda abakoze ibyaha nk’ibi babiranishirizwa mu Nkiko zisanzwe.”

Théophile Gauthier Nsegbe Umunyeshuri wo muri Cameroon akaba n’Umwunganizi mu by’amategeko, avuga ko kwiga banashyira mu bikorwa ubumenyingiro byazamuye igipimo cy’Ubumenyi bari basanganywe.

Yagize ati: “Jye umwihariko ni uko nize amategeko mu ndimi ebyeri, mu Rwanda nayize Cyongereza kandi byambereye akarusho kubera ko iwacu nari nsanzwe nkoresha Igifaransa.’

Furufuru Léopold Umunyamategeko wanakoze mu Rukiko Mpuzamahanga rwashyiriweho u Rwanda i Arusha muri Tanzania, avuga ko imyaka 12 yamaze muri uru Rukiko yagarutse mu Rwanda asanga amategeko yarahindutse harimo n’ayakuze.

Ati: “Abaregwa benshi ntabwo bazi amategeko, niyo mpamvu kubunganira ari ngombwa, ibi binafasha Umucamanza uburanisha guca urubanza ashingiye ku byo amategeko ateganya, aya tuba twifashishije arengera uregwa cyangwa urega.”

Umuyobozi Mukuru wa ILPD, Dr Kayihura Muganga Didace avuga ko kuba abanyamahanga benshi baza mu Rwanda kwiga amategeko ari ikimenyetso kerekana ko Igihugu kimaze gutera imbere mu birebana n’amategeko.

Umuyobozi Mukuru muri Komisiyo y’Igihugu y’Uburenganzira bwa Muntu, Mme Nirere Madeleine ari mu bahawe Impamyabumenyi uyu munsi.

Mu banyamahanga barangije harimo Umunyamategeko akaba n’Umuyobozi muri Perezidansi mu Gihugu cya Ghana, uyu akaba yategaga indege buri Cyumweru aza kwiga amategeko mu Rwanda.

Bakoze akarasisi basusurutsa abarangije muri ILPD

Umuyobozi Mukuru wa ILPD, Dr Kayihura Muganga Didace

Byari ibyishimo ku basoje amasomo, barimo n’Umukozi muri Perezidansi ya Ghana

Iyi ni inyubako nshya iri shuri ryujuje ifite agaciro k’asaga miliyari 3Frw

Abasoje amasomo muri ILPD Nyanza mu ifoto y’urwibutso n’abayobozi batandukanye

MUHIZI ELISEE
UMUSEKE.RW/Nyanza.

❌